الأحد، 5 ديسمبر 2010

عِز زوجها باين عليها


مثلما أستطيع أن أتعرف على طباع الأمهات من خلال رؤيتى لأبنائهن- ومعرفة كيف يتعاملون مع من حولهم ومع أشيائهم الخاصة سواء بإهمال أو بنظام وعلى مدى أعمارهم لأن تأثير تربية الأم يمتد حتى الممات- أستطيع أيضاً التعرف على طباع الرجال من خلال رؤيتى لزوجاتهم. فالزوجة تعبر عن حياتها الزوجية ومعاملة زوجها لها من عِدة أشياء بسيطة. فكما أن السعادة لا نستطيع إخفائها كذلك التعاسة أيضاً.
ومن أبسط حقوق الزوجة الذى يغفل عنها كثير من الأزواج حق النفقة .. فالغالبية تقول " ماهى بتاكل وبتشرب وبتنام عايزة إيه تانى.. وهى يعنى محتاجة الفلوس فى إيه.. مااللى هى بتطلبه أنا بجيبه".
ولا يضعوا فى اعتبارهم أنها محتاجة مصروف شخصى يكون لها وحدها لتأتى بمتطلباتها الخاصة كيفما تريد دون وجود رقيب عليها يعد أنفاسها ويرصد تحركاتها ويشعرها كم هى تافهة ولا تحسن التصرف.
متناسى أنها أكيد ناضجة كفاية للتعامل مع الأموال دون طلب استشارة خاصة وإلا ما كنت تزوجتها وأنت تعلم بعدم اكتمال نضجها العقلى الذى يجعلها لا تعرف جيداً كيف تتصرف فى مختلف المواقف.
من حقها تضع فى حقيبة يدها مبلغ من المال الإضافى حين الخروج وحدها تحسباً لأى ظرف مفاجئ تمر به.
من حقها تشترى هدية ليك من غير ما أنت تعرف هى هتجيب إيه ومنين وبكام.
من حقها تشترى لأولادها حلويات من غير ما تطلب منك.. وأنت يا تجيب يا ماتجيبش.
من حقها تشعر بأن ليها مال خاص لها مطلق الحرية فى التصرف فيه حتى لو هتدخره.
من حقها تشترى هدية لصديقتها من غير تحقيق وتقديم طلب بأن صديقتها كانت مجاملاها كتير قبل ما تتزوج سيادتك.
من حقها تتصدق وتشعر بمتعة العطاء بدون وعد منك بأنك هتبقى تتصدق بالنيابة عنها بس بعدين.
من حقها تشترى شامبو وكريمات وغيرها من مستحضرات التجميل من غير ما تديها محاضرة عن ضرورة الاستغناء عن مثل هذه التفاهات .. اللى فى الغالب بتشتريهم عشان تبقى حلوة فى عينيك.
وغيرها كثير من الأمثلة.

فالزوج الذكى هو من يعلم بأن زوجته هى مرآة لتصرفاته معها وهى من تحدد مدى طبيعة الزوج فى كل شئ وهل إذا كان يغير على حرمة بيته ولا يسمح لها بأن ترتدى ماهو لايصف ولا يشف ومدى سخائه معها عن طريق عدم حرمانها من أى شئ وخاصة إذا كان الجميع يعلم بأنه مقتدر مالياً وغيرها من طباعه المختلفة.
ولذلك نصيحة للرجال:
قبل أن تقدم على الزواج عليك باختيار التى تستطيع أن تحقق لها ماكانت متعودة عليه فى بيت أهلها أو أفضل منه حتى لا تتهمها فيما بعد بأنها مش عارفة تعيش معاك. أو تكون واضحاً وصريحاً معها منذ البداية- مش تفرش لها الأرض ورد ولما توافق عليك تلاقي الورد اتحول لحصير-
ونصيحة للأزواج:
حذار من أن تكون مقتدر مالياً وتبخل فى الانفاق على زوجتك.



سؤال جانبى:
ــــــــــــــــــــــــ
* ياترى كم مرة شوفت واحدة عز زوجها باين عليها؟.

هناك 28 تعليقًا:

Dr Ibrahim يقول...

هو المفروض الزوجة يكون ليها مال تنفق منه غير مصروف البيت..
وفعلا موضوع التوافق الإجتماعى دا مهم جدا بس مش كله بيبقى متوافق اجتماعيا..
ولذلك بستنكر اللى يعمل لخطيبته انه مفيش باعده والاخر يطلع على فشوش..فالمفروض يكون فيه صراحة عشان اللى اوله شرط اخره نور.

بس انا برجع سبب ان الزوج مبيعطيش لزوجته مال خاص بيها ان الحالة فى جميع المنازل على قد مصروف البيت والعيال والمدارس والجامعة...وكله بيضحى عشان السفينة تسير..بس مش معنى كده ان الزوجة تسيب نفسها خالص من غير اهتمام..يجب ان يكون الاهتمام موجود ولو القليل منه ليشعر كلا الطرفين بالاهتمام ببعضهما الآخر..

انا شوفت كتير زوجات عز زوجها باين عليها..
وفيه زوجات كتير شوفت عكس ذلك بس عايشين فى رضا..
وعلى فكرة حتة ان الست يبقى باين عليها العز قوى لما تروح اماكن عامة بتخلق نوع من الحقد والمشاكل فى الاسر اللى مستواها قليل شوية.. لان فيه ستات بتعملها منظرة يعنى..

بس دا مش ينفى ان يكون هناك اهتمام شوية.

شكرا لكم على طرح هذا الموضوع المهم

حمـــــــــــــــــــــة يقول...

سيدتي
حددتي الموضوع في "المال" كمصروف خاص لها
و هذا شائعا كثيرا
متفقا مع سيادتك
و لكن
أريد أن اسأل :
- ما رأيك في حالة تبذيرها ؟
شراءات أكسسورات و البيت في حاجة الى ما هو اهم ...........
- ماذا كانت هي تعمل و هو بطال
هل تعطيه مصروفه ؟ فرضية يعني
العلاقة الطيبة تتمتن بالبرمجة تالواضحة حسب المدخول أي كان و الحوار الهادف كفبلا ببرمجة كل نواحي الحياة بينهما
ثم تأتي مرحلة التنفيذ
الحياة الزوجية تعاون و تضحية في الوضوح
أما إذا دب الشك فالوداع للسعادة و ما تبعها .............
نقطة اخيرة لا بل نصيحة لله
أبتعدوا عن التعميم
أنتبهوا للفهم الخاطئ للحرية
راعوا الخصوصيات
تنبهوا للغيرة و ما تسببه خصوصا لدى النساء
مجرد راي شخصي نابع من واقع معاش

سواح في ملك الله- يقول...

كلام مظبوط جدا
طبعا من حقها كل ده
واجابة السؤال
ماذاتقصدين بعز جوزها
وكيف اراه وسيبك من الدهب والمظاهر
دي مش دلالة علي السعادة
تحيتي ليكي

موناليزا يقول...

د/ ابراهيم
ـــــــــــــ
أهلا بيك يادكتور
زى ماحضرتك قلت يافندم القليل من المال للزوجة لن يضر فالزوجة العاقلة تستطيع تدبير امورها بأقل القليل المهم يبان ان فيه اهتمام بيها

أشكرك جدا لمشاركتك
يسعدنا دوام التواصل



***************************


حمة
ــــــ
أهلا بيك يافندم
مع احترامى لسؤالك ولكن هذا ليس لب الموضوع فحتى لانخرج عن ما اردت قوله فانا اتحدث عن الزوجة الطبيعية التى تستطيع تدبير وتوفير احتياجاتها بأقل امكانيات
سؤالك الثانى عن اعطائها مصروفه ان كانت هى تعمل وهو لأ يرجع هذا لاخلاقها وذوقها معاه لانها بصراحة مش ملزمة تصرف عليه

نصيحتك على دماغى يافندم ولكنى لم اقصد مطلقاً البهرجة أو اى فعل مبالغ فيه يتطلب لفت أنظار النساء لها
كل ما طلبته أن الزوجة حين خروجها من بيتها بمفردها يكون على الاقل معاها حق المواصلات التى تغنيها عن سؤال اللئيم وبهدلة الميكروباصات

أشكرك جدا لمشاركتك
يسعدنا دوام التواصل



***************************

سواح فى ملك الله
ــــــــــــــ
أهلا بيك يافندم
أقصد ببساطة أنك لما تشوفها خارجة مع ابنها فى الشارع وعدى راجل بتاع غزل البنات وابنها شبط وعايز هتلاقيها تفتح شنطتها ببساطة وهى عارفة انها هتلاقى نص جنية تشترى لابنها طلبه من غير مايأثر على ثمن ركوبهم فى الميكروباص:)

ياترى قدرت اوضح مقصدى؟

أشكرك جدا لتعليقك
يسعدنا دوام التواصل

MR.PRESIDENT يقول...

معاكي حق .. بس الكلام ده لو كان اصلا الراتب يقضي اللي انتي بتقولي عليه .
انتي بتقولي كأن الشعب يا أمة الله عايش في نغنغة .
أنا والله معرفتش قد ايه العذاب إلا لما شفت ناس معايا في المدرسة لو 10 جنية ضاعت منهم ممكن تبقي مشكلة عشان في يوم مش هيكون فيه أكل يمكن .. لو عيل تعب يبوظ ميزانية الشهر ويخلي الأب يا يستلف يا يسرق .. يا يطلع عينة في شغلانة تانية .

هقولك معاكي حق .. لو الزوج مقتدر .

أما بالنسبة للسؤال ؟ فمعرفش حد .

salma mohamed يقول...

التوافق الاجتماعي مطلوب فعلا،بس احيانا تكون شخصية الطرف الاخر قابلة أن تعيش وتستطيع التأقلم مع مستوى أقل،لكن زي ما وضحتي يجب ان يكون في صراحة وقبول من الاول.
واما نقطة المال الخاص دي مهمة جدا فعلا،بس طبعا ده لو ظروف الاسرة المادية تسمح،لان مش معقول بردو تكون الاسره بتكافح وتتغاضى عن بعض الضروريات من اجل لقمة العيش،والست هانم :)تطالب بمصروف خاص!!
وطبعا ده ما يمنعش ان وقت ما ربنا يفكها عليه يفك عليها هي كمان :)
وفي كل الاحوال الاهتمام والعناية بالمظهر وبالنفس مش موقوف على المصروف الخاص.
جزاكِ الله خيرا يا موني على طرحك موضوع زي ده.

nour shahen يقول...

بالحاله اللي وصفتيها مش كتير
بس موجوده والله
بس بجد موضوع هايل ويحترم وفكره يا ريت تتطبق مش كتير بياخدو بالهم من النقطه دى

مهما عملنا شروط وحاولنا نتفاهم قبل الارتباط بتختلف الحكايه لما يبقو فى بيت واحد وكل انسان بيعلن عن حقيقته فعلا الا من رحم ربى
نتمنى والله ربنا يرزقنا كلنا بناس تفهمنا مش تتغير فيما بعد لأن العاقبه مش هتبقى علي واحد بس بل علي اسرة كامله
خالص تحياتى ليكى

Mohamed يقول...

عز زوجها !!..فلوسها!!..فلوسه!!..حياتها وحياته..ليه مش فلوس(هم) -حياتهم-عزهم..بستغرب جدا لما بسمع العبارات دي
الزواج مفروض مايكون ألا موده ورحمه بين الزوجين..ايثار من الطرفين لاسعاد الطرف الاخر ماديا ومعنويا وكل شيء ..فهم لا يملكون ألا بعضهم البعض ..ولأن السعادة دي حتعود علي الجميع بخير كتير جدا..المسكين الا مايفهم أن الحياة اقصر من أنك تعيشها في نكد
استعجب من الازواج الا يعامل زوجاتهم كأنها موظفه وهو مدير الشركه..كأنها كائن اقل منه..و الزوجات الي تفتكر أنهى عايشه مع عدوها..لازم تستنزفه ماديا و تدبحله القطه و الفرخه الي اخر هذه الافلام..والمساكين ما عارفين انهم فقط التعساء في القصه دي..لا أحد مهتم اصلا بحياتكم

كان عندي صديقين (ايمي و ديف)..اتزوجم صغار السن..قصتهم و طريقة كفاحهم مع بعض عاجبني جدا ..لما اتزوجم ماكنوش يمتلكوا الكثير..ديف اشتغل اشغال بسيطه لمدة 4 سنوت لحد ماايمي دخلت الجامعة و انتهت من برنامج حيجلب لهم مستو مادي عالي..اشتغلت ايمي..و ديف دخل الجامعة و درس مجال برده حيعلي من مستواهم الاجتماعي..مع استمراره في العمل بدوام جزئ..انتهم الاثنين..وحياتهم ماشية كويس فعلا ماديا و كل شيء ..القصه
(عزهم..سعادتهم..فلوسهم) ده رأي الشخصي معذره لو كان بعيد 3 مضمون التدوينه
كل التحيه والتقدير

Dr/ walaa salah يقول...

يا سلام يا موناليزا نصائح جميله والله

تعرفي اصعب حاجه الزوج اللي بيدقق على كل قرش بيديه لمراته

عشان كده انا بتفق معاكي ان لازم الست يكون ليها مصروف شخصي بيها

(ياترى كم مرة شوفت واحدة عز زوجها باين عليها؟.)


تعرفي حاولت ادور في زمايلي المتجوزين

بصراحه مش لاقيه ^-^


بس عشان اكون صريحه معاكي

ظروف الحياه صعبه اوي يا موناليزا خصوصا اللي عندها اطفال

يعني تلاقي الام تستخسر هى نفسها تجيب حاجه لنفسها وتقول ولادي اولى

يعني عشان بردوا منظلمش كل الرجاله ونقول انهم بخلاء على زوجاتهم

Sharm يقول...

انا كنت صريح جدا من البداية

Tota يقول...

الاخت العزيزة موناليزا بشكرك جداا ع موضوعك الجميل اللى بيخلى فى مجال للنقاش ... وموضوع من واقع الحياة وكلامك مظبوط فى اغلب الازواج اللى ما بيهتموش بالموضوع دا وكتيير جداا وبيحصل كمان خناقات عشان موضوع المصروف دا هو المفروض زوقيا من الراجل انه يعمل كدا ومن غير ما هيا تتكلم لكن الغالب انهم بيتجهالوا الموضوع دا ..... وانا شفت زوجات باين عليها عز زوجها بس قليل مش كتير ....لكن العكس بيحصل انا بشوف رجاله كويسة كتيرة بسبب زوجتها لما الست تبقى كويسة وطلبتها قليلة وتحسس الراجل بالرضا دا بيخلية كويس يعنى اللى عايزة اوصله فى النهاية ان مميزات الست بتظهر الراجل اكتر من ان مميزات الراجل هيا اللى تظهر ع الست

كلمات من نور يقول...

الحمدلله على سلامتك وتفاعلك من جديد في المدونة

جميل البوست وفعلا بيلمس مشكلة كبيرة في البيوت


أما السؤال فالحمدلله رايت كثيرات وداه يدل إن الحمدلله لسه الدنيا بخير والناس على دين وخلق يا موناليزتي الحبيبة

ويكا يقول...

معاكى ميه بالميه

عارفه
من كام اسبوع كده حصل بينى وبين والدى حوار (نقاش عم) ، وتطرقنا فيه للنقطه دى فقولتله :
"الست تقدر تستحمل اى غيب او نقص فى زوجها الا عيب واحد بيبقى اصعب العيوب فى التحمل ، هو البخل ، الست ممكن تتغاضى ان عيب من جوزها الا العيب ده ، بيرهقها ويتعبها نفسا جدا جدا"

دى فعلا وجهة نظرى

ممكن يكون فيه عيوب تانيه اصعب ، لكن انا اعلم مدى تأثير هذا العيب على النساء (مش تجارب شخصيه طبعاً ، لكن تدقيق فى المجتمع اللى حوالينا واحواله)

جميل البوست

فارس عبدالفتاح يقول...

هناك جانب وجيه ومنطقي في كلامك على إعطاء السعة للمرأة في تحركاتها الخاصة التي تحتاج فيها إلى المال بالقدر ‏المطلوب من غير تبزير أو تقتير ، ولكن هناك أمور فيها تعميم ومغالطات وتسطيح وخلط في طبائع العلاقة الإنسانية ‏والزوجية بين الأفراد على حسب مرجعياتهم الخاصة .. فمثال ذلك قولك : ‏

‏- ( أستطيع أيضاً التعرف على طباع الرجال من خلال رؤيتي لزوجاتهم) - ‏

هذا كلام غير دقيق فهم شخصان وليس بالحتمية ان يكونوا متماثلين في تصرفاتهم وأفكارهم ومعتقداتهم فالاختلاف هو ‏جوهر الخليقة ... ولكن لابد وان يكون هناك نقطة تلاقي بينهم تكمن في كون وكينونة كل واحد فيهم ، وهذا التلاقي ‏لابد له وان يكون بديهي وفطري ومنطقي في نفس الوقت ‏

كما ذكرتي عن طريق لبس الزوجة التي تدل على مرجعية الزوج الاجتماعية .. فهذه أمور بديهية لا نقاش حولها ‏

فهذه الأمور بديهية وفطرية ومنطقية ولا نقاش فيها واذا وضعت للنقاش بين الزوج والزوجة فاعلمي ان هذا الزواج ‏فاشل من أوله إلى آخره لأن منطق وفطرة ومرجية الزوجين غير متطابقتان ولا يصح ان يبنى عليها زواج مستقر ‏على اقل تقدير .. ان لم يكن سعيد ‏

‏- ( فالزوجة تعبر عن حياتها الزوجية ومعاملة زوجها لها من عِدة أشياء بسيطة. فكما أن السعادة لا نستطيع إخفائها ‏كذلك التعاسة أيضاً ) –‏

السعادة والتعاسة لا علاقة لها بالمال اذا وجد زوج وزوجه أسوياء ومتآلفين ومتفاهمين ويتمتعون بعقليه مستنيره وافق ‏واسع .. وأضيف ان هذا لا علاقة له بدرجة التعليم ( التحصيل العلمي ) بل بالتربية الاجتماعية في الصغر من الأهل ‏والأخلاق التي جبلوا عليها وغرست فيهم من الصغر في محيط البيئة التي نشئوا فيها . ‏

فلكم من زوج متعلم وحاصل على أعلى المراتب التعليمية وكذلك الزوجات . ‏

ولكنهم صفر على الشمال في الحياة الأسرية التي تعتمد بالمقام الأول على التنشئة القيمية السليمة والأفق الواسع ‏والأخلاق الحميدة وعلى راسها التواضع بين الزوجين وإنكار الذات ومعرفة المسؤوليات وتحديدها وعلى من تقع ‏بالفطرة دون الرجوع إلى معرفة وتحديد على من تقع هذه المسؤوليات هل هي على الزوج أم على الزوجة .. لأن هذه ‏بديهيات لا نقاش فيها واذا وضعت على طاولة المناقشات كان الزواج فاشل بدون شك . ‏

وتقولين مع كل تقدير : ‏

‏- ( قبل أن تقدم على الزواج عليك باختيار التي تستطيع أن تحقق لها ما كانت متعودة عليه في بيت أهلها أو أفضل منه ‏حتى لا تتهمها فيما بعد بأنها مش عارفة تعيش معاك . أو تكون واضحاً وصريحاً معها منذ البداية - مش تفرش لها ‏الأرض ورد ولما توافق عليك تلاقي الورد أتحول لحصير ) –‏

وهذا أيضا فيه تسطيح وتعميم .. مع الاتفاق بأن يكون هناك صراحة بين الاثنين بوضعهم ( المالي – والاجتماعي ) ‏لكلا الجانبين فهذا امر بديهي أيضا لا نقاش فيه . ‏

أما ان يكون الزوج من طبقة اجتماعية فقير والزوجة من طبقة اجتماعية غنية أو العكس فهذا يجعل الزواج فاشل ، ‏فهنا اختلف واختلف بشدة فالمال ليس المشكلة ،المشكلة في الأخلاق والتنشئة والفطرة السليمة . فلكم من نساء ( وهذا ‏عن واقع ان عشته وأعيشه إلى الآن ) ينتمين إلى طبقة اجتماعية مستواها أعلى من طبقة الأزواج الذين يرتبطون بهم ‏‏. ‏

ومع ذلك فهن في عيشة سعيد وهنيئة .. ليس لأن كثرة المال أو قلته أو توفير الحاجات الأساسية أو الترفيهية هي قوام ‏هذه الحياة الزوجية . ‏

وإنما وبموضوعية شديدة هو ان : " الزوجة والزوج مع الفرق المالي الواضح بينهم ولكنهم ينتمون إلى بيئة محافظة ‏وفكر محافظ وقيم محافظة .. وهنا لا علاقة للمال بالحياة السعيدة أو التعيسة أو توفير الزوج للزوجة احتياجاتها ‏الأساسية أو الترفيهية أو الكمالية لها ، لان الزوجة لم تتزوج لتتوفر لها هذه الأشياء في المقام الأول وإنما كان الزواج ‏على قاعدة متينة ومرجعية سليمة وقيم وأعراف متفق على بديهيتها وفطريتها ومنطقيتها . ‏

وكذلك لو كانا من بيئة منحدرة الأخلاق وقيم منحرفة قد يحدث بينهم توافق وتمازج ولكن ينتج عن ذلك الزواج نشيء ‏منحرف يؤمن بقيم منحدرة ومنطق مطرب ومختل .. ولكن يحدث هذا مع الأسف . ‏


واسف على الإطالة ‏

karmen يقول...

جزاك الله خيرا مواضيع هادفة دائما
خالص احترامي

حمـــــــــــــــــــــة يقول...

-2-
سيدتي
في غياب الوعي الكامل و التقدير السليم للمسؤولية يكتوي البشر بين نيران تحيط به من كل جانب
الرجل :
ويله من توفير القوت و تدبير شؤون أسرته
خاصة إن كان قريبا من أسرته
أهله كل على هواه و خاصة أمه و أخواته الإيناث
معادلة صعبة جدا
لعل الجانب المادي مؤثرا هنا
يقترب من اهله لتوفير سندا يعينه فيفقد حريته و زوجته طبعا
و هكذ دواليك

موناليزا يقول...

مستر بريزيدنت
ــــــــــــــــ
أهلا بيك يافندم
أقولك على حاجة يمكن تستغربها
المرأة عموما أستاذة فى الاقتصاد يعنى حتى لو ظروفهم صعبة برضه هتقدر تدخر قرشين على جنب تحسباً لأى ظروف ده فى حالة أن مصروف البيت فى إيدها
يعنى لو خدت مصروف شخصى ليها من الزوج ممكن جدا يلاقيها جايباله بيه قميص جديد أو حتى زوج شرابات:)
صدقنى فى الاخر هو الكسبان

أشكرك جدا لتعليقك
يسعدنا دوام التواصل



***************************


سلمى محمد
ــــــــــ
أهلا بيكِ يا سلمى
أكيد التوافق والصراحة مطلوبة بس حتى لو المصروف مجرد مبلغ رمزى فى حالة قلة دخل الزوج ده هيفرق جامد مع الزوجة

نورتينى حبيبتى
وفى انتظارك دائما

**************************


نور شاهين
ــــــــــ
أهلا بيكِ يا نور بعد طول غياب:)
أشكرك جدا لرأيك ولتعليقك
نورتينى حبيبتى
وفى انتظارك دائما


**************************

محمد
ـــــ
أهلا بيك أستاذ محمد
عجبتنى ملحوظتك جدا بانها المفروض تكون فلوسهم وحياتهم:)
وأشكرك جدا على تعليقك
يسعدنا دوام التواصل


**************************


د/ ولاء صالح
ــــــــــــــ
أهلا بيكِ يا ولاء
عندك حق لان الزوجة هتحس انها تلميذة وخايفة من عقاب المدرس ليها مش زوجة وليها حقوق

:) ضحكتنى اجابتك على السؤال وفعلا ده الواقع

تعرفى الزوجة والله بتحس مش عايشة منعزلة عن زوجها وزى ما انتى قلتى هتقول ولادى أولى بس المهم تحس انها موجودة أصلا على الخريطة مش مجرد آداة لتلبية طلبات الجميع

نورتينى حبيبتى واسعدتنى مشاركتك
فى انتظارك دائما


***************************


شارم
ــــــ
أهلا بيك يادكتور
عين العقل
وربنا يباركلكم ويسعدكم

يسعدنا دوام الواصل


*************************


توتا
ـــــــ
أهلا بيكِ يا توتا
ده حقيقى للاسف اغلبية الازواج بيتجاهلوا الموضوع ده رغم انه حقيقى بيقرق جدا مع الزوجة

وملحوظتك ميزة جدا على فكرة
أحييكِ عليها

نورتينى حبيبتى
وفى انتظارك دايما


************************

كلمات من نور
ــــــــــــــ
أهلا اهلا بالغالية
الله يسلمك ياحبيبتى
ليكم وحشة بجد:)

أشكرك جدا لرأيك فى البوست
والحمدلله ان اجابة سؤالك مبشرة بالخير:)

نورتينى حبيبتى
وفى انتظارك دايما



**************************

ويكا
ـــــــ
أهلا بيك يافندم
الله ينور عليك
أهو ده اللى أنا عايزة أقوله من الصبح:)

ربنا يكرمك وأشكرك جدا لرأيك ولتعليقك
يسعدنا دوام التواصل



***************************

فارس عبد الفتاح
ـــــــــــــــــ
أهلا بيك أستاذ فارس
أشكرك على الجزء الاول من الفقرة الأولى فى تعليقك:)
واسمحلى أوضح
- ( أستطيع أيضاً التعرف على طباع الرجال من خلال رؤيتي لزوجاتهم) - ‏

حقاً أستطيع ومن أول نظرة وبدون مبالغة

أنا متفقة معاك فى أن المال لايعتبر رقم واحد فى اساسيات الزواج لان فيه حاجات تانية أهم ولكن اذا شعرت الزوجة ببخل زوجها كانت هذه أكبر اسباب تعاستها

وعفواً رغم ان الصراحة بين الزوجين شئ بديهى حقاً ولكنها لاتحدث فى كل الأوقات

أشكرك جدا لمشاركتك
يسعدنا دوام التواصل



*************************


كارمن
ــــــــ
أهلا بيكِ يا كارمن
ربنا يكرمك يارب اشكرك جدا لرايك والحمدلله فماتوفيقى الا به
نورتينى حبيبتى وفى انتظارك دايما



**************************


حمة
ـــــــ
أهلا بيك يافندم
مش فاهمة تعليقك اوى
بس لو أعطى لكل ذى حق حقه لن يضير أحدا

أشكرك لمتابعتك يسعدنا دوام التواصل

eng_semsem يقول...

انا معاكي انه لازم يبقى معاها فلوس تصرفها لو احتاجت بس برده لو هو شاف منها انها بتصرف على الفاضي لازم يمسك ايده معاها وبعدين الراجل لما بيفكر في فلوس بيبقى عشان البيت والاكل والاطفال والمصيف والمستقبل بتاع ولاده يعني نادرا لما يكون بخيل عشان خاطر نفسه ده لو بخل مابالك ان في كتير بيبقى معاهم الامر اصعب انه بيحاول بس يعيش ويمنح اولاده اللي يخليهم مش نفسهم في حاجه مش اكتر
وبالنسبه للسؤال الجانبي متهيالي كل الرجاله مقصره مع زوجاتها لو الحال بيبان فعلا على وشهم وكلامهم
تقبلي تحياتي

حاجات جوايا يقول...

شوفت كتير طبعا
بس اللى بشوفه اكتر
نكد زوجها باين عليها
والعكس اكيد
لو خدتى بالك من الناس فى الشارع
هتلاقى ام خارجة بولادها تجيبلهم هدوم وطلبات وباباهم مش معاهم
ام نزلت تصلى العيد هى وولادها لوحدهم
ام بتفسح ولادها لوحدها
تحسى ان الستات شايلين فوق اعبائهم اعباء
والضحكة المرسومة على وشها وهى بتلاعب ولادها وراها حزن كبير واحساس بالوحدة
وانها بتحاول تسقف بايد واحدة

وفيه ستات تانية بتعمل كل ده
بس من غير ما تحاول تضحك
يمكن لانها مش قادرة
يمكن لان حزنها اكبر من اللحظة اللى بتشوف فيها سعادة ولادها
يمكن لانها زوجة تعيسة
يمكن لان جوزها بيخونا
الف احتمال ممكن نبرر بيه
بس الاكيد انها مش ام قاسية والا مكنتش نزلت عشان تفرح ولادها

برضه لما تلاقى راجل ومراته ماشيين فى الشارع وعلامات التحفز على وش كل واحد منهم
وكل واحد ضارب بوز كانه خارج على عينه او خارج من خناقة او رايح يتخانق

الغريب بقى والنادر لما تلاقى الاب متفهم وعطوف ورايح مع مراته يشترى هدوم ليها وله ولولادهم
او قاعدين فى مكان بيضحكوا ويهزروا ويتناقشوا وولادهم بيلعبوا حواليهم

مش عارفة لامتى هنفضل نعذب فى بعض
ليه منساعدش بعض عشان نعيش حياة جميلة

بالرغم من ان بره مش كده خالص
والزوجين بيعرفوا يستمتعوا كويس جدا بحياتهم وبيحرصوا على قضاء العطلات الاسبوعية والموسمية مع بعض

حتى لما بييجوا شرم بينزلوا البحر حتى لو عندهم 70 سنة
هو صحيح القرش بياكلهم فى الاخر بس برضه
اسمهم نزلوا البحر واستمتعوا بالحياة هههههههههههههه

كل سنة وانتى طيبة يا قمر
والى الله اقرب وعلى طاعته ادوم

ماجد القاضي يقول...

السلام عليكم

واضح طبعا إن أنا جاي متأخر جدا..!
لكن بصدق الموضوع مفتوح من يومين ومش لاقي وقت!!! :)

المهم.. أختي موناليزا.. أحييكِ والله على الموضوع اللي أكيد جاي في الصميم لعدد غير قليل من الأزواج...!
بصدق.. النقاط التي أشرتِ إليها كلها واقعية جدا، ويغفل عنها الكثير من الأزواج..
- المستلزمات الشخصية
- هديته
- هدايا ومجاملات صديقاتها
- الصدقة
...... باختصار أنتِ أوجزتِ الأمر في أنها يجب أن يكون لها ما تنفقه بدون رقيب!!! هو ده لب الموضوع...
عامة صحيح الكثير لا يستطيع اصلا إعطاء زوجته مصروفا خاصا (بسبب ضيق المعيشة كما قال البعض)... لكن أعتقد أن مجرد إحساس الزوجة بأن الزوج مقدر لهذا الجانب ولا يمنعه منه سوى ضيق ذات اليد.. فهذا بالتأكيد له وقع مختلف وقيمة مهمة لديها...

أحسنتِ في العرض أختي الكريمة...
تحياتي.

salwa يقول...

السلام عليكم اخت موناليزا
من الواجب الصدق و الصراحة من اول الطريق
لنكمل المسيرة بسعادة و تفاهم
تسلم ايدك و جزاكي الله كل خير
و راس سنة هجرية مباركة لكل الامة يا رب

رحــــيـل يقول...

بصراحة يا مناليزا
الميزة الوحيدة لعمل المرأة
انها مش بتحتاج تطلب او انها تنتنظر من زوجها مصروف

عاشــــــ النقاب ـقــــة"نونو" يقول...

هو فيه ناس زي كدة لسة؟؟؟
بجد انت جميلة وكلامك جميل ربنا يبارك لك

سمو الامير يقول...

موضوع مهم جدا

شكرا على النصيحةولو أن أوان تنفيذها لسا عليه بدري

:)

أشبال أون لاين يقول...

موضوع جميــل جداً

جزاك الله خيراً

وهذه أول زيارة ليه في مدونتك الرووووعة سراحة

وإن شاء الله أكون من متابعي مدونتك

تحياتي

قطرة وفا يقول...

* ياترى كم مرة شوفت واحدة عز زوجها باين عليها؟.

في كتير من اللي حواليا عز ازواجهم باين عليهم ما شاء الله والحمد لله طبعاً

و انا معاكي بموضوع انو الست يكون عندها مصروف جيب ... دا شيء بجد بيفرحها و بجد تحسي انها مسؤولة مش انها ولا حاجة .. !

موضوع جميل

حصان المرجيحة يقول...

بصراحة شفت و ممكن يكون كتير كمان
و في ناس والله عادية المستوي و برضو باين عليهم العز ماعرفش ازاي يمكن الزوج مهتم بيها زيادة

موناليزا يقول...

انج سمسم
ـــــــــــ
أهلا بيك يا باشمهندس
طبعا متفقة معاك ان فيه زوجات مسرفات ولكن ايضا فى ازواج كثير بخلاء وهم مقتدرون مالياً
أشكرك جدا لتعليقك ومشاركتك
يسعدنا دوام التواصل



*************************


حاجات جوايا
ــــــــــــــ
أهلا بيكِ ياسالى بعد طول غياب
:) عندك حق
لو الزوجين قررا ان يستمتعا بحياتهما مع بعضهما البعض لاختلفت الحياة تماما

ويارب يكون عام سعيد علينا جميعا
نورتينى حبيبتى
وفى انتظارك دائما



**************************


ماجد القاضى
ــــــــــــــ
وعليكم السلام ورحمة الله وبركاته
أهلا بيك أستاذ ماجد
يافندم حضرتك تنورنا فى أى وقت مكانك محفوظ دايما:)

عندك حق جدا.. المهم الزوجة تحس بالاهتمام

أشكرك جدا لتعليقك
ويسعدنا دوام التواصل



**************************


سلوى
ـــــــ
وعليكم السلام ورحمة الله وبركاته
أهلا بيكِ ياسلوى
عندك حق جدا
ربنا يكرمك واشكرك جدا على تعليق وتهنئتك
نورتينى حبيبتى وفى انتظارك دائما


**************************


رحيل
ـــــ
أهلا بيكِ ياسارة
حتى دى كمان بقى مشكوك فى ميزتها لان فى ازواج بياخدوا مرتب الزوجة ومابيرضوش يعطوها الا يادوب ثمن المواصلات

نورتينى حبيبتى
واسعدتنى مشاركتك


***************************


عاشقة النقاب
ـــــــــــــــ
أهلا بيكِ يا نونو
طبعا موجود كل شئ فى الدنيا فيه وفيه:)
ربنا يكرمك ياحبيبتى ماتحرمش منك
نورتينى ياجميلة واسعدنى تواجدك


**************************

سمو الامير
ـــــــــــ
أهلا بيك يافندم
أشكرك جدا لتعليقك
والمهم انك تفضل فاكرها:)
يسعدنا دوام التواصل


*************************


أشبال اون لاين
ـــــــــــــــ
أهلا بيك يافندم فى زيارتك الاولى
أشكرك جدا لرايك ولتععليقك
ومدونتى فى انتظارك دائما


*************************



قطرة وفا
ـــــــــــ
أهلا بيكِ ياحبيبتى
:) طب الحمدلله ربنا يزيد ويبارك

أشكرك جدا لرأيكولتعليقك
نورتينى حبيبتى واسعدنى تواجدك


**************************


حصان المرجيحة
ـــــــــــــــ
أهلا بيك يافندم
:) طيب ده جميل
وفعلا مش مهم يكون بيعطيها مصروف أو فلوس بزيادة الكلمة الطيبة وحدها تكفى حتى ترى نظرة الرضا فى عيون الزوجة
أشكرك جدا لمشاركتك
يسعدنا دوام التواصل