الكرة الأرضية

أثناء ممارستى لعبادة التفكر جاء فى ذهنى هذا السؤال.
ماذا لو توقفت الأرض عن الدوران الآن- الوقت ليلاً والفصل الشتاء-!!.
معلومة :دوران الأرض حول نفسها ينتج عنه تعاقب الليل والنهار.. ودوران الأرض حول الشمس ينتج عنه تعاقب فصول السنة".
-الأيام كلها هتبقى ليل بس!.
يعنى تخيل نفسك بعد ما نمت بالليل وصحيت الصبح تفتح الشباك تلاقى الدنيا لسه ضلمة.. هتبدأ تشك فى نفسك وفى الساعة..هتتصل بكل الناس يقولولك إحنا كمان الشمس ماطلعتش عندنا.
طيب هتروح الشغل إزاى والعيال هتروح المدارس إزاى..ياه الحياه هتقف تماماً.
ده غير أن الأمراض أكيد هتنتشر لأن الشمس لها فوائد كتير فى تقوية العظام وقتل الميكروبات.. وأكيد برضه النباتات هتموت أصلها هتعيش إزاى من غير شمس.. ده غير الأزمة اللى هتصيب الناس اللى عندهم عشا ليلي.
طيب وهنصلى إيه.. يعنى إيه الفروض اللى هنصليها ولا هنقضيها قيام ليل.
طيب والناس الى بتمارس الرياضة صباحاً فى ضوء الشمس والناس اللى بتحب تتفسح بالنهار والمحلات اللى بتسترزق بالنهار وغيرهم وغيرهم كل دول هيعملوا إيه؟
إزاى نعيش بالليل وبس.. أصل النهار ده حياة.
"(وجعلنا الليل لباسا ، وجعلنا النهار معاشا)) صدق الله العظيم.

قد إيه دوران الأرض ده نعمة كبيرة وإحنا مش حاسين بيها.
الحمدلله يارب على نعمك التى لا تعد ولا تحصى.

سؤال جانبى:
ــــــــــــــــــــ
* أذكر نعمة شعرت بها أثناء قراءتك للموضوع.