الثلاثاء، 5 يناير، 2010

متعة العطاء

بذل الجهد والتضحية للآخرين يعد من أروع الشعور وخاصة لو كنت تكن لهم معزة خاصة.
مثال: كثرة التفكير إذا ما أردت أن تعطى لشخص عزيز عليك مثلاً هدية وإذا ما وجدتها.. تحرص على إختيار ورق الزينة لكى تغلفها به ومن ثم تقدمها وأنت فى كامل سعادتك. ويمكن سعادتك تفوق سعادة الشخص المستقبل.
مثال آخر: تظل الأم تحضر وجبة الغداء مثلاً ولنفترض أن الطبق الرئيسى سيكون "محشى" ولك أن تتخيل كم الوقت والجهد المبذول فى تحضيره رغم أن تناوله لا يتعدى الدقائق وبعدها تقوم الأم بتنظيف السفرة وتفريغ الصحون وغسلها وما إلى ذلك بكل حب وسعادة.
مثال للتجربة:جرب تعطى لحد أنت بتحبه أى حاجة ولو حتى صابع موز وشوف لو رفضه شعورك وقتها هيكون إيه؟.


يوجد أنواع متعددة للعطاء وعلى كل نوع يختلف حجم الثواب.ولكنى سأختص فى هذا الموضوع شئ واحد فقط وهو"كفالة اليتيم".
أتذكر زيارتى لدار الأيتام وكم تكون سعادتى لأنى أستطعت أن أرسم إبتسامة على وجوه الأطفال هناك.
قال صلى الله عليه وسلم" أنا وكافل اليتيم كهاتين فى الجنة وأشار بإصبعيه السبابة والوسطى".رواه البخارى " الجامع الصحيح رقم 5304"
أى عمل هذا الذى يجعلنا جيران للنبى صلى الله عليه وسلم فى الجنة.
بعض الأفكار لكيفية الكفالة:
-ممكن جدا نكفلهم وهما فى مكانهم من خلال تعليمهم وتنمية مهاراتهم.
ويعتبر ذلك كالصدقة الجارية فأنك مثلاً إذا علمت ذلك اليتيم الصلاة فإن كل سجدة يسجدها فى ميزان حسناتك و إذا ربيته على خلق معين ثم ربى أولاده عليه و أحفاده و هكذا فإن ذلك كله فى ميزان حسناتك.
يعنى بدل ما تضيع وقتك فى مشاهدة مسلسل أو فيلم ممكن جدا تزور يتيم وتتفرج معاه أو تعلمه حاجة مفيدة.
-تخصيص وقت معين لهم. للسؤال عن أحوالهم ومعرفة ما إذا كانوا يواجهون مشاكل سواء صحية أو دراسية أو مع أحد فى الدار.
-كفالة طفل بعينه داخل الدار من الناحية المادية والنفسية والتربوية وجلب كل مايحتاجه من ملابس وكتب ولعب وممكن تخصص يوم فى الأسبوع تقضيه معه سواء داخل الدار أو خارجه. وعليه أن يُشعره بكل الحب والاهتمام .
تخصيص جزء من مصروفك أو من مرتبك وتركه لدى المسئولين عن دور الأيتام حتى لو كان بسيط.
ومن وجه نظرى:
- أرى أن إعطاء المال للدار أفضل من شراء أى حلوى أو لعب لشخص بعينه لأن أكيد الدار واضعة خطة معينة لتربيتهم وهى أدرى بما يناسب كل يتيم. بالإضافة لو أعطيت لواحد منهم مثلاً لعبة فأكيد بقية الأطفال هيحقدوا عليه أو ياخدوها منه وما إلى ذلك. ولذلك لو أردت شراء شئ فليكن بعدد الأطفال الموجودة.
-كفالة الطفل فى الدار أفضل كثيراً من أن تأخذه ليعيش معاك سواء كان ولد أو بنت لأن لو كان ولد فلا يجوز شرعاً أن يتعامل مع أمه بالتبنى كما يتعامل ابنها الأصلى لأنه مهما كان غريب عنها.
ولو بنت لا يجوز أن تجلس مع أبيها بالتبنى لأنه رجل غريب عنها.
-وهناك تنويه هام برضه وهو البنات اللى بيزوروا دور الأيتام الخاصة بالبنين وخاصة اللذين فى سن المراهقة ياريت يزوروا البنات ويتركوا زيارة البنين لبنى جنسهم.
-أبسط حاجة ومتهيألى كلنا نقدر عليها أن نعامل اليتيم معاملة طيبة سواء كان فى دار أيتام أو كان مع أمه الأرمله.(جيران أو أقارب).
ممكن جدا يكون اليتيم من أسرة غنية ولكنه يحتاج إلى الحنان والاهتمام المعنوى أكثر من الاهتمام المادى.
فقد أوصى الله تعالى بالإحسان إلى اليتيم الذي ترك له والده مالا برعاية هذا المال وتنميته وتثميره وعدم الاعتداء عليه بأي صورة من الصور.
فقال تعالى : (وَلا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ حَتَّى يَبْلُغَ أَشُدَّهُ ) (الأنعام: من الآية152).
وقال : ( وَلا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ حَتَّى يَبْلُغَ أَشُدَّهُ وَأَوْفُوا بِالْعَهْدِ إِنَّ الْعَهْدَ كَانَ مَسْؤُولاً) (الإسراء:34).
وقال تعالى (فأما اليتيم فلا تقهر) الضحى9
وقال عز وجل: ( وَيَسْأَلونَكَ عَنِ الْيَتَامَى قُلْ إِصْلاحٌ لَهُمْ خَيْرٌ وَإِنْ تُخَالِطُوهُمْ فَإِخْوَانُكُمْ) (البقرة: من الآية220).
وفى حديث قدسى قال الله عز وجل "من أبكى الغلام الذى غيبت أباه تحت التراب حقيق عليّ أن لا أرضَ عنه "
وقال صلى الله عليه وسلم :" من أراد أن يزاحم كتفه كتفى يوم القيامة فليكفل يتيما ً".
وعن أبن عباس رضى الله عنهما :أن النبى الله صل الله عليه وسلم قال : (من قبض يتيما بين مسلمين الى طعامه وشرابه أدخله الله الجنه ألبته الا أن يعمل ذنبا لا يغفر )رواه الترمزى
قال رسول الله صلى الله عليه وسلم:"‏من مسح رأس يتيم أو يتيمة لم يمسحه إلا لله كان له بكل شعرة مرت عليها يده حسنات" .
وبعد توضيح هذا الأمر الإلهى وتوضيح عظم الثواب الذى بشرنا به النبى صلى الله عليه وسلم أرجو أن يكون لليتيم وجود فى حياتنا. ولو حتى بكلمة طيبة أو مسحة على رأسه أو تربيته على كتفه أو إبتسامه فى وجهه.




سؤال جانبى:

* هل تحرص على زيارة دار الأيتام أو تهتم بيتيم على وجه العموم؟.

* أذكر أطرف موقف حدث لك أثناء زيارتك لدار أيتام؟.

هناك 35 تعليقًا:

حصان المرجيحة يقول...

و الله فكرة جميلة جدا
بس الدنيا وخدانا مش عارف ليه
و فعلا بدأت احس اني عايش للدنيا مش لله
ربنا ينصرنا علي انفسنا

حصان المرجيحة يقول...

انا لاحظت علي يمين المدونة كلمة :
اللهم انصرني علي من ظلموني
انا عندي فكرة احسن بس اصعب
و هي انك تسامحيهم و تتصدقي بده عند ربنا

ستيته حسب الله الحمش يقول...

كما هي العادة
يارب يجعل كل حرف من الحروف دي في ميزان حسناتك ويتقبله يارب
بصي انا مقدرش ازور دار ايتام
مش ها اعيط بس
لأ ده لو حد منهم تعلق بي ها أموت وانا ماشية وسيباه
ممكن اعمل خناقة علشان اخده
وطبعا مش ها ينفع اخده

انا عارفة طاقتي
ربنا يسامحني
لكن بحاول اطبق حديث الرسول الكريم صلى الله عليه وسلم بس بطريقة اخف وطئة على قلبي
ربنا يسامحني

انا قرأت موضوع عند ريمان معرفتش ارد ولا أواسيها
قعدت اعيط واتخيل احساسها والطفل اللي اتعلق بيها بيعيط بعد ما هي تمشي
واحساسها لما تم تبنيه
احنا الستات قلبنا ابن لزينة
هو مودينا في داهية اللي قلبنا
ربنا يسامحني

salma mohamed يقول...

العطاء والكرم فعلا من أعظم الأخلاق وليهم أعظم الأجر,
وانا بصراحة ما اتحملش اني اتعامل مع حد بخيل او حريص ابدا ابدا ابدا,
الكرم زي ما قولتي مش بس بالمال,
العطاء والكرم والجود بالنفس والمال والمشاعر وبكل ما هو طيب جميل,وفعلا أثر سعادته على المعطي اكبر من المعطى اليه,
أما عن كلامك عن الأيتام فقد أحسنتِ جزاكِ الله خيرا,
حقيقي ما زورتش دار أيتام قبل كده,
لكن يوجد ايتام في محيطي الاجتماعي,
اعاننا الله واياكم على البذل والعطاء.

أبو كريم يقول...

يا أمة الله نحسبك على خير بإذن الله وندعوا الله لك بظهر الغيب بالثبات على طاعته والدوام على طريقته والسير على سراطه المستقيم حتى تلقيه


موضوعك جميل جدا ولكم شعرت بالخزى لعدم زيارتى لأى دار أيتام طوال حياتى ولكنى حريص على مساعدة الأيتام بقريتى عن طريق مشروع كفالة اليتيم فى القريه والتى أشرف بان والدى هو مؤسسه ولكن ما أود أن أقوله بأن جارا لنا قد توفى وترك ثلاث أبناء وفى أقل من شهر مات والده أيضا وأقسم بالله انى عندما ذهبت للعزاء ووجدت إبنه الصغير يلعب تذكرت حديث رسول الله فمسحت على رأسه وأشتريت له بعض الأشياء القليله مع بعض أطفال الشارع وأقسم بالله ماشعرت بفرحه توازيها لان مشروع كفاله اليتيم أعطى المال لوالدى وهو الذى ينفقه حسب الأسر ولكنها المرة الأولى لى التى أمسح فيها على رأس يتيم


اللهم أعنا على طاعتك وإتباع سنة نبيك وأرشدنا للخير واساعدنا على عمله وباعد بيننا وبين الشيطان وسبله وإن قصرت اعمالنا

دمت فى معية الله

همسة حب يقول...

جزاك الله خيرا حبيبتي على طرحك للموضوع القيم
فعلا شعور لايوصف بصراحة لااذهب للدار الايتام لاني مغتربة في بلد اروبي وعندما اكون في بلدي انشغل لكني اتذكر ذهبت مرة مع جمعية شعور كان لا يوصف انتابني حينذاك الرغبة الشديدة في البكاء
واعترف اني مقصرة في هذا الامر لكن ان شاء الله من الان فاعدا ساهتف به وساخصص زيارة على الاقل كل سفرية لبلدي

الطالبة عفو الله

MOHAMMED ELBANNA يقول...

أمه الله
جزاكي الله خيراً
وفعلاً العطاء هو من خير الاخلاق ويسبب للأنسان شعور رائع بالنشوه والقرب من الله .
تقبلي تحياتي
محمد البنا
طريق النجاح

المسلم الصغير يقول...

السلام عليكم ورحمة الله وبركاته...
بجد موضوع جميل وحلو قوي
جزاكي الله خير فيما تنشريه
وعلى فكرة احنا جمعية وبنعمل دة بنساعد الأيتام وكل محتاج
دومتي بخير

Dr Ibrahim يقول...

جزاكم الله كل خير...موضوع مهم
وقد تناولت فكرة العطاء للأخر فى موضوع "فرح العطاء للأخر" من هنا

أما بالنسبة لزيارة دار ايتام فهى لم تحدث صراحةً... ولكن إن شاء الله ستحدث فى يوم ما أجلاً أم عاجلاً..

وربنا يكرمنا ويكرم الجميع بجيرة رسولنا الكريم صلى الله عليه وسلم

لجين أبو الدهب يقول...

والله بوست فيه تذكرة جميلة ما شاء الله ..

وبالنسبة للسؤال
فالحمد لله كان قبل الزواج كتيييييير

بعد الزواج بسبب كثرة التنقل والسفر صعب شوية
بس بحاول فى اللى حواليا ..

جزاكِ الله خير ياحبيبتى على التذكرة المفيدة

دمتِ بخير ..

ماء تشرين يقول...

جميله انت والله ياامه الله ربنا يباركلك
يارب

انا الصراحه مش بروح كتير واتمنى اروح بس حصلى موقف المره الوحيده الرحت فيها لدار ايتام كان في ولد مش راضي يلعب معانا وبيرمى علينا تراب وبعد شويه بدا يجى يكلم معايا انا وصحبتى بس فجاه صحبتى بتبصلى لقيتى بعيط ومبقتش عارفه تسكتنى ازاى بجد يومها حسيت قد ايه ربنا ادالى نعمه كبيره اوى مكنتش حاسه بيها
بجد ربنا يباركلك

تقبلى مرورى

(Joudy) يقول...

جزاكى الله كل الخير يا مونى على موضوعاتك الحلوة بجد

بس للأسف مفيش إجابة عندى على أسئلتك لأنى مش روحت دار أيتام قبل كده بس إن شاء الله عن قريب هروح

دمتى بكل الخير والسعادة

ذكري رحيل قلم يقول...

السلام عليكم
جزاكي الله خير عل الفكرة وعلي مجهوداتك
ربنا يكرمك ويرزقك
بس والله انا عمري ما فكرت ازور دار ايتام

مش عارفة ليه
ربنا يجعلنا من اهل العطاء
امين


دمتي

spiderman ( المدونه الإسلاميه ) يقول...

السلام عليكم ورحمه الله و بركاته
انا هستعين بكمله من كلامك اني قلتها

أرى أن إعطاء المال للدار أفضل من شراء أى حلوى أو لعب لشخص بعينه

فعلا عندك حق و الله
وهو ده الى مفروض على كل الناس تعمله

بالنسبه لزياره دار ايتام
فانا بصراحه ولا مره روحت زرت اي دار ايتام خالص
انما طبعا فيه اهتمام بالأيتام الى في بلدنا
لأنه اصلا مفيش مكان محدد ليهم عندنا

بس بجد بوست جميله
و فايدته كبيره كمان
جزاكي الله كل خير

spiderman ( المدونه الإسلاميه ) يقول...

سؤال جانبي
هو احان نسمعك ازاي في المدونه الى انتي حاطها في المدونه بتاعتك
كل ما ادخل
مفيش حاجه بتفتح معايا خالص ^_^

spiderman ( المدونه الإسلاميه ) يقول...

اهداء
ــــــ

احب اهدي ليكي الفديو ده
يارب يعجبك ^_^

نهر الحب يقول...

العطاء نعمة من نعم الله عز وجل منحها لبعض عبادة
وقد حاول الاسلام تدريب المسلم عليها فى جعل الذكاء ركن من اركان الاسلام
وشرع الصدقة
ليعلمنا فن العطاء والتضحية
ربنا يقدرنا وتكون عندنا نعمة العطاء
جزاك الله خيرا

كلمات من نور يقول...

سؤال جانبى:

* هل تحرص على زيارة دار الأيتام أو تهتم بيتيم على وجه العموم؟.

* أذكر أطرف موقف حدث لك أثناء زيارتك لدار أيتام؟.

الحمد لله أحاول الزيارة و إن كان بصورة غير دورية .والحمدلله بخصوص كفالة الأيتام عني ولد وبنت أولاد سائقي ، رحمه الله ، أسأل عنهم دوما و أتعاون مع والدتهم في أشياء كثيرة أهمها أنني عاونتها في تعلم الخياطة و أهديتها ماكينة الخياطة الخاصة بي حتى تعمل و لا تسأل الناس..


أطرف موقف حصل لي مرة كنت في زيارة لدار أيتام مع جارتنا وعدة نساء ووقفت انتقد مدى اتساخ الاولاد وكيف تسرق الدادات الالعاب والطعام ومدى الاهمال وحجز الالعاب عن الاود ووووووو وإذا بجارتنا تجذبني قائلة : انتي بتشتكي وتنتقدي وتشتمي المديرة في وشها؟؟؟؟؟؟؟؟؟؟؟ضحكت من قلبي وقلتلها سبحان الله الظاهر اني كنت سبب إنها تسمع شتيمتها بودنها ..تحياتي يا جميلة القلب

أم .. بوبه يقول...

أنا فعلا أكتر شئ بيخلينى مستمتعة لما بكون بفكر أو بدور وبشترى هدية لأى شخص

سعادة لا توصف وخصوصا لو الهدية عجبته

ماما أمولة يقول...

يا أمة الله فكرتيني سبحان الله بموقف حصل لي في دار للأيتام كاد أن يقطعني

ذهبت مع زميلات لي بالمدرسة الى دار للأيتام وكانت الزيارة في الصباح

وكان كل الأطفال الموجودة بالدار لا يزيد عمرها عن الثلاث أو الأربع سنوات والباقي كانوا بالمدارس

المهم قعدنا مع الأطفال وتعلق برقبتي طفل لايزيد عمره عن السنتين
لا يأكل الا من يدي ولا يريد ان يذهب لاحد من زميلاتي على الاطلاق
كأني امه والله نايم على كتفي كأنه يرضع الحنان
جلست به ولم اتحرك من الدار الا عندما نام وونيمته بنفسي على سريره

وتركت الدار وكأن قلبي منزوع من صدري

تقديري لك اختي الغالية

لن أمدح البوست لانه اكبر من الكلمات

ليس فقيرا من يحب يقول...

طبعا جزاكى الله كل خير على كلماتك

اللى كالعاده رائعه

الصراحه عمرى ما زرت دار ايتام

الواحد مقصر قوى والله

ربنا ييسر الامور ويعينا على الطاعه

ويسعدك يارب يا حبيبتى

hamma يقول...

مجالات العطاء واسعة
ولكن
يجب حسن إختيار بين الحاجة و الإمكانيات
حتى تكون الفائدة أكثر
و طبعا بدون رياء
موضوع راق تشكر عليه

موناليزا يقول...

حصان المرجيحة
ــــــــــــــ
أهلا بيك يافندم
طالما علمت فالزم
--
أشكرك جدا لفكرتك الخاصة بانى اسامح ولذلك عايزاك تدعيلى ان ربنا ينصرنى يمكن وقتها اقدر اسامح
عندى سؤال لو تسمح
امتى فلسطين ممكن تسامح اسرائيل؟

أشكرك جدا لتعليقك ويسعدنا دوام التواصل


**********************************


ستيتة حسب الله الحمش
ـــــــــــــــــــ
أختى الحبيبة:اهلا اهلا بنبض الحكمة
ربنا يعزك يارب فماتوفيقى الا بالله
عندى فكرة
بلاش تروحى لاطفال صغيرين
فيه دار مخصصة للبنات من اول سن المراهقة وانتِ طالعة
دول اكيد محتاجين حد فى خبرتك يقف جنبهم ويساعدهم على كيفية التفكير السليم
أى خدمة:)
موضوع ريمان بقى ضغط جوايا على غريزة الامومة المفتقدة:(
نورتينى سوتيتة الجميلة واسعدنى تواجدك


*********************************


سلمى محمد
ـــــــــــ
أختى الحبيبة:اهلا اهلا بالقمر
صح جدا فالكرم ليس قاصراً على الجود بالمال فقط
ربنا يكرمك يارب واشكرك جدا لتعليقك
نورتينى سلومتى الجميلة واسعدنى تواجدك


*********************************


أبو كريم
ــــــــــ
أهلا بيك استاذ بهاء بعد طول غياب
ربنا يعزك يارب ويتقبل دعائك ولك بالمثل اللهم امين

أشكرك جدا لرايك فماتوفيقى الا بالله
:) ربنا يجازيك كل الخير على فعلك الطيب هذا
ربنا يتقبل دعائك اللهم امين
أشكرك جدا لمشاركتك
يسعدنا دوام التواصل


*********************************


همسة حب
ــــــــ
أختى الحبيبة:اهلا اهلا بالقمر
ربنا يكرمك يازوزو فماتوفيقى الا بالله
:) أسعدنى نيتك فى تخصيص وقت لزيارتهم
ملحوظة: انتِ بتغيرى اسمك على المدونة فى الفترة الاخيرة كتير ليه؟
نورتينى ياجميلة واسعدنى تواجدك


*********************************


محمد البنا
ــــــــــ
أهلا بيك استاذ محمد
ربنا يكرمك
عندك حق
أشكرك جدا لتعليقك
ويسعدنا دوام التواصل

********************************


المسلم الصغير
ـــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يكرمك يارب اشكرك جدا لرايك فماتوفيقى الا بالله
:) شئ جميل جدا
ربنا يوفقكم ويقدركم على فعل الخير دايما
نورتينى ياجميلة واسعدنى تواجدك


*******************************

د/ ابراهيم
ـــــــــــــ
أهلا بيك يادكتور
ربنا يكرمك أشكرك جدا لرايك
فعلا مقتطفات رائعة
:) ربنا يقدرك على فعل الخير
أشكرك جدا لمشاركتك
ويسعدنا دوام التواصل

***********************************


لجين ابو الدهب
ـــــــــــــ
أختى الحبيبة:اهلا اهلا بالقمر
:) الحمدلله فماتوفيقى الا به
:) تعرفى ان اجابتك هى نفسها اجابة ناس كتير
نورتينى لوجى الجميلة واسعدنى تواجدك


********************************

موناليزا يقول...

ماء تشرين
ـــــــــــ
أختى الحبيبة:اهلا اهلا بالقمر
ربنا يعزك يارب فماتوفيقى الا بالله
سبحان الله بجد
شوفتى الرسالى جميلة قد ايه
ربنا يقدرك ياحبيبتى على زيارتهم دايما
نورتينى ياجميلة واسعدنى تواجدك

*********************************

جودى
ــــــ
أختى الحبيبة:اهلا اهلا بالقمر
ربنا يعزك يارب فماتوفيقى الا بالله
أشكرك جدا لتعليقك
وربنا يحبب اليكِ طاعته ويقدرك على فعل الخير اللهم امين
نورتينى جودى الحميلة واسعدنى تواجدك


***********************************


ذكرى رحيل قلم
ــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يعزك يارب فماتوفيقى الا بالله
تعرفى لو جربتى مرة مش هتفكرى تتنازلى عن الشعور الجميل اللى هتحسى بيه
ربنا يقدرك ياحبيبتى على فعل الخير
نورتينى ياجميلة واسعدنى تواجدك


********************************


المدونة الاسلامية سبايدر مان
ـــــــــــــــــــــــــــ
وعليكم السلام ورحمة الله وبركاته
أهلا بيك يادكتور
أشكرك جدا لاتفاقك معى
وهو ده المطلوب انك تهتم بالايتام اينما كانوا:)
ربنا يكرمك ويقدرك دايما على فعل الخير
===
هو الموقع لسه فى مرحلة البث التجريبى والافتتاح سيكون قريبا بإذن الله
ووقتها سأنزل تنوية فى المدونة
وهنتظر تعليقاتكم بفارغ الصبر:)
=======
:( هو فين الفيديو ده!؟
بتضحك عليا يا دكتور
ماشى:)

أشكرك جدا لتعليقك
ويسعدنا دوام التواصل

***********************************


نهر الحب
ــــــــ
أختى الحبيبة:اهلا اهلا بالقمر
فعلا والله انها لنعمة غالية لا يشعر بها الا من تذوقها حقا
نورتينى انوسة الجميلة واسعدنى تواجدك


*********************************

كلمات من نور
ـــــــــــــ
أختى الحبيبة:اهلا اهلا بالغالية
ربنا يقدرك يارب على فعل الخير كمان وكمان

ضحكتينى بجد وجميل لمديرة سمعت:) يمكن ده يجعلها تغير حاجة
نورتينى غاليتى ويسعدنى وجودك دائما


**********************************

أم بوبة
ـــــــ
أختى الحبيبة:اهلا اهلا بالقمر
:) شوفتى بقى
أمال لو ساعدتى حد.. ياااه شعور بجد مايتوصفش
نورتينى ياجميلة واسعدنى تواجدك


*********************************

ماما امولة
ـــــــــــ
أختى الحبيبة:اهلا اهلا بالقمر
يااه ربنا يعزك يارب ويجعله فى ميزان حسناتك
نورتينى ياجميلة واسعدنى تواجدك


**********************************


ليس فقيرا من يحب
ـــــــــــــــ
أختى الحبيبة:اهلا اهلا بالقمر
ربنا يعزك يارب اشكرك جدا لرايك فماتوفيقى الا بالله
ربنا يعينا على طاعته ويتقبل دعائك اللهم امين
نورتينى ياجميلة واسعدنى تواجدك


**********************************

هاما
ـــــــ
أهلا بيك يافندم
متفقة معاك جدا
أشكرك جدا لتعليقك
يسعدنا دوام التواصل

روح طفلة يقول...

السلام عليكم ورحمه الله وبركاته
موضوعك حلو اوى يا موناليزا ربنا يباركلك يارب ويجعله فى ميزان حسناتك
وفعلا فرحه الاطفال ولابتسامه الى على وشهم تسوى الدنيا كلها لانها بتسيب فرحه فى نفسى الواحد اكتر من لاطفال نفسها
اما عن اسألتك
فالحمدلله اناوصديقه ليا متعودين دايما نروح لدار الايتام مرتين تقريبا فى الشهر
اما عن المواقف فكتييييير جدا بس الى حاضر فى ذهنى ان الولاد لما بنغيب عنهم ومانرحلهومش فى الوقت المحدد اول ما بيشوفونا بيعملوا كلهم زعلانين ويقولولنا انتوا غبتواااااا وكتبناكم فى دفتر الغياب ههههههه كاننا فى مدرسه
ربنا يكرمك ويعزك يارب ويوفقك الاى مايحبه ويرضى

فشكووول يقول...

ازيك يا موناليزا

يعنى كان لازم تضربى مثل بالمحشى الكرنب وانا ضعيف جدا قدامه وعلى فكره لازم اكل محشى بكره

بخصوص كفالة الايتام ..للاسف انا عندى مبلغ ثابت كل شهر ادفعه لدار معينه لكفالة طفل يتيم بس للاسف مش بروح ولا باعمل زيارات بس بعمل اللى ربنا بيقدرنى عليه.

spiderman ( المدونه الإسلاميه ) يقول...

ايه ده انا نسيت احط الفديو
سوري
اهو

^_^

http://www.youtube.com/watch?v=lA3QIrkp-3c


^_^

موناليزا يقول...

روح طفلة
ــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يكرمك ياحبيبتى أشكرك جدا لرايك فماتوفيقى الا بالله
:) ماشاء الله
ربنا يثبتكم يارب ويتقبل منا ومنكم صالح الاعمال
ياعسل:) ربنا يديم عليكم نعمة حبهم ليكم
نورتينى ياجميلة واسعدنى تواجدك


***********************************


فشكول
ــــــ
أهلا بيك يافندم
أنا الحمدلله بخير أشكرك لسؤالك
:) ألف هنا وشفا بس افتكر اللى عملته تعبت قد ايه وماتنساش تقولها كلمتين حلوين:)

ربنا يقدر على فعل الخير ويكفى انك فاكرهم أصلاً ومدخلهم حساباتك
ربنا يعزك ويتقبل منا ومنكم صالح الاعمال
أشكرك جدا لمشاركتك
ويسعدنا دوام التواصل



*********************************



المدونة الاسلامية سبايدر مان
ـــــــــــــــــــــــــ
أهلا بعودتك يادكتور
:) بجد جمايلك مغرقانى
الفيديو تحفة طبعا رغم انى أخذت وقت عشان أستوعب انه بجد:)
واستشهادهم بالمسرحية موفق جدا:)
لك منى خالص الشكر
وفى انتظاركم دائما

الشجرة الأم يقول...

العطاء نعمة لا يعرف قدر تأثيرها إلا من يقدرها.

أختي في الله أنا عملت مدونة جديدة باسم التدوينة السوداء للعرب ولو تودي المشاركة فيها ضد الجدران العازلة للدنيا الفانية فأرجوا زيارتها وفي آخر التدوينة ستجدي إيميلي راسلني لأقوم بدعوتك.

رابط المدونة
http://blackblogarab.blogspot.com

أحمد شريف يقول...

السلام عليكم
أدام الله أيامك كلها خير وعطاء

ورزقك حسن الثواب وحسن العافية ووكل لك من يحسن رعايتك يا محمودة الأخلاق

ممنون لموضوعك وممنون لرسالة مواساتك في حق خالتي رحمها الله

والحمد لله على ما أعطى وما أخذ

أليس في بلاد العجائب يقول...

السلام عليكم ورحمة الله وبركاته

ربنا يفتح عليكي من فضله ويزيدك ان شاء الله

يمكن في نقطة اتكلمتي عليها بيتهيألي مفيش حد علق عليها

""ممكن جدا نكفلهم وهما فى مكانهم من خلال تعليمهم وتنمية مهاراتهم.""

""-تخصيص وقت معين لهم. للسؤال عن أحوالهم ومعرفة ما إذا كانوا يواجهون مشاكل سواء صحية أو دراسية أو مع أحد فى الدار.""

مش هعلق .. النقطتين دول واضحين كفاية واعتقد انهم نادرا ما بيحصلوا

ما اسهل انك تفتحي شنطتك تطلعي منها قرشين

ما اصعب انك تفتحي قلبك تعطي مشاعر لحد محتاجها
ما اصعب تفتحي عقلك وتعلمي حد محتاج علمك

ملحوظة علي جنب كده:
الفلوس مهما كترت وكانت مفيدة .. مش باقيه
اللي باقي حاجات تانية اهم
ان البني ادم دا يكبر يبقي عضو صالح عامل في المجتمع يفيد دينه ووطنه ونفسه وغيره

اتركك في حفظ الله :)

KHALED يقول...

حينما نصل إلى درجة العطاء بدون إنتظار مقابل .. فنحن فى أرقى حالاتنا الإنسانية

شوية ورد

موناليزا يقول...

الشجرة الأم
ــــــــــــ
أختى الحبيبة:اهلا اهلا بالقمر
عندك حق
لايشعر بقيمتها الا من تذوق حلاوتها
أشكرك جدا لتعليقك
نورتينى ياجميلة واسعدنى تواجدك


*********************************


أحمد شريف
ــــــــــ
وعليكم السلام ورحمة الله وبركاته
أهلا بيك استاذ احمد
ربنا يكرمك ويعزك يارب
أخجلتم تواضعنا بتعليقكم الجميل وبدعائكم الاجمل
لا شكر على واجب أخى الكريم ربنا يرحمها ويرزقكم الصبر الجميل
أشكرك جدا لتعليقك
ويسعدنا دوام التواصل



***********************************


أليس فى بلاد العجائب
ــــــــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يعزك يارب ويباركلى فيكِ
عندك حق جدا
تعرفى انى قابلت ناس لو سألتيهم على حاجة هما متخصصين فيها يحتفظوا بالمعلومة لنفسهم وكأنها سر حربى رغم ان اللى عايز يتعلم حاجة هيتعلمها
فما بالك بقى اللى مابيطلبش أواللى مايعرفش يسأل مين
فيه ناس كتير بتنسى تزكى عن علمها
وناسين أنه من سن سُنة حسنه فله أجرها وأجر من عملها ليوم الدين
حقيقى إسلامنا عاطيلنا فرص كتير اوى بس قليل اللى بيستخدمها
أشكرك جدا لمناقشتك التى استمتع بها دائما
نورتينى غاليتى واسعدنى تواجدك



*********************************



خالد
ـــــ
أهلا بيك أستاذ خالد
الله عليك
جملة جامدة جدا
ماحرمنا الله من وجودك المتميز

salwa يقول...

السلام عليكم اخت موناليزا
و ما اجملها من متعة ,هي العطاء لله
اللهم اجعلنا ممن يسمعون القول و يتبعون احسنه
دائما مميزة بادراجاتك
تسلم يدك
سلام

موناليزا يقول...

سلوى
ــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يعزك ويتقبل دعائك
أشكرك جدا لتعليقك
نورتينى سلوى الجميلة واسعدنى تواجدك