الأحد، 18 سبتمبر 2011

يعنى إيه حجاب



خدى بالك الحجاب مش مجرد غطاء للرأس..
لما تلبسى بنطلون وبلوزة قصيرة وإيشارب صغير وميك آب كامل كده خلاص بقيتى محجبة!!؟؟.
الحجاب يعنى غطاء فهل تشعرين فى حجابك بأنك متغطية ومستورة؟
لنستعرض سوياً صفات الحجاب الشرعى لنذكر أنفسنا ونحاول تعديل مانرتدى ليناسب تعاليم ديننا الحبيب.
1- لا يصف:-
طبعاً البنطلون بصفة عامة لا ينطبق عليه هذه الصفة ومن ثم لا يجوز إرتدائة إلا تحت الملابس الطويلة سواء كان البنطلون من وجهة نظرك واسع أو ضيق لأن البنطلون أصلاً بيصف حجم الساق.


وطبعاً برضه البديهات ماتنفعش سواء كانت بكُم طويل أو بلوزة نص كم وتحتها بودى بكُم لأن المنظر العام هيكون أنك ماشية من غير هدوم بس ملونة جسمك.


2
- لا يشف:-

يعنى ما ينفعش ألبس بلوزة كُم ولكنها شفافة وابقى لابسة تحتها بودى قط مثلاً أو حتى نص كًم..على فكرة البنطلونات الفاتحة بصفة عامة بتظهر ماتحتها وخاصة ذات اللون الأبيض.. وفيه حاجة كمان ممكن تلبسى جيبة واسعة أو حتى عباية طويلة بس قماشها نوعه خفيف بيظهر ماتحته.




3
- ساتراً للجسم:-
يعنى مش معقول أغطى راسى والبس جيبة قصيرة مثلاً ومعاها هاف بوت أو ألبس صندل أو شبشب من من غير شراب لأن حرام أصلاً إن كعب قدميك يظهر فطبيعى أى حاجة فوق الكعب بالمقابل حرام أنها تظهر.



4
:- ليس زينة فى نفسه:-
يعنى ماتلبسيش حاجة بتلمع أو ألوان فاقعة ملفتة للنظر أو تحطى ميك آب بكل الألوان.

5:- غير ملفت للأنظار:
طبعاً ده لا ينطبق على حجاب اليومين دول اللى كذا طرحة فوق بعض وبألوان صارخة كمان.



6
:-لا يشبه ملابس الكافرات:
شوفى إيه اللى ينفع تصلى بيه واخرجى بيه.



احكمى على نفسك بعد كده وشوفى أنت فعلاً محجبة ولا لأ؟.




طبعاً فيه حاجات ماتنفعش خالص مثال: إنك تخلعى حجابك فى المواقف الآتية:

واقفة فى البلكونة أو بتنشرى الغسيل أو بتلميه أو واقفة على السطوح(خدى بالك كأنك كده واقفة فى الشارع) وكمان وأنتِ بتفتحى باب الشقة أو واقفة على السلم أو قاعدة مع ضيوف رجال( ابن عمك- أخو زوجك- صديق والدك- زوج خالتك.......) وغيرهم من غير المحارم.
أو فى المصيف وطالعة البحر أو نازلة تعومى أو طالعة رحلة وغيرها من الأمثلة.



بدل اتحجبتى يعنى خلاص أنتِ اختارتى تنفذى أمر ربك يبقى تنفذيه صح وماتديش لحد فرصة أنه يتكلم على المحجبات ويقولوا أنه مجرد غطاء للرأس أو موضه.. ولا تجعلى أزياء الغرب هى من تتحكم فيما ترتدى.



هل تعلمين تبرج الجاهلية الأولى كان إزاى؟

كان عبارة عن عباية طويلة ولكنها مفتوحة من العنق !!
ماتبقيش من الكاسيات العاريات فأنتِ من أمة النبى صلى الله عليه وسلم.




سؤال جانبى:
هل راضية عن حجابك؟.

هناك 20 تعليقًا:

سواح في ملك اللــــــــــــــــــه- يقول...

كلامك مظبوط جدا رغم انه قد لايروق

لاصحاب وجهة نظر الدين في القلب

واصحاب مقولة

((الدين علاقة مابين العبد وربه))""

انا بشوف البنت اللي مش متحجبة الا من

شعرها بس وبقيه الجسم مش محجب

انا بشوفها شعرها وحش ومكسوفة تبينه

فتقوللك يالا كانه حجاب بالمرة

او مكسلة تقعد تسرح شعرها فتقول

طيب وليه وجع القلب مالحجاب موجود .""

اوقات كتير بسال نفسي

كيف اصدق من لاتحترم عقلي

اما حجاب اولا حجاب ...

طيب هي بتمثل علي البشر لاثبات

التدين ....

فهل تستطيع التمثيل علي الخالق عز

وجل ؟؟؟؟

ومن يهمها اكثر

المخلوق ام الخالق ؟؟؟؟

مقال جيد ياامة الله

دمتي رائعة

P A S H A يقول...

"المنظر العام هيكون أنك ماشية من غير هدوم بس ملونة جسمك" .. أه والله فعلاً للأسف !
أكتر منظر مقرف ومقزز بيستفزني إن الواحدة من دول تكون لابسه بلوزة قصيرة ولا بدي وتشده بإيديها وهي نازله من الميكروباص ! .. طب لما انتي عاوزه تستري نفسك وخايفه جسمك يبان بتلبسيه لييييييييييه من الأول ؟؟ ولا انتي ماشيه بمبدأ (الحتة اللي تبان مني زكاة عني) ؟؟ .. وتيجي تكلمي الواحدة من دول ترد ببجاحة : وأنت مالك ، أنت متخلف ؟؟ دي حرية شخصية ، أنت لو ملتزم المفروض تغض بصرك ! .. طب أنا يا ستي الحمد لله ملتزم ومتزوج وباغض بصري إنما غيري مش ملتزم ومحروم وجعان ومش هايكتفي بالنظر ! .. راخر اللي بيتكلموا ع التحرش – في رأيي - أغلبهم من السافرات ! .. لأني اعتقد إن لو واحدة ملتزمة وحد حاول إنه يتحرش بيها يبقى ده أكيد مريض نفسي والناس كلها هاتقطعه لانهم هايشوفوها أختهم ! .. إنما لو واحدة ماشيه عريانه وحد عاكسها في الشارع والناس اتلمت يبقى عشان تتفرج عليها !

تاني حاجة بتستفزني : تعمد الخلط بين الزي والأخلاق ! .. تبقى الواحدة من دول لابسه من غير هدوم وتقول لك : أنا محترمة ! .. إيه علاقة اللبس بالأخلاق ؟؟ .. هل عشان طريقة لبسي ما بتعجبكش ابقى مش محترمة ؟؟ .. أنا الحمد لله باصلي وما باسيبش فرض !

تالت حاجة : المبررات ! .. اللي تقول لك : أصلي بارتاح في البنطلون أكتر وباعرف اتحرك بيه ! (ده على أساس إنها بتلعب تايكوندو) .. أنا بالبس صنادل عشان الجزم بتعمل ريحة وحشة ! .. أصل الحجاب بيفطسني ! .. ما هي دي الموضة ! .. وبقى فيه اعتقاد عند البعض منهن : إنها لما تحط أحمر وأخضر وتبقى شبه كوكي بارك وتلبس المحزق والملزق تقوم تلفت النظر فتصطاد عريس ! .. أو تكون إحداهن مرتبطة وتقول لك : أصل حمادة بيحب شكلي كده !
لو الواحدة من دول تعرف حسابها في الآخرة قد إيه ؟؟ .. لو تعرف بتتشتم قد إيه هي وأهلها بسبب لبسها الفاضح !! .. لو تعرف إن الواحد اللي عاوز يتجوز عمره ما هيبص في خلقتها إلا عشان يتفرج ويتسلى ! .. اعتقد كانت هاتستر نفسها !
ربنا يستر بنات المسلمين اللهم آمين
آسف على الإطالة وجزاكي الله كل خير على الموضوع القيم وجعله في ميزان حسناتك اللهم آمين !

خالص تحياتي

AHMED SAMIR يقول...

من وجهة نظري ان واحدة غير محجبة و لكنها محتشمة في ملابسها افضل بكثير من واحدة محجبة حجاب من اياهم بتاع اليومين دول الجينز و الباديهات
ربنا يهدي الجميع
تحياتي

βent Pasha يقول...

لأ بجد جزاكي الله ألف ألف خير يا أمة الله ، الموضوع ده دلوقتي بقى مأساة تحزّن بجد
كتير قوي كمان تكون واحدة فعلا محترمة وتكون لابسة لبس محترم ، وتعمل حاجة من محقرات الذنوب هي ممكن تكون مش واخدة بالها منها ، زي ميك اب خفيف ، او مش لابسة شراب ، او جوانتي .

((هل تعلمين تبرج الجاهلية الأولى كان إزاى؟
كان عبارة عن عباية طويلة ولكنها مفتوحة من العنق !! ))
للأسف دلوقت ماحصلوش حتى الجاهلية.

لأ بجد أكرر جزاكي الله ألف خير ، وربنا يهدينا و يهدي بنات المسلمين أجمعين .

سلمت يداكي

غير معرف يقول...

الأخت الفاضلة منى
يلتهم الناس من جسد المرأة ما تسمح هي به و تكشفه ، موضوعك واقعي و ذكرني بتساؤلات طرحتها مرة و أنا أتعجب بسذاجة من تلك التي ترتدي بنطلون محزق و تضع حجاب ، فجائني الرد لأنها مش فاضية تغسل و تسرح شعرها كل يوم و الأسهل لفة الإيشارب. ربنا يهدينا جميعاً

دعاء العطار يقول...

" شوفى إيه اللى ينفع تصلى بيه واخرجى بيه. "

دايماً بحط الجمله دى قدام عينيا

بس عارفه ياموناليزا بتطلع عنيكى عشان تلاقى حاجه محترمه وشيك فى نفس ذات الوقت بسبب موضة البديهات والمعروض فى السوق

مالها الشيميزات يعنى

بالنسبه لسؤالك هل انتى راضيه عن حجابك ؟

فانا ع قد مااقدر بحاول تكون فيه المواصفات الشرعيه

شكراً ع البوست المفيد ده (: (:

نسرين شرباتي "أم سما" يقول...

بصراحة لا
لكن ربنا يهديني :)
،،،،،،،،،،،،،،،
موضوع أثر فيا بشكل كبير
هوا الواحد واخد من الدنيا ايه ؟؟

Unknown يقول...

السلام عليكم أختي موناليزا

بارك الله فيك على العرض المتكامل للموضوع .. استخدام الدليل العقلي والنقلي.. والصور التوضيحية.. ممتاز.

موضوع مهم جدا تكراره من حين لآخر..

تحياتي وتقديري الدائمين.

مدونة رحلة حياه يقول...

السلام عليكم
جزاكم الله خيرا
فعلا بوست اكثر من رائع
ربنا يجعله فى ميزان حسناتك ويرزقك الاخلاص قولا وعملا
دومتى بخير

مصطفى سيف الدين يقول...

يسلم ايدك يا موناليزا
بجد اغلب البنات فاكرين انهم محجبات وهمه في الحقيقة غير محجبات
بارك الله فيكي بجد بوست هايل

عبد الرؤوف بن عبدالسلام (أبوهارون) يقول...

اتمنى ان يقراه اهل تونس

reemaas يقول...

ماهى دى نظريه اللى يقولك الحجاب حريه شخصيه وعلاقه بينى وبين ربنا
بجد بتغاظ جداااااااا لما بسمع ده

شمس النهار يقول...

شوفي انا مش بحب منظر البنت اللي تبقا لابسه قلعة دي
ويادوب حاطة طرحة زي قلتها
وكمان مش بحب العباية ولا الخمار ولا الاسدالو والشادوف
انا بحب لبس الست المصرية الحشمة
اللي لابتقلد السعودية ولا ايران

لبسنا لمصري جميل بس لو حرصنا علي انه لايشف ولايصف
كده هيبقا كله تمام

المعتصم يقول...

بسم الله الرحمن الرحيم
السلام عليكم ورحمة الله وبركاته
اختنا الكريمه
تحياتى الكبيرة
يارب تكونى بخير وفى احسن الاحوال
ويارب يكون بالك رايق
(حلوة الدعوة دى صح؟؟)
هههههههههههههههه
موضوع الحجاب قتل بحثا ياموناليزا
ومتهيألى انك كتبتى فيه قبل كده واتكلمناعنه
وكأننا بنادى على واحد بيغرق فى البحر وهو مش سامعنا من شدة الموج
ولما تقعدى تكلمى واحده وتنصحيها شوفى الفزلكه البايخه
تقولك هو انتى تعرفى احسن منى طب ماالممثله الفلانيه اتحجبت وكانت لابسه مش عارف ايه وهى بتكلم الشيخ مش عارف مين ماقلهاش ليه لبسك مش شرعى
ولا هو تزمت وتشدد وخلاص يعنى
فكك شويه الدين يسر مش عسر
اهم امثالك دول هما اللى مخلين شكل الاسلام وحش قدام العالم
يعنى احنا عملنا كل حاجه فى الدين صح ومش فاضل غير الحجاب

وطبعا محاضرة طويلة تقولهالك بسرعة الصاروخ وماتدلكيش اى فرصه انك تشرحي لها اخطاءها الفظيعه
كل اللى اقدر اقوله ان ربنا يصلح الاحوال ويهدى بنات المسلمين لما فيه الخير
اللهم امين
والسلام عليكم

~ISLAM~ يقول...

جميلة جدا التوعيه دى

ولفت انتباه اخواتك البنات فى التدوين والحياه

ربنا يوفقك لكل ما هو خير دايما

نيللي علي يقول...

اننى اتفق معكى تماما ولكننى اختلف معكى فى موضوع اللون ..ربنا ماحددش لينا لون معين ..يعنى ربنا ماكتبتش اننا مثلا نلبس اسود او كحلى ..فايه المشكله اكون محجبه صح وبلبس الوان عندك ناديه عماره داعيه اسلاميه وبتلبس الوان عادى ...

ووحشتينى كتير

موناليزا يقول...

سواح فى ملك الله
ـــــــــــــــ
أهلا بيك أستاذ خالد
المهم أنه يكون فى صحيفة أعمالى يوم القيامة :)

متفقة معاك ولكن فى بعض الأحيان بتكون بجد مش عارفة إن ده مش حجاب وبتبقى مفكراه عادى وعلشان كده وجب علينا تقديم النصيحة من آن لآخر "وذكر فإذن الذكرى تنفع المؤمنين"

أشكرك جدا لرأيك ولتعليقك
فماتوفيقى الا بالله
يسعدنا دوام التواصل


**********************************

باشا
ـــــــــ
أهلا بيك أستاذ شريف
تعرف يافندم أنابشوف البنت دى مسكينة بجد لأنها بتقلد اللى بتشوفه فى التليفزيون وخلاص بغض النظر عن تحكيم عقلها فى الموضوع

أما عن التحرش فالآراء اختلفت فيه فى موضوعى السابق "لحم رخيص":)
ولكنى أحترم رأيك

وأتفق معك فى الخلط بين الزى والأخلاق وأضيف أن المحترمة مابتعرفش إنها محترمة إلا من خلال التعامل فقط أما الملابس فالانطباع الأول هو من يحكم

عن المبررات ضحكتنى أنها بتلعب تايكوندو:) هو فعلا مريح يافندم بس يكون تحت الهدوم:)


أشكرك جدا لتعليقك الدسم واللى ياريت البنات كلها تقرأه علشان يعرفوا وجهة نظر الرجل فيما يرتدوه

يسعدنا دوام التواصل


**********************************

أحمد سمير
ـــــــــــ
أهلا بيك أستاذ أحمد
وجهة نظرك تحترم جداً
أشكرك جدا لتعليقك
ويسعدنا دوام التواصل


**********************************

بنت باشا
ـــــــــــ
أهلا بيكِ حبيبتى فى زيارتك الأولى
ربنا يكرمك يارب
أيوة كله كوم والصندل أو شبشب الخروج ده كوم تانى..
يابنتى قدمك باينة ويكون الرد وإيه يعنى ما الجو حر!!!

سعيدة جدا برأيك وبتعليقك
وفى انتظارك دائما

*********************************

محمد محمود عماره
ـــــــــــــــــــ
أهلا بيك أستاذ محمد
عندك حق جداً
أشكرك جدا لتعليقك
ويسعدنا دوام التواصل


*********************************

دعاء العطار
ــــــــــــــ
أهلا بيكِ يا دودو يا قمر
الله عليكِ

عارفة يا أختى بس أنا خلاص حفظت المحلات وعرفت إيه المكان اللى يناسبنى علشان أشترى منه ووالله بتبقى حاجات شيك برضه :)

ربنا يثبتك يارب ويعينا جميعا على طاعته
أسعدنى وجودك
وفى انتظارك دائما


**********************************

موناليزا يقول...

نيسرينا
ـــــــــــ
أهلا بيكِ يا نيسو
ربنا يهديكى يا حبيبتى وطالما اعترفتى يبقى مش ناقص غير العزيمة جواكى إنك تغيريه وتبقى راضيه عنه وأنا عارفة إنها موجودة:)


سعيدة جدا بتعليقك
ويارب يكون سبب فى التغيير

نورتينى حبيبتى
وفى انتظارك دائما


**********************************

ماجد القاضى
ـــــــــــــ
وعليكم السلام ورحمة الله وبركاته
أهلا بيك أستاذ ماجد
ربنا يكرمك يارب فما توفيقى الا بالله

نعم يا فندم لعل وعسى:)
"و ذكر فإن الذكرى تنفع المؤمنين"

أشكرك جدا لتعليقك ولتدعيمك الدائم
ويسعدنا دوام التواصل

*******************************

مدونة رحلة حياة
ـــــــــــــــــــ
وعليكم السلام ورحمة الله وبركاته
أهلا بيك أستاذ محمد
ربنا يكرمك يارب
فما توفيقى الا بالله
أشكرك جدا لتعليقك
ويسعدنا دوام التواصل


******************************

مصطفى سيف الدين
ــــــــــــــــــ
أهلا بيك أستاذ مصطفى
ربنا يكرمك يارب
هذا حقيقى للأسف
ولكن الهادى هو الله فربنا يهديهن جميعا
أشكرك جدا لرأيك ولتعليقك
ويسعدنا دوام التواصل


**********************************

أميرالكافيه
ــــــــــــ
أهلا بيك يافندم وبأهل تونس
خلاص اعمل شير للموضوع:)
نورت مدونتى ويسعدنا دوام التواصل

********************************

ريماس
ـــــــــــ
أهلا بيكِ يا نور
لأ الجديد كمان أنه بقى مووووضة!!!

ربنا يهدى بنات المسلمين يارب
نورتينى حبيبتى وأسعدنى وجودك


*********************************

شمس النهار
ــــــــــــــ
أهلا بيكِ يا شموسة
ومين بيحبها:)!
يكفى إنك ماتبقيش فاهمة هى لابسة إيه:)
و دى حاجة بتضايقنى أنا كبنت أنى مش عارفة أحدد هى لابسة إيه بالظبط :)

وجهة نظر تحترم
أشكرك جدا لرأيك
وفى انتظارك دائما


******************************

المعتصم
ـــــــــــ
وعليكم السلام ورحمة الله وبركاته
أهلا بيك يا أبو صلاح بعد طول غياب

أنا الحمدلله بخي يافندم وأشكرك جدا لسؤالك
هى دعوة حلوة وعايزاها بصفة مستمرة بقى :)

نعمل إيه يافندم الأوضاع بتسوء أكتر أنا عارفة أنى اتكلمت عن الحجاب قبل كده ولكن لعل وعسى والتكرار كويس برضه :)

فعلا الغريبة أنها بتكون مقتنعة بكلامها وبتعتبر أى نصيحة تدخل فى شئونها الخاصة
ولكن ربنا هو الهادى وربنا يهدى بنات المسلمين جميعاً
أشكرك جدا لتعليقك
ويسعدنا دوام التواصل


*********************************

إسلام
ـــــــــ
أهلا بيك أستاذ إسلام
ربنا يكرمك يارب أشكرك جدا لتعليقك
والحمدلله الذى هدانا لهذا
ويارب يكون سبب فى هداية البنات

يسعدنا دوام التواصل


**********************************

نيللى
ــــــــ
أهلا بيكِ يا نونا بعد طول غياب
وأنا احترم اختلافك معى
وبغض النظر أنى مش عارفة مين نادية عمارة علشان أقدر احكم على لبسها لكن أنا مش ببص على اللى بيطلعوا فى التليفزيون على اعتبار أنهم قدوة المفروض أقلدهم لأن برضه كل واحدة ليها وجهة نظر خاصة بيها ومعتقدة أنها بتعمل الصح.. وعلشان كده أنا وجهة نظرى الخاصة أنى استنكر الملابس ذات الألوان الفاقعة الملفتة للنظر.

نورتينى حبيبتى
وفى انتظارك دائما

غير معرف يقول...

مشكورة على هذا الجهد الرائع فى نشر الحق ومحاربة الباطل بارك الله فيك ونفع بك

موناليزا يقول...

ناصر أبو الخير
ــــــــــــــــ
أهلا بيك يا أستاذ ناصر
ربنا يكرمك يافندم
والحمدلله الذى هدانا لهذا
أشكرك جدا لتعليقك
يسعدنا دوام التواصل