1- لا أحد ينكر فضل الضربات القاسية فهى تفيق من الغفلة وتنبه حواسنا بأن نكون أفضل من ذلك.
----------------------------
2- مش معقول تغبطيها عشان حظها أحسن من حظك..هى ذنبها إيه محدش بيختار نصيبه.
-------------------------------
3- إحساس بايخ أوى لما تكون عايز تكتب عن حاجة ومش عارف تعبر بالكلمات.
---------------------------
4- إحترافية النفاق: أعلن فشلى الذريع فى هذا الاحتراف..إزاى أضحك حتى فى وش حد مابحبوش!!.
----------------------------
5- أغلبية البنات مفكرين أن الزواج ماهو إلا رقص وميك آب ولو بيتقنوا الحاجات دى خلاص كده يبقى وصلوا وناسيين خالص الطبيخ والكنس والغسيل والكوى والتنضيف وغسيل الأطباق و... و.. و.. اللى برضه لازم يتقنوها بمهارة عشان الليلة تعدى على خير.
---------------------
6- الفلوس بتغير النفوس.
------------------
7- رسالة للأمهات: قبل ما تعاقبى ابنك عرفيه هو بيتعاقب ليه
----------------
8- أعظم هدية يعطيها الأب لابنته: أن يعامل أمها بحب.
وأعظم هدية يقدمها لابنه: ألا يشرب أمامه سجائر.
-------------------
9- خد نفس عميق وأخرجه زفيراً ..إذا اسمتعت بدخول الهواء لرئتيك دون أى مشاكل صحية فقل "الحمدلله" فغيرك لا يستطيع.
------------------
10- بحب شكلى وأنا متغطية.
------------------
11- عجيب أمر الأمهات فكل أم تعتبر طفلها من أجمل أطفال العالم حتى لو كان فى عيون الآخرين غير كذلك.
--------------------
12- ماينفعش تكلمنى فى وقت أنا مش طايقة نفسى فيه.
-------------------
13- بلاش تعيش دور المظلوم وبالذات معايا ده أنا بشم المظلومين من على بُعد.
---------------------
14- ما بال أقواماً يسيئون التصرف تحت بند حُسن النوايا.
---------------------
15- فى أى مكان بتروحه المهم الصُحبة.
-------------------
16- عندما يموت المرء بعد ما يقول كلمة ما فإنها تبقى فى ذاكرة الناس أكثر وقت ممكن..لذا انتقى كلماتك دائماً لعلها تكون الأخيرة.
---------------------
17- شعور بايخ لما تحس إنك متراقب ومعدود عليك أنفاسك.
---------------------
18- مابحبش حد يتصل بيا مخصوص عشان يضيع وقته معايا
ولا بحب حد يتصل بيا مخصوص عشان يلومنى انى مابتصلش بيه.
----------------------
19- إيه المشكلة لما تستأذنى قبل ما تزورينى.. مين قالك أنى بحب المفاجآت اللى من النوع ده.
------------------------
20- أقوى انتصار هو انتصارك على نفسك।
------------------------
21- أتعجب ممن يكون لدية ضائقة أو هموم من اى نوع ويشركنا فيها وندعو له بصدق وحينما تنقشع هذه الغمة لايخبرنا.. هل تتفقون معى بضرورة مشاركتنا أفراح بعضنا البعض كما نتشارك الأحزان.
-----------------
22- لسة يادنيا بتبهرينى بآدائك الغير متوقع دائماً بالنسبة لى وكأنك تفتحين صندوق بندورا الخاص بتنوع الشخصيات.
--------------------
23- موعد مع السعادة
ترى من منا أخلفه.. أنا أم السعادة؟.
هناك 8 تعليقات:
اعجبتني جدا موعد مع السعادة و سؤالك من منا اخلفه
احيانا اسال نفسي السؤال ده من مان اخلفه و بعدين اقول اكيد اكيد الموعد اتاجل مش اكتر :)))))
اعجبتني كتاباتك جدا:)
تحياتي :)
عزيزتي موناليزا ..
أعجبتني حكمكِ الرائعة ..
بالفعل الضربات مثل القنابل ، نعيد من خلالها التفكير ..
و هناك الزواج :)
و هناك امممم تربية الأبناء ..
و النفاق و و وو
أجبت بها كلها ..
و بصراحة سأعدل من واحدة منها !
" هي تضييع الوقت على التلفون " !!
دمتِ بخير ..
تحيآاتي لكِ ..
كان نفسى اعلق على كل مقوله بس مفيش عندك خاصيه الكوبى
على العموم استمتعت بخواطرك وكتاباتك تعجبنى نظرتك للحياه وتعمقك فى الاشياء التى قد تمر على البعض مرور الكرام
رائعه يا أمه
لا احد اخلف موعده لا انتِ و لا السعادة
لأن السعادة ليست في الدنيا
كتاباتك رائعة دمتِ مبدعة
الخط صغير اووووووى
فعلا احساس بايخ انك ماتعرفيش تعبرى ولا تلاقى الكلمات
مش عيب فى البنات انهم يفتكروا كده صدقينى انا شايفه ان ده حقهم
عجبنى اوىى موضوع الشهيق ده
للسعاده ميعاد ولكننا لا نعرف متى يكون
جميله كلماتك وعبارات كتير مهمه في حياتنا
تحياتي
حكم جميلة جدا
وأفادتني شخصيا الي حد كبير
بس مش عارف الفونت بتاع الكتابة صغير اوي ليه
مش عارف بقي دا عندي بس ولا عند باقي الناس
تحياتي
أهلا وسهلا بقرائى الأعزاء
أشكركم جدا لتعليقاتكم
وأعتذر عن صغر الخط وأعتقد أنه الأن قد تم التعديل
نورتوا مدونتى وفى انتظاركم دائما
إرسال تعليق