الاثنين، 25 نوفمبر، 2013

ظواهر





عن ظاهرة العبايات السودا والملابس السوداء عموماً
ليه السواد  يا نساء مصر ؟
ها.. ليه بجد..
المرحوم مين اللي لابسين عليه حداد مش عايز يخلص!!
بقى عادي لما تروحي أية مناسبة حلوة وتلاقي سواد أعظم مقابلك
داخلة مسجد أو حتى فرح.
طيب إيه الفرق بينه وبين ملابس العزاء ولا مؤاخذة يعني.
هتقولي وقار!! هقولك ما فيه ألوان كتير وقار.. عندك (كحلي ورصاصي) مثلاً.
وأكيد ما أقصدتش أنك تلبسي ألوان الطيف مع بعض.
هتقولي موضة!! هقولك وأنتي مالك ومال الناس.
هتقولي أناقة! هقولك الشيء إذا زاد عن حده انقلب لضده
وماتزعليش لما حد يطلق عليكِ لقب "وفيات" .
ربنا خلقلنا الطبيعة ملونة بهجة للناظرين ليه أنتي مضيقة على نفسك.
انشري البهجة على من حولك بارتداء ملابس مبهجة.
لو عايزة توحدي لون لبسك ليه ماتخليهوش أبيض مثلاً.
وليه تحرمي نفسك من استخدام ملابس ملونة أصلاً!.
ليه تضيقيها على نفسك وربنا واسع.
ليه تحصري نفسك في لون واحد.
ظاهرة تستحق وقفة للتأمل.

------------------------


ظاهرة صورة إشارة رابعة.

الناس اللي حاطين صورة فيها أربع صوابع والخلفية صفرا.
بالنسبة للأربع صوابع قلتوا انها كناية عن منطقة رابعة.
طيب اللون الأصفر ده كناية عن إيه؟.

ليه مش أحمر؟؟؟.
ليه الخلفية صفرا؟.
هتقولوا انتباه .. هقول لإيه؟.
هتقولوا استعداد.. برضه لإيه؟.
هتقولوا واشمعنى أحمر؟.
هقول علشان لون الدم اللي سال وماظنش في حاجة غيره ممكن تعبر أكتر.
 لو كان ده فعلاً قصدكم غير كده فأنا مش لاقية مبرر مقنع
 لاختيار لون الخلفية الصفراء.


------------------------------


انتشار تعليق"مش هيموتوا موتة طبيعية"
إليهم أقول
هو ربنا أداكم علمه علشان تعرفوا كل واحد هيموت ازاي؟؟.
اتمنوا الخير للناس أو بلاش تتمنولهم حاجة أصلا .. سيبوا الناس في حالها.

وادعوا لنفسكم بالخير.

--------------------------------




انتشار سواد القلوب والنفوس الغلاوية بطريقة مقززة..

إيه يعني لما واحد  يجيب راقصة تحيي فرح ابنه بمبلغ وقدره!.
ايه يعني لما واحد يسهر في كباريه وينقط بالألوفات.
إيه يعني لما حد يشغل "تسلم الأيادي " في فرح وقبلها في حنة .
إيه يعني لما برنامج ساخر يقول كلام مايعجبكش.
وغيرها من تصرفات كتير ممكن تستفزك.
هل ده يستدعي انك تدعي عليه بزوال ماله وفرحته وصحته و.. و.. و....؟.
أمال لو قتلك حد هتعمل فيه إيه؟؟.
مع احترامي لوجهة نظرك في اعتراضك على تصرفه .
بس الحقيقة اللي لازم تقتنع بيها أن كل واحد حر. 
فلوسه وهو حر فيها وربنا اللي هيحاسبه على تبذيره مش حضرتك.
فإيه لازمة بقى الغِل اللي بيبان في التعليقات وقتها.
ادعي يا سيدي ان ربنا يرزقك زي ما رزقه علشان تساعد الناس.
 وأنك عمرك ماهتبذر مع أن يا عالم لو ربنا رزقك بالفلوس بجد هتعمل بيهم إيه.
افتكر أن أخلاق الاسلام تنص على عدم السب واللعن والفحش والبذاءة.

خليك في حالك وانشغل بعيوب نفسك وماتنصبش نفسك واعظ.

-------------------------

لما بتعمق في تفاصيل حياة الحيونات والحشرات

 بلاقي أن أكيد اللي طلع بالمعلومات دي
 حد معندوش مشاكل في حياته لدرجة تخليه مثلا
 يراقب مملكة النمل ويعرف بيعيشوا ازاي ونظام حياتهم إيه!
أو يدرس فصيلة الهررة مثلا بجميع أنواعها.


----------------------------------





عارفين التعبير الاعتراضي الشهير الخاص بالاسكندرانية..
 كان زمان عيب حد يقوله ولو حد قاله يقولوا معلش أصله اسكندراني
 وعندهم عادي..
 ليه بقى ماعدتش عيب!! ليه بقى موجود في الإعلام كده!!.
 تخيل لما تكلم طفل وتلاقيه رد عليك بيها ولا حد حاططها لازمة في كل كلامه!!.شعورك وقتها ورد فعلك هيكون إيه؟.

ليه كل حاجة وحشة في انتشار .





هناك تعليق واحد:

شمس النهار يقول...

يانهااااارر
ده كل سطر عايز يوم الواحد يعلق عليه :)
السواد سواد القلب ونية اللي اقنعهم ان كده صح وجميل واقرب لله
والغل وان الناس تدعي علي بعض بقا عادي
ونسيوا ان الدعوة علي الغير لايحبها الله والدعوة للغير بظهر الغيب لها اجر وثواب كبير