السبت، 12 فبراير 2011

سنة حلوة وعام سعيد






النهاردة مدونتى الحبيبة تمت عامها الثالث.يااااه قد إيه الأيام بتجرى بسرعة.
وكعادتى معكم فى هذا اليوم أنوه على ضرورة حضور الحفل السنوى لمدونتى لنقيمها سوياً ولذلك وجب عليكم أولاً الانتهاء من أى شئ قبل دخول الحفل حتى يكون ذهنكم صافياً تماماً لفقرات الحفل.


وسنبدأ بأولى فقرات حفلنا الليلة وهى عرض الهدايا التى حصلت عليها مدونتى فى العام السابق.
أول هدية كانت من psycho بمناسبة عيد ميلاد مدونتى الثانى.


وبقية الهدايا كانت من The illusionist بمناسبة عيد ميلاد مدونتى الثانى.









وهدية عيد الأضحى المبارك كانت أيضاً من The illusionist .






وهدية رقيقة من carmen





وصلنا للفقرة الثانية وهى ملحوظاتى هذا العام .



أولاً: رداً على إحدى التعليقات التى جاءت لى العام الماضى أقول مجدداً كل ما يكتب فى مدونتى فهو من نتاج قلمى الخاص وإذا تم النقل من مكان- ونادراً ما يحدث- بكتب أنه منقول ولو أمكن بكتب مصدر النقل.- فما لا أرضاه لكتاباتى لا أرضاه لكتابات الغير-.

ثانياً: أعتذر للأخوة الرجال من المدونين الذين يريدون إضافتى على الفيس بوك لأنى لا أضيف الرجال.

ثالثاً: أشكر جميع المدونين الذين اشتركوا فى جروب برنامجى الإزاعى "حماتى فى بيتى". ..ومازال يسعدنى انضمامكم جميعا ومشاركتكم.

(على فكرة مش شرط تكون مرتبط أو لأ أو ليك حماة أو لأ لأنك ممكن جداً تفيد أصحاب المشاكل برأيك المحايد.. ده غير أنك أكيد هتستفيد شئت أم أبيت.. وهتستمتع بأسئلتى هناك كما تستمتع بها هنا:) وأسئلتى برضه لا تشترط أن يكون لك حماة أو لأ لأنك ممكن جداً تعيش اللحظة وتتخيل وتجاوب:))

رابعاً: حدث تلميحات على وجود مدونين يسيئون لغيرهم وخاصة من البنات ولذلك أطلب من الشخصية المخدوعة أن تعرفنا على هذا الشخص المسئ بطريقة واضحة ومعرفة ماذا فعل بدل ما تخصصى تدوينة تشتميه فيها وفى الآخر هتضطرى تنسحبى من عالم التدوين وهو ولا فى دماغه.. واقتراحى هذا لعدة أسباب:

أولاً حتى لا يخدع غيرك.. ثانياً: حتى ننبذه من وسطنا ونعرف حقيقة من نتعامل معه.. وثالثاً: حتى يخجل من نفسه ويعيد حساباته من جديد.

خامساً: فيه ناس بتزعل أنى مابعلقش عندها وناسيين أن أوقات كتير الواحد مابيلاقيش كلام يقوله فياريت زى ما أنا بعذركم لما مابتعلقوش عندى أنتوا كمان تعذرونى.

سادساً: "على الهامش" اللى بكتبها فى نهاية بعض الموضوعات ما بيكونش ليها علاقة بالموضوع المطروح وفى الغالب بتكون عبارة عن تهنئة أو تعزية وبيكون من أهم أسباب كتاباتى لها أن اللى يقرأها عندى يذهب للرابط المصاحب للمناسبة ويقوم معاه بالواجب.. يعنى لو تهنئة يدخل عنده يبارك له ولو تعزيه يدخل عنده يواسيه.. لكن لو علق عندى على المناسبة دى صاحب المناسبة مش هيستفيد حاجة وهو من حقه علينا كأحد أفراد أسرتنا التدوينية أنه يلاقى الناس حواليه فى مناسبته حتى لو ماتعرفوش.

سابعاً: لاحظت فى هذا العام قلة عدد التعليقات اللى بتجيلى مقارنة بالأعوام السابقة وحقاً لا أعلم السبب.

ثامناً: أى تعليق مالوش علاقة بالموضوع ما بنشروش.ولا أفضل أيضاً نشر تعليق يقوم صاحبه بالرد على تعليق آخر.فياريت تعذرونى وتتركوا لى مُهمة الرد على التعليقات.

تاسعاً: أنا عاملة جدولة للمواضيع يعنى مدونتى هتقوم بمهمة النشر حتى لو أنا مش موجودة فى نفس التوقيت وده معناه أن وجودى مالوش علاقة بنشر المواضيع على قد ما له علاقة بنشر التعليقات.. ولو لقيتونى اختفيت اكتر من الطبيعى يبقى أنا فى الوقت ده محتاجة لدعائكم.

عاشراً: لو فيه أى حد زعلان منى ياريت يعرفنى لأنى بجد استحالة أقصد أزعل حد فيكم.



وصلنا للفقرة الثالثة وهى فقرة الشكر.






أقدم بطاقة شكر وتقدير لكل من:

The illusionist على هداياه الرقيقة والجميلة والتى كان لها عظيم الأثر نفسى.

واحد من البلد دى على تعليقه الخاص بعيد ميلاد مدونتى الثانى من هنا.

بت خيخة وأي كلام لأنها وضعت رابط موضوع " ما أريده من الرجل وما لا أقبله" فى مدونتها طوال فترة عرض الموضوع.

قلم رصاص لأنه وضع رابط موضوع " جسدى الحبيب" فى البانر الجانبى لمدونته قبل أن يغير قالبها.

طهر فؤادك لأنه صاحب فكرة موضوع خلص الكلام.

كلمات من نور لوضعها موضوع"يا من تدعى محبته (1)" فى مدونة "زبد البحر".

فاتيما و ستيته حسب الله الحمش لتهنئتهم الرقيقة لى يوم ميلادى ولأنها كانت بجد مفاجأة جميلة لم أتوقعها وخصوصاً لأنى لم أعلن عنه .

ويكا لعرضه موضوع " صاحبة المايوه" فى مدونته.

KHALED على لوحاته التى زينت موضوع "
ما يريده الرجل من المرأة وما لا يقبله.

(المهاجر الى الله) لتشجيعه لى على الاستمرار فى الكتابة حتى يظهر كتابى المنتظر إلى النور.

ماجد القاضي على مساعدته لى فى إضافة خاصية جديدة لمدونتى.

richardCatheart لإضافتها مدونتى فى "بيت المدونين".

eng_semsem على نصيحته لي فى موضوعه" كشف حساب".

MR.PRESIDENT على استجابته لطلبى بالدعاء لى بعد إجرائه لعملية جراحية.

سبايدرمان لمساعدته لى على إضافة خاصية لايك فى مدونتى.





وصلنا للفقرة الرابعة وهى كلمة أخيرة لصاحبة المدونة.



دخلت عالم التدوين وأنا فى أسوأ حالاتى النفسية ومعاكم وبيكم استطعت اجتياز هذه الحالة حتى وإن لم تكن ذهبت تماماً ولكنى أشعر بأن حالتى النفسية اتحسنت وماعدتش زى الأول.
أنا كنت بهرب من غدر الزمن فى حضن تعليقاتكم وقد إيه كلماتكم فرقت معايا وكانت بتنقلنى من حالة لحالة تانية خالص وزى ما يكون بجد ربنا بيهادينى بيكم.
طول الثلاث سنين اللى فاتوا كنت دايماً بطلب منكم تدعولى أن ربنا ينصرنى على اللى ظلمونى.. يمكن لغاية دلؤتى لسه ماشوفتش نصر ربنا ليا بس دلؤتى أنا حاسة براحة كنت مفتقداها من زمان.. حاسة أن نفسى رجعت لى قلباً وقالباً وبقيت أستقبل الضربات بلامبالاة مش عارفة هل ده لأنى أخدت على الوضع وعلى وش الدنيا الوحش ولا لأنى بقيت راضية بالأمر الواقع ولا لأنى واثقة فى ربنا أوى أن القادم أكيد أجمل.. بصراحة مش عارفة أحدد بس الأكيد أنى فى عيد ميلاد مدونتى الثالث حالتى النفسية متغيرة للأحسن عما كنت عليه سابقاً.
وكان حقكم عليا زى ما شاركتكم آلامى أشارككم راحتى النفسية بس برضه لسه طمعانة فى أنكم تستمروا فى الدعاء لى أن ربنا يرضى عنى وينصرنى على اللى ظلمونى ويجبر بخاطرى.
- كنتم ليا ومازلتم خير عون وسند لمواجهة مصاعب الحياة.. صرت معاكم وبيكم قادرة على التواصل مع البشر من جديد.
- شكراً لكل قرائى اللى عرفتهم على مدار الثلاث سنوات الماضية .



أنا مازلت أهتم وأقرأ جميع التعليقات مهما كان قدم الموضوع وبجد بجد تعليقاتكم بتفرق معايا جدا.. فهى بالنسبة لى كأنها ماء تحيي أرض ميتة.
- كلمة شكراً وحدها لن تكفى ما أشعر به من امتنان لكل من ترك تعليق أو أرسل لى رسالة خاصة سواء على الايميل أو على الفيس بوك.
- يسعدنى استقبال أى نقد للمدونة.
- دمتم لى خير صُحبة وجمعنى الله بكم فى ظله يوم لا ظل فيه إلا ظله.. بحبكم فى الله.





وإلى هنا حان عرض الفقرة المنتظرة من قبل الجميع وهى فتح البوفيه وعرض البالونات.






بما أنه عيد ميلاد مدونتى فهعزمكم على المشروبات المفضلة بالنسبة لى:)
المشروب الساخن هيكون" شاى بلبن".


والمشروب البارد هيكون "عصير قصب".







طبعاً قبل ما اعرض البالونات منتظرين منى كالعادة سؤال جانبى.
لكن النهاردة لانه يوم مميز ففيه عرض لا يتكرر كثيراً.
وهو: أنتوا اللى هتسألونى.
اللى يحب يسألنى أى سؤال فله ذلك.
طلب أخير .
عايزة هدية المدونة من كل واحد أنه بعد ما يعلق على الموضوع ده يترك تعليق على أى موضوع تانى يختاره ويقرأه مهما كان قدمه وحتى لو كان علق عليه قبل كده.





فى انتظاركم دائماً.


هناك 26 تعليقًا:

د. ياسر عمر عبد الفتاح يقول...

مدونة حضرتك من المدونات المحترمة جداً

ربنا يجعلها في ميزان حسناتك يارب


كل عام ومدونتك بخير

وألف مبروك :)

Carmen يقول...

كل سنة وانتي طيبة ياحبي وتسلمي ياجميل ع الهدية الرقيقة دي :x

ليلى الصباحى.. lolocat يقول...

كل سنة وانت طيبة يا حبيبة
كل سنة وانت جميلة وراقية
كل سنة ومصر حرة ورائعة
ما اجمل القدر الذى وحد بين المناسبتين

كل سنة واحنا كلنا بخير
وان شاء الله من السنة الجاية هيكون عيد قومى لمدونتك ولمصر

تحية لك من كل قلبى اختى الحبيبة

شمس النهار يقول...

الفرح لما يهل يهل بالجملة

كل سنه وانتي ومدونتك طيبين

وسنه جديده بتتولد لمدونتك مع عهد جديد


لكي مني كل الود والتقدير

مصطفى سيف الدين يقول...

كل سنة وانتي طيبة تاريخ ميلاد مدونتك بقى تاريخ رسمي
وعيد قومي لكل المصريين
كل سنة ومدونتك بخير
والسنة الجاية ان شاء الله هيبقى فيها الف بوست اكتر
لانك بصراحة بتتمتعي باسلوب جميل بيعرض افكار قيمة ودي مش مجاملة
انا فعلا باستفيد جدا لما بزور مدونتك
انا بقي عايز جاتوه بعد الكلمتين دول :)
الف مبروك وعقبال السنة المائة للمدونة

جنّي يقول...

السلام عليكم

صباح الفل ..

صباح الثورة ..

صباح الحرية ..

وكل سنة وانتي طيبة ..

الازهرى يقول...

أجمل عيد ميلاد فى أحلى لحظات مصر

يا رب يجعل كل لحظاتك أفراح

غير معرف يقول...

الف مبروك اختي الكريمة
مدونتك هذه من اجمل المدونات التي احب ان اتابعها باستمرار
وهذه ليست مجاملة
كل عام وانت بخير
والف مليون مبروك الحرية للشعب المصري
كل التحية والتقدير

الطائر الحزين يقول...

مبروك مبروك مبروووووووووووك
مبروك مبروك مبروووووووووووك
مبروك مبروك مبروووووووووووك

على كل شىء

عين فى الجنة يقول...

تحيا مصر

كلمات من نور يقول...

الف الف الفين مبروك يا موناليزتي الحبيبه وعقبال اليوبيلات يا قمرررررررررر

eng_semsem يقول...

كل سنه وانت طيبه وعقبال مليون سنه وانت هنا معانا ودايما تواجدنا بنحس فيه باستفاده ودايما بنخرج بمعلومه جميله وفكره كويسه
ربنا يكرمك ونشوفك احسن واحسن
وتكون السنه الجديده لمدونتك فيها كل خير

عاشــــــ النقاب ـقــــة"نونو" يقول...

كل عام وانتي ومدونتك دوما بخيرموناليزا من اجمل المدونات المفضلة لدي واللي بانتظر جديدها وولو ما قريتوش في وقتها ودخلت لقيتك كاتبة كذا موضوع باقراهم مع بعضهم من غير زهق وان كنت اخرج في صمت اوقات كتيرة حاسة انك قريبة من قلبي جدا وشايفاكي فعلا بقلبي لاني لسة ما شفتكيش باذن الله قريب اشوفكم كلكم بعون الله وما تقلقيش على الظلم والظلمة ربنا ما بيسيبش حد ظلم ابدا ابدا وربنا هيراضيكي باذن الله واساليني انا مجرب _ وافتكر انك عملتي موضوع عن المثليين لازلت حاطة رابط له عندي في مدونتي اختار موضوع واعلق عليه في تعليق منفصلاحبك في الله

عاشــــــ النقاب ـقــــة"نونو" يقول...

تعليقي على موضوع ترجمة لخطاب الرئيس بقوله الان لمن الغلبة اليوم ولو كانت دامت لغيرك ما كانتش جاتلك تحياتي على طرحك الرائع

Tota يقول...

اولا احب اهنيكى ع مدوناتك الجميلة والرقيقة وفعلا بسيطة وبتدخل القلب لانه صادق ومن انسانه اكيد صادقة ..انا لسه داخلة مدونتك من شهور قليلة وانا بعمل بالصدفة سيرش ع جوجل ولقيت مدوناتك وعجبتنى لانى حسبت انها بتعبر بجد عن كل شىء حوالينا وعيد ميلاد مدونتك هو عيد فعلا لكل الناس لانه عيد الحرية اللى كنا مستنينه من زمان وكمان عيد ميلاد مدونتك وكل سنة وانتى بخير وفى نجاح وتألق وحب الناس

الشاب الصح يقول...

كل سنه وانت طيبه و يا رب يجعل المدونه فى ميزان حسناتك ان شاء الله
و تحياتى لك للهدايا الطيبه متمنين من الله ان تسعدينا بموضوعاتك الهادفه
جزاك الله خيرا

أشرف محيي الدين يقول...

موناليزا

كل عام ومدونتك الرائعة بألف ألف خير ... كم جميل أن تتقاطع هذه المناسبة مع أفراح الحرية التاريخية في مصر ... أتمنى لمدونتك العمر المديد والتألق الدائم لأنها بالفعل مدونة راقية وجميلة وتستحق كل الاحترام وفيها العديد من القضايا الجوهرية الملامسة لواقعنا وخاصة في الجوانب الاجتماعية التي هي أساس نهضة المجتمعات .

لك مني كل التقدير والاحترام

Unknown يقول...

السلام عليكم أختي موناليزا...

مبروك على السنة الثالثة في نشر الخير بين الناس.. ربنا يجعل لك بكل حرف في هذه المدونة حسنة ويبارك لك في عملك ويثقل بها ميزانك...

آسف على تأخرى... كنت خارج المنزل فترة طويلة... كما تأخرت لإعداد الهدية فوتوشوبيا :)

واسمحي لي أن أقول هنا ما كنت سأقوله في احتفالي بشأنك...
حقيقة أود إبداء امتناني العميق تجاه تعليقاتك لدي.. حيث كانت في فترة من الفترات (مع أختين فاضلتين أخريين) من الدوافع الرئيسية لاستمراري في الكتابة حيث لم أكن مخضرما في عالم التدوين ولم تكن الزيارات تتوارد على المدونة وقتها بغزارة نسبية مثل الآن.. فدائما ما أتذكر ذلك وأشكره لك أختي الكريمة...

بالنسبة لاحتفالك عجبني بجد.. حسيت فعلا أنه حفل وله فقرات مبهجة... :)

تحياتي أختي الكريمة..

أرجو قبول هذه الهدية البسيطة:

http://magidalkady.blogspot.com/p/blog-page_3346.html

Mahmoud Ahmed يقول...

كل سنه و انتي طيبه و كل سنه و مدونتك في تقدم للأمام دائما ان شاء الله ^_^

موناليزا يقول...

د. ياسر عبد الفتاح
ــــــــــــــــــــــ
أهلا بيك يادكتور
ربنا يكرمك يارب أشكرك جدا لرأيك
وكل عام وحضرتك من قرائى الدائمين

الله يبارك فيك يافندم
نورت مدونتى وفى انتظاركم دائما


*********************************


كارمن
ـــــــــ
أهلا بيكِ يا سمسمة
وانتى طيبة ياحبيبتى:)
أنا اللى بشكرك انك افتكرتينى فى احدى تدويناتك واهديتى لى هذا البوكيه:)

نورتي مدونتى واسعدنى تواجدك


*******************************

أم هريرة
ــــــــــــ
أهلا بيكِ يا لولو
وكل سنة وأنتى من قرائى اللى بستنى تعليقاتهم عندى
:) آه شوفتى الحمدلله بجد
تسلميلى حبيبتى
نورتى مدونتى واسعدنى تواجدك


*****************************


شمس النهار
ــــــــــــ
أهلا بيكِ يا شموسة
:) الحمدلله

وانتى بخير وصحة وسعادة

بإذن الله القادم أجمل

أشكرك جدا لتهنئتك
نورتى مدونتى واسعدنى تواجدك


*******************************


مصطفى سيف
ـــــــــــــ
أهلا بيك يا دكتور
وحضرتك طيب يافندم
:) أيوة بقى تاريخ قومى الحمدلله:)
وكل كل سنة وحضتك من قرائى المتميزين

الله يكرمك يارب أشكرك جدا لرأيك
ويارب دايما اكون عند حسن ظنكم بكتاباتى

جاتوه بس؟؟ المدونة مليانة يافندم اختار اللى يعجبك البوفيه مفتوح:)

الله يبارك فيك وأشكرك جدا لتهنئتك
نورت مدونتى وفى انتظاركم دائما


******************************

جنى
ــــــــ
وعليكم السلام ورحمة الله وبركاته
أهلا بيك أستاذ سعيد بعد طول غياب
ما أجمل هذه الصباحات وخصوصا صباح الحرية:)
وحضرتك طيب يافندم
أشكرك جدا لتهنئتك
نورت مدونتى وفى انتظاركم دائما


*******************************


الأزهرى
ـــــــــ
أهلا بيك يافندم
:) أجمل تعليق بجد
ربنا يكرمك يارب وأشكرك جدا لتهنئتك
نورت مدونتى وفى انتظاركم دائما


******************************

ماشى بنور الله
ـــــــــــــــــ
أهلا بيك يافندم
الله يبارك فيك
رأيك هذا فخر لنا
وكل عام وحضرتك من قرائى المتميزين
الله يبارك فيك
وأشكرك جدا لتهنئتك
نورت مدونتى وفى انتظاركم دائما


******************************


الطائر الحزين
ــــــــــــــــ
أهلا بيك يافندم
الله يبارك فيك:)
أشكرك جدا لتواجدك
نورت مدونتى وفى انتظاركم دائما


******************************


راجى
ــــــــ
أهلا بيك أستاذ راجى
عاشت مصر حرة مستقلة:)

نورت مدونتى وفى انتظاركم دائما


*****************************


كلمات من نور
ـــــــــــــــ
أهلا بيكِ غاليتى
الله يبارك فيكِ يا حبيبتى
ماتحرمش من تواجدك
نورتى مدونتى


*****************************

موناليزا يقول...

انج سمسم
ـــــــــــ
أهلا بيك يا باشمهندس
وحضرتك طيب يافندم
وكل سنة وحضرتك من زوارى الدائمين وقرائى المتميزين

ربنا يكرمك يارب فما توفيقى الا بالله
وشهادتك دى بعتز بيها جدا

أشكرك جدا على تهنئتك وتعليقاتك المشجعة
نورت مدونتى وفى انتظاركم دائما


*****************************


عاشقة النقاب
ـــــــــــــــ
أهلا بيكِ يا نونو
وانتى بصحة وسعادة يارب
كلماتك دى على دماغى والله:)
ماتتخيليش سعادتى بيها
ويارب نتجمع فى الخير وحتى لو ماشوفناش بعض فى الدنيا فأكيد ميعادنا سوا فى الجنة بإذن الله:)

ياااه يا نونو لو تعرفى كلامك عن انتقام ربنا من الظالم أثر فيا قد إيه.. وقد ايه كنت محتاجة اسمع الكلمتين دول.. قد ايه محتاجة حد يطمنى..
كلماتك عملت معايا واجب كبير بجد وكأنها أجمل هدية:)

أول مرة اعرف انك حاطة رابط موضوعى "الفطرة المنتكسة " فى السايد بار عندك.
أنا شوفت العنوان "هام للمثليين" بس مافكرتش قبل كده اضغط على الرابط عشان اشوفه
تسلميلى ياحبيبتى واشكرك بجد
---------------
ايه الكروتة دى طب مش كنتى تعلقى هناك عشان يبقى الموضوع متكامل مع تعليقاته:)

عموما وجودك عندى أجمل هدية بجد
بحبك فى الله
نورتينى غاليتى واسعدنى تواجدك


*******************************


توتة
ــــــــــ
أهلا بيكِ يا توتة
أشكرك جدا على تهنئتك وعلى رأيك فى مدونتى
الحمدلله:) صدفة جميلة فعلا
ودمتِ قارئة متميزة لمدونتى
نورتينى وفى انتظارك دائمة

*********************************

الشاب الصح
ـــــــــــــ
أهلا بيك يافندم
وأنت طيب وبكل الخير
ربنا يكرمك يارب
وبإذن الله اكون عند حسن ظنكم دايما
أشكرك جدا لتهنئتك
نورت مدونتى وفى انتظاركم دائما


********************************


أشرف محيى الدين
ــــــــــــــــ
أهلا بيك أستاذ أشرف
وكل عام وحضرتك من قرائى المتميزين
:) الحمدلله أجمل صدفة بجد
أشكرك جدا جدا لرأيك ولتهنئتك
ويارب اكون دايما عند حسن ظنكم

نورت مدونتى وفى انتظاركم دائما


******************************


ماجد القاضى
ـــــــــــــــ
وعليكم السلام ورحمة الله وبركاته
أهلا بيك أستاذ ماجد
الله يبارك فيك يافندم والحمدلله الذى هدانى لهذا:)

ربنا يكرمك يارب ويتقبل دعائك اللهم امين

يافندم حضرتك تنورنى فى اى وقت فمكانك محفوظ دائما

الشكر لله أخى الفاضل وحقاً قلمك يستحق المتابعة ولا أنكر استفادتى من أسلوبكم واختياركم لمواضيع مميزة جدا بالاضافة لانتظارى تعليقاتكم لدى لانها أيضا تفيدنى كثيرا
كل سنة وحضرتك من زوارى الدائمين ومن قرائى المتميزين

طبعا حفلة :) أومال هنهزر:).. عملنا حفلة تبقى حفلة بجد:)

وااااااو:)
بجد مش عارفة أقولك إيه على الهدية:)
جميلة جدا جدا بجد:)
مفاجأة لم أتوقعها حقاً
أشكرك جدا جدا جدا

نورت مدونتى وفى انتظاركم دائما


******************************


سبايدر مان
ـــــــــــــــ
أهلا بيك يادكتور
وانت طيبة يافندم
وكل سنة وانت من زوارى الدائمين

أشكرك جدا لتهنئتك
نورت مدونتى وفى انتظاركم دائما

إبن النيل يقول...

كل سنه وانت طيبة
وعقبال 100 سنة
مدونة تستحق التقدر والاحترام
وهتفضل الذكري السنوية للمدونة تفكرنا بأجمل أيام واحلي فرحه فرحة نجاح الثورة

عاشقة القمر يقول...

كل سنه وانتي طيبه كل سنه وانتي معنا في عالم تدوين بخير

حصان المرجيحة يقول...

كل سنة و المدونة و صاحبة المونة بخير
و ربنا يجعله في ميزان حسناتك
و المرة دي السنة حلوة بجد لانفيها اكترمن مناسبة و منهم مدونتك اكيد و التحرير و جوازي هههههههههه ان شاءالله

kochia يقول...

كنت عاوزة ارد علي كل حتة بس الحفلة كبيرة والفقرات كتير
مبسوطة اني عديت هنا النهاردة
وهكتفي اني اقولك
كل سنة وانتي طيبة

موناليزا يقول...

ابن النيل
ــــــــــــ
أهلا بيك يافندم
وحضرتك طيب يافندم
أشكرك جدا لتهنئتك
نورت مدونتى وفى انتظاركم دائما


********************************

عاشقة القمر
ـــــــــــــــ
أهلا بيكِ حبيبتى
وانتى طيبة ياجميلة
أشكرك جدا لتهنئتك
نورتى مدونتى واسعدنى تواجدك



*******************************




حصان المرجيحة
ـــــــــــــــ
أهلا بيك يافندم
وأنت طيب يافندم
ربنا يكرمك وأشكرك جدا لتهنئتك
ومبروك مسبقاً على الزواج:)
نورت مدونتى وفى انتظاركم دائما



*********************************



كوشيا
ـــــــــ
أهلا بيكِ حبيبتى
كان هيسعدنى جداً والله انك تعلقى على كل جزء كتبته

عموما وجودك يكفينى
وأنتى طيبة ياحبيبتى
وأشكرك جدا لتهنئتك
نورتى مدونتى