الخميس، 17 مارس 2011

جوجو و زمردة (17)


كان "جوجو وشقيقته " زمردة" يلعبان سوياً وفجأة قالت "زمردة":
- عيد الأم بعد بكرة واحنا لسه ماجيبناش لماما هدية.
- آه حقيقى.
- طب وبعدين هنعمل إيه؟.
- مش عارف.. فكرى أنتِ فى الهدية وأنا معاكِ.
- ماهو أنا محتارة ومش عارفة أختار حاجة.
- طيب إيه رأيك لو عملنا الهدية بنفسنا؟.
- والله فكرة.. بس هنعمل إيه؟.
- إيه رأيك لو ألفنا أغنية مخصوص ليها.
وفى اليوم التالى كانا "جوجو" و"زمردة" قد اتفقا على استعراض للأغنية التى قاما بتأليفها وطلبوا من ماما"زوزو" أن تأتى فى غرفتهما الساعة الخامسة عصراً لأمر هام.
ولبت الأم الدعوة وتفاجئت بجوجو وزمردة يرتديان ملابس كان ارتداها فى حفل مدرستهما ومعهما بالونات ويقوموا باستعراض الأغنية.
"ماما زوزو حبيبتى ياضى عينيا.. بدعيلك رب يخليكى ليا"
زمردة بمفردها" مامتى ياحلوة يا أجمل غنوة وأغنيتى دى للذكرى"
"ماما زوزو حبيبتى ياضى عينيا .. بدعيلك رب يخليكى ليا".
جوجو بمفرده" حبيتك من يوم ماشوفتك ولسانى بيردد اسمك"
" ماما زوزو حبيبتى ياضى عينيا.. بدعيلك رب يخليكى ليا"
زمردة" بتضحى براحتك علشانا ومعاكى دايما رافعين راسنا"
"ماما زوزو حبيبتى ياضى عينيا.. بدعيلك رب يخليكى ليا"
جوجو" هنوعدك نكون ليكى زى ما بتتمنى فى عيدك"
ماما زوزو حبيبتى يا ضى عينيا.. بدعيلك رب يخليى ليا"
صفقت لهم الأم بحرارة شديدة دامعة العين من مجهود أطفالها وضمتهم لها قائلة: أنتوا أجمل هدية فى حياتى.
- تمت-.
============
سؤال جانبى
ــــــــــــــــــــ
* ما الهدية التى تتمنى أن يفاجئك بها أطفالك؟.
(سؤال للجميع) حتى اللى لسه مارتبطوش يجاوبوا على اعتبار ماسيكون:)
- ما اقتراحاتك لهدية عيد الأم؟.

هناك 23 تعليقًا:

Days and Nights يقول...

الأخت العزيزة / موناليزا

أهم شيىء هو إننا لا ننسى أى مناسبة يمكن أن نسعد بها الآخرين.

وخصوصا لو كانت الى المقربين منا.

الأولاد عندى دائما بينسوا يجيبولى هدية .. لكن بأكون سعيد بما يقدموه لأمهم .

بالنسبة لى تكفينى وردة.

دمتى بكل الود

تحياتى

أخوك / تامر

Mahmoud Ahmed يقول...

هو الكلام ده بس للبنات يعني على اساس ان اسمه عيد الأم :)

هو ليه صحيح مفيش عيد الاب ؟؟!!

^_^

على فكره محدش لسه اقترح هدايا خالص :(
ياريت لو تضيفي السؤال ده في آخر البوست كمان
عايز اعرف اجيب ايه لماما
و الله هتضربني هههههههه ^_^ لو مجبتش هديه

الاحلام يقول...

كل يوم يمر بى وامى راضيه عنى فهو عيد وكل يوم يمر ولا ارى امى فهو ليس من عمرى لا يوجد يوم معين اهديها هديه لاننى اتفنن فى الهدايا التى اهديها لها ما بين الحين والاخر وكفى انها هدية الله لى
تقبلى تحياتى الاحــــــــلام

مصطفى سيف الدين يقول...

كل سنة وكل امهاتنا بخير وطيبين ويفضلوا دايما معانا
لانهم فعلا احنا من غيرهم منساويش
بالنسبة لللاسئلة المرة دي معقدة ومن خارج المقرر
انا معنديش اطفال ومش مرتبط اصلا بس لو عندي اعتقد ان ابتسامتهم هتبقى احلى هدية
بالنسبة لاقتراحاتي لهدية عيد الام اصلا المفروض اعتبر كل الايام عيد ام مش يوم في السنة يعني كل يوم احاول اخليها في عيد عن طريق البر بيها واحاول اسعدها
اعتقد احنا مش محتاجين عيد الام احنا بس محتاجين شوية بر بيها
تحياتي واشكرك

ghoneem يقول...

السلام عليكم

وبعد التحية ...

كل عام وكل أم وأب ف أتم صحة وأحسن حال ينيرو لنا الدنيا ويضيفو الينا رصيدا من الخبرة يدعمنا في الدنيا ويسلك بنا وبهمف الآخرة سبيلا الي الجنة ..آمين

أنا نفسي أولادي يجيبولي ...أممممممممم ...يعني بمناسبة الثورة وكدة يعني ..دبابة :)
هية موجودة دلوقتي كتيييير يتصرفو بقي

تحياتي

بالتوفيق............

ليلى الصباحى.. lolocat يقول...

السلام عليكم اختى الحبيبة

جميلة انت ورقيقة كتير :)
كل سنة وكل الامهات بخير وسعادة

اعتقد ان اجمل هدية لاى ام انها تشوف اولادها سعداء ومتفوقين وقريبين من الله
مفيش اجمل من الذرية الصالحة

اما لو انا هقدم هدية لامى هتكون اولا بوكيه الورد المعتاد .... مع شىء اشعر انها محتاجة له فى الوقت ده وبحب يكون شىء شخصى لها ومش للبيت :)

كل سنة وامى وامك وانت وكل الامهات بالف خير وسعادة حبيبتى

تحياتى لك ياطيبة

Carmen يقول...

كلمات رقيقة طالعة من القلب وسر جمالها في بساطتها تسلم ايدك حبيبتي

إنسان || Human يقول...

ههههههه طبعا واضح الجو الطفولي الجميل في البوست... جوجو وزمردة
الاغنية حلوة وتنفع لفقرة في حفلة لتكريم الام , عموماً
أنا اقترح هدية لعيد الام ممكن حاجه هي بتحبها حاجه شخصية ليا انا مش حابب فكرة الناس اللي بتجيب هدية " مستلزمات منزلية او ماشابه " يعني طقم حلل مثلاً ههههههه لاء انا اجيب حاجه خاصة ليها تستخدمها هيا لوحدها , ممكن ساعة جميلة او شنطة حريمي ايا كانت الهدية فهي تكون حاجه لاستخدامها هي فقط

زينب علي حبيب يقول...

اليوم عيد الام ؟ ههههههههه مكنتش عارفة بجد بس سامعة انو قريب :P

مممم ... يجو يبوسوني و يجيبولي ولوو وردة صغيرة كدا من الشارع و يقولولي ربنا يخليكي لينا يا ماما :)

ايه رايك بمخيلتي ؟ :P

غير معرف يقول...

الأخت الفاضلة موناليزا و المعلقين الكرام

قبل ما تجيبوا هدية لمامتكم افتكروا كويس لما كانت بتضربكم و انتم صغيرين .
( هييييييييييه آهو الواحد بيعمل الطيب و بيرميه البجر )

Asmaa mahaba يقول...

الواحد عنده6 يجيبلهم هديه ماشاء الله والجيب مفلس هههههههههه

كلمات من نور يقول...

* ما الهدية التى تتمنى أن يفاجئك بها أطفالك؟.

انهم يقربوا من ربنا اكتر علشان كل ما حيقربوا من ربنا حيعرفوا طريقهم صح وحيكونوا أجمل هدية

- ما اقتراحاتك لهدية عيد الأم؟.

أنا مش بجيب هدايا لأمي في عيد الام ولا بطلب هدايا من أولادي في عيد الأم علشان مش بحب اولا احتفل بما هو بدعة وثانيا مش بحب اختزل حبي في يوم واحد

تسلم إيديكي يا موناليزتي الغالية

وردة الجنة يقول...

موناليزا

كل سنة وكل ام بخير وصحة وسلامة

الحقيقة انا لو مرتبطة وعندى اولاد اهم واحلى هدية هتكون منهم انهم يكونوا بارين بيا وبابوهم ويكون فى سعادة فى البيت بابتسامتهم وحيائهم وتربيتهم السليمة اللى اتمنى انى اربيهم بيها

لانهم اكيد اغلى من كل شئ

تحياتى ليكى وكل سنة وانتى طيبة وتقبلى مرورى .......

الشاب الصح يقول...

السلام عليكم ورحمه الله
انا كأب ان شاء الله اتمنى ان تكون هديتى ابنائى بمعنى ان يكونو شباب نشأ فى طاعه الله و الله نفسى يكون ليا اطفال صح و زى الفل اللهم امين يا رب و دى اجمل هديه ان اطفالك هديه من ربنا و يكونو مؤدبين جدا و محترممين ومطيعين يا رب
========>♥ ◕‿◕ ♥<========
اللهم لولاك ما اهتدينا ولا تصدقنا ولا صلينا فأنزل يا ربي السكينة علينا وثبت الاقدام ان لاقينا
========>♥ ◕‿◕ ♥<========

❤ soso ❤ يقول...

اولادي هم اجمل هدية .. وتكفيني كلمة كل سنة وانتي طيبة يا ماما
سعد جدا بتواجدي في مدونتك الراقية
لك مودتي

eng_semsem يقول...

كل عام وكل ام مسلمه بخير وسعاده وصحه وعافيه
انادايما بحتار في الهدايا عامة لاني بحب اهرب من التقليدي عشان يكون الشئ اللي انا بقدمه مميز
عشان كده انا قررت تكون هجيتي لماما ابعت ليها رساله على التليفون واقولها ربنا يخليني ليكي وافتكرك على طول
صدقيني هي هتفرح جامد حتى لو بعت رساله فاضيه الام مش مستنيه لا شكر ولا تحيه يكفيها ابن ما ينسهاش يوم في السنه يقول ليها ولو صباح الخير

موناليزا يقول...

دايز اند نايت
ـــــــــــــــــ
أهلا بيك أستاذ تامر
ده حقيقى فالنسيان فى حد ذاته مُهين للطرف الاخر

:) حضرتك ممكن تفكرهم لان الاعلام بيهتم بهدايا الام وبس

أشكرك جدا لمشاركتك
يسعدنا دوام التواصل


********************************


سبايدر مان
ـــــــــــــــ
أهلا بيك يادكتور
ده كان زمان على فكرة دلؤتى بقوا يسموه عيد الأسرة عشان محدش يزعل:)

انا ملاحظة برضه الموضوع ده:(
يمكن ناويين يلغوه السنة دى

عشان خاطرك يافندم حطينا السؤال وبإذن الله تيجى اقتراحات مناسبة

طيب وتحير نفسك ليه ما تسألها وكده هتبين حسن نيتك:)

أشكرك جدا لتعليقك
يسعدنا دوام التواصل


*****************************

الاحلام
ــــــــ
أهلا بيك يافندم
ربنا يخليهالك ويباركلها فيك

أشكرك جدا لتعليقك
ويسعدنا دوام التواصل


*******************************


مصطفى سيف
ـــــــــــ
أهلا بيك يادكتور
ده حقيقى.. ربنا يبارك فى عمر امهاتنا

:) شوبة تخيل وهتلاقى الاسئلة سهلة

بإجابتك واضح انك ماتخيلتش كويس:)
يعنى تخيل ان ابنك بيقولك "بابا انا جايبلك هدية"
فانت بقى هتبص له وتقوله "هى فين ياحبيبى؟"
فهو بقى يضحك فى وشك ويسيبك ويمشى:)

طبيعى ان الاطفال يبتسموا فى وشنا انا اقصد هدية مادية يادكتور:)

كلامك جميل طبعا فبر الوالدين عموما من اعظم العبادات
ولكن نفهم من كده انك مش هتجيب هدية؟

أشكرك جدا لتعليقك
يسعدنا دوام التواصل

*****************************

غنيم
ــــــــــ
وعليكم السلام ورحمة الله وبركاته
أهلا بيك يادكتور

اللهم امين

:) فكرة حلوة وخصوصا ان الدبابات دلؤتى بقت متوفرة وموجودة فى اغلب الشوارع

أشكرك جدا لمشاركتك
يسعدنا دوام التواصل


******************************

أم هريرة
ــــــــــــ
وعليكم السلام ورحمة الله وبركاته
أهلا بيكِ يا لولو
:) ميرسى ياحبيبتى ده بس من ذوقك

ده حقيقى ربنا يرزقنا جميعا بالذرية الطيبة

ايوة انا منتفقة معاكى جدا فى ان الهدايا تكون للام نفسها مش للمطبخ:)

كل سنة وكل ام بخير

تسلميلى يارب
أسعدنى تواجدك وفى انتظارك دايما


*****************************


كارمن
ـــــــــ
أهلا بيكِ يا سمسمة
تسلميلى حبيبتى
وأشكرك جدا لتعليقك
وفى انتظارك دايما


****************************


هيومان
ـــــــــ
أهلا بيك يافندم
:) أشكرك جدا لرأيك فى البوست

أؤيدك تماما فالهدية لازم تكون ليها هى
جميلة اقتراحاتك

أشكرك جدا لمشاركتك
يسعدنا دوام التواصل

******************************

قطرة وفا
ــــــــــ
أهلا بيكِ حبيبتى
:) هو يوم الاتنين بس احنا لازم نتكلم عن الهدية قبلها

:) تخيل جميل ويارب يحصل وتشوفى اليوم ده بجد

أشكرك جدا لمشاركتك
وفى انتظارك دايما


******************************

محمد محمود عمارة
ــــــــــــــــ
أهلا بيك أستاذ محمد
:) يا سلاااام

تعرف حضرتك أنا أمى عمرها ماضربتنى لا وانا صغيرة ولا وانا كبيرة من يومى وهى بتتعامل معايا على اعتبار انى كبيرة واقدر افهم كلامها واسمعه من غير لاضرب ولا شتيمة:)

أشكرك لتعليقك
يسعدنا دوام التواصل


***************************


سومة مجنونة فى بلد عاقل
ـــــــــــــــــــــــ
أهلا بيكِ يا سومة
ماشاء الله.. ربنا يبارك

أشكرك لتعليقك
فى انتظارك دايما


********************************

كلمات من نور
ـــــــــــــــ
أهلا بيكِ غاليتى
وعشان تاخدى ثواب كمان:)

وجهة نظر تحترم
أشكرك جدا لمشاركتك
فى انتظارك دايما

******************************

وردة الجنة
ــــــــــــ
أهلا بيكِ حبيبتى
ربنا يرزقك يارب بالزوج الصالح والذرية الطيبة

أشكرك جدا لمشاركتك
وفى انتظارك دايما

*****************************


الشاب الصح
ــــــــــــ
وعليكم السلام ورحمة الله وبركاته
أهلا بيك يافندم
ربنا يرزقك بما تتمنى
أشكك جدا لمشاركتك
ويسعدنا دوام التواصل


******************************


مدونة قلب العرب
ــــــــــــــــ
أهلا بيكِ حبيبتى فى زيارتك الاولى
ربنا يباركاك فيهم
نورتى مدونتى وفى انتظارك دايما


******************************


انج سمسم
ـــــــــــ
أهلا بيك يا باشمهندس بعد طول غياب
ربنا يخليهالك ويباركلها فيك
وفعلا اى هدية بسيطة حتى لو كلمة حلوة كفيلة باسعادها

اشكرك جدا لمشاركتك
يسعدنا دوام التواصل

من كل بستان زهرة يقول...

كل سنه وكل امهاتنا بألف خير
وربنا يخليهم لينا
ويارب يخللنا أمنا الكبيره العظيمه بلدنا مصر الحبيبه


اما بقى الهديه فأنا جبتلها ساعه ذهب
ويوم عيد الأم هديهالها مع بوكيه ورد جميل كده

وطبعا ولا هدايا الدنيا كلها تليق بأمي هي اغلى من كل هدايا الدنيا
بس يلا بحاول اشوف هي محتاجه ايه واجبهولها

بس انا لما ابقى ام هستغل ولادي ايه

كل سنه وانتي طيبه يا موناليزا

فارس عبدالفتاح يقول...

ولا حاجة مش عايز اي حاجة من عيالي بس هما يسيبوني في حالي ويعتمدوا على انفسهم في غابة البشر .

والله عمري ما جبت هدي لامي في عيد الام ابداً وبعدين هو يعني لازم عيد الام عشان الواحد يجيب هدي لامة او ابوه او اخواته او اي حدى .

وبعدين انا ربنا رزقني باب عاقل وام عاقله وفي حياتهم ما طلبوا مني شيء حتى لما اجيب ليهم هدية بيبقوا مش عيزين يخدوها اصلا ولا عيزين من وشي او وشي اي حد من اخواتي .. يعني الناس دي ميه ميه فيه حد يلاقي اب او امي بالطريقة دي في الزمن ده .

اعتقد مفيش !

إبن النيل يقول...

السلام عليكم
موناليزا أجمل ما في الدنيا هي الأم والأب بردو علشان الابهات ما تزعلش والاجمل من كدا إننا نعرف قيمتهم ونبرهم في دنياهم وآخراهم بس أنا من دعاه عدم تخصيص يوم بعينه لان المفروض كل يوم يكون عيد للام ( الله يرحمك يا أمي ويسكنك فسيح جناته)
مقولكيش قد أيه مفتقد أمي بس الحمد لله بحاول أبرها ولان محدش يعرف انا مين ممكن أقول أهم حاجة عملتها لامي وهي حج بيت الله الحرام عنها الله يرحمها
وبالنسبة لاولادي مع اني مرتبظش إلا أني أحلم وأتمني أكون أب مثالي معاهم وبجد يكفيني كلمة بابا وقبلة رقيقة منهم علي خدي
معلش طولت شوية
دمتي بكل خير

Dr. Ibrahim يقول...

اقتراحى لهدية عيد الأم..
أن نحترمها ونتأدب معها فى الكلام ونودها ونزورها بصفة مستمرة وليس فى عيد الأم فقط وهذا لمن يتكلم مع أمه بطريقة غير لائقة أو لايزورها ولايسأل عنها..ونسأل من الله الهداية للجميع

موناليزا يقول...

من كل بستان زهرة
ـــــــــــــــــــ
أهلا بيكِ حبيبتى
يارب ياحبيبتى.. ربنا يتقبل دعائك

ربنا يخليهالك يا حبيبتى
ويرزقك بالذرية الطيبة اللهم امين

نورتينى يا جميلة واسعدتينى بمشاركتك


*********************************


فارس عبدالفتاح
ــــــــــــــــــ
أهلا بيك أستاذ فارس

عشان يعتمدوا على نفسهم محتاجين اهتمام ورعاية وتربية من حضرتك ليهم غير عادية

هو مش لازم يوم واحد بس المهم يكون فيه هداية من آن لآخر

مفيش أب وأم بيطلبوا هدايا من ولادهم على حد اعتقادى

ربنا يخليكم لبعض

أشكرك جدا لتعليقك
يسعدنا دوام التواصل


*****************************

ابن النيل
ــــــــــــ
وعليكم السلام ورحمة الله وبركاته
أهلا بيك يافندم
فعلا الأم والاب نعمة غالية
ومعاك ان مانخصصش يوم واحد بس فى السنة ليهمبس تقدر تقول انها تذكرة للى بينساهم طول السنة

ربنا يرحم والدتك ويتقبل منك صالح الاعمال

ربنا يرزقك بالذرية الطيبة

أشكرك جدا لتعليقك
يسعدنا دوام التواصل


**********************************

د/ هيما
ــــــــــ
أهلا بيك يادكتور
اقتراح يستحق التقدير

أشكرك جدا لتعليقك
يسعدنا دوام التواصل

(المهاجر الى الله) يقول...

قصة جميلة ورائعة وفيها ملمح ظريف