الثلاثاء، 5 أبريل 2011

دبلة الخطوبة


تعد دبلة الخطوبة هدفاً لكثير من البنات، وكأنها الفانوس السحري الذي سيقوم بحل كل مشاكلها في الحياة، وهتنقلها نقلة مختلفة تماماً، وهتغير حياتها للأجمل؛ ولذلك ما بتصدق العريس يدخل من الباب، ومجرد ما تتم قراءة الفاتحة، وقبل حتى ما تلبس الدبلة تبدأ تتعامل معاه كأنه زوجها وناسية تماماً بأن الخطوبة ماهي إلا وعد بالزواج؛ يعني ممكن جداً الموضوع مايتمش ومايكملش- إذا كان دلوقتي بيتم الطلاق قبل الدخول وقبل ميعاد الفرح بساعات كمان فما بالك بقى بمجرد خطوبة-.
الخطوبة عزيزتي العروسة ليست زواج.. يعني ماينفعش حتى تصافحيه لأنه مازال رجل غريب عنك وبالتالي برضه ماينفعش أنه يمسك إيدك وهو بيلبسك الدبلة مثلاً وبديهي ماينفعش وهو بيزورك في بيت أهلك تطلعي له مثلاً ببيجامة وسايبة شعرك وكأنه بقى من محارمك.
وعشان كده ولأن فرحتك ممكن تنسيكي حاجات كتير أوي والتزاماتك تجاه نفسك ودينك عايزة أفكرك.. طول ما أنتي شايفة الدبلة في ايدك اليمين فده معناه إنه مش مسموح لك تسيبي نفسك بحريتها..
عايزاكى تعملي كل الحاجات اللي ماتندميش عليها لو الموضوع ماكملش.
بصي أول ماتلاقي الدبلة اتنقلت لإيدك الشمال هنا فقط دعي مشاعرك تنساب في جدول حياتك بلا انقطاع.
وأخيراً اللهم ارزق بنات المسلمين بالعفة والحياء.

سؤال جانبي:
ــــــــــــــــــــ
* لو عندك نصيحة للمخطوبين لا تبخل علينا بها

هناك 29 تعليقًا:

سواح في ملك اللــــــــــــــــــه- يقول...

كلام محترم وجميل
لاتعليق عليه
ملاحظاتي بقي ياعزيزتي علي فترات الخطويه
في ايامنا دي
ان الخطيب يوماتي
تلاقيه لازق في بيت خطيبته بغرة
ومش عايز يتحرك
اذا كانت تعمل مثلا ييجي من بعد
ماهي تييجي من الشغل
لحد ميعا د النوم وهو لازقلها
وبعد ميروح يمسك التليفون
ويفضل يدش هو وهي لحد ميعاد النوم
ويمكن مايحصلش نصيب
بعد كده
الخسائر بقي
لكل بيت عورات ومزايا
يكون طبعا الخطيب السابق اطلع عليها
وهتلاقي العورات دي
مستباحة علي مسامع الغير
عملا بمبد اذا خاصم فجر
فنصيحتي لكل مخطوبة
الالتزام بمواعيد محددة اسبوعية مثلا
في وجود الاهل

كلمات من نور يقول...

نصيحة مهمة للمخطوبين : انهم يتقوا الله ويراعوا ربنا في كل خطوة وكل كلمة ومينسوش إن احيانا كتيرة الخطوبات بتتفركش لسبب أو لاخر فالأحسن إن الاتنين يتقوا الله

AHMED SAMIR يقول...

في بنات كتير بيتخلوا عن المحاذير دي علشان الموضوع يمشي

غير معرف يقول...

طيب لو حب يمسك إيدها ، قال إيه بيعديها كما فعل مع الأخت الفاضلة سناء يونس ، إيه الحل ؟
على فكرة بس هكلم جد لكل أخت فاضلة حتى ولو قبل أن تُزفي له بلحظات يُعامل معاملة الغريب حتى يتم الزفاف ، و لا أعنى أن تكون الفتاة جافة مع خطيبها و لكن أقصد الحقوق.

مصطفى سيف الدين يقول...

طبعا الخطوبة محللة شرعا مافيهاش كلام
لكن الواجبات المفروض اتباعها في الخطوبة دي ناس كتير مش فاهماها
الخطوبة ما هو الا مرحلة ما قبل الزواج من تجهيز للجواز ومحاولة التفاهم ومعرفة اخلاق العروسين مش اكتر من كده
في اخطاء كتير بنقع فيها بنعتبر الخطوبة عقد رسمي وزواج لكن للاسف ده خطأ جسيم زي ما قلتي هو لسه بالنسبالها رجل غريب
مفيش نصيحة للمخطوبين غير انهم يعتبروا الخطوبة شيء تحضيري للزواج ومعرفة اخلاق كل طرف للتاني ويتقوا ربنا مش اكتر من كده
تحياتي

ابراهيم رزق يقول...

موافقك تماما

بس وجهة نظرى ان احترامها لنفسها يزيده احتراما لها و العكس صحيح و لكن بدون جفاء

خالص تحياتى

سلوى يقول...

تمام كده موناليزتي

نختصر كل الكلام في
تقوى الله في كل كلمه وفعل

ربنا يرزق شباب وبنات المسلمين بالزوج الصالح

اللهم آمين

eng_semsem يقول...

كلام جيل يا موناليزا بس المهم ان حتى الوقت اللي بيقعدوه مع بعض يحاولوا يظهروا على طبيعتهم من غير تكلف عشان يشوف كل واحد فيهم الانسان اللي هيعيش معاه بقيت عمره ويعرفوا بعض بجد وياريت احترام اي اتفاق اتفقوا عليه في الخطوبه بعد الجواز
تقبلي تحياتي

الشاعر الفنان أحمد فتحى فؤاد يقول...

اختنا العزيزة

صح كلامك

كلام محترم من إنسانه محترمة تعرف حدود الله

الخاطب يتمسك اكثر بخطيبته كلما تمسكت بحدود الله

و ليس العكس أبدا

و ليس كما تظن بعض. البنات انه كلما أعطته كلما تمسك بها

أبدا غير صحيح

ربنا يحفظ كل البنات


تحياتي و تقديري

عادل عبد اللطيف يقول...

ربنا يكرمك
كلامك جميل و جديد و فكرك عالي ربنا يأجرك و يكتر من أمثالك

Unknown يقول...

كلام رائع لكن للأسف الكلام سهل و الفعل صعب بالذات لو هما مختلفين و الأهل لهم دور كبير في توعية البنت و الأفضل يكونوا موجودين معاهم باستمرار في البيت عندي كلام كتير في الموضوع ده بحضره عشان أكتب فيه.
شكراً على الموضوع المهم و الكلام القيم
تحياتي و احترامي لكي

شمس النهار يقول...

النصيحة ان البنوته المخطوبة
تعز نفسها علشان تكون غاليه

وتدرس اخلاق الخطيب كويس علشان ماتندمش وماتقدمش تنازلات وخصوصا في الاخلاق

وماتزودهاش اوي في الماديات
خير الامر الوسط

ツSmiLeY AnGeLツ يقول...

الخطوبة مجرد فترة تعارف قبل الزواج
لكن مش التعارف لدرجة انه يبقى عندها او يلمس ايدها وتخلي شعرها مفتوح
او يخروجوا طول الوقت مع بعض
يعني يتعرفوا على بعض بس بحدود
في الماقم الاول الي يقدر يمنع ان البنت تعمل اي شي في فترة الخطوبة الاهل
يعني لو كانوا رافضين ان يكون دائما عندهم وان شعرها باين وان طول الوقت يخرجوا او يتكلموا 24 ساعة فيبقى العيب عندهم وهم الي رضوا على بنتهم
لكن الاهل الي حريصين على ابنتهم مابيخلوها تعمل اي شي من هذا ايوة تكلمه تشوفة بس بحدود
ربنا يوفقك كل مخطوبين وربنا يتممها بزواجة الدرة ويرزقهم بالبنين.
موضوع جميل جدا
تقبلي مروري ^_^
سلامي لاطيب موناليزا.

فارس عبدالفتاح يقول...

السلام عليكم

والله انا معنديش نصيحة بس عندي تعقيب تقولين ان الخطوبة هي وعد بالزواج ، واحب ان اصحح الخطوبة هي مقدمات زواج وليست وعد .

لأن الوعد لابد له بالوفاء وقد قال الله تعالى : واوفو بالعهد ان العهد كان مسؤلا .. صدق الله العظيم

لذلك اذا كان وعد فلابد من اتمام الزواج مهام كان الامر ، وهذا خطأ لاجبار الطرفين على الاستمرار في عملية الزواج حتى ولو كانوا لا يريدون هذا او توجد مشاكل تعرق هذا الزواج او الخ

فما ايرد ان اقوله هو تمهيد او بداية او سبيل الى الزواج .. وليس وعد .

ولي طلب اخير

اذا وجدتي فتاة في يومنا هذا بهذه المواصفات التي تريدين ان تعمل بها فتاة اليوم مع خطيبها .. ارجوك اعطني علم وانا مستعد ان اتقدم لها في حين علمي بها بعد استيفاء السؤال عنها .. واكون شاكرا لك .


تقبلي تحياتي وارق امنياتي


فارس عبدالفتاح .. قومي عربي

Mahmoud Ahmed يقول...

جزاكي الله كل خير
اللهم ارزق بنات المسلمين بالعفة والحياء

Unknown يقول...

بعد خطوبتين فاشلتين تماما :)
أحب أقول للبنات المخطوبات :
1) اسمعي كويس جدا و خدي بالك من العلامات الدالة على شخصيته
2) حاولي تحليل كلامه جيدا في المواقف المختلفة اللي ممكن تكشف جانب هام منه
3) اوعي تفتكر انك هتقدري تغيريه اي عيب انتي مش مستحملاه ناتتخيليش انه هيغيره عشانك .. التغيير ينبع من داخله .

مدونة رحلة حياه يقول...

السلام عليكم
فعلا اختى دوا اغبطك على حسن اختيارك ما تطرحين
ليتنا ننتبه لما ذكرت فقد سئمنا من الكلام فيه وفى مشكلاته

موجة يقول...

ربنا يرزق بنات المسلمين باللي يسعدهم ويصونهم..
خالص تحياتي
أحمد

الاحلام يقول...

النصائح كثيره اختى العزيزه ولكن اهمها على الاطلاق ان يخافا الله ويعلموا انه رقيب على كل تصرفاتهم واحترام البنت بالذات لنفسها فى هذه المرحله يعطى انطباع جميل عند الزوج فى المستقبل
موضوع مهم جدا وحساس ومهم جدا ان نتحدث فيه سعدت بوجودى هنا وبكلماتك الرائعه تقبلى تحياتى الاحــلام

مصممة أحلام يقول...

السلام عليكم و رحمة الله و بركاته

كعهدي بيكي عزيزتي موناليزا مواضيعك رائعة و بسيطة و في الصميم
انا اوافقك بشدة في كل اللي قولتيه ... ليا تعقيب بس فعلا الخطوبة هي وعد بالزواج (من قبل المخطوبة لأنه يحرم على اي شاب اخر خطبتها و يحرم عليها هي قبول اي خاطب طول ما هي مخطوبة مش زي ما بنسمع تبقى مخطوبة لواحد و يخطبها واحد اغنى او عنده مميزات تانية تسيب ده و تروح لده ) قال رسول الله صلى الله عليه و سلم (لا يبع بعضكم على بيع بعض ولا يخطب على خطبة أخيه إلا أن يأذن له)
...
و انا مع كلام محمد محمود عمارة في ان الحدود دي لازم تفضل قائمة حتى تزف لعريسها لأن طول ما البنت في بيت اهلها لازم تحط قدام عينيها قيمتها في نظر نفسها و في نظره بتحددها الضوابط دي
و متخفش منه لو هو انسان خلوق بجد و فعلا بيحبها بجد حتعلى في نظره قيمتها و العكس بقى لو معندوش اخلاق و لا بيحبها حقيقي حيحاول ياخد ما ليس له به حق و حيبتزها عاطفيا بقولة (تبقي مش بتحبيني !!)

جزاكي الله كل الخير اختي
تسمحيلي يا مونا انقل الموضوع عنك على الجروب عندي على الفيس بوك لتعم الفائدة ؟؟

momken يقول...

الخطبه هى مقدمات الزواج
وليست زواج
وان كانت تقينا اعين ولسان الناس
فهى ابداً لا تحجبنا عن عين الله
ليس من المرؤه ان لا نفعل شىء لمجرد ان الزواج ربما لن يكتمل...فحتى لو اكتمل لن يعفينا من الذنب الذى ارتكب
ولكن ايماننا الراسخ بان الله يرانا هو ما يمنعنا من المعصيه


موضوع رائع تحياتى

وردة الجنة يقول...

كلامك جميل اوى وفعلا مش كل الناس تعرفه او بتغفل عنه

اللهم ارزق بنات المسلمين الزوج الصالح والذرية الصالحة

تحياتى لك

Dr. Ibrahim يقول...

بليوجد افضل ما ذكرتيه حضرتك
جزاكم الله كل خير

Unknown يقول...

السلام عليكم

سلم قلمك أختي موناليزا.. تذكرة مهمة جدا حول خطأ تقع فيه الكثير من الفتيات ويتهاون فيه بيوت كثيرة...

أعتقد أن غضافة هي خاصة بتفاصيل التعامل مع المحارم، وهي متضمنة تقائيا فيما قلتيه.. يكفي فعلا أن تتخيل الفتاة الملتزمة كيف تتصرف مع غريب في الشارع وستعرف ما حدود علاقتها مع خطيبها.

دمتِ سالمة مع تحياتي.

بنت الصالحين يقول...

نصيحة للمخطوبين

بطلو تفكروا ف المرحلة دي بالعاطفة عطووووول لازم يكون فيه إعمال للعقل علشان ميعديش شهر العسل وتلاقي نفسها مع إنسان مش فاهماه : )

موناليزا يقول...

أهلا وسهلا بجميع السادة الحضور
أشكركم جدا لمشاركتكم وتعليقاتكم
ونفع الله بها بنات المسلمين

يسعدنى دوام التواصل
وفى انتظاركم دائما

سكندري يقول...

أشكرك علي كلماتك الرقيقة و أود أن أشاركك بعض الملفات المهمة التي من الممكن ان تستفيدي منها و تفيدي قراء المدونة و هم كُثر_ما شاء الله_

لنكات التحميل
http://www.mediafire.com/?zpxu4732p8zxnfo
http://www.mediafire.com/?wgfshomf0ohagi9
http://www.mediafire.com/?37q5dlgo1nrp5a2
http://www.mediafire.com/?h3t3uk8n8mdf35o

(المهاجر الى الله) يقول...

اقول لهم اتقوا الله

سلمت يداك موناليزا

زهرة يقول...

تمام يا مونى كلامك .. وأصلاً كل حاجة بعد الجواز حتى الكلمه الحلوة بتفرق وبتحسى طعمها غير ايام الخطوبه اصلا