الخميس، 29 سبتمبر 2011

من كتاباتى (2)


1- البعيد عن العين بعيد عن القلب.. مقولة كاذبة فالغالى مهما بعد برضه غالى والرخيص مهما اقترب برضه رخيص.

----------------------

2- ضع نفسك دايماً مكان الآخرين وشوف تحبهم يتدخلوا فى حياتك زى ما أنت بتعمل معاهم أو يزوروك من غير ميعاد زى ما أنت بتعمل معاهم أو يجيبوا عيال صغيرة يبهدلولك الدنيا زى ما أنت بتعمل معاهم أو يستخدموا حاجتك بدون استئذان أو يسألوك أسئلة خاصة جداً أو يتجسسوا عليك زى ما أنت بتعمل معاهم أو يتصلوا بيك مخصوص عشان يلوموك إنك مابتتصلش عليهم أو عشان يقضوا وقت فراغهم معاك... جرب تعملها يمكن تتغير وتلاقى الناس بعد كده ترحب بيك.

---------------------------

3- فيه ناس تهوى الجدال بس عشان ماتطلعش غلطانة.

--------------------------

4- بيشترى لها حاجات طلبتها منه وهى صغيرة وماكنش بيجيبها ومايعرفش أنها خلاص كبرت واحتياجاتها أكيد اتغيرت.

-------------------------

5- سيبوا الأمل جوايا يعيش هتستفيدوا إيه لما تموتوه!!.

-----------------------

6- لو ماقدرتش تساعدنى ماتحبطنيش.. وبلاش تشيل من جوايا الأمل اللى أنا ماعنديش غيره.

------------------------

7- اتعودت خلاص على بُعدك.

-------------------

8- أحلى حاجة ممكن تحصل فى حياتنا بتحصل بالصدفة يعنى بتدابير ربنا مش بتدابيرنا احنا.

--------------------

9- كنت فين والدنيا عمالة تلطش فيا جاى دلؤتى بعد ما استوعبت الدرس كويس تدينى فى نصايح.

-------------------

10- جربت تتعامل معاه كرجل لقت نفسها هتغرق فرجعت لقواعدها سالمة وبحقيقة أنها أرجل منه.

---------------------

11- حاجة بايخة أوى لما تكون بتكلم حد جنبك وتلاقى أذن حد تانى بينكم.

------------------

12- من أسوأ الظواهر هذه الأيام: عدم اقتناع الناس بالحلال والحرام واقتناعهم بالإتيكيت أو برغبة الفرد.

--------------------

13- هناك آلام كثيرة مخفية ولكنها لا تلقى التعاطف كالجروح الظاهرة فقط لأنها مخفية فيظن الآخرون عدم وجودها.. كالقلب المجروح والضرس المخلوع والصداع والإكتئاب....

--------------------

14- أعترف أننى مختلفة عن الآخرين وعلى من يتعامل معى أن يتقبل هذا.

----------------------

15- خدعوكِ فقالوا: الخروج الكتير على الفاضية والمليانة هيجيبلك عريس.

-------------------

16- بقى عندى إكتفاء ذاتى ولم أعد أتحمل المزيد.

--------------------

17- طلعى حاجتك واستمتعى بيها بدل ما انتى عايناهم بقى لك سنين لأن محدش ضامن عمره.

-------------------

18- لما حد يطلب منك حاجة اعملها له لأن ده معناه أنه متعشم فيك وواثق فى قدراتك فماتخذلوش.

---------------------

19- أحلى حاجة فى الأطفال أنهم بينبهوا الآباء لو عملوا تصرف نهوا الطفل عنه من قبل.. وكأن الآباء يتبعون سياسة أنا تصرفاتى وحشة بس مش عايزك تكون كده!!.

--------------------

20- لو كنت ربيتها كنت أكيد هتفهمها.

-----------------

21- احترم رغبات الآخرين و احترم صمتهم ولا تتدخل فيما لا يعنيك.

----------------------

22- كونى فى حياة الرجل كسيارته ولا تكونى كسيجارته.

----------------------

23- ترتدى ملابس عارية فى الخروج ولكن قبل ارتدائها فستان الزفاف العارى قررت أن تصلي ليبارك الله لها.. فارتدت اسدال الصلاة وقامت بالصلاة....عجبنى أوى المشهد ده لأنه بيدل على أنها عارفة من جواها أن ملهاش غير ربنا وأنه ماينفعش تصلي وهى لا بسة حاجة مكشوفة وأتسائل فيها إيه لو تخرج باللبس اللى بتصلي بيه!!.

-----------------------

24- أتعجب من قدرة البعض على تدخين أول سيجارة فى الصباح الباكر.. إزاى بتجيله الجرأة أنه يكون أول واحد يلوث هواء ربنا اللى لسه نظيف!!!.

-------------------

25- أحلى حاجة فى الدنيا أن يكون عندك أمل.

-------------------

26- الشغل= حياة ..

الزواج= حياة.

إلى الزوجة العاملة: أنتِ فى نعمة إحمدى ربنا.

إلى العازبة العاطلة: كان الله فى عونك.

---------------------------

27- الأطفال محتاجين معاملة خاصة لأنهم بيتعلقوا بأى كلمة أو فعل بتتعاملوا بيه معاهم ومابيفهموش حكاية أنك مرهق أو مش فايق لهم.

--------------------

28- فيه كلمات زى ما هى عيب أنها تتقال عيب برضه أنها تتكتب.

----------------------

29- أعطى له فرصة الاستمتاع بالاعتماد على النفس (نصيحة للآباء).

-----------------------

30- إياك تستسلم لشيطانك لحظة غضبك.. هتقول وهتعمل اكتر حاجات هتندم عليها بقية عمرك.

----------------------

31- عجيب أمرك بتقول كلام قاسى فى لحظة غضب وبعد ما تهدأ بتتعامل كأنك ماقولتش حاجة!!.

----------------------------------

32- إزاى تحكم على حد وأنت ماتعرفش ظروفه.

---------------

33- هما بنات الناس لعبة!!..
طيب وبنات الناس يخلوا حد يلعب بيهم لييييه!؟؟.

--------------------

34- قبل ما تستغرب من قلة أدب ولادك اسأل نفسك مين اللى رباهم!.

----------------

35- فيه ناس كتير محتاجة إعادة تحميل لشخصياتهم.

------------------

36- مش معنى أنى قلت أن الطفل بيفهم الكلام أنك تشرحله كل حاجة بطريقة علمية مملة!!.

-------------------

37- طالما قمت بالوعد فعليك التنفيذ.. ولو كنت بتنسى اعمل رسالة تذكير على الموبايل.

------------------

38- بلاش كل شوية تفتكر حاجة تضايقك وتتكلم فيها فتضايق اللى حواليك.

------------------

39- مش من حق حد يصورنى بدون إذنى.

-----------------

40- الأمومة تجربة مثيرة.

--------------

41- فيه حاجات كتير فى حياتنا مانعرفهاش والأحسن نفضل كده لأن فى حقائق كتير صادمة وبعدها هيبقى صعب نرجع زى الأول.

-----------------

42- الحالة الصحية للمرأة بعد الطلاق: كسر فى القلب ونزيف فى الروح وشرخ فى الوجدان.

------------------

43- اللى ماشافش أى حاجة قبل كده أول حاجة بيشوفها بتعجبه.

----------------

44- ما أقبح البنت المسترجلة.

-----------------

45- أحداث الحياة لا تسير كما نريدها أو كما نتوقع حدوثها.

------------------

46- يبقى غباء من الظالم لو فكر أن المظلوم هيفضل طول عمره طيب ومش هيفكر فى الإنتقام.

-------------------

47- لو لقيت حد موجود فى حياتك بس عشان يسمعك ماتفرطش فيه أبداً.

------------------

48- أحلى حاجة فى أى مكان الناس اللى موجودة فيه.. المكان لوحده مهما كان روعته مابيبقاش له طعم من غير الناس اللى اتعودت تلاقيهم فيه.

---------------------

49- حذار أن ترفض طاعة يسرها الله لك.

-----------------

50- لو كنت حبيتها بجد ماكنتش هتستحمل زعلها ولا هتستهتر لما تعرف أنها محتاجة لحبك.

-----------------

51- إيه الأنانية المتسلطة اللى فى طباع المدخنين اللى بتخليهم يدخنوا فى أماكن مغلقة ومع مجموعة بدون أى إحساس بالذنب!.

-------------------

52- لو عرفت أن اللى بتتعامل معاه فى أى مجال مصاب بمرض الموت أكيد معاملتك معاه هتكون رقيقة ومهذبة.. تيجوا نتعامل مع الجميع من هذا المنطلق فى ظل انتشار الموت المفاجئ.. ولأن كمان محدش ضامن عمره فعايزين نترك ذكرى جميلة لدى كل من يتعامل معنا.



هناك 14 تعليقًا:

مدونة رحلة حياه يقول...

السلام عليكم
احييك اختى على كلماتك التى تحمل بين طياتها الكثير من الخبرات والتجارب
هى فعلا كلمات تحفر فى نفوسنا فنحن فى حاجة الى الاستفادة من كل تجربى نمر بها او نسمع بها او نقرا عنها
راقت لى كلماتك كثيرا
جعلها الله فى ميزان صالحاتك
دومتى بخير

سواح في ملك اللــــــــــــــــــه- يقول...

امة الله

هي روائع ماكتبتي ووصفتي

تستحقين عليها جائزة التامل

تحيتي

ويكا يقول...

انا جيت هنا بعد ما كتبت الخواطر عندى
والحمد لله ان الترتيب كان كده فعلا

لانى لو كنت جيت هنا الاول كنت ما كتبتش الكلاما الفارغ اللى انا كاتبه ده
بس والله كان حاجه زى فضفضه كده وخلاص مش جد
فبالتالى انا حاسس باحراج لو قارنت ده بده :))

ما شاء الله عليكى رائعه فوق الوصف

وعاجبنى التزامك بالمنهج الطبيعى الربانى المنطقى

بجد الكلام رااااائع رائع رائع


دائما متميزه

ربنا يحميكى

شكراً ليكى بجد

مصطفى سيف الدين يقول...

بصراحة باحترم طريقة تفكيرك ودايما خواطرك بتبقى مميزة جدا
كل خاطرة منهم محتاجة قرايتها كذا مرة
تسلم ايدك بجد

مها البنا يقول...

رائعين .. اختلفت فى واحده بس .. ومتفقه فى الجميع

لكن فى دى ...

(لو عرفت أن اللى بتتعامل معاه فى أى مجال مصاب بمرض الموت أكيد معاملتك معاه هتكون رقيقة ومهذبة.. تيجوا نتعامل مع الجميع من هذا المنطلق فى ظل انتشار الموت المفاجئ.. ولأن كمان محدش ضامن عمره فعايزين نترك ذكرى جميلة لدى كل من يتعامل معنا).

قمة الحكمه .. لو نفذناها .. هنعيش فى يوتيوبيا او المدينه الفاضله

عن نفسى .. صعب اتعامل مع المنطق ده مع الجميع :( ... لكن حقيقى .. بوست رااااائع يا موناليزا

زينب علي حبيب يقول...

دي عجبتني اكتر من خبايا نسائية يمكن لأن فيها فسحة أمل أكتر ؟؟؟ ...

راااااااائعة بجد تسلم ايدك عليها

reemaas يقول...

عجبنى اوى اوى كذا حاجة
وفى المجمل عجابنى طريقه التفكير

على الهامش
قوليلى ازاى منعتى الكوبى هههههههههههه عاوزة اعملها

Unknown يقول...

السلام عليكم

الله الله... استمتعت بجد بقراءة هذه الفقرات السريعة المركزة الخاطفة المتنوعة..

بعضها لا يضيف جديدا (لكنه بالتأكيد يعبر عن حالتك وقتها).. وبعضها أراه بصدق عبقريا في التعبير!!!!

تنوعت ردود أفعالي ما بين ابتسامة إعجاب وهزة رأس مندهشة وزمة فم متألمة وضحكة عالية... وهذا هو سر استمتاعي!!!! :)

يا ريت ترقمي الفقرات حتى أستيطع الإشارة إلى بعضها بسهولة...

وبالمناسبة مؤيدك فيما ذكرت من آراء بنسبة كبيرة جدا...

تحياتي الدائمة أختي موناليزا..

موناليزا يقول...

مدونة رحلة حياة
ــــــــــــــــ
وعليكم السلام ورحمة الله وبركاته
أهلا بيك أستاذ محمد
أشكرك جدا لتعليقك المشجع
وربنا يكرمك يارب فما توفيقى الا بالله
يسعدنا دوام التواصل


**********************************

سواح فى ملك الله
ــــــــــــــ
أهلا بيك أستاذ خالد
الله يكرمك يارب :)
أخجلتم تواضعنا يا فندم

أشكرك جدا لتعليقك
ويسعدنا دوام التواصل


*********************************

ويكا
ـــــــــ
أهلا بيك يا باشمهندس
ده من ذوقك يا فندم :)
ربنا يكرمك يارب
وأشكرك جدا لرأيك ولتعليقك
والحمدلله فما توفيقى الا به

يسعدنا دوام التواصل


********************************

مصطفى سيف الدين
ــــــــــــــــــ
أهلا بيك يا دكتور
ربنا يكرمك يارب
فما توفيقى الا بالله
ورأيك هذا على دماغى يافندم وأعتز به جداً
أشكرك جدا لتعليقك
ويسعدنا دوام التواصل


*******************************

مها البنا
ــــــــــــ
أهلا بيكِ يا مها
يبقى مفيش اختلاف:) احنا نحاول ونجرب وأكيد هنوصل فى الآخر

أشكرك جدا لرأيك ولتعليقك
نورتينى حبيبتى وفى انتظارك دائما


*********************************

قطرة وفا
ـــــــــــ
أهلا بيكِ حبيبتى
كده الخبايا هتزعل :)
عموما زورونا تجدوا ما يسركم :)

أشكرك جدا لرأيك ولتعليقك
نورتينى يا جميلة وفى انتظارك دائما


**********************************

ريماس
ــــــــ
أهلا بيكِ يا نور
كنتى شاوريلى على اللى عجبك:)
وأسعدتينى برأيك المجمل :)

تحت أمرك يا حبيبتى
ابعتى لى إيميلك أو الأكونت بتاعك على الفيس بوك وأنا أبعت لك الكود لأنه مابيرضاش يتبعت فى التعليقات

نورتينى حبيبتى
وفى انتظارك دائما


*********************************

ماجد القاضى
ـــــــــــــ
وعليكم السلام ورحمة الله وبركاته
أهلا بيك أستاذ ماجد
دائماً انتظر تعليقك لأنه يضيف لى وللموضوع

عجبنى استمتاعك بالموضوع ووصفك لردود أفعالك مع كل فقرة :)

عن ترقيم الفقرات ..عُلم يافندم وينفذ:)
وأشكرك بجد لأنك دايما بتنبهنى

أيضاً تعليقك على موضوعى السابق -وأعتذر لعدم ردى عليك هناك-.. أنتبهت لما فيه وحذفت "عليه السلام".. وعن الباقى سيتم تجنبه فيما بعد لأن دى أول مرة أعرف فيها حاجة زى كدا

جزاكم الله خيراً
يسعدنا دوام التواصل

نسرين شرباتي "أم سما" يقول...

السلام عليكم
مش عارفة أعلّق على ايه ولا اقول ايه يا موني
بجد كل جملة حكيمة أكثر م اللي قبلها
يمكن لأني من هواة اني أكتب جمل قصيرة
أو لأني بحسها بتلخص الموقف بسرعة
مع إنها بتحتاج تركيز علشان تطلع بالشكل ده
بجد بستمتع وأنا هنا :)

موناليزا يقول...

نسرين شرباتى
ــــــــــــــ
وعليكم السلام ورحمة الله وبركاته
أهلا بيكِ يا أم سما
علقى على كل حاجة وبالتفصيل :)
ربنا يكرمك يا حبيبتى
وسعيدة بجد برأيك وبتعليقك
وأستمتع حقاً بوجودك
وفى انتظارك دائما

الطائر الحزين يقول...

ضعى ختامة على باب المدونة حتى ابصم بالعشرة

Emtiaz Zourob يقول...

اعجبتني كلها بصراحة .. وبالاخص :
هناك آلام كثيرة مخفية ولكنها لا تلقى التعاطف كالجروح الظاهرة فقط لأنها مخفية فيظن الآخرون عدم وجودها.. كالقلب المجروح والضرس المخلوع والصداع والإكتئاب....

كمان اعجبني 47 .. عن جد ماتفرطش فيه أبدا ..

استمتعت بالقراءة كعادتي ..

كوني بخير اختي الغالية .

موناليزا يقول...

الطائر الحزين
ـــــــــــــــــ
أهلا بيك يافندم
ربنا يعزك يارب :)
أشكرك جدا على تعليقك ويسعدنا دوام التواصل


************************************

وجع البنفسج
ــــــــــــــ
أهلا بيكِ حبيبتى
سعيدة جداً برأيك
وأشكرك جدا على تعليقك
نورتينى يا جميلة
وفى انتظارك دائما