الثلاثاء، 30 مارس 2010

أصعب إحساس

* حينما يصاب شخص سليم بحادث يجعله قعيداً ومع إستمرار العلاج أستطاع أخيراً أن يمشى من غرفته إلى الحمام دون مساعدة أحد ومن كتر فرحته أخبر جميع من توقع أنهم ممكن يفرحوا معاه والمفاجأة كانت عدم إكتراثهم وكأن هذا الفعل شئ عادى وبديهى أن يحدث.
* حينما يحقد السليم جسدياً على المعاق جسدياً لامتلاكه جهاز بلاى ستيشن.
* حينما تأتى من سفر طويل وتجلس مع أفراد أسرتك لتجد أحبهم إلى قلبك ينصرف للغرفة المجاورة ليتحدث فى الهاتف لمدة تزيد عن الثلاث ساعات ويأتى ليجلس معك فى الوقت الذى هممت فيه بالانصراف فتجده يلومك بأنك مستعجل!.
* حينما يكون أقرب الأشخاص فى حياة الفرد عينيهم وحشة.
* حينما يأتى إليك شئ كنت تتمناه ..بعد فوات الآوان.
* حينما تشعر بأنك كالحمامة المربوط قدمها بحبل متين كلما أرادت أن تحلق فى السماء حال الحبل دون ذلك.
* حينما تجد شخص قريب منك سخى جداً مع الآخرين ومعك يحاسبك على أتفه الأشياء ويطلب منك ثمنها.
* حينما تحافظ على أمانة الأشخاص وكأنها ملكك إلا أن تردها لصاحبها سليمة وبالمقابل لا أحد يهتم بالأمانة الذى تودعه إياها حتى لو كانت مجرد كلمة.
* حينما تذاكر دروسك جيداً وتدخل الإمتحان وأنت واثق من نفسك لتجد النتيجة رسوبك.
* حينما تشعر بأنك بذرة بداخل الأرض وحان وقت خروجها للشمس ومع ذلك تجد الأرض صلبة ولا تستطيع الخروج والتنفس بحرية.
* حينما تبحث فى وجوه من حولك على وجه بعينه ولا تجده.
* حينما تكون فى حياتهم مجرد محطة إنتظار.
* حينما تضحى بفرصة كنت تنتظرها من أجل شخص إعتبرته صديق وحينما تأتى له نفس الفرصة يضحى بك من أجلها.
* حينما تبث بداخلهم روح الأمل والتفاؤل ويبثون بداخلك اليأس والإحباط.
* حينما تغيب عنهم ولا يفتقدون تواجدك إلا بعد سنوات.
*حينما تسخر مجهوداتك لخدمة الآخرين وبالمقابل حينما تحتاج لخدمة من أقرب الناس لك تجده لا يكترث بإسداء الخدمة حتى ولو لم تكلفه شئ.
* حينما تريد أن تغير جو وتجد من حولك يرتبون لقضاء نزهة متناسيين وجودك وإحتياجك.
* حينما تجد شخص كان لديه مصيبة ووقفت جواره وبكيت من أجله وتتضرعت إلى الله بالدعاء ليخفف عنه يقابلك بعد غياب سنوات بجفاء وكأنه لم يعرفك يوماً رغم أنك تعانى من نفس المصيبة الذى عانى منها يوماً ما.
* حينما يخبرك شخص ما بشئ يفرحك وبعد ما تشعر بالفرحة الذى تمنيتها تكتشف بعدها بساعات بأنه كان فقط يمزح.
* حينما تعلم بأن أرض الله واسعة ولكنك تعجز عن التحرك من مكانك.
* حينما تشعر بالوحدة وسط أحبابك.
* حينما تُصدق الكاذب و هو يكذبك وأنت له صادق.
* حينما تكره طيبتك لأنها بالنسبة للغالبية غباء وسذاجة.
* حينما يقابل إستفسارك البرئ عن شئ ما بالسخرية وعدم التصديق بأنك حقاً لا تعلم.
* حينما تشعر بالعجز وتضطر للإعتماد على الآخرين فى كل شئ.
* حينما تعاقب على شئ أنت برئ منه.
* حينما تجد ما بنيته بمجهودك ينهار فى لحظة أمام عينيك ولا تستطيع منع هذا.
* حينما تُهِمش رغباتك من قبل الجميع على إعتبار أنها أتفه من أن تُقضى.
* حينما تجد الظالم يزداد قوة وعناداً ويزداد المظلوم حزناً وهماً.
* حينما تُنتهك محارم الله أمامك ولا يكون بيدك حيلة للدفاع عنها.
* حينما ترضى بقليلك وتجده مع الوقت يفنى.
* حينما تجد أقرب ما ليك فى الدنيا مش حواليك.
* حينما تجد سنوات عمرك تتسرسب من بين إيديك.


سؤال جانبى:
ــــــــــــــــــــ
* ما أصعب إحساس واجهته ؟.

هناك 35 تعليقًا:

غير معرف يقول...

السلام عليكِ
الهدف من التدوينة بصفة عامة محمود جداً وأزيد عليه بهذا القول :
ألا قل لمن ظل لك حاسداً
أتدري على من أسأت الأدب ؟
أسأت على الله في حكمه إذا أنت لم ترض لي ما وهب

الزهرة البرية (Joudy) يقول...

يااه يامونى الكلام ده بجد فعلا أصعب إحساس فى الدنيا مش 8عارفة أقولك إيه بجد كلامك كله صح فعلا

أنا أصعب إحساس شوفته فى أصحابى اللى بحبهم بجد إنهم مش يسألوا أبدا عليا وأول لما أسأل تلاقيهم بيقابلوكى بوابل من مشاكلهم وفين وفين لما يفكروا يسألوا أنا عاملة إيه وفى الغالب بيكون سؤال عابر مقطوع إلى إكمال وصلة الشكوى

دمتى بكل الخير والسعادة

أع ـقل مـ ج ـنـونــة يقول...

انا اصعب احساس حسيته او هو اللى بحسه حاليا

صراع بين الداخل والخارج

حاجة كدا ملخبطة .. ربنا يعديها ع خير ..
دعواتك .. وتحياتي ومدونة جميلة جدا
وارجو ان نظل علي تواصل دائما

AHMED SAMIR يقول...

حقيقة كل الأحاسيس اللي انتي كتبتيها دي احاسيس صعبة جدا
الا ان مسألة اصعب احساس هي مسألة نسبية تختلف من فرد لأخر
انا عن نفسي اصعب احساس واجهني هو احساس الغربة
فكرة ان يبقى في حد واحشك قوي و نفسك تشوفيه و ماتعرفيش علشان الحدود و الفواصل بين الدول
فكرة بشعة بجد
تحياتي

ريمان يقول...

ما أصعب إحساس واجهته ؟.

اما يتخلى عنى اقرب الناس ليا


وشويه حاجات كتير من اللى انتى كتبتيها فى البوست

:(


فكرتينى بحاجات كتير محبش افتكرها

:(

كلمات من نور يقول...

اخ يا موناليزتي ما أصعبها من احاسيس

سؤالك صعب علشان فعلا فيه أحاسيس كتير صعبه مرينا بيها مرة ومرتين وتلاته ووو

بس من أصعب الأحاسيس اللي مريت بيها مرة كانت والدتي بتعمل عملية جراحيه و أنا قاعده بره غرفة العمليات وحدي وكان جنبي شاب وشابه والدهم بيعمل عملية برضه وفجأة وبدون مقدمات بدات ابكي ابكي ولقيت اللي جنبي بدأوا يبصوا لي ويعيطوا هم كمان وفضلنا كده لغاية ما خرج الطبيب وطلع يقول مين فيكم بنت فلانة؟ قلتله أنا ...قالي تعالي يا ستي ماما عماله تنده عليكي ....ربي يخلي كل أمهاتنا و أبائنا ويرحمهما كما ربيانا صغارا

موناليزا يقول...

أحمد شريف
ــــــــــ
وعليكم السلام ورحمة الله وبركاته
أهلا بيك أستاذ احمد
الله على تعليقك
جميل بجد
نورتنى واسعدنى تواجدك



*********************************


الزهرة البرية
ـــــــــــــــ
أهلا اهلا بالقمر
:) ياااه يا جودى من ده كتييييييير
واضح انها حالة عامة
نورتينى ياجميلة واسعدنى تواجدك



*********************************


أعقل مجنونة
ــــــــــــ
أهلا بيكِ فى زيارتك الاولى
بإذن الله إحساس وهيعدى سريعا على خير
أشكرك جدا لرايك ولمشاركتك
نورتِ مدونتى ويسعدنى دوام التواصل



*********************************


أحمد سمير
ــــــــ
أهلا بيك أستاذ أحمد
عارفاه الاحساس ده أصلى جربته قبل كده:)
أشكرك جدا لمشاركتك
نورتنى ويسعدنى دوام التواصل



********************************



ريمان
ـــــــ
أهلا اهلا بالقمر
بصى انا ردى عليكِ بجد ياريتك قدامى كنت خدتك فى حضنى وطبطبت عليكِ
أصلى حاسة بيكِ جدا

حقك عليا يا ريمو مقصدتش افكرك بحاجات بايخة
شوفتى اهو انا اللى هعيط دلؤتى
عموما انا عاملة حسابى ومعايا مناديل كتير تكفينا احنا الاتنين:)

نورتينى حبيبتى ويسعدنى تواجدك دايما



*******************************



كلمات من نور
ـــــــــــــ
أهلا اهلا بالغالية
ياخبر
والله وانا بقرأ تعليقك كنت حاطة ايدى على قلبى وقلقانة
بس الحمدلله:)
يارب ياحبيبتى يباركلنا فى اعمار امهاتنا وابائنا اللهم امين
نورتينى غاليتى واسعدنى تواجدك

مشخبطاتي يقول...

السلام عليكم..

يعجبني جدًا أسلوب عرضكم لآخر أربع تدوينات..أسلوب رائع !

التدوينة جيدة(مش رد والسلام)..وسأجاوب على السؤال الذي لم أجاوب عليه في التدوينات السابقة:

أصعب إحساس قابلني..حينما تعبت من أجلهم ولم أنتظر منهم أي شيئ..فقط لأني أحبهم..إلا أنهم لم يقبلوني وقالوا لي نحن لانريدك..!

Maha Shahen يقول...

لما بيحصل كل دا بفتكر جمله سمعتها فى فيلم بتقول
يا رب دنيتك حلوه قوى لكنى مش عارفه اعيشها
لما تتلخبط كل الاوراق ويبقى الغلط صح والصح غلط لما احس انى وحيده فلى بفكر فيه ولما اعرف ان الاخلاق والمبادىء هى المثاليه بعينها وان المثاليه شىء مستحيل التشبه حتى بيه
ولما اقرأ تدوينه زى كدا كتبتيها بمهاره لكنها وجعت قلبى
مش هقدر اقول الا ..
لا حول ولا قوة الا بالله
لله الامر من قبل ومن بعد
ربنا دايما والحمدلله بيبعت ضوء خفيف ينور الطريق من جديد بعد الظلام كل اللي عليا انى انتظر بأيمان وثبات

اما بالنسبالى الموقف الصعب ممكن يختصر بجملتين أصعب احساس هو فقد الاحساس
لما نفقد القدره علي الضحك وقت الفرح او نفقد القدره علي البكاء وقت الحزن

خالص تحياتى ليكى علي احاسيس زلزلتنى من شدة قسوتها وربنا يعين اللي مر بشىء منها

♥نبع الغرام♥♪≈ يقول...

اسفه متأخره ظروف النت ياحبيبتى

وحشتينى والله متشكره على سؤالك عنى يا حبيبتى


***************

أصعب أحساس واجهته
طبعا طالما فيه حياه وفيه بشر اذن الاحاسيس ااصعبه كتيره وملهاش حصر
ومن ضمنها لما تشتاق لشخص لكنك متاكد انك لم تراه ثانية
او تحتاج لمن تحبهم وتخجل ان تلفت انتباهم اليك فعزة نفسك تريدهم يفهموك بدون شكوى
واصعب احساس لما تثق فى حد وفجأه تفيق على مسخ دميم
تحياتى امة الله واحلى احساس اننا مسلمين ولينا رب الحمد لله

ميرا ( وومن ) يقول...

ايه التدوينة التقيلة دي
قلبتي علينا المواجع

أصعب احساس مخرجش عن كل ما كتبتية

ربنا يكرمك يا رب

دعواتك

مرايتى يقول...

هى دى دنيتنا
صحيح كلها أحاسيس صعبه جدا بس مرينا بقيها بكتيييير منها ودقنا مرارتها
والأـصعب والأصعب لما بتلاقيها متعلقه بالى المفروض بيحبوكى

أما عن سؤالك الجانبى صدقينى كتير بلاش تقلبى المواجع

حمـــــــــــــــــــــة يقول...

السلام عليكم ورحمة الله وبركاته
والله العظيم تخيلت نفسي وسط أغلب ما ذكرتي ............
إحساس بالمرارة أحيانا
العجز
أكاد أنفجر أمام ما يحدث أمامي
و الذي يجنن إستغباء البعض و يوهم بجميع الطرق أنه هو الصحيح
تشابهت الحالات و الواقع
لكن الحمد لله
الإيمان قوي جدا
و الإعتماد على المولى كلي
أخيرا أقول "إن شاء الله خيرا"
و ربنا يستر على الجميع

إمرأه من ثلج يقول...

الكلام بجد صعب بس الأصعب لما أبقى أنا فى المواقف دى مش عارفة كنت هعمل اية

او عارفةهتجيلى حالة يأس

أصعب أحساس لما تظلمى بجد من حد كان كل حاجة واظلمتى من غير ذنب

تحياتى يارقيقة المشاعر

KHALED يقول...

* ما أصعب إحساس واجهته ؟.

الغضب

Unknown يقول...

فعلاً احساس صعب
كل اللى ذكرتيه
واكتر منه لكن الواحد
بيحاول الا يتذكر على
قدر الأمكان لكى لا يستمر
الألم.

طهر فؤادك يقول...

السلام عليكم ورحمة الله وبركاتة
اخبارك اية ؟؟
وربارك الله فيكى

وبوست متميز كالعادة

واصعب احساس الغربة ..

ghorBty يقول...

السلام عليكم

كثيره هى المواقف التي تمر علينا ونشعر فيها بالاحساس الصعب ..

بجد تدوينه في غاية الجمال

لو سمحت لقلمي ان يكتب عن اصعب احساس وجدته لنفد مني عشرات الاقلام ولن اكتفي باهم شئ

اصعب احساس هو احساس ان يكلني الله الي نفسي في هذه اللحظه اشعر بالتوهان والضياع وكاني خيال وسراب علي الارض فاللهم لا تكلني الي نفسي طرفة عين ..

موفقه يارب ..

Unknown يقول...

السلام عليكم

بقالي كتيرمختفيبس كان لازم اسأل واطمن

يارب تكوني بخير

عايز اقولك ان التدوينة هايله بس جواها كده مبادئ اكتئاب


وبالنسبة لأصعب احساس
لما كل يوم الحلم ينتهي واصحي وملقيش حد جنبي ...... غيري

GiGi world يقول...

اصعب احساس لما تبقى عايز حاجه لكن القرار مش فى ايدك انك تاخد القرار وانت مهمش
تحياتى ياحبيبتى نفسي اسمع عنك خبر يفرحنى اكتر ماهيفرحك يامونى يارب
ربنا يسعدك

(المهاجر الى الله) يقول...

السلام عليكم ورحمة الله وبركاته :
ياااه طيب ليه كدة يعنى ، انتى حد مسلطك عليا ، لازم تقلبى عليا الواجع وتقعدى كدة تستغلى مهاراتك فى التصوير الواقعى عشان تفكرينى باحداث انا يا اما نسيتها ، يا اما باتناساها ، يا اما بحاول انساها ، كل ما ذكرتيه انا تقريبا مريت بيه فى مختلف مراحل عمرى ، وكل ده يا موناليزا كوم والشعور بان عمرى بيتفرط من بين ايدى من غير ما احقق طموحى او اللى كنت عاوز اعمله ، بيكون احساس قاتل ، مؤلم قوى ، لا يطاق عشان كدة باهرب من التفكير فى النقطة دى دايما .
اصعب احساس واجته : :) طب قولى اصعب احاسيس واجهتها ، طيب انا من كتر ما شوفت الالم والصعاب ، المفروض السؤال يكون ، ماهى اللحظة التى مرت دون احساس مؤلم .
بس على العموم الحمد لله على كل حال ، مش باعرف اشتكى لحد ولا باعرف احكى لحد همومى باكتم فى نفسى وربى اعلم بحالى منى وهو المستعان .

واحد من البلد دى يقول...

السلام عليكم ورحمة الله وبركاته

الحمد لله أن خلق لنا نعمة النسيان ولكن أصعب إحساس واجهته فى حياتى عندما كنت أصلى ذات يوم وأخذت أستغفر الله من ذنوبى التى أعلمها وفجأة...تذكرت أن هناك مئات الذنوب التى لا أعلمها والتى فعلتها ونسيتها وجائتنى الآية الكريمة---بسم الله الرحمن الرحيم(أحصاه الله ونسوه)صدق الله العظيم...فأخذت أجهش بالبكاء حتى كاد أن يغشى على ولكننى تمنيت أن أعيد تلك اللحظة عشرات المرات لما شعرت بعدها من صفاء نفسى شديد...

ومن أصعب الأحاسيس أيضا أن يتذكر الإنسان أن الموت يأتى فجأة..فهل يا ترى ..أين سيكون وعلى أى حال وبأى خاتمة سيختم له..وبعد الحساب يوم القيامة..ومن أسمائها أيضا التى تجلب العبرة..الواقعة والطامة الكبرى..أين سيكون مصير الإنسان بعد ما أفنى عمره فى الدنيا فى جمع ما أمكنه منها ونسى آخرته..يقول رب العزة عن هؤلاء-بسم الله الرحمن الرحيم(أذهبتم طيباتكم فى الحياة الدنيا وأستمتعتم بها فاليوم تجزون عذاب الهون بما كنتم تفسقون)صدق الله العظيم..
أختى فى الله..
لو لم يكن ذكر الموت والآخرة من أعظم وأصعب الأحاسيس لما أختص الله بها بعضا من أنبياءه كسيدنا إبراهيم وإسحاق ويعقوب..-بسم الله الرحمن الرحيم(إنا أخلصناهم بخالصة ذكرى الدار(46)وإنهم عندنا لمن المصطفين الأخيار(47)--صدق الله العظيم..

وأخيرا..فإننى أختاه لا أجد أصعب من إحساس المرء أنه مقصر فى جنب الله سبحانه وتعالى فأى إحساس بعد ذلك يهون....والحمد لله على نعمة التذكر والتفكر والله المستعان على أصعب الأحاسيس..

تحياتى إلى شخصك الكريم
أسأل الله لكى الرضا بما قسم والغنيمة من كل بر والسلامة من كل شروالثبات على الصلاح والسعى إلى الفلاح..إنه ولى ذلك والقادر عليه

والسلام عليكم ورحمة الله وبركاته

موناليزا يقول...

مشخبطاتى
ـــــــــــ
وعليكم السلام ورحمة الله وبركاته
أهلا بيك يافندم
شهادتك هذه أعتز بيها جدا
أشكرك جدا لرايك ولمشاركتك
وما افساه من شعور "الرفض ممن نحبهم"
نورتنى ويسعدنى دوام التواصل



*********************************


إبتسامة ملاك
ـــــــــــــ
أهلا اهلا بالقمر
عذرك معاكِ حبيبتى
أنتِ بس بتوحشينى:)
والحمدلله انك بخير

عندك حق جدا
نورتينى انوسة الجميلة وسعيدة بمشاركتك



**********************************


نور شاهين
ــــــــــ
أهلا اهلا بالقمر
تعرفى انى حسيتها اوى الجملة دى لما سمعتها برضه:)
سلامة قلبك يا حبيبتى من اى وجع اسفة بجد ماقصدتش
أما اجابتك عن أصعب احساس بأنه فقد الاحساس رائع بخق
ولكن ما اجمل الثقة فى الله حقا
نورتينى حبيبتى واسعدنى مشاركتك المتميزة وتواجدك



*********************************



ميرا وومن
ـــــــــ
أهلا اهلا بالقمر
حقك عليا مش ده قصدى ابدا والله
أشكرك جدا لمشاركتك
نورتينى ميرا الجميلة واسعدنى تواجدك



*********************************



مرايتى
ـــــــــ
أهلا اهلا بالقمر
عندك حق فالضربة من الحبيب مميتة
:) خلاص حاضر براءة المرة دى من اجابة السؤال
نورتينى ياجميلة واسعدنى تواجدك



*********************************



هاما
ـــــــ
وعليكم السلام ورحمة الله وبركاته
أهلا بيك يافندم
حقاً نقولها وعن يقين طالما من عند الله فهو خير
أشكرك جدا لمشاركتك ويسعدنى دوام التواصل



**********************************



امرأة من تلج
ــــــــــــــ
أهلا اهلا بالقمر
طب الحمدلله بجد انك مش فيها ويارب ماتجربيهاش ابدا
ياااه الظلم ما اقساه من شعور
نورتينى ياجميلة واسعدنى تواجدك



*********************************



خالد
ــــــ
أهلا بيك أستاذ خالد بعد طول غياب
إجابة مميزة ومختلفة
أشكرك جدا لمشاركتك ويسعدنى دوام التواصل



**********************************



نوراهاتى
ـــــــــــ
أهلا اهلا بالقمر
عندك حق جدا
نورتينى نور الجميلة واسعدنى تواجدك



**********************************


طهر فؤادك
ـــــــــــ
وعليكم السلام ورحمة الله وبركاته
أهلا بيك يافندم
أنا الحمدلله بخير أشكرك جدا لسؤالك
أشكرك جدا لرايك ولمشاركتك
واعلمه جيدا هذا الاحساس فقد جربته من قبل
نورتنى ويسعدنى دوام التواصل



*********************************


غربتى
ـــــــ
وعليكم السلام ورحمة اللله وبركاته
أهلا اهلا بالقمر بعد طول غياب
أشكرك جدا لرايك
إجابة مهمة جدا بحق
ربنا يسعدك ياحبيبتى
نورتينى ياجميلة واسعدنى تواجدك



********************************


برقش
ـــــــ
وعليكم السلام ورحمة الله وبركاته
أهلا بيك يافندم بعد طول غياب
وانا الحمدلله بخير اشكرك جدا لسؤالك
أشكرك جدا لرايك
هو باين انه اكتئاب:) أصلى عاملة مش واخدة بالى:)
الشعور بالوحدة ياله من شعور مؤلم
أشكرك جدا لمشاركتك ويسعدنى دوام التواصل



********************************


جيجى وورلد
ــــــــــ
أهلا اهلا بالقمر
عارفاه الاحساس ده:)
حبيبة قلبى ماتحرمش منك ابدا وخبر حلو ايه اكتر من انى الاقى حد يحبنى فى الله واخت جميلة زيك بتدعيلى:)
بجد انتِ مش عارفة كلامك ده بيسعدنى ازاى
ربنا يفرحك ويحقق لك كل ماتتمنى
نورتينى حبيبتى واسعدنى تواجدك



**********************************


المهاجر الى الله
ـــــــــــــــ
وعليكم السلام ورحمة الله وبركاته
أهلا بيك أستاذ طارق
حقيقى بجد انا اسفة جدا على اى شعور مؤلم افتكرته حين قراءتك لما كتبت
أقولك على تعليق مرة جالى زمان بس بجد أثر فيا جامد
" زى ما الدنيا ورتنا وشها الوحش أكيد هتورينا وشها الحلو لانها دوارة"
أنا بقى ماسكة فى الجملة دى وعندى يقين وأمل بأن سنوات الرخاء أكيد جاية:)
ربنا يهيئ لك كل الخير ويمتعك بصحتك
أشكرك جدا لمشاركتك ويسعدنى دوام التواصل



**********************************


واحد من البلد دى
ــــــــــــــــــ
وعليكم السلام ورحمة الله وبركاته
أهلا بيك يافندم
لحظة البكاء بين يدى الله بعتبرها من اجمل اللحظات:) حتى لو على ذنوبى
عارفاه احساس تذكر الموت لما بيتملكنى دموعى ما بتقفش لحظة
أشكرك جدا على مشاركتك المتميزة
وربنا يكرمك على دعائك لى وربنا يتقبل ولك بالمثل ان شاء الله
نورتنى ويسعدنى دوام التواصل

ahmed_k يقول...

ما شاء الله عليكي يا موناليزا
فمدونتك من المدونات القلائل التي أحرص على إسترجاع ما قد فاتني من مواضيعها
وعجبني جدا الموضوعان السابقان حول الزياره وآدابها وآداب إستقبال الضيوف والتعامل معهم
فبارك الله فيكي
وأما موضوع اليوم ففعلا كل ما ذكرتي يعد من أصعب الأشياء على النفس
وكل نقطة منهم تستحق تعليق خاص
أما بخصوص سؤالك فإن أصعب إحساس واجهته أو قد يواجهه اي إنسان يلخصه قول الشاعر :


وظلم ذوي القربى أشد مضاضة
على المرئ من وقع الحسام المهند

تقبلي خالص تحياتي

*الطالبة عفو الله *زوزو يقول...

تسلم ايدك يا مونالزتي

كل الواقف لي ذكرتيها مواقف صعب اوي بجد

بس لي حسيتها اوي هي

عندما تكره طيبتك لانها بالنسبة للاغلبية غباء و سذاجة بجد الاحساس دة بحسه من اقرب الناس لي احساس صعب اوي

بقينا عايشين في زمن انقلبت فيه الموازين سبحان الله

بقت الطيبة غباء

الله المستعان

تحياتي حبيبتي

r يقول...

الكلام دا صعب اوى
يعنى اكيد اشياء منها حدثت وبتحدث
ولكننا ايضا مملؤن بالعيوب

يمكن اصعب احساس انك وحيده وسط جمع من الناس لسبب انهم لا يفهون احتياجاتك
او تفكيرك وانتى بالنسبه لهم غريبه
للشعور دا بيضايقنى جدا

دمتى بكل الخير دايما

طوبه فضه وطوبه دهب يقول...

عندما تكره طيبتك لانها بالنسبه للاخرين سذاجه والاصعب ان تصدق الكاذب وانت له صادق بتتوجع اوى لما تعرف انك كنت صادق اوى وهو كان كداب اوى تسلم ايدك

salma mohamed يقول...

:((((
حسيت بكل كلمة كتبتيها أظن كل حد بيملك قلب حقيقي في زماننا ده مر بكل ده وزيادة :(
الحمد لله احاسييييس كتير اوي صعبة ومواقف اصعب والله ساعات لما اقعد مع نفسي واتخيل اني مش صاحبة الاحاسيس والمواقف الصعبة اللي انا حاسة بيها ببقى هاعيط عليه :)
بس لما افتكر ان الشوكة يشاكها المؤمن بأجر بتهون عليا كتير من احاسيسي دي والله المستعان يهون على صاحب كل كرب.

موناليزا يقول...

أحمد-ك
ـــــــــ
أهلا بيك أستاذ أحمد
وهذا من دواعى سرورنا
ربنا يكرمك واشكرك جدا لرايك
ومشاركتك فى محلها فعلا
نورتنى ويسعدنى دوام التواصل



---------------------------------


الطالبة عفو الله
ـــــــــــــــ
أهلا اهلا بالقمر
أشكرك جدا لرايك ولمشاركتك
وفعلا شعور موجع بحق
نورتينى زوزو الجميلة واسعدنى تواجدك



----------------------------------



بسنت
ـــــــ
أهلا اهلا بالقمر
وما اقساه شعور الاغتراب
نورتينى بسنت الجميلة واشكرك جدا لمشاركتك



---------------------------------



طوبة فضة وطوبة دهب
ــــــــــــــــــ
أهلا اهلا بالقمر
تعرفى يا كتكوتة فى الموقف ده اجعلى عزائك أنه "من أكبر الخيانة أن يحدث الرجل أخاه وهو له كاذب والآخر له مصدق"
نورتينى ياجميلة واسعدنى تواجدك



*********************************



سلمى محمد
ـــــــــ
أهلا اهلا بالقمر
تعليق مميز من صاحبة القلم الصادق
نورتينى سلومتى الجميلة واسعدنى تواجدك

Unknown يقول...

جزاك الله خيرا على هذا الحشد من المشاعر والأحاسيس الذي جعل -حسبما أعتقد- كل قارئ يجد إحساسه الخاص بينها.. فطالما نحن بشر ومحاطين بالبشر لن تخلو حياتنا يوما من أحد هذه الأحاسيس..

وإجابتي عن سؤالك ستجديها في البوست التالي:http://magidalkady.blogspot.com/2010/02/3_16.html

أدعوك لزيارته -إن شئتِ-..

دمتِ سالمة.

موناليزا يقول...

ماجد القاضى
ــــــــــ
أهلا بيك أستاذ ماجد
ربنا يكرمك واشكرك جدا على مشاركتك وسأتابع إجابتك حالا
يسعدنى دوام التواصل

mahmoued abdulsattar bayomi يقول...

ما اجمل مدونتك محمود من الرياض

موناليزا يقول...

القاهرة الجديدة
ــــــــــــــــ
أهلا بيك أستاذ محمود فى زيارتك الاولى
أشكرك جدا لرأيك
نورت مدونتى ويسعدنى دوام التواصل

نسيبه يقول...

السلام عليكم ورحمة الله وبركاته
يااااااه أصعب إحساس هو كل ما قولتيه ومعاه إحساسي الحالي بإني مش أنا مش لقياني
أصبحت إنسانه لاأعرفها والسبب محاولة إرضاء الآخرين ما قدرتش أحتفظ بهويتي
ما تعرفيش أرجع إزاي؟

موناليزا يقول...

نسيبة
ــــــــ
وعليكم السلام ورحمة الله وبركاته
أهلا اهلا بالقمر
فيه مقولة بتقول أفشل الناس من حاول إرضاء جميع الناس
افعلى دائما ما يرضى الله فقط ولا تبالى بأى شئ بعدها ولا تخشى فى الحق لومة لائم

اللهم فك كرب المكروبين وفرج هم المهمومين

نورتينى حبيبتى واسعدنى تواجدك