الجمعة، 17 ديسمبر 2010

عرفان بالجميل


ترددت كثيراً قبل أن أنشر هذا الموضوع نظراً لتحدثه عن حياتى منذ أكثر من عشرة سنوات وهذا يعني بأننى سأتحدث عن حياتي قبل التقرب الفعلي من الله وما فيها من ذنوب.. ولكنى قررت نشره لعدة أسباب وهى:-
أولاً: لأنبه كثيرات لما كنت أقوم به وكنت أظنه عادي.
ثانياً: لكي أقول للجميع بدل مانهاجم الناس ونحاسبهم على مظهرهم نعرفهم الأول الصح من الغلط والحلال من الحرام.
ثالثاً: لكي أثبت لكل من هو بعيد عن الله بأن التقرب إلى الله ليس بمستحيل.. يكفي إنك تريد.
رابعاً: أن ندعوا إلى الله دائماً بالحسنى.
خامساً: لكي أقول لمن أنا مدينه له بهدايتى"شوف أنا كنت فين وعلى إيدك بقيت فين.. وأن كلمة شكراً لوحدها مش هتكفي التحول اللي حصل في حياتي بسبب كلامك".
ابدأ الموضوع بعون الله.
نشأتي كانت بفضل الله على التربية والأخلاق التي أظنها طبيعية ويجب أن يتحلى بها أى إنسان بغض النظر عن ديانته.
منذ صغري وأنا أشعر بأني أحب الله ،وهذا كان يظهر جلياً في دوام دعائي ولجوئي إليه منذ أن كنت في المرحلة الإبتدائية وكنت بطبق دايماً دروس مادة التربية الإسلامية اللي باخدها فى المدرسة يعني كيفية الوضوء والصلاء ومايقال بعد الآذان.. وللأسف انتظامي في الصلاة لم يستمر ولكن دعائي أبداً لم ينقطع وكان دعائي الوحيد" يارب أنجح" ولما كنت باخد الأجازة الصيفية ماكنتش بعرف أدعي بإيه! والكلام ده استمر معايا من ابتدائى إلى المرحلة الثانوية.

-ماكنتش بصلي خالص حتى وأنا فى المرحلة الثانوية وكنت بقولها عادي جداً دون أى خجل. لكن لما دخلت الجامعة كنت بتكسف أقول أني مابصليش.. ولما كنت بروح كنت بقول لنفسي اشمعنى أنا مابصليش ليه؟؟ وكان مجرد سؤال داخلي لا يأخذ من وقتي الكثير ولكني أيضاً لم أكن أحب السهر إلى الفجر كما الآن- يعني كان لازم أنام قبل ما اسمع آذان الفجر لأنى من جوايا عارفة أنه ماينفعش اسمع الآذان وماأصليش وخصوصاً أن فى الوقت ده طبيعي ببقى فاضية مش زي بقية اليوم اللي حتى لو سمعت الآذان فيه بكون مشغولة.

- ماكنتش محجبة.. كنت أصغر بنت في عائلتي وفي صديقاتي سناً وحجماً وده يمكن ماكنش مخلي حد مهتم أنه يكلمني على فرضية الحجاب ومن ناحيتي كنت بتحجج دائماً بأن الجو حار.. وكنت- للأسف- بلبس قصير وكنت بتضايق من مدير المدرسة لما يزعق لي وأقول بيني وبين نفسي هو ماله لبسي؟ وفيها إيه لما البس كده؟!!.

- كنت بسمع أغاني كتييييير وماوقفش الأغنية الواحدة غير لما أكون خلاص حفظتها. ماكنتش اعرف أن سماع القرآن أجمل بكتييير-
- كنت برد على التليفون بـ"آلو"- ماكنتش أعرف أن السلام عليكم هي تحية الإسلام اللي هاخد على كل حرف فيها ثواب.
- كنت بلعب على الكمبيوتر بالساعات وماسكتش غير لما يقولى congratulation.- ماكنتش اعرف أن ربنا هيسألنى عن وقتى والمفروض أعمل فيه حاجة أهم من مجرد اللعب.
- كنت لو واحدة صاحبتى حكت لي حاجة- أيام ثانوي- احكيها لبقية البنات عادي جداً وآدينا بنتسلى - دلؤتى بدعى أنهم يسامحونى لأنى ماكنتش أعرف إن فيه حاجة اسمها أمانة المجلس-.
- كنت بضيع ساعات كتير من وقتى فى متابعة الكليبات الجديدة. - ماكنتش اعرف أن فيه قنوات كتير مفيدة جدا وبتجيب برامج ومعلومات مهمة فعلاً.
- كنت برفع حواجبي واحط روج والبس بنطلونات وبديهات وأنا مغطية رأسى - كنت مفكرة أن ده حجاب- وعادي جداً هو فيها إيه!!.
- كنت برسم طيور وحيوانات(ذوات أرواح يعني) لمجرد عمل لوحات وليس كمادة تعليمية فقط.
- وكنت مُدمنة تصوير سواء اذهب لاستوديو ليقوم بتصويري أو بكاميرتي الخاصة التى كنت أحملها معي دائماً.- ماكنتش أعرف أن كل ده إهدار وتبذير للمال-. (ماكنش لسه فيه موبيلات بكاميرا) وحتى بعد ماطلعت كنت أنا خلاص خفيت من التصوير وماعدتش بحب أتصور.
- كان ممكن أركب أى مواصلة ومش مهم رجل يجلس جواري- آه كنت ببقى متضايقة- رغم إني كنت بحط شنطتي بيني وبينهم- ولكني لا أملك سوى هذا نظراً لزحام المواصلات- دلوقتى ممكن أقف بالساعات بشرط أن أختار أن اللي هيجلس جواري تكون بنت.

- ماكنتش بصافح الرجال الأغراب لكني كنت بصافح أقربائى من الرجال- ماكنتش أعرف أن المصافحة حرام لجميع الرجال دون محارمي-.
فى بداية أيامى الجامعية كانت فترة محاولة التزامى وكنت طبعاً لسه فيه حاجات كتير معرفهاش وماكنتش لسه أقدر أقول على نفسى ملتزمة ونظراً لتعدد أنشطتي الجامعية(أشغال فنية- نادى الأدب- الجوالة- الرحلات) أصبح لي زملاء شباب وكنت أكن لهم جميعاً مشاعر الأخوة والاحترام المتبادل وتذكيري لهم دائماً بالأدعية والأذكار- ويمكن بتكلم عنهم النهاردة عشان لو حد فيهم بيقرأ كلامى دلوقتي يعرف سر انسحابي المفاجئ من حياتهم وتوقفي عن ارسال الرسائل الدينية لهم.- ماهو ماكنش ينفع اختار ربنا ويبقى لي أصدقاء شباب مهما كانت العلاقة محترمة وتتحدث فى الغالب عن الدين.. لأن ربنا قال" .... ولا متخذات أخدان".. وعلى قدر ارتباطي بصحبتهم الطيبة وجدت أن حبي لله أكبر بكثير.

إلى أن ظهر فى حياتى هذا الرجل.. أنه أستاذي الفاضل عمرو خالد.



دخل حياتي بالصدفة البحتة.. وكأن ربنا أرسله لي..
كنت كعادتي أقلب فى قنوات التلفاز بالساعات وأثناء انتقالي من قناة لأخرى بلا هدف واضح توقفت قليلاً عند قناة بعينها لأجلب شيئاً ما وتركت جهاز التحكم لثوانى لأسمع هذا الرجل يقول" يعني أنت ممكن تكون قاعد دلوقتى بتقلب فى التليفزيون فتلاقينا فتسمعنا فقبل ماتقوم يكون اتغفر لك لأنك قاعد بتسمع درس دينى والملائكة تحيط بك تستغفر لك" فتركت القناة لأشاهدها وكانت البداية.
قد إيه أسلوبه جميل وبسيط وراقى.. قد إيه حسسنى أنه عايش معانا وفاهم وعارف دماغ الشباب فيها إيه.. وإزاي يعرف يتكلم معاهم ويوصل ليهم.
اتعلمت على إيديه حاجات كتير أهمها كيفية التقرب إلى الله.. فالحب فعل وليس مجرد كلمة( يعنى إيه بحب ربنا ومابصليش أو رافضة أتحجب أو بضيع وقتي أو.... أو... أو...)
وجعلنى أتخيل أنى لو اتخطبت لواحد بحبه وقالى ماتصاحبيش ولاد وماتصافحيش رجال واتحجبى وماتحطيش ماكياج وأنه هيتصل بيا خمس مرات كل يوم ولازم أرد عليه على طول وحاجات تانية كتير( ولله المثل الأعلى) لقيت نفسى طبيعي لو بحبه هسمع كلامه لأنى عارفة أنه أكيد بيحبني وبيخاف عليا وعايز يحافظ عليا وكمان محضر لى هدية غالية جداً لو أنا نفذت أوامره.
وبدأت أعيش مع قصص الصحابة من خلال أولى برامجه( ونلقى الأحبة).
عرفنى على عائلتي الحقيقية من أصحاب النبى صلى الله عليه وسلم وأتباعه.. جعلني أعيش معاهم وأراهم بقلبي وأتمنى مرافقتهم فى الجنة.
علمني حاجة حلوة أوي وهى ليه ما تبدأيش أنتِ بالخير.. ليه تستني لما حد غيرك هو اللى يبدأ.. يعنى لو متخاصمة مع حد ابدأي أنتِ بالصلح أو شوفي لو النبي صلى الله عليه وسلم في الموقف ده كان هيتصرف إزاى وقلديه.

قد إيه غيرني وجعلني أظبط حياتي من خلال فهم ومعرفة الآيات القرآنية والأحاديث النبوية الشريفة.. وبدأت أغير من حياتي شيئاً فشيئاً.. اللي اسمعه أطبقه على طول.- اللهم اجعلنى ممن يستمعون إلى القول فيتبعون أحسنه-.

إلى أن صرت بفضل الله قبل أن أقوم بفعل أى شئ أستحضر النية أو أذكر حديث نبوي أو آية قرآنية كريمة تدعم موقفي وتؤيد ما سأقوم به وإذا لم يحضر في ذهني شيء أتسائل ترى لو النبي عليه الصلاة والسلام رآني الآن هل سأكون فخورة لما أقوم به أم لا..
وأصبحت استمع إلى أى برنامج ديني بعد ما كنت أغير القناة سريعاً قبل حتى أن استمع إلى عنوان الحلقة وأصبحت أبحث فى الكتب والإنترنت وأصبح عندي نهم لمعرفة ديني الإسلامي الحبيب.. ومع كل ذلك يظل أستاذي الفاضل "عمرو خالد" يحتل المركز الأول بالنسبة لي وأصبحت مشاهدة برامجه من ضمن أهم طقوسي فى رمضان.

وأصبحت بكل فخر أمة الله التى جاءت إلى الله ذليلة بعد طول غفلة.

أستاذى الفاضل لك مني باقة عرفان بالجميل محملة بكل الشكر و التقدير متمنية لك أن يجازيك الله عني خير الجزاء وأن يوفقك الله دائماً ويسدد خطاك ويبارك لك فى ذريتك ويجعلها امتداداً لك.
أحسبك على خير ولا أذكى على الله أحدا.





سؤال جانبى:
ــــــــــــــــــــــــــ
* لمن تهدى الآن باقة عرفان بالجميل ؟ ولماذا؟.

هناك 34 تعليقًا:

Carmen يقول...

بسم الله ماشاء الله ربنا يبارك فيك ويثبتك اختي الفاضلة ويهديكي ويهدي بك ويجعلك سببا لمن اهتدي
ويهدي جميعا ويثبتنا علي طاعته
خالص احترامي وتقديري

Unknown يقول...

السلام عليكم أختي موناليزا..

الراسلة رائعة.. كلماتها رقيقة ونابضة بالحياة وبحرارة الإيمان.. هذا ما شعرته والله..

هذا إضافة إلى قيمة العرفان بالجميل.. ما أحلاها من قيمة قمتِ بتطبيقها عمليا..
أرجو أن أحتذي بك قريبا في بوست شبيه.. ولتكن سنة حسنة تسنيها بين مدوناتنا..

ربنا يثبتك على دينه.. ويجعلك ممن يكرهون أن يعودوا إلى المعاصي كما يكرهون أن يقذفوا في النار..

أرى أختي الكريمة أن ترسلي بهذه الرسالة إلى موقع عمرو خالد.. فهو يستحق أن يرى هذه الكلمات الرائعة..

تحياتي أختي الكريمة..

Dr/ walaa salah يقول...

اولا انتي جميله اوي انك تعترفي بكل ده

وما شاء الله عليكي ربنا يثبتك ويثبتنا

بالنسبه لسؤالك \

والله ناس كتير اوي الواحد يدين ليهم بالعرفان

اولهم ماما وبابا

اللي معودينا من صغرنا على الصلاه والحمد لله

بجد بشكرك يا حبيبتي

على فكره انا اسمي ولاء صلاح مش ولاء صالح

محمد فخري يقول...

ما شاء الله..
ربنا يكرمك ويبارك لك ويثبتك

فعلا هذا الرجل منحه الله تعالى أسلوبا لا يقارن بسواه ورزقه القبول في قلوب عباده ومكانة بيننا نحن الشباب تجعلنا نرى فيه أملا للغد وقدوة صالحة ومحركا للعمل وطاقة للنجاح

أنا أيضا أفتخر أنه أستاذي وقدوتي الأولى في هذه الحياة المعاصرة

بارك الله فيكم ،،

SHAPE YOUR LIFE (ABOALI) يقول...

مش غريب عليا انى اسمع كده
لاننا مرينا بفترات كنا فيها مثل حالك واسوء
بس انتى جمعتى كوكتيل محترم قبل الجامعة وقبل
الدخول الفعلى الى الدين
كنتى تمشين على الكرة الارضية فى القشرة
لكن ده على العموم حال من يستمتع بدينه فى النهاية
لان الصحابة كانوا كذلك
عاشوا اعمار فى البعد عن الله واقتصر حالهم على الفرار من الله
وحين حان الوقت ونادى المنادى
كانت اللحظة الفارقة لك
حين تلقت اذانك النداء فكان عمرو خالد

اعجبنى ذلك التسلسل
ولكن لم يعجبنى البعد او ترتيب الحياه بهذا الشكل
بمعنى ان التعاملات مع الدين لابد ان تسير بشكل متسق مع بعضها
ويرى غيرك فيكى كل محاسن الدين
من اتصال وتوافق
هناك بعض الامور فيها نوع من التشدد او فهم غير متكامل فى صحيح الدين
السيدة عائشه كانت تظهر للجميع وتعطى للناس النصحيه وغيرها من الكثيرات وتفرض على غيرهم الاحترام
اللائى كن فى الحرب ومختلف الميادين يد بيد مع الرجل فى بناء وكد
ولكن غياب الامان عن حياتنا جعلنا نحذر حذر كبير لا اقول مغالى فيه ولكن حذر احيانا مضر

ولكنى
فى النهاية احب ان اشجع كل من يجد طريقة الى الرحمن
وكما قال احد من اعتز بهم يوما
كل واحد يعرف شمس بيته بتشرق منين

وانتى بالتاءكيد فى ساعة الاشراق الحقيقة
تحية لك لتلك الصراحة والصورة القريبة منك
ومازال امامك الكثير لتدعى غيرك ليس من منابر الكلمة ولكن من جمال التطبيق وحسن الفهم والتعلم على يد العلماء لما فيه من صحيح الدين
فكلام استاذ عمرو خالد هو نقطة فى بحر الدين وفهمه وادراكه

اعانك الله ووهبك الجنة والقرب من الرحمن والسجود تحت عرشه
وتنالى رحمته وعفوه

اما عن من نقدم لهم العرفان
فتلك المنابر التى فى اعلى المساجد
التى تنبه بالاذان خمس مرات
تدعونا لكى نستفيق تحت عناوين
الله اكبر
الله اكبر فوق كل عمل تقوم به

فاءن كان للاشخاص دور
فاءن المنابر كانت كل خمس ساعات
تقول تعالى واقترب وفز بالقرب من جنان ربك


تقديرى لانسان قدير

سواح في ملك اللــــــــــــــــــه- يقول...

امة الله
كم جميل هذا الاسم
جزاكي الله خيرا
اللهم ثبتتك علي دينه الحق
اللهم بارك لكي في بيتك وولدك
تحياتي يااختنا الفاضلة

eng_semsem يقول...

ربنا يبارك فيكي ويقويكي ويثبتك على الايمان ويهدي بيكي حقيقي كلنا بنتوه احيانا مع الدنيا بس ياريت ماتسرقش مننا داللي باقي من دينا ونتمسك بيه لان هو حياتنا وبالنسبه للواجب والعرفان بالجميل انا اهديه لابويا اللي عنده مكتبه جميله شجعني اني اقرى فيها واتعلمت منها من ناس عظماء زي الغزالي وسيد قطب والقرضاوي
تقبلي تحياتي ودعواتي

Unknown يقول...

اللهم ارنا الحق حقا وارزقنا اتباعه وارنا الباطل باطلا وارزقنا اجتنابه وثبتنا والمسلمين جميعا على دينه
الاخ الكريمshape your life السيدة عائشة ممن قال الله فيهن (واذا سألتموهن متاعا فاسألوهن من وراء حجاب )ولما خرجت للصلح بين المسلمين في مقتل عثمان كانت في هودج ولعلك تذكر ان معركة الجمل سميت بهذا الاسم لكثرة من قتل حول هودجها المحمل على الجمل فأين ظهورها للجميع ورجاء تقول رأيك من غير موضوع صحيح الدين ده فرأيك صواب يحتمل الخطأ

غير معرف يقول...

أمة الله ..غفر لك الله وهداك وبارك فيك ولك
..ما أجمل الاعتراف ..ماأحلي التوبة الي الله ..وما أجمل العرفان بالجميل
موضوعك رائع ومدونتك اروع
جعلها الله في ميزان حسناتك
اشكرك علي تعريفي بها عندما دخلت الي مدونتي وأضفتي تعليقك ..وإن شاء الله سأكون من المتابعين لجديد مواضيعك

Dr. Ibrahim يقول...

ربنا يصلح حالك ويبارك فيكى..
وخير الخطائين التوابون..
كلنا أخطأنا ولكن الذكى هو من يتوب ويثبت على الحق..
اللهم ثبتنا جميعاً على الحق.

أما بالنسبة لعرفان الجميل فهو لأى إنسان علمنى شىء من مدرسين وجيران وأى شخص علمنى أى شىء نافع فأكن له بالجميل ..

Tota يقول...

جميل اوى انك تحكى مراحل حياتك بالطريقة دى وبالحس العالى دا وبجد كلامك حاسة بيه فعلا لاننا بنمر بيه حاليا ..واختيارك لعمرو خالد كشخصية اثرت فيك واثرت فى ناس كتيرة جداا وصاحب فضل كبير ع ناس كتير ومن الشخصيات اللى بحبها جداا ..بس انا ادركت لما كبرت ان فى حاجات كتيرة مش بتيجى مرة واحدة ولكن بالتعود والتكرار وطبعا اهم شىء قدرة الانسان نفسة ع انه يعملها باستمرار ....سؤالك عن شخص اعترفله بالعرفان والله ناس كتيرة اوى سواء مدرسين فى المدرسة او كان ليا اصحاب كويسين قدروا يأثروا فيا ويتاثروا بيا وناس قرايبى ...لكن تقريبى لله سبحانة وتعالى كان السبب الاول فى دا هو امى ربنا يباركلى فيها ودايما كانت تحثنا ع الصلاة وقراة القرأن والاذكار خالص احترامى ليهم جميعا....وشكرا ليكى موناليزا ع مواضيعك الجميلة اللى دايما بحس فيها بانها طالعة من انسانة حاسة بكل شىء بتكتبة

مجداوية يقول...

السلام عليكم

ومثلك آلاف مؤلفة وبدون مبالغة فعمرو خالد بالفعل أثر على الكثيرين من الشباب وبدايته كانت موفقة جدا وكنت من المعجبات به جدا وأعلم أنك تردي بهذه التدوينة بطريقة غير مباشرة على الهجوم الذي شن عليه وأنا ممن هاجموه بشدة لأنه من "وجهة نظري" حاد عن الطريق ولكن هذا لا يمحي تأثيره الطاغي على الشباب خاصة وهو ما استغله الغرب جدا في استخدامه لبث أفكار المواطنة والإختلاط وتقبل الآخر بكل عيوبه وكفره وسيئاته وما استغله الحزب الحاكم في الدعاية لمرشح له في ندوته الأخيرة بالأسكندرية والغاية لا تبرر الوسيلة !!!
لا ننكر فضله في تأثيره في هداية الكثيرين وأنت منهم ولكن لا يمكن أن نتغاضى عن ميله عن الطريق بسبب هذا الفضل ولعل الله يعيده لسابق عهده وتركيزه على الدعوة وتصحيح أخطاؤه
أعلم أننا مختلفان في تلك القضية وكما أوضحت لك سابقا ,هذا لاختلاف زاوية الرؤية
ولكن بغض النظر عن هذا , الإعتراف بالجميل من شيم الكرام,

مذكرات موززه عانس يقول...

بارك الله فيكى يا امة الله فعلا الواحد محتاج دايما يحس انه لازم يقرب من ربنا سبحانه وتعالى ويارب يهدينا كلنا

موناليزا يقول...

كارمن
ـــــــــ
أهلا بيكِ يا كارمن
ربنا يعزك يارب ويتقبل دعائك ولكِ بالمثل اللهم امين
اسعدتينى جدا بدعواتك الطيبة
نورتينى حبيبتى وفى انتظارك دائما


***************************

ماجد القاضى
ــــــــــــ
وعليكم السلام ورحمة الله وبركاته
أهلا بيك أستاذ ماجد
الحمدلله فما توفيقى الا به:)

ونحن فى انتظار ماسيخطه قلمكم ومن دواعى سرورى أن أسن سنة حسنة بين الجميع:)

ربنا يتقبل دعائك ويرزقك بكل الخير اللهم امين

أشكرك جدا لتذكيرى.. فعلا هو أكتر شخص من حقه يقرأها
وقد قمت بتنفيذ نصيحتك:)

أسعدنى تعليقك
وارجو دوام التواصل


*************************


د/ ولاء صلاح
ــــــــــــ
أهلا بيكِ يا ولاء
ربنا يعزك يارب اخجلتم تواضعنا:)
اللهم يا مقلب القلوب ثبت قلوبنا على دينك

ربنا يخليهملك ويباركلك فى عمرهم

الشكر لله ياجميلة فماتوفيقى الا به

بعتذر جدا عن هذه الغلطة المطبعية:)

نورتى مدونتى واسعدنى تواجدك


*************************

محمد فخرى
ـــــــــــ
أهلا بيك أستاذ محمد فى زيارتك الاولى
ربنا يعزك يارب ويتقبل دعائك اللهم امين

ده حقيقى بفضل الله
أشكرك جدا لتعليقك
نورت مدونتى
ويسعدنا دوام التواصل

*************************

ابو على
ـــــــــ
أهلا بيك أستاذ حسن
الحمدلله الذى هدانا لهذا وماكنا لنهتدى لولا ان هدانا الله
وماكنتش هقدر اتذوق طعم الشئ الحلو لو لم أكن تذوقت طعم الشئ السئ
اللهم ارزقنا حلاوة الايمان

مع احترامى لرأيك فى الاشياء التى لم تعجبك بس انا حقيقى مش فاهمة تقصد إيه؟

وفعلا يافندم مازلت اشعر بان ينقصنى الكثير والكثير لأتعلمه عن دينى وأرجو من الله دائما ان اكون قدوة للاخرين بأفعالى

ربنا يعزك يارب ويتقبل دعائك اللهم امين

أشكرك جدا لتعليقك
يسعدنا دوام التواصل
وفى انتظار توضيح مالم أفهمه فى تعليقك:)

************************

سواح فى ملك الله
ـــــــــــــــ
أهلا بيك أستاذ خالد
:) ربنا يكرمك ويعزك ويتقبل دعائك ويرزقنى قريباً ببيت وأولاد ويباركلى فيهم:)

أشكرك جدا لتعليقك
يسعدنا دوام التواصل


*************************

انج سمسم
ـــــــــ
أهلا بيك يا بشمهندس
ربنا يكرمك يارب ويتقبل دعائك اللهم امين

ربنا يخليلك والدك وتكون لابنائك زى ما كان هو ليك

أشكرك جدا لتعليقك
يسعدنا دوام التواصل


*************************

واحد من الناس
ـــــــــــــ
أهلا بيك يافندم فى زيارتك الاولى
ربنا يتقبل دعائك ويرزقنا جميعا حلاوة الايمان

اجابة سؤالك اعتقد ان المقصد هو وجودها وحرصها على نشر الدعوة والله أعلم

أشكرك لتعليقك
يسعدنا دوام التواصل

**************************

ماشى بنور الله
ــــــــــــــ
أهلا بيك يافندم فى زيارتك الاولى
ربنا يكرمك ويتقبل دعائك اللهم امين
فعلا ما اجمل الرجوع الى الله

ربنا يعزك أشكرك جدا لرايك فى مدونتى فماتوفيقى الا بالله

تنورنا يافندم فى أى وقت
ويسعدنا دوام التواصل


**************************

د/ ابراهيم
ـــــــــــ
أهلا بيك يا دكتور
ربنا يكرمك ويتقبل دعائك اللهم امين
أشكرك جدا لمشاركتك
يسعدنا دوام التواصل


*************************

توتة
ــــــــ
أهلا بيكِ يا توتة
أشكرك جدا لرأيك فى اسلوبى والحمدلله فماتوفيقى الا به

فعلا ياحبيبتى اهم حاجة رغبتك فى التغير للأحسن

أشكرك جدا على تعليقاتك المميزة ومشاركتك ورأيك فيما أكتب

فى انتظارك دائما


**************************

مجداوية
ــــــــ
وعليكم السلام ورحمة الله وبكاته
أهلا بيكِ ياحبيبتى بعد طول غياب

أنا فعلا مدينة لعمرو خالد بالكثير وهذه التدوينة أقل ما يمكن أن اقدمه له

حبيبتى الغالية اسلامنا انتشر قديما بسماحة المسلمين واخلاقهم الطيبة مع غير المسلمين
هل تريدين ان يقول علينا بمحاربة اعداء الله وينتشر الدم والقتل بيننا وخصوصا ان فيه ناس بتفهم الكلام على مزاجها وماهتصدق واحنا مش ناقصين وكفاية علينا اوى الفتنة الطائفية اللى كل شوية تظهر
أما عن ندوته الاخيرة فى اسكندرية فلقد استمعت اليها ولم أجد فيها شئ يدينه ولا اتذكر انه اتكلم عن الانتخابات من أصله

عندك حق بغض النظر عن اختلاف ارائنا فى هذه النقطة فالاختلاف فى الرأى لا يفسد للود قضية:)
نورتينى غاليتى واسعدنى تواجدك

*************************

بومبونة
ــــــــ
أهلا بيكِ يا جميلة
ربنا يكرمك ياحبيبتى ويرزقنا جميعا حلاوة الايمان ويجعل طاعته احب الاعمال الى قلوبنا

نورتينى واسعدنى تواجدك

Maha Shahen يقول...

ربنا يكرمك حبيبتى ويبارك فيكى ويسعدك يا رب
ويثبتك دايما علي الحق
ورسالة العرفان بالجميل بهديها لناس كتيره كانت سبب فى تكوين كل ما انا عليه حتى الأن
يا رب نكون كلنا علي صوره ترضى الله ويفرح بيها نبينا الحبيب

من كل بستان زهرة يقول...

ربنا يبارك فيكي
ويزيدك ايمان وتقرب لله
ويهدي جميع شباب وبنات المسلمين

أكيد اهدي باقة الورود والعرفان
لكل شخص اوصلني لما انا فيه اليوم
من تربيه وعلم ومكانه

تحياتي

غير معرف يقول...

ربنا يبارك فيكي و يزيدك هداية و يهدي بك غيرك

عمرو خالد راجل جميل و مخلص ربنا يجازيه كل خير

كلمات من نور يقول...

ربي يبارك فيكي يا موناليزتي ويزيدك قرب من الله

تعرفي أول مرة اتردي التونيك أو بداية العبايات والخمار كان في محاضرة لعمرو خالد في إسكندرية من حوالي عشر سنوات أو اكتر يمكن ............ربي يهديه ويرده تاني للحق والصواب ويصلح حاله وحالنا أجمعين ...

عرفان بالجميل يصدر مني للكثيرون والكثيرات ولكنني أتذكر والدة صديقة لي قربتني من الله كثيرا في بداية حجابي

جزاها الله كل خير

SHAPE YOUR LIFE (ABOALI) يقول...

الذى لم يعجبنى هو انقطاع التواصل مع من كنتى تعرفيهم
باءمكانك ان تظللى دائما مع من تعرفيهم مع كل الاحترام والتقدير
وتوضحى فى اسلوب سلس مالهم وما لك

وايضا
الانتظار بالساعات لركوب السيارة بجانب فتاه
لماااااااا؟
وضع الفواصل مطلوب وبامكانك الركوب مع وضع الفواصل
فذلك الوقت هو حياتك وليس كل ما يركب قروش مفترسة
بل فى الكثير من الاحوال يكون تهيئات من الطرف الاخر
مسائلة الصور بكل مافيها من اجتهادات فى الاراء
ليس مجال للعرض هنا برأى مطلق هكذا انها حرام
لان العلماء بينهم اختلاف فيها
وده من عظمة الدين


المهم
انى قصدت
الطريق الى الدين طريق يجب ان يكون طريق مرن متجاوب مع كل الناس
حتى نكون قدوة لهم بالتعاملات والمقدرة على مساعدتهم

تقديرى الكامل

شمس النهار يقول...

ماشاء الله

يابخته اللي ربنا يرضي عليه ويرده الي رحابه

انتي محظوظه ان ربنا نور لك طريقك

وبالبوست ده انرتي الطريق الي الكثير

كتير في حيتنا نحب نهدي لهم باقة ورد
علي طول الحياة

تعالي عندي في المدونةوافتكري معايا الذكريات
:))
:))

غير معرف يقول...

الفاضلة: موناليزا
حياكِ الله

أنا متابع لكِ على فكر لكن أنا مًقل في المشاركة بطبعي عند الجميع لظروف الوقت

=========

العرفان بالجميل يتسع لقائمة طويلة للغاية
كل من علمني حرف
أدين له بالجميل

موناليزا يقول...

نور شاهين
ـــــــــ
أهلا بيكِ يا نور
ما اجمل دعواتك لى ربنا يتقبل ولكِ بالمثل اللهم امين
ربنا يعزك يارب ويفرح قلبك ويرزقنا جميعا حلاوة الايمان
نورتينى حبيبتى واسعدنى تواجدك


*************************


من كل بستان زهرة
ـــــــــــــــــــ
أهلا بيكِ حبيبتى
ربنا يعزك يارب ويتقبل دعائك اللهم امين
أشكرك جدا لمشاركتك
وفى انتظارك دائما


**************************


يوميات شحات
ـــــــــــــ
أهلا بيك يافندم
ربنا يكرمك يارب ويتقبل دعائك اللهم امين
أشكرك جدا لتعليقك
يسعدنا دوام التواصل


*************************

كلمات من نور
ـــــــــــــــ
أهلا اهلا بالغالية
ربنا يعزك يارب ويتقبل دعائك اللهم امين

ربنا يثبتنا دايما على دينه ويرزقنا دايما حلاوة الايمان
ويجعلنا سببا فى هداية من حولنا ليتذكرونا فيما بعد ويدعو لنا بالخير

أشكرك جدا لمشاركتك
نورتينى غاليتى واسعدنى تواجدك


**************************

أبو على
ــــــــــ
أهلا بعودتك يافندم
مشكور جدا على التوضيح
وسأدافع عن نفسى
أولا: باءمكانك ان تظللى دائما مع من تعرفيهم مع كل الاحترام والتقدير
وتوضحى فى اسلوب سلس مالهم وما لك

**ماكنش ينفع أفضل معاهم زى ما أنا لعدة اسباب اولا:لانهم عرفونى فى مرحلة الوسط اللى هى قبل الالتزام بشوية كتير ومش سهل يتقبلونى بفكرى الجديد ده غير انهم كانوا بيتخنقوا منى لما كنت ابعت لهم على الايميل رسائل دينية وكنت لسة مش ملتزمة اوى ويقضوها تريقة ولان علاقتى بيم قوية كنت باخد الموضوع بهزار وبرضه ابعت لهم:)
ثانيا: لانى بجد تخيلت انى اتخطبت لحد بحبه وبخاف على زعله وقالى انه بيغير علياو مش عايز يكون ليا اصدقاء شباب- ولله المثل الاعلى-

ثالثا: لان علاقتى بيهم كانت بجد أخوة اكتر منها صداقة وكلهم كانوا بيتعاملوا معايا على اعتبار انى اختهم الصغيرة يعنى كل واحد منهم له حقوق عليا اهمها مثلا ان من حقه يعرف اخبارى او يطمن عليا أو حتى اعزمه فى فرحى وانا كمان المفروض اسأل عليهم وازعل منهم لو ماعزمونيش فى فرحهم وغيرها من الامثلة اللى المفروض تكون موجودة بين الاصدقاء
(على فكرة كانوا عارفين بابا واخواتى ولو فيه مناسبة ليهم اخويا كان بيروحلهم ولو شافوا بابا دلؤتى بيسألوه عنى)
-حبيت بس اوضح لك قد ايه علاقتى بيهم اخوية ومع ذلك اختارت البعد-
لكن بعد التزامى شوفت الصورة من بره مالقيتهاش حلوة
ده غير انى كنت عايزة اعرف كل حاجة عن دينى وخصوصا فى موضوع الاختلاط وجميع المشايخ قالوا ان الاختلاط لازم يكون للضرورة
فمنعاً لأى شبهة فضلت الانسحاب من حياتهم وفيهم اللى عرف اسبابى واستوعبها ودعالى بالثبات وفيه اللى لسة زعلانين منى لغاية دلؤتى وفيه اللى مفكرين انى بعدت بحكم اننا خلاص اتخرجنا
-----
ثانيا:وايضا
الانتظار بالساعات لركوب السيارة بجانب فتاه
لماااااااا؟
وضع الفواصل مطلوب وبامكانك الركوب مع وضع الفواصل
فذلك الوقت هو حياتك وليس كل ما يركب قروش مفترسة
بل فى الكثير من الاحوال يكون تهيئات من الطرف الاخر

**كده أضمن وأأمن بالنسبة لى لان الفواصل هتكون ايه مجرد شنطة ايدى بحطها جنبى طيب مافيه كتف اللى جنبى ودراعه دول بقى اعمل فصل بينهم ازاى؟؟
ده غير ان اغلبية الرجال على اختلاف اعمارهم بيستعبطوا بجد
كنت فى الاول أقول عادى انا حجمى صغير وطبيعى هيكون فيه مسافةفاضية بينى وبين اللى جنبى لكن أبدا برضه كانوا بييجوا على المسافة الفاضية دى.. كده احسن بالنسبة لى

ثالثا:مسائلة الصور بكل مافيها من اجتهادات فى الاراء
ليس مجال للعرض هنا برأى مطلق هكذا انها حرام
لان العلماء بينهم اختلاف فيها
وده من عظمة الدين

**مش عارفة قصدك التصوير ولا الرسم
عموما لو التصوير انا بعتبره تبذير للمال وفيه غيرى أحق بالفلوس دى لو كانت كاميرا فوتوجرافيا أما لو كاميرا ديجيتال أو كاميرا موبايل فانا مازلت محترفة تصوير:)
بس بجد ماعدتش بحب أتصور

أما لو تقصد رسم ذوات الارواح فبرضه اغلبية المشايخ اذا ماكنش كلهم اباحوها فى حالة الضرورة كالتعليم مثلاً

وعموما أنا لم أحرم شئ مطلقاً أنا بس حبيت أوضح انا اتغيرت ازاى وعشان دينى ممكن اسيب اى حاجة فيها شبهة ولو حتى صغيرة

أشكرك جدا لمتابعتك
ويسعدنا دوام التواصل


*************************


شمس النهار
ـــــــــــــ
أهلا بيكِ حبيبتى
الحمدلله الذى هدانا لهذا وماكنا لنهتدى لولا ان هدانا الله

كنت عندك ياحبيبتى:)
بس مالقتش حاجة أقولها:)

نورتينى ياجميلة واسعدنى تواجدك


***************************

أحمد شريف
ــــــــــــ
أهلا بيك أستاذ أحمد بعد طول غياب
كان الله فى العون يافندم
وانا كمان على فكرة متابعة جيدة لمدونتك حتى وان لم أترك تعليق:)

وهذا شيم الكرام فالعرفان بالجميل لا يعترف به الكثير

اشكرك جدا لتعليقك يسعدنا دوام التواصل

المصوراتي يقول...

لقد بكيت من كلامك الصادق
وجددتي لي الامل في اناس مازالوا علي خطأهم الذي كنا عليه حتي تاب الله علينا

الي الان لا اصدق ان هناك من يقول مثل قولك

انا لا استطيع فعل ذلك

اسأل الله لك الثبات اختاه
حماك الله

تحياتي

TIMMY !! يقول...

ربنا يهدينا و يهدي بنا ,

فعلا لأن يهدي الله بك رجلا خير لك من حمر النعم

فارس عبدالفتاح يقول...

اهدى هذه الباقة الى ابي وامي واهلي لانهم وقوفو معي في حياتي العملية في بدايتها وكانت في منتهى الصعوبة .


فاقدم لهم هذه الباقة عرفاناً لهم .

ليس فقيرا من يحب يقول...

انتى جميله اووى يا مونى

ربنا يثبتك ويهدينا لكل عمل يقربنا من ربنا

ربنا يبارك فيكى ويسعد ايامك

ويفرح قلبك عاجلا غير اجل

انا باعترف بالجميل لكل انسان اثر فيا بكلمه صالحه او فعل صالح
اوحتى ابتسامه دخلت السعاده على قلبى

انا باحبك قووووووووووووووى

Butterfly يقول...

ربنا يهديكى كمان وكمان
ويهدينا جميعا يارب

فعلا د عمرو خالد كان سبب فى هدايه وانصلاح حال شباب كتير أوى

كوكتيل يقول...

أسأل الله لك الثبات اللهم أمين

باقة الورد راح أهديها لنفس الشخص اللى أهديتيله الإستاذ الفاضل ومعلمى الدكتور عمرو خالد لأن فعلا أحمد الله كثيرا لأنه وضعه في طريقي فنشأة على برامجه الجميلة والمفيدة جداجداجدا

أحبه جداجدا فإسلوبه ومنهجه في النصح جميل ولين ومتخذ من الوسطية منهجا
وفعلا يتكلم مع الشباب بإسلوبهم ويعرف ماذا يردون

جزاه الله عنا خير الجزاء اللهم أمين يارب العالمين

قلم رصاص يقول...

السلام عليكم

جزاكِ الله كل خير والله اختي الكريمه
بجد أحييكِ على اقدامك على كتابة هذا البوست دون خجل من الماضي
فمهما كنا نرفض الماضي ، الا انه لابد من وجوده في حياتنا لنستشرف به المستقبل سواء كامتداد له او تفاديا لاخطاءه

ربنا يثبتك ويزيدك ويقربك لربنا اكثر واكثر

خالص تقديري وتحيتي

(green eyes) يقول...

يا مثبت القلوب ثبت قلوبنا على طاعتك

ربنا يهديكي وايانا ويزيدنا قربا منه ويثبت اقدامنا

اما عن عرفان الجميل فاهديه الى كل من اعطاني معلومة تقربني فيها الى الله

حصان المرجيحة يقول...

مع اختلافي الكبير مع أ/عمرو خالد
الا اني لا انكر انه كان بمثابة الشرارة لبعض الناس
و لكن لا يجب ان يكون هو اساس تلقي الدين و انما نقطة انطلاقة فقط

موناليزا يقول...

المصوراتى
ــــــــــــ
أهلا بيك يافندم
تعليقك أثر فيا جدا
وربنا يكرمك ويثبتنا جميعا ويهدينا دايما لطاعته ويرزقنا حلاوة الايمان اللهم امين
أشكرك جدا لتواجدك
يسعدنا دوام التواصل


************************

مدونة تظبيط
ــــــــــــــ
أهلا بيك يافندم
ربنا يتقبل دعائك ويجعلنا سبب فى هداية الناس
أشكرك جدا لتعليقك
يسعدنا دوام التواصل


***********************

فارس عبدالفتاح
ـــــــــــــــــ
أهلا بيك أستاذ فارس
ربنا يباركلك فى عمرهم
وأشكرك جدا لمشاركتك
يسعدنا دوام التواصل


**************************


ليس فقيرا من يحب
ـــــــــــــــــ
أهلا بيكِ يا رونى
:)ده من ذوقك ياحبيبتى
أقول أنا إيه دلؤتى بعد دعواتك الجميلة دى:)
ربنا يسعدك ياحبيبتى ويتقبل دعائك
حتى اجابتك على السؤال بتقول انك جميلة بجد:)
وانا كمان بحبك اوى وربنا يجمعنا تحت ظله فى يوم لاظل فيه الا ظله
أحبك الذى أحببتنى فيه
نورتينى حبيبتى
واسعدنى تواجدك


***********************

بيترفلاى
ـــــــــ
أهلا بيكِ حبيبتى
ربنا يكرمك ويتقبل دعائك اللهم امين
ده حقيقى عمرو خالد كان سبب فى هداية ناس كتير ربنا يكرمه
نورتينى ياجميلة واسعدنى تواجدك


************************

كوكتيل
ـــــــ
أهلا بيكِ حبيبتى
ربنا يكرمك ويتقب دعائك اللهم امين

:) حقا اسعدتينى انك بتهديها لأستاذى عمرو خالد

نورتينى حبيبتى واسعدنى تواجدك


*********************

قلم رصاص
ـــــــــ
وعليكم السلام ورحمة الله وبركاته
أهلا بيك يافندم
ربنا يكرمك يارب واشكرك جدا على تعليقك
يسعدنا دوام التواصل

************************

جرين آيز
ـــــــــــ
أهلا بيكِ حبيبتى
ربنا يعزك يارب ويتقبل دعائك
أشكرك جدا على مشاركتك
نورتينى ياجميلة واسعدنى تواجدك

*************************

حصان المرجيحة
ـــــــــــــ
أهلا بيك يافندم
فعلا كانت البداية به ولكن بحور العلم أبداً لن تنتهى
أشكرك جدا لتعليقك
يسعدنا دوام التواصل

إنسان || Human يقول...

مش عارف أقول ايه
جزاك الله خيراً
وبجد البوست ده أثر كثيراً فيا....أستمري في طريقك وأن يكون لك هدف سامي في الحياة يخدم الأمة جمعاء
الأستاذ عمر خالد واحد ممن أثرو في الشباب واثر فيا شخصياً
جزاكي الله كل الخير

موناليزا يقول...

هيومان
ــــــــ
أهلا بيك يافندم
ربنا يكرمك واشكرك جدا لتعليقك ولمشاركتك
يسعدنا دوام التواصل