الخميس، 9 سبتمبر، 2010

دورة الحياة

تشرق الشمس كل صباح. جملة بديهية ولا تدل على أى معلومة جديدة. ولكن إذا تفكرت فيها فستجد أن هذا يعنى بأن دورة حياتنا مستمرة باستمرار شروق الشمس وغروبها وذلك كل يوم ولا تنقطع إلا بانتهاء المدة الإفتراضية لوجودنا فى هذه الحياة.
يعنى لازم كل يوم آكل وأشرب وأنام وماينفعش آجى فى يوم وأقول أنا مش هاكل النهاردة عشان أنا أكلت إمبارح مثلاً لأن جسدى له حق عليا كل يوم.وهكذا فى بقية الغرائز الجسدية التى يجب أن تؤدى فى اليوم الواحد أكثر من مرة وليس مرة كل أسبوع أو كل كام يوم لأنها لو ماتعملتش فى وقتها الطبيعى اللى الجسد بيكون محتاجها فيه مع مرور الوقت هيصاب بالأمراض وبعدها هتكون النتيجة الطبيعية هى الموت .
وكما للجسد حق فاللقلب وللروح أيضاً حق وهذا يكون بالعبادات التى تنير القلب وتسمو بالروح وهذا يتطلب أن تكون أيضا بصفة مستمرة. يعنى ماينفعش أصلى النهاردة كل الفروض فى أول الوقت وآجى بكرة وماأصليش وأقول ما أنا صليت إمبارح.. وهكذا فى سائر العبادات لأن العبادات وكيفية التقرب إلى الله مستمرة باستمرار حياتنا.
يعنى ما ينفعش أعبد ربنا كويس أوى فى شهر رمضان وآخد أجازة بقية شهور السنة لأن رب رمضان هو رب بقية الشهور..
ولذلك أذكر نفسى وإياكم بتجديد العهد مع الله مع كل إشراقة شمس يوم جديد طالما فى العمر بقية.
************************

كلمة للنساء خصوصاً وللرجال عموماً:
ــــــــــــــــــــــــــــــــــــــــــــــــــــــــ
طبعاً كلنا عارفين ثواب صيام ست أيام من شوال.. بس أنا عايزة أفكركم بحاجة مهمة أنه ماينفعش أصوم نافلة وأنا عليا فريضة..
يعنى فيه ناس ممكن تكون فطرت أيام فى رمضان نتيجة لأى سبب شرعى وده معناه أن صيامها مش هيترفع لربنا غير لما تبقى تصوم الأيام اللى فاتتها.. وفيه ناس كتير للأسف بيأجلوا الصيام ده لغاية شعبان الجاى و ده لو افتكروا يصوموا كمان وكأنهم ضامنين عمرهم لكمان أسبوع جاى.. وعشان كده ياريت اللى عليه أيام من رمضان يصومهم قبل ما يصوم الست أيام من شوال لأن مش معقول أصلى سُنة العشاء مثلاً وأنا أصلاً ماصليتش المغرب.
صوموا الفريضة الأول وأتموا شهر صيامكم وبعد كده صوموا النوافل زى ما يعجبكم.
فيه رأى سمعته بيقول أن ممكن نعدد النية فى صيام ست أيام من شوال وندخل معاهم صيام الأيام الفائتة لكن أنا غير مقتنعة بالرأى ده لأن مش معقول هيتساوى واحد صام شهر رمضان كامل وأتبعه بست ايام بواحد تانى ماصامش رمضان كله وأتبعه بست ايام.. لمزيد من التوضيح لأن فيه ناس الرأى ده جاى على هواها أوى.. معقول واحد صام 30 يوم فريضة و6 نافلة يعنى36 يوم هيتساوى باللى صام مثلاً 25 يوم فريضة و6 نافلة يعنى 31 يوم!!.
فياريت نخلص ديونا ونصوم اللى علينا أول بأول.وياريت كمان بلاش بعد ما نصومهم ورا بعض وبعد الإنتهاء منهم نقول أنا هعيد بكره لأن العيد خلاص كان فى أول شوال وبلاش نبتدع حاجة مش موجودة فى الدين. وعلى فكرة محدش يسميهم الأيام البيض لأن الأيام البيض دول هما 13 و14 و15 من كل شهر عربى.




على الهامش:
ـــــــــــــــــــــــ
وحشتوووووونى جداً.. وربنا يتقبل منا ومنكم صالح الأعمال.. ويارب يكون عيد سعيد علينا جميعاً..
وكل عام وأنتم جميعاً بخير وصحة وسعادة.



سؤال جانبى :
ــــــــــــــــــــــ
* مين أول واحد هتحرص على تهنئته بالعيد؟ و ما هى كيفية التهنئة.. يعنى زيارة ولا بالتليفون ولا برسالة سواء على النت أو على الموبايل؟.



‏هناك 32 تعليقًا:

MR.PRESIDENT يقول...

معلش يا موناليزا ، مفيش حاجة اسمها انا مش مقتنعه والإسلام فيه فسحه وميزة النية إن الواحد ممكن ينوي بأكثر من نية في الشيء الواحد ولكن القصد إن يفضل يكون فيه رأيي شرعي . ودا مش معاناه ان كلامك غلط .. لان مثلا مش ينفع الواحد يصلي الضهر والعصر بصلاة واحدة ونيتين مختلفين .
تحياتي ليكي .
ومعلش مش هجاوب علي السؤال أنا لسه راجع من فترة راحة معلش بقي استحملني .

كيــــــــــــارا يقول...

كل سنة وانتي طيبة ياموووني

سمية قهوة يقول...

كل سنة و انت طيبة و شكرا على تذكيرك لينا

Alaa Salim - علاء سالم يقول...

السلام عليكم

موضوع جميل وشيق بجد كما تعودنا منك
وبالنسبه للجمع بين نيتين في صيام ست أيام من شوال فأنا أتفق معكِ
فأكيد اللي صام 36 أفضل من اللي صام 31 لكن أظن اللي صام وجمع بين النيتين وصام أكتر من الأيام اللي عليه لو حتى يوم أو إتنين فأكيد له أيضا أجر أكبر من اللي ماحاولش ولا فكر ياخد الثواب

ربنا يتقبل منا جميعاً ويلهمنا طاعته وحسن عبادته
وكل عام وانتي بخير

لـــولا وزهـــراء يقول...

حبيبتي امة الله مونايزا...كل عام وانتي بخير وسعادة
انا مش مصدقة !! اخيراا نورتيني هناك!!!
انا بجد معرفش سبب مقنع للمقاطعة دي .. ههههه ربنا يعزك يارب

كلامك جمييييييييييييل جداَ عن استمرار الروحانيات بعد رمضان وامثلتك بهرتني ربنا يعزك.

بس ليا ملحوظتين بصي ياقمر ... ال6 البيض ليهم وقت معين بيتصاموا فيه وهو شهر شوال فقط.
اما قضاء رمضان له كل ايام السنة فالاولى اننا نصوم ال6 في الشهر المخصص والقضاء في باقي ايام العام
وينفع برضوا الجمع بنيتين واكتر في الصيام وده رأي فقهي لا يحتمل رأي شخصي مني.
ياعني الاراء دي شرعت للتيسير وما شاد الدين احد الا غلبه
ياعني زي لما حد يروح يصلي جماعة ويلاقي الامام سبقوا ميقولش الاولى اني اصلي لوحدي عشان اتم الاربعة لأ لاالدين قاله صلى وتمم ما فاتك وهكذا.
وربنا يوفقنا لما يحب ويرضى
لولا

قطرة وفا يقول...

طبعااا لازم نكمل الفرض و بعد كدا المستحب

و انا بعرف من زمان انو اللي بيصوم الفرض بأيام مستحب فيها الصيام ياخد أجرين :)

و إن شاء الله صح و ربنا سبحانه و تعالى كريم يدي كل حد على قد نيتو و على قد استحقااقو :)

و تعرفي أريح حاجة الواحدة تصوم بأقرب وقت الفرض عشان ترتاح بجد ... الدين شي تقيل بجد

ربنا يتقبل منا و منك صالح الأعماااااااال إن شاء الله :)


* مين أول واحد هتحرص على تهنئته بالعيد؟ و ما هى كيفية التهنئة.. يعنى زيارة ولا بالتليفون ولا برسالة سواء على النت أو على الموبايل؟.

مفيش بجد ... كلنا تعايدنا ... بس أحلى عيدية كانت من بابا لأنو اتصل فيا عشان يقولي النهاردة ان شاء الله أول ايااام العيد ... فرحني الخبر دا اوووي بجد ... و صاحباتي بعتوولي مسجات و تعايدنا على المسؤول الرسمي للعيد الأستاذ فيس بوك :P

واحشاني مدووونتك بجججد ...

و بانتظار موااااضيعك الجاية


كل سنة وانتي بألف خير و مبروووك العيد

وان شاء الله تفرحي و نفرح بيكي بجـــــــــــد :)

ستيتة حسب الله الحمش يقول...

السلام عليكم ورحمة الله وبركاته
أولا كل عام وانت بخير
ثانيا تقبل الله منا ومنكم صالح الأعمال
ثالثا لي رأي في مسئلة قضاء ما على النساء من ايام افطار حال الحيض في شوال

من زماااااااااااان جدا وانا عارفة وسامعة من الشيوخ ان مفيش مشكلة اننا نقضي ما علينا في اي وقت وان السيدة عائشة كانت تقضي ما عليها في شعبان الذي يليه

ثم في السنوات القليلة الماضية خرج اصرار جامد جدا على الستات بيقول ازاي تصومي نفلا قبل فرضا؟

طيب انا بالعقل وبدون البحث عن دليل كنت بتخانق مع اللي مصمم ومصر على ان الفرض اولى من النفل
واقول يا عم الحاج النفل وقته ها يخرج ان انقضى شوال والفرض امامي عام كامل اقضيه
يعني يا سيد
يا بيه
يا محترم
يا ستو هانم
انتوا لما بتصعبوها انا بصوم اللي عليا وهوب بطاريتي تفضى وزيي كتير
ومش كل انسانة تقدر تصوم من 12 ل 15 يوم بعد رمضان
والحقيقة دايما كنت بمشي برأيي لأني عارفة ان الدين يسر وليس عسر
وان ربنا سبحانه خالقنا وعارف مقدرة كل منا وضعفه
ولأني متأكدة من سماعي حديث السيدة عائشة

عن عائشة ضي الله عنها قالت : ( كانَ يكونُ عليَّ الصَوْمُ مِنْ رَمَضانَ فَما أسْتَطِيعُ أن أقْضيَ إلاَّ فِي شَعْبَانَ) ـ الشغل من رسول الله صلى الله عليه وسلم أو برسول الله صلى الله عليه وسلم ـ.من كلام يحى بن سعيد أخرج الحديث الشيخان، وغيرهما.
وفي رواية للترمذي وابن خزيمة من طريق عبد الله البهي عن عائشة، أنها قالت: ( ما قضيت شيئا مما يكون عليّ من رمضان إلا في شعبان حتى قبض رسول الله صلى الله عليه وسلم).

وأدي كلام ابن حجر
" وفي الحديث دلالة على جواز تأخير قضاء رمضان مطلقاً؛ سواءً كان لعذر أو لغير عذر، لأن الزيادة كما بيناه مدرجة. فلو لم تكن مرفوعة لكان الجواز مقيداً بالضرورة لأن للحديث حكم الرفع، لأن الظاهر إطلاع النبي صلى الله عليه وسلم على ذلك؛ مع توفر دواعى أزواجه على السؤال منه عن أمر الشرع، فلولا أن ذلك كان جائزاً لم تواظب عائشة عليه".

------------------------
معلش ها أطول سامحيني

أما عن جواز جمع نية القضاء مع نية صيام التطوع وهو الأيام البيض فلا يجوز حسب ما سمعت من زمان برضه
وذلك لأن القضاء فرض والايام البيض نفل
ولكن اللي يجوز هو جواز نية نفلين
يعني مثلا جاء يوم عاشوراء وكان يوم اثنين وواحدة نذرت ان تصوم الأثنين والخميس من كل شهر
ساعتها يجوز تجمع النيتين لأنهما نفلا
والله اعلم
وربنا يعلمنا ما جهلنا وينفعنا بما علمنا ويزيدنا علما

ولو عرفتي شيء يخالف ما قلت ياريت تعرفيني علشان انتي عارفاني
مش عارفة ونفسي اعرف :)

تحياتي

ستيتة حسب الله الحمش يقول...

معلش اكمالا لإزعاج ها تستحملي مني حتة نونو
ونراجعها مع بعض برضه
انتي قلتي وكأنه ضمن ان يعيش لشعبان الذي يليه
وإن توفاه الله
برضه يصوم عنه ولده او حد من اهل بيته وقد اجازها رسول الله صلى الله عليه وسلم
وانا مش بقول نأخر متعمدين
انا بقول كل واحد ربنا يبارك له في ايامه ويبارك له في صحته ووقته وكل ما رزقه وبرضه ربنا سبحانه وتعالى رحمن رحيم
ما خير رسول الله صلى الله عليه وسلم بين أمرين إلا أخذ أيسرهما ما لم يكن إثما فإن كان إثما كان أبعد الناس منه

ومعلش انا اسفة لو كنت اطلت
اهو ده تعليق بغيابك الشهر كله :)

د/عرفه يقول...

كل سنة وانتى طيبة
موناليزا

ويارب ايامك كلها اعياد


ومعذرة للغياب الطويل



ملاحظة
انا كمان غير مقتنع
بتعدد النوايا
فى صيام ال6 ايام بتوع شوال مع ايام رمضان الفائتة

لانه يجوز تعدد النوايا مع السنن
لكن ايام رمضان دى فرض مش سنة


وجزاكم الله خيرا
على التذكرة

موناليزا يقول...

مستر بريزيدنت
ــــــــــــــــ
أهلا بيك يافندم
مع احترامى لرأيك إزاى ممكن أعدد النية فى فرض يعنى هل ممكن وانا بصلى الفجر انوى انها هتكون ركعتين استخارة او قضاء حاجة

حمدالله على السلامة وعذرك معاك:)
أشكرك جدا لتعليقك



***************************


كيارا
ـــــــ
أهلا اهلا بالقمر
وانتى طيبة ياحبيبتى وبكل الخير
نورتي مدونتى واسعدنى تواجدك


*******************************


سمية قهوة
ـــــــــ
أهلا بيكِ
وأنتِ طيبة ياحبيبتى والشكر لله فماتوفيقى الا به
نورتي مدونتى وفى انتظارك دائما


*********************************

علاء سالم
ـــــــــــ
وعليكم السلام ورحمة الله وبركاته
أهلا بيك أستاذ علاء
الله يكرمك فما توفيقى الا بالله
عندك حق فيه ناس بتصوم رمضان بالعافية أصلا

تقبل الله منا ومنكم صالح الاعمال
وكل عام وانتم بخير
أشكرك جدا لتعليقك


********************************


لولا وزهراء
ـــــــــــــ
أهلا اهلا بالقمر
كل سنة وانتِ طيبة ياحبيبتى
:) كنت أجازة من النت

ربنا يعزك يارب ويرزقنا حلاوة الايمان دائما

عندك حق ياحبيبتى أنا فعلا بتكلم من وجهة نظرى الخاصة لانى بشوف أمثال قدامى بيأجلوا الأيام اللى عليهم لآخر شعبان وممكن ينسوا كمان أو تحصلهم ظروف يخليهم مايعرفوش يصوموا فعشان كده بقترح للى يقدر يصوم اللى عليه على طول

تسلميلى حبيبتى
وفى انتظارك دائما



*********************************


قطرة وفا
ـــــــــــ
أهلا اهلا بالقمر
ماهو ده اللى انا اقصده ان نخلص ديونا أول بأول لان محدش ضامن عمره:)

أشكرك جدا لمشاركتك
ويارب يكون عيد سعيد علينا جميعا



*********************************


ستيتة حسب الله الحمش
ــــــــــــــــ
وعليكم السلام ورحمة الله وبركاته
أهلا اهلا بنبض الحكمة
وحشتييييييينى جدا حبيبتى
ومالقتش رابط التعليقات فى موضوعك الاخير عشان نهنيكى بالعيد.. ده ينفع:)

أنا بشكرك بجد على تعليقك ومشاركتك
بالنسبة لقضاء الايام الفائتة انا معاكِ انها ممكن تكون لغاية شعبان اللى بعده بس فيه ناس بجد بقت تستعبط وماتصومش الايام الفائتة رغم حرصها على صيام الست ايام من شوال فالكلام فى الغالب ليهم لان صيام النافلة مش هيغنى عن صيام الفريضة فالأولى انهم يصوموا الفريضة
واستكمالا ياستى فيه ناس بتفطر ومابتعملش اعلان انها فطرت فبالتالى محدش يعرف لو هى ماتت عليها كام يوم

ايوة كده ياحبيبتى وصلنا لاتفاق واضح اللى يقدر يصوم ما يأجلش الفريضة

وبجد نورتينى واسعدنى تعليقاتك وفى انتظارك دائما
وكل عام وانتى بالف خير ويارب يكون عيد سعيد علينا جميعا


**************************


د/عرفة
ــــــ
أهلا بيك يادكتور بعد طول غياب
أشكرك جدا لتعليقك
وكل عام وانت بخير وتقبل الله منا ومنكم صالح الاعمال
وفى انتظاركم دائما

ahmed_k يقول...

كل عام وانتي بخير يا موناليزا
وعيد سعيد عليكي وعلى كل أحبابك

معلش زيارتي دلوقتي خاصه بالتهنئه
ولكن لي عوده لقرائة الموضوع بإذن الله
تحياتي

الازهرى يقول...

عندما يختلف الأئمة فلنا أن نأخذ بالرأى الراجح أو الذى ترتاح إلأيه قلوبنا عند التساوى
ولكن لا يوجد أن نأخذ برأى آخر لأنه لا يعجبنى الرأى الأول

أول واحد كنت حريص على زيارته زميل لى كان مسافر ورجع امبرح فرحتله وأنا راجع من صلاة العيد

كل سنة وأنت وكل أحبابك فى فرح وسرور

طوبه فضه وطوبه دهب يقول...

ما ينفعش يجى عيد ويبقى سعيد من غير ما نقول لاجمل مناليز كل سنه وانتى بالف خير وفى احسن حال

قوس قزح يقول...

كل سنة و انتى طيبة و بخير
ربنا يسعد ايامك يارب
انتى كمان وحشااانى :)

Butterfly يقول...

كل سنه وانتى طيبه وعيد سعيد

Unique يقول...

أسال الله تعالى أن تتجد حياتنا دوماً في طاعته

تقبل الله منا ومنك.. وكل سنة وأنتِ أطيب

المجاهد الصغير يقول...

السلام عليكم
كل عام وانتم الى الله اقرب وعلى طاعته ادوم
وفقكم الله
عيد سعيد

sweet angel يقول...

كل سنه وانتي طيبه

ليس فقيرا من يحب يقول...

كل سنه وانتى طيبه ياروح قلبى

عودا احمد ونورتى من تانى

عيد سعيد عليكى وعلى كل حبايبك

بصى هو الاختلاف فيه رحمه وانا عن نفسى بافضل اجمع النوايا فى بعض الحاجات لكن فى الصيام او الصلاه لا مش باعدد النيه

السؤال اول حد باعيد عليه بتكون امى وجدتى ودول باروح احضنهم واهريهم بوس ههههههههههه وخمسين كل سنه وانتى طيبه كل لما ابص فى وش حد منهم اقول كل سنه وانتى طيبه لحد ما يزهقو ههههههه
اصحابى بقى وقرايبى وكده بيبقى تليفونات واوفلاينات على الميل وتهنئه على الفيس والمدونات

مرايتى يقول...

كل سنه وأنت طيبه وبخير يا مونى

عيد سعيد

د. ياسر عمر عبد الفتاح يقول...

جزاكِ الله خيراً


كل عام وحضرتك بخير
تقبل الله منا ومنك صالح الأعمال

أحمد شريف يقول...

بوركتِ وربنا يتقبل منكِ يا رب

وعيد مبارك وكله خير ورحمة وبركة عليك وعلى كامل أسرتك

*الطالبة عفو الله *زوزو يقول...

كل سنة و انت طيبة يا حبيبتي و كل سنة و انت الى الله قريبة
تقبل الله منا و منكم صالح الاعمال
وحشتيني و يا رب ما تغيبي علينا تاني و منورانا

دمت بود يا غالية

ذكري رحيل قلم يقول...

السلام عليكم
كل سنة وانت طيبة يا حبيبة قلبي انت كمان وحشتيني قوي ربنا يفرحكيما ويكون عيد سعيد عليكي وعلي كل من حولك

ذكري رحيل قلم يقول...

جزاكي الله خير علي التذكرة والوضوح انا كمان معرفشي اعدد النية في الصيام كمان فعلا الفرض شيء والنافلة شيء اخر ممكن في صلاة النافلة اعدد النية في صلاة حاجة واستخارة لكن في الصوم تختلف كتير

اللهم تقبل منا سائر اعمالنا وزدنا في الايمان ولا تنقصنا اللهم امين

دمتي بحب وحياة مشرقة ومنيرة

بسنت يقول...

كل سنه وانتى طيبه
وبالنسبه لصيام السته ايام من شوال فالفتاوى بها كثيره
بس ربنا يقدر الجميع على الصيام وتجديد النيه لثبات مابعد رمضان دا الاهم

norahaty يقول...

كُلِّ عَـامّ وَأَنْتُمْ بِخَيْرٍ
عَيْــدُ سَعَــــيَدَ
بِاذْنِ
الْلَّهِ
سُبْحَانَهُ وَتَعَالَىْ
أَعْلَمُ أَنِّىٓ تَأَخَّرْتُ قَلِيْلا
وَلَكِنَّ كُلَّ لَحْظَةٍ وَأَنْتُمْ بِخَيْرٍ

MR.PRESIDENT يقول...

علي فكرة أنا قلت مينفعش تعدد النية وكل اللي قلت له
إننا محتجين رأي شرعي والله .
لكن فيه عموما فسحه في الإسلام ورحمه .

--------------
ثانيا

واجب اختياري لو مكنتوش حلتوه وأنا غيرت فيه سؤال
لمعرفة إطلاعتكم فلو عايزين تحلو خير وبركه ، ولو مش عايزين متقلقوش الواجب مش هيتحط في أعمال السنة .
ما هي كتب الطفولة التي بقيت عالقة في ذاكرتك؟
مَنْ أهم الكتاب الذين قرأتَ لهم ؟
من هم الكتاب الذين قررت ألا تقرأ لهم مجددا؟
في صحراء قاحلة ، أي الكتب تحمل معك؟
ما هو الكاتب الذي لم تقرأ له أبدا ، وتتمنى قراءة كتبه ؟
ما هي قائمة كتبك المفضلة ؟
ما هي الكتب التي تقرؤها الآن ؟
اللي بعت الدعوه ؟
أرسل الدعوة لمدون واحد علي الأقل من أجل مشاركتنا باطلاعهم في القراءة ؟

richardCatheart يقول...

كل سنه وانت طيبه يا موناليزا

ياب ينعاد بالخير

كلمات من نور يقول...

عيد سعيد يا موناليزتي الغالية

صح كلامك للنساء وطبعا للرجال اللي كانوا على سفر أو مرضى وفطروا في رمضان

http://mhg1962.ba7r.org/montada-f46/topic-t1840.htm#9006

نيجي للأسئلة

أول إنسان بحب أعيد عليه هو والدي ووالدتي ببعتلهم ماسيجات وباكلمهم عالتليفون أو الموبايل لو مش في البيت و طبعا الأعمام والعمات و الخالات وخالي وووووووو

الناس المسافره الموبايل او الماسنجر او الإيميل ...والكبار منهم المكالمة عالموبايل وووووووو

كفايه عليكي بقى الا مش حاخلص كلام ..كل سنة وانتي موناليزتي الغالية لقلبي

akeed يقول...

السلام عليكم و كل عام وانتِِ بكل خير و جزاكِ الله خيرا على التذكير بارك الله فيكِ اختى الكريمة

موناليزا يقول...

أحبائى فى الله
تقبل الله منا ومنكم صالح الاعمال
وكل عام وانتم جميعا فى خير وهنا وسرور
نورتونى واسعدنى تواجدكم
وماحرمنى الله من تعليقاتكم
فى انتظاركم دائما