جوجو و زمردة (18)

كانا "جوجو" و"زمردة" يشاهدان التلفاز.
جوجو: أنا عطشان.
زمردة :قوم اشرب.
جوجو :معلش يا زمردة ده انتى هتاخدى ثواب.
قامت زمردة على مضض فهى تغضب من اسلوب شقيقها دائماً.
جوجو : ماتنسيش تعلقى لى هدومى وترتبى لى سريرى .
زمردة:وأنت ما تعملش حاجتك بنفسك ليه؟.
جوجو:يابنتى أنا ولد يعنى ده مش تخصصى.
زمردة: ومين قال أن ده تخصصى.
جوجو : لأنك بنت وده فى حد ذاته سبب كافى.
زمردة: مين بقى اللى أصدر القانون ده؟.
جوجو:هى معروفة كده.
زمردة:بس ده ظلم يعنى إيه أنت ترمى هدومك وأنا اللى أرتبهالك ويعنى إيه ماترتبش سريرك مكانك.. لأ وكمان بعد ما تستحمى أدخل ألاقى الحمام غرقان ميه وأنا برضه اللى أنشفه.
جوجو: وإيه المشكلة؟.
زمردة : المشكلة أن المفروض كل واحد يعتمد على نفسه ويخدم نفسه بدل يقدر.. أنت أكلت يبقى تشيل مكان أكلك.. قلعت هدومك تبقى تعلقها.. وبالمقابل دخلت الحمام تعمل حساب أن فيه ناس تانية ممكن تدخل وراك ومن حقهم يكون المكان نظيف.
جوجو ببرود: ياااه ده أنتى شايلة أوى.. خلاص ياستى ماتعمليش حاجة أنا هقول لماما وهى هتعمل.
زمردة بغيظ: بس دى مش شطارة إنك تعتمد على اللى حواليك.. تخيل لو فى مكان لوحدك هتعمل إيه؟.
جوجو بلا مبالاة :ولا حاجة عادى يعنى وبعدين أتخيل ليه وأختى حبيبتى موجودة.
زمردة :برضه أنت اللى هتعمل حاجتك.
جوجو بزهق: يا بنتى مابعرفش.
زمردة بحسم :اتعلم.
جوجو :بعدين .. أنا مش فاضى دلؤتى .. مش شايفانى بتفرج على التليفزيون.
زمردة جلست جواره قائلة :وأنا كمان مش فاضية.
- تمت-.
------------------------------
سؤال جانبى :
ما مدى اعتمادك على نفسك؟.