الراية البيضا

زمان حينما كنت أشاهد فيلم كرتون ويكون المشهد عبارة مثلاً عن "كلب" بيجرى وراء "قطة" وحينما تجد "القطة " أن مفيش أمل من الفرار والنجاة ترفع يدها ممسكة بمنديل أبيض فيتوقف النباح وينتهى المشهد بنجاة القط.
ووقتها لم أكن أعلم ما المقصود بهذه الحركة.. وفيما بعد عرفت أن رفع الراية البيضا معناه إعلان الشخص عن إستسلامه وبالمقابل من يتعارك معه يتركه ولا يؤذيه.
حتى فى الافلام العربى القديمة حينما كان يأتى مشهد رجال الشرطة وهم يطاردون الهارب ويرفع أحدهم صوته قائلاً"سلم نفسك" أو "ارفع إيدك" ولو الهارب نفذ ماقيل لن يتم قتله أو إيذائه وسيتم القبض عليه فى سلام.
وأتذكر مشهد فى أحد الأفلام" كان البطل يريد أن يأخذ بالثأر فنادى على عدوه ليراه ثم يقتله" بغض النظر عن الفحوى ولكن يكفى أنه ماضربوش فى ضهره. على الأقل من حق المقتول يعرف مين اللى قتله قبل مايموت.
ويلفت نظرى أيضاً اللعب بالعصا والمبارزة بالسيف وبغض النظر عن عنفها بس الجميل إن فيه مواجهة.. اللى هيتضرب هيبقى عارف أنه هيتضرب .
أما الآن فالدنيا اتغيرت مهما ترفع الراية البيضا برضه هتضرب وتموت.

ليه مابتقدرش غير على الضعيف!!.
إزاى بعد ما تعطى لحد الأمان تغدر بيه!!.
ليه اللى بيستسلم برضه بيضرب. وليه محدش يقدر يقرب من اللى بيعرف يهرب.
ليه الضربات أصبحت فى الضهر وماعدتش فيه مواجهة .
المستسلم بيكون خلاص إنهار داخلياً وفقد القدرة على الصمود وهذا بيكون أصعب عليه من الهزيمة لأن الهزيمة ممكن جداً يعقبها نصر.. والإنهزام دون استسلام يعتبر فى حد ذاته نصر.. فلماذا لا نحترم ضعف المستسلم !!.
رسالة إلى كل شخصية سادية والتى تجد متعة فى تعذيب الآخرين والتلذذ بآلامهم:
إذا دعتك قدرتك على ظلم وإيلام من لا يقدر عليك فتذكر قدرة الله عليك.

سؤال جانبى:
ــــــــــــــــــــــــ
هل رفعت الراية البيضا قبل كده؟ وكان إيه الموقف؟.
لو لقيت حد رفع الراية البيضا هتتصرف معاه إزاى؟.