الجمعة، 9 سبتمبر، 2011

علشان شبهك


دخل على ابنته فوجدها مُنهارة من البكاء فسألها: صارحينى ياابنتى ليه مُصممة على الطلاق.. لازم تقولى سبب يقنعنى على الأقل..
وبعد إلحاح منه وفى ضعف منها قالت بانفعال: لأنه شبهك يا بابا..
واستردت قائلة: بيعاملنى بنفس الطريقة اللى كنت بتعامل بيها ماما.. أنا مش موجودة أصلاً فى حياته..أنا حاسة أنى بالنسبة له مجرد كرسى مابيفتكروش غير لما بيكون عايز يقعد عليه.. أو مجرد منبه يصحيه من النوم.. أو مجرد خادمة تطهو وتنظف وترتب أغراضه.. لا يوجد بيننا حوار من أى نوع.. أتعجب من أن نُصاب بالخرس الزوجى منذ الشهر الأول من الزواج.. إذا كان هذا الوضع وأنا مازلت فى عامى الأول معه فماذا سيكون حالنا بعد عشرات السنين.. أنا حقيقى تعبت ومش هقدر أكمل..
امتص غضبه قائلاً: وهل ترين أنى أعامل أمك هكذا؟.
أجابته بابتسامة ساخرة : ياه يا بابا واضح إن حضرتك نسيت..
فاكر لما كنت بتيجى من الشغل وتفضل قاعد فى شقة مامتك بالساعات ومش مهم إذا كنا جوعى ومستنيينك على الغدا .. هو كمان بيعمل معايا كده بس الفرق أن ماما ماكنتش بتعرف تسيبنا وتيجى تقعد معاكم لكن أنا بيقفل عليا الباب علشان ماروحش معاه عندها.. يا بابا إحنا تقريباً ماكناش بنشوفك إلا لما مامتك ماتت وكنا ساعتها بقينا فى الجامعة وزى ماحضرتك كنت مستغرب أننا كبرنا بسرعة إحنا كمان كنا مستغربين وجودك..
حتى رغبته فى إنى أحمل مش عشان هو عايز ابن منى لكن هو عايز منظره قدام الناس يكون أنه متجوز ومخلف ومش مهم بقى هل هو فعلاً هيقدر يربى ابنه ده كويس ولا هو عايزه وبعد كده أنا اللى أقوم بالمسئولية لوحدى.. زى ما حضرتك كنت عايزنى أجيب درجات نهائية فى المدرسة مش حباً فى أنى أكون ناجحة ومتميزة ولكن عشان لما حد يسألك عليا تقوله إن بنتك من الأوائل.
أنا شوفت حياتى معاه كمان خمس سنين وشفت معاملته السيئة لأولادى اللى لسه ماجوش وإهماله ليهم وعدم إحساسه بالمسئولية تجاههم وشوفت انه رامى مسئوليتهم كلها عليا لوحدى ولو حصل أى حاجة أبقى أنا المقصرة.. ده غير طبعاً استخساره الحاجة فيا ويعطيها لمامته ولو اشترى لى حاجة حتى لو خاصة لازم يعديها على مامته الأول عشان تشوفها.. زى ما كنت بتعمل معانا بالظبط.. بس الفرق إن ماما بتحبك وبتتحمل منك أى حاجة أنا بقى مابحبوش ومفيش حاجة واحدة تخلينى أفضل معاه.. والحمدلله أنى مش حامل..
قاطعها قائلاً: بس.. كفاية.. اسكتى.. ماتكمليش.. أنا فعلاً معرفتش أربيكِ.
- تمت-



سؤال جانبى:
* أذكر صفة فى والدك تتمنى وجودها فى زوجك (للنساء)؟.
* أذكر صفة فى والدتك تتمنى وجودها فى زوجتك( للرجال)؟.

هناك 20 تعليقًا:

مونتي بوكيه ورد يقول...

عشان شهبك اتعلم ازاي يبقي قاسي وعنيد ويهمل التفاصيل الصغيرة ويمسك في الحاجات المكلكعه المؤلمة
عشان شبهك اتعلم ينسي الحنيه ويفتكر كل حاجه اسيه ونسي انه هو ال زرع الاسوه دي في قلوب اللي حواليه
عشان شبهك اتعلم اتعلم ازاي يجرح ومتعلمش ازاي يداوي بعد كل عملية جراحية بيجرحها لقلوب الناس
مستغرب اوي انه يقاطع بنته ويقولها كلمة زي دي هو كان عاوزها ايه ؟
كان عاوز يربيها زاي وهو اصلا خلفها ليه ؟
يعني هو في راجل في الدنيا او اب يقبل علي بنته كدا او انه يبيتها من غير عشا ؟
يا ربي رحمتك
وهي كمان ازاي تفكر ولو للحظة تحمل او تخلف من راجل لا يعشق ان يكون ابنه منها وانه يفتخر انه هايجيله ابن اتشال 9 شهور جوه رحم انسناه بيعشقها
فخرنا كرجال ان نستطيع ان نحب وليس فخر بالانجاب
الانجاب رزق رباني و الحب هبه ربانيه ياببخت من امتلاكها وحافظ عليها

أمي .. صفة واحده اتمني أن راها في زوجتي .. لما يموت زوجها تكون اب وام لولادها تنشغل في تربيتهم ليل نهار تراقبهم في كل خطوة و تحافظ علي حقوقهم في كل شيء ومايكونش راجل تاني في حياتها غير جوزها واولادها و تعيش حياتاه وكل املها تشوف ولادها احسن ناس وناجحين حتي لو فيهم ابن مغلبها مبتفقدش الامل معاه و بتمشي علي مباديء جوزها وكانه عايش واكتر
بجد بتمني اشوف الصفة دي في زوجتي في المستقبل مع تركي حريتها انها تحب وتشوف الدنيا لان اللي شوفته مع امي كرم رباني لا تملكه كل النساء الحمدلله

محمود عسكر يقول...

تذكرت حديث للنبي عليه الصلاة والسلام
فيما معناه
"إن أولي الناس بالمرأة زوجها وأولي الناس بالرجل أمه"
لكن المبالغة دائما في الشيء الجميل ربما تجعله يظهر بصورة غير محمودة
بالطبع كما توجد حقوق للزوج علي زوجته
هناك حقوق للزوجة علي زوجها
ويجب أن يراعيها الزوج ويهتم بها
إن من أكثر اسباب الطلاق في مصر هو اهمال الزوج لزوجته ..ربما لأن الزوج يعتقد أن زوجته ستكون موجودة في كل مرة يعود فيها للمنزل
أو لأن طبيعة الرجال عادة ما تميل للتغيير
أتمني أن يتنبه الأزواج للآيات والأحاديث التي تحض الرجل علي حسن العشرة مع الزوجة ورعايتها والاهتمام بشؤنها وشئون بيته

كقوله تعالي
{وَعَاشِرُوهُنَّ بِالْمَعْرُوفِ }
وقول النبي صلي الله عليه وسلم
( إن لأهلك عليك حقا )

واخيرا أتمني ان تصبر الزوجات علي ازواجهن ولا تستعجلن الطلاق .

لك اختي الكريمة التحية والتقدير

MR.PRESIDENT يقول...

الصفة : الطيبة بس تكون بذكاء

ياااااه احيانا الواحد مش بيشوف نفسه إلا من خلال ولاده وبيتصدم بعدها

فكرني في اليوم اللي جيت قلت لأبويا في قاعدة صفا " انت ليه مكلمتنيش علي الحاجات اللي الشباب بيمروا بيها " كنت ساعتها وصلت للمرحلة الجامعية واتبعت باسلوب هادئ " علي فكرا يا بابا إنت مش أب مثالي " بس أبويا فهم رسالتي الغريب ان بعد كام سنة من الكلية لسه فاكر الحديث معايا وأحيانا بيورده في الكلام

ماجد القاضي يقول...

السلام عليكم..

الفكرة من جهة: راااائعة جدا.
ومن جهة أخرى: مؤلمة جدا...!!

تحياتي أختي الكريمة.

سواح في ملك اللــــــــــــــــــه- يقول...

بصي ياامة الله

عايز اقول حاجة

مايمكن ده افراط في الغيرة من الجانبين

من جانب الام حست ان فيه واحدة خدت

منها ابنها وعايزة تستحوذ عليه

ومن جانب الزوجة اللي مش متحملة

زيارة ابن لامه

قد يكون بيقضي بعض الوقت في زيارة امه

حتي يتفرغ بعدها لبيته

عموما اذا لم تتحمل هذه الزوجة

هذا السلوك سواء كانت غلطانه او لا

فهي لاتستحق سوي الطلاق في الحالتين

اللي يهمل امه يهمل كل حاجة بعد كده

Bent Men ElZman Da !! يقول...

صعبه اوووى بجد
مأساه ان الاب يعيش حياته مهمل فى اسرته اللى هى جزء كبير اوى من كيانه
ويكون بعيد عن اولاده بالشكل ده
والاسوء ان البنت تتجوز واحد فيه نفس المسأوى دى
بتخرج من مأساه لمأساه اكبر للاسف


كل الصفات اللى كانت فى بابا الله يرحمه اتمنى تكون فى جوزى ان شاء الله
بس اكتر حاجه هى الطيبه و الحنيه والكرم :)

reemaas يقول...

ده رده؟
بجد مش لاقيه كلام اقوله

قطرة وفا يقول...

* أذكر صفة فى والدك تتمنى وجودها فى زوجك (للنساء)؟.

ثقته فيا وحبه ليا و انو مبيحبش الدين ولا توطية الراس

Barbi يقول...

سلمت يداكى
رائعة حقا

Barbi يقول...

المرأة ممكن تغفر اى حاجة الا عدم المبالاه بيها
وطبعا يا امة الله طول ما الراجل مش موفر مساحة فى حياته لمراته ده اكبر عدم مبالاه بيها
ومراته هتكون حياتها مأساه ويا سلام لو كانت حساسة شويتين هتلاقى امراض الدنيا جتلها من الزعل والنكد والعياط كل يوم وهو ولا هو هنا
على فكرة الرجالة بيتعبو بس فى حجات كده مبيخدوش بالهم منها فى الحالة دى ممكن يكون فيه تسامح لكن لو الراجل قاصد اللى بيحصل بيكون فيهرد فعل تانى
اولا لازم يكون فيه نقاش وبعدين يكون فيه معاملة بالمثل وبعدين اخر حاجة ممكن الواحدة تفكر فيها الانفصال

نيللى يقول...

لاسف معظم الرجال بيعاملوا النساء انها شئ مكمل لحياتهم وليس اساسى وبيعاملهم انه رجل ذيه مش عاوزها تتكلم ولا تتناقش ولا تتفتح بقها ..هو يخرج مع اصحابه ويضحك ويهرج عندها يسكت ..الرجاله مش عاوزه رغى وبيتريقوا على ان الست بتتكلم ...بس هم بيتريقوا على ايه ..
ربنا خالقها بتتكلم ...هما عاوزينها خرسه
لكى منى كل تحيه

شيرين سامي يقول...

غريبة التشابه ده و غريبة إن البنت متبقاش عايزه زوج شبة باباها في الغالب فتى أحلام البنت بيشبه باباها.

أنا بقى كان نفسي زوجي يكون فيه صفة (المصالحة) زي بابايا لكن هو مبيعرفش يصالح في حين إن بابايا كان دائماً لما نزعل يبدأ هو بالمصالحه و جر الناعم...لكن منكرش إن فيه صفات جميلة تانيه وجدتها في زوجي و ماكنتش موجوده عند والدي.
يعني بإختصار مفيش حد بيشبه التاني كل واحد فينا فيه صفاته الحلوه و السيئه, مش عايزه أعاتب عليها لكن هي ليه إتجوزته و هي مبتحبوش...الحب بيغفر كتير...و ليه محاولتش تحبه و تغيره ولو شوية...حكمت عليه بسرعه و مدتوش فرصه رغم إن الأزواج في الأول بيبقوا متعلقين بأمهاتهم بس بمرور الوقت مبيستغنوش عن أسرتهم و حياتهم.

طولت عليكي موضوع مهم كالعاده
تحياتي الخالصه لكي

وجع البنفسج يقول...

ياه ، دائما تدقي الباب بأسئلة وأحاسيس غريبة ولكنها قريبة لدرجة اننا لا نراها جيدا .. المفروض اسميتي مدونتك " خبايا " لانك تغوصين في الاعماق وتخرجين مكنونات أنفسنا ..

بالنسبة للصفة .. يمكن في صفة في والدي لم أراها في سواه .. وهي الطيبة الزائدة ورقة القلب .. وهي موجودة في الكثير من الرجال ولكنها بدرجات متفاوتة ..

أبو حسام الدين يقول...

الذي يعجبني في قصصك أنها تعالج قضايا المجتمع.
لا أظنك تبعت هنا المثل العربي القائل "كل فتاة بأبيها معجبة" وقد خرجت عن هذا العرف بحيث أن البنت كرهت زوجها لأنها ترى فيه نفس الرجل الذي تراه في والدها -طبعا من جانب التصرفات-.

تحية مباركة

مصطفى يقول...

السلام عليكم،،

البيوت ثم البيوت ثم البيوت..
والتربية ثم التربية ثم التربية..

هو فعلًا الأب لم يستطع تربية ابنته، وهذا واضح جدًا من الفجوة الكيرة بينهما،

التواصل بين الأباء والأبناء هو الشيئ الوحيد القادر على أن يكن لدينا مجنمع متفاهم قادر على مواجهة المشاكل الإجتماعية والتكيف معها..

يعني لو أن الأب مهتمًا بها وكان جيدًا، لإختار لها الأفضل أو على الأقل (شبهه)..

كثيرًا مانسمع من البنات/ إنه يكون شبه بابا. ردًا على سؤال/ تتمني عريسك يكون مواصفاته إيه؟!


الإجابة على السؤال/
رجوت في زوجتي أن تكون صبورة كأمي، وقد كان والحمد لله :)


تحياتي.

ليالي باريس يقول...

بالعكس .. يا ريت كل الناس مثل بابا
عن جد ما في مثله يئبرني حبيب قلبي

لكن طبعا في نماذج من الآباء و الأمهات الملاجئ أهون من الحياة معهم

eng_semsem يقول...

عشان هي خايفه من مستقبل وشعور عاشته قبل كده هتخاف من حاجات ممكن ما تحصلش بنفس الصوره وتخاف من بكره بس ياريت ندور على مميزات الطرف الاخر اكتر من اننا نحاول نعالج عيوبه ونواجهها وربنا يديم السعاده على كل المتجوزين

موناليزا يقول...

مونتى بوكيه ورد
ـــــــــــــــــ
أهلا بيك أستاذ محمد
تعليقك مميز جدا وكأنه تكملة لما لم أكتبه فى الموضوع
أما عن مواصفات زوجتك المستقبليه فربنا يرزقك بالزوجة الصالحة
أشكرك جدا لتعليقك
ويسعدنا دوام التواصل


**********************************

محمود عسكر
ــــــــــ
أهلا بيك أستاذ محمود فى زيارتك الأولى
تعليقك رائع جدا ويختصر ما أردت قوله
أشكرك جدا
ويسعدنا دوام التواصل


*********************************

مستر بريزيدنت
ـــــــــــــــ
أهلا بيك أستاذ بسام
ربنا يرزقك بالزوجة الصالحة

ده حقيقى بس قليل أوى لما بتحصل

أتخيلها كانت مواجهة جريئة منك و مفاجئة له

أشكرك جدا لتعليقك
ويسعدنا دوام التواصل


***********************************

ماجد القاضى
ـــــــــــــ
وعليكم السلام ورحمة الله وبركاته
أهلا بيك أستاذ ماجد
دائما رأيك مميز وله نظرة منطقية وبعيدة للأمور
أشكرك جدا لتعليقك
ويسعدنا دوام التواصل

*********************************

سواح فى ملك الله
ــــــــــــــــــ
أهلا بيك أستاذ خالد
وقد يكون افراط من الزوج فى الاهتمام بأمه على حساب أهل بيته حتى تكون الصورة المحفورة فى ذهن ابنته على هذا الشكل
أراك متجنياً على الزوجة قليلاً
فالإسلام أمرنا أن نعطى لكل ذى حق حقه وواضح أنها لم تشعر بأى حق لديها عنده

أشكرك لتعليقك
ويسعدنا دوام التواصل


************************************

بنت من الزمن ده
ـــــــــــــــــ
أهلا بيكِ حبيبتى
ده حقيقى

ربنا يرزقك كل ما تتمنى

أشكرك جدا لتعليقك ولمشاركتك
نورتينى وفى انتظارك دائما


***********************************

ريماس
ــــــــــ
أهلا بيكِ يا نور
أكيد ده هيكون نفس رد فعلها
وخصوصاً أن ده آخر حاجة هى محتاجاها منه فى الوقت ده

نورتينى حبيبتى وأسعدنى وجودك


***********************************

قطرة وفا
ــــــــــــ
أهلا بيكِ حبيبتى
ربنا يرزقك بالزوج الصالح
أشكرك جدا لمشاركتك
نورتينى وأسعدنى وجودك


**********************************

باربى
ــــــــــ
أهلا بيكِ حبيبتى
أشكرك جدا لرأيك

متفقة مع تعليقك جدا

نورتينى وفى انتظارك دائما


**********************************


نيللى
ـــــــــ
أهلا بيكِ يا نونا بعد طول غياب
تعليق واقعى جدا
ورغم ما في هذه الجملة من تعجب" ..هما عاوزينها خرسه"ولكنها حقيقة موجعة
وخصوصا لو شخصية الزوجة أقوى وتعليمها أعلى

نورتينى حبيبتى وأسعدنى وجودك


**********************************


شيرين سامى
ـــــــــــــ
أهلا بيكِ يا شيرين
يخلق من الشبه أربعين :)

مش شرط الزواج يكون مبنى على حب لكن تعامل الزوجين مع بعضهم لو فيه مودة ورحمة حياتهم هتكون محتملة لكن واضح انها ماشافتش ده وعلشان كده عيوبه طغت على الموقف

أشكرك جدا لرأيك
وعلى فكرة أنتِ تطولى براحتك أنا بحب أعرف تعليقاتك دايما:)

نورتينى وأسعدنى زوجودك


*******************************

وجع البنفسج
ـــــــــــــــ
أهلا بيكِ حبيبتى
:) رأى مميز جداً فيما أكتب أشكرك جداً عليه
ولهذا سميت سلسلة من المواضيع باسم "خبايا نسائية "

أشكرك جدا لمشاركتك
نورتينى وأسعدنى وجودك


********************************

أبو حسام الدين
ـــــــــــــــــ
أهلا بيك أستاذ رشيد
أشكرك جدا لرأيك فيما أكتب
وعلى فكرة لم أسمع عن هذا المثل من قبل :)

هذا حقيقى فهى تخشى أن ترى مآساتها فى بيت أبيها تتكرر للمرة الثانية ولكن باختلاف الأدوار

أشكرك لتعليقك
يسعدنا دوام التواصل


***********************************


مصطفى
ــــــــــ
وعليكم السلام ورحمة الله وبركاته
أهلا بيك أستاذ مصطفى

هيربيها إزاى وهو طول الوقت عند مامته!!

لو فيه تواصل كان سمع بنته وعرف هى عايزة ايه

أشكرك جدا لتعليقك ولمشاركتك
ويسعدنا دوام التواصل


**********************************

ليالى باريس
ــــــــــــــ
أهلا بيكِ فى زيارتك الأولى
ربنا يخليهولك
أشكرك جدا لتعليقك
وفى انتظارك دائما


**********************************


انج-سمسم
ـــــــــــ
أهلا بيك ياباشمهندس
المميزات محدش بيدور عليها لأنها المفروض بتكون واضحة للجميع والناس مابتشوفهاش لو العيوب كتيرة أوى لدرجة أنها مغطية أى ميزة

أشكرك لتعليق
ويسعدنا دوام التواصل

مونتي بوكيه ورد يقول...

تسلمي يا فندم حضرتك ملكتي الفكرة و الاحساس وكتير بشوف في مواضيعك حاجات كتيره عايشها ومبقدرشا قولها وبستني اشوفها هنا واتكلم عنها .. يعني مثلا انا نفسي اتكلم عن موبايل واحد مليان اكتر من رقم امراه وبنات كمااااان وعايش معاهم دور روميو الوحيد في حياتهم في حين انه راجل كبير و لا يملك المواصفات اللي بيبنيها في احلامهم .. مجرد وجود الرسايل دي لو اتكتبت هتحكي عن قصرة الراجل دا و اد ايه بشاعة حياته اللي بتتكرر في ناس كتيره عاوزين توعية حتي لو هما مش مهتمين .. قدام ربنا نعمل ال علينا و ننقذ روح من براثين مثل هذا الرجل .. اظن الراجل دا ببشاعته دي موصلش انه يقول لبنته كلام زي ال قريته هنا تخيلي حجم الالم لما اقرا كلامك هنا .. ورد فعلي هيكون ايه
:$
أشكرك علي ردك الراقي و اهتمامك الجميل و دعواتك الرائعه يارب يستجب منك و يرزقك كل ما تتمني :)

موناليزا يقول...

مونتى بوكيه ورد
ــــــــــــــــــ
أهلا بعودتك أستاذ محمد
بتحرجنى دايماذ بذوق كلماتك
وتعليقك ده على دماغى يافندم والله

المثال الذى ذكرته محزن حقاً

أشكرك جدا لمتابعتك
وربنا يتقبل دعائك
ويسعدنا دوام التواصل