الجمعة، 17 يونيو، 2011

لراغبى التعليم


بما أنى مارست دورى كطالبة وكمُدرسة فأصبح عندى خبرة لا بأس بها ولذلك أردت أن أوجه عده نصائح لكل طالب مهما كان عمره.
- احترم مواعيد درسك التعليمى ولا تعتمد أن ينتظرك مُعلمك ويوقف الدرس إلى أن تحضر.
- لا تكن طالباً مشاكساً.
- لا تحدث من جوارك مهما كانت الأسباب طالما الدرس بدأ.
- إذا أردت أن تسأل عن أى شئ غير واضح فى فهمك للدرس فاسأل مُعلمك فهو سيتقبل هذا ولن يتقبل أن تسأل من بجوارك.
-لا تسخر من مُعلمك أو توجه له نقداً على الملأ.
- لا تسخر من زملائك أو تعلق على مايقولوا.
- اترك المكان كما تحب أن تجده.
- ضع هدف أمام عينيك واسعى جاهداً للوصول إليه.
- اعرف مكانة طالب العلم عند الله فأنت فى سبيل الله حتى تعود لمنزلك.
- لاتعتبر مكان العلم نادى إجتماعى لمقابلة أصدقائك فأماكن الترفيه كثيرة ويمكنك الذهاب لأى منها بعيداً عما يريدون التعلم.
-راجع الدرس مباشرة بعد ذهابك إلى المنزل وإذا كان هناك واجب فاعمله أولاً بأول.
- لا تركن المادة التعليمية كثيراً حتى لايتراكم عليك فيصعب عليك مذاكرته.

وهذه نصايح سريعة لأيام ما قبل الامتحان:
-التليفزيون والكمبيوتر والنت والموبايل مش هيطيروا.. نويت مذاكرة بجد يبقى تغلق الموبايل ..تبتعد تماماً عن مشاهدة التليفزيون واطمن مفيش حاجة هتفوتك فكل حاجة بتتعاد.
- أنت أولى بكل وقت ممكن يضيع فى تفاهات.. واعرف أن أى اتصال هيمتد لساعات لأن الشيطان هيحاول يشتت انتباهك لأنه هيستفيد من رسوبك.


- اعمل جدول للمذاكرة والتزم به بحيث يتوافق مع إمكانياتك ولاتقلد أحداً من أصدقائك فكل فرد وله إمكانيات خاصة به.
- اجعل هدفك دائماً أن تحصل على أعلى تقدير وذاكر على هذا الأساس مش عشان تنجح وبس.
- إياك أن تفكر فى الغش أو تلجأ إليه مهما كانت الظروف.. فالنجاح بمجهودك لا تعادله سعادة.

وأخيراً بُشرى سارة لكل طالب :
أنت فى سبيل الله.
فقط خد نية أن تنجح نصرة لدينك. فالمُسلم يجب أن يكون متفوقاً وقدوة حسنة دائمة.


سؤال جانبى:
ــــــــــــــــــــــــ
أذكر ذكرياتك مع المذاكرة والامتحانات؟
.

هناك 19 تعليقًا:

دعاء العطار يقول...

فكرتينا بالذى مضى ياموناليزا

دى الذكرى السنويه لأخر امتحان امتحنته

أنا بصراحه كنت دايماً مش بذاكر طول السنه بس كنت فى الأخر بطحن

وكنت دايماً بطبق عشان أخلص

وفى كل مره مكنتش بتعلم وكنت بأجل المذاكره لأخر أيام

الحمد لله عدت على خيييييييييير

(:

سواح في ملك الله- يقول...

ارشادات جميلة جدا

فاتتنا المرحة دي بقي من زمان

ياريت تعلقيها مثلا في وحات علي جدار الفصل

تحيتي ياامة الله

مصطفى سيف يقول...

نصائح يحتاجها اطفالنا كثيرا نشكرك عليها
اما عن ذكرياتي عن المذاكرة والامتحانات
فقد كنت ممن لا يذاكرون الا حينما يحدد ميعاد امتحان قد اتابع في حضور المحاضرات لكن كمذاكرة جادة لا تكون الا حينما اشعر بقرب وقت الامتحان
اتذكر فقط في تالتة اعدادي تم تأخير امتحاناتنا بسبب انتخابات برلمانية فظبطولنا الامتحانات بحيث نخلص قبل اختبارات الثانوية العامة بيومين
حتى يوم الجمعة امتحنونا فيه
افتكر في الفترة الطويلة اللي قبل امتحان تالتة اعدادي كان كل اللي في البيت عندي خلصوا امتحانات وعمالين يذلوا فيا علشان اذاكر
وصلت اني كنت بذاكر اكتر من 10 ساعات ده رقم قياسي بالنسبالي متكررش حتى في الثانوية العامة بس علشان ملعبش مع اخواتي
تحياتي

أم هريرة.. lolocat يقول...

السلام عليكم

شكرا لك على كلماتك وارشاداتك الجميلة والنصائح الرائعة :)
بالنسبة لذكرياتى يمكن ناس كتير تستغرب لما اقول انا كنت اعشق المذاكرة (مذاكرة بفهم مش دح ) هههههه كنت احب اعرف كل جديد و اخاف جدا اترك اى حرف فى ورقة الاسئلة ما اجاوب عليه

الحمد لله كنت دائما متفوقة يمكن ما كنت من الاوائل دايما لكن فعلا كنت متفوقة بفضل الله انا وكل اخواتى الحمد لله

اما ايام الجامعة الامر كان مختلف لانى كليتى دخلتها باختيارى جدا وكانت هدفى من وانا صغيرة وكانت كلها ايام طيبة وجميلة وذكريات مش ممكن انساها

اشكرك مرة تانية على مساحة الذكريات الرقيقة اللى سمحتى لنا بها هنا :)
لك تحياتى وتقديرى

Carmen يقول...

مش هكتب عن ذكريات بقي ده واقع مؤلم ملموس ^_^
يلا ربنا يعديها علي خير
بوست رائع تسلم ايدك

سبايدرمان يقول...

نصايح مفيده و مهمه جدا
و محدش يعرف قيمتها الا الى في مزنوووق
هههههههههههههه

انما ذكرياتي بقي
ده دلوقتي صعب لأني مش هلحق او احتمال حد برد عنده دلوقتي يجي يضربني ولا حاجه
^_^

تحياتي لك

الاحلام يقول...

جميل اختى الكريمه موضوعك وفى غايه الاهميه
اتذكر عندما كنت اذاكر يوما وكنت على بعد يومان على الامتحان وانقطع النور بالمنطقه ولا يوجد اناره الا فى عامود البلديه فقلت اذهب لاذاكر بعيدا عن ضجيج الناس والتى خرجت الى الشارع المظلم يتحدثون بصوت عالى جدا ذهبت مسرعا الى هناك لارى موقفا له العجب رأيت كل زملائى فى البلده عند عامود البلديه يذاكرون فابتسمت وتوجهت اليهم واكملنا الليل سويا .
تقبلى تحياتى الاحــــــــــلام

Single Mummy يقول...

جميل يا موناليزا ومفيد بس نفسى بأة تعملى بوست مماثل للمدرسين عشان كتير منهم محتاجين هذة النصائح جزاكى الله خير على كتاباتك المفيدة

سارة
سنجل مامى

lina يقول...

السلام عليكم

- اعرف مكانة طالب العلم عند الله فأنت فى سبيل الله حتى تعود لمنزلك...

فكرة رائعة لتجديد النية ..أحسن الله إليكِ..

لينا.

محبة الرحمن يقول...

نصائح حلوة للى يطبق

ابراهيم رزق يقول...

جازاكى الله كل خير

لكن كل الحاجات دى معروفة و دى اللى بتفرق بين الطالب المتفوق و الطالب العادى
لكن كل الحاجات دى مكنتش بعملها
يا ترى عرفتى انا كنت طالب ايه
هههههه

تحياتى

مها البنا يقول...

فكرتينى بالإرشادات اللى كانت بتبقى فى ضهر كراسة الخط :)

تعرفى؟؟ وانا فى الثانويه العامه حصل معيا موقف لذيذ

كنت مذاكره الكميا كويس جدا .. لكن يوم الامتحان لقيتها كله سلطه جوه دماغى ومش فاكره شئ (ملحوظه: لست من النوع الذى تنهار أعصابه خلال الامتحانات.. فقط بعض القلق لا يضر). المهم رحت وانا ميته من الخوف وفعلا الخوف شل تفكيرى وبكيت .. فاصحابى حبوا يجاملونى فكتبولى معادلات التحويل بتاعة العضويه على الديسك.
وقالولى قبل الدخول على طول .. المهم أنا قعدت وانا مصره انى مش هغش أبدا (ولله الحمد عمرى ما غشيت فى اى امتحان فى حياتى) .. لكن الفتنه كانت شديده .. أسئله مش عارفاها .. وأجوبه قدام عنيا .. خفت .. ونديت المراقب وقلتله ان الديسك مكتوب عليه حاجات وانا مش كتبتها وطلبت منه يغيرلى الديسك.
الغريب ان المراقب بصلى بشك فى البدايه .. وساعتها قلت هلبس قضية غش .. لكن ربنا ستر ونظرة الشك بقت نظرة استغراب وغيرلى الديسك.

الخاتمه .. جبت نوته وحشه جدا فى الكميا .. ومقدرتش ادخل الكليه اللى كنت بحبها .. لكن ربنا كرمنى بعد كده احلى كرم وطلعت من الاوائل فى الكليه وبعدها ..

الغش زى الكذب ... ملوش رجلين وبيجبر صاحبه دايما انه يزحف على الأرض وميرتفعش ابدا.

نصايح مفيده .. فقط اذا كان هناك من يستمع

ماجد القاضي يقول...


السلام عليكم

جزاك الله خيرا على النصائح الطيبة.. أعتقد أن عددا لا بأس به من المدونين يحتاجونها.. :)

بالنسبة لذكريات الامتحانات فهي كثييييرة.. لكن سأكتفي حاليا بما ذكرته في آخر بوست عن اللغة العربية :)

تحياتي أختي الكريمة.

----------------

بالنسبة للبوست السابق: صراحة تعجبت جدا من توضيح أحد المعلقين الذي يتعجب من أن تكون مرجعيتك في أمورك كلها إلى الحلال والحرام، ويفضل عليها (فلسفة الصواب والخطأ)!!!!!!

أنترك تحكيم (الحلال والحرام) والمقصود به تحكيم الشرع، ونلجأ إلى تلك الفلسفة التي هي نتاج تفكير بشري نسبي للغاية قد يتحول فيه الصواب عند قوم إلى خطأ عند آخرين، والعكس بالعكس....!!!!

ليس أمامي إلا أن أقول: لا حول ولا قوة إلا بالله.. أتستبدلون الذي هو أدنى بالذي هو خير؟!!!

عامة عندما اطلعت على مدونة صاحبنا، فهمت من أول نظرة سبب ما يحمل من فكر..

اللهم أرنا الحق حقا وارزقنا اتباعه.. وأرنا الباطل باطلا وارزقنا اجتنابه.


أحسن تـستاهـل يقول...

عمري ما قمت أصحصح نفسي لما يكبس عليا النوم.. كبس اقوم انام على طول
انما اغسل وشي بأه واصحصح وامشي شوية واتكلم مع حد علشان افوق؟؟
نووووووووو

ريحة النسكافيه الى الان بتفكرني بالمذاكرة.. عااااااااا
ما كنتش بشربه غير في اليوم اللي هطبّق فيه :(

*********************

مها ميهوووو

موناليزا يقول...

دعاء العطار
ــــــــــــــ
أهلا بيكِ يا دعاء
بس مش بذمتك كانت ايام جميلة:)
ولا يوم من أيامها دلؤتى

وانا كمان كنت كده وكأن آخر يومين دول هما اللى هيثبتوا المعلومة اكتر:)

نورتينى حبيبتى
وأشكرك لمشاركتك


*********************************


سواح فى ملك الله
ـــــــــــــــــ
أهلا بيك أستاذ خالد
أشكرك جدا لرأيك
وياريت لو ينفع بجد انى اقولها واعرفها لكل طالب
أصل الفرق بين التقديرات ممكن يكون على نص درجة وده بجد بيفرق بعد كده

ربنا يوفقهم جميعا

يسعدنا دوام التواصل


****************************

مصطفى سيف
ــــــــــــ
أهلا بيك يا دكتور
الشكر لله يافندم فما توفيقى الا به

واضح انها حالة عامة:)..أنا ايضا كنت احضر المحاضرات بانتظام ولكن المذاكرة حينما يتم تحديد موعد الامتحان

ياخبر حتى يوم الجمعة وانتوا لسه فى تالتة اعدادى!!
الموقف ده حصل السنة اللى فاتت لاخويا وهو فى البكالوريوس خلوه يمتحن يوم الجمعة بس مش فاكرة كان ايه السبب:)

أشكرك جدا لمشاركتك
ويسعدنا دوام التواصل


******************************

أم هريرة
ــــــــــــ
وعليكم السلام ورحمة الله وبركاته
أهلا بيكِ يا لولو

الشكر لله حبيبتى فما توفيقى الا به

بس بجد كانت أجمل أيام:)
أنا بقى حبيت تخصصى لما دخلته

نورتينى حبيبتى واسعدنى مشاركتك
فى انتظارك دايما


******************************

كارمن
ــــــــــ
أهلا بيكِ يا سمسمة
طيب كنتى اكتبى عن طقوسك فى المذاكرة:)

ربنا معاكِ يا حبيبتى
شدى حيلك وذاكرى كويس

أشكرك جدا لرأيك
وفى انتظارك دايما


*********************************

سبايدر مان
ــــــــــــــ
أهلا بيك يا دكتور
أشكرك جدا لرأيك فى النصايح
وياريت تطبقها
لان النت مش هيطير:)

تمنياتى لك بالتوفيق
بس اسعى ياعبد وانا اسعى معاك:)

يسعدنا دوام التواصل


******************************

الأحلام
ـــــــــ
أهلا بيك يافندم
أشكرك جدا لرأيك فى الموضوع
:) رغم توتر الاعصاب المصاحب لهذا الموقف الا انه يظل ذكرى لها أثرها الطيب

أشكرك لمشاركتك
ويسعدنا دوام التواصل


*******************************

سنجل مامى
ــــــــــــ
أهلا بيكِ يا سارة
أشكرك جدا لرأيك

و دى حاجة تفوتنى برضه
كاتبة بوست مخصوص ليهم ونزلته من فترة
وده الرابط يا حبيبتى

http://monaliza110.blogspot.com/2010/11/blog-post_17.html

أنتى تؤمرى بس :)

نورتينى وأسعدنى تواجدك

موناليزا يقول...

*******************************

لينا
ـــــــــ
وعليكم السلام ورحمة الله وبركاته
أهلا بيكِ يا لينا
تعرفى لو قبل ما نعمل اى حاجة مهما كانت وخدنا نية هنحس بقيمتها وهتفيدنا دنيا وآخرة

أشكرك جدا لتعليقك
وأسعدنى تواجدك


*******************************

محبة الرحمن
ـــــــــــ
أهلا بيكِ فى زيارتك الاولى
أشكرك جدا لرأيك فى النصايح
وربنا يهدى جميع الطلبة والطالبات ويفتح نفسهم للمذاكرة

يسعدنا دوام التواصل


********************************

ابراهيم رزق
ـــــــــــــ
أهلا بيك أستاذ ابراهيم
ربنا يكرمك

ماتقولش الكلام ده بقى قدام زياد وساليناز وانا عن نفسى مش هقولهم:)

يسعدنا دوام التواصل


*******************************

مها البنا
ـــــــــــــ
أهلا بيكِ يا مها
ههههههههههه عجبنى تشبيهك للى انا كاتباه بالارشادات اللى بتبقى ورا الكراسات

تعرفى انه حصلى موقف مشابه
بس وانا فى البكالوريوس دكتور العربى كان عاطى لنا قبل الامتحان جملتين وقالنا هطلب منكم اعرابهم
وانا ذاكرت الكتاب كله وحافظة المنهج والجملتين دول كنت حطاهم فى جيبى عشان قبل الامتحان اقرأهم بسرعة المهم انى نسيت وقلت مش معقول هييجوا وجت الورقة ولقيت ان الجملتين دول عليهم درجات كتيرة اوى وانا بجد ناسية الاعراب ومش فاكرة.. وكان ممكن اطلع الورقة من جيبى فى اللجنة او ادخل الحمام وأقرأها لكن خوفى من ربنا منعنى وطلعت النتيجة وجبت درجة وحشة بس على قد ما زعلت من الدرجة لكنى فرحت انها كانت فى الدنيا مش فى الآخرة:)

أشكرك جدا لمشاركتك
وفى انتظارك دايما

*********************************

ماجد القاضى
ــــــــــــ
وعليكم السلام ورحمة الله وبركاته
أهلا بيك أستاذ ماجد
ربنا يكرمك يارب
ويارب تجيب نتيجها
أنا بجد كتباه لهم مخصوص:)

ولماذا تكتفى فنحن نستمتع بتعليقاتك وبمشاركتنا ذكرياتك

----

أنا تخطيت مرحلة التعجب:)

أشكرك جدا لتعليقك ولمتابعتك
ويسعدنا دوام التواصل

**************************

أحسن تستاهل
ــــــــــــــ
أهلا بيكِ يا ميهو

أنا المشروبات مابتعملش معايا حاجة
انتى عارفة آخرى شاى بلبن او كاكاو لكن بقى المنبهات دى ماليش فيها خالص:)

ومن قلقى طبيعى النوم كان بيروح بس كان اجمل شعور بعد ما اروح وآخد السرير بالحضن بعد غياب يومين عنه ياااه:) كانت ايام والله:)

نورتينى حبيبتى فى انتظارك دايما

Dr Ibrahim يقول...

جزاكم الله كل خير على تلك النصائح القيمة فما أحوجنا لمثلها ليس فى أيام المذاكرة والإمتحانات فقط ولكن طول العمر فعلى المتعلم أن ينهى دراسته وقت موته فقط..

وبالنسبة للذكريات ذكريات لاتعد ولا تحصى:)
تحياتى

موناليزا يقول...

د/ ابراهيم
ــــــــــــ
أهلا بيك يادكتور
ربنا يكرمك وأشكرك جداً رأيك
وفعلا العلم يعد متعة بالنسبة لبعض الناس

كنا عايزينك تشاركنا فى بعض هذه الذكريات :)

يسعدنا دوام التواصل

دنيا رواياتي يقول...

نصائح رائعة وجدا مفيدة للي بيقدرها

http://rewaeate.blogspot.com