دورة الحياة

تشرق الشمس كل صباح. جملة بديهية ولا تدل على أى معلومة جديدة. ولكن إذا تفكرت فيها فستجد أن هذا يعنى بأن دورة حياتنا مستمرة باستمرار شروق الشمس وغروبها وذلك كل يوم ولا تنقطع إلا بانتهاء المدة الإفتراضية لوجودنا فى هذه الحياة.

يعنى لازم كل يوم آكل وأشرب وأنام وماينفعش آجى فى يوم وأقول أنا مش هاكل النهاردة عشان أنا أكلت إمبارح مثلاً لأن جسدى له حق عليا كل يوم.وهكذا فى بقية الغرائز الجسدية التى يجب أن تؤدى فى اليوم الواحد أكثر من مرة وليس مرة كل أسبوع أو كل كام يوم لأنها لو ماتعملتش فى وقتها الطبيعى اللى الجسد بيكون محتاجها فيه مع مرور الوقت هيصاب بالأمراض وبعدها هتكون النتيجة الطبيعية هى الموت .

وكما للجسد حق فاللقلب وللروح أيضاً حق وهذا يكون بالعبادات التى تنير القلب وتسمو بالروح وهذا يتطلب أن تكون أيضا بصفة مستمرة. يعنى ماينفعش أصلى النهاردة كل الفروض فى أول الوقت وآجى بكرة وماأصليش وأقول ما أنا صليت إمبارح.. وهكذا فى سائر العبادات لأن العبادات وكيفية التقرب إلى الله مستمرة باستمرار حياتنا.

يعنى ما ينفعش أعبد ربنا كويس أوى فى شهر رمضان وآخد أجازة بقية شهور السنة لأن رب رمضان هو رب بقية الشهور..

ولذلك أذكر نفسى وإياكم بتجديد العهد مع الله مع كل إشراقة شمس يوم جديد طالما فى العمر بقية.

************************

كلمة للنساء خصوصاً وللرجال عموماً:

ــــــــــــــــــــــــــــــــــــــــــــــــــــــــ

طبعاً كلنا عارفين ثواب صيام ست أيام من شوال.. بس أنا عايزة أفكركم بحاجة مهمة أنه ماينفعش أصوم نافلة وأنا عليا فريضة..

يعنى فيه ناس ممكن تكون فطرت أيام فى رمضان نتيجة لأى سبب شرعى وده معناه أن صيامها مش هيترفع لربنا غير لما تبقى تصوم الأيام اللى فاتتها.. وفيه ناس كتير للأسف بيأجلوا الصيام ده لغاية شعبان الجاى و ده لو افتكروا يصوموا كمان وكأنهم ضامنين عمرهم لكمان أسبوع جاى.. وعشان كده ياريت اللى عليه أيام من رمضان يصومهم قبل ما يصوم الست أيام من شوال لأن مش معقول أصلى سُنة العشاء مثلاً وأنا أصلاً ماصليتش المغرب.

صوموا الفريضة الأول وأتموا شهر صيامكم وبعد كده صوموا النوافل زى ما يعجبكم.

فيه رأى سمعته بيقول أن ممكن نعدد النية فى صيام ست أيام من شوال وندخل معاهم صيام الأيام الفائتة لكن أنا غير مقتنعة بالرأى ده لأن مش معقول هيتساوى واحد صام شهر رمضان كامل وأتبعه بست ايام بواحد تانى ماصامش رمضان كله وأتبعه بست ايام.. لمزيد من التوضيح لأن فيه ناس الرأى ده جاى على هواها أوى.. معقول واحد صام 30 يوم فريضة و6 نافلة يعنى36 يوم هيتساوى باللى صام مثلاً 25 يوم فريضة و6 نافلة يعنى 31 يوم!!.

فياريت نخلص ديونا ونصوم اللى علينا أول بأول.وياريت كمان بلاش بعد ما نصومهم ورا بعض وبعد الإنتهاء منهم نقول أنا هعيد بكره لأن العيد خلاص كان فى أول شوال وبلاش نبتدع حاجة مش موجودة فى الدين. وعلى فكرة محدش يسميهم الأيام البيض لأن الأيام البيض دول هما 13 و14 و15 من كل شهر عربى.

على الهامش:

ـــــــــــــــــــــــ

وحشتوووووونى جداً.. وربنا يتقبل منا ومنكم صالح الأعمال.. ويارب يكون عيد سعيد علينا جميعاً..

وكل عام وأنتم جميعاً بخير وصحة وسعادة.

سؤال جانبى :

ــــــــــــــــــــــ

* مين أول واحد هتحرص على تهنئته بالعيد؟ و ما هى كيفية التهنئة.. يعنى زيارة ولا بالتليفون ولا برسالة سواء على النت أو على الموبايل؟.