الخميس، 29 يوليو 2010

فضفضة مع نفسى

فيه حاجات عاوزة أعملها لكن مش عارفة.. رغم أن الحاجات دى مافيهاش أية شبهة حرام ومع ذلك فيه حاجة جوايا بتمنعنى من أدائها.
يعنى مثلاً
* عاوزة أمشى حافية فى البيت ولو حتى شوية صغيرين قبل النوم .. عايزة أحس إن المكان ده بتاعى ومن حقى أمشى فيه براحتى.
* عاوزة لما أكون تعبانة أتأوه بصوت عالى بدل ما بكتم الآه جوايا.. شعور حلو بجد لما حد يكون تعبان ويقدر يعبر عن ألمه لكن بخاف على اللى حواليا من قلقهم عليا أو ييجوا يقعدوا جنبى وأنا لما بكون تعبانة بحب أكون لوحدى.
* عاوزة وأنا فى البيت أسيب شعرى مفرودا على ضهرى بدل الكحكة اللى بعملها دايماً.. حاسة أنى كاتمة حريته ومنعاه من أنه يشم نفسه.
* عاوزة ألبس فى البيت بيجامات عادية أو لبس بيت طول النهار بدل لبس الخروج اللى بفضل لابساه من أول ما أصحى لغاية ما آجى أنام رغم أنى أصلاً مابخرجش ولا مستنية حد ييجى عشان أقابله كده.
* عاوزة أخرج .. بس فى مكان بعيد أوى مافيهوش حد اعرفه أو يعرفنى ويكون بالنهار والشمس طالعة.. هو أنا آه مابحبش الخروج إلا للضرورة بس إيه المانع لما أخرج واتمشى واغير جو وأشم هوا.
* عاوزة أبقى أم.. بس لازم أبقى زوجة الأول .. رغم أنى مش متحمسة لإعادة تجربة الزواج من جديد.
* عاوزة أكون محترفة قيادة سيارات.. بس لسه معنديش الجرأة .. مش عارفة هتيجى أمتى وإزاى, طيب أعمل إيه إذا كنت خايفة على أرواح الناس وخصوصاً أن الناس بقت بتستعبط وتمشى فى وسط العربيات عادى.. وعشان كده بحب اسوق فى أى مكان فاضى.. وفى نفس الوقت معنديش الحماس اللى يخلينى اروح مدرسة لتعليم القيادة.
* عاوزة أجرى فى مكان واسع..كنت بجرى زمان وأنا صغيرة فى أى مكان مكنتش تفرق معايا.
* عاوزة أقعد مع صحبة حلوة مافيهاش غيبة ونميمة أوشكوى أو تطلع لما فى يد الغير أو أخبار وحشة أو أحلام مستحيلة.
* عاوزة أرجع شغلى كمُدرسة رياض أطفال ..بس برضه ماليش نفس.. رغم حبى للأطفال واشتياقى لهم لكن فريق العمل غير مشجع على الإنضمام له من جديد.
* عاوزة أركب خيل.. إزاى وفين معرفش بس عاوزة أحس أنى طايرة وهو بيجرى بيا.
* عاوزة أبقى منتظمة فى ممارسة تمارينى الرياضية اليومية..لكن برضه أوقات كتير مايبقاش عندى حماس.
*عاوزة أتعلم فوتوشوب.. بس مش لاقية حد يعلمنى.
* عاوزة أنزل أدور فى كل مراكز صيانة الكمبيوتر على "بوردا" للهارد القديم بتاعى.. بس مش حابة أكون لوحدى.
* عاوزة أزور ملجأ الأيتام اللى كنت متعودة أزورة.. بس مش عايزة أشوف شخصية أشتغلت فيه مؤخراً. ده غير أن موقع الدار برضه ماعدتش مناسب.
* عاوزة أكمل الكتاب اللى بدأت فى كتابته.. لكن ماعدتش عندى حماس.
* عاوزة أرجع اعمل لوحات فنية .. إحساس حلو وأنت بتختار الألوان المناسبة وتحطها على القماش بالفرشاة الصغيرة المخصصة لكده وتبعد شوية وتلاقى إن إختيارك كان موفق.. وحشنى إحساس ملاً فراغ الرسومات المطبوعة بالألوان.. بس اللى كنت بعمل عنده البراويز خلانى أحرم أعمل لوح إلا لما أبقى ألاقى واحد تانى يكون شغله كويس.
* عاوزة أحضر ندوة شعرية أو أمسية ثقافية أو محاضرة علمية.. وحشنى أوى الجو ده.
تقريباً كده أنا محتاجة حياة جديدة أعيشها رغم حبى وتأقلمى لحياتى الحالية.

سؤال جانبى:
ــــــــــــــــــــــــ
* إيه الحاجة اللى نفسك تعملها دلؤتى ومش عارف؟.
أو اعتبروها مساحة للفضفضة اللى يحب يقول أى حاجة عن أى حاجة فبراحته أعتبروها فقرة(إفتح قلبك).

هناك 27 تعليقًا:

د. إيمان مكاوي.. أم البنين يقول...

بصراحه لما قرأت الموضوع لقيت في حاجات كتير أنا كمان نفسي أعملها
بس دلوقت حالا نفسي أكون لوحدي لمدة ساعتين على الأقل ومش بعمل حاجه ومش مطلوب مني حاجه
كتير عليَّ يا ترى ؟؟؟؟؟؟؟؟؟؟؟؟؟

MR.PRESIDENT يقول...

طبعا مقدرش اقول ان حاجات سهلة ولا صعبة هيا بالنسبة لكتير سهلة وبالنسبة للبعض ملوش نفس فتندرج تحت بند اللي مش قادر اعمله مع ان فيه قدره .

المهم كل اللي عندك يندرج تحت بند الكسل القاتل زيي .. بس انتي بديتي أنا لسه .. يعني نفسي العب رياضة عشان شكلي يكون معقول مش علي رأي ست بتقولي خد يا كلبوظة هههههه رغم اني مش سمين قوي :)

نفسي اتجوز - نفسي أبقي ريس - نفسي اثبت نفسي - نفسي اكون صانع السلام والوحدة الاسلامية - نفسي اكون كاتب - نفسي اكون رياضي .

بالمناسبة موضوع حد مضايقك هناك أو في اي حته واحد صاحبي قاعد معايا في دورة كمبيوتر بنقدم ليها واحد قاعد يسأل اسئلة كتير رد صاحبي وقاله ليك فيه عشان تتكلم .. الاخ كتم .. بالنسبة ليكي ملوش حد ليه فيها عشان يزعلك روحي لدار الأيتام .. وانبسطي في طاعة الله .. واتمني ليكي انك تعيدي تجربتك الحياتية تانية .. وربنا يوفقك ويسعدك

زهرة يقول...

انا أول واحدة جييييييت هييييييه :)

طب يا حبيبتى ما تعملى حاجة حاجة من كل دة ..

انا شايفه انها حاجات كتير مكركبة .. وانتى حطاها فوق بعض كلها فحساها مش هينفع تتحقق .. لكن هى بسيطة اوى .. وسهل انك تحققيها مش بس تحلمى بيها ..

ومش لازم كله يتعمل فى نفس الوقت .. شوفى الاولى .. وكل ما تنجزى حاجة وتفرحى بيها هتديكى دفعه او زقه صغنونة تخلصى اللى بعدها .. وبنفس مفتوحة كمان

.. يا ستى بالنسبة للسؤال ..كح كح

نفسى نفسى دلوقت .. أكمل حاجة كنت بمتبها بقالى شهرين .. مش عارفه اكملها
وده لانى وقتها كنت حساها أوى وبكتب بحاجة واقعيه .. لكن دلوقت إحساسى بنفس الحاجة إختلف .. وحسيت انى لو كملت هكون بسد خانة وبضحك على نفسى .. ومش هتوصل لحد لانه انا نفسى مش هكون مصدقاها

لكن فى نفس الوقت .. نفسى اكتبها جداً .. واتفرج عليها بعد ما تخلص ..

لانى مش عارفه أبدأ فى جديد :(

وبس

سبايدرمان يقول...

انا نفسي لما اكون زعلان اروح للى زعلان منه و اقوله انا زعلان منك عشان كذا و كذا ، مش اسكت

نفسي ابقي مش صريح مع كل الناس ،ي عني نفسي مقلش دايما الصراحه لكل الناس ، لأن دايما الصراحه بتوجع و بتزعل

نفسي انام براحتي لحد لما ازهق و محدش يدخل يصحيني من انلوم .

................


بعيدا عني انا بقي
ليه عايزه تركبي خيل بالتحديد يعني ^_^ ؟
و الفوتوشوب علمي نفسك بنفسك فيه دروس ممكن تحمليها و تعلمك و ارشحلك الدورس الى بالأنجليزي مش الدروس الى بالعربي الى ملهاش لازمه دي

و بالنسبه لقياده السيارات ، بلاش حكايه الاحتراف دي بلييييز ^_^ انا حصلتلي حادثتين ، مره كانت ليا و مره لأخويا ، و الأثنين كانوا من بنات او ستات للاسف يعني :(

ستيتة حسب الله الحمش يقول...

نفسي أعرف أتكلم
مش بعرف أتكلم
تعرفي إني في أي لقاء مع صديقاتي بيجي لي صداع عجيب
بأصاب بصداع بعد نصف ساعة
أنا مش بتكلم خالص مع الحبايب القريبين
حتى لو جه الحبيب وطبطب عليا علشان يعرف أنا إيه مضايقني
مش بحب أحكي
بتضايق زيادة لو حكيت
يمكن أحتاج حنيته
يمكن أحتاج يطبطب عليا
لكن أزعل لو خلاني أحكي
أزعل وأتنكد جدا
هو أنا بخاف أبان ضعيفة؟
تفتكري ده ممكن؟
طب ما أنا عارفة إني ضعيفة
مخلوق بشري هامشي ضعيف عدد أيامه على الأرض محدود


نفسي أعرف أشكي
آه نفسي لو جوايا بلاوي اقعد اعيط واصرخ واحكي
نفسي ألوك لوك بس مش ع الورق
لو أي صديق قرب مني أوي يبقى ها أديه بومبة صداقية سريعة
بمعنى إذا قربت مني قوي فأنت معرض للمقاطعة الستيتية
طب ليه كده؟


نفسي كمان في يوم الأمنيات العالمي إني أخد بنصيحة حد
آه أنا بلاء يمشي على قدمين
مش بقتنع إن أي مخلوق فاهم في مصالحي أكتر مني
نفسي وطالبة من الله ولا يكتر عليه شيء أتحول
لأ مش اتحول سيد
أتحول عقليا
يعني أعرض مشكلتي على حد قريب مني
ولما يديني نصيحة أتهبب مفكرش وأطبقها مباشرة
نفسي أريح نفوخي من غير ما أضطر أخيرا لمهدئات ومنومات
حاسة إن نفسي الشريرة ناوية في الخطة الخمسية الجاية تدخلني الطريق ده
وشوشو الوحش عمال يقول لي انتي عضمة كبيرة وإيه يعني لما تاخدي منوم


نفسي أفصل زي ما التلاجة بتفصل
لو مقرأتش سياسة ولا مجتمع ولا شئون داخلية
عجلة التنمية ها تتنيل تقف؟
لو مقرأتش اطلاقا من حيث المبتدأ
عجلة التنمية ها تنام؟


وبما إن الفضفضة مفتوحة
فآخر أمنياتي الدنيوية
نفسي قبل ما ركبي تخلص اركب موتسيكل
موتسيكل يارب ماركة كوازاكي
عاااااااااااااااااااااااا
واطير زي العصافير

شفتي بقى
ادي اخرة الفضفضات
تحياتي وربنا يسعد ايامك

اتمني الشهادة يقول...

ربنا يعينك علي انك تحققي كل الي نفسك فيه ويكتبلك فيه كل الخير .

تقريبا كذا حاجه من الي قولتيها نفسي اعملها..
نفسي اقعد من شغلي لاني خايفه منه لكن بحبه وما اقدر استغني عنه

نفسي احافظ علي حريتي الي حصلت عليها بعد عناء لكن اهلي مش هيسبوني اعمل كده

نفسي اخد ابني واسافر اي مكان اقضي فيه وقت اغير جو لكن عارفه ان اهلي هيقلقوا عليا ومش هقدر اتحمل ده

نفسي اقود سياره لكن فعلا خايفه علي الجمهور لكن سبقتك بخطوه اني ارضيت غروري اني استخرجت رخصة واقول لنفسي كلما تهفو علي السواقه ما في مشكله اذا كنت عاوزه اسوف في اي وقت اسوق عندي رخصه

نفسي انجح في شغلي واكون علي قدر المسؤليه لكن مش عارفه اتغلب علي إحساسي بالتقصير

نفسي اكرر رحلة العمره لكن اوفر للحج افضل

نفسي اروح فلسطين لكن عاوزه مش عاوزه تاشرة إسرائيلية
ونفسي اصلي في القدس لكن مش عاوزه ارجع
نفسي اشوف ابني رجل ويكون قوي بايمانه وخلقه ودينه وعلمه وبدنه ويموت شهيد لكن يارب هو يتمني ده

طولت عليكي موضوع بجد جميل حسيت بعد مكتبت اني ارتحت

طوبه فضه وطوبه دهب يقول...

عارفه ان معظم الحاجات دى نفسى اعملها ذيك بالظبط بالاضافه انى نفسى اخد اجازه طويله من اى حاجه وابعد عن اى شغل او اى تفكير نفسى اشوف ناس كتير ما شفتهاش من زمان نفسى ارجع من تانى الكليه ويرجع نفس اصحابى معايا بس للاسف كل دى امانى تكاد تكون مستحيله ها قلبتى علينا المواجع كل سنه وانتى طيبه يا اجمل منونه فى الدنيا

ليس فقيرا من يحب يقول...

السلام عليكم

ازيك يا مونى يا حبيبتى وازى اخبارك

يارب كده تكونى بخير

الاول عايزة اقولنى انى احبك فى الله

باحبك بجد من قلبى

وبعدين تعالى هنا عيشى حياتك واتحررى من كل

حاجه حسه انها بتقيدك وامشى حافيه

واخرجى وسيبى شعرك والبسى كل اللى نفسك فيه

طالما انتى مش بتغضبى ربنا انبسطى وعيشى يا قلبى

ان شاء الله ربنا هيعوضك خير

وتيجبى قمرات بعد الهنا طبعا يقولولى يا خالتو

وبالنسبه للسؤال فنا نفسى فى حاجات
كتير جدا لما تسمح الظروف بعملها وفى حاجات مش بايدى انى اعملها
نفسى اتجوز حد يحبنى بجنون واحبه مش واحد اعيش معاه عيشه والسلام ونفسى اخلف دستتين عيال يطلعو عينى
نفسى اروح الملاهى وافضل اصرخ كتير اطلع كل شحنات الكبت والخنقه اللى جوايا
نفسى اجرى فى الشارع حافيه والدنيا بتشتى مع انى عملتها قبل كده بس على السطح
نفسى اكل غزل البنات ونفسى النت يبطل يتغابا عليا ونفسى اشتغل بس مش مهنتى الاساسيه اللى هى التدريس

لاءة انا نفسى فى حاجات كتير جدااااااا واحتمال لو فتحت مفصلش الا الصبح

وحشانى اوى يا مونى امموووووووووووووووااااااااااااااااه

وحضن اد الدنيا كلهاااااااااااااااا

د/على خميس يقول...

السلام عليكم و رحمة الله و بركاته
نفسى..
نفسى أروح البيت بدرى و من غير عشا أقوم أتوضأ و أفضل أصلى لغاية السحر و بعدين أجلس أستغفر و أنزل أصلى الفجر و أجلس أذكر الله و أقرأ قرآن لغاية الشروق ..أصلى ركعتى الضحى و أرجع البيت أنام ...و لكن المعاصى حجبتنى عن جناب الله
اللهم بلغنا رمضان

أحمد شريف يقول...

أتمنى أن تحققي كل أحلامك .. غيري جو ما رأيك ؟

حاولي أن تثقي أكثر بالحياة وبأنها خلقت لنحيا فيها ونعمرها

من جديد أتمنى أن تزول تلك الحالة عنكِ عن قريب بإذن الله

P A S H A يقول...

حالياً
نفسي أناااااام

:)

مصطفى يقول...

شوية فضفضة حلوين..أعتقد إنك هاتستريحي شوية..

لكن ماتنسيش تعملي أي حاجة فيهم داضروري جدًا..

hamma يقول...

السلام عليكم ورحمة الله و بركاته
المرور من مرحلة الى أخرى في الحياة يتطلب تأمل و تأني من خلال التجارب المكتسبة
هذا بدون الإنغلاق على الذات رغم لون السواد الأعظم.... لا بد من الإحتكاك و معرفة ما يجري عمليا لا "virtuel" ...عفوا على الكلمة الاجنبية
المهم يحقق المرء ما يريد بالإرادة و السعي الصحيح ....و لا ينتظر من "الآخر" شيءا ببلاش ........لأنه في زمننا قل كثيرا و طغت طقوسا دخيلة لعل أهمها المادة و حب الذات ............
-------->>>>
سؤال جانبى:ــــــــــــــــــــــــ* إيه الحاجة اللى نفسك تعملها دلؤتى ومش عارف؟
جواب : أرى كل من أعرف سعيدا جدا و قد ساهمت بعض الشيء في إسعاده
و حقيقي و الله

ماجد القاضي يقول...

يا نهار أبيض!!!!!!

هي حكومتنا نجحت في إنها تجعل أحلامنا بالشكل ده؟!!!!

أختي الكريمة.. بجد معظم ما ذكرتيه -للغرابة- مشروع تماما والأغرب أنه قابل للتحقيق بسهولة!!!

عامة أحسب أنها فعلا فضفضة تشي بحالة نفسية ما..! لا أريد أن أكون محللا.. لكن واضح أنك بحاجة ماسة لتغيير المكان أو (البيئة) المحيطة، ولصديقة مقربة مخلصة تستمع إليكِ والأهم .... تقوم معك ببعض هذه الأنشطة.

عذرا على التقصير في الزيارة مع تحياتي.
وفقك الله دائما لما يحب ويرضى.

rovy يقول...

أزيك يا مونى .. وحشتينى و مش حاقولك سامحينى على تقصيرى لأنى أنا نفى مش مسامحة نفسى ..
معلش كلنا زيك نفسنا فى حاجات كثير ......
بس صدقينى حرام يكون فى حاجات ممكن نعملها و نحرم نفسنا منها .. ليه متعشيش براحتك فى البيت و ليه تحرمى نفسك من انك تعملى حاجات بسيطة تحسسك بحريتك ..حاولى تقومى من نومك بكره ان شاء الله و انتى مصممه تعملى كل اللى تقدرى تعمليه و نفسك فيه ..
ربنا معاكى و يا رب يسعدك و تكونى دائما فى احسن الاحوال ..

مودتى الدائمه لكى ..

rovy يقول...

نسيت أجاوب على السؤال ..
حاسة ان نفسى الاقى روفى تانى لأنها تعبت اوى و تاهت منى و بجد مش لقياها ..

بنية آدم يقول...

موناليزا
أنا شايفة انك حاطة قيود كتير علي نفسك
ايه المانع لما تعملي الحاجات اللي انتي عاوزاها طالما :
*بايدك تعمليها.
*مش مخالفة للشرع.
ليه بتحبسي نفسك جوة سجن انتي اللي بتبني أسواره وبتخلي الماضي يبقي الحارس
بتاع السجن ده.

عيشي حياتك طالما ما بتأذيش حد ومش بتغضبي ربنا.
وتحياتي لك ولمدونتك الجميلة

بنية آدم.

كلمات من نور يقول...

كل داه يا موناليزتي؟؟؟؟؟؟؟؟

على فكرة انتي محتاجه تجددي الهمة وفيه حاجات كتيرة تقدري تعمليها براحتك يعني مش برضه انتي في بيتك؟؟؟؟؟؟؟؟ وفيه حاجات تانيه محتاجه عزيمة وهمة زي ما قلتلك ...تعرفي انا نفسي اعمل ايه؟ من يادوب سنتين تلاته كنت رياضية جدا بالعب يوجا وبامشي وباعوم وباعمل تمارين في البيت بس بقالي اهو كام سنة وانا منعتني ظروف معينه عن الرياضه ومن يومها مش عارفه ارجع تاني زي ما كنت ......زالرياضة ميزتها انك بتجددي خلايا جسمك وتنشطيه وووو وبجد بتحسي انك مقبلة على الحياة .....تيجي نقرر نلعب رياضه؟؟؟؟؟؟؟؟

ذكري رحيل قلم يقول...

السلام عليكم

انا شيفة انهاكلها حاجات عادية ممكن تعمليها في ا وقت مع اختيار المكان المناسب اللي مش عادي هو حالتك لا زم تغيريها ضروري ضروري بس المشكلة هتغيريها مع مين ازي ما فيش وحدة صحبتك قريبة منك تخرجك مما انت فيه معقول انعدموا يا مونتي مش مهم ادعيها لبيتك واخرجوا سوي
اكيد دوري في دفاترك القديمة واكيدهاتفتكري حد من صحباتك علي فكرة شهر الخير جاي اكيد في مسجد قريب الصوم والذكر وكتاب الله والقيام ان شاء الله هيخرجك مما انت فيه وهيبدل احوالك للخير بس انت ادعي ربنا من قلبك وانسي كل ما فات المهم تبدأي من جديد علي صفحة بيضاء لا تنظر للخلف ولا تنظر اسفل قدميك ولكن انظر امامك ستجد مستقبلا مشرقا ان شاء الله يناديك

تحياتي

salwa يقول...

السلام عليكم اخت موناليزا
من اروع ما كتبتي
تسلم يدك
و من لا يحتاج التغيير و كسر الروتين
طالما انه ضمن الحدود
لكي دائما اطيب تمنياتي

احاسيس آيوشه يقول...

فكرتنى بحاجات كتيييير نفسى اعملها وكل مرة بخاف وبأجل
الحل انك تنفذى على طول ومتفكريش كتير اللى نفسك فيه اعمليه

KHALED يقول...

عايز ألاقى وقت فاضى زى زمان ..!!!!!

♥♥ سكنـــ روحي ــت♥♥ يقول...

كل ما هو متاح لكى فعله ولا يشوبه اى حرومات أفعليه كما شئتى ولا تقيدى نفسك بتقاليد نصنعها بأنفسنا

*******


كتير حلو سؤالك
نفسى أسكن الصحراء !!!!!!!!!!!!!!!!!!

موناليزا يقول...

أشكركم جميعا على تعليقاتكم سواء كانت فضفضة أو تعليقاً على فضفضتى

أسعدنى تواجدكم
وفى انتظاركم دائما

The Queen يقول...

نفسي اطير في السما بحرية زي العصافير
بوست جميل جدا ربنا يقدرك وتحققي ولو نص اللي نفسك تعمليه

عابر سبيل يقول...

للأسف احنا حاصرين أنفسنا في اطار عادات وتقاليد ولو نحب نعمل حاجة لازم نعمل حساب الناس أولا يعني بجد ده حصار زي جدار الفصل العنصري اللي في فلسطين المهم مطلوب من كل واحد انه يعمل حاجة عاوز يعملها ويصر عليها طالما انها مش حرام يلا نبدا من الآن

نسيبه يقول...

السلام عليكم ورحمة الله وبركاته
وحشششششششششششتينيي جدا جدا
أولا أنا أسفه جدا علي تقصيري معاكي بجد
وربنا يفرج كربك ويسعدك ويرزقك كل ما تتمني
في حاجات كتيرمن اللي قولتيها سهله صحيح أنا عارفاكي وعارفه ليه هي صعبه بس حاولي يعني إيه المشكله لو تسيبي شعرك في البيت عادي يعني ولا تلبسي لبس عادي حتي لو نص اليوم أوبليل مثلا
وبالنسبه للسواقه تعالي معايا لاني بجد نفسي اتعلم السواقه بس مش لاقيه وقت تعالي نروح سوا بعد رمضان ان شاء الله
اما عني ياااااااه ما تفتحنيش نفسي في حاجات كتير جدا
نفسي أروح عند البحر وحشني جدا قبل الغروب بنص ساعه وافضل قاعده
نفسي في اتنين مليون جنيه ضروري اخلص بيهم كام حاجه وحالات عارفاها بالذات علي دخلة رمضان
نفسي ربنا يرضي عني ويكتبني من عتقائه الشهر ده
نفسي العب رياضه واتعلم سباحه
نفسي الشتاء ييجي بقي كفايه صيف كده
نفسي اشوفك ونقعد نتكلم شوية
نفسي تفرحي واشوفك في بيتك ان شاء الله عن قريب