الخميس، 28 أبريل 2011

من كتاباتى(1)


من الصعب أن تظل محتفظاً بهدوئك فى جو ملئ بالغضب والضجيج.
-----------------------------

كم أتمنى لو كان شريط حياتى فيه خاصية فوروارد.

------------------

فرق كبير أوى بين أنك تقعد فى البيت بمزاجك وأنت بكامل صحتك بس مالكش مزاج تخرج وبين أنك تقعد مجبر لأنك عاجز عن الحركة.

--------------------------
أجمل الهدايا التى تأتى دون انتظار

------------------------------
قراءة الفرد تؤثر على أسلوب التفكير ومنهجية الحياة فقل لى ماذا تقرأ أقول لك بماذا تفكر.
----------------------------

أعتقد لو أن كل محامى رفض يدافع عن ظالم.. الدنيا هتكون مختلفة تماماً عما هى عليه الآن.

-----------------

فيه ناس وجودهم فى حياتنا عقاب.
--------------

ارجع يا زمان.. يمكن أقدر أغير أحداثك.
-----------------------

هى مالها إختيارات الدنيا ليا عاملة كده!.
--------------------

بتطلب رأيى ليه إذا كنت هتغضب منه.
-------------

هتعرفها إزاى وأنت ماربيتهاش.
-----------------

طلاقى ليس عاراً أدرايه ولكنه وجعاً أداويه.

---------------------------

مستجدعنى آه لكن مش ناسى أنى أنثى يتخاف عليها.

--------------------------

نصيحة للمقبلات على الزواج: لازم يكون فيه هدف مشترك بينك وبينه علشان مع مرور الوقت وطول العِشرة وتسرب الملل فى نفوسكم تلاقوا حاجة لسه بتجمعكم.

---------------------------------------

أشكركم جزيلاً فقد كنتم مادة خصبة لكتاباتى.

--------------------------

بطلت أسيب غيرى يفكر لى.

---------------

هل ملَ القوم قلمى أم ضاق عالمهم بى.

---------------------

تقتضى الأمانة أنه إذا أعجبتك كلمات وأردت كتابتها على الاستاتيوس أو على الإيميل أو فى أى مكان آخر خاص بك أن تنسبها إلى كاتبها.

-------------------------

الاستيقاظ من النوم يعتبر نعمة.. فحينما تفتح عينيك لتجد نفسك مازلت فى الدنيا وأنك مازلت ترى وقادراً على تحريك أعضائك كل هذه المعجزات تستحق أن تقول"الحمدلله الذى أحيانا بعد ما أماتنا وإليه النشور".

---------------------------

احكم فى ما تمتلكه لكن لاتعطى شئ مِلك غيرك لشخص آخر دون إذنه وتغضب إذا ما استرد صاحب الشئ حاجته.. فهذا ليس من حقك.

-----------------------

ماتمنعوش حد عن عمل خير حتى لو كان من وجهة نظركم مالوش لازمة فالكلمة الطيبة صدقة.

----------------------------

شعور رائع أن يكون لديك القدرة على ترجمة كلمات طفل عمره عامان فى الوقت الذى عجزت فيه أمه عن ذلك.

--------------------------

بفضل إعلامنا المحترم أصبح يتحدث أطفالنا عن الحشيش والمخدرات ولا أجدعها معلمين.

-----------------------------

أؤمن تماماً بأنه يوجد هناك علوم كثيرة لم يتوصل إليها العقل البشرى بعد.

---------------------------

ليه أبرز صفة فى المجنون أنه بيكلم نفسه.. طيب وإيه المشكلة لما الواحد يكلم نفسه!!على الأقل نفسه هتسمعه ومش هتقاطعه ولا هتلومه ولا هتنقده.

--------------------------

غريبة اوى.. طول الوقت بتنقد فى ملابس الناس وفى شققهم ..توقعت انى لما هزورها هلاقيها فى قصر.. النتيجة انها أقل بكتييير اوى من الناس اللى هى بتنقدهم... فيها ايه لو كل واحد خلاه فى نفسه.

-----------------------------

معاملتك مع طفلك هى من ستحدد شخصيته فى المستقبل فبالله عليك بلاش تكبر دماغك وأنت بتتعامل معاه.

----------------------------

أوقات كتير ماببقاش محتاجة اتصال من حد على قد ما ببقى محتاجة مجرد رسالة.

--------------------------------

قليلون هم من يحاولون تغيير الواقع للأجمل.

---------------------

جهلك بالشئ لا ينفى وجوده.

------------------------

كنت معاها فى عز آلامها ودلؤتى أنا ولا على بالها.

--------------------------

لو سجدت لله أبداً ماحييت ما وفيت شكر نعمته علىَّ.
------------------------------

شعور مقيت حينما تحبهم وتفضلهم على نفسك وتدعو لهم دائماً بالخير وتتذكرهم وتبتسم وهم ناسيين مرورك فى حياتهم.

----------------------------------

ما أجمل أن تغلق باب الشيطان رغم أنه كان يأتى لك بنسمة ربيعية فى حر الصيف طلباً لمرضاة الله.



***********************

سؤال جانبى
ـــــــــــــــــ
* عبر عن ذكرى أو خاطرة جالت فى ذهنك أثناء القراءة بجملة واحدة.

هناك 35 تعليقًا:

ENG./ELSAYED,PMP يقول...

لو الزمان يرجع ... علشان تغيرى فيه
لا هوه هيرجع ... ولو فرضنا جدلاً رجوعه ... فلن تستطيعى تغيره ... فيه جزء كبير جدا من حياتنا مرتبط بحكمة كونية كبرى ... كل واحد مننا جزء من الحكمة دى ... وما شاء الله كان وما لم يشاء لم يكن

كمان موضوع انك متأكدة ان فيه علوم كتير لم يصل اليها العقل البشرى

ايوه كتير جدا ... اساسا الاسلوب العلمى ف التفكير المتبع ف دراسة العلوم جميعها لدرجة تدخله ف العلوم الاجتماعية والانسانية اسلوب قاصر - من وجهة نظرى ووجهة نظر بعض الكتاب والمفكرين والمدارس الفكرية - فما هو العلمى من توقعك لحدوث شىء ما ويحدث ، واين العلم من الاحساس - الا اقصد الاحاسيس العاطفية - ولكن الاحساس باشياء ما خير مقبل او شر او حدث ، لن اطيل عليكى بالسرد

تحياتى
تقبلى مرورى

أنا - الريس يقول...

فرق كبير أوى بين أنك تقعد فى البيت بمزاجك وأنت بكامل صحتك بس مالكش مزاج تخرج وبين أنك تقعد مجبر لأنك عاجز عن الحركة.


بطلت اسيب غيري يفكر لي


------
الجملة اللي جات في دماغي وأنا بقرا كنت بقول نفس فكرتي لما كتبت اللي بكتبه علي الفيس

منتدى شنواي يقول...

سحيح كنت معاها فى عز الامها وياما سهرت الليل أداوي جراحها والامها . لكن دلوقتي ولا على بالها. وكل اللى هي بتفكر فيه ازاي تهدمني لترضى غرورها اللى هدمني وهدمها. ربي يسامحها ويشفيها ويهديني ويهديها.

Dr. Ibrahim يقول...

وانا نفسى ان شريط حياتى يكون فيه خاصتى
Ctrl+Z
و
Ctrl+X

وأسيب غيرى يفكر معايا مش يفكر لى :)

سواح في ملك اللــــــــــــــــــه- يقول...

الفكرة التي جالت في بالي وانا اقرا
انتي تتحدثين عن مدينة فاضلة لو تحلينا بربع ماتحدثتي به لاصبحت حياتنا اجمل كثيرا مماهي عليه الان
تحيتي

مصطفى سيف الدين يقول...

اول حاجة بصراحة ابهرني البوست فيه فلسفة عميقة وتجربة حياتية كل جملة محتاجة دراسة
بس ليا تعلي على الجملة دي
(ليه أبرز صفة فى المجنون أنه بيكلم نفسه.. طيب وإيه المشكلة لما الواحد يكلم نفسه!!على الأقل نفسه هتسمعه ومش هتقاطعه ولا هتلومه ولا هتنقده.)
مين اللي قال نفسك مش هتلومك ولا تنتقدك بالعكس حديث النفس اصعب الاحاديث ولا يقوى عليه الا أصدق البشر
وعلشان هم صادقين احنا بنتهمهم بالجنون
الجملة التي جالت بخاطري
كأوراق الشجر تتساقط الأيام ولا يجول بخاطري كيف تساقطت تعلمت من تتابع سقوطها الصمت ومراقبتها تقع ورقة تلو اخرى عاجزا عن ايقافها عن السقوط صمت مريع في انتظار تساقط آخر الاوراق
تحياتي واشكرك

رحلتنا في الحياة يقول...

بوست جميل بس مش فى بالى حاجة فى الوقت الحالى :)

ابراهيم رزق يقول...

جميل ما كتبتيه من خواطر و لكن لماذا كل خواطرك مغلفة بمسحة من الحزن

الخاطرة التى جاءت فى راس سؤال و ليس خاطرة

اين ابتسامة الموناليزا

خالص تحياتى

Mahmoud Ahmed يقول...

حلوه فكره تدوين الكلمات الى بتطلع من الواحد
انا هغشها منك ^_^

Mahmoud Ahmed يقول...

انا دايما بقول
نفسي يكون في حياتي زرار delete عشان امسح الحاجات الى مضايقاني نهائيا

الشاعر الفنان أحمد فتحى فؤاد يقول...

لخصتي كل امر الحياة لكل واحد مننا في كلماتك

لدرجة أني اعتقد ان كل واحد عايز يقول نفس الكلام ده بالضبط

صحيح مع بعض التغييرليناسب شخصية القائل لكن هو هو نفس الكلام

تحياتي و تقديري لك

زينب علي حبيب يقول...

ليه أبرز صفة فى المجنون أنه بيكلم نفسه.. طيب وإيه المشكلة لما الواحد يكلم نفسه!!على الأقل نفسه هتسمعه ومش هتقاطعه ولا هتلومه ولا هتنقده.


عدتها اكتر من مرة حتى فهمتها ... على فكرة أنا بكلم نفسي :P

عجبوووووووووووووني اوي و حبيت اسجل اعجابي

زينب علي حبيب يقول...

صح و اوافق مصطفى سيف ... بجد حديث النفس احيانا كتير بيكون قااااااااسي اوووي ... و احيانا بتقاطع افكارنا و كداا ...

موناليزا يقول...

إنج السيد
ــــــــــ
أهلا بيك ياباشمهندس
عارفة يافندم أن عمره ماهيرجع أنا بس بقول لو
وعندك حق كل شئ مكتوب من قبل حتى مانتولد

جميل أنك متفق معى بوجود علوم لم يتوصل إليها العقل البشرى بعد..
حينما قرأت مثلاً عن اختراع جرهام بيل للتليفون وبأن الجميع وقتها قالوا عنه مخبول أصبحت موقنة بضرورة عدم الحكم على الأشياء إلا بعد إثبات نفعها من عدمه على مدار السنين

أشكرك جدا لمشاركتك
ويسعدنا دوام التواصل


********************************

مستر بريزيدنت
ـــــــــــــــ
أهلا بيك أستاذ بسام
أشكرك لاختياراتك
---
:) يعنى الأفكار عند بعضها

يسعدنا دوام التواصل


*******************************

منتدى شنواى
ــــــــــــــ
أهلا وسهلا فى زيارتك الأولى
ما أصعبه من شعور
أعرفه جيداً وأتعامل معاه كثيراً

فى انتظاركم دائما


*****************************

د/ ابراهيم
ـــــــــــــــ
أهلا بيك يادكتور
ممكن توضح الخواص دى بتعمل إيه؟:)

ربنا يلقيك بمن يفكر معاك

اشكرك جدا لمشاركتك
ويسعدنا دوام التواصل


*******************************

سواح فى ملك الله
ــــــــــــــــ
أهلا بيك أستاذ خالد
هل حقاً هذه المدينة الفاضلة إذن أنا أريد المستحيل:(

أشكرك جدا لمشاركتك
يسعدنا دوام التواصل


*******************************

مصطفى سيف
ـــــــــــــ
أهلا بيك يادكتور
أشكرك جدا على رأيك فى البوست

ده حقيقى بس نفسك يوم ما هتنقدك هيكون نقد فى صالحك هتظهر لك عيوبك بصراحة دون تجميل ده غير إنها مش هتجرحك ولا هتذلك كل شوية بعيوبك:)

ماشاء الله يادكتور
دائما قلمك يبهرنى فلديه القدرة على استخدام ابسط الكلمات فى معانى عميقة

أشكرك جدا لمشاركتك
يسعدنا دوام التواصل


******************************


أحاسيس آيوشة
ــــــــــــــ
أهلا بيكِ يا يويو
أشكرك جداً لرأيك
ويكفينى تواجدك الذى أسعدنى


*****************************

إبراهيم رزق
ــــــــــــــ
أهلا بيك أستاذ إبراهيم
أشكرك جدا لرأيك فيما كتبته
إجابة سؤالك بأننى ابتسمت الآن بعد تعليقك فقد ذكرتنى بلالبتسام:)

أشكرك جدا لمشاركتك
يسعدنا دوام التواصل


********************************

سبايدر مان
ــــــــــــــ
أهلا بيك يادكتور
تحت أمرك يافندم:)

الجميل بقى ان مفيش فى حياتنا ولا زرار هو جواب نهائى ولا رجعة فيه:)

أشكرك جدا لمشاركتك
ويسعدنا دوام التواصل


******************************

الشاعر الفنان أحمد فتحى فؤاد
ـــــــــــــــــــــــــــ
أهلا بيك أستاذ أحمد
دائما تسعدنى بكلماتك المشجعة لى
جزاك الله عنى كل خير

ويسعدنا دوام التواصل

*******************************

قطرة وفا
ـــــــــــ
أهلا بيكِ حبيبتى
:) إعجابك وصل وأسعدنى جداً على فكرة
عادى أنا بعملها كتير
ودى أحلى حاجة أنه بيكون حوار صريح مع حد مش هتندمى أنك كلمتيه وفضفضتى معاه

نورتينى وفى انتظارك دايما

Carmen يقول...

خطرات رائعة بعضها من مبادئي في الحياة
يسلم فكرك

Unknown يقول...

أحييك على هذا الطرح المتميز وماحوى من
أفكار وآراء عميقة وكلمات بليغة......
ـــــــــ
ماجال بخاطرى هل يمكن ان يكون المحامى محامياً عن الحق ففط...؟؟؟؟

تقبلى تقديرى واحترامى
بارك الله فيك وأعزك

رشيد أمديون يقول...

راق لي ما قرأت الساعة
أجدها كلمات تحمل الكثير والكثير لشموليتها. جد جميل.

جملة جالت في خاطري وهي قاعدة يستند إليها في التفسير القرآني، ولها علاقة بما قرأت هنا:
العبرة بعموم اللفظ لا بخصوصية السبب.

مع تحياتي

7dmo3yen يقول...

فكرة فشل أم في تفسير كلام ابنها ....

حسيت بمعني اعمق قد ايه من نعم واخدينها كأنها شيء عادي مسلم بيه ..

غير معرف يقول...

الأخت الفاضلة موناليزا
الزمن لا يعود إلى الخلف لأنه يتقدم بنا دائماً للأمام وهذه ميزة و ليست عيباً ، لأن من مميزاتها أنه لو عاد بنا للخلف لبقينا هناك في تلك الحقبة نبكي على أطلال ربما لا تستحق أن ننظر إليها أصلاً. أما التقدم المستمر للأمام فيمنحنا ميزة إلقاء نظرة على ما مر من حياتنا فنتعلم من أخطائنا فنتلافاها في القادم أو مميزاتنا فنجودها. و بالمناسبة العقلاء فقط هم من يتعلمون من دروس الماضي أما الحمقى فيكتفون بالبكاء و التباكي دون دراسة أو تعلم.
و لعل من الأمور التي تستوقفني بكاء و تباكي بعض الفتيات و النساء و أحياناً بعض الشباب و الرجال كونهم أو كونهن مطلقين و مطلقات.
هل الطلاق هو المحطة الأخيرة في الحياة؟ بالطبع لا ، لكن يختلف الناس ، فهناك من يبقى هناك يندب حظه و هناك من ينظر فيتعلم ثم يكمل مسيرة حياته باعتبار أن ما حدث من قدر الله و من باب البلاء مع الأخذ في الاعتبار أخذ الدروس و العبر و تلافيها في القادم ، فالحياة لا تقف عند أحد و لا من أجل أحد. و الأجمل تجاهل نظرات و تعليقات الآخرين فيما يتعلق بهذا الموضوع لأن كلام الناس يؤخر و لا يقدم.
في المحن تظهر معادن الناس و من لا يعرفني في محنتي ، فما حاجتي إليه في رخائي ؟ كثيرون من مروا بحياتي و كنت أحسبهم أصدقاء أعزاء ، اليوم أعتبرهم أشباح مروا من هذا المكان المسمى رحلة حياتي.و خير ختام قول الله تعالى:
" ألا بذكر الله تطمئن القلوب "

الاحلام يقول...

خرجنا من صلاة الفجر كنت اسير بجوار رجل متوسط العمر كان يقول لصاحبه سانام حتى الساعه الثامنه صباحا ثم احضر اليك فنذهب الى صديقنا لتناول الافطار معه وانا اذهب الى عملى فى الثامنه رايتهم يتنادون فى ميكروفون نفس المسجه انه توفى فقد مات على فراشه وهو نائم بعد صلاة الفجر تذكرت هذا الموقف عندما قرأت كلماتك
الاستيقاظ من النوم يعتبر نعمة.. فحينما تفتح عينيك لتجد نفسك مازلت فى الدنيا وأنك مازلت ترى وقادراً على تحريك أعضائك كل هذه المعجزات تستحق أن تقول"الحمدلله الذى أحيانا بعد ما أماتنا وإليه النشور".
تقبلى تحياتى الاحــــــــلام

eng_semsem يقول...

ياريت لو في شريط حياتي فورورد
عشان اعرف بكره مخبي ايه وهتنتهي مشاكلي على ايه
وفي اكتر من حاجه وكلام ياريت يتحقق بس مش هيتحقق في الدنيا
تقبلي تحياتي

دعاء العطار يقول...

بجد كل جمله كتبتيها بتحمل خبرات وبتختصر كلام كتير اوى ممكن يتقال

حاسه ان كل جمله من اللى قولتيهم عايزه كلام كتير اوى عشان تعلقى عليها

بجد لمستينى جداااااً بكلماتك

فيها فلسفه عميقه

:::::::::

مواقف كتير بصراحه افتكرتها وانا بقرا كلماتك

كل جمله كانت بترجعنى لموقف معين حصل معايا اوحصل لغيرى

دمتى بكل خير

فارس عبدالفتاح يقول...

سلام عليكم ‏

لا اقرأ كلمة ولا يجوب معناها او معانيها اذا كانت تحتمل اكثر من معنى وانا اقرأ حتى ولو كان كاتبها لا يعنيها ‏وكانت مجرد كلمة قد القى بها من عقله الواعي او اللاواعي في طريق عقلي . ‏

لان التواصل لغة واشارة ووجدان وتعقل واللغة تتكون من مبنى ومعنى ‏

لهذا كل كلمة اضعها موضع الاهتمام ، ولذلك قال رسول الله صلى الله عليه وعلى آله وسلم في حديث ما معناه : " ‏بلغوا عني ولو آيه ، رب مبلغ اوعى من سامع " ،، او كما قال عليه الصلاة والسلام ‏

تقولين :‏

فيه ناس وجودهم فى حياتنا عقاب.‏

بعد قرأتي لتلك الكلمات جلست اضحك من قرارة نفسي كيف يكون وجود انسان في حياتنا عقاب من الله سبحانه ‏



هى مالها إختيارات الدنيا ليا عاملة كده!.‏


لانها دار البلاء وليس دار المثوبة



هتعرفها إزاى وأنت ماربيتهاش.‏

ليس بالحتمية عدم معرفة الاخر وخصوصة الانثى ان لم اكن قد قمت بتربيتها ‏


طلاقى ليس عاراً أدرايه ولكنه وجعاً أداويه.‏

من وجهة نظر ذكورية ليس عارا ولا وجع لان المراة رومانسية حالمة في طبيعتها للعلاقة الزوجية اما الرجل ‏فبرجماتي زرائعي ، ولهذا فالمشكلة مشكلة الانثى وليس مشكلة الذكر ، لانها ليس واقعية بل تعيش الوهم في اللحظة ‏الف مرة .‏


مستجدعنى آه لكن مش ناسى أنى أنثى يتخاف عليها.‏

هو مخطأ في ذلك بلا شك ، لانه ينظر اليك من منطلق انك تتمتعين بالصفاة الكاملة للذكورة وانت في واقع الامر انثى ‏لها ما لها وعليها ما عليها ولابد ان تقيّم على قدر تكوينها وكينونتها . مهما صدر منها من مواقف حاسمة لا تصدر الا ‏من الرجال ، فهي في الاخير انثى لا اكثر .‏



نصيحة للمقبلات على الزواج: لازم يكون فيه هدف مشترك بينك وبينه علشان مع مرور الوقت وطول العِشرة ‏وتسرب الملل فى نفوسكم تلاقوا حاجة لسه بتجمعكم.‏


يعني ايه هدف مشترك مش فاهم .. يعني يكون عندهم تخطيط لقلب نظام الحكم او الاستيلاء على السلطة مثلا ‏

هههههههههه

بصراحة مش فاهم ‏



بطلت أسيب غيرى يفكر لى.‏

من البديهي ومن المسلمات ان لا يفكر احد لغيره ولكن اذا طلب المشورة او النصيحة فلا بأس ‏


لاستيقاظ من النوم يعتبر نعمة.. فحينما تفتح عينيك لتجد نفسك مازلت فى الدنيا وأنك مازلت ترى وقادراً على تحريك ‏أعضائك كل هذه المعجزات تستحق أن تقول"الحمدلله الذى أحيانا بعد ما أماتنا وإليه النشور".‏

الحمدلله على كل حال في السراء والضراء ، ولكن انا اعتقد وقد اكون مخطأ ان افتح عيني واجد نفسي مازلت في الدنيا ‏فهذا في حد ذاته كارثة لان وجودي في الدنيا يستتبع ذلك بالضرورة والحتمية انه هنا تكليف افعل ولا تفعل من اجل ‏الثواب والعقاب الجنة او النار الترغيب والترهيب ، شيء في منتهى الالم ‏

واللهم لا اعتراض لانه اذا اعترضت فلن تغير شيء ايضا فانت ليس لك اي خيار ثالث ، ان تختار بين هذين الامرين ‏وفي الاخير لا تلوم الا نفسك . ‏


ههههههههههههه لا حول ولا قوة الا بالله انا لله وانا اليه راجعون ‏

فارس عبدالفتاح يقول...

احكم فى ما تمتلكه لكن لاتعطى شئ مِلك غيرك لشخص آخر دون إذنه وتغضب إذا ما استرد صاحب الشئ حاجته.. ‏فهذا ليس من حقك.‏

من يعطي شيء ليس له فهو يسطوى على الاخرين ، ويريد ان يشكر على ما لا يملك ويوصف بالكرم ‏



شعور رائع أن يكون لديك القدرة على ترجمة كلمات طفل عمره عامان فى الوقت الذى عجزت فيه أمه عن ذلك.‏

هي ليس ام مسؤولة ولا تتمتع باليقظة ‏


ليه أبرز صفة فى المجنون أنه بيكلم نفسه.. طيب وإيه المشكلة لما الواحد يكلم نفسه!!على الأقل نفسه هتسمعه ومش ‏هتقاطعه ولا هتلومه ولا هتنقده.‏


اذا تحدث عاقل وليس مجنون مع نفسه ونفسه لم تلومة ولم تنتقده ولم تقاطعة فهي نفس غير سليمة بالمرة وعقله ليس ‏لديه رؤيا وضميرة لا يتمتع باي قيمة اخلاقية يجعلها مرجعية له في كل شارده وواردة في وجدانه ‏


غريبة معاملتك مع طفلك هى من ستحدد شخصيته فى المستقبل فبالله عليك بلاش تكبر دماغك وأنت بتتعامل معاه.‏

هل هذا اكتشاف حديث ان التعليم في الصغر كالنقش على الحجر ‏


قليلون هم من يحاولون تغيير الواقع للأجمل.‏

لا احد يستطيع ان يغير الواقع فالوجود لا يتغير الا من مبدعه ولكن لابد من قوانين وقيم اخلاقية تحكم معاملات البشر ‏فيما بينهم .. وهذا هو جوهر التكليف في افعل ولا تفعل .. ولذلك قال الرسول صلى الله عليه وسلم في حديث ما معناه ‏‏: " الدين المعاملة " او كما قال عليه الصلاة والسلام ‏



جهلك بالشئ لا ينفى وجوده.‏


هذه قاعدة فلسفية تقول : " عدم الوجدان لا ينفي الوجود " ..‏


كنت معاها فى عز آلامها ودلؤتى أنا ولا على بالها. ‏

عادي جدا هل انت تحتاجين الى شيء منها ام انك تشعرين انك صاحبة فضل عليها وتحتاجين الى رد الجميل .. فقط ‏هنا الاختلاف ‏



شعور مقيت حينما تحبهم وتفضلهم على نفسك وتدعو لهم دائماً بالخير وتتذكرهم وتبتسم وهم ناسيين مرورك فى ‏حياتهم.‏

هذا كلام غير صحيح وغير صادق لا يحب انسان احد اكثر من نفسه .. الا اذا كان انسان يفتقر الى الادراك والوعي ‏بالوجود وبكونه فيه ‏


ما أجمل أن تغلق باب الشيطان رغم أنه كان يأتى لك بنسمة ربيعية فى حر الصيف طلباً لمرضاة الله.‏

باب الشيطان لا ياتي منه نسمه صيفية تطلب مرضاة الله ابدا ‏

فقد خانتك العبارة وخانك التشبيه ‏



تقبلي تحياتي وارق واعزب امنياتي ‏



فارس عبدالفتاح .. قومي عربي ‏

موناليزا يقول...

كارمن
ـــــــــ
أهلا بيكِ يا سمسمة
أشكرك ياحبيبتى لرأيك
وتسلميلى يارب
نورتينى واسعدنى تواجدك


**********************************

محمد الجرايحى
ــــــــــــ
أهلا بيك أستاذ محمد
أشكرك جدا لرأيك ولتعليقك

ليه لأ هو مش المفروض انه يدافع عن الحق أصلاً وده القسم اللى أقسمه قبل ممارسة المهنة
مانراه فى واقعنا مخالف للطبيعة وشواذ للقاعدة

يسعدنا دوام التواصل


*********************************

أبو حسام الدين
ـــــــــــــــــ
أهلا بيك أستاذ رشيد
أشكرك جدا لرأيك

"العبرة بعموم اللفظ لا بخصوصية السبب."
جملة جميلة أول مرة أقرأها

يسعدنا دوام التواصل


*********************************

حد معين
ـــــــــ
أهلا بيكِ حبيبتى
آه والله وقيسى على ده بقى نِعم كتييرة اوى

أشكرك جدا لمشاركتك
وسعيدة بتواجدك


*****************************

محمد محمود عمارة
ــــــــــــــــــ
أهلا بيك أستاذ محمد
صح يافندم وكده احنا متفقين فخاصية فوروارد خاصة بالتقدم السريع للأمام:)
وهذا لايمنع من الندم على تصرف معين فى الماضى نتيجة طيبة زيادة أو سذاجة لاتصلح

أما عن الطلاق فرفقاً بهم أخى الكريم فهو تجربة مريرة حقاً وتستحق الرفق بمن هم يعانوه.. ومعك ان الدنيا مابتقفش لحد بس الموضوع هياخد وقت

عجبتنى اوى هذه الجملة
"في المحن تظهر معادن الناس و من لا يعرفني في محنتي ، فما حاجتي إليه في رخائي ؟"

أشكرك جدا لتعليقك ولمشاركتك
ويسعدنا دوام التواصل


*******************************

الأحلام
ــــــــــ
أهلا بيك يافندم
لا إله إلا الله
سبحان الله فعلا محدش ضامن عمره ولا عارف هيموت إمتى
البقاء لله

أشكرك جدا لمشاركتك
يسعدنا دوام التواصل


******************************

إنج- سمسم
ـــــــــــــ
أهلا بيك ياباشمهندس
ياخبر النهاردة بفلوس بكره يبقى ببلاش:)
شوية صبر بس وربنا يسهل

أشكرك جدا لمشاركتك
ويسعدنا دوام التواصل


********************************


دعاء العطار
ـــــــــــــــ
أهلا بيكِ يادعاء
ربنا يعزك يا دعاء على كلماتك المُشجعة لى.. من بعض ماعندكم ياحبيبتى:)

سعيدة بتعليقك وبتواجدك
وفى انتظارك دايما

*****************************


فارس عبدالفتاح
ـــــــــــــــــ
وعليكم السلام ورحمة الله وبركاته
أهلا بيك أستاذ فارس

وأنا يسعدنى تعليقك على كل كلمة

:) أقولك يافندم
فيه ناس دائمة الحقد والحسد عليك أو تتدخل فى شئونك الخاصة بفضول غير مرغوب فيه أو كلامها دايما بيجرحك تحت مسمى أن هى طبيعتهم كده مابعرفوش الكلمة اللى بيقولوها بتروح فين وغيرها من النماذج اللى تحس فعلا ان وجودهم فى حياتك عقاب:)
------
صح يافندم لانها دار ابتلاء بس الواحد ساعات بينسى:)
-----
اللى بيعاشر حد بيقدر يعرفه كويس سواء كان ولد أو بنت ومهما كان سنه ومش شرط يكون قصدى التربية بالمعنى المفهوم:)
----
"الرجل ‏فبرجماتي زرائعي"
مافهمتهاش الجملة دى على فكرة:)
هو ممكن يكون عندك حق ويكفى ان النبى صلى الله عليه وسلم وصف حالها قائلاً "وكسرها طلاقها"
-----
بس هو كده مش غلطان لأنه مش ناسى أنى أنثى:)
-----
:) لأ يافندم مش لدرجة قلب الحكم ممكن يكون الهدف طاعة الله وكل واحد فيهم بينافس التانى ويساعده على طاعة الله يعنى بيجمعهم هدف أعظم وأرقى من مجرد علاقة اجتماعية

-----------------
أوقات الانسان بيكون هش نفسياً جدا وكالريشة فى مهب الريح فيعتمد على من حوله لعدم قدرته على اتخاذ اى قرار

--------------
الموت يصبح راحة فعلية لو كنت بجد مظبط امورك مع ربنا وكل أعمالك تمام غير كده الواد يحمد ربنا انه اعطانا فرصة تانية لنستغفر ونتوب ونعمل عمل يشفع لنا عنده
-----------

أيوة بالظبط كده وكأنك بتتباهى بما ليس لك
----------------

أو تقدر تقول أم ومش حاسة بالنعمة اللى هى فيها
--------
نحمد الله ان نفسنا سليمة وسوية وبتعمل معانا أحلى واجب:)

--------------

ليس اكتشاف حديث ولكن قلة من يدركون ذلك

-------------
لأ ممكن تغيير الواقع بعدم استسلامك لوضعك الذى لا يروق لك
يعنى لو قاعد فى الضلمة ممكن جدا تقيد شمعة بدل ماتلعن الظلام

------------------

أول مرة اعرف انها قاعدة فلسفية
---------------

لأ يافندم مش محتاجة منها حاجة بس شعور بايخ لما تحس انك فى حياة أحدهم مجرد دواء لا يتذكرونك إلا عند الحاجة فقط

------------------

لأ والله بتحصل وده تقدر تسميه سذاجة
--------------

لأ يافندم قصدت ما قلته
كمحاولة أن تتحر من قيودك ولو للحظة
يعنى مثلاً فيها إيه لو هتحضر فرح مختلط للترفيه وغيرها من الأمثلة الذى يفعلها الكثير ولكنك مدرك عظمة الفعل


أشكرك جدا جدا على تعليقك وأسعدنى حقاً التعليق على ماجاء فى البوست
ويسعدنا دوام التواصل

غير معرف يقول...

أختي موناليزا
أعلم أن تجربة الطلاق تجربة مريرة ، لكني أردت أن أكون كجراح يقسو ليشفى مريضه ، و بالمناسبة مررت بالتجربة في سن صغير لم يتجاوز عمري ساعتها 20 سنة لكني فعلت كما طلبت من غيري أن يفعل ، نهضت و نفضت عن نفسي غبار التجربة و تعلمت و وعيت دروسها ثم مضيت أجتاز حياتي للأمام حتى من الله على بزوجتي الحالية ، ولا زلت أتعلم كل يوم فنون التعامل مع الزوجة و الأبناء ، فالحياة مدرسة لا تخلو أيامها من حصص دراسية.
تقبلي تحياتي

موناليزا يقول...

محمد محمود عمارة
ـــــــــــــــ
أهلا بعودتك أستاذ محمد
أحترم وجهة نظرك جداً
وأشكرك جدا لمتابعتك ولاهتمامك
وربنا يبارك لك فى حياتك

يسعدنا دوام التواصل

كلمات من نور يقول...

أحيانا أتمنى لو هناك خاصية فورمات لعقلي الباطن الذي يكنز بعض الذكريات المريرة .....تسلم الايادي يا موناليزتي

موناليزا يقول...

كلمات من نور
ـــــــــــــ
أهلا بيكِ غاليتى
آه والله ياريت كان فيه
أوقات كتير ببقى عايزة الذاكرة تسقط شوية حاجات بدل ما كل شوية تفكرنى بيها:)

تسلميلى حبيبتى
وأسعدتينى بتواجدك

فارس عبدالفتاح يقول...

سلام عليكم

شكر على الاهتمام وصدق رسول الله صلى الله عليه وسلم فهي فعلا رؤيتها ليست منطقية وليس سليمة فعلا لانها تنظر للامور على اساس عاطفي بعيد عن الموضوعيه ههههههههههههه ولهذا فانا لا اطيق ان استشير امراة حتى ولو كانت ( أمي ) مع اني اعلم انها امراة ذات طابع حليم جدا والحلم يجمع الكثير من الاخلاق ولكن الرؤية للامور رؤيا مشوشة بالعواطف والتخذيرات العاطفية والنواهي العاطفية والقيود العاطفية

ههههههههههههههههههه


تشعر حين تتحدث مع امراة او فتاة انك لست على كوكب الارض انت في الفردوس الاعلى ههههههههه مع النبيين والصديقين والشهداء وحسن اولائك رفيقا

مع انهم بشر وعندهم كلاكيع فكريه عميقه جدا ايضا مربوطه برضو بالعواطف

هههههههههه

اسف على اسلوبي في التهكم واعلم اني اخطاب انثى ايضا ولكن فعلا صدق رسول الله صلى الله عليه وسلم .. علينا ان نأخذ النساء على قدر عقولهم ونخلص المشكلة دي ونريح دماغنا ووجع المخ وان معجبهاش بعد كده بقى ما باليد حيله ولم يعد في قوس الصبر منزع هي حره الله يسهلها سكتها زراعي من غير مطبات

اسف اسف جدا والله يمكن تماديت في الكلام لكن والله لا اقصد شيء الا ان اخرج ما في قلبي وراسي

وعلى فكره .. اذا كنتي قارئه جيدة للامور الفكرية الدينية انصحك بان تقرأي لفكر المعتزلة فهو فكر محترم جدا سوف تستفيدين منه جدا

موناليزا يقول...

فارس عبد الفتاح
ــــــــــــــــــ
وعليكم السلام ورحمة الله وبركاته
أهلا بيك مجدداً أستاذ فارس

هى يمكن تكون بتحكم عواطفها كتير لكن هذا لا يمنع من رجاحة عقلها فى أمور كثيرة وأذكرك بموقف النبى صلى الله عليه وسلم حينما سمع بمشورة زوجته وقام بحلق رأسه حتى يقول لأصحابه بطريقة عملية بأنهم مش هيعملوا عمرة فى هذا العام

حضرتك بتتريأ وكمان معترف ان اسلوبك فيه تهكم!!
بس على فكرة بجد المرأة إنسان زيها زى الرجل فيهم وفيهم

ماشى يافندم أسفك مقبول:)

أما عن أصحاب الفكر المعتزلة فياريت تقولى زى مين؟

يسعدنا دوام التواصل

فارس عبدالفتاح يقول...

سلام عليكم

طبقات المعتزلة في كتاب الفهرست لابن النديم جعل لهم اكثر من عشر طبقات لاعيان المعتزلة ( العلماء الزهاد العباد ) على راسهم واصل بن عطاء اوبا الهزيل والخياط والفوطي ووالنظام والجاحظ والجبائي .... الخ


وانصحك بقراءة كتاب : " المعتزلة ومشكلة الحرية الانسانية " ... وكتاب : " المعتزلة والثورة " للدكتور محمد عمارة .

فهم كتابان في منتهى الروعة والايجاز

كما يوجد كتاب كثر قد كتبوا عن تاريخ هذا الفكر والتيار السياسي الديني في الاسلام منهم الغربيين ومن العرب الشرقيين وهناك كتاب اخر اسمه : : المعتزلة " ، للاستاذ زهدي جار الله .

وهو كتاب قيم جدا وثري بالمعلومات عن فلسفتهم ولكن انصحك ان تقرأي للدكتور محمد عمارة لانه يبسط الفلسفة الخاصة بهم حتى تستطيعين ان تفهمي ما هو اصل فلسفتهم .

تقبلي كل تقدير واحترام

فارس عبدالفتاح يقول...

عفواً


الكتب التي اشرت اليها موجودة ومرفوعة على النت لو قمتي بعمل بحث عنها على جوجل سوف تحصلين على الروابط للصفحات التي تخزن عليها تلك الكتب ما عليك الا ان تقومي بتنزيلها على كمبيوتر الخاص بك

فارس عبدالفتاح يقول...

يرجى متابعة الحلقة بالكامل

http://www.youtube.com/watch?v=ne0QOYoOsfs

مع اطيب التمنيات

موناليزا يقول...

فارس عبد الفتاح
ـــــــــــــــــــ
وعليكم السلام ورحمة الله وبركاته
أهلا بيك أستاذ فارس
وأشكرك جداً على اهتمامك
وجارى تحميل أول كتاب ومشاهدة الحلقة الخاصة به

جزاكم الله خيرا
ويسعدنا دوام التواصل