السبت، 23 يونيو 2012

جوجو و زمردة (24)


كانا "جوجو" و شقيقته "زمردة" فى مدينة الملاهى يركبان العربيات اللى بتخبط بس كل واحد راكب عربية لوحده..
يقوم "جوجو" بالقيادة سريعاً ويخبط فى العربيات وهو مستمتع.
أما "زمردة" فكانت تلزم أقصى اليمين وتبتعد جاهدة عن العربيات.
وبعد ما انتهوا من اللعب ونزلوا من العربيات.. ظل جوجو يضحك ويسخر على أسلوب "زمردة" فى السواقة.
قائلاً: ياخبر ده أنتى لو سوقتى عربية بجد هتبقى ضحكة.
: ليه بقى وفيها إيه لما امشى براحتى.
:براحتك إيه يا بنتى مش فيه ناس هيبقوا ماشيين وراكى وعايزينك تتحركى علشان هما كمان يمشوا.
: وأنا مالى بيهم دى سواقتى وأنا بحب أمشى على مهلى.
: خلاص أحسن لك ماتسوقيش.
:مش أحسن ما امشى بسرعة زيك وأخبط الناس.
:دى بس علشان لعبة لكن فى الحقيقة اللى هيشوف سرعتى هيبعد عنى علشان ماخبطوش.
: أنت مفكرها لعبة كمبيوتر.. دى أرواح ناس.
: وأنتى مفكره نفسك فى فيلم كارتون مافيهوش غيرك علشان تمشى بطئ.
: أنا مبسوطة كده وبعدين كده عمر ما الرادار هيمسكنى.
: رادار إيه بس ده هيدوكى فلوس علشان تتحركى.. ده غير الناس بقى هيسمعوكى أحلى كلام على غرار بدل مش قد السواقة بتسوقى ليه.. يا شيخة اتحركى فرستينا.
:أنت بتتريق عليا يا جوجو طيب والله ماهركبك معايا فى عربيتى.
ضحك جوجو كثيراً من رد فعل زمردة قائلا بدعابة: لا والله ابقى ركبينى علشان ماعيطش.
: مش هركبك وهخليك تعيط براحتك.
جاءت الأم فى الوقت المناسب قائلة لهم: يلا نروح بقى احنا كده اتأخرنا.
-تمت-.

=====================
دعوة للمناقشة:
ــــــــــــــــــــــــ
ماعلاقتك بقيادة السيارات؟.
أذكر موقف طريف أثناء قيادتك؟.

هناك 7 تعليقات:

ليلى الصباحى.. lolocat يقول...

علاقتى بالسواقة علاقة توم وجيرى :)

انا من الاساس اكره ركوب السيارات من وانا طفلة اول ما اركبها اشعر بالغثيان ويحصل بقى حاجات مش كويسة ( قىء )
ولو كنت مسافرة افضل النوووووووووم لحد ما اوصل حاولت مرة اتعلم السواقة بس كنت بخاف ادوس اى حاجة خاصة لو قطة :)

لكن سيارات التصادم راااااااائعة بعوض فيها خسارتى مع السيارات الحقيقية :)
بصى كل حاجة فى الملاهى الى الان احب اركبها زى الاطفال واكتر لكن تكلمينى عن السيارات الحقيقية والسواقة اقولك ابداااااااا



تحياتى لك اختى الحبيبة

كريمة سندي يقول...

والله مازلنا في السعودية ممنوعات من القيادة المهم لي كذا محاولة وهي شبه ناجحة

أرجوا المشاركة في جمعة التاريخ الأسود يوم 20 يوليو

AHMED SAMIR يقول...

الحقيقة انا باسوق من حوالي ١٥ سنة
و بالتحديد من سنة ١٩٩٧
طبعا مرت عليا مواقف كتير و لكن اغلبها للأسف تنقط و تفرس و تجيب المرض و الهم
انما اكثر المواقف جلبا لحرقة الدم لما تبقى ماشي في طريق ضيق لا يسمح فيه بتخطي السيارة التي امامك
و تكون السيارة امامك يقودها رجل كبير في السن
يا لهووووووووووي
سواقتهم هو الجحيم بعينه
اثنان حذار ان يكونا امامك او خلفك وانت تقود سيارتك
سيدة و رجل عجوز
حذار حذار

Carmen يقول...

:))))

دخلت فى جنب مرسيدس مرة وكنت هتعلق :D

βent Pasha يقول...

الموضوع جميل وأحلى مافيه البراءة اللي ف الطفلين .. بس هما طفلين كبار شوية
:-))
علاقتي بالقيادة للسيارة .. أنا مش بعرف أسوق أصلا :-))

تحياتي لقلمك

تقبلي مروري

momken يقول...

.....

شوفى الحكمه الازليه فى القياده

اتقى اخطاء الاخرين

فى الطريق فى نصيحه يجب ان يعمل بها كل من حولى الا وهى القياده فن وزوق
اما بالنسبه لى انا فالقياده حسب الظروف
سواء كنت مستعجل او عندى وقت

وكمان بقى وده من الاخر حسب نوع وقوة العربيه
لو معاكى عربيه مسعداكى هى هتتصرف
ولو عربيتك على اد حلها يبقى امشى على جنب

دى الخلاصه

تحياتى

....

موناليزا يقول...

أهلا وسهلا بجميع السادة الحضور
أسعدتونى حقاً بمشاركتكم :)

نورتونى وفى انتظاركم دائما