الجمعة، 10 مايو، 2013

للساذجات فقط



بعد طفرة الاتصال التي حدثت في السنوات الأخيرة من خلال انتشار أكثر من موقع للتواصل الاجتماعي كالفيس بوك وتويتر وجوجل بلس وغيرهم.. أصبح من المتاح أن تقع الفتاة في الرذيلة دون أن تدري؛ فكل شئ مع التعود يصبح عادي ولا غضاضة فيه.. فالانزلاق يحدث بالتدريج ولهذا لا تشعر الفتاة به.. فالبداية قد تكون متابعة صامتة ثم إشارة إعجاب (لايك)، ثم ترك تعليقات، ثم انبوكس، ثم اتصال، ثم لقاء...
ولن تتم الرذيلة بصورتها الصريحة؛ بل ستكون هناك مبررات وأسباب قوية من وجهة نظرك لوجود حوار ومن ثم يتم السقوط رويداً رويداً.
فمن تتواصلين معه أصبح بينكما حواراً عاماً مشتركاً ويا ما تحادثتما .. اعتبرتيه أخ أو صديق أو حبيب أو حتى أب .. لكن يظل السؤال هو اعتبرك إيه!!.

نصيحة للساذجات:
(أصل السذاجة ملهاش سن معين بعدها تحسي إنك كده خلاص عديتي.. لأ خالص أنتي ممكن تكونى عديتى الخمسين ولسه ساذجة وعايشة فى الزمن الجميل بتاع الناس هتكذب ليه! وأنا ما أذيتش حد علشان يأذيني! وهو هيستفيد إيه لما يلعب بيا!...)


 - ماترخصيش نفسك.. وماتصدقيش إن فيه حد عمره ما شافك ولا فكر فيكِ أعجب بيكِ وحبك لمجرد كام تعليق سيبتيهم فى صفحته على الفيس مثلاً وأمنية حياته إنه يسمع صوتك!.

- ماتقوليش أنا واثقة فيه أوأنا شايفاه راجل.. ما تتعشميش أوى كده.
المواقف وحدها هى من ستثبت لك نواياه.. شوفي كلامه معاكي رايح على فين وفكري
بعقلك وأنتى هتفهمي.

- ماتصدقيهوش لما تكون معرفتكم على النت و يقولك نفسي اسمع صوتك ومش هعرف أنام من غير ما اكلمك فتتصلي بيه.. فى الغالب هتلاقيه نايم بالفعل أو يمكن يكون بيحاول يعمل ميت علشان يمثل الدور كويس.

- ماتقابليهوش لمجرد إنه قالك نفسي أشوفك وهموت لوماشوفتكيش فتقابليه .. فى الغالب هتلاقيه عايش عادي لا مات ولا بيموت.

- مفيش حاجة اسمها أنا واثقة في نفسي لانك مش معصومة والانسان بطبعه ضعيف.

- مفيش حاجة اسمها ده كله هزار لان الهزار أوقات كتير بيقلب جد في المشاعر وخصوصاً لو كنتى من البداية أصلاً معجبة بيه، أو لو عندك فراغ عاطفي، أو لو بينكم عيش وملح وعِشرة سنين ومعتقدة انه عمره مافي يوم هيفكر يجرحك أو... أو...

- ماتصدقيهوش لو قالك أنا حاسس انى بضعف معاكي..أو بفكر فيكي طول الوقت أو... أو... أو...

- ماتعبريهوش لو قالك أنا ماليش خاطر عندك أو أنا زعلان أو يسيبك ويمشى
 لأنه لو باقي عليكِ وبيحترمك مش هيخليكِ تعملى أي حاجة ممكن تندمي عليها بعد كده.
ولو بيحبك أصلاً عمره ما هيزعل منك مهما عملتي.

- اعرفي إنه سهل عليه ياخد منك اللي هو عايزة بالحيلة.. مش هيغلب معاكي ما أنتي أصلك ساذجة وملكيش تجارب.

- اعرفي إن في الوقت اللي أنتي عايزاه فيه زوج هو عايز يجربك بس مش أكتر..
في الوقت اللي بتتعاملي معاه كحبيب هو بيعتبرك مجرد نزوة وهتروح لحالها.

- اوعي تكوني معتقدة انه شايفك حد محترم أو كويس بالعكس لو شوفتي نفسك بعينيه عمرك ماكنتي تفكري تقربي منه أو تصدقي حرف من كلامه..

- يوم ما يزهق منك ويسيبك محدش هيجيب اللوم عليه ولا حتى هو هيحس بالذنب لحظة.. أنتي في عينيه الفاجرة اللي أغوته ..

- حبك ليه مش هيصدقه وهتبقى جريمة هتفضلي مُدانة عليها بقية عمرك.. ثقتك فيه هيعايرك بيها.. سيتلذذ بوجعك وسماع صراخ عذابك في بُعده و لن يكترث بإهانتك والتعامل معك كوضيعة لا قيمة لها.

- وجع القلوب غالي ونادراً ما يتم شفاءه فلا تلق به إلى التهلكة فتشقي ما حييتي.

-فوقي بقى وارجعي لنفسك ولدينك..





هناك 10 تعليقات:

salwa abdelhalim يقول...

رساله جميله جداا وعنوان رائع..
جزاك الله خيرا عن كل بنت تقراها وتخلي بالها من نفسها بسبب كلامك

حبيبه يقول...

ماترخصيش نفسك.. وماتصدقيش إن فيه حد عمره ما شافك ولا فكر فيكِ أعجب بيكِ وحبك لمجرد كام تعليق سيبتيهم فى صفحته على الفيس مثلاً وأمنية حياته إنه يسمع صوتك!.
تصدقي انتي فنانه كلامك كله حقيقي لمس حاجات جوايا يمكن اتمنيت انا اكتب الكلام ده بس اكيد مكنش هيجي بالروعه دي ولا الاحساس ده
دمتي مبدعه معبره <3
رانيا الجبالي

حبيبه يقول...

(أصل السذاجة ملهاش سن معين بعدها تحسي إنك كده خلاص عديتي.. لأ خالص أنتي ممكن تكونى عديتى الخمسين ولسه ساذجة وعايشة فى الزمن الجميل بتاع الناس هتكذب ليه! وأنا ما أذيتش حد علشان يأذيني! وهو هيستفيد إيه لما يلعب بيا!...)

الله عليكي علي فكره قريتها اكتر من مره وكل مره بلاقي فيها كلام كان نفسي اقوله بس انتي عبرتي بطريقه رووووووعه
رانيا الجبالي

eng_semsem يقول...

ربنا يحفظ بناتنا وبنات المسلمين
تحياتي على الموضوع الرائع

Days and Nights يقول...

أختى العزيزه

البوست أكثر من الرائع

ويارب البنات اللى تقرأه تعمل بيه

دائما كده بتحطى إيدك ع الجرح

بس يارب العلاج ينفع

تحياتى لروحك الطيبه

تامر

جميله المصرى يقول...

السلام عليكم

ممكن تزورى مدونتى وتشوفى الرابط ده

http://gamilaelmasry.blogspot.com/2013/05/blog-post.html

كل الشكر

اختك جميله ام مريم

reemaas يقول...

عجبنى جدا البوست وصح على فكرة فكرة ان حد يحب حد عمره ماشافه فكرة اصلا غريبة جدا

بيبقى فى الغالب فراغ من الناحيتين

مدحت محمد يقول...

هو زى ما حضرتك قلتى الفيس و التويتر والموبايل
كل وسائل الاتصالات اللى ظهرت فجأة
منحت حرية لم تكن معروفة من قبل
وسبحان الله استخدمناها فى معصية الله
ولم نشكر النعمة بطاعة الله ونشر الخير بالعكس اول ماربنا انعم علينا عصينا
وبقينا فى عصر " عبدى لما جعلتنى اهون الناظرين إليك "

لأن وسائل الاتصالاتتجعل يختلى ولا رقيب عليه إلا الله ثم تقواه

ومن تعريفات التقوى : ألا تعصى الله وانت وحدك
وربنا يهدينا جميعا

Sodfa Kitty يقول...

والله نفس البوقين اللي بقولهم وبيروح زوري وانا بقولهم كل يووووووووووووووووم

زينب علي يقول...

روووووعة

احلى حاجة نصيحتك عن الحبيب ميزعلش من حبيبو ... بجد يااا رب تفيد حد