الجمعة، 13 مارس 2009

النهاردة يكسب

أيام بتجيب أيام. وشهر يسلم شهر. وسنة وراها سنة.ومازلت فى انتظار بُكرة. ولكن لإمتى أنا هستنى؟؟؟.
آه يا بُكرة تعالى بسرعة.
أكيد بُكرة جاى لكن لغاية إمتى هنتظره. عارفة إن بُكرة ملك ربنا وهييجى فى الوقت اللى ربنا هيختاره وعشان كده عايزة ماقولش بُكره ولا عايزة أأجل كل حاجة لغاية لما بُكرة ييجى. عايزة أعيش النهاردة وبُكرة ييجى على مهله. لأن ببساطة شديدة مش يمكن أموت النهاردة قبل ما بُكرة ييجى ساعتها بقى أبقى أقول لربنا إيه؟. كنت مستنية بكرة!.
متهيألى مش سبب أنى أضيع أيامى فى الانتظار لأجل الله وحده يعلم نهايته.
كتير كنت بقول بُكرة أحلى من النهاردة. وفجأة بدأت أقول مين عارف مش يمكن النهاردة أحسن وأنا اللى مش واخدة بالى. بدليل أن كل مايعدى يوم ونيجى نفتكره بعدين نبتسم ونقول يااه كانت أيام جميلة. مهما كانت صعوبتها وشدتها بس أول مابتخلص بتفضل ذكرى وممكن نقول وقتها ياريتنا ماضيعنا وقتنا كده.
مش يمكن النهاردة جميل بس احنا اللى مش عارفين نستغله.
مش يمكن النهاردة فرصة من ربنا لينا لعمل حاجات كتير تفيد دنيانا وآخرتنا.
مش يمكن النهاردة يكون أحلى مافيه الناس اللى حوالينا اللى مش عارفين ياترى بُكرة هيكونوا معانا ولا لأ.
مش يمكن النهاردة عندنا صحة نقدر نعمل بيها كل حاجة نفسنا فيها.
مش يمكن النهاردة وقتنا يسمح لنا بتعلم أشياء جديدة.
مش يمكن النهاردة نقدر نساعد حد محتاجلنا والله أعلم إذا كنا بُكرة هنقدر نساعده ولا لأ.
قررت أعيش النهاردة واستمتع بكل لحظة فيه وبُكرة يبقى ييجى على مهله لأنى بصراحة مش ضامنة عمرى لبُكرة.
ذكرنى بهذه الاحاديث النبوية الشريفة د/عرفه ربنا يكرمه فهذا حقاً ما أردت أن أختم به.
قال رسول الله صلى الله عليه وسلم:((اغتنم خمساً قبل خمس شبابك قبل هرمك وصحتك قبل مرضك وحياتك قبل موتك وغناك قبل فقرك وفراغك قبل شغلك)).
ويقول أيضا صلوات الله وسلامه عليه :((لا تزول قدما عبد يوم القيامة حتى يسأل عن أربع عن عمره فيما أفناه وعن شبابه فيما أبلاه وعن ماله من أين اكتسبه وفيما أنفقه وعن علمه ماذا عمل به))
******

سؤال جانبى:

ياترى أنت مستنى بُكرة؟ وليه؟(بتكلم على الصعيد الشخصى).





هناك 79 تعليقًا:

الفراغ يقول...

بسم الله الرحمن الرحيم
يا سلام لو عشنا النهارده ونسينا بكره بكل خوفنا منه
بجد هانكون اسعد الناس
حنى المريض..النهارده قريب من ربنا ...مايعرفش بكره هايحصل ايه ...ممكن يشفى ويلاقى نفسه بقى بعيد عن ربنا حتى لو شويه صغيره (من فرحته بالشفاء وتلقى تهانى حبايبه)
دمتى النهارده بكل خير

واشوفك بكره فى احسن حال

سلوى يقول...

مش مستنياه
لأنه ببساطه ممكن يجي وأنا مش موجوده أصلا

وكمان مش خايفه منه
في خكمه بتقول
لا تخشى الغد .. الله موجود اليوم وغدا وإلى الأبد

ستيتة يقول...

الحمد لله على كل حال

ايوه عايشة النهاردة وسعيدة بيه وقاتلاه حبا وفرحا وعملا وزعيقا وهمسا ونوما كمان

بس مستنية فرج من ربنا كبير

لا يقدر عليه الا رب العالمين

عاوزة الفرج ده يارب وها افضل ادعيك

ولن أمل وإن ملل الناس ويأسوا

طالما انت ربي .. وعرفتني انك ربي .. وهديتني لنور ربي .. ووقيتني عبادة سواك من حجر وشجر وثلوث .. وانك كاشف الهم ومفرج الكرب والرزاق ذو القوة المتين

يبقى انا مستنية وسعيدة وراضية وفرحانة وعايشة

ومستنييييييييييييييييية

محمد يقول...

السلام عليكم ورحمة الله وبركاته

أختي العزيزة

إن شاء الله تكونين بخير وعافية .... كلماتك جميلة حلوة خفيفة سهلة الهضم ويحضرني قول أحد المفكرين الغربيين وهو توماس كارليل " لا ينبغي أن نتطلع إلي هدف يلوح لنا باهتا علي البعد ولكن علينا أن ننجز ما بين أيدينا من عمل واضح لا لبس فيه" .... خالص ودي وشكري وصادق دعائي

د.خالدأمين يقول...

ربنا يكرمك بجد علي موضوعك الهام والمبدع والجميل جدا






بجد النهارده هو الاهم



امس انتهي وزال
غدا باذن المتعال
واليوم هو الحال
فاحسن حالك تمحي زنوب امسك وتكرم بها غدك

SHAPE YOUR LIFE (ABOALI) يقول...

بكرة احلى من النهارده
بكرة ده يوم جديد

سعاد حسنى


لما غنت سعاد الاغنية دى
طلع انى بكرة كان ل سعاد حسنى مش احلى

ماتت مقتولة او منتحرة او او


كان فى عهد رسول الله (ص) زوج وزوجة يعشيان وحدهما لم يرزقهما الله اولاد
وكانا فقراء
كانا الزوج يذهب ليصلى ويخرج من المسجد بسرعة ليذهب الى زوجته لتاءخذ نفس الثواب وتقضى ما تريده

راى المصطفى( ص) الرجل يخرج اكثر من مرة من المسجد قبل ختم الصلاة
فقال له اتحب ان تدخل الجنة ولا تتذوق من ثمارها كناية عن ختام الصلاة
فحكى له عن حاله وفقره

فقال له الحبيب(ص) اذهب الى ابى بكر الصديق وهو سيتصرف
فذهب اليه فسمعه يتكلم مع زوجته بصوت عالى
ويقول لها اين باقى الدرهم
فقال فى نفسه يحاسب زوجته على باقى الدرهم فماذا سيعطينى
فمشى وعاد ادراجه
فقابل رسول الله (ص) فسئله هل ذهبت الى ابى بكر فقال لا
فقال له اذهب اليه

فذهب الرجل
فوجد ابى بكر يمسك بالطين ويبنى فى حائط بيته شيىء
فقال فى نفسه
انه لا يستطيع طلب من يبنى له فهل سيعطينى شيىء
فذهب وعاد ادراجه
فقابل الرسول (ص) فسئله هل ذهبت الى ابى بكر
فحكى له عما حدث
فذهب الرسول معه الى ابى بكر
وحكى له الرجل ماكان
فقال لما لم تسئلنى
فقال ابى بكر

كنت فى المرة الاولى اسئل زوجتى عن باقى الدرهم فقد كانت فى السوق
فى المرة الثانية لاحظت ثقب فى الحائط
فخشيت ان يقع نظرى منه على جارى
فكنت بالطين ابنيه

فاءعطى ابى بكر الصديق للرجل ثوبان

فذهب الى زوجته فرحا"
وقررا ان يلبسا الثوبان غد"

فيرى الناس انهما يمتلكان ثياب اخرى

ولكن قضاء الله سبق فماتا الاثنين

وفى جنازتهما

نزع الرسول صلى الله عليه وسلم نعله
ومرة ضحك

فاستغرب الصحابه

فسئلوا الرسول (ص)
فقال عندما نزعت نعلى
كنت لا اجد مكان من كثرة الملائكة
وفى المرة الثانية عندما ضحكت

عندما جاء الملائكة يسئلون الرجل وزوجته
قالا

لم يكن لدنيا مال نصرفه
ولا اولاد نربيهما
كل ما لدين ثوبان اخذناهما من ابى بكر
اذهبا فخذاه


تلك كانت القصة
ولنا جميعا العبرة

تحياتى مع خالص تقديرى لقلمك

salma mohamed يقول...

الله يكرمك يا حبيبتي,على اختيارك الموفق للمواضيع,
كل ايام حياتنا فيها الحلو وفيها الوحش والنهارده ممكن يكون احسن من بكره بس ساعات بنبص لبكرة ونمني نفسنا انه هيبقى احسن علشان يدينا دفعة امل للاستمرار في الحياة ومابها من منغصات,
اما بقى انا مستنيه بكره وليه؟
فانا مستنياه علشان نفسي يكون ليا بيت انا ملكته ويكون ليا اولاد اربيهم على الدين علشان يهموا ويصلحوا الفساد.

Unknown يقول...

انا كمان كنت بستنى بكرة وبستعجل اليوم يخلص عشان بكرة يجى لانى كنت مستنية ان بكرة يمكن يكون فية سعادة او اى شئ جديد لكن تعبت من انتظار بكرة وقررت بجد اعيش النهارضة مش يمكن تكون الساعدة قدامى وضيعتها وانا بستنى بكرة

موناليزا يقول...

الفراغ
ــــــــــ
اختى الحبيبة:اشكرك جدا لمشاركتك الجميلة
نورتينى حبيبتى ودمتِ بخير




***********************************




سلوى
ــــــــ
اختى الحبيبة: رأينا واحد:)
اشكرك جدا لمشاركتك
نورتينى حبيبتى ودمتِ بخير



******************************





ستيتة حسب الله الحمش
ــــــــــــــــــــــ
اختى الحبيبة:ان شاء الله سيأتى الفرج قريييييبا جدا
ويمكن اقرب مما تتخيلين كمان
ده ربك كبير اوى ومش هيخذل عباده ابدا
نورتينى حبيبتى ودمتِ بخير




*********************************




هذه حياتى
ــــــــــــ
وعليكم السلام ورحمة الله وبركاته
اهلا بيك يافندم
الحمدلله انا بخير اشكرك جدا لسؤالك
ولرأيك
جميلة هذه المقولة واشكرك لاضافتها
اسعدنى تواجدك
دمت طيبا ولمدونتى زائرا




******************************




د. خالد أمين
ــــــــــــــ
اهلا بيك يادكتور
ربنا يسعدك ويرضى عنك اشكرك جدا لرايك
جميلة جدا مشاركتك
دمت طيبا ولمدونتى زائرا




********************************



ابوعلى
ـــــــــــ
اهلا اهلا بصاحب التعليقات المميزة
متهيألى الاغنية دى بتاعة شادية:)

ايه القصة الجميلة دى اول مرة أعرفها
اشكرك بجد على ذكرها
ربنا يعزك ويبارك فيك يارب
يسعدنى دائما تواجدك
دمت طيبا ولمدونتى زائرا



*********************************




سلمى محمد
ــــــــــــ
اختى الحبيبة:ربنا يسعدك يارب فماتوفيقى الا بالله
اشكرك جدا لمشاركتك
وربنا يرزقك بالزوج الصالح والذرية الطيبة قريبا اللهم امين ويهيئلك دايما كل الخير
نورتينى حبيبتى ودمتِ بخير





*********************************




ايوية
ــــــــــ
اختى الحبيبة:صح كده
علمتنى الحياة ان الحياة لن تأتى بشئ انتى تنتظريه فسيبيها لله
ربنا يهيئلك كل الخير
نورتينى حبيبتى ودمتِ بخير

د/عرفه يقول...

فعلا معاكِ حق طبعا
لازم نستغل اليوم اللى عايشينه
وكما يقول الرسول
((اغتنم خمساً قبل خمس شبابك قبل هرمك وصحتك قبل مرضك وحياتك قبل موتك وغناك قبل فقرك وفراغك قبل شغلك))

ويقول ايضا
((لا تزول قدما عبد يوم القيامة حتى يسأل عن أربع عن عمره فيما أفناه وعن شبابه فيما أبلاه وعن ماله من أين اكتسبه وفيما أنفقه وعن علمه ماذا عمل فيه))

mohamed ghalia يقول...

أنا بقول نعيش الحاضر نبص على المستقبل ننسى مرارة الماضى
دمتى فى سعادة أختى

صمت المشاعر يقول...

شكراا ليكي يا امة الله

بس بصراحه اما نقدر نعيش انهرده نبقي نستني بكره

حواء يقول...

انا كمان بستني بكره
بس انا بقي بدعي انه يكون احسن من النهارده
يمكن علشان مستنيه الطلاق
يمكن علشان هخلص من كابوس كابس علي قلبي بقاله تلات سنين وكام شهر
يمكن علشان مستنيه اشوف قرة عيني نمبر تو
كله يمكن
وربنا هو الوحيد اللي في ايده كل ده

GiGi world يقول...

كلامك رائع
بس يامونى فعلا مش بايدنا ساعات كسلنا وتعبنا من الوقت اللى احنا عايشينه بنقول هنستنى لما ييجى بكره ويكون احسن
انا عارفه ان انتى معاكى حق
بس ياريت حد يشجعنا نعيش يومنا ومايكرهناش فيه وفى حياتنا
بحبك ويارب نعرف نعيش النهارده ومش لازم نستنى لبكره اصل احنا بجد تعبنا اننا مستنيين بكره لحد مابان علينا التعب

"أم أدهم المصرية" يقول...

السلام عليكم ورحمه الله وبركاته

بوست رائه حبيبتى

ولايجابه سؤالكانا من الناس اللى مستنيه بكره بفارغ الصبر لانى حاليا مفيش حاجه اعملها
كلامى مش معناه انى يائسه بالعكس انا نفسى بكره يجى عشان احقق احلام النهارده وامبارح
ولحد ميجى بكره
ادينى مستنياه على امل انه يجى بسرعه

--------------------------------

جنّي يقول...

السلام عليكم

بالفعل كما ختمتي اليوم يكسب اعيشه لأجعله أحسن من أمس ولا أدري هل سيأتي غدا أم لا ؟؟

اذن فلنعيش اليوم ..

اما انتظار الغد اذا كان بسبب التسويف وتأجيل العمل لغد فأرجو الا يكون ذلك اما اذا انتظرته لاجعله احسن من اليوم ومن امس فانا انتظره ان شاء الله ..

تحيتي

كفايـة طيبـة يقول...

مش يمكن النهاردة يكون أحلى مافيه الناس اللى حوالينا اللى مش عارفين ياترى بُكرة هيكونوا معانا ولا لأ.
------

طيب مش يمكن انا مش مستمتعة بالنهاردة ولا حاسة به عشان انا مش مع الناس اللى بحبها
مستنية بكرة بفارغ الصبر عشان ارجع بلدي وابقي مع الناس اللى بحبها

مش شرط مش اعيش ايامي او مستمتعش بالحاضر بتاعى ابقي مش بشتغل او بستغلها كويس

ممكن اكون بستغلها كويس اوى ولكن فى نفس الوقت منتظرة بكرة على احر من الجمر

------
ببساطة شديدة مش يمكن أموت النهاردة قبل ما بُكرة ييجى ساعتها بقى أبقى أقول لربنا إيه؟.
------
هو لازم الانتظار يتواكب معاه عدم شغل وتكاسل؟
مش لازم طبعا :)

معلش تعليقي ملخبط
حاسة انى مش عارفة ارتب الكلام

الفقيرة إلى الله أم البنات يقول...

حبيبتى
موضوعك رائع...ومن ينتظر الغد هو من
يأمل رحمة الله
انا انتظر غدا" حتى يأتينى بشفاء من اله لابنتى...وبركه فى عمرها وعرم اختها
انتظر بكرة لعلى استطيع بكرة ان احفظ قرآنى..وغدا قد يكون ايمانى أقوى
ولكنى اسعى انى استغل اليوم ..لانه هناك احتما ان يأتى الغد

رائعه دائما موضوعات

mahasen saber يقول...

احنا وبكره وبعده وكل ايام السنه
لين ايدين المولى عز وجل

فننتظره او مننتظرش
اليى مكتوب بين صفحات الغد هنشوفه

Butterfly يقول...

أحسن حاجه ان الانسان يعيش اللحظه اللى هو فيها
ويحاول يستغلها على قد مايقدر - يستفيد منها يعنى -

موضوع جميل جدا تحياتى ..

شمس النهار يقول...

بكره في علم الغيب
واحب اعمل ب عيش لدنياك كأنك ستعيش ابدا واعمل لأخرتك كانك تموت غدا
يعني الفعل لما يكون يختص بالدنيا واحولها الواحد مايستعجلش عليه لكن لو يختص بالأخره يعمله بسرعه لحسن يموت قبل مايعمله ويضيع عليه الثواب
وصدق القائل
الدنيا عمل بلا علم
والاخره علم بلا عمل

ELMASRYA - MOSLEMA LELLAH يقول...

الجميلة المميزة أمة الله موناليزا

طبعا الموضوع رائع وقوي ومعناه عميق

كلامك صحيح جدا

وعن نفسي بعيش اليوم وببذل جهدي يكون يوم نافع أزيد فيه من حسناتي

وفي نفس الوقت بتمنى بكره ييجي بالخير ويكون أحلى من النهارده

ربنا يسعد أوقاتك كلها ويجعلها مملوءة بالأمن والصحة والستر وراحة البال يزينهم العمل على مرضاة الله في كل لحظة

دمتي سالمة

أم فريده يقول...

النهاردة يكسب

عندك حق انا عايشة طول الوقت بفكر فى بكرة ومستياة اوى على اعتبار انه احلى بس مش دايما احلى

ساعات بيكون صعب اوى بتمنى انه يمر بسرعة

وساعات بيبقى حلو اوى بتمنى انه مش يعدى

بس انى استنى بكرة دة بيكون امل عشان اقدر اعيش

لا اخاف ان النهاردة يعدى ولا احب انه يجرى بسرعة

كلام دايما بيكون منبة للقلب والعقل

جزاك الله خيرا

صوت من مصر يقول...

اقولك اني فقدت الامل في بكره

المعتصم يقول...

بسم الله الرحمن الرحيم
السلام عليكم ورحمة الله وبركاته
اختى الكريمة موناليزا
تحياتى
كالعاده بوست جميل (الطبيعى يعنى)
وبعدين انا عاوز اعرف مين اللى قال بكرة اجمل من النهارده ده؟؟ مين؟ ميييين؟؟؟؟؟؟ (وقعته طين معايا)
بأمارة ايه بكرة احسن ؟
لازم طبعا نعيش النهارده ونعمل كل حاجه النهارده لأننا ببساطه مش ضامنين بكرة ده خااااااااااااااالص
صحيح لازم يكون عندنا امل بس الامل ده فى الله والامل ده طالما فى الله يبقى ممكن يتحقق لنا بكرة وممكن يتحقق النهارده واحنا بنتكلم عادى يعنى
انما بكرة لما يبقى ييجى نبقى نشوف ساعتها هو اجمل ولا اوحش
تحياتى ودمتِ بكل خير وود
والسلام عليكم ورحمة الله وبركاته

حاسوباتيه يقول...

كلام جميل جدا فعلا ياريت نحس بقيمه النهارده بجد لانه بيروح ومش بنحس بيه

حياتنا الزوجية...(عضو رابطة هويتي إسلامية) يقول...

السلام عليكم ورحمة الله وبركاته

جزاكِ الله خير الجزاء ووفقك إلي ما يحب ويرضي

بجد أولا أسف علي عدم المتابعة وبجد فتني الكثير
ولكن والله مرغم بسبب ظروف فوق العادة ربنا يوفقنا ويوفقك

أولا أبدي إعجابي بالعنوان بجد العنون يكسب


ثانيا المحتوي بجد رائع بجد يا موناليزا الأمر يحتاج مننا وقفة جادة بهذا الصدد وفعلا " عش في حدود يومك " وجميل إنك تناولتي الموضوع من عدة جوانب والناجح من إستسمر يومه بإمكانياته دون النظر لإمكانيات الغد

ثالثا كثيرا ما نضيع واجبات علينا في يومنا قد تعطل الغد بدعوي إنتظار الغد

وأؤكد ليس نظرة فقط بل بالتأكيد خاب وخسر من ضاع يومه في إنتظار غده ولنعلم أننا لا نستطع الصعود إلي الطابق الثاني غلا بالمرور بالطابق الأول

بارك الله فيك

بجد أتأسف علي ضعف المتابعة

ربنا يلهمك التوفيق الدائم كما تعودنا منك

بجد الرسالة تكسب

محمد حياتنا

شيماء زايد يقول...

يضيع العمر بين خوف من قادم ، وندم علي ما فات
احيكي حبيبتي
فانا من عشاق اليوم

romansy يقول...

النهارده جميل قوى بس لو خططنا نستغله صح بس بنلاقى فعلا العر بيعدى بسرعه قوى قوى
بس اتمنى ان بكره يجى ومعاه احلام اقدر اسعد بيها نفسى والناس اللى حواليه

ميرا ( وومن ) يقول...

لا يا مونا انا مش بستني بكرة بعيش انهاردة حتي لو وحش حتي لو نفسي انه يخلص

بعيش انهارده علشام محدش عارف في ايه بكرة ولا هايعيش لحد بكرة ولا لاء

صدقيني انا عشت طول عمري كده حاولت اعمل كل حاجة اقدر اعملها اشتغلت ونوعت خبراتي واتعرفت علي ناس وشوفت حلو ووحش وكل ده فادني وساعدني

عارفة يا مونا لما بقف كدة وابص ورايا واقول لنفسي يااااااااه هو انا عديت علي كل الحاجات دي ازاي

بس برضة وارجع اقول الحمد لله كله بيعدي والأجمل اننا احنا كمان بنعدي علي ناس بنأثر فيهم وياثروا فينا ونبقي راضيين عننا ساعات وساعات لاء بس بجد طول ما احنا عايشين لازم نعمل اللي نقدر عليه واهو بكرة برضة جاي إن شاء الله

همس الاحباب يقول...

الحمدلله على كل حال
وفعلا اكيد النهاردة احسن من بكرة
ولابد اننا نستغله فى طاعة الله
لان اليوم اللى يعدى لن يعود مرة اخرى
وربنا يحسن خاتمتنا جمبعا
تحياتى

موناليزا يقول...

د/ عرفة
ــــــــــــ
اهلا بيك يادكتور
ربنا يكرمك على هذه الاضافة المميزة فقد كنت فى حاجة لها لاضيفها الى الموضوع
اشكرك جدا لمشاركتك
دمت طيبا ولمدونتى زائرا



********************************




محمد غالية
ــــــــــــــ
اهلا بيك استاذ محمد
الله عليك
اهو ده الكلام
دمت طيبا ولمدونتى زائرا




*********************************




صمت المشاعر
ـــــــــــــ
اختى الحبيبة:الشكر لله ياجميلة
طالما فينا نفس يبقى هنعيش وهننجز وهنعمل كل حاجة حلوة كمان
ربنا يسعدك ويهيئلك كل الخير
نورتينى حبيبتى ودمتِ بخير





**********************************




حواء
ــــــــــ
اختى الحبيبة:ربنا يهيئلك كل الخير ويعملك اللى فيه الصالح ليكى ولبنوتك
نورتينى حبيبتى ودمتِ بخير





********************************





جيجى
ـــــــــ
اختى الحبيبة:اشكرك ياجميلة فماتوفيقى الا بالله
أشجعك أنا ياستى:)
هفكرك بأننا مش ضامنين عمرنا لبكرة وعايزين نستغل النهاردة زى دعوتك الجميلة بأننا نحفظ قرآن مع بعض ليه مأجلتيهاش لبكرة!
عشان احنا الحمدلله ربنا هدانا لطريقه النهارده ومعانا صحبة خير تعيننا وعندنا وقت كمان وكل ده مش مضمون لحد بكرة
"كونى لله كما يريد يكون لكِ كما تريدين"
ده قصدى بلاش نشغل نفسنا ببكرة ونضيع وقتنا فى التفكير فيه نعيش النهاردة ونؤدى كل الالتزامات اللى علينا ونسيب بكرة لربنا
بحبك فى الله:)
نورتينى حبيبتى واسعدنى تواجدك ومشاركتك






*********************************





لؤلؤة الرحمن
ـــــــــــــــ
وعليكم السلام ورحمة الله وبركاته
اختى الحبيبة:ازيك ياجميلة فينك من زمان يارب تكونى بخير

اشكرك جدا لرايك فماتوفيقى الا بالله
اسمحيلى استفسر بس يعنى ايه مفيش حاجة تعمليها؟
ايه رايك لما تتعلمى حاجة جديدة
اى حاجة ممكن تفيدك وخدى النية دى من سلك طريقا يلتمس به علما سهل الله به طريقا الى الجنة
ايه رايك لما تحددى يوم لزيارة الايتام
ايه رايك لما تتعلمى طبخة جديدة وتبقى استاذة فيها.. وكده يعنى
النهاردة فرصة كبيرة اننا نتعلم وننجز فرصة قبل مابكرة ييجى ويشغل وقتنا كله
تمنياتى لكِ بكل الخير
نورتينى حبيبتى ودمتِ بخير





********************************




جنى
ـــــــ
وعليكم السلام ورحمة الله وبركاته
اهلا بيك استاذ سعيد
اشكرك جدا لمشاركتك
ويارب ايامك دايما تكون مليئة بالخير والطاعات
دمت طيبا ولمدونتى زائرا






**********************************





كفاية طيبة
ــــــــــــــــ
اختى الحبيبة:اهلا اهلا بالقمر
فاهماكِ وحاسة بيكِ اوى لانى كنت فى موقفك فى يوم من الايام بس تعرفى احلى حاجة انى كنت بستغل غربتى فى حاجات تنفع دينى وده كان اللى مهون عليا انتظار بكرة
ان شاء الله ترجعى لاحبابك قريبا جدا

الجملة الاخيرة بقى ده كان فعلا مقصدى لان فيه ناس بتأجل مثلا صلة الرحم لبكرة لان النهاردة مضايقة شوية
تأجل الصلاة اصل الجو برد
تأجل تزور حد فى الله او تهادى حد لغاية لما مزاجها يبقى كويس ... كده يعنى
فى كل الاحوال ومهما كتبتى باى طريقة بحبك وبحب تواجدك:)
نورتينى حبيبتى ودمتِ بخير






*******************************




الفقيرة الى الله ام البنات
ــــــــــــــــــــــــــ
اختى الحبيبة:اشكرك جدا لرايك فما توفيقى الا بالله
ياحبيبتى ربنا يسعدك ويحقق لك كل ماتتمنى
وان شاء الله بكرة ييجى ومعاه كل الامل اللى بتتمنيه
احنا عايشين النهارده اه بس املنا فى ربنا كبير وتأكدى انه مش هيخذلنا ابدا
نورتينى حبيبتى ودمتِ بخير





*********************************





محاسن صابر
ـــــــــــــ
اختى الحبيبة:صح كده
بس برضه نعقلها ونتوكل
نورتينى حبيبتى ودمتِ بخير





*********************************





بيترفلاى
ـــــــــــ
اختى الحبيبة:اشكرك جدا لرايك ولمشاركتك
منورانى دايما ياجميلة





*********************************





شمس النهار
ـــــــــــــ
اختى الحبيبة:الله عليكِ
ايه الجمال ده:) بجد اشكرك على تعليقك المفيد جدا
نورتينى حبيبتى ودمتِ بخير





*********************************





المصرية مسلمة لله
ـــــــــــــــــــ
اختى الحبيبة:اهلا اهلا بالغالية
أخجلتم تواضعنا فماتوفيقى الا بالله
اشكرك جدا وربنا يعزك يارب ويرضى عنك
الله
مش عارفة ليه دمعت وانا بقرأ تعليقك ومافيه من دعاء جميل أحتاجه حقا
ربنا يسعدك يارب وينفع بيكِ دايما
نورتينى حبيبتى ودمتِ بكل الخير





*********************************





زوجة عنيدة
ـــــــــــــ
اختى الحبيبة:جزانا واياكم ياجميلة
اشكرك جدا لمشاركتك
وتمنياتى لكِ بكل الخير
نورتينى حبيبتى ودمتِ بخير





********************************





صوت من مصر
ــــــــــــــ
اهلا بيك يافندم
ليه بس؟؟؟
عموما عيش النهاردة زى ما ربنا أمرك وبكرة ان شاء الله محمل بكل الخير
"لاتقنطوا من رحمة الله"
دمت طيبا ولمدونتى زائرا





**********************************





المعتصم
ــــــــــــ
وعليكم السلام ورحمة الله وبركاته
اهلا بيك يافندم
اشكرك جدا :) ربنا يعزك يارب ويرضى عنك فماتوفيقى الا بالله

ليه بس؟؟؟ مين عارف مش يمكن فعلا يكون جميل:)
:) اهو ده الكلام عندنا امل فى ربنا وبكرة بقى ييجى براحته
ربنا يكرمك يارب ويجعل ايامك كلها خير وطاعة
تمنياتى لك بكل الخير
دمت طيبا ولمدونتى زائرا





*********************************





حاسوباتية
ــــــــــــــــ
اختى الحبيبة:صح ياجميلة
دقات قلب المرء قائلة ان الحياة دقائق وثوان
ربنا يكرمك
نورتينى حبيبتى ودمتِ بخير





*********************************




حياتنا الزوجية
ـــــــــــــــــ
وعليكم السلام ورحمة الله وبركاته
اهلا بيك استاذ محمد
جزانا واياكم اخى الكريم
لا عليك ربنا ييسرلك امورك ويهيئلك كل الخير ولعل المانع خير

اشكرك جدا لرايك فماتوفيقى الا بالله
ثالثا دى جامدة جدا ربنا يعزك ويرضى عنك صح جدا
ربنا يكرمك ويتقبل دعائك ولك بالمثل ان شاء الله
يافندم سيادتك تنورنا فى اى وقت ودائما مكانك محفوظ
دمت طيبا ولمدونتى زائرا




****************************





شيماء زايد
ـــــــــــــ
اختى الحبيبة:اهلا اهلا بالقمر
الله عليكِ
كلماتك جميلة بحق
اشكرك جدا لمشاركتك وتواجدك
نورتينى حبيبتى ودمتِ بخير





********************************




رومانسى
ـــــــــــ
اهلا بيك يافندم
ربنا يسعدك ويهيئلك كل الخير فى جميع ايامك
دمت طيبا ولمدونتى زائرا




******************************




وومن
ـــــــــــ
اختى الحبيبة:اهلا اهلا بالقمر
الله عليكِ
ربنا يعزك ويرضى عنك
ده فعلا اللى اقصده مش لازم نضيع وقتنا ابدا
تمنياتى لكِ بكل الخير والسعادة
نورتينى حبيبتى ودمتِ بخير




**********************************



همس الاحباب
ــــــــــــــ
اهلا بيك استاذ خالد
صدقت اخى الكريم
ربنا يسعد ايامك ويهيئلك كل الخير
دمت طيبا ولمدونتى زائرا

☼♫♪ عمــاد الدين يــوسف ☼♫♪ يقول...

معاكي حق .. الاعمار بيد الله وصدق من قال اعمل لدنياك كأنك تعيش ابدا ولآخرتك كأنك تموت غدا ... علشان كده لازم نتعايش مع يومنا ونحاول نصلح ونستفيد من الي فات بطريقه تخلي يومنا في نظرنا احسن اوقاتنا
تحياتي

ملكة في بيتي يقول...

السلام عليكم ورحمة الله

ما شاء الله مواضيعك دائما مميزة

ياترى أنت مستنى بُكرة؟ وليه؟

عايشة النهاردة ومستنية بكرة برده

اعتقد ان صعب ان الواحد ما يفكرش في بكرة بس المهم تفكيره يبئى ايجابي بمعنى انا عايز ايه من بكرة وابدأ اعمله من النهاردة

عارفة الفلاح لما بيزرع الأرض بيشتغل وبيشقى النهاردة وفي نفس الوقت مستني بكرة علشان يحصد اللي زرعه

لأنه شقي وتعب لا تكاسل ولا تواكل فهو مستني بكرة وكله أمل أنه يكون أحلى

نفس الفكرة بئى

اي حد بيبئى ليه هدف في حاجة ومش عارف يحققهاوممكن يكون اللي مانعه كسله بيتمنى ان بكرة يجي احلى
وبكده بيسكن ألمه

لكن في واقع الأمر كده يبئى خسر النهاردة لأنه ترك العمل فيه على أمل ان بكرة أحلى وخسر بكره لأنه ماشتغلش النهاردة

اللي هيحصل بكرة هو نتيجة لعملنا النهاردة

يبئى المفروض الاهتمام الاكبر ينصب على استغلالنا للنهاردة لكن لو مش حطين بكرة في دماغنا يبئى مش هنعمل حاجة النهاردة

حتى ده أساس سعينا للعمل الصالح انا عايزه بكرةفي الآخرة أكون من أهل الجنة اللي نالوا رضا الله علشان كده هعمل كل الصالحات اللي اقدر عليها النهاردة في الدنيا


كفاية كده بئى معلشي طولت عليكي بس اصلي لما بافتح في الكلام ما بخلصش

دمتي مبدعة
تحياتي

Arsenal Way يقول...

بسم الله

دايما مواضيعك تجبر الواحد انه يرد عليها وده من اهميتها وجمالها
___________________________

أنا طبعا مستني بكره - مستني اتخرج - مستني ارتبط - مستني يكون عندي ولاد - مستني احقق اهداف كتير مش هتحصل الا اذا جه بكره
بس انا عندي مشكله اني مش بانسى امبارح

تقبلي مروري

صدى الصمت - عاشقة الورد - يقول...

أنا جيت أرد الزيارة والحقيقة لقيت مدونة جميلة وهادفة ومتميزة
تحياتى
دمت بكل الود

عاشقة الورد

rona يقول...

جميل قوى فعلا مش يمكن النهرده احسن
خلينا فى النهرده وبكره عند ربنا

ماء تشرين يقول...

اه اكدب لو قلت انى مش مستنيه بكره
بس انا فى راى انو الانتظار حاجه وحشششششه اووووى
بس هو الانسان اتخلق كده عندو امل اه النهارده حلو بس بكره عايزه احلى
ولازم تتعلق بشئ في بكرة ده ولا انت كده مش هتبقه عايز يوم تانى يطلع عليك هيحصل فيه نفس الحجات

وجه نظر

ومازلتُ أتعلم يقول...

بوست رائع جداً
المشكلة انا كلنا بنفكر دايماًفى بكره
مع انه بكره ده مش فى ايدينا
ونتمنى يجى بكره بحلوه دايماً
حتى لو كان النهاردة احلى

كل اللى علينا ندعى ربنا بالرزق والفرج بكره...ونخليها على ربنا
جزاكِ الله خيراًعن ماقدمتى

*الطالبة عفو الله *زوزو يقول...

ما شاء الله عليك يا موناليزا دائما تتحفيننا بمواضيعك الجد قيمة

صراحة موضوع تحفة بجد

عجبتني اوي عبارة كتبتيها قلتي مش ممكن يكون النهاردة احسن و انا لي مش واخدة بالي

اه فعلا كتير مبندخش بالنا من النهاردة و بنشغل تفكيرنا في بكرة و لما يجي البكرة دة اسوا من النهاردة نندم على اللحظات الي ضيعناها من النهاردة وحتى الي كانت في تفكيرنا في بكرة

اليوم يومك عشه بكل توانيه و اترك الغد المجهول لاوانه

بالنسبة للسؤال من طبعي مبفكرش اوي في بكرة و بعيش يومه و اللحظة بس في لحظات او مواقف بتضطرني اننا افكر في بكرة غصب عني

تسلمين يا غالية

تحياتي

موناليزا يقول...

عماد الدين يوسف
ــــــــــــــــــ
اهلا بيك استاذ عماد
صح جدا
اشكرك جدا لمشاركتك
دمت طيبا ولمدونتى زائرا




********************************




ملكة فى بيتى
ــــــــــــــ
وعليكم السلام ورحمة الله وبركاته
اختى الحبيبة:طولى براحتك ولا يهمك
انا مبسوطة بمشاركتك
ماختلفناش على فكرة
لان قصدى برضه نعمل اللى علينا النهاردة وبكرة نسيبه لله وماكان لك سوف يؤتيك
نورتينى حبيبتى ودمتِ بخير




******************************





مصطفى ابو زيد
ــــــــــــــــــ
اهلا بيك ياباشمهندس
الله يكرمك ده بس من ذوقك فماتوفيقى الا بالله
ويسعدنى مشاركتك دائما
غريبة انك ماتنساش امبارح رغم انه خلاص انتهى
تمنياتى لك بكل الخير وبغد اجمل محمل بكل ماتتمنى
دمت طيبا ولمدونتى زائرا






********************************




صدى الصمت
ــــــــــــــ
اختى الحبيبة:اهلا بيكِ فى زيارتك الاولى
بشكرك جدا لزيارتك المتميزة ومشاركتك الرقيقة
نورتى مدونتى ياعاشقة الورد وارجو دوام التواصل




*********************************




رونا
ــــــــ
اختى الحبيبة:صح كدا
اشكرك جدا لمشاركتك
نورتى مدونتى وارجو دوام التواصل




*********************************




ماءتشرين
ـــــــــــــ
اختى الحبيبة:هو فعلا لازم يبقى فيه امل فى بكرة عشان نقدر نصحى كل يوم ونكمل حياتنا بس ده مش معناه اننا نكسل النهارة ونقول لما يبقى بكرة ييجى
يعنى باختصار لاتؤجل عمل اليوم الى الغد
نورتينى حبيبتى ودمتِ بخير




********************************



د. صيدلانية
ــــــــــــــ
اختى الحبيبة:اهلا بيكِ فى زيارتك الاولى
اشكرك جدا لرايك ولمشاركتك
جزانا واياكم يادكتور
نورتى مدونتى وارجو دوام التواصل




*******************************




الطالبة عفو الله
ــــــــــــــــ
اختى الحبيبة:اهلا اهلا بزوزو الجميلة
ربنا يكرمك يارب فماتوفيقى الا بالله
اشكرك جدا لمشاركتك ولتواجدك
نورتينى حبيبتى ودمتى بخير

Ophelia - cfd يقول...

الحمد لله بحب أعيش النهارده ليه هاستنى بكره .. مش يمكن النهارده فعلاً يبقى أحسن من بكره ..

دا فى علم الغيب علشان كدا لازم نعيش اليوم بيومه ..:)

جزاكِ الله خيراً على البوست الرائع بجد

مدحت محمد يقول...

بصراحة

انا خايف من بكرة جدا

mUsLiM يقول...

نسأل الله السداد وحسن التوفيق

وأن يهدينا فى هذه الدنيا الى صراطه المستقيم

المهم أن يرزقنا الله التوفيق فى الحياة سواء اليوم أو الغد :))

السلام عليكم

Gannah يقول...

ازيك يا موناليزا؟؟
يارب تكونى بخير
كلامك صحيح لكن انا بستنى بكرة لانى محتاجة اعمل حاجات كويسة ربما استطيع ان اقول لربى انى فعلت شيئا
ومع ذلك اطمع فى رحمته وكرمه
اما يومى فاحاول ولكن اتمنى ان افعل فيه اكثر
تحياتى

حياتى نغم يقول...

السلام عليكم / موضوع جميل أختى أمة الله جعله الله فى ميزان حسناتك ، أغلب الأوقات لا أنتظر الغد وأشعر بما تشعرين به ، رزقنا الله وإياكِ حسن الخاتمة آمين .

momken يقول...

موضوع جميل

لكن اليوم لا يعنى لى الا زاد ليوم ليس فيه ذات

فاليوم ذات ليوم المعاد

اما غداً فله رب يرعاه

تحياتى

KHALED يقول...

فعلا الأيام إللى بتعدى بيكون ليها وقع أحلى على النفس لدرجة أننا نتمنى لو أنها تعود
من نعم الله علينا أننا لا نعلم الغيب
فلو علمتم الغيب لأخترتم الواقع

أرق تحية

ادم المصرى يقول...

بجد انا بحمد لله انى مش من بتوع بكره هيكون فيه ايه

ومش من سياسه ديمننا ان ننتظر غدا

الخوف بييجى عند تارك الصلاه لئنو بى بساطه بيقول ان شاء الله هصلى بكرا وقال رسول الله صلى الله عليه وسلم هلك المصوفون

وهوا ده بس الى بيخاف من الى جى عشان عارف انو لو مات هيكون مصيرو مش تمام

ومع ذالك لذم نأمن مستقبلنا الدينى بحفظ القرأن والسنه والعقيده والمشى على منهج السلم وقرائه اذكار الصباح والمساء حتى نكون فى مأمن من بكرا

موناليزا يقول...

زهرة الامل
ـــــــــــــــ
اختى الحبيبة:ربنا يكرمك
واشكرك جدا لرايك ولمشاركتك
نورتينى حبيبتى ودمتِ بخير




*********************************





مدحت محمد
ــــــــــــــ
اهلا بيك استاذ مدحت
خايف ليه؟ توكل على الله وهو معاك دايما
تمنياتى لك بكل الخير
دمت طيبا ولمدونتى زائرا




*********************************




مسلم
ـــــــــ
اهلا بيك يافندم
ربنا يكرمك ويتقبل دعائك
اشكرك جدا لمشاركتك
دمت طيبا ولمدونتى زائرا



********************************



جنة
ــــــــ
اختى الحبيبة:اهلا اهلا بالغالية
انا الحمدلله بخير ماتحرمش منك ابدا ياحبيبتى
حاسة بيكِ اوى اصلى ساعات كتير بحس ان اليوم قصير اوى وبيبقى صعبان عليا حتى انى ادحل انام:)
تمنياى لكِ بكل الخير والسعادة
نورتينى جنتى الجميلة ودمتِ لى قلبا رقيقا وأختا وفية




**********************************



حياتى نغم
ـــــــــــــ
وعليكم السلام ورحمة الله وبركاته
اختى الحبيبة:ربنا يكرمك ويتقبل دعائك
تمنياتى لكِ بكل الخير
اشكرك جدا لمشاركتك
نورتينى حبيبتى ودمتِ بخير



*********************************




ممكن
ــــــــ
اهلا بيك يافندم
الله عليك صدقت اخى الكريم
اشكرك جدا لرايك ولمشاركتك
دمت طيبا ولمدونتى زائرا




***********************************




خالد
ـــــــــ
اهلا بيك استاذ خالد
صدقت اخى الكريم
ربنا يكرمك وتمنياتى لك بكل الخير
دمت طيبا ولمدونتى زائرا




*********************************



ادم المصرى
ـــــــــــــ
اهلا بيك استاذ ادم
الله عليك
ربنا يسلمك من كل شر وينفع بيك
اشكرك جدا لمشاركتك
دمت طيبا ولمدونتى زائرا

مجداوية يقول...

السلام عليكم

دائما موضوعاتك رائعة بارك الله لك
نعم نحن نملك لحظتنا فقط لكننا أيضا مطالبون بأن نفكر ونتدبر ونترك لله كل الأمر فنعقلها وتتوكل
محتاجين موازنة وتوازن بين اليوم وغدا فنعيش اليوم في طاعة لله ونأمل ونفكر في الغد بدون قلق فاليوم الذي نعيشه كان بالأمس غد ومر كما مر أمس فلا داعي للقلق فغدا سيمر أيضا اذا كان في العمر بقية ولكن لا بد من التفكير فيه والاعداد له كجزء من أعمال انهاردة

فهمتي حاجة ؟
هو مين اللي جاب التورتة
:)
:)

ست البنات يقول...

موناليزا
بصراحة أنا ساعات بخاف من بكرة
بس بحاول أستنى ىخر النهاردة أشوف إيه اللي هيحصل فيه

كلام جميل...........
تحياتي

حاجات جوايا يقول...

طول عمرى كنت مستنية بكره
مستنياه عشان اكبر
عشان اتخرج
عشان اتخطب
عشان اتجوز
عشان اتفسح واعيش حياتى اللى معيشتهاش
عشان مينفعش اطلع رحلة لوحدى
عشان اجيب عربية عشان ينفع اخرج مع جوزى ومنتبهدلش فى المواصلات
عشان ابنى يكبر شوية ويريحنى شوية
مش كل اللى استنيته اتحقق
وفى نفس الوقت ندمت على الوقت اللى ضاع منى فى الانتظار من غير فايدة

عشان كده بضم صوتى لصوتك
وبقول النهارده يكسب
بس يارب نعرف نعيشه صح ومنرجعش نندم

حلو قوى موضوعك ده يا مونا
بقاله فترة فى بالى وبحاول اقنع نفسى ان النهارده احسن
يارب اقدر استغله

دمتى بخير حبيبتى

ريمان يقول...

السلام عليكم

ازيك حبيبتى


اتاخرت عليكى معلش اعذرينى يا قمر


انا بستنى بكره عشان بيبقى عندى امل ان بكره احلى واحسن من النهارده


فى انتظار موضوعك الجديد يا عسل

الفراشة الصغيرة يقول...

فى كتا قريته قبل كده
يقول فى الكاتب

امبارح خلاص عدى
وبكرة الله اعلم به
اما انهارده فهو موجوده بين ايدينا
ركز فيه
هتحس بمنتهى السعاده

Unknown يقول...

السلام عليكم ورحمة
الله تعالى وبركاته
اليوم عرفته ولا أخافه
خوفى الكبير هو من
.. المجهول =بكرة
فلا أدرى ماذا سيكون فيه
من احداث ودموع أو ضحكات
اللهم لا اسالك رد القضاء
ولكنى اسألك اللطف فيه
اللهم أمين يارب العالمين

أختكم فى الله يقول...

ايه الكلاد الجميل ده

والله موضوع زى العسل

انا بحاول انى اكون سعيدة لكن انا يصراحة مستنية بكرة لانى عندى امل ان الجاى احسن وان ربنا حيحققلى حلمى بكرة

جزاكى الله خيرا حبيتى

”*°•.˜”*°•..سونه..•°*”˜.•°*”˜ يقول...

السلام عليكم .
بجد والله موضوع مهم جدا وكلامك كلو صح
وعجبنى اوى استشهادك باقوال الرسول صلى الله عليه وسلم .
دمتى بخير تحياتى ليكى على هذا البوست
سلاممممم ((***ســونه***)) .

لجين أبو الدهب يقول...

والله فعلا ياموناليزا ..

انتظار بكرة شئ ممل جدا والاكتر كمان لو جه بنتائج مش متوقعة ..

أجمل شئ استغلال اليوم ..

انا يمكن الحاجة الوحيدة اللى بنتظر بيها بكرة ان ربنا ينعم عليا واعيشه امل فى توبة جديدة ..

وان بكرة ازود فى الاعمال ..

استمتعِ بيومك موناليزا ..

وربنا يجعل بكرة ليكِ احسن دايما ..

أحبك فى الله ..

عمرو جويلى يقول...

موناليزا
السلام عليكم
أنا ممن ينتظرون بكرة أملا فى أن يكون أحسن ولامانع من النظر لأمس حتى أستشرف حياتى بكرة
دمت بكل الخير

الربان يقول...

تحياتي

بصراحة انا كنت بانتظر بكره بفارغ الصبر...

لكن الان عودت نفسي ان أحيا اليوم فقط
لا بل الان فقط...و لا افكر في غير ذلك..

صدقيني اجمل ما في الحياة ان نعيشها بلحظتها....فغداً بظهر الغيب.... ولا
اعلم هل سيأتي غدا و أنا حي ...

تحياتي و تقديري

rovy يقول...

السلام عليكم اختى الحبيبه موناليزا
اكيد عندك حق حبيبتى فى اننا لازم نحاول نعيش النهارضه و نستغل كل لحظه فيه ممكن تكون لصالحنا
كثير بتهرب منا الايام و تضيع من بين ايدينا و احنا مش حاسين انها بتضيع معاها عمرنا و فرصتنا فى انجاز صالح ينفعنا سواء للدنيا او للاخره
اتمنى ان نعى قيمة اليوم و ان لا نجعله يضيع هباء و لكن يجب ايضا ان يكون عندنا الامل فى ان يكون الغد جميل و ان يتحقق فيه احلامنا و لكن لكى يأتى الغد المشرق الذى نحلم به يجب ان نحسن استغلال اليوم و لنعمل لحياتنا كأننا نعيش ابدا و نعمل لأخرتنا كأننا نموت غدا .. يمكن تكون المعادله صعبه شويه لكن لازم نحاول ..
دمتى سالمه غاليتى فى حفظ الله وجزاكى الرحمن كل الخير لكل ما تخططه يدكى من مواضيع هامه و مفيده ..

خالص مودتى ة تحياتى

Mafrousa يقول...

و النبي انا افتكرت انى انا لوحدى اللى بتفكر كده
بكرة حنعمل ايه؟
مهم النهاردة نعمل فيه حاجة تنفع آخرتنا كمان
ايه رأيكم لو اتفقنا اننا كل يوم نحفظ صفحة من القرآن و لو صفحة كتيرة خلوها آيه واحدة و بعدين هيه لوحدها حتزيد و تبقى صفحة
ايه رايك؟؟؟؟؟
ربنا يحسن خاتمتنا جميعا يارب

اما على المستوى الشخصي
بفكر اعمل ايه بكرة؟؟
و النبي يا اختى بفكر اطبخ ايه اصلها بقت حاجة تفرس و الله
تحياتي

موناليزا يقول...

مجداوية
ــــــــــ
وعليكم السلام ورحمة الله وبركاته
اختى الحبيبة:ربنا يكرمك فماتوفيقى الا بالله
اشكرك جدا لرايك
صح كدا

طبعا فهمت:) انا اللى جبت التورتة :)
نورتينى حبيبتى ودمتِ بخير




*********************************




ست البنات
ــــــــــــ
اختى الحبيبة:ماتخافيش ياجميلة وسيبيها لله
تمنياتى لكِ بكل الخير
نورتينى حبيبتى واشكرك لمشاركتك




**********************************




حاجات جوايا
ــــــــــــــــ
اختى الحبيبة:اهلا اهلا بسالى الجميلة
ان شاء الله نقدر نستغله صح فى حاجات تفيد ديننا ودنيانا
اشكرك جدا لمشاركتك
نورتينى حبيبتى ودمتِ بخير





******************************




ريمان
ـــــــــ
وعليكم السلام ورحمة الله وبركاته
اختى الحبيبة:ازيك انتى ياريمو
انا الحمدلله بخير ماتحرمش من سؤالك
ولايهمك المهم انك جيتى ونورتينى واسعدتينى بتواجدك
ان شاء الله ياحبيبتى املنا فى ربنا كبير بس خدى بالك لان كل يوم محسوب من عمرنا
ان شاء الله ربنا يقدرنى ويكون موضوع موفق دعواتك:)
نورتينى ياقمر ودمتِ بخير





////////////////////////////////





الفراشة الصغيرة
ــــــــــــــــــ
اختى الحبيبة:اشكرك على مشاركتك المتميزة
وفعلا ياجميلة كلام مظبوط جدا
نورتينى حبيبتى ودمتِ بخير





******************************





نوراهاتى
ــــــــــــــ
وعليكم السلام ورحمة الله وبركاته
اختى الحبيبة:صح الكلام ولذلك وجب علينا عدم الانتظار ولنعمل جاهدين باستغلال يومنا على اكمل وجه يرضى الله
اشكرك جدا لمشاركتك
نورتينى حبيبتى ودمتِ بخير





********************************





اختكم فى الله
ــــــــــــــ
اختى الحبيبة:ربنا يكرمك اشكرك جدا لرايك فماتوفيقى الا بالله
ان شاء الله ربنا يحققلك كل اللى تتمنيه
اشكرك جدا لمشاركتك
نورتينى حبيبتى بعد طول غياب




*******************************





سونة
ـــــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولمشاركتك
فماتوفيقى الا بالله
نورتينى حبيبتى ودمتِ بخير




*********************************






لجين ابوالدهب
ـــــــــــــــــ
اختى الحبيبة:ربنا يهيئلك كل الخير وتنولى كل اللى تتمنيه
وعلمتنى الحياة ان الانتظار مضيعة للوقت فقط
تمنياتى لكِ بكل السعادة
أحبك الذى احببتنى فيه:) وانا كمان بحبك فى الله
اشكرك جدا لمشاركتك
نورتينى حبيبتى ودمتِ بخير





*********************************





الؤلؤة
ـــــــــ
وعليكم السلام ورحمة الله وبركاته
اهلا بيك فى زيارتك الاولى
طب والنهاردة اخباره ايه؟ ماجيبتش سيرته يعنى:)
تمنياتى لك بكل الخير
نورت مدونتى وارجو دوام التواصل




*********************************




الربان
ــــــــــــ
اهلا بيك يافندم
صح كده
بكرة ياعالم هيكون فى ايه
تمنياتى لك بكل الخير
اشكرك جدا لمشاركتك
دمت طيبا ولمدونتى زائرا



********************************



روفى
ــــــــــ
وعليكم السلام ورحمة الله وبركاته
اختى الحبيبة:اهلا اهلا بالغالية
اهو دا الكلام
تسلميلى ياقمر من كل شر
ودام لى تعليقاتك ومشاركتك المتميزة دائما
ربنا يسعدك ويهيئلك كل خير
نورتينى حبيبتى ودمتِ فى رعاية الله




***********************************




واحدة مفروسة
ــــــــــــــ
اختى الحبيبة:الله عليكِ
ايوا كده اهو دا الكلام
موافقة طبعا:)
يااارب

ههههههه تطبخى ايه يامفروسة تطبخى ايه يامفروسة امممم ايه رأيك فى الكشرى
جميل وخفيف وسهل كمان والف هنا:)
اشكرك جدا لمشاركتك
نورتينى حبيبتى ودمتِ بخير

TIMMY !! يقول...

فعلا الواحد المفروض يعمل ليومه ,
و يترك غده حتى يأتي ,
و كما يقولون : يومك يومك ,

بالنسبة لي , يومي و غدي و بعد غدي لمدة 3 سنين زي بعضهم ... ظابط في الجيش :(

بس ربنا يوفقنا و نعمل فيهم حاجة و ما نستسلمش للروتين و الواقع ,

جزاكم الله خيرا

كفايـة طيبـة يقول...

هو انتى مش هتكتبي حاجة جديدة :(

انا قاعدة مستنية اهو

نسيبه يقول...

alsalmo alekom surprise iam nosyba wahshteny and your wrtting ana kman start live tody and this coumputer is dalil rabna yarzokna hosn alkhatma nosyba

محمد عتلم يقول...

انا بصراحه مستنى بكره بشده
وبصراحه اكتر طمعان فى بكره انه يكون احسن من امبارح . بس املى وايمانى بربنا كبير جدا جدا
قل لن يصيبنا الا ما كتب الله لنا
ايا كان شكل بكره اكيد ربنا مش هيجيب حاجه وحشه انشاء الله

منى يقول...

بخاف افكر فى بكره اساسا
كتير بحلم
واكتر بخاف احلم
س دايما فاكره ان ربى كريم ومش كتير عليه انه يخلي بكره احلى
بس فى نفس الوقت بقيت احاول اقبض على كل لحظه استمتع بيها او استفيد منها
ماهو على راى سلوى مش عارفه بكره هيلاقينى ولا لاء
ابقى تعالى شوفى مدونه جين اير الجديده انتى وجنه من غير ما تاخدوا بالكم كنتم السبب فيها
كل التحيه والحب

موناليزا يقول...

تيمى
ـــــــــ
اهلا بيك يافندم
ياخبر:) ربنا يوفقك ويعديهم على خير
بجد بجد ربنا معاك
اشكرك جدا لمشاركتك
دمت طيبا ولمدونتى زائرا




*******************************



كفاية طيبة
ــــــــــــــ
اختى الحبيبة:ماتحرمش منك ابدا ياجميلة انا حاليا بخلص موضوع وهنشره باذن الله على بكرة بالكتير
عايزاكى تكونِ اول تعليق:)
هستناكِ ياحبيبة قلبى
بحبك جدا




**********************************





نسيبة
ــــــــ
وعليكم السلام ورحمة الله وبركاته
اختى الحبيبة:اهلا اهلا ايه المفاجأة الجميلة دى(هى دى المفاجأة اللى قلتيلى عليها صح؟:))
صاحية بدرى ليه؟ كنتى فين على الصبح كده:)
وانتى كمان ياحبيبتى بتوحشينى على طول
والحمدلله الذى هدانا الى هذا وماكنا لنهتدى لولا ان هدانا الله
وربنا يرزقنا جميعا حسن الخاتمة
مبسوطة جدا بمشاركتك وتواجدك
نورتينى حبيبتى ودمتِ بخير





**********************************





محمد عتلم
ــــــــــــ
اهلا بيك استاذ محمد
ان شاء الله يافندم بكرة يكون احسن واجمل
تمنياتى لك بكل الخير
نورت مدونتى وارجو دوام التواصل




********************************




منى
ــــــــ
اختى الحبيبة:اهلا اهلا بالقمر
ربنا يسعدك ويديكِ على قد قلبك الجميل
وربنا يحقق لك كل اللى بتتمنيه

بجد:) انا جاية على طول
اشكرك جدا لمشاركتك ولتواجدك
نورتينى حبيبتى ودمتِ بخير

مدونة حكومتى ملاك يقول...

السلام عليكم ..

نعمتان مغبون فيهما كثير من الناس

الصحة والفراغ

فاذا كنت تملك الوقت فاستغله فانت لا

تعلم ما فى الغد

موضوع جميل

تحياتى ..

عمار صبرى

غير معرف يقول...

أنا مستنية من بكرة يوم انام ما افكرش ف حاجة تغم

تصدقي بأه؟؟
:)

مها ميهوووو

ذكرى رحيل قلم يقول...

تاسلام عليكم

تسلم ايدك ديما موضوعاتك سلسة وهينة ورقيقة مع انك متقدمي لينا معني كبير
جعله الله في ميزان حسناتك
ان شاء الله مش هستني بكرة
نور

ghorBty يقول...

السلام عليكم

اسفه علي التأخير

ووحشاني جدا يا موناليزا

موضوع مميز جدا جدا ربنا يبارك لك

الانتظار فعلا شئ مقلق وبيخلينا ما نحس بطعم اللحظه اللي عايشنها بس ساعات كتير بننسي الألم اللحظه اللي عايشنها ونفكر ونصبر نفسنا ان بكره احلي وان أحلامنا وأملنا ان شاء الله تعالي هتتحقق ويمكن دا في حد ذاته طول أمل وممكن يكون مزموم بس بيريح ساعات

لكن اكتر حاجه تخوف هي لو كان الواحد بيعمل شئ حرام ويفضل يقول بكره اتوب بكره هكون احسن دا بقا اللي مش صح ابداودا تسويف من عمل الشيطان

واتذكر عبارة الشيخ عائض القرني

يومك يومك

ودا اريح بكثير بس محتاجه منا جهاد لحد ما نوطئ نفسنا علي ذلك

جزاك الله خيرا

معلشي حاسه ان التعليق مش مرتب

السلام عليكم

موناليزا يقول...

مدونة حكومتى ملاك
ــــــــــــــــــ
وعليكم السلام ورحمة الله وبركاته
اهلا بيك استاذ عمار
اشكرك جدا لرايك ولمشاركتك
دمت طيبا ولمدونتى زائرا



*********************************



احسن تستاهل
ـــــــــــــــ
اختى الحبيبة:مالك يا مهاميهو؟
كده قلقتينى عليكِ
ان شاء الله ياحبيبتى القادم أجمل
وربنا يسعدك ويحقق لك كل ماتتمنيه
نورتينى ياجميلة ودمتِ بخير




*********************************




ذكرى رحيل قلم
ــــــــــــــــــ
وعليكم السلام ورحمة الله وبركاته
اختى الحبيبة:اشكرك جدا لتعليقك الرقيق
وتمنياتى لكِ بكل الخير
نورتى مدونتى وارجو دوام التواصل




*********************************



غربتى
ـــــــــ
وعليكم السلام ورحمة الله وبركاته
اختى الحبيبة: ولا يهمك ياجميلة المهم تشدى حيلك وترفعى راسنا:)
وانتى كمان ياقمر وحشااانى جدا بس كله يهون فى سبيل العلم
ربنا يكرمك ياحبيبتى فماتوفيقى الا بالله

معاكِ حق بس انا قصدت ان نستغل كل لحظة مش شرط نكون بنعصى ربنا ممكن جدا نكون بنضيع وقتنا فى الانتظار وبس وده اللى بحاول الفت النظر ليه
تعرفى فى مقولة كنت قرأتها عجبتنى اوى بتقول"من اسعد الناس من ينهمك فى العمل فلايدرى ان كان سعيدا او تعيسا"
يعنى نشغل نفسنا لغاية لما ربنا يفرجها
اشكرك جدا لمشاركتك ولتواجدك
نورتينى حبيبتى ودمتِ بخير

نسيبه يقول...

السلام عليكم ورحمة الله وبركاته
أنا عايزة أقول لك إن الموضوع ده أثر علي فعلا وخلاني أقول فعلا أنا لازم أفكر في النهارده بشكل مختلف فكل يوم يمر نقول إمبارح كان أحسن زمان كان أحسن من كده مع إن وقتها ماكناش بنقول دبمعني إني أستشعر ده وأقتنع بيه
جزاك الله خيرا
أما عن بكره هأقولك نبذه مختصره بيت أطيع ربنا فيه وزوج صالح يعينني علي هذا وحسن خاتمه
جزاك الله خيرا

موناليزا يقول...

نسيبة
ـــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر
مبسوطة بجد ان فكرتى وصلتلك:)
ربنا يرزقك بكل الخير ويحقق لك كل ماتتمنى فى طاعة الله
نورتينى حبيبتى الغالية ودمتِ بخير

تأثير الفراشة يقول...

ما شاء الله، عجبنى جدا ،و قدرت توضحى فكرتك بأسلوب جميل جدا ، ربنا يكرمك دايما و يبارك لك، و سعيدة بإنك عرفتينى على رابط الموضوع

أتمنى لك كل التوفيق، و بإذن الله يدوم التواصل

تحياتى ليكى

موناليزا يقول...

تأثير فراشة
ـــــــــــــ
اختى الحبيبة:اشكرك جدا لرايك ولمشاركتك فماتوفيقى الا بالله
نورتينى حبيبتى واسعدتينى بتواجدك