كلمات قاتلة

بعض الكلمات تحيي وتميت ولكن أغلبية الناس لا يدركون ذلك.. فبكلمة واحدة قد تجعل حياة فرد من أسوأ مايكون وبكلمة أخرى قد تجعله يلمس السماء بيديه.
والأمثلة كثيرة منها:
* مفيش جديد؟. - سؤال ملازم لمن عدت سن الخامسة والعشرين-.
فتقول المتلقية بداخلها: والله لو فيه هقول وهعمل إعلان كمان بطلوا تسألونى السؤال ده بقى.

--------

* فرصتك فى الزواج أصبحت قليلة وماتطمحيش فى عريس كويس وماتجوزش قبل كده.. أنتِ مُطلقة .. فوقى.
-أنا أشرف من بنات كتير لسه ماتجوزوش وطلاقى مايدينيش أنا عمرى مامشيت مشى بطال ومن حقى احلم بزوج يعوضنى عن اللى آسيته فى حياتى.

-------

* أنا عايز ماما- يقولها الطفل لعمته-
- بعد ماضيعت عمرى عليك بتقولها هى يا ماما وهى كانت فين من وأنت طفل صغير وبتعيط جوه حضنى من قسوتها عليك.. دلؤتى بقت هى ماما.. طب وأنا!!.

--------------

*لازم تخرجى.. لازم ترجعى شغلك حتى لو مابتحبيهوش.
-كل ده ليه عشان اتزوج.. عايزنى أعرض نفسى .. ناقص أعلق ورقة على ضهرى وأكتب فيها مطلوب عريس.. للدرجة دى شايفينى رخيصة ولا أنا بقيت حمل تقيل عليكم!.

----------------

*كله كان بمزاجك.. وأنا ماغصبتكيش على حاجة.. يقولها لخطيبته.
غلطتى أنى حبيتك أكتر من نفسى وسلمتها ليك عشان أنت ماتزعلش ومفكرتش فى أى حاجة تانية.

--------------

*مفيش أخبار عن طليقك؟ وأنتِ عاملة إيه بعد الطلاق؟.
بحاول انسى وياريت مش كل شوية حد يفكرنى.

----------------

* أنتِ طالق.
- فى لحظة كده بيتى اتهدم.. حتى لو كنت أنا اللى طلبته فى لحظة كبرياء ومحاولة لحفاظى على كرامتى أنت ماصدقت.. ليه مادافعتش عن بيتنا أكتر من كده.

------------------

*أنا مش ممكن ارجع أعيش فى مصر تانى واقبض 200 جنيه أنا دلؤتى بقبض بالدولار. - يقولها لصديقه-
- سافرت وجاى تتمنظر عليا وأنا اللى ياما سلفتك زمان رغم أنى كنت بقبض أقل من مرتبك اللى مش عاجبك دلؤتى.

----------------

*أنا خلاص دفعت تمنك واللابتوب بتاعى أغلى منك- يقولها لزوجته-.
-أنا ماكنتش للبيع ولا عمرى هكون.

--------------------

* أنتِ مش حلوة زى مامتك ليه؟. - تقولها إحدى المعارف لفتاة صغيرة-
- ربنا خلقنى كده.

-------------------

*ياغبى.. عمرك ماهتفلح.- يقولها أب لابنه-.
- بطريقتك دى فعلاً عمرى ماهفلح.

------------------

*عايزك تصبغى شعرك أصفر وتقصيه زى فلانة وتلبسى زى علانة وترفعى حواجبك وتركبى ضوافر.
- للدرجة دى مش عاجبك شكلى طب استنى لما نتجوز ده احنا لسه مكتوب كتابنا من كام يوم لحقت تزهق من شكلى.

------------------

*أنا عايزاك تفسحنى.. أنا تعبانة ومحتاجة أخرج- تقولها لشقيقها-.
يرد عليها قائلاً :محدش فايق لحد.. بصى لما آجى أخرج مع فلانة صاحبتى هقولك وهوديكى تقعدى عند علانة صاحبتك ولما أخلص خروجتى هبقى آجى آخدك.
- يعنى صاحبتك أهم منى!!. هيحصل إيه لو عملت لى خروجة مخصوص عشان تبسطنى فيها.. هو أنا مش ليا حق عليك.

--------------------

*هو فيه بينا وبين بعض حاجة.
- لا والله بعد حب سبع سنين وماكنش فيه!!
- أنا شايفة كل واحد يشوف حياته وبعدين أنا ما وعدتكش بحاجة.

---------------------

*تؤجل القضية.
- لغاية إمتى هتفضل تتأجل هو أنا هضيع عمرى كله فى المحاكم.

--------------------

*أنا جاى أعزمك على فرحى.
- وحبك ليا كان كذب.
- بس أنا عمرى ما قلت لك أنى بحبك.

----------------------

*مش عايزة مراتك تعرف عنى حاجة- تقولها لشقيقها-.
- بتتكلمى عنها كده ليه- يقولها الأب بغضب شديد-
-ياااه خايف على مشاعرها أوى كده حتى وهى مش موجودة وأنا مش مهم رغم أنى أقرب لك منها.

-------------------

* مالوش لازمة.. ايه الفايدة يعنى.. إحنا مش مقتنعين.
- بس أنا مقتنعة ..كل ده عشان عرفتكم أنى هزور ملجأ ده أنا لو قلت أنى هخرج مع زمايلى ماكنتوش اعترضتم كده.

--------------------

* أنا مش ممكن أتزوج واحدة أخوها مدمن مخدرات.
- طيب أنا ذنبى إيه!!.

---------------------------

*ابنى أحلى منك.. أنا عارفة خدك على إيه.
- ماهو القرد فى عين أمه غزال.

-------------------------

* مانكرش أنى بحبك بس مش لدرجة أنى أكمل حياتى معاك
- لأ يا شيخة قولى كلام غير ده.. أومال درجة حبك واصلة للكلام فى التليفون والخروجات وبس

------------------

* الحقنى يادكتور .. ابنى بيموت (تقولها أم لطبيب فى مستشفى عام).
- دماغك بقى شوية ماتصدعيناش.. لما أتغدى هشوفه.
* لسان حالها يقول" شوفت العمى يا بعيد"

----------------------

* حرام عليكِ أنا واقفة من الصبح فى الطابور عشان اخد الدواء لابنى وفى الآخر تقوليلى احنا خلاص قفلنا.. ياشيخة حطى نفسك مكانى. (تقولها أم فى مركز الأورام لمسئولة الصيدلية).
- أنا عمرى ماهكون مكانك.
* لسان حالها يقول"محدش ضامن نفسه وربنا كبير يجيب اللى فى ابنى فيكِ "

---------------------

*آدى اللى خدتيه من الحلال.. ياما اتحايلنا عليكى ايام الجامعة تعيشي حياتك مع الشباب اللى كانوا هيموتوا عليكِ وكنتى تردى بكل ثقة أنك محوشة كل الحاجات دى لزوج المستقبل.. طيب أهو سابك وبقيتى أنتِ الوحيدة اللى فينا مطلقة.
-أنتِ جاية تفتنينى فى دينى.. أنا ماعملتش حاجة حرام أو غلط هو اللى قليل الأصل ومالوش فى الطيب.

------------------------

*ماقولتيش ليه إنك متزمته ومش عايزة تسيبى شعرك وترقصى فى فرحك .. كنتى لبستى نقاب أحسن.- تقولها لعروسة ابنها-.
- أنا مش محتاجة أتنقب عشان أنفذ تعاليم دينى.

-------------------

* أنا عايز أصارحك يا ماما أنا إتجوزت عرفى بس خلاص قطعت الورقة وكمان مدمن مخدرات بس بحاول أبطل.
يا خيبة أملى فيك وبتقولى ليه!! عايز تموتنى!! ولا عايز تبين لى أنى معرفتش أربيك.. ياخسااارة عمرى.

-----------------

* يابختك اتبنى لك قصر فى الجنة بتعيطى ليه بقى..- تقولها لأم ماتت طفلتها-.
عقبالك يارب بإذن الله.

-------------------------

*بعزمك على فرحى وأنا عارفة أنك مش جاية عموماً فرحى بكرة- تقولها لصديقتها وتنهى الإتصال قبل أن تخبرها عن مكان الفرح-
-وبتعزمينى ليه تأدية واجب.. طيب ما أنا عزمتك فى فرحى قبلها بكتير وكنت عارفة برضه أنك مش جاية.

-------------------

* قومى يا بنت الـ (...) اعملى كذا.
- وايه لازمة الشتيمة ولا هو طولة لسان وخلاص.

----------------------

*حافظى على شرفك- تقولها سيدة لداعية تجلس جوارها فى المواصلات-.
- بتقولى أنا كده!! هو أنا ليا إيه غيره عشان ماحفظش عليه ولا أنتِ شوفتى منى إيه فى أول مرة بنتقابل فيها عشان تقوليلى كده!!!.

-------------------------

*ماتعملش كده تانى
-ليه
-عشان حرام
-أنا عايز سبب مقنع
طب أقول أنا سبب مقنع تانى منين!.

-----------------------

*مين فلانة اللى باعتالِك رسالة اوف لاين على الايميل دى؟
- أنت بتتجسس عليا.. أنا مابعملش حاجة غلط لكن أرفض شكك فيا ولا أقبل انتهاك خصوصيتى.

----------------------

*أنت فاشل
- أناَ!! بعد تعبى وجهدى ده كله.. طيب يابابا شكراً.

===

أنا عارفة أنى عرضت أمثلة كثيرة ولكنها حقاً مؤلمة لدى من يستقبلها وأعلم أنه يوجد المزيد منها والتى سأتركها لكم لتكتبوها فى التعليقات.

فقط سأختم بنصيحة:
ضربة الحبيب قاتلة فقد تقبل كلام مميت من الأغراب وتستقبله وممكن جداً ترد عليه لكن كلمة واحدة من الحبيب غير مقصودة تترك جرح غائر بداخل القلب.. ولذلك رجاء خاص أن تحافظوا على قلوب من تعلمون أنكم تسكونها لأنهم مهما عملوا مايستاهلوش منكم أى جرح. وصدقونى أرخص هدية وأجملها هى الكلمة الطيبة. وسبحان من جعلها فى ديننا صدقة نؤجر عليها.