حبيب صاحبتى

قامت"ندى" بطهى الغداء وتحضير المكان الذى ستستقبل فيه صديقتها"حنين" التى لم تلتقى بها منذ سنوات.
فقد كانتا يعملان سوياً فى نفس المكان وكم تعاطفت" ندى " كثيراً مع "حنين" إزاء حبها المفقود فقد كانت تحب شخصاً ولكنه كل مايتقدم لخطبتها أهلها يرفضوه وكان سبب رفضهم "إزاى بنتنا تتجوز حد كانت بتحبه قبل الزواج!!"
ندى: بس ده سبب مايتقالش غير فى الأفلام الأبيض والأسود بتاعة زمان.
حنين: ومين قالك إن أهلى بيفكروا بطريقة تتواكب مع عصرنا الحديث..
وتنهدت قائلة: ياااه ده أنا إتضربت ضرب.
وألقت رأسها بين ذراعى ندى قائلة وهى تبكى بحرارة: مش قادرة ياندى أعيش من غيره.. أنا لسه بحبه مهما يبعدونا عن بعض هو فى دمى.
ندى تربت على رأسها قائلة: لو كان بيحبك كان اتقدم لك على طول مش يستنى لما أهلك يعرفوا ويشوفوكم بالصدفة وأنتوا ماشيين فى الشارع مع بعض.
حنين: حظى كده.. أنتِ عارفة أنا ماكنتش بشوفه غير كل فين وفين بس كان كفاية عليا مكالماته.. بعد ما حبينا بعض جاله شغل بره وسافر.. ظل هناك سنتين واليوم اللى أهلى شافونا فيه كان أول مرة أشوفه بعد غيابه وهو وقتها عمل شهم وصمم أنه يوصلنى.. أخويا شافنا مع بعض قرب البيت والدنيا اتقلبت.. يعنى مالحقش يا ندى يتقدم لى قبل ما يعرفوا.
ندى: خلاص يا حبيبتى ماتزعليش لو كان نصيبك مفيش حد فى الدنيا هيقدر يفرقكم عن بعض.
حنين: ييجى إزاى تانى وهو اتطرد من بيتنا كذا مرة.

------------------------------------

أفاقت" ندى" من ذكرياتها على اتصال زوجها "أحمد": خلاص ياستى صاحبتك وصلت؟.
ندى: لأ يا أحمد لسه .. كلمتها وهى فى الطريق.
أحمد:طيب افتكرى إنى هتأخر فى الشغل عشان تفعدوا مع بعض براحتكم واعرفى أن بما إنك ضيعتى علينا الغدا سوا هتعزمينى على العشا.
ندى تضحك قائلة: من عينيا يا حبيبى .
أحمد: خلاص اتفقنا.. هقفل معاكِ دلؤتى واسيبك تجهزى الغدا لصاحبتك.

أنهت معه الإتصال وسمعت جرس الباب فذهبت سريعاً لتفتح..
حنين حبيبتى وحشتينى ..وبعد اللقاء الحار أخيراً جلسا سوياً فى الصالون يسترجعان الذكريات وتحكى كل منهما للأخرى ماحدث لها خلال هذه السنوات..

بدأت حنين قائلة: بعد ما أهلى إتأكدوا إن حبيبى إتجوز بدأوا يسمحوا لى بالخروج من البيت وعدت إلى وظيفتى من جديد واتفاجئت إنك إتنقلتى.
ندى: كنت هقولك إزاى بس وأهلك ماكانوش بيخلوكِ تردى حتى على التليفون.. حتى موبايلك لما كنت اتصل عليه ترد عليا واحدة تقولى الموبايل ده أنا لقيته فى الشارع ومانعرفش عن صاحبتك دى حاجة!.
حنين: قالولى بعدين على كل الاتصالات اللى جاتلى.. وماكنش ينفع اتصل بيكِ.. أنتِ ماتعرفيش الإرهاب اللى كنت عايشة فيه.
ندى: أنتِ هتقوليلى!!..أنا انسى إنك ماحضرتيش فرحى.. رغم أنى عرفت مامتك أنى هتزوج فى بلد تانية وياما اتحايلت عليها انك تجيلى حتى يوم الحنة وأنها تيجى معاكِ لأن فرصة رؤيتنا لبعض هتبقى قليلة أوى بعد كده وهى برضه ما رضيتش.
حنين: معلش يا ندى هما أهلى كده ومش هيتغيروا.. أنتِ عارفة قد إيه كان نفسى أوى أكون معاكِ يوم فرحك بس غصب عنى.
ندى: أنا عارفة ياحبيبتى.. استنى لما أفرجك صور فرحى.
ناولت "ندى" ألبوم الصور لحنين التى فتحته بدورها .
فقالت لها ندى متحمسة : يلاقوليلى رايك إيه فى فستانى.
حنين مبتسمة: ماشاء الله كنتى زى القمر.
ندى بثقة ضاحة : أنا طول عمرى زى القمر.
لم تبادلها حنين الضحكة ولكنها نهضت قائلة: أنا لازم أمشى دلؤتى ياندى.. ماما بترن لى.
حنين غاضبة: إيه ده أنتِ أكيد بتهزرى.. هو احنا لحقنا نقعد مع بعض؟.. والغدا اللى أنا مجهزاه وأحمد اللى مذنباه فى الشغل لغاية دلؤتى عشان نعرف نقعد مع بعض براحتنا.
حنين: معلش يا ندى فرصة تانية.
وخطت خطوة تجاه الباب فامسكت ندى ذراعها قائلة: مش هتمشى دلؤتى.
وهنا لاحظت ندى بأن حنين ترتجف وتوشك على البكاء فقالت لها مذعورة: مالك يا حنين ؟؟ أنتِ بترتجفى كده ليه؟ أنتِ حاسة بحاجة ؟؟ شكلك تعبان؟ إيه اللى حصل؟.
حنين:معلش يا ندى اعذرينى.. واضح أنى اخدت دور برد وأنا جاية ده غير أن السفر طويل و هذه أول مرة أسافر فيها لوحدى فيادوب بقى عشان ما اتأخرش.. ورسمت ضحكة مصطنعة قائلة: حد قالك تتجوزى بعيد كده؟.
ندى: طيب استنى هحط الأكل على السفرة فى ثوانى.. الغداء جاهز من بدرى.
حنين: معلش يا ندى مش هينفع أتغدى ولا ينفع أقعد هنا كتر من كده.
ندى: فى إيه يا حنين؟؟ مالك؟ حساكِ مش طبيعية.
حنين بنفاد صبر: مفيش حاجة أنا بس حسيت أنى تعبانة شوية ومحتاجة أروح.
ندى بإصرار: وأنا مش هسيبك تمشى من عندى وأنتِ كده.. مالك؟؟.
انفجرت حنين فى البكاء وتهاوت على أقرب كرسى قائلة: أصل أنا لما كنت بحكيلك عن حبيبى زمان نسيت أقولك أهم حاجة.
ندى رافعها حاجبيها من الدهشة قائلة: وأنتِ إيه اللى فكرك بحبيبك دلؤتى.
فتحت حنين حقيبة يدها باحثة عن شئ ما قائلة لندى: نسيت أقولك أن اسمه "أحمد" ونسيت كمان أوريكِ صورته وخرجت صورته من حقيبتها لتعطيها لندى.
مسكت "ندى " الصورة وتهاوت على الكرسى المجاور لحنين غير مصدقة.
قالت حنين ودموعها مازالت منهمرة على خديها: عرفتى ليه أنا ماينفعش أقعد هنا.. لأن أحمد زوجك هو نفسه أحمد حبيبى
ندى لا تعلق وكأن المفاجأة ألجمتها فلم تجد مفر من الصمت المطبق.
تتابع حنين قائلة: أنا آسفة ياندى ماقصدتش أتضايقك أو أخرب حياتك بس غصب عنى.. مقدرتش أتمالك أعصابى لما شوفت صور فرحكم.. حاولت أمشى .. أنتِ اللى منعتينى.. متهيألى دلؤتى هتخلينى أمشى عادى.. مش كده؟.
ندى بعد ما تمالكت نفسها واستوعبت الموقف ردت بهدوء قائلة: لأ يا حنين استنى.. احنا لازم دلؤتى نقعد ونتكلم مع بعض.. أنتِ صاحبتى وأنا بحبك ومكنتش أتخيل أبداً أن أحمد زوجى هو نفسه حبيبك.. بس أنتى نفسك قلتيها أنا ماكنتش اعرف أن هو .. وهو كمان ماكنش يعرف.
حنين: أنا عارفة يا ندى وأنتِ مش ملزمة تبررى لى حاجة أنتِ بقى ليكِ حياتك وأنا كمان ومفيش حاجة هتتغير.
ندى تنظر لها برجاء قائلة: مش عايزاكى تكرهينى أو تدعى على أحمد.
حنين دامعة: ماتقوليش كده أنتوا أكتر اتنين حبيتهم فى حياتى وأتمنى لهم الخير.
ندى: حنين .. آنا آسفة.
حنين: ماتتأسفيش.. مش أنتى زمان قلتيلى لو نصيبى مفيش حد فى الدنيا يقدر يفرقنا وأنا دلؤتى بقولك لأنه نصيبك مفيش حاجة فى الدنيا هتقدر تفرقكم عن بعض..
تم عناق الوداع بينهما وقالت حنين ملوحة لها بيدها: أشوف وشك بخير يا ندى واطمنى "أحمد" عمره ما هيشوفنى.
أغلقت "ندى" الباب وراءها ثم سرحت مع نفسها وتسائلت بداخلها " يا ترى أحمد لسه بيحبها ولا لأ؟؟.
ولو كان بيحبها أنا أبقى إيه فى حياته.. مجرد زوجة وبس!!
بس لو كان مابيحبهاش يبقى مايستاهلش حبها ليه لغاية دلؤتى!.
أفاقت على نغمة موبايلها تبشر باتصال من زوجها ردت قائلة :أيوة ياحبيبى .
أحمد: صاحبتك هتاخدك منى كتير ولا إيه؟.
ندى: لأ ياحبيبى محدش يقدر ياخدنى منك.
أحمد: طيب يلا البسى بقى عشان عزومة العشا. ولا رجعتى فى كلامك؟.
ندى: لأ طبعا مارجعتش فى كلامى .. هجهز حالاً.
ابتسمت ندى وذهبت سريعاً تستبدل ملابسها لتستعد لخروجها مع زوجها الحبيب ناسية تماماً ما حدث منذ قليل.
-تمت-.