الأربعاء، 21 يوليو 2010

بائع الأدوية

وصف لى طبيب الأسنان نوعاً معيناً من المضمضة وأكد علىَّ بألا أشترى نوع آخر بديل.
الصيدلية الأولى: أحضر لى زجاجة تشبة زجاجة الشامبو وكتب عليها ما كتبه لى الطبيب فى الروشتة عن طريقة الإستعمال وحينما نظرت إلى الاسم المكتوب على الزجاجة والاسم المكتوب فى الروشتة وجدت إختلاف شاسع بينهما وحينما سألته أخبرنى بأن هذا نوع بديل ولكنه يفى بالغرض. فأخبرته بأن الطبيب أكد علىَّ بألا أستخدم نوع بديل فقال لى بشئ من الغضب الصامت: أكيد بس هو عايز ينفع الشركة المصنعة للدواء ده وبعدين أنا طبيب صيدلى ومش هضرك ده غير أن النوع ده مش موجود فى السوق.
فأنهيت الحوار قائلة: سأسأل عنه فى مكان آخر .
الصيدلية الثانية: أعطيت للبائع الروشتة فذهب بها إلى جهاز الكمبيوتر ليبحث عن اسم الدواء المطلوب ثم عاد وأخبرنى بأن هذا النوع غير موجود.
الصيدلية الثالثة: بحث قليلاً فى القسم الخاص بمثل هذه النوعية من الدواء ثم أخبرنى بأن هذا النوع غير موجود لديه ولكنه يوجد فى صيدلية (...) ووصف لى عنوانها.
الصيدلية الرابعة: أحضر الدواء المطلوب فألقيت نظرة عليه لأتأكد من صحة الاسم وتطابقه مع النوع المطلوب وفعلا وجدته صحيح فنظر لى البائع نظرة نارية قائلاً: أنتِ بتقرأى إيه؟.
قلت بحسن نية: بتأكد من صحة اسم الدواء.
فأعاد نفس السؤال وكانت إجابتى واحدة لم تتغير - توقعت عنده مشكلة فى السمع - إتضح انه كان سؤال إستنكارى لأنه بعدها قال بانفعال: أنا طبيب صيدلى من أكثر من عشرين سنة وعارف شغلى كويس ومش هضحك عليكِ لو مش موجود كنت قلت لك أنه مش موجود.
أخبرته بشئ من الحدة بأن تأكدى من الاسم لا يسئ إليك ولن يضيرك فى شئ طالما أن الدواء متطابق مع ما أريد.
وأخذت الدواء المطلوب أخيراً وانصرفت.
وبداخلى تعليقات عديدة على كل موقف حدث لى.
فى الصيدلية الأولى: أولاً / أحمد الله كثيراً على نعمة قدرتى على القراءة فبها استطعت أن أميز نوع الدواء البديل.
يعنى لو شخص أمى كان خده عادى جداً ما هو طبعا الطبيب الصيدلى رجل كبير والمفروض أنه أهلاً للثقة.
( يمكن يكون الموقف بسيط بالنسبة لدواء مضمضة لكن أنا هنا أتحدث عن المبدأ).
ثانياً / أين أمانة البيع.. المفروض أيها الطبيب الصيدلى أن تخبر المشترى بأن النوع الذى يريده غير موجود وبأن هذا نوع بديل وعلى الزبون وحده أن يقرر.. لا أن تفرضه عليه وتتعامل معه على اعتبار أن أى شئ ستأتى له به يعتبر أمر مسلم به كما كنت تريد أن تفعل معى!!.
فى الصيدلية الثانية: رغم كونك شاب وغير صيدلى ولكنى أحييك على أمانتك وعلى معاملتك المهذبة للزبون.
فى الصيدلية الثالثة: رغم كونك شاب وطبيب صيدلى فأنا أحييك على أمانتك فى البيع وبشكرك على مساعدتك لى فى وصف عنوان الصيدلية المتوفر فيها الدواء المطلوب.
الصيدلية الرابعة: لاتجعل خبرتك الطويلة فى هذا المجال تكون سبباً فى غرورك وتعاليك على الزبون لأنه تعامل مع غيرك ووجد أن ثقته كانت فى غير محلها .


سؤال جانبى:
ــــــــــــــــــــــ
أذكر موقف مشابه.

هناك 29 تعليقًا:

أنا - الريس يقول...

أولا احي الناس المحترمة التي لم تغرها خبرتها واتصفت بالأمانة .. وربنا يهدي اللآخرين .

ثانيا الموقف ذكرته تقريبا قبل دا ابويا رايح لدكتور وابويا مهندس زراعي بس بيحب يلبس جلبيا بلدي وكان واخد معاه كتاب شعر .. فالدكتور بص له وبص للكتاب وقاله انت بتحب الأدب ابويا رد وقال اه قاله يااااااااه علي ايام زمان .
المهم أبويا دخل له ابويا بيطلع روشتات 2 دكتره رحلهم .. صرخ الدكتور وقال لا متورنيش دوا حد ، ابويا قاله امال عملي فيها أديب وراجل بتاع احساس . انا بطلعهم عشان لو هتكتب نفس الدوا اللي كتبوه يبقي بلاش عشان مجبش نتيجة .

بالنسبة للسؤال إنتي لو دورتي علي النت مكنتش هتسألي لكن اعمل ايه بقي .. يلا امري لله خلتني ابحث كدا
اجزاخانة
اصلها تركى دي: كلمة (((أجزاخانة))) عبارة عن شقين -أجزا: و معناها [دواء] - خانة: و معناها [محل]

صيدلية مش عارف سبب التسمية لذا هتحجج إن الأسماء لا تعلل

يلا باي

مجداوية يقول...


السلام عليكم
المواقف الأربعة تدل أن الخير ما زال موجودا وهذا مطمئن
وسلامتك ألف سلامة
أندهش لسؤالك عن أى معلومة يا موناليزا !!!
فعمنا جوجل فيه كل شىء ولكن الجميل أنك تثيري أسئلة تجعلنا نبحث ونتعلم
إجابة السؤال الذي سألتيه في هذا المنتدى على هذا الرابط


http://www.al-maqha.com/t8850.html


أحمد يقول...

جميلٌ أن يتعلم الإنسان من كل ما يمر به في حياته. فمثل هذه المواقف يخرج الإنسان منها ببعض العبر والدروس.
لا يحضرني موقف مشابه.

جميلٌ ما كتبتِ.

مذكرات زوجة يقول...

اتصلت بالصيدلية وطلبت من الدكتور دواء لادرار اللبن لما كانت بنتى بيبى بترضع ... يعنى عايزة حاجة تزود اللبن عشان كان قليل

أرسل لى دواء ... فتحت الروشتة لأقرأها ... دى عادة عندى من زمان ... وكمان بطلع مكونات الدوا على الانترنت وأعرف تأثيرها علىا لجسم بالظبط

فوجئت انه دواء مخصص للستات اللى بيفضل عندهم لبن حتى بعد الفطام

تخيلى الكارثة ... الدوا بينشف اللبن مش بيزوده

نزلت الصيدلية بنفسى من شدة غيظى وبهدلت الدكتور

بس آدى الموقف اللى حصل لى

Mona يقول...

متعديش مش حأوجع دماغك بس هى بتحصل مع جوزى مش معايا لانه نظره ضعيف لا يستطيع القراءة بسهولة من غير النظارة بس لما بيرجع البيت براجع كل الأدوية ساعات الدوز بيبقى مختلف يعنى يبقى كاتب لك 250 يدوكى 500 بس الحمدلله دلوقت بنتعامل مع صيدلى كويس ذو ثقة - تحياتى

Mahmoud Ahmed يقول...

مضمضه ؟
الموضوع زي ما قالك الراجل في اول صيدليه ... الدكتور هياخد عموله في البيع ^__^

مندوب المبيعات هيعدي على الصيدليات قبل ما يروح للدكتور ، و يسألهم عن نوع الدوا ، فيقلولوا لا تمام و بيبع ، يروح للدكتور يجبله هديه بقي

و لكي ان تتخيلي انواع مختلفه من الهدايا من عينات ادويه و دفاتر للروشتات الى اجهزه طبيه و رحلات للمصايف بأسعار قليله جدا جدا جدا او مجانيه كمان و غيرها كتييير

مــــش ضد ابدا انك لازم تجيبي الى في الروشته ، و خصوصا لما الانسان يكون عيان جدا و الدكتور كاتببله ادويه معنيه
لازم يجبها بالإسم عشان احيانا فيه حاجات بتشغل ادويه تانيه
^__^

بس عجبني قوي موقف دكتور الأسنان هههههههه فكرني بيا هههههههههههههههه

SHAPE YOUR LIFE (ABOALI) يقول...

جميل الموقف ده

اولا
الصيدلية الاولى
الاصل ان يتصل بالدكتور المعالج ويوضح له انه لا يتوفر عنده الدواء وسيصرف كذا والطبيب المعالج يحدد

لاءن المريض هو امانة بين الطبيب والصيدلى

الصيدلى الثانى
يعرف اهمية التكنولوجيا
وهو من الاساس ليس مالك الصيدلية
لان مالك الصيدلية سيعرض عليكى بدائل ويتصل بالطبيب

الصيدلى الثالث
اخر انتخة وروقان وعقله بيقول
ماجتش على مضمضه بتلاته جنية

الصيدلى الرابع
عنده حق
لان المريض ثقافته الطبية تكون مضرة شوية
ساعات المريض يقرء مش الاسم يقرء كمان الاثار الجانبية للدوا قبل قراية هو عنده ايه
ويسبب قلق للدكتور والصيدلى على حسب بقى ثبات نفسية المريض

الخلاصة يا سيدتى

المريض امانة بين الدكتور والمريض
ولما تتعرضى لموقف زاى ده
قولى للصيدلى ان كان الدوا مش موجود
اتصل بالدكتور علشان تعرف منه البديل


نملة مرة سئلت انسان
تقدر تمسك الميا فى ايدك مثل الحجر
فقال لها نملة هزوء فعلا ما بتفهمش
قال ليها طبعا
اضع الميا فى الفريزر تتلج وامسكها مكعبات
فقالت له
مادام انت بتفهم كده وبيقوله عليك انسان
تبقى تقدر تتحكم فى الفاظك وغضب وتمسك لسانك وقت لما تكون غضبان
جرى وارها
مسكها بيده قالها شوفى اد ايه انتى صغيرة وافعسك وحقيرة
قالت
وكذلك الدنيا صغيرة وحقيرة روح اتشطر عليها
بدل ما هى شغلاك وحيران

ساب النملة وقال
يظهر انى كنت بحلم وقلقان


تقديرى

موناليزا يقول...

مستر بريزيدنت
ـــــــــــــــ
أهلا بيك
وأنا كمان أحييهم معك:)

ما اكثر هذه المواقف من الاطباء وكأن ذهاب المريض لطبيب قبلهم يعتبر نقطة سوداء يجب ان يمحى آثارها سريعا:)

أشكرك جدا لمشاركتك
وكنت أقصد ليه الناس أوقات بتكتب على المكان ده صيدلية واوقات تانية تكتب أجزاخانة:)

يسعدنا دوام التواصل



*********************************


مجداوية
ـــــــــ
وعليكم السلام ورحمة الله وبركاته
أهلا بيكِ
الموقف الثالث فقط والثانى مجازا هو من أعطانى هذا الشعور
الله يسلمك ياحبيبتى ماتحرمش منك:)

:) جوجل اوقات كتير بيكون محير بالنسبة لى ويدينى روابط ماترضاش تتفتح
بس انا هنا كنت اقصد ليه الدكاترة اوقات يكتبوا "صيدلية" واوقات يكتبوا "اجزاخانة" يعنى لو مفيش فرق مايوحدوا الاسم وخلاص:)

وأشكرك على الرابط ولو انه برضه مش راضى يفتح:)

نورتينى حبيبتى واسعدنى تواجدك



*********************************


سنفور
ـــــــــ
أهلا بيك
عندك حق
أشكرك جدا لتعليقك
يسعدنا دوام التواصل


*********************************


مذكرات زوجة
ــــــــــــ
أهلا بيكِ
يا خبر!!!
طب الحمدلله ان ربنا هداكِ انك تتأكدى من فائدة الدوا
وهو ده ياستى الأمانة اللى أنا بتكلم عنها
افرضى حد تانى مش عارف يقرأ أو واثق ان مش معقول طبيب صيدلى ويكتب له حاجة غلط

أشكرك جدا لمشاركتك
نورتِ مدونتى واسعدنى تواجدك



*********************************


منى
ــــــ
أهلا بيكِ
والغريب ان الصيدلى لو انتى راجعتى وراه يضايق ويفكر اننا بنفهم اكتر منه
ماهو لازم نراجع من كتر اللى بنشوفه

أشكرك جدا لمشاركتك
نورتينى ياجميلة واسعدنى تواجدك



*******************************


سبايدر مان
ــــــــــــ
أهلا بيك يادكتور
أيوة مضمضة:)
مقدرش اصدق الصيدلى لأن الدكتور أصلا مش من نفس بلدى
بس اللى انا عرفته ان الدوا ده تركيزه تقريبا اعلى ده غير انه نوع قديم
هو الصيدلى كان عايز يبيع وخلاص لان صيدليته قديمة ومحدش تقريبا بيدخلها
ولما نزلت فى وسط البلد عشان اجيبها تانى لما خلصت ..لقيتها متوفرة جدا على فكرة:)

أنا فعلا اعرف حكاية العينات المجانية دى وببقى مبسوطة لما اعرف ان الطبيب ممكن يعطى منها للمريض لما يلاقي حالته المادية لا تسمح

ده غير انى اعرف دكتورة فعلا بتعمل زى ما انت بتقول يبقى المريض مثلا عنده اى حاجة بسيطة حتى لو دور برد وتكتب له الروشتة وش وضهر:)

أول مرة اعرف حكاية الاجهزة الطبية ورحلات المصايف باسعار قليلة او مجانية
مش كان حد يقولى كنت دخلت طب:)

تعرف انى بجد كنت بظلم الدكتور لانه كل مرة مثلا ممكن يكتب مضاد حيوى ويأكد عليه وانا برضه مالاقيهوش واتضح انى بروح للصيدليات اللى مابتشتغلش وان اللى هو بيكتبه موجود عادى جدا:)

:) بس اهم حاجة تكون متأكد ان الدواء متوفر فى الاسواق:)
هو أنت تخصص إيه؟

أشكرك جدا لتعليقك
يسعدنا دوام التواصل


*******************************


أبو على
ــــــــــ
أهلا بيك يافندم بعد طول غياب
أولا: ومين اللى هيدفع تمن المكالمة:)
الصيدلية واضح ان حالتها المادية مش قد كده وانا دخلتها لانها صعبت عليا ورفوفها فاضية ومحدش بيدخلها:)

يافندم ده كان ناقص يقولى انتى ايه اللى خلاكى تقرأى الروشتة :)

الصيدلى الثانى: ورغم هذا احترمته كلمتين وبس وخلصنا:)

الصيدلى الثالث: لأ خالص ده كان مهتم جدا وجاب لى بديل بس قالى انه بديل ولما عرف انى عايزة النوع ده هو اللى قالى على الصيدلية اللى جبت منها

الصيدلية الرابعة:أنا معاك ان اوقات المريض بيتصرف تصرفات تضايق الصيدلى والموقف ده انا عانيت منه - كنت بشترى دوا ومستعجلة والصيدلية زحمة ولقيت ست كبيرة فاتحة كل علب الدوا وبتشوف الاثار الجانبية وبتسأل الصيدلى وهو ذوقياً بيرد عليها بس انا كنت متغاظة :) -
بس انا معملتش كده معاه انا مجرد بتأكد من الاسم.. وكان هاين عليه يقولى بدل بتشكى فيا خلاص مش هبيعلك حاجة:)

حلوة حكاية النملة رغم انى مش فاهمة ايه علاقتها بالموضوع وارجو التوضيح وعذرا لقصور ادراكى

أشكرك جدا لتعليقك
يسعدنا دوام التواصل

Mahmoud Ahmed يقول...

انا تخصص كله
انا دلوقتي يعتبر طبيب عاااام
بتاع كله يعني ^_^
لسه متخصصتش !!
لا انا مدلع الناس بتوعي على الاخر ، مش بكتب ادويه صعبه ، في الاول بس على ما نوصل للمصايف الى ببلاش ^_____^ هههههههههههه


هو انتي لو عايزه الدوا الى الدكتور بيكتبه اكييييييييد مليييييييون في الميه هتلاقيه في الصيدليه الى جنب الدكتور على طووول
اول صيدليه تقابلك على طووول هتلاقيه فيها

بيبقوا متفقين على فكره

ههههههههه
بطلع انا اسرار مهنه الطب بره
هههههههههههه

ذكرى رحيل قلم يقول...

السلام عليكم


عادي جدا وهو ده السائد بين الصيدليات ان تبدل الدواء يعني في صيدلية عندنا اطلقوا اهل المنطقة علي صاحبها الدكتور بديل والله انا كبرت وكنت بحسب اسمه كده لحد ما ماما فهمتني وقالت لي اصله بيبدل الدوا هومش موجود بس عندي بديل

في ناس بتقول وفعلا نشكرها علي امانتها وفي ناس مش بتصارح
وعل فكرة اغلبية الموجودين في الصيدليات مش دكاترة ولكن خبرة الممارسة

شكرا لصاحب الامانة
تحياتي من القلب

فارس عبدالفتاح يقول...

بصراحة مش فاكر بس انا متأكد انه حصل معي مثلك تماماً واكثر من مرة بس مش في الدواء كان في امور اخرى .. بس انا بقلب الصفحة بسرعة عشان كده مبفتكرش اي حاجة من المواضيع دي بعد ما تعدي .

ولكن هناك ملحوظة بسيطة الا وهي :


كلمة جاهل ليس معنها عدم المعرفة بالقراءة والكتابة ، انما معنها سوء الخلق .


اما عدم المعرفة بالقراءة والكتابة اسمها ( امية - فهو أمي - وهي امية ) .. ولهذا يقال على سيد الخلق صلى الله عليه وسلم النبي الأمي .


ولذلك سمي العصر الجاهلي بهذا الاسم ليس لعدم معرفتهم بالقراءة والكتابة ولكن لانتشار سوء الخلق والغلظة في المعاملة ..


فقد ثبت في الاثر :


انه حدث شجار يوماً ما بين أبو ذر وبلال بن رباح رضي الله عنهما فما كان من أبو ذر أنه قال لبلال ابن رباح " يا ابن السوداء " فحزن بلال رضي الله عنه .

كيف يعيره وقد أسلم والإسلام لا يفرق بين الناس فكلهم سواسية فما كان منه إلا أن ذهب للرحمة المسداه سيد الخلق عليه الصلاة والسلام .. يشكو له أبا ذر فنادى الحبيب أبو ذر فقال له " أعيرته بأمه !!


إنك امرئ فيك " جاهلية " ..

فاغتم أبو ذر وقال : والله أحببت أن تدق عنقي ولا أسمع ذلك الكلام ، فذهب في تواضع جم لبلال وقال له : هذا خدي أضعه على الأرض ضع قدمك عليه والله لا أرفعها حتى تضعها " فقال : بلال " والله ما كنت أضع قدمي على جبهة سجدت لله " ـ أو كما جاء في الحديث ـ فتعانقا وصفت النفوس بين ذلك الصحابيين الجليلين رضي الله عنهم .

حـــــ الــجــنــة ـــــور يقول...

سلام عليكم

موقف يواجه العديد منا وفيها عبر كثير

سلمت اناملك على البوست

بأمانة أسلوبك راقي دمتي بخير

(ست* جنى* الحسن) يقول...

سلامو عليكو..
الله يهدى الجميع
مفيش حد كامل الكمال لله وحده

لك تحياتى

جنّي يقول...

السلام عليكم

لو عملت احصائية فستجدين الصنف الاول والأخير هما الأوسع انتشارا .. فالاخلاق والامانة اصبحتا عملة نادرة ..

♥ ♥ Amira Samy ♥ ♥ يقول...

حبيبتى جزاك الله خيراً على
النصائح و يارب
تكون فى ميزان حسناتك

تحياتى لك حبيبتى

salwa يقول...

لسلام عليكم اخت موناليزا
للاسف اصبحت الامانة عملة نادرة
و كذلك حسن التعامل مع الناس
تسلم يدك
و جمعتك مباركة
سلام

حمـــــــــــــــــــــة يقول...

السلام عليكم ورحمة الله وبركاته
ما يحدث حول موضوع الأدوية منتظرا ما دامنا لا ننتج ما نحتاجه بأنفسنا مائة بالمائة .
في الحقيقة نحن عرضة للإبتزاز من طرف المصنعين "الكبار" و لعل ما فعلته الهند خير دليلا حين أنتجت دواءا لشعبها دون شراء ترخيصا أو إستشارة أحدا...أحدث الموضوع بلبلة عالمية و هنا كان هذا الموقف الشجاع سببا في بعض التنازل حيث صنفت الأدوية الى قسمان:
واحد: أدوية قديمة و بالتالي مجربة و معروفة بإمكان الجميع إنتاجها وفق شروط ميسرة
إثنان : أدوية جديدة وبالتالي محمية
هنا دول العالم الثالث عليها شراء مستلزماتها من الادوية وفق عطاءات معينة في القيمة المالية والمدة الزمنية
هنا يطرح مشكل "الخزن" لفترة ما ضمانا للصحة العامة و هي مكلفة جدا
أما أكبر مشكل و هو : حين ينتهي العطاء الأول و يأتي الثاني بعنوان مختلفا و سعرا أقل من الأول " مع ضمان الجودة المطلوبة" يجب التنسيق بين الأطباء و الصيادلة حتى يعرف الطبيب ما هو متوفرا بالسوق و يضمن معافاة حريفه
هنا تقصيرا واضحا من الجميع
تصوري كم من عنوان يجب الإطلاع عليها
و تبقى أخلاق العباد أحسن دواء مبدئي ثم يأتي الدواء
-----------
لعل كل مرة أزور فيها الطبيب
لا بد من مكالمة الصيدلي عن الدواء الفلاني موجودا أم لا؟
ثم ما يعوضه ؟ و..و....و
في النهاية لا بد من ذلك 

ليس فقيرا من يحب يقول...

انتى عسل اوى يا موناليزا ودايما

بتفكرى فى اى موقف يعدى عليكى

ومش بتخليه يمر مرور الكرام

انا مش باعمل كده ابدا ماشيه بالبركه كده وخلاص

وطبعا زى الدكاترة والصيدلين زى كل الناس

فيهم الهادىء الصبور حسن المعامله

وفيهم وفيهم الفظ او المستهتر او او

طبعا دا مش غرور من الدكتور دا

أنزحه منو وما اكثر الناس اللى بتتأنزح على مخاليق ربنا

مش فاكرة بجد موقف مشابه

اخبارك ايه يا حبيبتى يارب تكونى بالف خير

وحشاااااااااانى اوى

غير معرف يقول...

كل ما طرحتِ هنا يفرض علينا أن نلتزم بمعايير كثيرة أثناء البيع تحفظ حقوقنا ومنها الحرص على الفاتورة وهي ثقافة تحفظ للبائع وللمشترى وللوطنحقه في أمور كثيرة ومن بالطبع الضرائب لصالح الدولة

الأمر الآخر : لا أعرف كيف كنت تفحصي الاسم لكن ربما كان عليكِ أن تفحصي الاسم بدون أن تلفتي نظره لأن التشكيك وقعه على النفس غير لطيف
يعني أنت تعلمي اسم الدواء مسبقاً وأنت تستلمي الدواء كنت المحي الاسم سريعاً وأنت تضعيه في الكيس

مصطفى يقول...

المشكل أن الدواء في مصر أصبح تجارة بنسبة مائة في المائة..

الصيدلي كما هو واقف في محل..لو سمحت انا عاوز كذا..أخده وأحاسب وخلصت !!

الذي أعطاكِ دواء مختلف وقال لكِ هو نفس التأثير لكن الطبيب يتعامل مع شركة معين...ربما وبنسبة كبيرة يكون محقًا..بل إن بعض الأطباء يتفق مع الشركة المعينة على ترويج الدواء ويحصل على نسبة كذا..او مقابل كذا !!


بس أحسن حاجة إن الواحد يكون له زمايل دكاترة..بيسأل على الدوا من غير كشف ولايحزنون..


تحياتي.

د/على خميس يقول...

السلام عليكم و رحمة الله و بركاته
موضوعات حضرتك زى العادة مميزة
أنا هتكلم بصفتى صيدلى..
الموضوع بينقسم فى رأيى لشقين .. ثقافة و ثقة
بعض الناس لو كان عنده بعض ثقافة فى موضوع معين بيعتبر نفسه خبير و يعدل على الخبراء اللى بجد و للأسف إن بعض الخبراء اللى بيكونوا غير أمناء أو خبراء بالأسم فقط و علمهم ضحل بيضطروا الناس انها لا تثق فى بعضها.. المريض لا يثق فى أى طبيب و أى صيدلى مثلا لما يتعامل مع واحد كان فاكر انه أهل علم و ثقة ويطلع غير كده

د/على خميس يقول...

تكملة ..
نيجى لموضوع الدواء ..
الأول كلام علمى بعد إذنك:
فى كل دواء مادة فعالة و هى المادة التى تعطى التأثير المرغوب فيه من حق أى ( صيدلى ) شرعا و قانونا و مهنيا إنه يبدل بين الدواء مادام يحتوى علفى نفس المادة الفعالة بنفس التركيز أو بتركيز آخر مع تعديل جرعات الدواء للمريض
طب لو المادة الفعالة مختلفة لكن التأثير واحد هنا ينقسم الوضع لنوعين ...مواد فعالة يمكن للصيدلى وصفها بدون روشتة أساسا و هذه له تبديلها أما الأدوية التى لا يحق له وصفها ابتداءا فهذا لا يحق له تبديلها حتى لو بتعطى نفس التأثير من وجهة نظره إلا بعد الإتصال بالطبيب ..
و بالطبع فلا يحق للصيدلى صرف دواء مكان دواء لا يعطى نفس تأثيره بأى حال من الأحوال ..

د/على خميس يقول...

تكملة ..
المشكلة إن كثير من الصيادلة يسلمون صيدلياتهم لغير الصيادلة و يعطوهم صلاحيات الصيدلى مما أفقد الصيدلى الثقة من الناس و البعض الآخر غشاش همه كله فى الربح بغض النظر عن مصلحة المريض و هذا أيضا أفقد الصيدلى الثقة من الناس و البعض الآخر غير مهتم بالعلم يعنى شغال بالفهلوة و لا نبخس حق الأمناء من الصيادلة و أصحاب العلم حقهم فهم أيضا كثير
بالنسبة للصيدلى الأول فإن كانت المضمضة لها نفس المادة الفعالة فهذا لا يعتبر خيانة للأمانة و لكنه حقه بعد دراسة 5 سنوات فى كلية من كليات القمة ألا يعتبر نفسه بائعا للأدوية فقط

د/على خميس يقول...

تكملة ..و الثانى و الثالث آثروا السلامة أو هم لا يعلمون عن المواد الفعالة أو أن هذه المضمضة فعلا ليس لها بديل و فى هذه الحالة يكون الصيدلى الأول مخطئا و متجنيا بوصفه دواء فى غير محله ..
أما الصيدلى الثالث و إن كنت ألومه على قله صبره و بالطبع الصبر أقرب إلى الله و ثكن قد أجد له بعض العذر و خاصة إن كان يرى فى نفسه الأمانة و العلم و يرى من الناس التخوين و إن كانوا بلا علم ...
جزاك الله خيرا و آسف للإطالة
بارك الله فيك
اللهم بلغنا رمضان

مجداوية يقول...


السلام عليكم
غيري المتصفح بمتصفح جوجل
والصفحات إن شاء الله كلها حتفتح
بس اللي عرفته من المنتدى إن الصيدلي معناه العطار والإجزخانة معناها بيت الدواء وهي كلمة فارسية
فيمكن الدكاترة عارفة المعلومة دي ومش عايزة يتكتب على اليافطة إنهم عطارين أو شايفين إن الكلمة التانية بتدل على المعنى أكتر وممكن نسأل برضه فزوج أختي صيدلي وعندة إجزخانة
:)

موناليزا يقول...

سبايدر مان
ـــــــــــــ
أشكرك جدا لمتابعتك
وشد حيلك يادكتور عشان تفتح عيادة متخصصة وتروح المصيف ببلاش

وفعلا نصيحة غالية نشكرك عليها

يسعدنا دوام التواصل



**********************************


ذكرى رحيل قلم
ـــــــــــــــــ
وعليكم السلا ورحمة الله وبركاته
أهلا بيكِ
:) حلوة حكاية الدكتور بديل ده

ده حقيقى لان غالبية اللى بيتخرجوا دلؤتى بيبعوا اسمهم عشان يتحط على صيدلية بس ..واللى بيبقى مسئول عن الصيدلية لا يمت للصيدلة بصلة

ونشكر صاحب الامانة جمعاء:)

نورتينى حبيبتى واسعدنى تواجدك



********************************


فارس عبد الفتاح
ـــــــــــــــــ
أهلا بيك أستاذ فارس
أحسن حاجة على فكرة وعشان كده اول ماجيت كتبت عن الموقف على طول قبل ماانساه:)

أشكرك جدا على ملحوظتك الغالية وقد تم التصحيح

يسعدنا دوام التواصل



**********************************


حور الجنة
ـــــــــــ
وعليكم السلام ورحمة الله وبركاته
أهلا بيكِ فى زيارتك الاولى
أشكرك جدا لرأيك ولتعليقك
نورتِ مدونتى ويسعدنى دوام التواصل



*********************************


ست الحسن
ــــــــــ
وعليكم السلام ورحمة الله وبركاته
أهلا بيكِ
عندك حق
أشكرك جدا لتعليقك
نورتينى واسعدنى تواجدك



**********************************


جنى
ـــــــ
وعليكم السلام ورحمة الله وبركاته
أهلا بيك أستاذ سعيد
وهذا للأسف:(
أشكرك جدا لتعليقك
يسعدنا دوام التواصل



********************************


سلسبيل
ـــــــــ
أهلا بيكِ
ربنا يكرمك وأشكرك جدا على تعليقك
نورتينى حبيبتى واسعدنى تواجدك



*********************************


سلوى
ـــــــ
وعليكم السلام ورحمة الله وبركاته
أهلا بيكِ
فعلا وهذا للأسف
نورتينى حبيبتى واسعدنى تواجدك



********************************

موناليزا يقول...

هاما
ـــــــ
وعليكم السلام ورحمة الله وبركاته
أهلا بيك
"و تبقى أخلاق العباد أحسن دواء مبدئي ثم يأتي الدواء"
ما اجملها من جملة

أشكرك جدا لتعليقك ولمشاركتك
يسعدنا دوام التواصل


**********************************


ليس فقيرا من يحب
ــــــــــــــ
أهلا بيكِ
:) وانتِ زى السكر

لازم نتعلم من اخطاء غيرنا عشان مانعملهاش

وفعلا كل واحد واخلاقه
أنا الحمدلله بخير ماتحرمش من سؤالك
وانتى كمان على فكرة وحشاانى جدا
نورتينى رونا الجميلة واسعدنى تواجدك



**********************************


أحمد شريف
ــــــــــ
أهلا بيك أستاذ أحمد
مش كل المحلات بتعمل فواتير وحتى الصيدليات لو ماكنتش صيدلية كبيرة يبقى مافيش فاتورة

ماهو انا لانى حافظة الاسم شكيت فى رقم واحد (أصل الدكتور قعد يحفظهولى وكتبهولى بالعربى كمان على ضهر الروشتة مؤكدا على ضرورته دون غيره):)
فبقيت ابص على الزجاجة المجلوبة وهذا آثار ضيقهم
الحاجة ماتتحطش فى الكيس غير وانا واثقة من صحتها

أشكرك جدا لتعليقك
يسعدنا دوام التواصل


*********************************


وحدى
ــــــــ
أهلا بيك ياباشمهندس
هو فعلا فيه ادوية بتبقى بديلة وبتحل محل الدواء المطلوب لكن الدواء اللى هو كان هيديهولى كان عبارة عن زجاجة تشبة زجاجة الشامبو ولانى خبرة فى انواع المضمضات المختلفة خدت بالى:)

ده حقيقى بس للاسف طبيب الاسنان ماينفعش كشفه يكون فى التليفون:)

أشكرك جدا لتعليقك
يسعدنا دوام التواصل


********************************


د. على خميس
ــــــــــــ
وعليكم السلام ورحمة الله وبركاته
أهلا بيك يادكتور
بداية: حقا انتظرت تعليقك على هذه التدوية بالذات حتى يكون شهد شاهد من أهلها:)

:) ربنا يكرمك واشكرك جدا لرايك فيما اكتب

عندك حق جدا المهم الثقة ولان حصلى الموقف الاول كان لازم اخد بالى فى الموقف الرابع:)
------
أحييك على كلامك العلمى جدا.. وأشكرك جدا للتوضيح
---------
فعلا اغلبية اللى بيقفوا فى الصيدليات يتعاملوا بحكم الممارسة لا بحكم الشهادة فممكن خريج الزراعة والتجارة وحتى التربية يتقالوا يادكتور طالما واقف فى صيدلية

بالنسبة للصيدلى الاول معرفتش اصدقه لسبب وهو ان الزجاجة كان شكلها غريب تشبة زجاجة الشامبو وليس اى زجاجة للمضمضة العادية.. وبعدين برضوا ده مايمنعش انه كان يقولى انها بديل.. ده شئ ما يقللش من شأنه
-------
الثالث قالى انها مش موجودة بس ممكن يجيب لى بديل يعنى اعطانى حرية الاختيار مافرضش حاجة عليا وده اللى انا اقصده

فعلا الرابع كان طبيب كبير فى السن واعتبرها اهانة لا تغتفر

ربنا يكرمك
وأشكرك جدا على تعليقك
يسعدنا دوام التواصل



**********************************


مجداوية
ــــــــ
وعليكم السلام ورحمة الله وبركاته
أهلا بيكِ
بحاول انزل فير فوكس بس النت بطئ
:)
بالعكس كلمة صيدلية منتشرة اكتر:)

تسلميلى حبيبتى وماتحرمش من متابعتك
نورتينى واسعدنى تواجدك

كلمات من نور يقول...

يا ربي 4 صيدليات علشان زجاجة دواء ؟؟؟

موقف مشابه : من حوالي سنة ابني الكبير حس ان شعره بدا يقع و زعل قوي بقى حيتصلع وراح لطبيب الجلدية اداه سبراي للشعر واقراص فيتامين : كلمت الصيدليه ونظرا لأن الطبيب بيطبع الدوا فكان سهل عليا اقرا الاسماء ...قوم إيه؟ الصيدلي بعت الدوا وتمام التمام واخد ابني الأدوية وبدا ياخدها وبعد يومين حس بتعب مفاجيء وكلم طبيب العائلة قاله بتاخد أدوية يا أحمد ؟ قاله باخد دوا فيتامين للشعر اسمه كذا...قاله نعم؟؟؟؟؟؟؟؟؟؟؟؟ داه دوا قلب يا أحمد !!!! تخيلي بقى الصيدلية الله يكرمهم بعتوا اسم دوا يكاد يكون شبيه له بس بتاع قلب وابني اخده يومين ...ستر ربنا انه دوا خفيف مش من الأدوية اللي كان ممكن تؤذي القلب ...طبعا أنا كلمت الصيدلية طلبت المدير واتكلمت معاه بكل أدب قلتله ان ميصحش العمال ياخدوا المكالمات و هم اللي يجيبوا الأدوية بنفسهم من غير رجوع للدكتور وووووووو

الحمد لله قدر ولطف


ملحوظة يا موناليزتي بالنسبة للكمبيوتر مافيش أحلى من الجوجل كروم دلوقتي ...بتنزليه بعدما تنزلي الموزيلا فايرفوكس وحيعجبك قوي جدا خالص (:

موناليزا يقول...

كلمات من نور
ـــــــــــــــ
أهلا اهلا بالغالية
إتأخرتى عليا ليه.. مش عوايدك:)

:) اه تخيلى وكمان مضمضة يعنى حاجة بسيطة:)

يااااخبر.. معقول وصلت للدرجة دى
الحمدلله بجد
فيه ناس ممكن تطنش اى الم وتقول بكرة هبقى كويسة
الحمدلله ياحبيبتى ان ربنا نجاه


تسلميلى غاليتى
يعنى انزل الفير فوكس الاول وبعدين الجوجل كروم
انتى عارفة خبرتى مش قد كده:)
عموما هحاول بس النت بطئ أوى

ماتحرمش من تواجدك ابدا اللى بجد بيسعدنى جدا
نورتينى غاليتى