الأربعاء، 22 مايو، 2013

للبنات فقط



يعني إيه تلبسي بنطلون تحت ملابس الخروج؟.

يعني يوم ما عربية تخبطك أو تتزحلقي فى الشارع أو تتكعبلي في طوبة وتلاقي نفسك طايرة وفى الآخر اترميتي على الطريق تكوني مستورة ومفيش حاجة من جسمك باينة.
يعني يوم ما تلبسي جيبة واسعة والهوا يطيرها وتلاقيها اترفعت تبقي مطمنة إن مفيش حاجة منك بانت.
يعني لو طالعة سلالم عالية والجيبة ضيقة وطبيعي هتترفع تبقي مطمنة إن لو فى حد طالع وراكِ مش هيشوف منك حاجة.
يعنى لو ماشية ولقيتى مكان مش نضيف وحبيتى ترفعى عبايتك علشان ما تتوسخش تبقي مطمنة إن حتى كعب قدمك مش هيبان.
يعني لو متعودة تحطي رجل على رجل مش هتبقي قلقانة إن فى حاجة منك ممكن تبان.




يعني إيه تلبسى نقاب؟
يعني ماينفعش تبقي راسمة عينيكِ وحاطة عليها ألوان الطيف.
يعني ماينفعش تمشي مع زميل فى الشارع مثلاً وتقولى أصل احنا زى الإخوات.
يعني ماينفعش تلبسي عباية قصيرة ونص رجلك باينة.
يعني ماينفعش تلبسي شبشب بصابع وتكونى كمان حاطة منيكير أو حنة.
يعني ماينفعش تبقي حاطة تاتو على كف إيدك بالحنة مثلاً وتقولي عادي ماهي مش حرام.
يعني ماينفعش تعلي صوتك فى الشارع وتضحكي ضحكة رقيعة وتتمايعي مع حد.
يعني ماينفعش تحطى منيكير فى إيدك وخصوصاً لو لونه أحمر.
يعني لازم تلبسى معصم علشان لما كوم اللى أنتي لابساه يترفع لأى سبب ذراعك مايبانش.
- - يعني تبقي لابسة شراب لأن كعب قدمك المفروض مايبانش ولو على سبيل السهو الغير متعمد
_يعني كل حاجة فيكي تكون متغطية.
- يعني ماتنزليش صورك على النت بحجة أن وجهك متغطي لأن تفاصيل جسمك ظاهرة ومقاسك واضح.
ده غير أن حركات الدلال في الصور عموما مش مستحبة فمابالك بقى لما تكوني منتقبة!!
- يعني مالبسش حاجات بتبرق وألوان فاقعة ومُلفتة للنظر.
- يعني حرمتي على نفسك مباهج الزينة أمام الغرباء فلازم تكون قد اختيارك.
يعني تاخدي بالك من كل كلمة وحركة بتقوليها مش علشانك لكن علشان ماتسيئيش لدينك.
- يعني تعرفي أن العين بقت عليكي.. كل همساتك ولفتاتك وحركاتك مرصودة مش علشان أنتي بقيتي معصومة بالنقاب، ولكن لأنه زي أمهات المؤمنين اللي أول ما الناس بتشوفه أو تتعامل معاكي من خلاله هتبدأ تاخد انطباع عن دينك عموما مش عنك.
- يعني تسألي نفسك يا ترى أنا لبساه ليه؟ وياترى أمهات المؤمنين لو شافوني هيفتخروا بيا بجد وياترى هيكون حجة ليا ولا عليا.
أنتي عملتي نفسك مش عادية يبقى لازم تكوني قد ده.


أنتي عملتي نفسك مش عادية يبقى لازم تكوني قد ده.

(المنتقبة المفروض تكون وصلت لدرجة عالية جدا من الإيمان والالتزام
عكس المحجبة اللي وارد جدا تكون لسه مش مقتنعة أصلا بحجابها وبتتمنى تخلعه مثلا أو مستنية ربنا يهديها وتبقى أحسن من كده.
لكن أنتي ملكيش أعذار)







هناك 6 تعليقات:

جنّي يقول...

السلام عليكم

نصائح غالية ليت أخواتنا يلتزمن بها ..

جزاكي الله خيرا ..

تحيتي

حاجات جوايا يقول...

يااااااااااااه
عاجبنى فيكى يا موناليزا انك لسه متمسكة بالزمن الجميل :)
ده انا بدات احس انى دقة قديمة فى الزمن ده يا اختى :(

زينب علي يقول...

عارفة يا موناليزا ... قريت البوست دا اكتر من مرة وكل مرة افتحو عشان ارد الاقي حاجة تصادفني ...

فكرتيني بموقف مر معايا من اكتر من سنة تقريبا ...

كنت لسة جديدة في العراق ولابسة مانتو (بالطو) معرفش تسموه ايه وخارجة مع ناس ... فواحدة منهم قالتلي انتي ليه مش لابسة حاجة تحتيه؟ انا بجد مكنتش منتبهة للنقطة دي قبل كدا بصراحة ... قامت قالت باستهزاء بما معناه -مش فاكرة بالضبط- ان دول اللي عاملين فيها متدينين ...

طبعا وقتها كنت مغتاضة اوي وبينتلها اني بجد مكنتش اعرف الموااقف الي ممكن تصادف الواحدة -ودا حقيقة- وهي قالتلي كم موقف ...

تعرفي ايه اللي غاضني بجد؟
اسلوب نصيحتها مع انها وبناتها -الي اكبر مني- لبسهم مش زيي خالص ودا مش مدحا بنفسي وربنا الشاهد والى ربنا المرد ومش بتعالى عليها برضو << مظنش فيوم هتقرا ردي اصلا ...

عايزة اوصل ان الاسلوب بجد مهم وبجد احيانا نكون غافلات عن حاجات بسيطة بنرددها او بنعملها واحنا مش داريانين فدا ... الغالبية مش بيعارضو المعروف بس الاسلوب .. دا الرسول صلى الله عليه واله وصحبه المنتجبين لو كان فض وقلبو قاسي مكنش الاسلام نجح !

"أنتي عملتي نفسك مش عادية يبقى لازم تكوني قد ده."

بجد الإنسان كلما ارتفع قدره بقراره او مش بقراره زاد التكليف عليه ... وكل مالإنسان ازداد ايمانا والتزام عامة بتزيد واجباتو تجاه نفسو والمجتمع اللي حواليه

حبيت بوستك دا ... عارفة عندنا في العراق فبعض المناطق النقاب بيكون فوقو قطعة قماش تانية عشان متبانش حتى العين وفي كتير ستات جزاهم الله خير الجزاء بيلبسوه ... مبيلفتوش نظر خالص وبيتصرفو بكامل حريتهم في الشارع مش بتفضل عيونهم على الارض ^_^

والستر كلما زاد كان افضل للمسلم والمسلمة ربنا ان شاء الله يجعلنا من المستورين دنيا وآخرة يااا رب

<<< مش هعتزر على الكلام الكتير اظن تعودتي :P

موناليزا يقول...

جني
ــــــ
وعليكم السلام ورحمة الله وبركاته
أهلا بك أستاذ سعيد
أشكرك جدا لرأيك في البوست
ورزق الله بنات المسلمين جميعا الهداية والعفاف

يسعدنا دوام التواصل

--------------------

حاجات جوايا
ــــــــــــــ
با أهلا يا أهلا
فينك من زمان.. حقيقي افتقدت هالطلة الرائعة :)

هذا من فضل ربي :)

المفروض تكوني اتعودتي خلاص :)

نورتيني وفي انتظارك دائما


------------------------

زينب علي
ـــــــــ
يا هلا يا هلا
أنا كل ما آجي أرد النت يفصل :)

تعرفي ان فعلا بنات كتير مابياخدوش بالهم من حاجات ممكن تكون بالنسبة لهم صغيرة ولا تذكر لكن اللي بيشوفهم بياخد انطباع سلبي ضدهم

ومعاكي حق المهم أسلوب النصح.. ومحدش يفكر انه بقى أحسن من حد.. وكما قال الله في حديثه القدسي" يا عبادي كلكم ضال إلا من هديته فاستهدوني أهدكم " .

رزقنا الله الستر والعفة دنيا و آخرة اللهم آمين

أيوة طبعا ماتعتذريش..
أنا بنتظر تعليقاتك جدا على فكرة :)

الوردة البيضا يقول...

جزاك الله خيرا يا منى على النصائح الجميلة دي

وتقبلي مروري

رؤى عليوة يقول...

السلام عليكم

سلمت يمينك منى
خاصة للمنقبات اللى بيفرسوا والواحد بيبقى هينطق

احيانا بيوصلوا الواحد انه يقول ياريتهم لابسين استرتشات ولا انهم يسيبوا انطباع سئ

مع انى مش لابسه نقاب لكن شايفه انه طالما ارتضته لنفسها يبقى لازم تديه حقه


دمت بخير