عن الحجاب

 من المؤسف أن يصل بنا الأمر للتشكك في فرضية الحجاب
 والأكثر أسفا أن يكون الحجاب لا يليق بكونه غطاء وستر للرأس و للجسد.

-عزيزتي المحجبة: ياريت تغطي ضهرك.. الطرحة القصيرة بتبين قفاكي وضهرك.
و بايخة جدا لما تبقي لابسة كذا طرحة ولفاها كذا لفة وقفاكي أو ضهرك باينين.

- اللي لسه بيشككوا في فرضية الحجاب هو ينفع تصلي من غيره؟

أنتي ما بتمنيش على ربنا بيه على فكرة..
 لبساه تقربا لله يبقى تلبسي اللي ينفع تصلي بيه..
لبساه بقى موضة أو just a fun يبقى عيدي تفكير تاني وقرري يا تلبسيه يا تقلعيه.

الحجاب مش مش مجرد غطاء رأس.. في حاجات تانية معاه لازم تتغطى منها:
 ضهرك وذراعك ورجلك وصدرك..
 إزاي حجاب وتفاصيل جسمك وثنياته ومقاسه ظاهر للجميع بأدق التفاصيل!
مين اللي قال أن الكارينا والليجن ينفعوا للبس المحجبات..
 دول يتلبسوا تحت الهدوم مش يبقوا هما الهدوم.

- في ناس شايفة أن الحجاب هو أصل كل مشكلة زي مثلا:
شكلها وحش علشان محجبة.
شعرها وحش علشان اتحجبت وهي صغيرة.
مش عارفة تعيش سنها علشان محجبة.
الحجاب عاملها مشكلة فعلا.. السؤال هنا لبساه ليه؟

- القصة الصفراء اللي طالعة من الطرحة وخيلاكي طول الوقت
 علشان بتنزل على عينيكي.. أنتي كده معتقدة أنك محجبة فعلا!

ملحوظة هامة: أنا عارفة أن ربنا اللي بيحاسب مش أنا.
واللي شايفين أني بتدخل في اللي ماليش فيه أحب أقولهم
طالما شيء يخص ديني فأنا ليا فيه.
واللي شايفين أسلوبي غليظ وفظ أحب أقولهم أني بعرض تعليقات وسخريات الشباب على حجاب البنات ولما تيجي مني أعتقد أنها بالنسبة لك هتكون أظرف لما تسمعيها عابرة من شاب معدي جنبك.