سلوكيات مذمومة

توجد سلوكيات بشرية غاية فى السوء لا تلاقى القبول سوى من شخص واحد فقط هو فاعلها أما من حوله فيشمئزون منه بل ويغضبون أيضاً.
وهذه السلوكيات لا يستأثر بها نوع عن آخر ولكنها مشتركة بين الرجل والمرأة ولذلك أردت إلقاء الضوء عليها حتى نحاول جميعاً تجنبها.
على سبيل المثال لا الحصر:
* الإهمال:
خلع الملابس مثلاً فى أى مكان فى الشقة والمطلوب من المحيطين به أن يجمعوها ويعيدوا ترتيبها ويضعوها فى الدولاب بسلام ولو معملوش كده يبقى هما الغلطانين.
أنا شايفة أن لو كل واحد اعتمد على نفسه مش هيبقى فيه مشكلة لا اللى بيرمى ملابسه هيضايق لو لم يجدها فى الدولاب مكوية ولا اللى بيلم وراه هيضايق أنه بيتعامل مع طفل صغير والكلام ده لكل من هو فوق العشر سنوات.
وقيس على ده.. اللى عطشان يخلى حد يقوم يجيب له يشرب.. وأنت إيه يمنعك من خدمة نفسك؟
* ارتداء ملابس غير مهندمة فى البيت.. من حق اللى معاك يشوفوك بمنظر كويس.
* فيه كلمة بكرهها أوى وهى كلمة "معرفش" وخاصة لما تكون فى موقف ساذج فتشعر معها أن قائلها أعطى لنفسه الحق فى الاعتماد على الآخرين.
مثال: معرفش أعمل لنفسى ساندوتش, معرفش أكوى هدومى , معرفش أخيط شرابى . سواء رجل أو امرأة هذه أشياء أساسية فى الاعتماد على النفس.
استغلال حد طيب معانا.
مثال: اعملى مش عارف إيه على مااتفرج على الماتش.. يعنى نطلب من الآخرين المساعدة لمجرد أسباب واهية.

* سلوكيات دورة المياه:
عدم شد السيفون, إلقاء الفوطة بعد استخدامها على الأرض - رغم انك لو نشرتها على العلاقة مش هيحصل حاجة- تغريق الحمام بالمياه..
رجاء أن تترك المكان كما تحب أن تجده لأن بكل بساطة متصور مين هينظف مكانك وأكيد انطباع اللى هيدخل بعدك مش هيكون فى صالحك
* التعليق على الطعام بصفة مستمرة ونقده بطريقة مبالغ فيها.. كان النبى صلى الله عليه وسلم لا يعيب طعاماً قط إذا اشتهاه أكله وإذا لم يشتهيه تركه.
*عدم احترام عادات وتقاليد المجتمع الذى يعيش فيه.
مثال: التأخر بعد منتصف الليل, ارتفاع الصوت بطريقة مستفزة تؤذى الآخرين سواء بارتفاع صوت المذياع أو التلفاز أو حتى صوته الشخصى, التدخين سواء من رجل أو امرأة, الملابس المستفزة من الجنسين.
* فى الشارع:
البصق على الأرض وقزقزة اللب ورمى القمامة فى الشارع.
* التعامل مع الأشياء بقسوة, عدم الالتزام بقواعد المرور.
* التدخل الزائد فى شئون الآخرين.
* عند الشراء أجد سلعة ما بسعر معين وبعد ما اشتريها أجدها بسعر أرخص فى مكان تانى.. ليه بتغلى الحاجة على الناس وتعتمد انهم هيفاصلوا طيب واللى مابيعرفش يفاصل يتضحك عليه!!
*خلع الحذاء فى الأماكن العامة, ارتداء جورب غير نظيف, عدم وضع مزيلات للعرق.

وغيرها كثير من السلوكيات المرفوضة.
والتى ادعو من يفعلها أن يقتنع تماماً بأنه قدوة للآخرين بأفعاله وسفيراً للإسلام بسلوكياته فأرجو أن تكون قد هذه المسئولية.

سؤال جانبى:
ــــــــــــــــــــــــ
* ما اكثر سلوك يستفزك ممن تتعامل معاهم؟.