الاثنين، 6 يونيو، 2011

صفقة طلاق


مما لاشك فيه أن عناد أحد الطرفين أو كلاهما يعد من أهم أسباب الطلاق. وقد يُخرب البيت بكل سهولة ويسر لرفض الطرفين بالتنازل قليلاً من أجل إرضاء أحدهما. وكأن الميثاق الغليظ الذى يجمعهما أصبح سهل فكه وتمزيقه وانتهاكه. ومن المؤسف فى حدوث الطلاق من وجهة نظرى عدة أشياء منها:
اعتبار أحد الطرفين بأن الطلاق مكسب مادى.
فالزوجة ترى أنها هتاخد قايمتها ومؤخرها والنفقة وهتتجوز بعد كده سيد سيده.
والزوج يرى أنه عرف يضحك عليها فى بداية الزاج ومايكتبش ليها مؤخر أو مايكونش له عمل ثابت أو عنده القدرة المادية التى تجعله يزور فى أوراق رسمية عشان يخسف بحقها فى النفقة الأرض أو ممكن يطعن فى القايمة أو ممكن يكرهها فى عيشتها لحد ماهى تقول حقى برقبتى ومش عايزة منك حاجة وفى هذه الحالة برضه هيتزوج واحدة تانية وبنفس العفش القديم ومش بعيد كمان بنفس ملابس زوجته الأولى واهو كده يبقى ضرب عصفورين بحجر واحد وغير زوجته الأولى طلباً للتغيير ومنعاً لملل..
-من كثرة ما أرى من حالات متشابهة بدأت أعرف الطرف الظالم من المظلوم فالظالم هو اللى غدر ورتب الخطة وقدر ييستنزف الطرف الآخر لآخر قطرة -.
ده غير أن أسباب الطلاق فى مثل هذه الحالات واهية جدا ولاتقنع طفل صغير.
الشئ الآخر:
أين أهل الزوجين!! ولماذا سمحوا بانهيار بيت مسلم بهذه السهولة!.. أين الحكم من أهله والحكم من أهلها لفض أى شجار!.. أين الأب اللى يهدى ابنه والأم اللى تعقل بنتها!.. أين كبير العيلة!.. أين الفرصة اللى يعطوها للزوجين يمكن يغيروا رأيهم!!.
للأسف فى أغلب الأحيان أصبح نادراً ماتجد أحد يريد أن يحافظ على كينونة البيت.
يعنى لو الأب مثلاً عرف أن ابنه ناوى يطلق زوجته بدل مايعقله يبدأ ينصحه تاخد منها إيه أو تنصب عليها فى إيه وهتوكل المحامى مين ولازم تشحططها فى المحاكم ونفس السيناريو لو الزوجة هى اللى ناوية تطلب الطلاق!!.
وأتسائل بدهشة لماذا كل هذا.. إذا كان الإسلام اللى انتوا تزوجتوا على كتاب الله وسُنة رسوله بيقول
" لا تخرجوهن من بيوتهن ولا يخرجن إلا أن يأتين بفاحشة مبينة" ومع الفاحشة يكون فيه أربعة شهود.. هى بقى زوجتك عملت إيه عشان سيادتك تعمل فيها كده؟؟.
والزوجة ممكن جداً تضر زوجها فى عمله وتتهمه زور ولا كأن كان فيه بينهم ميثاق غليظ!.
لماذا كل هذا؟
أيعقل بعد ماكانا الزوجين أقرب المقربين يصبحو أعداء..أيعقل أن تخون العِشرة والعيش والملح لأى سبب.. ألا يوجد ذكرى حلوة تشفع لأحدكما عند الآخر حتى إذا ما أردتما الفراق فليكون بالمعروف..
نصيحة:
-الزواج ليس كلعبة تزهق منها فترميها و تشترى غيرها.
-ارضى بنصيبك وحاول تصحيح أخطائك فأنت لست بملاك أيضاً بالنسبة لشريك حياتك.
-لو كان الطلاق لابد منه فيبقى بكتاب الله .
-لاداعى لتضيع العمر فى المحاكم ولا داعى لأن يكره الطرف الآخر نفسه يوم ما فكر أنه يرتبط بيك..
- اترك ذكرى طيبة فأن لم تصبحا زوجين ليس بالضرورة أن تصبحا أعداء.
-رجاء خاص للأهل بدل ماتبدأوا تدوروا لابنكم على عروسة قبل حتى مايطلق زوجته ساعدوا على عمارة بيته بدل هدمه.
وعلى الجميع أن يعرف بأن الزواج ميثاق غليظ ليس من السهل فكه بالإضافة لفرحة الشيطان يوم خراب أى بيت مسلم.
فاتقوا الله.




هناك 29 تعليقًا:

دعاء العطار يقول...

" - اترك ذكرى طيبة فأن لم تصبحا زوجين ليس بالضرورة أن تصبحا أعداء "

المفروض دى تكون قاعده مع أى حد بنتعامل معاه مش الزوجين بس

بجد حرام والله اللى بيحصل ده .. من أول مابيتجوزوا بيعلنوا الحرب على بعض مع ان الأصل ان بينهم موده ورحمه

كلام فى غاية الأهميه ياموناليزا

NISREENA يقول...

الناس أصبحت مش بتخاف من ربها :)

والكل بيحاول يكسب من كله

لا وتلائي لو الناس عندها بنت وولد وعاوزين يطلقوا تلائي النظرة المعاكسة

كتبت موضوع قبل فترة عن الحكاية دي

لكنه محفوظ ف الجهاز

فكرتيني انشره

لكن حيروحوا من عذاب ربنا فين؟؟؟

فارس عبدالفتاح يقول...

سلام عليكم

اولا شكرا على الاهتمام بالرد

ثانيا مش عايز اتكلم في موضوع الطلاق والزواج لاني تحدث فيه كثيرا واوضحت رايي فيه بما فيه الكفاية واعتقد انه سبب كل هذه المشاكل هي سوء الاخلاق والنظرة الضيقة الحالمة التي تاخذها الفتاة عن الرجل بصفه عامة وعن الحياة الزوجية بصفة خاصة

ولكن اردت ان اشير الى امر قد بدر منك واردت ان القي عليه الضوء وهو في احد التعليقات اثناء نقاشي معك قلتي انا لا ارى داعي من نقاشي معك وارى انه نوع من السفسطه

فاردت ان اوضح امر بسيط ولكنه يجافي الحقيقة العلمية اشتق مسطلح السفسطه من من اسم السفسطائيون وهم فلاسفة تابعين للفلسفة الجدلية البيانية وهي اعظم المدارس الفلسفية الكلامية التي تعتمد على الحجة القاطعة وجذالة اللغة وبلغة البيان في الصياغة ااادبية او في الخطاب المنطقي في المسائل الفكرية الفلسفية العمية وهي من اعظم المدارس الفلسفية في التاريخ وياتي في مقابلها في الفلسفة الاسلامية المعتزلة مؤسسين علم الكلام والوحيد

لهذا فانه العامة من الناس تعتقد خطاء ان السفسطة او السفسطائيون هم مجموعة من الفلاسفة المتكلمين ولكن يقلبون الحق باطل والباطل حق او انهم يقولون كلام اي كلام

وهذا خطاء علمي فادح فالسفسطائيون من اعظم علماء المنطق واحذق المتكلمين قاطبة في التراث البشري على وجه الارض

هذا للعلم والا حاطة

ريــــمــــاس يقول...

مساء الغاردينيا موناليزا
لوكان احد الطرفين ينظر للحياة الزوجية على أنها حياة وعمر وشراكة روح لما فرط بذلك الرابط بهذة السهولة أسوأ مايصل إليه الزوجين هو العناد وخاصة اذا أعتبرت الحكاية كرامة وكبرياء والحياة الزوجية كان من المفترض الا ينظر اليها بمشاعر الكبرياء كما ان مركب الزواج يحتاج من الاثنان التجديف امام موج الحياة والاهل حتى تصل المركب ولاتغرق بهما "
؛؛
؛
موضوعك رائع حقاً كم اتمنى على كل زوجين قرائته لانه ذو فائدة نتمناها للجميع "
؛؛
؛
لروحك عبق الغاردينيا
كانت هنا
reemaas

lina يقول...

موضوع جميل
جزاكِ الله خيرا و أحسن إليكِ
لينا.

مصطفى سيف يقول...

حالات الطلاق اليومين دول في زيادة بشعة
النسبة بقت مهولة جداجدا
و ده اللي خلى اي عرسان جداد اول ما يفكروا يفكروا في القايمة قبل اي حاجة تانية
تحياتي

أم هريرة (lolocat) يقول...

السلام عليكم

اختى لحبيبة
الامر ابعد من كده بكتير
احيان كتير مش بيكون الاهل مش قادرين يغيروا طبيعة الطرف الظالم ... وبيعملوا اقصى ما يمكنهم للاصلاح
لكن لان طباع هذا الطرف انتهت تفاصيلها ولا يمكن تغييرها او استبدالها لانه شب عليها
وليس ممن السهل التغيير هنا

واحيان تانية بيكون الطلاق اسلم طريق للعصمة وهنا بيكون لاسباب معينة صحية او نفسية لان مش كل الزيجات لازم تنفع وتستمر فيه امور لا تنكشف ولا تتضح الا بعد الزواج والاهل ليس لهم دحل هنا لانها اقدار الله

اما بقى المصيبة الكبرى لما مثلا المرأة تعمل كل اللى تقدر عليه لكن ربنا يوقعها فى زوج لا يعرف ادب الزواج ولا الحياة الزوجية الصحيحة وكيفية تعامل الزوجة والاولاد

او العكس بالنسبة للرجل عندما لا تشاركه المرأة حياته وتكون قاسية القلب وتجردت من انوثتها وطبيعتها

اما الاهل فكثيرا مانجد هذه الايام ان هناك من يسعد جدا بخلاصه من الابن او البنت متصورين ان بزواجهم انتهت المسؤلية للاسف وهنا تحدث المشاكل
بعد الزواج يجب ان تفهم ام العروس ان عليها واجب النصح والارشاد المستمر لابنتها لانه بالتاكيد ستقع فى مواقف لابد من التوجيه فيها وكذلك الزوج يحتاج اهله فى خطواته الاولى ليرشدوه للصواب بهدووووووووووووء

اسأل الله تعالى ان يهيىء لنا جميعا من امرنا رشدا

بوركت اختى الحبيبة
موضوع النهارده دسم جدا :)

تحياتى لك

Butterfly يقول...

عندك حق طبعا
بس انتى مش واخده بالك ان معظم الحالات دى بيبقوا شباب مستهتر
بيبقوا عاوزين يتجوزوا وخلاص معرفوش ازاى يبنوا بيت ويكونوا عيله
عشان كده مع اول مشكله حقيقيه الكل بيبان على اصله

ربنا يعافينا ويكتبلنا اللى فيه الخير

ماجد القاضي يقول...

السلام عليكم

إشاراتك وملاحظاتك مهمة جدا أختي موناليزا...

أنا لست بصدد الحديث عن اسباب الطلاق.. لكن يهمني أن اذكر أن بعد أحد الطرفين أو كلاهما عن الخلق الكريم لديننا.. والبعد عن تحكيم شرع الله بين الزوجين عند الطلاق يصنع العجائب...!!!!!

ووالله لو طبقنا أحكام الشرع في الطلاق لرأينا أرقى وأجمل علاقة بين طرفين افترقا...

ولا أتوقف ابدا عن تأمل قول الله عز وجل في هذا المقام: "ولا تنسوا الفضل بينكم".

وملاحظة أخيرة خطيرة: وهي سعي عديمي الخلق في سبيل تبرئة النفس إلى تشويه سمعة الآخر وإفشاء أسراره التي كانت بينهما كزوجين.. ولا حول ولا قوة إلا بالله.

تحياتي.

لـــولا وزهـــراء يقول...

على فكرة يامونا مبدئياً انا بحب التورت جدا لو دفعولي فلوس الدنيا ماكل من التورتة اللي انتي حطاها دي ابداااااااااااااااااااااااااااااااا

لولا

لـــولا وزهـــراء يقول...

"وعلى الجميع أن يعرف بأن الزواج ميثاق غليظ ليس من السهل فكه بالإضافة لفرحة الشيطان يوم خراب أى بيت مسلم.
"

وربنا كلام رائع وموزون جعله الله في ميزان اعمالك الصالحة

لولا

أحمد شريف يقول...

السلام على الجميع
تابعت المقال والتعليقات وأدعو الله أن يهب الناس البصيرة والسلام الداخلي أولًا

=======

ليست لدي الكثير من الكلمات هذه الأيام لكي أتحدث عبرها ... اعذريني

سواح في ملك الله- يقول...

الطلاق

عنوان عريض وكأنه نهاية الدنيا
ولكنه قد يكون طوق النجاة
لااحبذ الطلاق في حالة وجود اولاد
فيجب ان يضحيا كلا الطرفين من اجل اولادهما
والا فانهما لايستحقان ان يكون لهما اولاد
ان يراعي كلا الطرفين الله في الاخر
حتي ولو حدث الطلاق
فهذه اخلاق الاسلام

شيرين سامي يقول...

موناليزا بعتذر عن تقصيري معاكي
للأسف كلامك صحيح و العنوان مُعبر جداً اتنين صحابي مروا بتجربة الطلاق و الاتنين اتبهدلوا و اتنصب عليهم.
و أكتر شئ انتبهتلوا ان الجيل ده مالوش كبير يعني مبيسمعش كلام حد كلامه من دماغه و ان سمع يسمع الكلام اللي على هواه الغلط أساساً.
سامحيني بس بحس ان معظم أسباب الطلاق الرجال و ان البنات بتبقى حرسصه على الزواج أكتر لدرجة التضحية.
موضوع مهم و نهايه موفقه سردتيها بشكل جميل
تحياتي الخالصه لكي

reemaas يقول...

اقولك انا يا مونى الاهل فين

انتى قلتى كل الاسباب اللى الاهل ممكن يتدخلوا فيها بس ده لو كانوا معتبرين دى جوازة

لكن فى حالات كتير انا شفتها الاهل بيعتبروا الجواز صفقة او فرصة او غنيمة

هياخدوا مهر اد ايه وهيشيلوا ااقل التكاليف باى وسيلة والمؤخر هيبقى كام

عمليه حسابيه بحته اترفعت منها الرحمة

MR.PRESIDENT يقول...

أنا هقول رأيي
لو في احتمالية تغير المخطأ لخطأه ، افضلوا مع بعض
لكن فيه أخطاء بتبقي كبيرة لو مفيش اصرار وعناد واستكبار صدقني أحسن لهم كل واحد يخرج من الرباط ده بالمعروف

علي فكرا فيه عادات ممكن تخلي الواحد يطلق مراته ممكن تكون في نظر الغير هايفة

مثال احنا عندنا يعتبر قرية متمدينة شويا ، بس لازلت هناك بعض الأسر بتعيش مع بعضها ، أحيانا تلاقي الزوجة ربة منزل وترفض تعمل اي حاجة في بيت حمتها بحجة إنها مش الخدامة ، مع إن فيه عرف ، وتعمل الزوجة مشكلة بين الابن وبين أمه

الابن يعمل حاجة من الاثنين يا يركب مراته علي أهله يا يركب أهله علي مراته كل طرف بيبص من وجهة نظر التاني

مع إني أبسط شيء إن ممكن تعدل بين الاثنين بإنك تقول لمراتك دي أمي وخسراتها من خسارتي وتقول للأم براحة عليها

لكن في رأيي لو ركبت الزوجة دماغها ، في سيت سلامة وتاخد حقها بما كتبه الله لها ولا نبدل قول الله .

فيه ستات بتبقي عايز الستر ورجاله عايز الستر
وفي ستات بتبقي عايزه الحرق ورجاله عايزين تحط عليها زيت ويتولع فيهم

أنا شايف إن العادات ليها دور في ابقاء الزواج من عندمه معلش طولت عليكي

كريمة سندي يقول...

إن حالات الطلاق لدينا في السعودية ارتفعت جدا لأنه لا يوجد قانون يحمي حقوق المرأة فالرجال يساندون بعضهم

Dr Ibrahim يقول...

صفقة طرفيها خاسران.

بنت الصالحين يقول...

بجد موضوع روعة

خصوصاً إنك كنتي محايدة فيه جداً

موناليزا يقول...

دعاء العطار
ـــــــــــــــ
أهلا بيكِ يا دعاء
ماهو للأسف مش كل اللى المفروض بيحصل

لو احترموا المودة والرحمة اللى بينهم ماكنوش عملوا فى بعض كده

أشكرك جدا لرأيك ولتعليقك
نورتينى دعاء الجميلة وأسعدنى تواجدك


*********************************

نسرينا
ـــــــــــ
أهلا بيكِ يا نسرينا
دى حقيقة للأسف:(

ونحن فى انتظار موضوعك:)

صح.. ربنا كبير وعلى كل ظالم

نورتينى حبيبتى وأسعدنى تواجدك


********************************

فارس عبدالفتاح
ــــــــــــــــــ
وعليكم السلام ورحمة الله وبركاته
أهلا بيك أستاذ فارس
أولا: لاشكر على واجب
ثانيا:مع احترامى لرأيك واشمعنى اختصيت الفتاة وحدها بسوء الاخلاق والنظرة الضيقة للحياة الزوجية؟؟
أليس الرجل أيضاً أحد أهم طرفى الزواج والذى يستطيع أن يجعل الحياة وردية اللون أو يجعلها قاتمة اللون من خلال حكمته فى إدارة شئون بيته

ثالثاً: أشكرك على المعلومة

يسعدنا دوام التواصل


*******************************

ريماس
ـــــــــــ
أهلا بيكِ يا ريماس
مساء الفل يا حبيبتى:)

أحييكِ جداً على تعليقك المنطقى وأتفق معكِ فيه

أشكرك جدا لرأيك
وأنا أيضا أتمنى من الجميع قراءته

تسلميلى حبيبتى
ولروحك عبير الورد:)

فى انتظارك دايما

*****************************

لينا
ــــــــــ
أهلا بيكِ لينا
أشكرك جدا لرأيك فى الموضوع
ربنا يكرمك يا حبيبتى
نورتينى لينا الجميلة واسعدنى تواجدك


******************************

مصطفى سيف
ـــــــــــــ
أهلا بيك يا دكتور
وهذا للأسف
تعرف ان فعلا ممكن جوازات كتير بتبوظ من قبل حتى ما تبتدأ بسبب القايمة والمؤخر

أشكرك لتعليقك
ويسعدنا دوام التواصل


********************************

أم هريرة
ــــــــــ
وعليكم السلام ورحمة الله وبركاته
أها بيكِ يا لولو
أنا متفقة معاكِ طبعاً ولكنى هنا أخص اللى بيطلقوا بأسباب تافهة ولا تستحق

أما فى الحالة التانية فليطبقوا شرع الله"تسريح بإحسان" يعنى الطلاق فى حد ذاته مش حرام ولا فيه أى اعتراض الاعتراض على اللى بيحصل وقت الطلاق وبعد الطلاق

وعن توجيهات الأسرة المفروض من وجهة نظرى تكون التوجيهات دى حصلت بالفعل قبل الزواج عشان مش كل مشكلة أجرى على أهلى واحكيلهم واطلع اسرار بيتى بره ولاهو كمان المفروض يعمل كده

أشكرك جدا لرأيك و لتعليقك
وربنا يهيئ الخير للجميع
نورتينى حبيبتى واسعدنى تواجدك


********************************

بيترفلاى
ــــــــــ
أهلا بيكِ حبيبتى
فعلا غالبيتهم شباب بس العيب بجد على أهلهم اللى تسمح لهم بكده وماتعرفوش ان الزواج ده رباط مقدس ومش من السهل كده يتفك

الأهل هنا عليهم دور كبير جداً

يارب ياحبيبتى
أشكرك جدا لتعليقك
نورتينى وفى انتظارك دايما


*******************************

ماجد القاضى
ــــــــــــــ
وعليكم السلام ورحمة الله وبركاته
أهلا بيك أستاذ ماجد
أشكرك جداً لرأيك

ده حقيقى جداً لأن الزواج أصلاً شرطه الوحيد أن يكون على كتاب الله وسُنة رسوله
وفعلا حاجة مؤذية بجد لما تشوف اتنين مطلقين وفيه بينهم عداوة ومحاكم وقضايا ولا كأنهم كانوا أقرب الناس لبعض فى يوم من الأيام وخصوصا لما ماتبقاش لاقى سبب مقنع للعداوة دى

وعن ملاحظتك فطبعاً عندك حق لأنه عيب وحرام كمان

أشكرك جدا لتعليقك الممميز
ويسدنا دوام التواصل


*********************************

لولا وزهراء
ــــــــــــ
أهلا بيكِ يا لولا
:) حقك يا حبيبتى

ربنا يكرمك يارب وأشكرك جدا لرأيك ولدعائك

نورتين حبيبتى واسعدنى تواجدك


*****************************

أحمد شريف
ـــــــــــ
وعليكم السلام ورحمة الله وبركاته
أهلا بيك أستاذ أحمد
ربنا يكرمك على دعائك وأشكرك جدا لمتابعتك

عذرك معاك يافندم ويكفينى تواجدك
يسعدنا دوام التواصل


******************************

موناليزا يقول...

سواح فى ملك الله
ــــــــــــــ
أهلا بيك أستاذ خالد
هو مش نهاية الدنيا ولكنه نهاية لحياة كانت قائمة بالفعل
ومش كل الناس بتقدر تمر بالتجربة دى بسهولة
وعشان كده نتمنى أن تنعدم تماما من مجتمعنا
والحل دايما فعلا فى تطبيق أخلاق الإسلام

أشكرك جدا لتعليقك
ويسعدنا دوام التواصل


********************************

شيرين سامى
ــــــــــــ
أهلا بيكِ يا شيرين
عذرك معاكِ يا حبيبتى انتى تنورينى فى الوقت اللى يعجبك فمدونتى ترحب بكِ دائما

ده حقيقى أى بنت مابتبقاش بتتجوز النهاردة عشان تطلق بكره بس ارجع واقول العيب كان فى اختيارها من الأول

أشكرك جدا لرأيك ولتعليقك
أسعدنى تواجدك


********************************

ريماس
ــــــــ
أهلا بيكِ يا ريماس
دول بجد حسابهم كبير عند ربنا
لأن الزواج مش لعبة ولا مشروع ولا صفقة ده حيااااة

أشكرك جدا لتعليقك
نورتينى حبيبتى واسعدنى تواجدك


*****************************

مستر بريزدنت
ــــــــــــــ
أهلا بيك أستاذ بسام
ماهو مفيش اعتراض على الطلاق فى حد ذاته الاعتراض على التصرفات المسيئة من كلا الطرفين للآخر ده غير طبعا ان الزوجة ممكن جدا ماتاخدش حقها الطبيعى فى الظروف دى

المثال اللى حضرتك ذكرته واقعى جدا وانا اعتب فيه على الزوجة لسبب بسيط وهى انها اكيد عارفة التقاليد دى من قبل الزواج وبما انها وافقت يبقى ماتجيش تشتكى بعد كده

فعلاً فيه وفيه ومش كل الناس زى بعضها

أشكرك جدا لتعليقك
وطول براحتك فتعليقكم يثرى الموضوع

يسعدنا دوام التواصل


********************************

كريمة سندى
ـــــــــــــ
أهلا بيكِ يا كريمة
غريبة ان ينتشر معدل الطلاق فى السعودية لان الزوج ممكن جدا يتزوج اكتر من واحدة عادى واللى على ذمته ومش عايزها يصرف عليها وعلى البيت وخلاص

أشكرك جدا لتعليقك
وفى انتظارك دايما


*******************************

د/ ابراهيم
ــــــــــــــ
أهلا بيك يادكتور
مش دايماً
فالظالم بيكسب كل حاجة فى الدنيا وبيتجوز وبيخلف وبيبقى له حياة جديدة تماما

أشكرك جدا لتعليقك
ويسعدنا دوام التواصل


*******************************


بنت الصالحين
ـــــــــــــ
أهلا بيكِ حبيبتى
أشكرك جدا لرأيك
على صاحب القلم أن يكون دائماً محايد:)

نورتينى حبيبتى واسعدنى تواجدك

وجع البنفسج يقول...

الكلام جميل ، بس مين يفهم ويعي هالكلام .. ساعات يا موناليزا باحس انه الطرفين داخلين معركة وكل واحد منذ بداية الزواج يجهز نفسه أنه في حالة الطلاق ، يكون أقل الخاسرين من هذه المعركة المسماة زواج ..

يعني في الاساس في نية الطلاق ،، قبل ما نبدأ انتهينا ..!!
""""""""
الله يبعد عنا وعن الجميع الشر .

ابراهيم رزق يقول...

الطلاق مع انه حلال لكن بغيض

ادعو كل من يفكر فى الطلاق ان يتذكر يوم زواجه و ما هو حلمه يومها
استغرب ايضا كيف لمن تم اغلاق باب واحد علينا و اقتسمنا الوسادة كيف يحمل للاخر مشاعر بغض
فى اغلب احوال الطلاق ابحث عن المادة و المصالح

تحياتى

فارس عبدالفتاح يقول...

سلام عليكيم


اقول وبالله التوفيق :

المشاكل هي سوء الاخلاق والنظرة الضيقة الحالمة التي تاخذها الفتاة عن الرجل بصفه عامة وعن الحياة الزوجية بصفة خاصة

فانا لم اخصص سوء الاخلاق على الفتاة، بل ( اطلقت - عممت ) سوء الاخلاق على الطرفين .

وعطفت النظرة الضيقة الحالمة للفتاة عن الرجل والزواج .


هذا باختصار

مها البنا يقول...

الطلاق فعلا صفقه أو صدمه .. لكن طرفيها خسران الطالم والمظلوم.
أحيانا لا يكون هناك مجال لحل أخر ..
تعرفى أنا نفسى فى ايه؟؟
نفسى أشوف حد من بتوع .. ولا تنسوا الفضل بينكم أو من بتوع .. تسريح بإحسان .. هما لسه عايشين فى الدنيا؟؟
قربت أصدق إنى من زمن اليوتوبيا زى ما المقربين منى بيقولوا .. نفسى أشوف حد صح عشان اتاكد إنى مش عايشه فى خيالى. حد يقدر يوصل لحقه بالقانون وليس بالدراع رغم إنه قادر على ذلك دون أن يكون أفلاطونى التفكير وحالم فى زمن واقعى ومادى أكثر من اللازم
موضوع قيم جدا .. وصعب قوى ..
شئ غريب ... كل البوستات بتتكلم عن البعد والهجر والطلاق والقلب اللى بيبع وبينقى ...
هو فيه ايه؟ D:

rack-yourminds يقول...

بصراحه في تلك الايام نشهد حاله من انقلاب القيم وتلك مفارقه غريبه جدا في مجتمع يدمغ نفسه بانه مجتمع متدين!!

__

موضوعاتك دائما هادفه
بارك الله فيكي

موناليزا يقول...

وجع البنفسج
ـــــــــــــــ
أهلا بيكِ حبيبتى
عندك حق وهذا من وجهة نظرى زواج غير مكتمل لأن الأصل فى الزواج الأبدية مش اتجوز وانا من جوايا ناوى أطلق

ربنا يكرمك ياحبيبتى
وأشكرك جدا لرأيك ولتعليقك
وفى انتظارك دائماً


******************************

ابراهيم رزق
ـــــــــــــ
أهلا بيك أستاذ ابراهيم
ده حقيقى
وهذا يثير تعجبى أيضاً فهل نسوا الفضل بينهم!!

أشكرك جدا لتعليقك
ويسعدنا دوام التواصل


*******************************

فارس عبد الفتاح
ـــــــــــــــــ
وعليكم السلام ورحمة الله وبركاته
أهلا بيك أستاذ فارس
طالما عممت سوء الاخلاق على الطرفين .
يبقى واضح انى فهمت كلامك غلط

أشكرك للتوضيح
ويسعدنا دوام التواصل


*******************************

مها البنا
ـــــــــــ
أهلا بيكِ يا مها
وانا كمان والله نفسى اشوفهم.. فيها ايه لو نتعامل بكتاب الله اللى احنا اتجوزنا عليه.. فيها ايه لو كل واحد خد حقه اللى يرضى ربنا

واضح انها حالة عامة يا مها:)

أشكرك جدا لتعليقك
واسعدنى تواجدك


******************************

راك يورمايند
ـــــــــــــــ
أهلا بيك يافندم
مين قال ان مجتمعنا مجتمع متدين!!!
بقى بعد كل المصائب اللى الناس بتعملها فى بعض ويبقى مجتمع متدين!!!
ده بأمارة إيه طيب؟؟

واضح إنها إشاعة مش أكتر

ربنا يكرمك وأشكرك جدا لرأيك فى مواضيعى فما توفيقى الا بالله

أشكرك جدا لتعليقك
ويسعدنا دوام التواصل

eng_semsem يقول...

موضوع مهم يا موناليزا جدا وسبب في خلق جيل يعاني من اضطرابات نفسيه وفعلا الدين وجد الحلول في جميع الحالات اللي تحافظ على الطرفين سواء بداية محاولة حل المشاكل ما بين الطرفين في بيتهم وثانيا تدخل الاهل لمحاولة الاصلاح مش التخريب اعطاء الرجل حق الطلاق والانثى حق الخلع في حالة احساسهم بعدم نجاح المعيشه بالمره مع اعطاء كل فرد حقوقه اما الطرف الذي يلجئ الى المحاكم فقد يكون مظلوم لم ياخذ حقه او ظالم يريد الاستفاده بقوانين تعطيه اكثر من حقه
وانا ارى والله اعلم لزواج الذي يقابل المشاكل ويتجه الى الفشل له حل من الاثنين اما الخلاص بالمعروف وكل واحد عارف حقوقه او محاولة انجاحه من قبل الزوجين والاهل بحل المشاكل اما حل المحاكم فهو استمرار في الفشل وزيادة للمشاكل لن يكون هناك مكسب منهاالا بوجود شبهة مال حرام سواء دفعه الزوج وهي لا تستحق اصبحت هي اخذت مال حرام او منعه الزوج وهي تستحق اصبح هو من يملك مال حرام
تقبلي تحياتي

موناليزا يقول...

إنج -سمسم
ــــــــــ
أهلا بيك يا باشمهندس
عندك حق
الأطفال هم الضحية الاولى

و الطرف المظلوم هو الضحية التانية
وفعلا لو طبقنا الدين حياتنا هتكون مختلفة تماما
إما الزواج بمعروف أو التسريح بإحسان

أشكرك جدا لتعليقك
ويسعدنا دوام التواصل