الاثنين، 17 يناير 2011

حياة فى الجنة


أطمع كثيراً فى رحمة ربى ألا يعاملنى بعملى ويعاملنى برحمته فيدخلنى الجنة.. وكثيراً ما أتخيل نفسى هناك مع الأحبة.
مع النبى صلى الله عليه وسلم وأقوله: كنت لنا نِعم القدوة فأخلاقك فى جميع المواقف تدعونا للإنبهار والفخر بأننا من أمتك لكن للأسف غالبية من تعاملت معهم فى الحياة الدنيا لم يتخذوك قدوة إلا فى إعفاء اللحية وتقصير الثوب!!.
والسيدة خديجة وهقولها: كنتِ نِعم الزوجة.
والسيدة عائشة وهقولها: كنت بغير منك أوى على حب زوجك ليكِ ولأن يوم ما اتظلمتى ربنا نزل برائتك فى قرآن يتلى ليوم الدين.
فاطمة بنت محمد وأقولها: كان نفسى أوى أكون مكانك وأحظى بحب النبى كأب كما كان يفعل معاكِ.
وسيدنا عثمان بن عفان وأقوله: أنت غالى عندى أوى وكان عندى إحساس قوى جداً وأنا فى الدنيا أنى حفيدتك.
و"آل ياسر" وأصحاب الأخدود وأقولهم: ما أجمل صبركم النادر وبجد وجعتوا قلبى لما عرفت اللى حصلكم.
والسيدة مريم وأقولها: كيف استطعتى أن تعيشين وسط أهلك وهم يتهموكى بما ليس فيكِ رغم أن دليل برائتك كان واضح.
وخالد بن الوليد عايزة أشوفه .
والرجل الصالح الذى ذكر فى سورة "يس" ولم يذكر اسمه وهقوله: كنت دايما بردد كلمتك" ياليت قومى يعلمون".
سيدنا يوسف هقوله :كنت قصادى دايماً مثال للصبر على الظلم.
وهند بنت عتبة وأقولها: كانت شخصيتك شرسة و قوية قبل الإسلام وبعد الإسلام قلتى كلمة وزنها ذهب
" أو تزنى الحرة" لما قولتيها وأنتِ بتبايعى النبى.
أسماء بنت أبى بكر وأقولها: كنتِ قوية وجريئة وشجاعة حينما أخذتى لقب"ذات النطاقين" وكنتِ أم قوية جداً فاكرة لما قلتى لابنك"هل يضر الشاه سلخها بعد ذبحها".. كلمة لا يقولها أشجع الرجال ولكنك قلتيها.
سيدنا إبراهيم وهقوله: ياترى شعورك إيه بعد ما كان نفسك فى طفل فرزقك الله الذرية الطيبة وجعلك أبو الأنبياء.
والسيدة هاجر والسيدة سارة وياترى علاقتهم ببعض داخل الجنة شكلها إيه.
وهذهب لألقى السلام على أستاذى عمرو خالد ونروح مع بعض للنبى عليه الصلاة والسلام وأقوله يا رسول الله الرجل ده هو اللى عرفنى سيرتك وعلمنى إزاى أحب دينى.

بعد مقابلة الأحباء

هذهب لرؤية قصورى فى الجنة وأستبدل ملابسى وابدأ الاستمتاع بممتلكاتى..
هنزل البحر واعمل حركات بهلوانية فى الهواء كالدولفين ثم أغطس فى القاع لأشاهد الأسماك الملونة.
وبعد كده أطلع من البحر ناشفة وفى ثانية ملابسى تستبدل .
ثم أمتطى ظهر حصانى اللى مستنينى على الشط ويطلع يجرى بيَّ. إلى أن يوصلنى لحديقة كلها زرع مليئة بالأطفال ..أنزل من عليه وأجرى ألعب معاهم ثم أتسلق الشجر وأنتقل من شجرة لأخرى كـ" طرازان" إلا أن أصل لشلالات المياه وأنزل عليها كأنى فى الملاهى.
واركب على بساط سحرى ليطير بى ويذهبنى إلى قصرى ومنه إلى غرفتى التى ستكون جدرانها زجاجية وأستطيع من خلالها مشاهدة عالم البحار من كل جانب..
وأعمل عزومة لكل أهلى وأحبابى وهتكون عبارة عن آيس كريم وشيكولاتة ..
وبعد كده هلعب مع الحيوانات اللى كانت فى الدنيا مفترسة وهكون مربية عندى فى القصر نمور وقطط وأتفرج هيتعاملوا مع بعض إزاى.. وهركب على الفيل واستخدم زلومته كدُش مائى.. وطول الوقت السماء بتمطر ورق ورد وبالونات ملونة....

ياااااه قد إيه مشتاقة للجنة.. طبعاً كل هذا مجرد حلم ولا أدرى نسبة إحتمالية حدوثه لأن فى الجنة مالاعين رأت ولا أذن سمعت ولا خطر على قلب بشر ولكنى أتخيل فى حدود قدراتى الحالية.

اللهم أنى أسألك مرافقة نبيك صلى الله عليه وسلم فى أعلى جنة الخلد.
اللهم أنى أسألك رضاك والجنة.
اللهم أنى أسالك رضاك والجنة.
اللهم أنى أسألك رضاك والجنة.


سؤال جانبى:
شاركنا تخيلاتك لحياتك فى الجنة؟.

هناك 18 تعليقًا:

TIMMY !! يقول...

ياااااااه

بس احنا ندخلها بس ,

أو حتى ما ندخلهاش , كفاية إننا ما ندخلش النار

فمن زُحزح عن النار و أُدخِل الجنة فقد فاز

مصطفى سيف الدين يقول...

ياااااااه
بصراحة انا بارتجف لسه مش عارف هاكون عارف اكتب التعليق ولا لاء
ده من اجمل البوستات اللي شفتها
يا رب نسالك رضاك والجنة
عارفة يا موناليزا لو ربنا حاسبنا بعملنا محدش هيطول الجنة لكن نتمنى ان ربنا يحاسبنا برحمته التي وسعت كل شيء
تحياتي ليكي وتقديري ليكي
ربنا يدخلنا الجنة جميعا ويسعدنا في الدنيا والآخرة
شكرا ليكي بجد

Carmen يقول...

ربنا يجعلنا من عباده الصالحين ويجعلنا من اهل الجنة:)
جزاك الله خيرا حبيبتي

هبة فاروق يقول...

بارك الله فيكى بوست جميل

eng_semsem يقول...

ربنا يجعلنا جميعا من اههل الجنه ويغفر لنا خطايانا ونشرب من يد رسول الله
تقبلي تحياتي وتمنياتي
وطبعا اتمنى اني اشوف الرسول وبرده اللي نفسي اقابله سيدنا عمر بن الخطاب

Tota يقول...

قد ايه البوست دا رقيق اوى وجميل وعشمنى انى ادخل الجنة ويارب نكون جميعا من اهل الجنة ويجعل البوست الجميل دا فى ميزان حساناتك يا موناليزا بس ع فكرة انا زعلت لما قرأت البوست لانك ما ذكرتيش فيه عمر بن الخطاب لانى بحبه جدااااا وبحب شخصيته اوى ودايما بتخيل شكله وكمان على بن ابى طالب ..

غير معرف يقول...

اللهم ارزقها الجنة
اللهم ارزقنا الجنة
اللهم ارحمنا اللهم ارحمنا اللهم ارحمنا

غير معرف يقول...

تقبل طاعتك و جعلك مع من تحبين

مصممة أحلام يقول...

"فمن زحزح عن النار و أدخل الجنة فقد فاز"
صح يا رب احنا بس ندخلها
مش بعملنا بس برحمة ربنا و كرمه
و يا رب نتجمع فيها مع كل من أحببناهم في الله و من اشتقنا لرؤيتهم
جزاكي الله خير

موناليزا يقول...

تيمى
ــــــــ
أهلا بيك يافندم
كن طالب دؤوب يسعى للحصول على المركز الأول
كان دايماً مدرس عندنا يقول لو حبيت تجيب جيد ذاكر مذاكرة اللى عايز يجيب امتياز ولو عايز تنجح ذاكر مذاكرة اللى عايز يجيب جيد
وهكذا إذا سألتم الله الجنه فاسألوه الفردوس الأعلى

رزقنا الله واياكم الفردوس الأعلى

أشكرك لتعليقك يسعدنا دوام التواصل



*****************************

مصطفى سيف
ــــــــــــــ
أهلا بيك أستاذ مصطفى
ربنا يعزك يارب والحمدلله الذى هدانى هذا
ده حقيقى محدش هيدخل الجنة الا برحمة ربنا
رزقنا الله صحبة النبى فى أعلى جنة الخلد
ربنا يكرمك واشكرك جدا لتعليقك
يسعدنا دوام التواصل


*****************************


كارمن
ـــــــــ
أهلا بيكِ ياسمسمة
ربنا يكرمك ويتقبل دعائك اللهم امين
نورتينى حبيبتى وفى انتظارك دائما


****************************


هبة فاروق
ــــــــــــ
أهلا بيكِ ياهبة
ربنا يكرمك يارب
فماتوفيقى الا بالله
أشكرك جدا لتعليقك
فى انتظارك دائما


********************************

انج سمسم
ـــــــــــ
أهلا بيك ياباشمهندس
ياااااارب يافندم
ربنا يرزقنا جميعا صحبة النبى فى أعلى جنة الخلد
أشكرك جدا لتعليقك ولمشاركتك
ويسعدنا دوام التواصل


*********************************

توتة
ـــــــ
أهلا بيكِ يا توتة
أشكرك جداً لرأيك والحمدلله الذى هدانى لهذا
وطبعا رحمة ربنا كبيرة لازم تكونى متأكدة من كده دايما
:) طيب وانتى تزعلى ليه إذا كانت دى تخيلاتى أنا الخاصة.. أنتى ممكن تتخيلى كل اللى أنتى عايزاه:)

يسعدنا دوام التواصل


******************************


ماشى بنور الله
ــــــــــــــــــ
أهلا بيك يافندم
:) ما أجمل دعائك
ربنا يكرمك يارب ويرزقنا جميعا الفردوس الاعلى
أشكرك جدا لتعليقك
ويسعدنا دوام التواصل


******************************

محمد محمود عمارة
ـــــــــــــــــ
أهلا بيك أستاذ محمد
ربنا يعزك يارب ويتقبل دعاءك اللهم امين
أشكرك جدا لتعليقك
يسعدنا دوام التواصل


******************************


مصممة أحلام
ـــــــــــــ
أهلا بيكِ حبيبتى
أيوة أهم حاجة ندخلها
اللهم انك اعطيتنا الاسلام دون أن نطلبه فارزقنا الجنة ونحن نطلبها
جمعنى الله واياكى فى اعلى جنة الخلد
نورتينى حبيبتى اسعدنى تواجدك

ويكا يقول...

ههههههههههههه

اللهم ارزقك ما تمنيتى وما لا تعلمى من جمال ورزق وفرح ومتع عينك بخير نعمة وهى رؤية الله عز وجل بغير حجاب

اللهم ارزقنا الجنة ورفقة نبيك

اللهم ارزقنا مصاحبة الاخيار الصالحين المصلحين فى الدنيا

اللهم ابعدنا عن انفسنا المريضه وكن حاجزا بيننا وبينها

وارجعنا الى الدين واجعلنا خير المسلمين وخيراً لهم.

الله ارزقنا برك وبر من ابرك

مشكوره ، ويارب يارب يتقبل منك العمل الصالح ان شاء الله ويغفر ذنبك ويقضى اجرك كامل غير ناقص

Unknown يقول...

السلام عليكم

الفكرة روعة أختي موناليزا...

ما أجمل الترغيب في الدعوة..

أحلامك جميلة قوي.. بتدل على إن اللي كاتبالنا البوست ده طفلة شقية (طبقا شقية بمعناها الدارج وليس بمعناها اللغوي :)

حقيقة أكثر مشهد يهزني عند تخيل دخول الجنة.. مشهد المتحابين في الله (غرباء الدنيا) عندما يقترب سرير هذا من سرير هذا وكلاهما متكئين فيتذاكران الدنيا، ويقول أحدهما: أتذكر متى غفر الله لنا؟ فيقول الآخر: يوم كذا يوم كنا نفعل كذا...
لا أذكر حاليا متن الحديث.. لكنه صحيح.


دمتِ سالمة حالمة ومن أهل الجنة...

اللهم إن رسولك قال: المرء يحشر مع من يحب... وإنك لتعلم أني أحبه وصحابته فاحشرني معهم وكل من يحبونهم.... آمين.

غير معرف يقول...

انا عندي تلات مواعيد يا منمن محدداهم
واحد اول ما ادخل الجنة على ايدي اليمين
والتاني تحت شجرة التفاح
والتالت هروح اقابل حد هيكون مع الحور العين قالي انا مش هبقى فاضي ابقي تعاليلي هناك ههههههههههه
آه والله

بس انا ناوية اسأل كام صحابي يحكولي عن الغزوات ويفرجوني عليها باور بوينت مثلا او فيديو :)
ما تضحكيش عليا بأه.. الله!!

وناوية اسلم ع الشيخ على ابو الحسن جدا
وهقوم للسيدة فاطمة الزهراء ان انا لما كنت صغيرة كنت بتمنى اكون مكانها

وهتصاحب على سيدنا عمر بن الخطاب
وعندي كلمتين لسيدنا أبو عبيدة ابن الجراح شايلهاله من صغري

عايزة ادوق الشاي بلبن بتاع الجنة والشيش طاووق

وعايزة اروح ابات واقضي اوقات كتير مع كل اللي كنت بحبهم في الدنيا وباعدني عنهم الزقت والسافات

صحبتي داليا بدور عليها من تانية اعداد اكيد ان شاء الله هشوفها هناك،، وصديق الطفولة معتز كمان.... أيوه بأه :)

عندي تخيلات كتير أوي مش هنخلص
بس نفسي اتكلم معاكي هناك يا منمن

تيجي نتفق على معاد؟؟
ها.. اختاري المكان

***************************

مها ميهوووو

إبن النيل يقول...

السلام عليكم
أمة الله رزقك الله كل ماتمنيتي ياااااااارب وربنا عنده المزيد مالا عين رأت ولاأذن سمعت ولا خطر علي قلب بشر
اللهم أرزقنا الفردوس الأعلي
يااااه الجنة يااااااارب أكون من أهلها
بس الموضوع مش أماني وأحلام بس الموضوع مش سهل
سلعة الله غالية سلعة الله الجنة لكن هل من مشمر ؟

دمتي بكل خير

فافى يقول...

بوست رائع كالعاده بحبك جدا وبارتاح نفسيا لما ادخل مدونتك وبحس ان ناقصها بخورههههههههههه وبتغاظ منك جدا انى مش قادره اخد حاجه منها قولى لى انتى عامله حقوق طبع ولا ايه؟ وبارك الله فيكى

Dr. Ibrahim يقول...

فى الجنة مالاعين رأت ولا اذن سمعت ولاخطر على قلب بشر..
وقال تعالى فى سورة السجدة" فَلَا تَعْلَمُ نَفْسٌ مَا أُخْفِيَ لَهُمْ مِنْ قُرَّةِ أَعْيُنٍ جَزَاءً بِمَا كَانُوا يَعْمَلُونَ" 17

فأهم شىء أن نعمل ما يؤهلنا لبلوغ تلك المنزلة..وأن نضع الجنة أمامنا كهدف ونحاول تحقيقه وهذا لن يتأتى إلا برضى وطاعة الله سبحانه وتعالى
بارك الله فيكم

موناليزا يقول...

ويكا
ـــــــ
أهلا بيك يا باشمهندس
:)ما أجمل دعائك
ربنا يكرمك يارب ويتقبل دعائك ويرزقك بكل الخير
أشكرك جدا لتعليقك
ويسعدنا دوام التواصل


*********************************


ماجد القاضى
ـــــــــــ
وعليكم السلام ورحمة الله وبركاته
أهلا بيك أستاذ ماجد
ربنا يكرمك وأشكرك جدا لرأيك
فماتوفيقى الا بالله

:)أحلى حاجة فى الجنة أنى هبقى على حريتى غير خاضعة لقانون المجتمع

ربنا يرزقنا جميعا الجنة ونكون صحبة مع النبيين والأبرار

أشكرك جدا لنعليقك ولمشاركتك
يسعدنا دوام التواصل


*******************************

أحسن تستاهل
ــــــــــــــــ
أهلا بيكِ يا مهاميهو بعد طول غياب
:) ربنا يحقق لك كل ماتتمنى فى الدنيا والآخرة

تعرفى رغم حبى للشاى بلبن بس ماتخيلتش انى اشربه فى الجنه مش عارفه ليه:)

:) خلاص اتفقنا
هنتقابل فى جنينة الفواكه بتاعتى تحت شجرة المانجو بس بعد ما نتكلم ياميهو نجرى مع بعض أو ورا بعض عادى أنا بحب اللعبة دى أوى :)

رزقنى الله واياكى الفردوس الأعلى اللهم آمين
نورتينى حبيبتى واسعدنى تواجدك


********************************


ابن النيل
ـــــــــــــ
وعليكم السلام ورحمة الله وبركاته
أهلا بيك يافندم
ربنا يكرمك ويتقبل دعائك اللهم آمين
وها نحن نحاول جاهدين الارتقاء برحمة ربنا ليشملنا بكرمه وعطفه علينا فيدخلنا الجنة

أشكرك جدا لتعليقك
يسعدنا وام التواصل



******************************

فافى
ــــــــ
أهلا بيكِ يافافى
أشكرك جدا لرأيك فما توفيقى الا بالله
أحبك الذى أحببتنى فيه
:) حلوة فكرة البخور بس انا مابحبش الدخان عموما حتى لو كان بخور

طيب انتى عايزة تاخدى منها إيه وأنا ابعتهالك.. رغم ان المدونة مفتوحة طول الوقت وتقدرى تقرأى اللى فيها زى ما انتى عاوزة فى الوقت اللى يعجبك كمان:)


ربنا يكرمك واشكرك جدا لتواجدك


********************************


د/ ابراهيم
ــــــــــــــ
أهلا بيك يادكتور
وهذا هدفى من البوست أن نتخيل الجنة فنشتاق لها ونتمنى أن ندخلها فنتعب ونجد حتى نرتقى لدخولها
أشكرك جدا لتعليقك
ويسعدنا دوام التواصل

Unknown يقول...

عندك حق والله