الحياة تجارب

توجد فئة كثيرة لديها ارتباط غريب بعاداتهم فى كل شئ منذ صغرهم ولا يجدون أى مُشكلة فى هذا ولا يحاولون مجرد محاولة لتغيير ماهو جديد ولو على سبيل التغيير وكسر الملل ومن يحاول تشجيعهم على التغيير يعتبرونه مُتسلط. والأمثلة كثيرة منها:
- واحد أكلته المفضلة رز وشوربة من وهو صغير ومابيفكرش أنه يجرب حاجة تانية رغم أنه لو جرب أصناف أخرى أكيد مش هيندم.
- آخر يتعامل مع ميكانيكى لتصليح سيارته وهو بالنسبة له أحسن واحد يصلح سيارات رغم أنه دائم الذهاب له مما يعنى بأنه غير كفء وإلا كان صلح العربية كويس.. طيب ليه ماتروحش لميكانيكى تانى .
- واحد رافض أن يأكل صنف معين لمجرد عدم تعوده عليه منذ الصغر .. لماذا لاتتذوقه مش يمكن يعجبك.
- واحدة متعودة تطبخ بطريقة تقليدية من أيام جدتها وترفض طلب أولادها بأن تطهى لهم أصناف جديدة.. حتى لو مش عارفة ما تتعلمى واسألى مش يمكن ده يجعل أبنائك يقبلون على طعامك.
- واحد متعود يقضى يوم الأجازة الأسبوعية نايم فى البيت.. لماذا لا تجرب الخروج مع أهل بيتك والاستمتاع بهذه العطلة .
-واحد مابيحبش السفر.. لماذا لا تجرب وتستمتع بكل شئ هتتعلمه.
- واحد متعود ينام بالنهار ويستسقظ بالليل.. ماتجرب تغير الوضع مش يمكن تلاقيه أفضل.
- واحدة متعودة تشترى من محل معين وبعد ما تشترى تتفرج على بقية المحلات وتتفاجئ إن فيه حاجات أحلى وأرخص من اللى هى اشترتها.. طيب ماتجربى تتفرجى الأول.
- آخر يقرأ نوعية معينة من الكتب ويشاهد برامج معينة ومعندوش نية يتغير.. طيب ماتجرب حاجة جديدة حتى لو مابتحبهاش مش يمكن تفيدك أكتر.
- واحد بيلعب شطرنج بخطة معينة وكل مرة يتغلب ..طيب ماتجرب تغير خطتك فى اللعب مش يمكن تفوز.
- واحد متعود يسهر فى مكان معين.. طيب ما الأماكن كتير جرب تروح أماكن جديدة ليه تحصر نفسك فى حاجة واحدة بس.

نصيحة:
ــــــــــــــــــ
* لا ترتبط بشئ معين طول الوقت بل جدد من حياتك.
* كن مرن وجرب كل ماهو جديد طالما لا توجد فيه معصية.
* الحكمة :هى الخبرة التى نحصل عليها من خلال تجاربنا.
* لا تتوقع أن يتقبلك الآخرين هكذا دائماً ومثلما تطالب بتغيير عاداتهم عليك أيضاً أن تغير من عاداتك.

سؤال جانبى:
ـــــــــــــــــــــــ
أذكر موقف مشابه؟.