الخميس، 9 يونيو 2011

إحساس خاطئ


غالبية الرجال يصنفون النساء إلى نوعين: نوع يتزوجوه ونوع آخر يصاحبوه.
وهكذا أيضاً غالبية النساء تصنف الرجال إلى نوعين: نوع تتزوجه ونوع آخر تفضل صُحبته.
ولكن مع الإختلاف فى نوعية الاختيار..
فالرجل مثلاً: يرفض أو يتردد كثيراً قبل الارتباط مثلاً بامرأة أكثر نجاحاً منه أو محترمة زيادة عن اللزوم من وجهة نظره أو حتى تعمل فى وظيفة عادية..
ومع ذلك فهو قد يفضل الارتباط بمن هى أقل منه ثقافياً بمراحل أو غير ملتزمة دينياً أو غير محجبة والغالبية يفضلونها لا تعمل وإذا وافق على عملها يكون بغرض مساعدته فى المعيشة.
حتى الملتزم دينياً ممكن جداً يرتبط بمن هى غير محجبة أو محجبة على الموضة بحجة أنه هيهديها بعد كده!.
أو يرتبط بامرأة عاملة وهو ناوي يقعدها فى البيت بعد كده.
أو يبقى عارف ماضيها الغير محترم وعادى برضه مفيش مشاكل.
وكم قابلنا رجال يرفضون الارتباط بصديقتهم فى العمل أو فى الدراسة مثلاً لمجرد أنها محترمة أوى أو عاقلة زيادة عن اللزوم أو ملتزمة دينياً وأكيد هتخنقه..
أما تفكير النساء فهو مختلف تماماً: فعند المرأة أساسيات لا تتنازل عنها بسهولة..
مثال: يكون عنده وظيفة محددة أو على أقل تقدير عنده دخل ثابت وطبيعى يكون عنده شقه ..
الرجل المحترم بالنسبة لها فخر..
الرجل الملتزم دينياً بالنسبة لها مصدر للأمان فهذا ضمان لأن يتقى الله فيها..
تفضل الارتباط بمن هو متقارب معها فى المستوى التعليمى والثقافى.. تفضله أعلى منها فى كل شئ..
ولكنها مثلاً تحب تقعد فى مكان فيه شخص كوميدى لمجرد الترفيه وإذا غاب تسأل عنه ليس لأنها تهيم به حباً ولكن لأنه يضفى جو من المرح على الجلسة.. كحبها لمشاهدة أى ممثل كوميدى تشاهده فى التلفاز ولكنها لا تفضل أن تحمل اسمه يوماً ما.
مثال آخر: حينما تكون فى مكان يجلس فيه رجلاً مما يقال عنهم أنه مقطع السمكة وديلها وينظر لها كثيراً ممكن جدا تبادله نفس النظرات أو حتى تختلس النظر إليه ليس لأنها وقعت فى غرامه من أول نظرة ولكنها نظرة فضول كنظرتها لأى ممثل مشهور سمعت عنه كثير..
ولذلك على الرجل إذا أراد أن يعرف المشاعر الحقيقية لأى امرأة تجاهه أن يسألها مباشرة ولا يعتمد على إحساسه لأن غالبية الرجال إحساسهم خاطئ واختياراتهم لا تكون دائماً صائبة ومن ثم يندمون عليها فيما بعد.
والمرأة أيضاً إذا أرادت التأكد من مشاعر شخصاً ما تجاهها فلتنتظر دخوله لبيت والدها.



هناك 38 تعليقًا:

ميرا ( وومن ) يقول...

عجبني البوست ده وخصوصا في تفسيرك في وجهه نظر الراجل للمرأة

خصوصا من هي متفوقة عليه أو تعمل في وظيفة أعلي منه أو تعمل بالأساس

أو لو كانت مدونة أو بتكتب أو صحفية

رشيد أمديون يقول...

السلام عليكم

قد تكون وجهة نظرك في من الصحة الشيء الكثير ولكن هناك استثناءات دائما.

استفدت شيء واحد قد تجاهلته أو كان غائبا عني وهو مسألة النظرة المتبادلة من المرأة التي كثيرا ما يخطئ فيها الرجال..

تحيتي

مصطفى سيف الدين يقول...

بوست يستحق القراءة بامعان والتأمل
وجهة نظرك جديرة بالاحترام بها الكثير والكثير من الصواب لكن الاستثناءات كثيرة

تحياتي

سواح في ملك اللــــــــــــــــــه- يقول...

اااااه ياامة الله

قلبتي علينا المواجع

كلامك فيه كتير اوي من الصحة

بس علي فكرة

مش عيب ان الرجل مايرضاش ان زوجته تشتغل

دي وجهه نظري


تحيتي

Carmen يقول...

معاك حق جدا المرأة دايما بطبعها مبالغة في ردود افعالها واظهار مشاعرها وكتير بيتفسر خطأ من الرجال
بوست هايل تسلم ايدك

غير معرف يقول...

بصي
فيه حاجات كده عمرها ما هتتغير الظاهر والله اعلم .. حتى بعد الثورة :)

افكار ده عن دي.. وافكار دي عن ده.. كل واحد بيبص بصة ومقتنع انه صح.. الست ما تخرجش عنها،، والراجل ما يخرجش عنها.. والنظرة الكويسة الموضوعية بتكون استثناء !!

مجتمعنا أصــّـل فينا شوية انطباعات، عشان نغيرها لازملنا ثورة ع الافكار والأدمغة .. ودي عايزة شغل بعد الضهر
::
هـا فاضية ولا نأجلها كمان سنتين على ما نفوق؟؟
:: :: :: :: ::

مها ميهوووو

Days and Nights يقول...

دائما وأبدا رائع هو تفكيرك ومنطقك

دمتى سعيده

تامر

Lobna Ahmed Nour يقول...

حقيقي فعلا
الغالبية بترتبط بالنوع المخالف ليها تمامًا وغير المناسب بالمرة
بزعل أوي لما بشوف بنات على قدر عالي من الاحترام والثقافة وبعدين ترضى ترتبط بحد أبعد ما يكون عن ما تستحقه

eng_semsem يقول...

يحتاج الرجل لرؤية موافقتها قبل موافقة اهلها يحتاج الرجل ان يشعر انها ستكون سعيده بقدومه كما يشعر بسعادته لارتباطه بها عذرا سيدتي فانا لا ارى ان اول الطريق هو باب البيت وخصوصا لو كان يعرفها او يتكلم معاها لابد هي ان تفتح له باب بيتها بنفسها اولا ثم تاتي مرحلة الاب
تقبلي تحياتي

Unknown يقول...

و الله يا موناليزا ..
الرجال يخشون من القوية و المستقلة و الناجحة جدا جدا
لانهم يخافون ألا يستطيعون إحكام السيطرة عليها فيما بعد .. فيبدون صغارا و تبدو هي أكبر و أنجح و أكثر ثقافة و هذا يتعارض مع مفهوم الرجل الشرقي .. اللي اتربى على مفاهيم كتير متلخبطة اصلا .

rack-yourminds يقول...

الرجل يا سيدتي عندا يفكر في الزواج يريد زوجه صالحه مش زوجه مصاحبه رجاله ,وطبعا هي بتبرر الصحوبيه مره بالزماله ومره بالصداقه البريئه وغيرها من العنواين البراقه .....
تفتكري انه فيه رجل يقبل انه زوجته كانت مصاحبه رجاله قبل منه !؟

مهو اصلي اللي بتصاحب اكثر من رجل قبل الزواج مش هتقدر تغير طبعها بعد الزواج,,,, ويا سلام بقي لما يجي واحد من اللي كانت مصحباه ويعطي كام نصيحه للزوج في كيفية التعامل معها مهو اصلي كان مصاحبهاوفاهم طبعها اممتي تغضب وامتي تهدأ ههههه

يا سيدتي الرسول قال فاظفر بذات الدين ولم يقل اظفر بضعيفة الايمان وتاخد ثواب لوقدرت تغيرها وتبقي متدينه!!

عندما نتزوج نريد زوجه صالحه تعينا علي الحياة وتكون سكن وموده ورحمه ,
مش نتزوج واحده عاوزه تصليح وتعديل يبقي كده بنتزوج عشان نتبهدل مش نرتاح

اكتر شئ بقي يستفز انك تلاقي واحده متزوجه وزوجها مش مالي عينها وهتلاقي النوعيات ديه كتير وطبعا كل التجاوزات باسم الزماله
__

معلهش كلامي بالعاميه كتير بس عشان موضوعك مهم وحبيت اخد راحتي

وميــــض أمــــل يقول...

فى أول مرة أزور المدونة فيها يكون تعليقى باتهامك بظلم الرجال لأنى وجدت حقيقة كثير منهم عكس ما ذكرتى تماما

وربنا يهدى الباقيين بقى :)


أحب اسجل اعجابى بالمدونة


تقبلى مرورى

reemaas يقول...

وجهة نظر فى الغالب صحيحة وبتحصل ممكن مش بنفس السرد لكن فعلا موجودة

دعاء العطار يقول...

متفقه معاكى جداً ياموناليزا مع ان برضه لكل قاعده استثناء زى ماقال أبو حسام الدين

عارفه تقريباً يتعدوا على الصوابع اللى ممكن يقبلوا انها تكون أنجح منه

زمان كنت منزله موضوع على جروب " عروسه من غير شبكه "

اسمه مراتى مدير عام .. فهل تقبل ؟

ماقولكيش ياموناليزا على كمية الاندهاش اللى اندهشته ساعتها

من ناس أنا حاسه انهم عقليه ومثقفين ولهم أرااء تحترم

بس الواضح ان الرجل الشرقى مش بيعترف بنجاح المرأه

مش عارفه العقليه دى هتتغير امتى ؟

Mahmoud Ahmed يقول...

و الله كلام مفييييد جدا جدا
و كلام مهم و لازم الواحد يخلي باله منه

حمـــــــــــــــــــــة يقول...

الإحساس هو جزء مهما في تحديد الأهداف و ما ذكرتي صحيحا نابعا من الواقع المعاش.....
ولكن :التمدن و تفضيل الجانب المادي سيظل مؤثرا...........هذا دون نسيان "الخلفية" ألا وهي بيئة النشئ فهي قوة جاذبة لا مفر منها للعديد
البشر جسدا وروحا و يجب التوفيق بينهما دون ذلك لا مجال لحياة سعيدة.

Single Mummy يقول...

يا بنتى يا حبيبتى دائما يتوق المرء لما ليس بيدة...خلص الكلام

ابراهيم رزق يقول...

اختى العزيزة

تسمحى لى ان اختلف معكى قليلا

وجهة نظرك احادية و فى الغالب وجهة النظر الاحادية غير صحيحة
بعض تصنيفاتك طبقا للمظهر مثل غير محجبة او حجاب على الموضة و هذه التصنيفات ايضا قد تكون غير صحيحة
اكتفى بهذا القدر و اتمنى الخير لكم و لى

خالص تحياتى

أم يقول...

مسألة الاختلاف بين الرجل والمرأة هي مسألة فطرية منذ خلق أبونا آدام وأمنا حواء والعلاقة بين الطرفين في تطور مستمر منذ بدء الخليقة وإلى الآن موضوع أكثر من رائع

الاحلام يقول...

نوعا اخر من النساء والرجال
فهما لا يعنيهما الاخر باى حال من الاحوال فلا المرأه تنتبه للرجل ولا الرجل ينتبه للمرأه فكلاهما فى وادى اخر
دمتى بخير تقبلى تحياتى الاحــــلام

Unknown يقول...

السلام عليكم..
أختي موناليزا..
أتفق معك بنسبة كبيرة فيما ذكرتيه عن طريقة اختيار المرأة..
لكن أختلف فيما ذكرتيه عن الرجل.. هو صحيح ولكن فقط فيمن لا يحكمون الشرع في اختيارهم..!
والذي اتفق فيه معك كليا هو الفقرة الأخيرة (باللون البني).
وعلى فكرة موضوع الطرح مهم جدا.. وأرى أنه كان يحتاج مزيد من التعمق أو التفصيل.. يعني بوست تاني.
تحياتي الدائمة..

ليلى الصباحى.. lolocat يقول...

السلام عليكم
طبعا انا عارفة شخصيتك من كتاباتك
وعارفة انت تقصدى ايه من النصيحة دى

باختصار انا عجبنى البوست اوى
لانك بتشرحى صفحات شريحة كبيرة فى اى مجتمع عربى مش فى مصر بس

استمتعت بقراءة البوست والتعليقات عليه

برغم ان هذه هى حقيقة المجتمع الان واغلب الرجال والنساء الا من رحم الله

لكن فى النهاية يظل الالتزام الدينى مفتاح كل فلاح ونجاح سواء رضى الانسان هذا الالتزام ام رفضه


ومقاييس الحب والزواج يجب ان تدور فى مدار الشرع والا هلكنا

شكرا لك اختاه
اعزك الله ورزقك كل خير
تحياتى لك

نسرين شرباتي "أم سما" يقول...

ممممممممممممم
لماذا يرقض الرجل الارتباط بزوجة محترمة؟؟

أعتقد حلم كل رجل الارتباط بفتاة محترمة لكي تكون له عوناً عى الحياة

أصلاً أيامنا هذه
كثير من الرجال ما زالوا يتزوجون على زوء "الماما"
وهذه مصيبة بحد ذاتها
فإن رأتها "ماما" جميلة سيوافقون من غير تردد
وطبعاً الأم لا تريد إلا "بنت جميلة صغيرة تجيـــــــــد الرقص،، ذات شعر طويل تتباهى بهاأمام الآخرين"

وكثيراً ما يبتعدون عن المتعلمة ويخافون منها لأنها باعتقادهم ستتعالى عليهم وعلى ابنهم

مشكلة أغلب الرجال أنهم منقادووووووووووووون :)

وابن "ماما"

معلش فقدت تركيزي علشان البنات :)
والله معرفة كنت حقول ايه كمان

كريمة سندي يقول...

إن الاحترام المتبادل هو الذي يؤدي إلى إنجاح أي علاقة سواء بين المتزوجين أو بين الموظفين أو بين الأسرة

وجه نظر في محلها تحياتي الصادقة

غير معرف يقول...

صباح الغاردينيا مونا ليزا
انا امبارح كتبت تعليق
ومش عارفه طار فين
لكن صدقيني البوست بتاعك
كتب وناقش بروعة يعني بجد
صعب ازيد بعد كلامك بس صدقيني
بين كل ماقيل لابد هناك استثناءات "
؛؛
؛
لروحك عبق الغاردينيا
كانت هنا
reemaas

نيللي علي يقول...

انا هعلق اولا على موضوع الراجل اولا اختياراته الخاطئه ونظرته الخاطئه هو اساسه الدين ...يعنى بيبص لحاجات تافه وبنسى ان يختار المراه الصالحه


بالنسبه للمراه انا كمان بختلف معهم لانهم اخرا حاجه ينظروا ليها هى الدين اهم حاجه شقه وعربيه وبعدين بيصلى اوكى يلا على بركه الله

الجواز والارتباط دلوقتى بقى الحكم عليه سطحى

وربنا يهدي الناس يارب

فارس عبدالفتاح يقول...

السلام عليكم

قطعا البيئة الاجتماعية والثقافية هي عامل مؤثر وفاعل في الفرد وكل النماذج التى قمتي طرحتها من الذكور كلها تنطبق على ذكور الوجه البحري من مصر تقريبا الدلتا

يعنى لو قلنا لرجل من صعيد مصر هي هتخرج من البت وتشتغل عشان تجبلك فلوس عشان تساعدك على اعباء الحياة

ههههههههههههههههه


مش هقلك رده هيكون ايه لكن هترك الاجابة لاستنتاجك الخاص

موناليزا يقول...

ميرا
ـــــــــ
أهلا بيكِ يا ميرا
ايوة وكله كوم وحكاية رفض الرجل للبنت اللى بتدخل على النت ده كوم تانى خالص:)

أشكرك جدا لرأيك ولتعليقك
وفى انتظارك دايماً


********************************

أبو حسام الدين
ــــــــــــــــ
وعليكم السلام ورحمة الله وبركاته
أهلا بيك أستاذ رشيد
طبعاً يافندم أكيد فيه استثناءات

:) وأنا سعيدة بإفادتك

أشكرك جدا لتعليقك
ويسعدنا دوام التواصل


********************************

مصطفى سيف
ــــــــــــ
أهلا بيك يادكتور
أشكرك جدا لرأيك فى البوست
وفعلا هناك استثناءات

يسعدنا دوام التواصل


********************************

سواح فى ملك الله
ــــــــــــــــ
أهلا بيك أستاذ خالد
بداية أنا عايزة اشكرك لأنك بتنادينى بأمة الله لأن ده أحب الأسماء الى قلبى فبجد لك منى كل الشكر لما تسببه لى من سعادة:)

ليه بس قلبت عليك المواجع!

أنا معاك طبعاً ومش عيب ولاحاجة بس هو أصلاً ياخدها بتشتغل ليه لو هو عايزها ماتشتغلش!

أشكرك جدا لتعليقك
ويسعدنا دوام التواصل


*******************************

كارمن
ــــــــــ
أهلا بيكِ يا سمسمة
أشكرك جدا لاتفاقك معى
وأسعدتينى بتواجدك وتعليقك
فى انتظارك دايما


******************************


أحسن تستاهل
ـــــــــــــــ
أهلا بيكِ يا ميهو
حلوة ثورة على الأدمغة دى:)
وتفتكرى هتجيب نتيجة بعد قد إيه؟
أنا بقول نبدأ فيها من دلؤتى والنتيجة دى بتاعة ربنا

نورتينى ميهو حبيبتى
واسعدنى تواجدك


********************************

دايز اند نايت
ــــــــــــــ
أهلا بيك أستاذ تامر
الله يكرمك يارب..فما توفيقى الا بالله
أشكرك جدا لرأيك فيما اكتب

يسعدنا دوام التواصل


*******************************

لبنى أحمد نور
ــــــــــــــ
أهلا بيكِ يا لبنى
البنات اللى بيقبلوا بيكون يا إما اتخذلوا من اللى شبهم يا إما ده اللى كان متاح ليهم

أشكرك جدا لتعليقك
فى انتظارك دايما


********************************

انج- سمسم
ـــــــــــ
أهلا بيك يا باشمهندس
وانا أحترم وجهة نظرك جداً

أشكرك لتعليقك
ويسعدنا دوام التواصل


********************************

شيماء على
ــــــــــــ
اهلا بيكِ يا مشمش
متفقة معاكِ جدا لأنه حقيقى جداً جداً

أشكرك جدا لتعليقك
وفى انتظارك دايما


*******************************

راك يورمايند
ـــــــــــــــ
أهلا بيك يافندم

إجابة على سؤالك
"تفتكري انه فيه رجل يقبل انه زوجته كانت مصاحبه رجاله قبل منه !؟"
أيوة افتكر وكتير جداً كمان
وممكن يتزوجها أصلاً لانه كان من ضمن اصدقائها

أنا متفهمة وجهة نظرك لكن اللى بيفكر كده بيكون هو كمان معندوش صديقات من النساء لكن لو هو عادى وله صحبات مش هيلاقى مشكلة ان هى كمان يكون لها اصحاب

جعلتنى ابتسم حقاً ومن الآن يبحث عن زوجة صالحة أو ذات دين!!!
ومن الآن يطبق شرع الله ووصايا رسوله!!

خد راحتك يافندم وعلق بأى طريقة فتعليقك يثرى غالموضوع
أشكرك جدا لتعليقك
ويسعدنا دوام التواصل



******************************

وميض أمل
ـــــــــــ
أهلا بيكِ فى زيارتك الأولى
:) لى حق فيما كتبت إذن فلم ألتقى أو أسمع إلا ما ذكرتهم

أشكرك جدا لزيارتك
وفى انتظارك دايما


********************************

ريماس
ــــــــــ
أهلا بيكِ يا ريماس
أشكرك جدا لاتفاقك معى
نورتينى حبيبتى
وفى انتظارك دايما


*******************************

دعاء العطار
ـــــــــــــ
أهلا بيكِ يا دعاء
طبعاً يا حبيبتى الاستثناء موجود

إذا كانوا الغالبية مش عايزينها تكون بتشتغل فهيقبلوا انها تكون مدير عام كمان:)

أشكرك جدا لتعليقك
وفى انتظارك دايما


*******************************

سبايدرمان
ــــــــــــ
أهلا بيك يادكتور
أشكرك جدا لرأيك

يسعدنا دوام التواصل


*******************************

موناليزا يقول...

حمة
ـــــــــ
أهلا بيك يافندم
أشكرك جدا لتعليقك المنطقى
يسعدنا دوام التواصل


******************************

سنجل مامى
ـــــــــــ
أهلا بيكِ يا سارة بعد طول غياب
:) فعلا جبتى الخلاصة بس برضه مش عايزين نعمم

نورتينى حبيبتى
وفى انتظارك دايما


*********************************

ابراهيم رزق
ـــــــــــــ
أهلا بيك أستاذ ابراهيم

اتفضل يافندم اختلف معايا زى ما تحب

لأن المظهر اول شئ الانسان بياخد انطباع بيه عن اللى قدامه

يعنى مثلا لو لقيت رجل ملتحى ومتزوج غير محجبة مثلاً يعنى ده تسميه إيه؟
أو لقيت أستاذ جامعى ومتزوج واحدة لم تكمل تعليمها مثلاً ده تقول عليه إيه؟

احترم اختلافك معى وأشكرك لمشاركتك
يسعدنا دوام التواصل


*********************************

أم
ــــــــ
أهلا بيكِ
أشكرك جدا لرأيك
وفى انتظارك دايما


*******************************

الأحلام
ـــــــــ
أهلا بيك يافندم
فعلاً فيه انواع كتيرة مش نوع واحد

أشكرك لتعليقك
ويسعدنا دوام التواصل


******************************

ماجد القاضى
ــــــــــــ
وعليكم السلام ورحمة الله وبركاته
أهلا بيك أستاذ ماجد
أشكرك لاتفاقك معى
وفعلا أنا قصدت من لا يحكمون الشرع فى اختياراتهم

وسعيدة باتفاقك الكلى معى فى الفقرة الأخيرة
أشكرك جداً لرأيك ولكنى أردت أن أترك التعمق لمن يترك تعليق حتى لا أتهم بأنى لا أعطى للقارئ فرصة لأن يقول أى شئ لأنى قلت كل حاجة:)

فى انتظار تعليقك دائما
ويسعدنا دوام التواصل


******************************

أم هريرة
ــــــــــ
وعليكم السلام ورحمة الله وبركاته
أهلا بيكِ يا لولو

:) وهذه ميزة قرائى المتابعين واصدقائى الدائمين

ده حقيقى فديننا لم يترك شيئاً إلا وتحدث عنه بما فيه الخير للجميع

أشكرك جدا لتعليقك
وفى انتظارك دايما


*********************************

نيسرينا
ــــــــ
أهلا بيكِ يانيسو
هو ممكن مايرفضهاش بس يفضل واحدة تكون عادية تماماً علشان ماتخنقوش اعتقادا منه ان المحترمة دى هتبقى شخصية جادة وخنيقة فى البيت

عندك حق وعشان كده لو الأم اتقلبت على الزوجة ممكن جدا يحصل طلاق بكل سهولة

أشكرك جدا لتعليقك
وفى انتظارك دايما


*********************************


كريمة سندى
ــــــــــــ
أهلا بيكِ يا كريمة
عندك حق
أشكرك جدا لرأيك
وفى انتظارك دايما


******************************

ريماس
ـــــــــ
أهلا بيكِ يا ريماس
هو بلوجر كده بيبقى عليه حركات تكسف.. انا بعتذر لك نيابة عنه وبشكرك انى كتبتى تعليق تانى

أشكرك جدا لرأيك وطبعا يا حبيبتى الاستثناءات موجودة

أسعدتينى بتواجدك
وفى انتظارك دايما


*******************************

نيلى
ــــــــ
أهلا بيكِ يا نونا
ده حقيقى فالغالبية معتقدين ان المرأة الملتزمة دينية مش هتعرف تسعده

والمرأة ممكن يكون تفكيرها ان دينه لنفسه يعنى لو فقير ومتدين ده مش هيأكلها عيش

أشكرك جدا لتعليقك
وفى انتظارك دايما

*******************************

فارس عبد الفتاح
ــــــــــــــــــ
وعليكم السلام ورحمة الله وبركاته
أهلا بيك أستاذ فارس
:) وعشان كده من ضمن طموحاتى لزوج المستقبل انه يكون صعيدى

أشكرك جدا لتعليقك
ويسعدنا دوام التواصل

هبة فاروق يقول...

حلو البوست وتحليلك ووجهة نظرك فى محلها
اؤيدك فى كثير مما طرحتية
تحياتى

Unknown يقول...

غالبية الرجال يصنفون النساء إلى نوعين: نوع يتزوجوه ونوع آخر يصاحبوه.
وهكذا أيضاً غالبية النساء تصنف الرجال إلى نوعين: نوع تتزوجه ونوع آخر تفضل صُحبته.
ــــــــــ
صدمتنى هذه الفقرة .......

فارس عبدالفتاح يقول...

سلام عليكم ‏

بالمناسبة انا نسيت امبارح ان اتكلم في عدة نقاط مهمة جدا بالنسبة لي ، ولكن ما جعلني انسى هو تحليلك الخالي من ‏الموضوعية بالنسبة للرجل . ‏

أولاً : ‏

علينا ان نفرق بين الذكورة والرجولة ، هذان امران مختلفان تماماً جملةً وتفصيلاً .. وكل ما ذكرتيه امس كان عن ‏الذكورة وليست الرجولة لذلك كنت دقيق في هذا الامر في تعليقي . ‏

ثانياً : ‏

الرجل ( الرجولة ) ‏

لا يرفض ان يرتبط بامراة اكثر منه نجاحاً لانه سوف يكون نجاحها في البيت ، لانه لا يقبل بان تخرج الى العمل دون ‏سبب ودون حاجة ملحة في هذا الصدد واذا وافق فانه يوفق على مضض والحاجة هي التي تضطره على القبول بها ‏كذا امر . ‏

كذلك ، ان تكون محترمة او ملتزمة ، بصراحة اني استغرب بل اتعجب من هذا الطرح ، كيف لي ان لا ارغب في فتاة ‏جادة وملتزمة ، شيء مستهجن ومستغرب ولا اجد له منطق او فلسفة تحكمة وتكون فلسفة تعتمد على معيار القيمة ، ‏يستنكر ان يرتبط رجل بفتاة أو امراة محترمة وملتزمة ..! ‏

ضحكت حتى كدت اقع على ظهري ، على كلمة يهديها بعد الزواج ، اي ساذج واي مغفل واي منحرف فكريا واخلاقيا ‏، يقتنع بهذا الكلام ..!‏

ومن هذا ( الرجل ) الذي يقبل بان يرتبط بفتاة ذات سمعه سيئة( ماضي )..؟

لقد ضغط ابي علي بان اتقدم لفتاة اعرف اهلها جيدا اخوتها وابيها وهم اناس محترمون ، واعلم جيدا ان هذه الفتاة فتاة ‏جيدا ، وبعد زيارتهم في بيتهم ، قال لي اخي الاصغر ، ( وعلى فكرة هو متزوج ومعه ابن الان ) ان هذه الفتاة قد ‏قبلت بان تخرج من احد اصدقائة لانه الح عليها في ذلك لانه طلب يديها من ابيها ولكنه رفض . ‏

وعلى حسب تحليلي الشخصي ان هذه الفتاة قبل لمجرد انها تريد ان تعرف ماذا يريد منها هذا الشاب او كانت تأمل انه ‏يحبها ومصصم على ان يعاود الكرة في التقدم لها من جديد . ‏

فاستنكرت هذا الفعل من تلك فتاة ، من المفروض ان هذه الفتاة من اسرة محترمة لا تقبل بان تفعل مثل هذا الامر ، ‏حتى ولو كانت تبحث عن الحب او الزواج . ‏

هذه امور ليس فيها تبريرات او ان يغالط الانسان نفسه ويحاول ان يهدم قيمة وقناعاته وفلسفته الاخلاقية لمجرد هفوة ‏او انزلاق . ‏

هذا شرف وكرامة وسمعة ، ولو قبلت بان اتغاضى عن هذه الهفوة او الغفلة او الانزلاق ، فما يدرني ان لا تهفوا او ‏تغفل او تنزلاق مرة اخرى وقد اصبحت زوجتي . ‏

هذه امور ليس فيها بين البنين يا ستي . ‏

كذلك الذين يرفضون الفتاة على اساس انها عاقلة زيادة عن اللزوم او انها محترمة زيادة عن اللزوم او ملتزمة دينيا ‏زيادة عن اللزوم . ‏


لا تعليق على هذا إلا انه انسان مختل القيم ومنحرف الفكر . ‏

فارس عبدالفتاح يقول...

ثالثاً : ‏

بسبب التنشئة الاجتماعية القيمية والاخلاقية الخاطئة عند الكثير من الفتيات ، فكثيراً من الفتيات تخاف جدا من الرجل ‏الجاد والصريح والدقيق والمباشر في طلبه . ‏

لانها تحلم برجل رومانسي وحالم وتكون الفتاة مستغرقة بل غارقة في احلام اليقظة .‏

وهذا عن تجربة . ‏


فقد تقدمت لاكثر من فتاة بطريقة مباشرة وجدية في طلب الخطبة ، ولكن تم رفضي بسبب اني جاد وحازم في طبعي ‏واني تمتع بسجية لا تقبل بها فتاة اليوم . ‏

لدرجة ان ( والدتي ) حاول اكثر من مرة ان تلفت نظري الى هذا الامر وقالت لي باختصار واقتضاب : الدنيا تغيرت ، ‏وللاسف مفيش بنات عندنا في العيلة كنت خطبتهالك من غير متتعب نفسك . ‏


رابعاً : ‏

قد قرأت لك تعليق تستنكرين على الرجل ان يعترض على امرأته ان تتدخل الى الانتر نت . ‏

وتقولين ردا على احدى المعلقات : ‏

ايوة وكله كوم وحكاية رفض الرجل للبنت اللى بتدخل على النت ده كوم تانى خالص :)‏

‏... انتهى ‏

طبعاً انا ارفض بان زوجتي تدخل النت ، والسبب هو باختصار . ‏


باي صفة وباي حجة وباي سبب وباي منطق انا اتحدث معك الان ، هل انا اخوكي او ابوكي او اختك او عمتك او ‏خالتك . ‏


هههههه بالطبع لا ، فكيف لي ان اكون مطمئن الجنان فارغ البال وانا مثلا نايم ومراتي قاعدة عن النت . ‏

الا اذا كنت رجل مغفل لموخزه . ‏

مش لاني مراتي وحشة او اخلاقها مش كويسة او اني رجل شكاك او مستريب . ‏

لا ليس هذا منطقي ‏

انما منطقي هو ان كل ابن ادم خطأ حتى انا ، وقد اكون مقصر في امر داخل بيت بقصد او بدون قصد ، وتجد ‏زوجتي على النت تعويضاً لهذا عن هذا التقصير ، او تجد كما تقولين انسان مرح وصاحب فكاهة كما تقولين ‏وتحتجين على اساس انها ليست واقعه في دباديبه ، فهل عليا ان لا اغير او اطلب منها ان لا تدخل على النت . ‏

نفترض العكس ، اذا كانت هي تفكر بهذا المنطق وطلبت مني ان لا ادخل النت لاسباب السابقة الذكر . ‏

فمن المفروض عليا كرجل يحترم زوجته وكرجل يريد ان يستمر في حياته مع زوجته بطريقة ملتزمة ودون اي امر ‏ينغص عليهم عيشتهم أن يرفض دخول من اجل ان لا يخلق مشكلة قد تكون ليس لها اساس ولكن هي مجرد هواجس . ‏

فيقطع تلك الهواجس بان يلتزم التزام صارم امام شريكة في الحياة وفي البيت لانه اصبح انسان يريد المحافظة على ‏اسرة قد بناها . ‏

وبنت ناس قد قبلت بان تكون له روحاً وجسداً ، وقبلت بجميع شروطه ،، فبناء عليه ان يكون هو ايضا اهل لهذه ‏التنازلات حتى تستمر الحياة ويكون هناك احترام قبل ان يوجد حب . ‏

وعلى فكرة بالمناسبة انا لم اجد الى الآن تلك الفتاة مع الاسف الشديد . ‏

تقبلي كل تقدير واحترام

موناليزا يقول...

هبة فاروق
ـــــــــــ
أهلا بيكِ يا هبة بعد طول غياب
أشكرك جدا على رأيك ولاتفاقك معوجهة النظر المطروحة

نورتينى حبيبتى
وفى انتظارك دايما


**********************************

محمد الجرايحى
ـــــــــــــ
أهلا بيك أستاذ محمد
اعتذر لصدمتك فى هذه الفقرة وكنا نريد توضيح الأسباب فهذا يحدث فى غالبية المواقف فلماذا الصدمة؟

أشكرك لمشاركتك
ويسعدنا دوام التواصل


*******************************


فارس عبد الفتاح
ـــــــــــــــــــ
وعليكم السلام ورحمة الله وبركاته
أهلا بعودتك أستاذ فارس


تحليلى هذا جاء نتيجة مواقف حياتية كثيرة وليس من خيالى

أولا: متفقة معاك

ثانيا: طيب معلش ممكن توضيح هتكون ناجحة فى البيت ازاى؟؟ إذا كانت هى مثلاً طبيبة أو مُدرسة أو تعمل فى أى وظيفة أخرى ونجاحها يترتب عليه زيادة مرتبها يعنى العائد المادى هيرضيها ده غير انها هتكون ليها ذمة مالية منفصلة من غير ماتمد ايديها ليك كل شهر تطلب مصروف شخصى وانت وظروفك يا تعطيها يا لأ.. والجانب المعنوى لديها هيكون مرتفع لكن فى البيت نجاح إيه اللى هتحققه غير أى واحدة تانية ممكن تعمله.. لو قصدك على المهام الزوجية فده كل زوجة بتعمله وبتنجح فيه سواء كانت بتشتغل أو لأ

أما عن نظرة البعض تجاة المرأة الملتزمة فأنا طبعا احترم تفكيرك وأويدك تماما ولكن مش كل الرجال بتفكر زى حضرتك لانها بالنسبة لهم هتكون خنيقة

وحكاية انه يهديها بعد الزواج فبتحصل بجد

واللى بيقبل واحدة ليها ماضى بيكون مبرره انه بيحبها وانه يحكم عليها من يوم ماهو عرفها

عن الموقف المذكور لو كل الرجال فكروا كده مفيش حد هيتزوج.. انا مش ببرر تصرفها لكن ده مش سبب كافى ان الزيجة ماتمش.. لأن مش كل حاجة بتبان للناس بتبقى كاملة وكان الأولى إنك تسألها على ملابسات هذا الموقف لو كان يثير شكوكك لان طالما هى كويسة واهلها كمان يبقى حرام ناخد انطباع لمجرد كلمة واحد قالها على واحدة أهلها رفضوه

أما عمن يعترضون على عقلها الزايد عن الحد فعذرهم انها برضه هتخنقهم وازاى يمارسوا سلطتهم الذكورية عليها

ثالثا:
اختلف معاك فيها فالبنت مهما كانت بيئتها تريد ان ترتبط برجل يكون مسئول عنها.. هى آه عايزاه رومانسى بس ده لما يدخل البيت من بابه ويتم الزواج.. يعنى بتطلب حقها فى المودة والرحمة اللى ترجمتهم بالنسبة لها رومانسية

عن تجربتك الخاصة اسمح لى اوضح لك وجهة نظر البنات.. البنت عايزة تتجوز واحد يسعدها ويحتويها مش يحسسها انه مدير مدرسة وهى تلميذة لو ماعملتش الواجب هتتعاقب
وبصراحة والدتك معاها حق
"لو كنت فظاً غليظ القلب لانفضوا من حولك"
الرفق ما كان فى شئ إلا زانه وما نزع من شئ إلا زانه.

رابعا:
إذا اعتبرت كلامك معى الآن غير مبرر فلا تتحدث معى مرة أخرى

أما عن النت عموماً فهو كأى شئ آخر أخلاق المرأة أو الرجل هو من سيحدد كيفية الاستخدام
ممكن المرأة تدخل بيه على مواقف الطهى وتعرف تعمل حاجات جديدة لزوجها
وممكن برضه تخونه عليه
زى الموبايل ممكن تكلم زوجها عليه وممكن جدا تخونه عليه
والتليفزيون ممن تتفرج على برنامج دينى او حتى كوميدى وممكن تتفرج على اى شئ خادش للحياء

فلذلك الأولى طالما مش واثق فيها وبيشك فى نفسه انه يحرمها من التليفون والموبايل والتليفزيون والخروج عموما
فأى شئ فى الدنيا له وجهان وانت وحدك من تختار الوجهة المناسبة لاخلاقك فى استخدامه

يعنى لو زوجتك قالت لك ماتشيلش الموبايل لانها ما تضمنش ممكن واحدة تكلمك فى وقت هى مزعلاك فيه..هترمى الموبايل مهما كان له فائدة لك

وماتقولش ان مفيش وجه مقارنة لأن النت الآن بضرورة أى جهاز آخر.. احنا فى 2011 حضرتك

آسفة أقولك إن بطريقتك دى مش هتلاقى

أشكرك لمتابعتك

فارس عبدالفتاح يقول...

سلام عليكم

اعتقد اني ارفض ان تكون زوجتي امراة عاملة او حتى كانت تعمل قبل ان ارتبط بيها ، بختصار

واتمنى من الله سبحانه ان يرزقني بفتاة عاقلة ومحافظة شكلاً وموضوعاً وتكون ذات ثقافة حقيقية .

وليس رغايا لمجرد انها قرأت كتاب شعر لمش عارف مين او انها قرأت قصة قصيرة او طويلة لمش عارفين . او انها قرأت كتاب معين في مذهب معين او فكر معين لعالم دين او مفكر سياسي او اجتماعي او ثقافي .

تكون واسعة الاطلاع وعندها القدرة الحقيقية على ادارة حوار حقيقي له قواعد فكرية وفلسفية تجعل منه منطلاقات لحياتها .

اتمنى من الله ذلك ، لكن ليس كل ما يتمناه المرء يدركه .

ففي حركة الحياة كلها هو الصراع بين ما هو كائن وبينما يجب ان يكون الطريق طويل بين تصور التطور وتحقيق هذا التصور ، والعقبات رواسب والامكانيات لها حدود .

المهم :

قد استغني عن الموبيل اذا لم يكن عليه تواصل للعمل ( لقمة العيش ) استعني عنه في اقل من طرفة عين .

وان لم استطع ان استعني عنه ، اتركها تفتش فيه كيفما شاءت ، واعتقد ان اي انثى سوف ترتبط بي لن تشك ولو للحظة في او حتى يراودها هذا الوهم في خيالهم او بينها وبين وجدانها ، لانها سوف تتيقن من شخصية الرجل الذي امامها انه ليس من طبعة الخيانة او التلاعب لمجرد التسلية او المتعة التي ليس يحكمها عقل او منطق .

انا اشاركك الراي باني لان اجد هذه المواصفات لكني قد بحثت في الطريق الخطأ فاني اعيش في الاسكندرية مع اني من اصل صعيدي ، ونشأتي الاجتماعية والثقافية في الجنوب .

وان اشاء الله سوف اجد ضالتي في الجنوب ، وستكون زيارتي لمصر في عيد الفطر المبارك ، وسوف يكون هنا في الجنوب اللقاء بما اريد ، باذن الله فانا على يقين انه هناك سوف اجد ضالتي لعلمي ببني جلدتي .

على فكرة احب اضيف معلومة بسيطة جدا ، حضرتك تعتبرين ان النت أصبح ضرورة حاتيه ملحة في عصرنا هذا .

انا لم اتعلم على الكمبيوتر الا من ست سنوات قريباً ، وما اجبرني عليه سوق العمل في الخارج ، ليس إلا .

حتى الموبيل كذلك لانه يدير حياتي في الغربة لقلة الوقت ، اما في مصر فلا حاجة لي به اطلاقاً .


انا شاب قروي ريفي من الجنوب ، حياتي بسيطة جداً ، تربيت بين افنان واغصان الاشجار وتدفق المياه في مجاريها بين الزروع ، كذلك تربيت على الصحراء لاني نشئت في بيه زراعية في الوادي وكذلك مناصفة مع الصحراء .


ومن يستظل بالسماء والنجوم والغمام والقمر في ليل الصحراء ، يستهين عليه ان يترك زخرف الحضارة المرهق .

فعشة في قلب بستان او غيط اطيب عيشة لي من قصر في شارع مزدحم يعج بالسيارات الفارهة والاشكال البشرية الزائفة .

وقد نشئت فيه بيئة متعلمة مثقفة ثقافة حقيقية لها قواعد ومنطلق ، وليس حكاوي او قصص الاقدمين والمحديثن فقط ، بل عن علم وعن فلسفة وفكر حقيقي ناتج عن وعي حقيقي بطبيعة الوجود ومعرفة بواجب الوجود .

تقبلي تحياتي

موناليزا يقول...

فارس عبد الفتاح
ـــــــــــــــــ
وعليكم السلام ورحمة الله وبركاته
أهلا بعودتك أستاذ فارس
جميل انك حددت المكان الذى قد تجد فيه ضالتك المنشودة
وهذا أفضل لكليكما

تمنياتى بالتوفيق

أشكرك لمتابعتك

Emtiaz Zourob يقول...

والله اشعر بأنه مش احساس خاطئ بقدر ما هو صراع ازلي بين الطرفين ..

معلش يا موناليزا ، مقصرة معاك والله .

موناليزا يقول...

وجع البنفسج
ــــــــــــــ
أهلا بيكِ حبيبتى
أشكرك جدا لتعليقك ولمتابعتك
ووجهة نظر تحترم

انتى تنورينى فى اى وقت وعذرك دايما معاكِ حبيبتى

فى انتظارك دايما