السبت، 26 نوفمبر، 2011

البائع والمُشترى

بين البايع والشارى يفتح الله.
جُملة جميلة ومعبرة جداً عن الوضع الذى يجب أن يكون فى التعامل بين فردين تحكمهما علاقة هات وخد أو علاقة تبادل المنفعة أوأى مُسمى آخر لمن كانت النقود بينهم.. سواء بائع فى محل تجارى أو أجير وما إلى ذلك من مُسميات عدة.
وكما يقال العقد شريعة المتعاقدين.. واللى أوله شرط آخره نور.. واحد زائد واحد بيساوى اتنين.
يعنى لما أكون بشترى حاجة ووجدت سعرها غالى عليا خلاص يبقى مااشتريهاش مش آخدها وأقول للبائع يبقى عليا ليك كذا لأن لو البائع معرفة ومستأمنك ممكن يوافق ولو كان ضد نظام الشكك فهذا حقه.
ولو اضطر الفرد أنه ياخد الحاجة شُكك أو استعان بعامل سباكة أو نجارة أو كهربا أو نقاشة أو حتى سائق تاكسى يبقى لازم يحدد وقت معين هيدفع فيه اللى عليه ولو ماكنش فى الوقت ده معاه فلوس على الأقل يعتذر منه مش يستنى لما صاحب الحق يتصل بيه أو يبعت له أو يذهب له بنفسه بدل المرة ألف..
المفروض الإنسان يبقى عفيف وعنده إحساس ويحط نفسه دايماً مكان الناس. ويرى الموضوع بمنظور أن واحد فك زنقتك فالذوق بيقول إنك ترد اللى عليك سريعاً فهل جزاء الإحسان إلا الإحسان مش بعد ما الفلوس تبقى معاك تستخسر فى الناس حقوقها وتبدأ تفاصل.
وتأكد أنه كما تدين تدان وإذا ماكنش هيتعمل فيك كده من منطق إيه ياخد الريح من البلاط أو لأنك حريص بزيادة فهيكون مع ولادك فالله هو الحق ولا يرضى بظلم عباده.
يعنى مثلاً يوم ما حد من ولادك يتنصب عليه فى فلوسه اللى أنت عاطيهاله أو يشترى حاجة بضعف تمنها أو دهب مراتك يتسرق أو عربيتك تتخبط وتصرف عليها قد كده أو ما إلى ذلك.
وقتها ابحث بداخلك عن الخلل وسدد ديونك وبرأ ذمتك من الله.. فالديان لا يموت.




هناك 7 تعليقات:

مها البنا يقول...

جميل يا موناليزا .. ربنا يباركلك

اللهم اقبضنا اليك غير مدينين ولا مفتونين .. امين

أم هريرة.. lolocat يقول...

السلام عليكم

جزاك الله خيرا اختى الحبية شكرا لك على الطرح الطيب الهادف
بارك الله فيك واسعد قلبك غاليتى

تحياتى وتقديرى

reemaas يقول...

كما تدين تداان

جملة عودت نفسى فى حياتى انى اعمل حسابها جداااااااااااااا

dodo, the honey يقول...

السلام عليكم موناليزا ...

حكم و كلمات رآئعة ،
بارك الله فيكِ ...

دمتِ بخيرْ ...

تحيآتي لكِ ...

وجع البنفسج يقول...

العقد شريعة المتعاقدين .. يااااه سمعت الجملة هذه يمكن خمسين الف مرة الفصل الدراسي الماضي .. كان زوجي بيدرس معاملات مالية :)

عموما ربنا يبعد عننا شر الدين يارب ..

ويارب يسد عننا ديوننا قبل وفاتنا ..

بارك الله فيك وجعلها في ميزان حسناتك يارب ..

eng_semsem يقول...

ناس كتير بتستخف بحكاية ان يبقى عليه دين
وكان رسول الله ولنا فيه قدوة حسنه اول ما يسأل عن حال الميت اعليه دين وكان لا يصلي عليه حتى يقضى دينه
تحياتي على موضوعك الجميل

موناليزا يقول...

أهلا وسهلا بجميع السادة الحضور
أشكركم لتعليقاتكم التى تسعدنى كثيراً
ربنا يكرمكم يارب
وفى انتظاركم دائما