السبت، 17 يوليو، 2010

حلم بغيض



تراه في أحلامها من آن لآخر.. تارة على فترات متقاربة وتارة أخرى على فترات متباعدة وفي كل مرة يثبت لها بأنه لم ولن يحبها وفي كل مرة ترى أنها مازالت تنتظر منه أن يبادلها نفس مشاعرها.
وحينما تستيقظ تشعر بالسعادة لأنها رأته فهي لم تراه فى الواقع منذ عدة سنوات.. ومع مرور الوقت بعد الإستيقاظ وحينما تنتهي نشوة رؤيتها له تشعر بالغضب من الرسالة التي يتضمنها حلمها.. فتُحدثه بصوت عالِ وكأنه موجود أمامها ويسمع ما تقوله.. قائلة: خلاص عرفت مشاعرك.. وكنت عارفاها من زمان.. مش لازم كل شوية تيجي تفكرنى بيها.. تفتكر أنا بعدت عنك بكامل إرادتي ليه!!.. بس خلاص بقى.. كفاية كده.. ولا عايز تثبت إن حبك جوايا أقوى مني وأني إذا كنت قدرت أخرجك من حياتي فمش هعرف أخرجك من أحلامي.
وتدير برأسها إلى الجهة الأخرى وكأنها تنهي حوارها التخيلي معه وتبدأ في حوارها بصوت عالِ مع نفسها وكأنها شخصاً مجسداً أمامها تحاوره فتتسائل بغضب: مين قال إن فيه صداقة بين ولد وبنت!!!؟؟؟.
صداقة يعني إرتياح ورغبة في التواجد معه ومشاركته أفراحه وأحزانه والإطمئنان عن أحواله وده لو حصل بين ولد وبنت يبقى إيه الفرق بينه وبين الحب!؟
يمكن يكون هو أقوى مني لأن له علاقات كتير وهو بالنسبة لي أول شخص يدخل في حياتي.
يمكن مش عارف يشوفني كأنثى لأني دايماً واضعة حواجز وسدود في التعامل معاه.
يمكن لأنه مرتبط أصلاً بغيري وبيحكيلي عنها عادي جداً.. هو أنا آه بسمعه وببقى مبسوطة انه بيكلمني حتى لو عن واحدة تانية بس مابقدرش أتحكم في نفسي لما بشوفها معاه.. بشعر بسخونة غير عادية في جسدي وكأن وجههي سينفجر من كتر إحمراره من الغضب.
يمكن لأن عمري ما خططت لمشاعري تجاهه واتفاجئت بوجودها غصب عني وأخدت وقت كبير على ما استوعبت حقيقة مشاعري وصدقتها وصارحت بها نفسي.. ووقتها مقدرتش أشوف أحلامي قصادي ومامسكهاش.. بس عرفت بعدها أنه عمره ماحبني زي ما أنا حبيته.. وعشان كده ماكنش قدامي حل غير البُعد الأبدي عنه بكامل إرادتي.
بس لحد إمتى هفضل أقارن بينه وبين أي حد يتقدم لخطبتي.. أصله كان بالنسبة لي زي ما الكتاب بيقول.. كان فيه كل المواصفات اللى أحبها تكون موجودة في شريك حياتي.. حتى عيوبه بالنسبة لي كانت لا تذكر.
وبعد صمت إستغرقته مع نفسها قررت أخيراً بعد كل هذه المداولات بأنه لو آتى إليها في أحلامها مرة أخرى ستستيقظ سريعاً وتأبى النوم من جديد وإذا أنهكها جسدها راغباً في النوم ستتعمد قراءة الروايات البوليسية قبل النوم مباشرة لتكون أحلامها عبارة عن معركة حربية تقوم بين دولتها ودولته وستدمرها له بمفاعل نووي وستشاهد قبل نومها أكثر أفلام الرعب إثارة لترى في أحلامها مصاصوا الدماء والمذءوبين.. فهذا أهون عليها من رؤيته.
- تمت-.



سؤال جانبى:
ـــــــــــــــــــــ
* هل تؤمن بالصداقة بين الرجل والمرأة؟ ولماذا؟.

هناك 23 تعليقًا:

MR.PRESIDENT يقول...

بعد السلام والتحية
أما بعد
من رئيس الجمهورية
القصة حلوة وإن كانت فيها عيب بالنسبة ليا إن البطل شخص واحد .. وكالعادة أنا غلس وبطلع القطط الفطسانة .
التصوير الأخير رائع عن جد ..بتاع معركة حربية بين دولته ودولتها .
-------------
أنا لا أعترف بوجود صداقة بين ولد وبنت .. لأن فيها دخول لكثير من المحرمات .. مثل الخضوع بالقول والنظرة .. وربما تصل لما لا يحمد عقباه حتي لو مفيش كل ده لو محصلش نصيب هتفضل مقارنة بينه وبين أي حد وهو بالمثل هيقارن لو كان الصداقة وصلت لحب .
مرة تانية لا توجد صداقة .. تلك حجج واهية .. والسؤال لما لا تنشأ صداقة بين بنت وبنت أصلا وولد وولد . يعني هيا هتفرق لما تكون ولد وبنت . ربنا يهديني ويهدي الجميع

تحياتي مرة تانية علي القصة
يلا باي

حفيدة عرابى يقول...

كتبت تعليق طويل عريض وضاع
قدر الله وماشاء فعل
-----------
أولا انا من متابعى مدونتك الدائمين والصامتين
واللى شجعنى على التعليق ان الموضوع ده كان أثير فى مدونة صديقة ودخلت بسببه فى جدل مش ظريف

العلاقة بين الجنسين لازم تكون فى حدود
زيها زى أى حاجة فى الدنيا
بس عندنا فى المدرسة مكنش فى أى تعامل بينا وبين زمايلنا ولما نضطر نتعامل معاهم فى الكنترول مثلا نتخنق من استهتارهم بالشغل
وبعد فترة جم ناس تانية فى منتهى الاحترام
بصراحة انا استمتعت جدا بالشغل معاهم
بعد فترة وخصوصا بعد ساعات العمل الطويلة بقت فى الفة واحترام متبادل
لدرجة لو فى شغل بعد الكنترول بنختار بعض علشان نشتغل سوا واتعرف ان مجموعتنا بتدى أدق شغل فى أى حاجة نعملها
ممكن نتكلم فى حاجات بره الشغل
ممكن ناخد رأى بعض فى مشكلة بسيطة
بس فى حدود
التعامل معانا كأخوتهم الصغيرين حتى لو احنا الاكبر سنا
انا بكون حريصة جدا فى تعاملاتى ان مديش الفرصة مش لحد
لا لنفسى ولقلبى
انه ممكن يفكر فى زمايلنا دول بشكل مختلف
علشان كده فى البداية قبل مااعرفهم
كنت حريصة ان سن الناس اللى بشتغل معاهم يكون اكبر بكتير او اصغر بكتير
او يكونوا متزوجين علشان مااعرضش نفسى لموقف زى البوست كده وعلشان اتقاء الشبهات

ليه بحب تعاملى معاهم؟
محترمين وجادين ومستفيدة جدا انسانيا منهم
رأيهم فى امور كتير بينورنى
غير اراء الستات
مش الستات غلط بس وجهة نظر الطرف التانى مفيدة بتخليك عندك وعى اكتر
معاهم او مع غيرهم الحمد لله مفيش خضوع بالقول اطلاقا بالاضافة لانه حرام
هو من نعم ربنا علينا مش طبعنا

مش بنتكلم فى حاجات شخصية قوى
بس بنتكلم فى حاجات شخصية تكاد تكون عامة

يعنى مثلا لسه قريب واحد منهم ربنا كرمه ببنت تالتة واهله كان زعلانين
بمنتهى الشياكة وزوجته حامل عزم أهله كلهم على عزومة ماحصلتش وفهمهم ان سبب العزومة فرحته بالبنوتة التالتة
ده مثال لحاجة شخصية ممكن نتكلم فيها

أو حد فيهم يقول مشكلة بتواجهه
فواحدة من السيدات الاكبر سنا تنصحه هو بيستفيد واحنا كمان
لو خرجنا بره المدرسة فى الشهادات العامة بنحاول نكون مع بعض
لو محصلش بنوصى على بعض وننصح بعض فى أى مشكلة
بنقول بعض كل سنة وانتم طيبين وبنضحك مع بعض

كفاية انك لما تشتغلى مع رجل يقولك ماتشليش هم وراك رجالة
وفعلا لو انا مش موجودة بكون واثقة ان الشغل تمام اكتر من وجودى يمكن
لكن اغلب السيدات مش كده

رأيى ان الرجال اكثر وضوحا من النساء حتى فى اختلافاتهم
مش بيرموا كلام على بعض
حتى لو اتخانقوا تبقى خناقة واضحة وصريحة
مش بستحمل انا الحركات ورمى الكلام والغيرة الغير مبررة عند السيدات
لو الحالة دى صداقة
يبقى انا من انصار الصداقة

انا اسفة جدا على الرغى
وربنا يكون فى عونك تقرأى كل الكلام ده

تحياتى لحضرتك

أم الخــلـود يقول...

الصداقة مفهوم واسع وبين المرأة والرجل توجد علاقة أكثر من صداقة لأنه مع مرور الوقت قد تتطور لأمور خارجة عن ديننا.



اصحى يا نايم ووحد الدايم

(حملة الجسد الواحد)

أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية

لمزيد من المعلومات

http://dndanh111.blogspot.com/2010/06/blog-post_14.html

جعله الله في ميزان حسناتكم .. آمين

ابو ريم يقول...

لا يوجد علاقة احسن درءا للشبهات

قطرة وفا يقول...

* هل تؤمن بالصداقة بين الرجل والمرأة؟ ولماذا؟.


لا .. أبدااا

كنت أؤمن بهذا المبدأ قديما .. في فترة المراهقة و من ثم إنتبهت ... أتعلمين ؟

حتى الأجانب نفوا وجود علاقة صداقة بين الرجل و المرأة !

و لماذا ... اممم من تجاربي البسيطة في الحياة و تجارب غيري و ما قرأت من كلام


حفظك الرحمن و سترنا بكرمه الواسع

كلمات من نور يقول...

انا أؤمن بصداقة الزوج والزوجة ....انما غير كده لا ...ربي يبارك لكما يا زوزو ويجمع بينكم بالخير..


http://img180.imageshack.us/img180/5618/azkarmtnawea0020.jpg

حنان الشافعي يقول...

ما أبغضه حلم

.................
اجابة السؤال
اؤمن بالصدداقه في حدود وفي تجمعات

سلسبيل يقول...

جزاك الله خيراً
حبيبتى على الموضوع
انا لا ءأمن تماماً بالصاقة
بين الولد و البنت
و الف الف مليون مبرووووووورك

ســـــــهــــــــــر يقول...

عن بطلتك
ربنا يصلح لها حالها و يسعدها و يشفى قلبها سبحانه مقلب القلوب


عن سؤالك
الصداقه موجوده لكن اما تكون حقيقيه مش مجرد تسميه

افروديت يقول...

مفتكرش .....! عارفه في ناس كتير بيسموها صداقه بس هي في الحقيقة أسمهاعيب نقوله..سلمتي ياأمة الله

فارس عبدالفتاح يقول...

لا اؤمن باهذا ولكنه قد يحدث وفي تلك الحالة فانه خطير ان لم يكن له ضوابط اخلاقية ورادع ديني

لانه مهما كانت الشفافية والاخلاق في هذه الصداقة فان الغريزة والشيطان يلعبان دور لا يستهان به في خطورته اذا وجد تألف يقترن بخلوة .

وقد حدث هذا معي .. وتنكشف هذه الغريزة وتفهم بسرعة بين الاثنين والخطر اذا استمر هذا التواصل .

حصان المرجيحة يقول...

لا طبعا
انا مش مع الصداقة
لانه ببساطة حرام
شكرا ليكي

salwa يقول...

السلام عليكم اخت موناليزا
اللي باعك بيعو
اكتفي بهذا و تسلم الايادي
سلام

(أم البنين) يقول...

ما ينفعش بوتاتا إطلاقا يكون في صداقة بين الجنسين يا بنوته
بس خلاص

رحــــيـل يقول...

ستتعمد قراءة الروايات البوليسية قبل النوم مباشرة لتكون أحلامها عبارة عن معركة حربية تقوم بين دولتها ودولته وستدمرها له بمفاعل نووى وستشاهد قبل نومها أكثر أفلام الرعب إثارة لترى فى أحلامها مصاصوا الدماء والمذءوبين.. فهذا أهون عليها من رؤيته.

قصتك جميلة جدا والاجمل القرار الى خدته البطلة رغم انه عنيف لكن اوقات بنحتاج ده مع نفسنا

ذكري رحيل قلم يقول...

السلام عليكم
بصراحة انا عمري ما كنت بحب اي صداقة بين ولد وبنت بس كانوا كتير بيحبوا يصحبوني في الله وكلهم بصراحة محترمين جدا بس العلاقة كانت تبادل اوراق ومذكرة وخلصت
عن بطلة القصة ادعوها لحب جديد لا يمحو الحب القديم من الذاكرة والقلب الا حب جديد ربنا معاها وتحسن الاختيار هذة المرة ولكن تتمسك به قدر المستطاع وتتحمل نتائج اختيارها مهما كانت مش مع اول اعصار عاطفي تتركه وتندم لا ادعوها ان تصبر ولا تيأس
تحياتي

P A S H A يقول...

جميلة القصة .. حية .. إيقاعها عجبني
أحييكي
:)
خالص تحياتي وعميق احترامي وتقديري

جنّي يقول...

السلام عليكم

كثير من احلامنا تكون مخزنة في اللاوعي وتتصارع معنا لان الفطرة السليمة ترفضها ..

الصداقة بلفظها بين بنت وولد مرفوضة ولكن نسميها تعاون على البر والتقوى في العمل او حتى على النت ولكن في حدود من الادب والاخلاق وعدم الخضوع بالقول ..

الفقيرة إلى الله أم البنات يقول...

واحد زميلى زان قالى كلمه مينفعش صداقه بين الراجل والمراة لانى لو انا قاعد مع واحد صاحبى راجل...وانكشف جزء م ايده مش هبص عليه
خلاص كده اتفهم

بخصوص البوست هو من الروعه انى مش لاقيه كلام يوصف صدق التعبير والتصوير وشرح الحاله المزاجيه
انت مبدعه
وفعلا يوم ما ختتخلص من تأثيرة مش ختشوف احلام لاء دى هتشوفه وهيكون زى بائع الجرايد او بتاع المكوى
شخص بتتعامل معاه بدون اى تفكير
بحبك قوى يا مونى:)

Mona يقول...

موناليزا: الحلم بكرة يتنسى وإن شاءالله فى الحقيقة ستجد فارس الاحلام والحلم عادة يحدث عندما نفكر فى الامر - فمن الأفضل تحاشى التفكير - والصداقة موجودة فى وجود الالتزام والاحترام وفى تجمعات - تحياتى

زهرة يقول...

موناليزا..

التصوير حلو اوى

والحكايه شدتنى جدا

بس عن سؤالك الأخير

فا جابته ان مفيش حاجة اسمها صداقه بين ولد وبنت

ودايما بقولها كرأى شخصى
لما تبقى البنات تخلص نبقى نصاحب ولاد

ولما تبقى الولاد تخلص يبقوا هما يصاحبوا بنات

كان نفسى ارغى كتير

لان الموضوع مهم وجميل .. بس خير الكلام ما قل ودل

تسلمى يا حبيبتى

موناليزا يقول...

مستر بريزيدنت
ـــــــــــــ
أهلا بيك
نقدك على عينى وراسى بس انا غالبية القصص اللى بكتبها بيكون بطلها شخص واحد ولو حبيت أكتر هيبقى اتنين:)
أشكرك جدا لرأيك
00000
أحييك جدا على مشاركتك
يسعدنا دوام التواصل



********************************


حفيدة عرابى
ــــــــــــ
أهلا بيكِ
:)
مرحبا بكِ دائماً

مستمتعة بتعليقك وفاهمة وجهة نظرك ولكن الناس فيها وفيها وزى ما فيه ستات بتعمل مقالب وغاوية رغى فيه ستات برضه جدعة وبمية راجل حتى لو كانت صغيرة فى السن
اما موضوع ان الراجل يكون اكبر فى السن بكتير او اصغر بكتير او حتى متزوج ده مش مبرر لأن الشيطان له طرقه واذا كنتى ضامنة نفسك فانتى ايه يضمن لك نظرة اى راجل ليكى
تعرفى كنت زمان بقول زيك وايه المشكلة طالما فيه احترام متبادل لكن بعد قراءتى وفهمى لتفسير آية "ولا متخذات أخدان" نفذت كلام الله وقلت اكيد ربنا عارف مصلحتى اكتر ومش هينهينى عن حاجة الا لو كانت مضرة فعلا
وبجد وعن تجربة عدم الاختلاط متعة فى حد ذاته يكفى انك ماتشيليش ذنب حد ممكن يكون اتفتن بيكِ وانتِ مش واخدة بالك

أشكرك جدا لمشاركتك
وفى انتظارك دائما


*********************************


أم الخلود
ــــــــــــ
أهلا بيكِ
صح جدا.. فالتعود على أى شخص له مفعول السحر فى تحول اى علاقة

عذراً على عدم وضع الشعار

أشكرك جدا لمشاركتك
وفى انتظارك دائما



********************************


أبو ريم
ـــــــ
أهلا بيك فى زيارتك الاولى
عندك حق جدا
أشكرك جدا لمشاركتك
نورت مدونتى ويسعدنا دوام التواصل


*********************************


قطرة وفا
ــــــــــــ
أهلا بيكِ
أحييكِ على اجابتك الصريحة المحسومة
دمتِ فى حفظ الله


**********************************


كلمات من نور
ــــــــــــــ
أهلا بالغالية
وما اجملها من صداقة تلك التى تنشأ بين الزوجين
تسلميلى حبيبتى وتسعدينى دايما بمشاركتك



*********************************


حنان الشافعى
ــــــــــــــ
أهلا بيكِ بعد طول غياب

أشكرك جدا لرايك ولمشاركتك
نورتينى حبيبتى وفى انتظارك دائما



*******************************


سلسبيل
ــــــــــ
أهلا بيكِ
ربنا يكرمك
أشكرك جدا على مشاركتك وتهنئتك "لزوزو"
دمتِ فى حفظ الله



*********************************


سهر
ــــــ
أهلا بيكِ بعد طول غياب
أشكرك جدا لتعليقك ولمشاركتك
نورتينى حبيبتى واسعدنى تواجدك



**********************************


أفروديت
ــــــــــ
أهلا بيكِ
الله عليكِ.. اجابة مختصرة ومؤدية الغرض
نورتينى ياجميلة واسعدنى تواجدك



********************************


فارس عبد الفتاح
ــــــــــــــــــ
أهلا بيك
متفقة معاك ولذلك فلنتجنب الاختلاط قدر الامكان
أشكرك جدا لمشاركتك
يسعدنا دوام التواصل



*********************************

موناليزا يقول...

حصان المرجيحة
ــــــــــــــ
أهلا بيك
الله عليك.. خير الكلام ما قل ودل
أشكرك جدا لمشاركتك
يسعدنا دوام التواصل



*********************************


سلوى
ــــــــ
وعليكم السلام ورحمة الله وبركاته
أهلا بيكِ
أشكرك جدا لرأيك
نورتينى ياجميلة وفى انتظارك دائما



**********************************


أم البنين
ـــــــــــ
أهلا بيكِ بعد طول غياب
متفقة معاكِ جدا
تسلميلى ياحبيبتى
وسعيدة بمشاركتك



***********************************


رحيل
ــــــــ
أهلا بيكِ بعد طول غياب
أشكرك جدا لرأيك
فهو حقاً أسعدنى
نورتينى حبيبتى وفى انتظارك دائما


*******************************


ذكرى رحيل قلم
ـــــــــــــــ
وعليكم السلام ورحمة الله وبركاته
أهلا بيكِ
انما القلوب بين اصابع الرحمن يقلبها كيف يشاء وانا نصيحتى لها بأن تلتزم الدعاء:)
أشكرك جدا لتعليقك
نورتينى حبيبتى واسعدنى تواجدك



**********************************



باشا
ـــــــ
أهلا بيك بعد طول غياب
أشكرك جدا لرأيك
يسعدنا دوام التواصل



**********************************


جنى
ـــــــ
وعليكم السلام ورحمة الله وبركاته
أهلا بيك
وأضيف على كلامك التعامل يكون فى اضيق الحدود وللضرورة القصوى فالشيطان يقف بالمرصاد
أشكرك جدا لتعليقك
يسعدنا دوام التواصل



*********************************


الفقيرة الى الله ام البنات
ــــــــــــــــــــــــ
أهلا بحبيبتى فى الله
ونِعم التعليق حقا
أشكرك جدا لرأيك
ودائما تسعدينى بتواجدك فى حياتى
تسلميلى حبيبتى
وأحبك الذى أحببتنى فيه:)


**********************************


منى
ــــــ
أهلا بيكِ
أشكرك جدا لتعليقك
نورتينى حبيبتى واسعدنى تواجدك


********************************

زهرة
ـــــــ
أهلا بيكِ
أشكرك جدا لرأيك ولمشاركتك
نورتينى حبيبتى واسعدنى تواجدك