السبت، 17 ديسمبر 2011

فى حياتنا


فى حياتنا ناس كتير لكن قليل من يشعرون بهم.
-فى حياتنا ناس مكسورة من جواها وتظهر القوة أمام الغير.
- فى حياتنا ناس محتاجة لمن يطبطب عليها وياخدها فى حضنه بكلماته الطيبه.
- فى حياتنا ناس ماعدتش قادرة تحب نفسها.
- فى حياتنا ناس عندها مصائب ومع ذلك بتبان إنها سعيدة وراضية عشان اللى حواليها مايتألموش لحزنهم.
- فى حياتنا ناس بتكتم ألمها لو وقعت ورجلها اتكسرت وهى اللى بتصبر اللى حواليها بأنها بكره هتبقى كويسة.
- فى حياتنا ناس فقدوا الثقة فى كل اللى حواليهم.
- فى حياتنا ناس كتير موجوعة ومحدش حاسس بيهم.
- فى حياتنا ناس مستنيين معجزة من السماء عشان تحل لهم مشاكلهم
- فى حياتنا ناس عاوزة تبعد عن كل اللى تعرفهم وتبدأ حياتها مع ناس جديدة ماتعرفهومش.
- فى حياتنا ناس عاوزة تسيب البلد بأى طريقة.
- فى حياتنا ناس عاوزة ولادها تسافر تشتغل بره عشان يبقى معاهم فلوس كتير يقدروا يعيشوا بيها ومايعرفوش إن لو ولادهم سافروا مش هيلاقوا حد يعيشوا عشانه ولا هيلاقوا حد يسندهم وقت عجزهم.
- فى حياتنا أمهات كل وظيفتهم فى الحياة أنهم يأكِلوا ولادهم وبس.
- فى حياتنا ناس بتشكى لناس هتموت من كتر همها.
- فى حياتنا ناس بتفرح لآلام الآخرين.
- فى حياتنا ناس بتتصل مخصوص لمجرد لمجرد أنها تشكى حالها المزعوم عشان محدش يحسدها.
- فى حياتنا ناس بيعتمدوا على اللى حواليهم بطريقة مبالغ فيها لمجرد إن اللى قدامهم طيب.
- فى حياتنا ناس شريرة زيادة عن اللزوم.
- فى حياتنا ناس طيبة زيادة عن اللزوم.
- فى حياتنا الفلوس هى سيدة الموقف.
- فى حياتنا ناس مابيحاولوش يحلوا مشاكلهم وبيقولوا ده أكيد إبتلاء.
- فى حياتنا آباء بيبعوا بناتهم لأى عريس يكون معاه فلوس ومش مهم دينه وأخلاقه.

إزاى تحكم على حد وأنت ماتعرفش ظروفه!.

هناك 15 تعليقًا:

ليلى الصباحى.. lolocat يقول...

السلام عليكم


إزاى تحكم على حد وأنت ماتعرفش ظروفه!.

انت لخصتى الحكاية كلها فى سؤالك ياموناليزا
ازاى نحكم واحنا مالدينا المعرفة الكاملة عن ظروف الناس

للاسف احنا فنانين فى اختراع الحكايات والاشاعات وعدم التماس الاعذار لبعض

جعل الله الناس شعوب وقبائل لنتعارف لكن قال ان اكرمكم عند الله اتقاكم

اللهم ارزقنا التقوى والصلاح والعفو والعافية وان نعامل الناس بخلق حسن

تحياتى لمواضيعك الرائعة المتجددة
كونى بخير

ظلالي البيضاء يقول...

موناليزا ..
أصبت في كلماتك جرحاً في قلوبنا عميقاً .. فكأنك تقرئين أعماقنا بذكاء ..
طابت أيامك سعيدة ..
مع التحية .. محمد

هبة فاروق يقول...

مش من حقك تحكم وتعمل نفسك قاضى وجلادعلى غيرك
مش من حقك تحكم على غيرك وتشوه صورته وتعمل نفسك مثالى
فعلا دول فى حياتناولكنهم لا يشعرون بغيرهم
تحياتى بوست رائع

eng_semsem يقول...

اكبر مشكله بتقابلنا في حياتنا لما نلاقي اشخاص مجبرين على التعامل معاها حتى واحنا بنكره طبع فيهم بس مرتبطين بيهم زي الشغل والسكن والبيت والجيران
في حياتنا ناس مش قابلين سلوكهم بس بنتعامل معاهم
تحياتي لموضوعك الرائع

مصطفى سيف الدين يقول...

للاسف ناس كتير بتظهر غير ما تخفي وتامر بالبر وتنسى انفسها
للاسف هي دي مشكلة المشاكل
جزاكي الله خيرا
ودام قلمك نابضا بمشكلات المجتمع
تحياتي لكي

مدونة رحلة حياه يقول...

السلام عليكم
لو هندور فى حياتنا هنلاقى العجب
بس الاحسن
وياما ناس بتحكم من غير ما تعرف وقليل اللى بيحكم بعد ما يسأل ويعرف
وكأنى كلمة سؤال بقت عيب امال المتسولين ليل ونهار بيسألوا من غير ملل ليه
دومتى بخير

Carmen يقول...

حكم رائعة حبيبتى صدقتى

سلمت اناملك

تحياتى لك

Carol يقول...

تدوينة عميقة جدا
تدعو الى التأمل في الحياة و الأشخاص من حولنا
و لكن فعلا صعب يا سيدي ان نفهم و نعرف تفاصيل الروح و خبايا النفس
إلا إذا كانت الاشخاص قريبة فاتحة قلبها و تبوح بالأسرار
و تتكلم عن ما في القلب

شمس النهار يقول...

انتي لخصتي
ازااااااي تحكم علي حد وانت ماتعرفش ظروفه
كمان ازاي تلوم علي حد وانت يمكن لو اتحطيت في نفس ظروفه تعمل زيه
مش بحب حد يحكم علي حد
ولا بحب حد يتدخل في العلاقة بين حد وربه

Lobna Ahmed Nour يقول...

صدقتِ
والصورة معبرة جدًا

مامة مازن يقول...

الدنيا علمتنى من زمان انى محكمش على حد لانى معرفش ظروفه وحياته واللى جرى حتى النهاردة فى يومه العادى

الدنيا علمتنى ان مش من حقى اعرف علشان يبقى عندى مبرر احكم

الدنيا علمتنى انى مش من حقى احكم على حد ابدا مهما كان عقلى بيقولى او نفسى بتقولى

الدنيا علمتنى ان ال21 نوع من الناس دول موجودين قوى قوى واكتر

الدنيا علمتنى ان 21 نوع دول مصيبتهم انهم من الدائرة القريبة قوى من الانسان دول الصف الاول اللى بيحميه اهله واصحابه

الدنيا علمتنى ان البعد عن الناس غنيمة وان الكنة من الجنة وان أأمن طرق التعامل مع الناس هى سلام عليكم عليكم السلام صباح الخير يا ايها ال21 نوع انت فى حالك وانا فى حالى

الدنيا علمتنى ان كل نقطة فيهم عايزة 21صفحة يتكتبوا ولكن
معلش طولت عليكى

Emtiaz Zourob يقول...

في حياتنا الكثير والكثير للاسف ..

فالحياة مليئة بكل أنواع البشر ..

ربنا يلطف فينا وفي الجميع ..

دعاء يقول...

هناك الكثير من الأصناف ...
كثيرون هم الناس و أحوالهم و أصنافهم ...

تحيآتي لكِ ...

غير معرف يقول...

صباح الغاردينيا موناليزا
وفي حياتنا بشر وبشر
ونحتاج التعايش معهم مهما كانت قساوتهم "
؛؛
؛
موضوعك رائع
لخصتي الكثير
لروحك عبق الغاردينيا
كانت هنا
reemaas

خالدمحمودالموناليزا يقول...

كلماتك فعلا منتهى الرقة.....تقبلى تحياتى وخالص تقديرى