الأحد، 20 مايو 2012

ادعوا لى بالخير


من رحمة ربنا بنا أنه سمح لنا ندعيه ونطلب منه كل اللى نفسنا فيه فى أى وقت وفى أى مكان ووعدنا بالإجابة.
لكن للأسف يوجد ناس تسئ استخدام هذه النعمة كأن يدعو أحدهم على ولده أو نفسه أو ماله أو كأن يتمنى أحدهم أن يصبح مثل فلان ويظل يدعو الله كثيراً"يارب أكون زى فلان" ومايعرفش مثلاً أن فلان ده ممكن يكون مريض بمرض خطير أو يكون غشاش أو يكون حرامى لأن مايراه هو ظاهر الشخص وليس باطنه.
أو مثلاً زوجة تدعى على حماتها أن ربنا ياخد أغلى حاجة عندها علشان تتهد وماتعرفش إن أغلى حاجة عندها ممكن تكون زوجها أو ابنها على اعتبار أنه حفيدها.
أو زوجة تدعى على زوجها أنه يحصل له مصيبة وماتعرفش أنها أول واحد هتتأذى لو هو حصل له أى حاجة.
أو من تتشاجر مع زوجها وتدعو الله بألا تنجب منه وبعد ما الخناقة تهدى وهو يصالحها وتجد أن الحمل اتأخر تندم .
أو حد يدعى أنه نفسه يحصله كذا وبعدين يموت.. وشوفتها بجد واحد ظل يدعى أنه يخلف ويحمل ابنه وبعد كده يموت من كتر ما كان يائس وسبحان الله الزوجة تحمل ويكون هو فى قمة السعادة وتنجب الولد ومن فرحته يذهب للأهل والمعارف لكى يروا ابنه وبعدها بأسابيع قليلة يموت.
وهكذا فالدعاء فى لحظات الغضب والجهل كفيل بأن يغير حياتنا رأسنا على عقب.

أحياناً كثيرة أجد عدم قبول الدعوة رحمة من ربنا لأن كل واحد بيبقى شايف الموضوع من جهة واحدة بس ومايعرفش فين الخير بجد.

ولذلك أدعوا دائماً بالخير والسعادة وإن ربنا يعمل لنا الخير حيثما كان ثم يرضينا به ومالوش لازمة نتدخل فى أقدار الله فالدعاء يمنع القدر.
واستغلوا لحظات الضعف والظلم فى الدعاء بالخير لكم لأن ربنا وعد بالإجابة.



مش هوصيكم ادعوا لى بالخير.

هناك 10 تعليقات:

الـسـيـدة نـون يقول...

يعني إيه الدعاء بيمنع القدر ؟
!!!!!!!!!!!!!!!

معتقدش ان فيه حاجة ممكن تمنع ما قدره الله لنا يا موناليزا


الشخص اللى مات ده بعد ما دعا ربنا ان ربنا يرزقه بالولد وبعد كدة يموت

الشخص ده كان هيموت هيموت
دعا ربنا او مدعاش ربنا كان مقدر له الموت من الأول خالص


انا معاكى ان الواحد مايدعيش بحاجات بعينها او حاجات مادية
ونخلى دايما الدعوة عامة
و تكون دعوة بالخير والرزق الطيب
ونكون واثقين من جوانا ان اى حاجة هتحصلنا حتى لو ظاهرها مش خير
إلا ان اكيد في باطنها الخير الكثير
لان ربنا مبجيبش الا كل خير




انا على فكرة مش فاهمة برضه يعنى ايه الدعاء بيمنع القدر
هل دى حقيقة دينية فعلا؟
ام انها مجرد وجهة نظرك

عايزة افهم بجد


سلام

اختك خيخة

فاتيما يقول...

انتى صح جداااا
ف كلامك

الواحد ميدعيش
بشر ...

كفاية يقول حسبى الله
ف اللى ظلموه
وكفى بالله حسيبا
وعدله سبحانه .. ييجى ف وقته هوه


احنا بس اللى بنستعجل
وبنخاف
وبنتمنى العدل ف وقتنا احنا


معلش
بالوقت ..
نتعلم
نتعلم ان شاء الله
نضبط حالة الهلع دى
ونوجه غضبنا التوجيه الصح
ونطلب المساعدة بالطريقة الصح


ربنا يهدينا جميعا

:)

ليلى الصباحى.. lolocat يقول...

السلام عليكم
فى حديث بما معناه ( لايغير قدر الا الدعاء ) والدعاء ايضا قدر

نسأل الله تعالى ان يوفقنا واياكم لما يحب ويرضى ويرزقنا واياك شربة هنيئة من يد الحبيب محمد لانظمأ بعدها ابدا

تحياتى لك اختى الغالية
دمت بكل خير

ظلالي البيضاء يقول...

اللهم باسمك الأعظم الذي إذا دعيت به أجبت ؛ وإذا سئلت به أعطيت .. يا رحمن يا رحيم .. يا ذا الجلال والإكرام .. يا الله .. اكتب لنا ولأختنا موناليزا ولجميع أحبابنا والمسلمين الخير في الدنيا والآخرة والسعادة فيهما .. عاجلاً غير آجل ..

P A S H A يقول...

ربنا يكرمك إن شاء الله

Days and Nights يقول...

الأخت الغالية / موناليزا

أتفق مع كلامك 100%

وبإن الدعوة تستجاب حتى من المشرك

فهى علاقة بين الله سبحانه وتعالى وداعيها

علاقة مناجاة بين الرب وعبدة

وممكن حدوثها أو تحقيق رغبة قائلها

وممكن أن تتصل بالقدر ولكن لا تغير فيه

فمثلا شخص ظالم دعونا عليه الله عز وجل

والله يعلم أنه ظالم ومقًدر له العذاب

فقط بدعوتنا عليه عرفنا مصير ظلمة

وما ستأول إليه نفسه وشهدنا عليه

يوم يكون الناس كالفراش المبثوث

لم نغير من قدره ولكننا أيضا أشهدنا

الله تبارك وتعالى عليه وعلى أفعاله

وعلى النقيض شخص آخر دعونا له بالخير

يعرف الله جل جلاله أفعاله

ولكن دعوتنا له لن تعجل له بالجنه

بقدر ما يمكن أن تعلو به لجنة أخرى

دعائى الدائم لروحك الطيبة

خالص مودتى

تامر

موناليزا يقول...

بت خيخة وأى كلام
ـــــــــــــــــــ
أهلا بيكِ يا خوخة

الدعاء فى حد ذاته عبادة احنا مأمورين بيها..

أما عن إجابة سؤالك

هشبهالك بحاجة
تخيلى الدعاء زى الشمسية اللى هيحمى الانسان من أى حاجة ممكن تقع عليه من فوق مثلاً.. هو مكتوب ان فيه مية مش نضيفة مثلا تقع دلؤتى فى الشارع ومكتوب برضه إنك تعدى فى نفس الوقت فى الشارع ده لكن بالدعاء أنتى بقى معاكِ شمسية حمتك من أن تسكب هذه المياه عليكِ فهى آه وقعت بس ماجاش منها عليكِ حاجة أو حتى لو أصابك بعضاً منها فهى لم تكن كلها..

كان النبى صلى الله عليه وسلم يدعو قائلا: اللهم قنا واصرف عنا برحمتك شر ما قضيت"
وكان يقول عليكم بالكليات فكان يدعو اللهم إنى أسألك الخير كله وأعوذ بك من الشر كله"

وفيه حديث نبوى يقول"صنائع المعروف تقى مصارع السوء"
وتيجى الآية القرآنية " يمحو الله ما يشاء ويثبت وعنده أم الكتاب"

وهذا حديث صحيح صحيح يقول": قال رسول الله صلى الله عليه وسلم: الدعاء سلاح المؤمن وعماد الدين ونور السموات والأرض وله مع البلاء ثلاث مقامات أحدها أم يكون أقوي من البلاء فيدفعه الثاني أن يكون أضعف من البلاء فيقوى عليه البلاء فيصاب به العبد ولكن قد يخففه وإن كان ضعيفا الثالث أن يتقاوما ويمنع كل واحد منهما صاحبه

أرجو أن أكون استطعت توضيح ماسألتى عنه

نورتينى يا خوخة وسعيدة بوجودك


----------------------------------

فاتيما
ــــــــــ
يا دى النور :)
بطماطم الجميلة
التعليق الأولانى ده بتاعى وطبعاً مش هنشره رغم انك ماكتبتيش مش للنشر^_^
ربنا يخليكِ ليا يا حبيبتى ويستجيب دعائك يارب :)

فيه دعاء حلوى أوى النبى علمهولنا وأنا بحبه "اللهم قنا واصرف عنا شر ما قضيت" لما تقوليه كتير مهما يحصل بتحسى انك مطمنة لإنك دعيتى ان ربنا يحميكِ وواثقة فى اجابته

عذر الانسان دايما إنه مستعجل ومفكر نفسه فى فيلم عربى كمان ساعة والفيلم هيخلص ومايعرفش اننا فى الدنيا يعنى فيلم آه بس بالتصوير البطئ :)

نورتينى يا طماطم وأسعدنى وجودك


******************************

ليلى الصباحى
ــــــــــــــ
وعليكم السلام ورحمة الله وبركاته
أهلا بيكِ با لولو .. وحشتينى :)

فعلا يا حبيبتى وهذا نص الحديث " قال رسول الله صلى الله عليه وسلم : " لا يرد القضاء إلا الدعاء ولا يزيد في العمر إلا البر".

ما أجمل دعائك
ربنا يكرمك ويستجيب دعائك
نورتينى يا حبيبتى وأسعدنى وجودك


******************************

ظلالى البيضاء
ـــــــــــــ
أهلا وسهلا
الله :)
ما أجمله من دعاء
ربنا يعزك ويكرمك يارب

نورت مدونتى
ويسعدنا دوام التواصل


******************************

ياشا
ـــــــ
أهلا بيك أستاذ شريف
أشكرك جدا لدعائك
ربنا يعزك

نورت مدونتى ويسعدنا دوام التواصل


********************************

أيام وليالى
ـــــــــــ
أهلا بيك أستاذ تامر
سأضيف على تعليقك قول عطاء بن أبي رباح رحمه الله :
" متى أطلق الله لسانك بالدعاء فاعلم أنه يريد أن يعطيك ماتشاء مهما عظم مرادك وعظم مطلبك"
فأكثر من الدعاء ولا تقنط وأبشر

أشكرك جدا لتعليقك
نورت مدونتى ويسعدنا دوام التواصل

وحي القلم يقول...

السلام عليكم
الدعاء مخ العبادة
واسوأ شيء ان ندعوا على الاخرين
حتى المصطفى صلى الله عليه وسلم لم يدع على الكفار
....
ربنا يوفقك الى ما تحبينه ويرضاه

rack-yourminds يقول...

اسال الله ان يصلح احوالنا جميعا

موناليزا يقول...

مصعب صلاح
ــــــــــــــ
وعليكم السلام ورحمة اله وبركاته
أهلا بيك أستاذ مصعب
أشكرك جداً لمشاركتك
نورت مدونتى ويسعدنا دوام التواصل


******************************

راك يورمايند
ـــــــــــــــ
أهلا بيك يافندم
ياااارب
أشكرك جدا لدعائك وربنا يتقبل
نورت مدونتى ويسعدنا دوام التواصل