الجمعة، 9 أبريل 2010

موعد هام

الساعة فى إيدك كام؟.
سؤال يُطرح علينا أو نطرحه على الآخرين فى مختلف الأوقات والمواقف. ومع ذلك تجد لا مبالاة فى إحترام المواعيد.
رغم وجود دراسة تؤكد بأننا أكثر شعب يحرص على شراء الساعات سواء يد أو حائط ومع ذلك فنحن أيضاً أكثر شعب لا يهتم بالمواعيد ولا يحترمها.
أتذكر أثناء المعرض السنوى للأعمال الفنية الذى كان يقام فى الجامعة كانت المشرفة على أعمالى أنا وصديقاتى تخبرنا بالموعد المحدد للإفتتاح والذى على أثره سيحضر رئيس الجامعة ومديرة رعاية الشباب وغيرهم من المسئولين عن الأنشطة الطلابية وحينما نذهب فى الموعد لا نجد أحد سوانا وعمال النظافة وحينما نسألها تقول لنا: ماكنتش اعرف انكم منضبطين فى المواعيد وعشان كده أخرت الميعاد ساعتين.
وعندها حق لأن فيه ناس متعودة تتأخر على مواعيدها ولا تجد فى هذا شئ يدينها.
ولذلك سأعرض بعض الأسئلة والتى من خلال إجابتك عليها بينك وبين نفسك ستحدد هل تحترم المواعيد حقاً أم لا؟.
* كام مرة حددت موعد وتأخرت عنه أكثر من عشرة دقائق؟.
* كام مرة حددت موعد ولم تذهب أصلاً ولم تفكر حتى فى الإعتذار قبلها بوقت كاف؟.
* كام مرة إنتظرت أحداً ولم يأتِ فى موعده معك؟ وماذا كان شعورك وقتها؟.
* كم المدة التى تعطيها لكى تنتظر شخصاً ما؟. بمعنى هتترك مكان الإنتظار بعدها بقد إيه أو إمتى تتصل بيه؟.
* هل تذهب إلى عملك أو دراستك فى الموعد المحدد؟.
* هل حينما تقول مثلاً"سآتى بعد عشرة دقايق" بتبقى قاصد التوقيت ده فعلاً ولا بيبقى معناه كمان ساعتين مثلاً ؟.
* المعروف عنك وسط من يتعاملون معك بأنك منضبط فى المواعيد أم لا؟.
* العادى بتاعك للذهاب لأى موعد قبل ولا بعد ولا فى تمام الساعة المتفق عليها؟.
يا ترى لو عندك إمتحان أو مقابلة مهمة برضه بتتأخر عليها.. أكيد طبعاً لأ.
ليه بقى ماتعتبرش أى موعد تذهب إليه هو موعد هام وإن لم يكن هام بالنسبة لك فسيكون هام بالنسبة للطرف الآخر وإذا لم تجده مهماً لا تحدده من البداية.
*أنت أكيد بتضايق لو كان عندك موعد مهم وصاحب الموعد إتأخر عليك. يبقى ليه ماتحطش نفسك دائماً مكان الشخص المنتظر.
*تذكر كم من المرات التى ممكن أن تعطل فيها أحد بسبب تأخيرك.
*تذكر إستيئاك من زيارة الناس لك بعد الموعد المحدد بساعات. حتى لا تفعل ذلك.
*هل تعلم بأن من ضمن آيات المنافق" إذا وعد أخلف".
*لا تعطى أى موعد طالما لا تريد الالتزام بالإتفاق.
* لا تتحجج أبداً بكلمة "نسيت". فهذا عذر غير مقبول للمنتظر.
إذا كانت هذه مشكلة فعلية تواجهك وتريد إصلاحها. فالموبايل حل مشاكل كتير.
يعنى مثلاً ممكن تعمل لنفسك رسالة تذكير قبل الموعد بفترة كافية عشان ماتنساش وتظبط منبه الموبايل برضه وتبدأ تجهز نفسك قبلها بفترة كافية وتعمل حساب زحمة المواصلات.. وهكذا.
* وتذكر.. أن تذهب مبكراً أفضل من أن تذهب متأخراً.




سؤال جانبى:
ــــــــــــــــــ
* أذكر موقف بايخ أتعرضت له بسبب إهمال المواعيد معك؟.

=====

على الهامش: إهداء إلى كل ظالم وغافل

هناك 33 تعليقًا:

Mahmoud Ahmed يقول...

انا اكثر حاجه بتنرفزي جدا المواعيد
انا بروح قبل معادي بساعهواثنين كمان و بيضايقني قوي قوي الى يتأخر ثانيه بس عن معاده

د/ رامي شهاب الدين يقول...

عدم إحترام المواعيد للأسف ظاهرة مجتمعية خطيرة عواقبها أحيانا بتكون مدمرة

أشكرك على هذا الموضوع الرائع والطرح الممتاز ليه .. بقالى فترة غايب عن التدوين و متابعة المدونات ، لكن أنا قرأت لك آخر موضوعين .. بجد موضوعات مهمة وطرح متميز .. بالتوفيق دايما يارب

دمتى بكل ود .. تحياتى

♥نبع الغرام♥♪≈ يقول...

السلام عليكم
اختى وحبيبتى الغاليه مونى اخبارك ايه يارب تكونى بخير

جميله موضوعاتك حبيبتى
ماشاء الله

انا حصلى موقف كنت بزياره بالقاهره واتصلت على مدون صديق ولما عرف انى بمصر قالى اشوفك بعد ساعه بمحطة مترو دار السلام روحت وانتظرته فضلت اكتر من اربع ساعات منتظراه وكان شكلى بايخ اووى
ولما جه اتخنقت معاه وتركت ومشيت ومن يومها حرمت انى انتظر اى مخلوق هما اللى ينتظرونى
المهم اخبارك ايه وفينك كده ياللى وحشانى
موووووووووووووووووووواه

د/على خميس يقول...

السلام عليكم و رحمة الله و بركاته
و الله فعلا موضوع مهم جدا
أنا كنت طول عمرى بحب الإنضباط فى المواعيد بس الفترة الأخيرة مبقتش كده... المفروض فعلا أحاول أرجع زى زمان
جزاك الله خيرا لهذه التذكرة
بارك الله فيك

المدوناتى يقول...

بعد السلام عليكم

الالتزام بالمواعيد شىء مهم جدا ..بل أنه من أهم الأشياء .حيث يعتبر الملتزم بمواعيدة انسان نادر ..فقد أصبح منقرض..

تحياتى وخالص تقديرى واحترام
فى أنتظار زيارتكم الميمونة لمدونتى المغمورة
الموعد كما تشائين

SHAPE YOUR LIFE (ABOALI) يقول...

عدم احترام المواعيد يدل على اما اللا مبالاه او عدم احترام الشخص لذاته وللاخرين ....واتفق معكى بالفعل فى كل ما ذكرتيه واذا كنت لا تريد ان تذهب للميعاد فلماذا قمت بتحديده من البدايه ....نحتاج بالفعل ان نحترم ذاتنا والاخرين اكثر ونعرف قيمه هذا الوقت الذى هو اعز ما نملك ومع ذلك اكثر شىء لا نبالى به فى حياتنا .

اللهم اهدنا جميعا واجعلنا ممكن يستغلون كل لحظه فى حياتهم لطاعته.

SHAPE YOUR LIFE (ABOALI) يقول...

وصحيح نسيت اذكر ان اهم موعد ولقاء لا نبالى به وهو لقاء خالقنا واليوم الذى سيحاسبنا فيه على كل صغيره وكبيره ....لا نبالى فى الحفاظ على الصلاه فى اوقاتها .....اصبح عدم الالتزام جين وراثى فى الشعب .......حقا لو عرفنا وقدرنا قيمه الوقت سنصبح بالفعل الامه التى ترضى عنا الله ورسوله ..

تحياتى لكى لعرضك لهذا الموضوع القيم.

E73 يقول...

بسم الله الرحمن الرحيم
السلام عليكم ورحمة الله وبركاته

عارفة ومن غير ماجاوب على الأسئلة اني هطلع بغيييييييضة إلى أبعد حد

فأنا وللأسف ممن لا يلتزمون بمواعيدهم

ولست أدري فليس الأمر معي هو النسيان للأسف

وليس في سوء تخطيت للوقت فحتى لو كنت مستعدة قبل المواعد بساعات أجدني لا أصل في الموعد

حتى في الإمتحانات بوصل بعدها بربع ساعة على الأقل وفي الغالب بوصل يادوب على الميعاد

بالنسبة لزياراتي للناس مش بحب ألطع حد ببقى على اتصال دائم به للتأكد هل مازال على استعداد لاستقبالي أم أنه لا يمكنني الحضور بعد أن تأخرت عن الموعد

بالنسبة لقدرتي على انتظار الناس فأنا لا أتخذ موقف من الانتظار إلا بعد مرور ساعة وبعدها أحدد هل أتصل أو أمشي أو أي شيء

لكنني حقًا أرغب بكل كياني في ضبط مواعيدي

ولكنني جربت كل الطرق ولا توجد نتيجة حقًا ولست أدري لماذا

خلاص الناس بقت بتظبط ساعتها عليا باجي دائما بعد الميعاد بربع ساعة

كلمات من نور يقول...

موضوع موجع بجد بالنسبة لي ..علشان أنا عقدتي المواعيد واحترامها ودايما باروح موعدي قبل الموعد علشان تحسبا للظروف و كتير بيحصل إني أنتظر فترة طويلة بسبب التأخر في الموعد ..طيب ليه متكونش زيي و تنزل بدري شويتين؟ ويا سلام بقى لو حصل كده و أنا منتظرة صديقات علشان نفطر سويا ( باكل التمر و أصلي المغرب و أنتظر ):

موناليزا يقول...

سبايدر مان
ـــــــــــ
أهلا بيك يادكتور
ومين سمعك يافندم بس انا بروح فى الميعاد بالظبط أصلى ما بحبش أستنى حد:)
أشكرك جدا لمشاركتك
يسعدنى دوام التواصل



**********************************


د/ رامى شهاب الدين
ـــــــــــــــــــ
أهلا بيك يادكتور
عندك حق أنا عن نفسى قاطعت ناس بسبب عدم احترامهم للمواعيد:)
الشكر لله يافندم وأنا سعيدة جدا برأيك وبتواجدك
يسعدنى دوام التواصل



**********************************


ابتسامة ملاك
ــــــــــــــ
وعليكم السلام ورحمة الله وبركاته
أهلا اهلا بالقمر
أنا الحمدلله بخير ياحبيبتى ماتحرمش من سؤالك

ربنا يعزك يارب فماتوفيقى الا بالله

ياخبر ابيض اربع ساعات يا ايناس!! والله انتِ طيبة :)
تعرفى انا آخرى10 دقايق ده لو فيه معزة يعنى:)
أشكرك جدا لمشاركتك
وأسعدنى تواجدك



**********************************


د/ على خميس
ـــــــــــ
وعليكم السلام ورحمة الله وبركاته
أهلا بيك يادكتور
تسمحلى أسألك إزاى مابقتش كده
أصل انا متهيألى ان الموضوع ده طبع يعنى صعب يتغير
عموما طالما تريد الانضباط فى المواعيد فستعود كسابق عهدك
ربنا يكرمك وأشكرك جدا لمشاركتك
يسعدنى دوام التواصل


**********************************


صباح الخير
ــــــــــ
وعليكم السلام ورحمة الله وبركاته
أهلا وسهلا
عندك حق جدا
انا زرت المدونة بالفعل ولكنى لم استطع ترك تعليق
أشكرك جدا لمشاركتك
يسعدنى دوام التواصل



*********************************


أبو على
ــــــــــ
أهلا بيك يافندم بعد طول غياب
عندك حق فالملتزم ملتزم فى كل شئ ومن ضمنها المواعيد

وعجبنى جدا ذكرك لعدم الحفاظ على الصلاة فى اول الوقت وكمان تحريض الناس على كده يعنى لما تبقى قاعد فى مجموعة والعشاء تأذن وتقترح انهم يقوموا معاك يصلوا تلاقى خمسين رد فى وقت واحدوكلهم معناهم ياسيدى مالليل كله عشا

اللهم ارنا الحق حقاً وارزقنا اتباعه وارنا الباطل باطلا وارزقنا اجتنابه
أشكرك جدا على تعليقاتك المتميزة
ويسعدنى دوام التواصل



***********************************


اى73
ـــــــ
وعليكم السلام ورحمة الله وبركاته
أهلا اهلا بالقمر
أقولك على فكرة كويسة
أخرى الميعاد نص ساعة بما انك بتتأخرى ربع ساعة يعنى لو عندك ميعاد الساعة7 مثلاً ظبطى أمورك واقنعى نفسك ان الميعاد6.30 وبإذن الله توصلى فى الميعاد المحدد:)
أشكرك جدا لمشاركتك
نورتينى ياجميلة واسعنى تواجدك


********************************


كلمات من نور
ــــــــــــــ
أهلا اهلا بالغالية
والله ياقلبى ده نفس السؤال اللى بسأله لما بيكون عندى ميعاد
ليه الناس ماتحترمش مواعيدها وبضايق بجد من الوقت المهدر فى الانتظار وخصوصا لما مايبقاش قدامى غير الانتظار زى مااكون مستنية بدء ندوة وصاحبها يتأخر بالساعات وغيرها من الامثلة

ربنا يسلمك من كل شر
نورتينى غاليتى واسعدنى تواجدك

حمـــــــــــــــــــــة يقول...

السلام عليكم ورحمة الله وبركاته
إيه إحنا موش عرب و إلا إيه......في الحقيقة وجدتها تردد كثيرا بأكثر من لغة أجنبية طبعا "موعد عربي"..... كنت أكتإب حين أسمعها و مع الأسف كل الشواهد ضدي فلاأجد عذرا.........
بدأت بنفسي :
- أبكر: يعني أذهب قبل الموعد تلافيا لكل شيءا ....... وجدت نفسي وحيدا ..حتى أن البعض يهاتفني ليقول لي أرجوك حين يكنمل النصاب كلمني...عندي حالة طارئة...و هلم جرا
- الأدهى و الأمر التأخير ليس ربع ساعة أو نصف...بل أصبح بمعدل ساعة كاملة
و هم لديهم أعذارهم أما أنا مهما حصل لا عذر لي طبعا من وجهة نظرا ناس معينة
و آخر طرفة حصلت لي : تلقيت عتابا شديد اللهجة مفاده ( حضورك الدائم سبب كثيرا من المشاكل ) و البقية معروفة
إذن الأمر تجاوز السلوكيات الى طريقة ممنهجة معتمدة لغايات معروفة
معذرة على الإطالة لقد فكرتني
دون أن أنسى ظاهرة أخرى متفشية : و هي الكذب و الدفع نحوه =====>>>

إمرأه من ثلج يقول...

ازيك ياقمر

انا بردة عندى المشكلة دى والله ببقى عايزة اروح فى معادى
بس اللبس هو الى بياخرنى بجد نفسى اتخلص من المشكلة دى

بجد موضيعك كلها مميزة

tarek alghnam يقول...

الاخت العزيزه امه الله
فى البلاد الغربيه عندما يستهزأ بأحد المواعيد يقولون ميعاد عربى وكأننا بسبب عدم احترامنا لمواعيدنا صبحنا مثل سئ فى العالم كله وتقاس الحضارات بمدى الالتزام بالمواعيد لو حكيتلك عن اشياء حدثت بسبب عدم دقه المواعيد مش حخلص
بس حابب احيكى على موضوعك الرائع وياريت نعرف قيمه الوقت ونلتزم بمواعيدنا
تقبلى تحياتى
واتمنى التواصل
ودمتى بحفظ الله

وحي القلم يقول...

السلام عليكم
الواحد بفضل الله بيحاول على قدر الامكان انه يحافظ ع المواعيد ...
لكن في ظروف احيانا بتمنع
...
موقف حصل لقريب ليا شغال مهندس بترول في شركة أمريكية في مصر
رئيسه بيقولوه على شيء معين ينجزه فرد عليه قال كمان نص ساعة فساله الرئيس نص ساعة نص ساعة ولا نص ساعة مصري ..!!!
يعني مواعيدنا بقت حكاية والله

حصان المرجيحة يقول...

اولا انا عمري ما اتاخرت عشر دقايق
انا بتاخر بالساعات
ههههههههه
اما الموقف : بعد ما اترقيت و بقيت مدير المكتب و المفروض ان وقت الاجتاع يبقي مظبوط و محدش يتاخر
قمت الصبح حاولت اخد دش سريع و فجأة المياه اتقطعت
و اتاخرت علي الشغل
و اتهريت تريقة
هههههههههههه
بالحق
انا اسف اني ماعنتش بدخ كتير بس والله مشغووووول
جداااااااااااا

MOHAMMED ELBANNA يقول...

أمه الله
جزيتي خيراً على موضوعك الطيب ، وفعلاً الوقت من ذهب وهو اغلى شيئ في حياه الانسان ولكن للأسف الكثيرين يفرطون فيه .
محمد البنا
طريق النجاح

*الطالبة عفو الله *زوزو يقول...

موضوع جميل عزيزتي و لازم كلنا نعيد النظر فيه

انا عن نفسي الحمد لله المعروف عندي التزامي بالمواعيد

و اكثر حاجة بتعصبني هو عدم التزام الاخر بمواعيده معي

و غالبا ما بتخانق مع الناس بسبب عدم التزامه بالموعد

واحيانا كثيرة بيكون عندي موعد مع شخص المعروف عنه تاخره في المواعيد ديما و برضو مش بقدر اننا اتاخر

الله المستعان

ربنا يهدينا

تحياتي

موناليزا يقول...

هاما
ـــــــ
وعليكم السلام ورحمة الله وبركاته
أهلا بيك يافندم
عندك حق انطباع الاخرين عن مجتمعنا يسئ للجميع
حقا اننا فى اخر الزمان اصبح المنضبط فى مواعيده يلام ويعاقب بالاهمال واللى بييجى متأخر عادى جدا ولا كأن حاجة حصلت
عموما فطوبى للغرباء
أشكرك جدا لمشاركتك
يسعدنى دوام التواصل



***********************************


امرأة من ثلج
ـــــــــــــ
أهلا اهلا بالقمر
انا الحمدلله بخير ماتحرمش من سؤالك
:) ابدأى فى اللبس بدرى شوية وابقى محددة انتِ هتلبسى ايه قبلها بفترة كافية ولو فيه حاجة محتاجة للمكواة مثلا يبقى لازم تجهزيها من بدرى وبإذن الله توصلى فى الميعاد مظبوط:)
نورتينى ياجميلة واسعدنى تواجدك



*********************************


طارق الغنام
ـــــــــــــ
أهلا بيك أستاذ طارق بعد طول غياب
فعلا من المؤسف انطباعات المجتمعات الاخرى عننا وكما يقال السيئة بتعم
أشكرك جدا لرايك ولنعليقك
يسعدنى دوام التواصل



**********************************


مصعب صلاح
ـــــــــــ
وعليكم السلام ورحمة الله وبركاته
أهلا بيك أستاذ مصعب
انا معاك ان فيه ظروف احيانا بتكون خارجة عن الارادة لكن فيه ناس اهمال المواعيد ده طبع عندهم
وفعلا انطباعات الاخرين عننا مش ظريفة خالص
أشكرك جدا لمشاركتك يسعدنى دوام التواصل



********************************


حصان المرجيحة
ــــــــــــ
أهلا بيك بافندم
:) ياخبر بالساعات.. ليه طيب؟
بقيت مدير يعنى خلاص بقيت قدوة.. خد بالك بقى:)
عذرك معاك يافندم مكانك محفوظ فى اى وقت
أشكرك جدا لمشاركتك
يسعدنى دوام التواصل



*********************************


محمد البنا
ــــــــــ
أهلا بيك أستاذ محمد
ربنا يكرمك ومعاك حق جدا
أشكرك جدا لتعليقك ويسعدنى دوام التواصل



*********************************


الطالبة عفو الله
ــــــــــــــــــ
أهلا اهلا بالقمر
تعرفى انا كده برضه مهما احاول أأخر نفسى لما اكون عارفة ان ميعادى مع حد دايما بيتأخر وبرضه مبعرفش:)
تسلميلى يا زوزو
نورتينى حبيبتى واسعدنى تواجدك

د/على خميس يقول...

السلام عليكم
هو طبع بس ممكن طباع تتغير مع الزمن و لكن كما قلت حضرتك أن شاء الطبع يغلب فى الآخر

Unknown يقول...

موناليزا :)
___________

الحمدلله
انا مش فاكرة اني اتأخرت عن اي موعد نهائي ..
حتى وقت الشغل .. :)
تذكرة كويسة جدا للناس اللي لازم تحافظ على مواعيدها ..
و بالاخص مواعيد الصلاة :)

rovy يقول...

السلام عليكم أختى الحبيبه
أولا عاوزه أقولك أن أهدائك للظالم و الغافل صعب جداا .. أنا ما أقدرتش أكمل أكثر من ثانيه .. عارفه أن ده مصيرنا جميعا و لكن أدعوا الله أن يرحمنا بواسع رحمته اذا ما صرنا الى ما صاروا اليه .. يااااارب لطفك بنا يا الله ..
بالنسبه للمواعيد و الله أنا فعلا بقدر الناس جداا و بألتزم جداا بمواعيدى و لكنى يحزننى فعلا أن دلوقت فيه ناس عجيبه و لا فى دماغها تبقى عطياكى الميعاد و نسياكى او متناسياكى عادى جداا و لو أتأخرت ما تفكرش تعتذر و لا حتى تحسسك بأسفها لأنها عطلتك و لا و لا .. بجد الحكايه دى أصبحت زى المرض و أنتشرت جداا
مونى حبيبتى .. انا لسه المنظر تاعبنى و مش عارفه أكتب و لا أعلق و بعدين كنت ناويه أرد على التعليقات عندى كده مش حينفع .. ياارب أرحمنا برحمتك يا حبيبى يا الله ..
تصبحى على خير ياارب
تحياتى و خالص مودتى

د.خالدأمين يقول...

ادي فيه مواقف لسه حاضر ليه حالا


انا كنت جاي من اسكندريه

وجاي في القطر


اه تخيلي قطر



ووصلت متاخر اكتر من نص ساعه وانا كان عندي نبطشيه واتاخرت عليها واظن مفيش ابوخ ن كدا



اشطه



مواعيد ايه بس


احنا اليوم عندنا بعد الضهر وبعد العصر وبعد المغرب وبعد العشا

وهي دي المواعيد في مصر

موناليزا يقول...

د/ على خميس
ــــــــــــ
وعليكم السلام ورحمة الله وبركاته
أهلا بعودتك يادكتور
صح جدا الطبع وخصوصا الحسن لازم يغلب فى الاخر
ربنا يوفقك دايما
وأشكرك جدا لمتابعتك
يسعدنى دوام التواصل



*********************************


قهوة بالفانيليا شيماء على
ــــــــــــــــــــــــــ
أهلا اهلا بالقمر
أيوة كده.. برافو عليكِ بجد:)
أشكرك جدا لمشاركتك
نورتينى شيمو الجميلة واسعدنى تواجدك



*********************************


روفى
ــــــ
وعليكم السلام ورحمة الله وبركاته
أختى الحبيبة:اهلا اهلا بالغالية
اعذرينى حبيبتى انا عارفة انه صعب جدا وعشان كده ماحبتش أقول إيه اللى موجود فيه:)
تعرفى يا روفى انا حطاه كمان عشان لما احس انى غفلت أو بعدت شوية اتفرج عليه عشان يفوقنى
ربنا يرحمنا برحمته

المواعيد بقى بما انننا زى بعض ملتزمين ده كويس جدا عشان يوم مانتقابل بإذن الله مفيش واحدة فينا تتأخر عن التانية:)

بس انا عندى فكرة بطبقها مع اللى بيتأخروا على مواعيدهم معايا
فى الميعاد بالظبط اتصل بيهم واشوفهم فين وهيتأخروا قد إيه وكده يعنى:)

انا اول ماشوفته عملت زيك كده بس أجبرت نفسى انى لازم أشوفه للآخر
ربنا يرحمنا وينجينا ويسترنا فوق الارض وتحت الارض ويوم العرض عليه

تصبحى على كل خير سعادة وراحة بال

نورتينى غاليتى واسعدنى تواجدك



**********************************


د. خالد أمين
ــــــــــــ
أهلا بيك يادكتور بعد طول غياب
وهذا من ضمن آفات مجتمعنا للأسف
عموما
حمدالله على السلامة يادكتور:)
أشكرك جدا لمشاركتك
يسعدنى دوام التواصل

طهر فؤادك يقول...

السلام عليكم ورحمة الله وبركاتة

اولا اعتذر لعدم متابعة المواضيع السابقة لظروف خارجة عن ارادتى ...

وماشاء الله موضوع جميل ومتميز وفعلا عدم احترام المواعيد حاجة تضاايق جدا جداا واسألينى انا يااختى والله ...
ولو اتبعنا هدى الحبيب سيدنا محمد صلى الله علية وسلمحين قال :- حَدَّثَنَا قُتَيْبَةُ بْنُ سَعِيدٍ ، قَالَ : حَدَّثَنَا إِسْمَاعِيلُ بْنُ جَعْفَرٍ ، عَنْ أَبِي سُهَيْلٍ نَافِعِ بْنِ مَالِكِ بْنِ أَبِي عَامِرٍ ، عَنْ أَبِيهِ ، عَنْ أَبِي هُرَيْرَةَ ، رَضِيَ اللَّهُ عَنْهُ ، أَنّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : " آيَةُ الْمُنَافِقِ ثَلَاثٌ : إِذَا حَدَّثَ كَذَبَ , وَإِذَا وَعَدَ أَخْلَفَ , وَإِذَا اؤْتُمِنَ خَانَ " .

- واذا وعد اخلف دى وهى فعلا الى محتاجين نفهمها كلنا فياريت نبعد عن عدم احترام المواعيد ويكون وعدنا صدق وربنا كريم [اذن الله ويصلح الاحوال ..

Dr. Ibrahim يقول...

كل شعوب العالم بتحترم المواعيد إلا احنا
على الرغم احترام الوقت هو سبيل التقدم والمفروض احنا كشعب مسلم المواعيد تبقى مظبوطة لان ربنا أكرمنا بمواعيد الصلاة اللى المفروض عارفينها وبدون ساعة نعرف مواعيدنا عاملة ازاى
وغير كده الدقيقة بتفرق..
يعنى مثلا فيه دكتور مخ وأعصاب عندنا كان مسافر أمريكا واكان عامل دراسة ظريفة أوى طبعا مش هتبقى ظريفة وغير واقعية لو اتطبقت هنا
وهى الوقت الذى يأخذه المريض منذ دخوله باب المستشفى وإعطاءه العلاج اللازم أو الحقن مرورا بقى بوجود طبيب ليفحصه وعمل أشعة والكلام دا
"from door to injection"

لأن فيه أمراض زى السكتات والجلطات الدماغية يجب التعامل معها فى ثوانى وليس دقائق
time is brain
ربنا يعافينا جميعا

فالوقت مهم جدا فى أى حاجة

واحد من البلد دى يقول...

السلام عليكم

بسم الله الرحمن الرحيم

(واذكر فى الكتاب إسماعيل إنه كان صادق الوعد و كان رسولا نبيا) صدق الله العظيم

إن لم يكن الحفاظ على المواعيد له أهميته القصوى لما حبا به الله نبيه إسماعيل عليه السلام...وقد أجمع المفسرون على أن هذه الآية ذكرت لموقف لسيدنا إسماعيل عليه السلام يخص جانب الحفاظ على الميعاد...

و يكفى أن إخلاف الميعاد من آيات المنافق الثلاث التى ذكرها لنا رسول الله صلى الله عليه و آله وسلم(وإذا وعد أخلف)

ومن أطرف المواعيد التى حدثت لى عندما كنت أريد نجارا ليصلح لى شيئا معينا بمنزلى و عندما إتصلت به قال لى أنه سوف يأتى يوم الثلاثاء..ومر بعدها قرابة الشهر ولم يأتى ولم يتصل ولم يرد على مكالماتى له...فاتصلت به من رقم آخر و عندما أجاب قلت له..السلام عليكم..معك فلان..عفوا..حضرتك حددت لى اليوم ولكنك نسيت أن تحدد لى السنة..

ومن المواقف التى لن أنساها موقف مشابه ولكنه هذه المرة جعلنى أسافر من محافظة إلى محافظة و لم يأتى و لم يعتذر و أغلق تليفونه..

وفى النهاية أقول...يا نااااس..عاملوا الناس كما تحبون أن يعاملوكم..

دمتى فى حفظ الله

مهموهة أحمد يقول...

موناليــــزا يا قلبي واحشاني واحشاني واحشاني واحشاني و الله موت موت موت يا قلبي و الله
و انا اسفة جدا جدا على التاخير ده و الله بس غصب عني اصلي كنت مخنوقة شوية و بعيدة عن النت الكام يوم اللي فاتوا دول بس اديني بحاول ارجع تاني
ربنا كريم

المهم البوست جميل اوي و فعلا الوقت كالسيف ان لم تقطعه قطعك
انا مش فاكرة موقف معين في المواعيد
بس انا لما بيبقى عندي معاد مع حد مش بنام اصلا من بالليل و اروح قبلها بساعة او اتنين المهم اني ما اتاخرش علشان انا كده اتعودت على كده

ربنا يوفق الجميع يا رب

خلي بالك من نفسك يا قلبي

خالص حبي وحبي و اشواقي

موناليزا يقول...

طهر فؤادك
ــــــــــ
وعليكم السلام ورحمة الله وبركاته
أهلا بيك يافندم
حضرتك مكانك محفوظ دايما وتنورنى فى أى وقت
عند حق جدا
أشكرك جدا لتعليقك
يسعدنى دوام التواصل



***********************************


د/ ابراهيم
ـــــــــــ
أهلا بيك يادكتور بعد طول غياب
عندك حق جدا احنا مسلمين ومرتبطين بأوقات الصلاة فالمفروض نكون ملتزمين اكتر من كده
بجد بشكرك جدا على المثال اللى ذكرته لانها فعلا حاجة بيتوقف عليها حياة بنى آدم وياريت بجد نهتم ونلتزم بالمواعيد اكتر من كده
أشكرك جدا لمشاركتك
يسعدنى دوام التواصل



**********************************



واحد من البلد دى
ــــــــــــــــــ
وعليكم السلام ورحمة الله وبركاته
أهلا بيك يافندم
اله عليك بجد
ما اجمل مشاركتك فذكرك لهذه الآية وتفسيرها أول مرة أعرفه رغم قراءتى لها كثيراً
فجزاكم الله خيرا

:) ضحكتنى بجد وموقفك أكيد كان غير متوقع بالنسبة له

أشكرك جدا لمشاركتك
يسعدنى دوام التواصل



**********************************


مهموهة
ــــــــــ
أهلا اهلا بالقمر
سلامتك من الخنقة ياجميلة وانتِ تنورينى فى أى وقت
ويارب ماتشوفى حاجة وحشة أبدا

انا بعمل زيك كده بس لما كان بيبقى ورايا امتحانات مكنتش بعرف انام غير لما اروح وآجى:)

تسلمى ياحبيبتى على تعليقك
نورتينى مها الجميلة واسعدنى تواجدك

Kiara يقول...

اكتر حاجه بتكرهني في الانسان هي المواعيد بتخنق جدا لاني بوصل في معادى ونادر اما اتاخر علي المعاد الا اني دايما استني


جميل البوست يامووووونى

salwa يقول...

السلام عليكم اخت موناليزا
نعم انما المءمن اذا حدث صدق
و اذا اؤتمنى ادى الامانة
و اذا وعد وفى
تسلم يدك
دااااائما مميزة
سلام

موناليزا يقول...

كيارا
ـــــــ
أهلا اهلا بالقمر
متفقين تماما:)
نورتينى يانيمو وأسعدنى تواجدك



**********************************


سلوى
ــــــ
وعليكم السلام ورحمة الله وبركاته
أهلا اهلا بالقمر
ربنا يكرمك واشكرك جدا لتعليقك
نورتينى ياجميلة واسعدنى تواجدك

نسيبه يقول...

السلام عليكم ورحمة الله وبركاته
دايما بتحرجيني كده ده من أكتر المواضيع إحراجا بالنسبة لي بس أنا بأحاول أظبط مواعيدي وأكيد بأدايق جدا من من لا يظبطون مواعيدهم زيي ولكن أحيانا يكون غصب عني لكن عندك حق الأعذار مش كافيه بس أنا بأحاول أظبط مواعيدي ولا أتذكر دلوقتي موقف معين
دعواتك

موناليزا يقول...

نسيبة
ــــــــ
وعليكم السلام ورحمة الله وبركاته
أهلا اهلا بالقمر
:) أنا عارفة
مااحنا عِشرة يابنتى
و دى بصراحة أكتر حاجة بتضايقنى فيكِ

يارب يا بطتى مواعيدك تبقى مظبوطة دايما

نورتينى ياجميلة واسعدنى تواجدك