السبت، 19 فبراير 2011

حكايات من الثورة



طول الوقت بتتهمنى أنى فاشل ومش هفلح فى حاجة ونسيت إنك أنت السبب فى قعدتى جنبك فى البيت. ربتنى على الخوف والذل وأنى دايماً لازم أكون غلطان حتى لو أنا المظلوم.أنا عارف أن بينك وبين نفسك بتتمنى أنى أكون مش مؤدب عشان ترفع عن نفسك مسئوليتى ونسيت إنك أنت اللى كنت بتجيب لى كتب اقرأها وكانت هى اللى بتربينى الحاجة الوحيدة اللى بشكرك عليها إنك حببتنى فى القراءة وبغض النظر عن نوعية الكتب اللى كنت بتجيبهالى ورغم اختلافى معها بس من حبى للقراءة قدرت اختار الكتب الصح اللى شوفت فيها القدوة المفقودة. وده اللى خلانى اعرف ان ليا حق انى اعيش بكرامة.. لو كنت انت اللى ربيتنى كنت هتلاقينى جنبك بتابع آخر الأخبار المكذوبة وبشتم فى الشباب زى ما كنت هتعمل لو ماكنتش أنا معاهم دلؤتى.. افخر بيا يا والدى ابنك بيشارك فى صناعة التاريخ.

---------------------------

* طبيعى اللى يقوموا بالمظاهرة الشباب المرفه اللى عنده قوت يومه ويفيض تعرف ليه لأن أمثالى من المحبطين واليائسين معندهمش رفاهية حتى الحلم بالصراخ وآخرنا نلف سيجارة ونعمل دماغ تنسينا اللى احنا فيه.
------------------------------

* عذراً يا أمى كان لازم أكون معاهم أنتى بنفسك شوفتى أنا اتظلمت قد إيه .. اربع سنين فى قضية نفقة ولسة ماخدتش حقى أمُال لو قضية قتل كنت هقعد قد إيه فين حق المُطلقة اللى ملهاش عائد واتطردت من بيتها من غير ذنب غير أنها خلاص ماعدتش على مزاج البيه.. طالعة أطالب بقانون يحمينى من غدر الزمن ويجبر طليقى انه يدفعلى نفقتى حسب دخله الحقيقى مش المزور واللى قال فيه أنه مُعسر رغم أنه بيقبض فى الشهرخمسة عشرألف ريال سعودى شوفى انتى بالمصرى يبقوا كام.. فاكرة قرار القضاء اللى خسف بحقى الأرض من 88 ألف جنية ل 7200جنية وده إذا أخدتهم كمان.. طبعاً ماهو البيه مش هنا وحتى لو هنا ودفعهم المحامى هيقاسمنى فيهم.. فاكرة لما بعت اهله سرقوا شقتى وخلوهالى على البلاط وروحت قدمت بلاغ وكانت النتيجة بعد 3 سنين اتحكم عليهم بشهر سجن.. يابلاش.. شقة بكل اللى فيها بتساوى شهر واحد فقط لا غير وده برضه لو اتسجنوا.. سامحينى انى روحت من غير ما اقولك ما هو أنتى ماكنتيش هتوافقى..ادعيلى يا أمى.

-------------------------------

* معلش يا بابا كان لازم أطلع معاهم أنا مش عايزة أخويا يتغرب ويبعد عنى.. عايزة وظيفة لأخويا مش مطلب عسير يعنى.

-----------------------------

* أنا طالع أطلب بوظيفة تخلينى اقدر أعيش مرتاح من غير مااخد مصروف من أبويا.. وظيفة تخلينى اقدر اجيب شقة واتجوز.. أيوة تقديرى فى البكالوريوس مقبول رغم مذاكرتى واجتهادى بس مش ده موضوعنا.أنا ممكن اشتغل بتقديرى ده بس أى وظيفة بتشترط أن اقل تقدير يكون "جيد" طيب واللى جايبين مقبول يعملوا إيه؟.

------------------------------

* ماتقلقيش طالع افكرهم بمرتباتنا اللى نسيوها بقى لهم3 شهور.. انتى دكتورة بيطرية بالمكافأة وبتاخدى مرتبك كل شهرين شهر وأنا إمام وخطيب فى وزارة الأوقاف و بقبض خمسين جنيه فى الشهر عشان بالمكافأة ومش كده وبس ده أنا باخد مرتبى كل أربع شهور شهرين.. هفكرهم بس إننا عايزين نعيش من غير مانشحت.

-------------------------------

* ليه عايزنى أرجع من الطريق اللى بدأته.. ليه مصدقهم بعد ماكذبوا عليك قبل كده.. ليه عايزنى أكون زيك واسكت وارضى واصدق الوعود اللى ما بتتنفذش..فاكر لما سمعوا كلامك واعطوك الفلوس اللى طلبتها وكانت النتيجة سرقوا اعضائك من غير ما أنت تعرف ولما فوقت مالقيتش حتى الفلوس ولما حبيت تشتكى مالقتش حد يسمعك.فاكر لما جت لى البعثة وخدها واحد تانى بدل منى وجيت اشتكى قالولى السنة الجاية هتكون أول واحد وانت صدقتهم وخليتنى أمشى معاك ولما جت السنة الجديدة قالولى احنا مانعرفكش.. مش هرضى بالذل تانى حتى لو هموت هناك.

----------------------------

*ماكنتش اعرف ان ابنى رجل وممكن يحمينى مع شباب المنطقة.. ماكنتش اعرف ان جيرانى طيبين أوى كده.ماكنتش اعرف أن اللى بيحطوا جيل فى شعرهم ويلبسوا ألوان فاقعة وييتكلموا فى الموبايل طول الليل ممكن يحموا بيوت وأرواح وممكن يكنسوا الشوارع وينظموا المرور.. عذراً يا شباب فجيلكم يختلف كثيراً عن جيلى.

-----------------------------

* سعيد أنى اتعرفت على جيرانى جميعاً واحنا بنحمى شارعنا..سعيد انى عرفت أنى بحب مصر وعشانها مستعد أدفع حياتى.. وسعيد أكتر لأن ميعاد جيشى قرب ولو لبست هبقى فخور.

---------------------------

* طلعت أعرفهم أنى مُدرس فى مدرسة خاصة وبقبض 200 جنيه فى الشهر بذمتكم أعمل بيهم إيه ؟.

-----------------------------

* فيها إيه لو وزع مليار واحد على مرضى السرطان.ومليار واحد على اللى عايزين يتجوزوا.ومليار واحد على اللى عايزين يتعلموا.ومليار واحد يعمل بيه مشروع يلم فيه الشباب العاطل.كتير علينا من السبعين مليار اللى عنده!!.

-----------------------------

* افرحى يا أم الشهيد.. ابنك بطل.

---------------------------

* طلعت أطالب بإلغاء قانون الطوارئ اللى بياخد الناس اللى مش عاجبينهم من غير مايعرفوا حد مكانهم وياعالم بيعملوا فيهم إيه.

----------------------------

* بقى لى خمس سنين هتثبت إمتى فى شُغلى؟.

------------------------------

* عينونى فى بلد بعيدة جدا عن محافظتى ولما اعترضت رفدونى.

---------------------------------
* طلعت عشان أطالب بحقى الطبيعى لأى إنسان من تعليم وزواج ومسكن ووظيفة ودخل ثابت اللى بسببهم بقت مجرد أحلام.. حولوا حقوقنا لأحلام مش عارفين نحققها.

---------------------------------
* أنا فى المظاهرة لأن لعيبة الكورة والممثلين والمطربين والمذيعين اللى بيقبضوا بالملايين مش أحسن منى فى حاجة.
---------------------------
* من حقى أكون عالِم فى بلدى.. من حقى أحس أن مجهودى مش هيروح هدر فى شوية روتين مالوش لازمة.

---------------------------
* من حقى أنجح من غير واسطة.
--------------------
* عاوزة أخلف عيال مايدعوش عليا انى جيبتهم فى دنيا ظالمة مابترحمش.. عايزة يوم ما اربيهم على الأخلاق الطيبة يعرفوا بيها يعيشوا بدل مايتضحك عليهم.

------------------------
* من حقى يكون ليا طموح وهدف أعيش عشانه كإنسان بدل ما أنا عامل زى الحيوان اللى كل يوم بيصحى يدور على قوت يومه عشان مايموتش من الجوع.

-----------------------------
* من حقى أثق أن القانون هينصف المظلوم وهيرجع له حقه بدون تباطئ ممل من القضاء وبدون واسطة حكومية أو رشوة لمسئول كبير.





سؤال جانبى:

ـــــــــــــــــــــــــ

اللى عنده حكاية يحب يضيفها يكتبها فى التعليق.

أو اللى راح التحرير يقول هو كان رايح عايز إيه واللى ماراحش وكان عايز يروح برضه كان عايز يروح ليه؟.

عاوزة طلب شخصى.

هناك 18 تعليقًا:

سكن الليل يقول...

يا أمة الله

هنا كل حرف ينطق بقصة

كل حرف أدماه الوجع والاحباط

حاجات كتير خلتنا نثور ونغضب

مستفزين للنهاية

منتهى الاستهتار بينا وبحقنا حتى في ابداء الرأي

كانوا بيسكتونا ويكتموا نفسنا ويمصوا دمنا ودم اهالينا

قالوا عشان نشتغل لازم شهادة كبيرة

وعشان نوصلها عدت سنين جهاد وكفاح وتعب ومصاريف .. دي طبعا مجانية التعليم اللي بيتكلموا عنها

جات الشهادة الكبيرة..فين الشغل..اشتغلنا..فين المرتب؟؟

دي خطة محكمة لانقراض المصري والقضاء عليه وعلى أحلامه

ويصحى الحاكم ما يلاقيش شعب يحكمه
ويسافر السعودية بقى يجيب خلاطين
لا ما يسافر سويسرا بقى يجيب فلوسه
هيخبيها ليه

***

سهل اوي عندهم ينقلوا جامعة كاملة من مكانها اللي مخصوص عشانها من عشرات السنين

واللي بيناسب كل الطلبة في المحافظات اللي بيروحولها

ينقلوها مكان بعيد تسافر بلد عشان تاخد منها مواصلات تسافر بيها لبلد الجامعة اللي هتبقى في مكان مهجور

ودة ليه

عشان السياحة يا عم
عيب السياح يشوفوا الطلبة وهما طالعين يدوروا على مواصلات

اييييييييييييه

هنقول ايه وللا ايه

يللا زمن السكوت انتهى

ماشي بنور الله يقول...

دمعت عيناي وانا أقرأ هذا الموضوع ..
كل كلمة تعبر عن الكثير مما يجول في خواطرنا
ربنا يوفقنا وما يفرقنا
وغدا ان شاء الله مصر افضل

مصطفى سيف يقول...

موناليزا
انها بانوراما الثورة الحقيقية
هذا ما سطرتيه بحروفك رسمتي هموم تراكمت فوق النفوس ثلاثين عاما وربما اكثر
ممكن اضيف ان من حقي في حرية الاختيار بنزاهة وشفافية مش اجبار ولا بلطجة ولا تزوير ولا تسويد
شكرا اختي الكريمة والف مبروك لمصر واتمنى الفترة الجاية كل الحالات دي اللي اتكلمتي عنها مشاكلها تتحل ومتكونش موجودة تاني في مجتمعنا

عبدالله بيه رفاعي يقول...

الحكاوى كتير
و المظالم اكتر
لكن دلوقتى وقتها
وقت اننا نساهم فى بناء بلدنا
فى تعمير بلدنا
فى تطهير بلدنا
فى تطوير بلدنا


ببساطه لانها بلدنا
معدتشى بلد حد و لا حكر على حد



و شكرا

سواح في ملك الله- يقول...

تخيلي الطاقات دي كلها
يهدرها النظام
وكانهم مال عام يسعي لاهدارة

وبالنسسبةلسؤالك
عشان زهقنا من الاستغفال

أم عمـــــر يقول...

نسأل الله أن يصلح احوال البلاد والعباد
.
.
.
.
.
.
.
حملة الدفاع عن هوية مصر اسلامية
شارك بتوقيعك http://www.islamic-id.com/sign.php

ابراهيم رزق يقول...

لو عندك وقت انا مستعد انها اجمل ايام حياتى رغم الشقاء و رغم تحقق نسبة كبيرة من الهدف لكن تصدقى انا بحن الى التحرير بحن الى النوم فى الخلاء فى البرد القارس و التجمع و التسامر حول النيران التى يشعلها البعض الحكايات كثيرة لكن اجملها اطفال الشوارع الذين شاركوا فى الثورة
لو عندك وقت انا مستعد

هبة فاروق يقول...

اتمنى ان تتحقق كل امنيات ومطالب الشعب المصرى فهى مطالب ليست عسيرة او صعب تحقيقها
انا لم انزل التحرير ولكن زوجى نزل وشاهد الكثير عن اصرار وعناد الشعب فى الحصول على الحرية واسقاط النظام الفاسد
ولكننى نزلت يوم التنحى واحتفلت انا واسرتى بزوال النظام الفاسد فى ميدان التحرير وكان مشهد رائع والله كانة كان عيد وكرنفال
تحياتى

راجى يقول...

المهم الان الحفاظ على مكاسب الثورة وضرب الثورة المضادة بفضحها

أسمعنى شكراًً يقول...

يارب دايما نفضل أيد واحدة فى طريق الحق

وأنا واحد من الناس يوم ثورة الغضب

كنت ماشى فى ميدان السيدة زينب يوم
الجمعة وفجأه لقيت نفسى بفتكر كل كلمة مهينة أتقالتلى من لسان شرطي فى القسم
وكل نظرة إستعلاء كانو بيبصوهالى وكل كف خدتة على (الحر)قفاية ومادريتش بنفسى إلا وأنا كنت بولع مع الشباب والمتظاهرين فى القسم
حسيت أنى بفش غلى وغل كل واحد ظلموة وكلوا حقة ....

نبض الأمل يقول...

أمة الله
حكاياتك أبكتني فهي تعبر عن معظم المآسي والأحلام المحطمة وأنا متأكدة ان هناك من يعانون أكثر من هذا بكثيييييييير
لطالما تمنيت أن أطالب بحق الأباء والامهات الذين يجولون في الشوراع يبيعون الاشياء البسيطة عشان لقمة العيش وكلما رأيتهم أقول في نفسي أما آن لهذا الشيخ وتلك العجوز أن يرتاحوا أما جاء الوقت لاحترام هذا الشيب ربما وراء كل أب وأم من هؤلاء حكااااااااايات إما شباب مش لاقي شغل وبالتالي مش قادر على إعالة أمه وأبوه أو مسئول ظالم حرم الناس دي من أبسط حقوقها وهي مكان تنام فيه ودخل ثابت يأكلهم حتى عيش حاف
المهم إننا ندعي ان كل الآلام تتحول إلى آمال وتطلعات لمستقبل أفضل بكثير ان شاء الله

eng_semsem يقول...

;كلنا كنا في التحرير معاهم بقلبنا وبسبب بعد المسافات مكناش معاهم في المكان انما كان هدفي ان اشوف الحقيقه مره واحده في بلدي مش دايما اعيش في تزوير وكلام انزل الشارع الاقيه بس كلام
وان كانت واحده دورت على حقها اللي ضاع مع جوزها
انا كمان نفسي حقي يرجع ليا من واحده كانت مراتي وفي يوم زعلت راحت بيت بابها ورفعت قضية نفقه ورفعت تبديد واخدت عفشها واخدت بنتي مني لانها زعلت او يمكن عشان انا مكنتش تحت امرها
القضيه مش شخصيه انا يهمني الناس كلها تعيش ممكن انا املك افتح بيت واتنين وتلاته بس غيري برده لازم ياخد حقه ولو هدفع عمري عشان خاطره التعليم والوظيفه والسكن والشغل ده مش مطالب ده واجبات على الدوله وهي كانت مش بتعمل واجباتها علينا عشان كده انا كنت عايز اكون في التحرير

الاحلام يقول...

نمازج كثيره وكثيره وهناك اكثر واكثر هذه هي طبيعه الحياه
انا اريد شيئا وانت تريد شئا وكل انسان يريد شىء مختلف تماما عن غيره ولاكن فى 25 يناير الكل اتفق على الحريه والكرامه مهما اختلفت الميول
تقبلى تحياتى الاحـــــــــــــــلام

موناليزا يقول...

سكن الليل
ــــــــــــ
أهلا وسهلا فى زيارتك الاولى
وماخفى كان أعظم كل يوم بنكتشف مهازل جديدة
لكِ الله يا مصر
وربنا على الظالم
أشكرك جدا لتعليقك ويسعدنا دوام التواصل


*********************************


ماشى بنور الله
ــــــــــــــــ
أهلا بيك يا فندم
فعلا عشمنا فى ربنا كبير
أشكرك جدا لتعليقك يسعدنا دوام التواصل


*******************************


مصطفى سيف
ــــــــــــــ
أهلا بيك يا دكتور
أشكرك جدا لتعليقك و لاضافتك
ربنا يكرمك
وبإذن الله القادم أجمل
يسعدنا دوام التواصل


*******************************


عبدالله بيه رفاعى
ــــــــــــــــــ
أهلا بيك أستاذ عبدالله
عندك حق
فالماضى أسود ولو فتحنا فى الكلام فيه مش هنخلص
أشكرك جدا لتعليقك
يسعدنا دوام التواصل


******************************


سواح فى ملك الله
ـــــــــــــــــ
أهلا بيك أستاذ خالد
حاجة تغيظ بجد كأنها خطة مدبرة لتحطيم الشعب جسديا ونفسيا وعقليا

أشكرك لاجابة السؤال
يسعدنا دوام التواصل


******************************


أم عمر
ـــــــــ
أهلا بيكِ يا أم عمر
تقبل الله دعائك
وجعل النصر حليفنا دائما


المادة الثانية فى الدستور المصرى غير مطروحة للنقاش أو قابلة للتعديل

أشكرك جدا لتواجدك
فى انتظارك دائما


*******************************


ابراهيم رزق
ــــــــــــــ
أهلا بيك أستاذ ابراهيم
:) ما اجمل الذكريات وخصوصا لو كانت مصاحبة لهدف
خد راحتك يافندم
كأنها مدونتك بالظبط:)

يسعدنا دوام التواصل


*****************************


هبة فاروق
ـــــــــــــ
أهلا بيكِ يا هبة
الغريب انها حقوق بديهية لأى انسان يعنى تحقيقها واجب على الدولة

:) حكايات ومواقف ميدان التحرير كلها رائعة ومثال نفتخر به بجد

نورتينى حبيبتى واسعدنى تواجدك


*******************************


راجى
ـــــــــ
أهلا بيك أستاذ راجى
ربنا يستر عى مصر

يسعدنا دوام التواصل


******************************


اسمعنى شكرا
ــــــــــــ
أهلا وسهلا فى زيارتك الاولى
يارب نرجع خير أمة أخرجت للناس

الظلم طعمه مر كالحلقم
إمبارح سمعت جملة بتقول لو المظلوم خد حقه هيبقى ظالم وانه لازم يرجع للقانون
ولقيت نفسى بقول طيب لو القانون هو اللى ظلمه مين يجيب له حقه

ربنا يرفع عنا جميعاً الظلم

أشكرك لتعليقك ويسعدنا دوام التواصل


********************************


نبض الامل
ــــــــــــ
أهلا بيكِ
فعلا وما خفى كان أعظم
والله فكرة جميلة بجد
سبحان الله انا كنت لسه بفكر فى اطفال الشوارع ولازم فى ظل هذه التعديلات يعملوالهم حاجة

ان شاء الله ياحبيبتى مصر هترجع لنا أحسن وأجمل عما نحلم به كمان

نورتينى واسعدنى تواجدك


******************************


انج سمسم
ــــــــــــ
أهلا بيك يا باشمهندس
فعلا جعلوا حقوقنا البديهية مجرد أحلام نسعى لتحقيقها
حتى قانون الرؤية مثلا فيه آباء كتير متضررين منه نظراً لسوء اختيار مكان الرؤية أو لقلة الوقت المصاحب للرؤية
بصراحة فيه قوانين كتيرة محتاجة تتظبط بحيث تناسب البنى آدمين
أنا عن نفسى بقترح للى هيعدل أى قانون أنه يحط نفسه دايما مكان صاحب الحق يمكن يطلع قانون ينصفه

أشكرك جدا لتعليقك ويسعدنا دوام التواصل


******************************


الأحلام
ـــــــــ
أهلا بيك يافندم
عندك حق فالحرية والكرامة هى اللى هتجيب بقية الطلبات

أشكرك جدا لتعليقك
يسعدنا دوام التواصل

فارس عبدالفتاح يقول...

على العموم من الواضح انك معندكيش مشكلة اذا كان فيه واحد زيي كان بيجي هنا ويعلق واديلوه فتره مجاش .. ممكن تكوني مختيش بالك وممكن يكون مش مهم .


لكن تخيلي انك ممكن تاخدي بالك هو اللى خلاني اقول الكلام ده .


المهم :


بالصدفة البحتة مع اني لا اؤمن بقانون الصدفة ولكن كان قدر الله سبحانه وتعالى اني دعيت لحضور المؤتمر التاسيسي لرابطة الوحدوين الناصريين العرب في القاهرة في تاريخ 15/1/2011م، وهو ذكر ميلاد القائد الرمز جمال عبدالناصر .

واللى دعاني اخ لبناني وسوري ونوينا السفر مع بعض بحكم اني مصري ومستضيفهم في هذه الفترة في مصر وطلبت اجاز من تاريخ 12/1/2011م، الموافق يوم اربعاء وسافرت الى مصر قبل الاخ اللبناني والسوري بيوم واستقبلتهم في اليوم التاني وحضرنا المؤتمر التأسيسي في ضريح القائد الله يرحمه في منشية البكري وكان من القيادات الناصرية المصرية والعربية شيء مبهر على راسهم المفكرين والسياسيين والمناضلين العرب والمصريين مثل حمدين صباحي وحمدي قندير وعبدالحكيم عبدالناصر وهدى ومنى عبدالناصر ومصطفى بكري والفنانة نجلاء فتحي والدكتور عبدالحليم قنديل والاستاذ الدكتور يحيى الجمل والكثير الكثير من المفكرين والثوريين الناصريين العرب من موريتانيا غرباً الى العراق شرقاً بدون مبالغة .

وخرجنا في مظاهرة نهتف فيها باسقاط النظام العميل الخائن من امام الضريح يوم 15/1/2011م، ويشاء الله سبحانه وتعالى ان هذه المظاهرات لا تتوقف بي الا في يوم 31/1/2011م، يوم سفري من الاسكندرية لرجوعي بسبب اني قد اخذت اجازة 15 يوم فقط لا غير وكنت في منتهى الاسف والحزن اني تركت الثورة في اوجها . وطبعاً ليس لي اي عذر حتى ولو تزرعت بالبحث عن لقمت العيش .. لان هذا ضد ما اعتقد به وكانت خيانة كبيرة لقيمي ومبادئي .

وكنت اتمنى ان اسمع سقوط النظام قبل ان اسافر من مصر ولكن الحمد لله شاركت في المظاهرات في الاسكندرية وشاركت في اللجان الشعبية لحماية الحي والبيوت والمحلات التجارية .

وكانت للحظات فارقة في حياتي لم ارى مثلها واعتقد انها لن تتكرر .. فبحكم اني اؤمن بالفكر القومي العربي الثوري اؤمن ان الثورة هي الحل الوحيد وكنت اخاف على اجهاض هذه الثورة بالدعوة للحفاظ على امن البلد او ان حسني مبارك لن يرشح نفسه او ان نعطية مهلة ليثبت حسن نواياه او من الذين كان يخافون من اجندة الفوضى التي خطط لها النظام بالحرق والنهب والتخويف والقتل التي كانت الشرطة اليد الطولا للنظام في تطبيق هذه الخطط المعدة سلفاً .


وقد سمعت انتصار الثورة في خارج مصر وكانت فرحة هستيرية سبقها خوف وفزع وحسن واسى واحيانا بكاء على وطن يهان من مصريين بالاعلام والحرب الدعاية على الثوار الذين كان يقال عليهم انهم عملاء لايران وحزب الله باكلة كنتاكي .


والكثير الكثير ولكن الله سلم بفضل الله ومنته وبذل الشهداء دمائهم الطاهرة .

فهؤلاء هم اصحاب الثورة الحقيقة هم تاريخة ومستقبل الوطن المصري في كل العصور وفي كل الملمات والمحن هم الابطال الحقيقيون وليس غيرهم ابطال .

اللهم اني اسأل باسمك الاعظم الذي سؤلت به اعطت ودعيت به اجبت ان ترحمهم وان تسكنهم فسيح جنات وان تجمعنا وايهم تحت لواء سيد الخلق محمد بن عبدالله .. آمين آمين يا رب العالمين .

فارس عبدالفتاح .. قومي عربي

موناليزا يقول...

فارس عبد الفتاح
ـــــــــــــــــ
أهلا بيك أستاذ فارس
تعودنا منكم دائماً القاء تحية الاسلام أولاً:)
ولكن أجد ان هذا عتاب أخوى فلا ألومك عليه واعتذرلك على عدم سؤالى
أنا بس مابحبش افرض على قرائى انهم يتابعوا مدونتى واللى مايجيش أقوله لازم تيجى هو طبعا تعليقاتكم بتفرق معايا جدا وزيارتكم بتسعدنى جدا بس انا دايما بلتمس الاعذار للى مابيعلقوش ابسط عذر بقول يمكن كلمات موضوعى ماعجبتهمش.. وعشان كده ومنعا لان افرض عليكم تعلقوا على موضوع مش عاجبكم.. بكتفى بالصمت ولكنى فى انتظاركم دائما


ماشاء الله يافندم يعنى حضراتكم قمتوا بهتافات الثورة قبلها بعشرة أيام :)

الحمدلله أن حقق لبلدنا النصر واستطعنا ان نزيل رأس الفساد آملين من المولى أن يزول الفساد بأجمع

أشكرك جدا لمشاركتكم
يسعدنا دوام التواصل

ماجد القاضي يقول...

السلام عليكم أختي موناليزا

بجد البوست ده مميز جدا.. والقصص دي لخصت الكثير، وتصل إلى القلب والعقل معا بدلا من أن يكتب، من أسباب ثورة 25 يناير: 1- ... 2- .... 3-...

حسيت قوي بعض القصص...

لكن أفضل لو جمعتي عددا لا بأس به من القصص أن تصنفي ما قبل الثورة وما بعد الثورة ، بمعنى آخر: كيف كنا؟ وكيف صرنا؟

معذرة على التأخير في التعليق كالعادة، لكن والله أنا قرأت البوست ده من يوم ما اتنشر تقريبا!!!! لكن فيه بوستات باحب أقرأها على روقان قبل ما أعلق :)

تحياتي أختي الكريمة.

موناليزا يقول...

ماجد القاضى
ـــــــــــــــ
وعليكم السلام ورحمة الله وبركاته
أهلا بيك أستاذ ماجد

أشكرك جداً لرأيك فى القصص:)

نفسى والله يافندم أكتب أمثال هذه القصص بس بعد الثورة:)
عاوزين نحس بتغيير فى جميع الأشياء ومع جميع فئات الشعب
وعشمنا فى ربنا كبير بأن القادم أكيد أجمل

:) يافندم حضرتك صاحب مكان متى حللت فمرحباً بك دائماً

أسعدنا تواجدكم
وفى انتظاركم دائما