الأربعاء، 29 سبتمبر 2010

مكتوب


مكتوب
أقتل أملى فيك
أدبح حبى ليك
ويوم لما أنزف
أعرف أنى
دبحت قلبى
لما قالى عليك
وعاد لى
إنه فى هواك تملى
يتمنى يشوفك سعيد
وســــاعـــــات
بحب حزنك
لأنه بيقربنى منك
بحس ساعتها إنك
محتاجلى
أو حتى حابب تصارحنى
باللى فى قلبك وشاغلك
بس أعمل إيه
حبى ليك
لازم يموت
لأنه ماينفعش
يعيش فى سكوت
فكان لازم
أقتل ابنى بإيدى
أكتم صرخة وليدى

غصب عنى
علشان تعيش
محتاج حنان
محتاج رعاية واهتمام
محتاج صدق ووفا
محتاج حضن ودفا
محتاج حب وإخلاص
محتاج تقول للناس
أنا موجــــــــــود
ولأنك مش موعود
إنك تعيش فى خلود
كان لازم تموت
------------
رسالة لصاحبات القلب المرهف والإحساس الصادق:
* لو حُبك ماكنش فى النور وقدام أهلك وأهله هيفضل طول عمره فى الضلمة.
* حبك الكتير ده لازم يكون لزوجك وبس قبل كده هيبقى إهدار لمشاعرك.
* خدى قرارك بالبعد ولو هو بيحبك هيدخل البيت من بابه .
* إياكِ تكونى رخيصة تحت عنوان إنك بتحبيه وماتقدريش تستغنى عنه.
* لو كلمتيه فى الخفاء يبقى بتعملى حاجة غلط والغلط عمره ما بيعيش.
* طالما عارفة النهاية المحتومة مسبقاً بالفراق لا داعى للاستمرار فتحطيم القلب ومداواته ليس بالسهولة التى تجعلك تجازفين به.
* وأخيراً ليس كل مايتمناه المرء يدركه فلا تبكى على ماليس لكِ.

هناك 17 تعليقًا:

د. ياسر عمر عبد الفتاح يقول...

كلام مظبوط بقى
كفاية هطل وعبط

كمية الطاقات المهدرة والأوقات الضائعة والأماني المهدمة بسبب ما نسميه (حب) فاقت الحد

الحب الحقيقي في النوووووووور

أنا - الريس يقول...

لو شغلنا بحب الله لن يكون هناك مكان لاحد اخر .. فندعو الله ان يمن علينا حبه وحب من يحبه وحب كل عمل يرقبنا لحبه

Unknown يقول...

اولا احساسك مرهف كالعادة
وبجمال جداا يا منى
بجد احساسك عالى اوى
اما عن نصايحك فهى غالية لا يفقها غير من حطم قلبهم على صخرة الالم والخيانة او حتى خيبة الامل
بجد نصائح من ذهب
تحياتى وحبى

ليله شتاء يقول...

السلام عليكم

الله على كلامك ياريت كل بنت تشوف وتقرأ وتعرف أنه قدر ونصيب

*****

ر بنا يعفى كل القتيات من المهازل اللى بتحصل دلوقتى
**لا تواعدهن سرا**

دمتى بخير

سواح في ملك اللــــــــــــــــــه- يقول...

السلام عليكم لي وجهه نظر فيما تكتبين كلام جميل جدا لكن تنفيذه في هذه الاوقات صعب جدا فقد تفشي الحب بين الفتيات المراهقات والفتيان كالوباء كانه محطه في حياتهم يجب عليهم المرور عليها واصبحت الرذيله لاتشين احد وانا لا لن الوم هؤلاء علي مايفعلون فالاساس ضايع فالاب لم يربي من البدء علي العيب والحرام والام لم تقوم بدورها التربوي والمدرس فقد نفوذه والشيوخ او المشايخ فقدوا مكانتهم كان اهل الجاهليه في الماضي يعبدون الاصنام وفي زماننا هذا هناك ايضا اصنام (( المال والجنس )) وانصرفوا الناس عن كل فضيله بعبادتهم لهذه الاصنام واعتقدوا انها تضر وتنفع واعتقدوا انه لااامان بدونها ولااحد يتعظ هل من يرقد في قبره الان احصنته امواله ؟ شكرا لكي  

داليـ ـ ـ ـ ـ ـ ــــا يقول...

برافوووووووو
مافيش راجل يستاهل الحب الكبير ده الا فى شرع الله وتحت ظله

زهرة يقول...

بجد مبسوطة أوى بالبوست دة

لانه صح جداً والله ومنطقى

تسلم إيدك ياحبيبتى

رفقة عمر يقول...

عزيزتى موناليزا
شكرا ليكى جدا على سؤالك عنى
جزاكى الله عنى خير الجزاء
بصراحه كلامك دايما جميل
بس احيانا تحبى خطيبك ولا يكون بينكم نصيب يعنى مش لازم يكون الحب فى الضلمه ممكن يكون هناك حب حلال ولكن ايضا لا يدوم
ربنا يجمع كل المحبين فى الحلال ويديم عليهم نعمه الحب
اللهم امين

Unknown يقول...

مؤيدك تماما أختي الكريمة..
وإن كنت أعتقد أن من وقعت في بئر الحب فعلا يصعب أن تجيبك إلى طلبك أو نصائحك!!!
أتمنى أن تقرؤه من هي على الأعتاب لعلها تتعظ..!
كعهدنا بك تبغين الخير لمن حولك .. فجزاك الله خير الجزاء على ما تقدمين من نصائح قيمة..

تحياتي.

كلمات من نور يقول...

لا لا لا موناليزتي من غير أسئلة؟؟؟مشعقول مش مصدقة عيني ..هههههههه

بوست من نور يا موناليزتي ربي يكرمك ويعظم لكي نورا دائما ...لو ملينا قلوبنا بحب الله أول شيء حنعمله إننا نعيش في النور وصح وتاني شيء ربنا حيعصمنا من الخطأ علشان احنا حنكون وقتها ماشيين بنور الله ..تسلم ايديكي

الظل يقول...

عجبتنى أوى النصايح بتاعت حضرتك

والقصيدة دى جميلة جدا

ربنا يبارك فيكى وف موهبتك

Alaasalim2 يقول...

السلام عليكم

كلمات جميله ونصائح غاليه بجد لكل بنت ولكل رجل أيضاً
فما هو محرم على النساء محرم أيضاً على الرجال
وما يجرح المرأه يجرح الرجل

الحب شيئ جميل جداً وهو متعة لا نهائيه للقلب والروح والوجدان
ولكن من يعطي حبه في غير موضعه الصحيح كمن يصعد بقلبه ومشاعره إلى قمة عاليه ثم يلقيهم من فوقها ليصلا إلى الأرض محطمين

الشاعر الفنان أحمد فتحى فؤاد يقول...

صح كده

برافو عليكى .. هو ده بالضبط الكلام اللى لازم يتقال لصاحبات القلب المرهف و الغير مرهف كمان

انا معاكى قلبا و قالبا ... فنحن فى الزمن الصعب ... الزمن اللى مابقاش فيه أى أمان

أحييكى و أهنيكى

دمتى بخير

طوبه فضه وطوبه دهب يقول...

عندك حق فى كل كلمه تسلم ايديكى وعنيكى ياحبيبتى

Unknown يقول...

ربنا يحفظ قلوب البنات .. و يعينهم على العفة و الثبات على الطريق الصح .
:)
تسلمي يا موناليزا

موناليزا يقول...

أحبائى فى الله
أشكركم جدا لاتفاقكم معى
وربنا يهدى الشباب جميعا ويحمى قلوبهم من أى ألم
نورتونى وأسعدنى تواجدكم
فى انتظاركم دائما

زينب علي حبيب يقول...

جميلة :)



دمت بحفظ الرحمن :)