الأربعاء، 13 يناير 2010

قابلينى على الشات

يستعد "حسين" الآن للذهاب لمقابلة "حبيبة" تلك الفتاة التي تعرف عليها عن طريق الشات.ولأن لديه خبرة كافية في هذا المجال؛ ففى بداية تعارفه عليها طلب منها أن تتحدث معه عبر الميكرفون ليتأكد من كونها فتاة وليس فتى، وحينما وافقت أخذ انطباع سريع عنها بأنها سهلة المرام، مع أنها أقسمت له بأنه أول شخص يستمع إلى صوتها في الشات روم، وبالطبع أظهر تصديقه لها. ومن خلال كلامه معها أستطاع أن يستنتج بأنها فتاة خام ليس لها أية علاقات من أي نوع، وأنها تدخل الشات لتضييع وقتها دون هدف محدد، ولا حتى أن يكون هذا الهدف إصطياد شاب للزواج به.وهذا سهل عليه المهمة وبالفعل طلب منها سريعاً وفور إيتاء الفكرة برأسه أن يقابلها لكي يتعرف عليها أكثر حيث أوهمها بأنه من خلال كلامه معها شعر بانجذاب ناحيتها، ويريد أن يوطد العلاقة. 
وتذكر رد فعلها من تردد وطمأنته لها بأن المقابلة ستتم في أية كافيه يقع اختيارها عليه.
وبالطبع وافقت "حبيبة" وحددت المكان والزمان واختيار لون الملابس الذي سيرتدونها. فقد اختارت اللون الأزرق لترتديه وطلبت منه أيضًا إرتداء طقم نفس اللون حتى يتعرفا على بعضهما البعض من خلاله.
يتذكر "حسين " كل هذا وهو يقف أمام دولابه ليختار ما سيرتدي ضاربًا اتفاقه معها عرض الحائط.
وأختار أن يرتدى الطقم البنى.
قائلاً لنفسه:" عشان لو طلعت مقلب ماشربوش واخلع بدري بدري من غير ماهي تاخد بالها،
ولو طلعت تستاهل هقولها بعد مالبست كوباية الشاى وقعت عليا."
خرج"حسين" وشاور إلى تاكسي وحدد له المكان المطلوب.
محدثًا ذاته" كان المفروض أخليها تستناني جوه الكافيه وأنا أبص عليها من بعيد مش أوافق أنها تتنتظرني أمام باب الدخول عشان ندخل سوا..بس برضه مش مهم أنا هعرف أتصرف".
وفي أثناء شروده تفاجأ بالسائق يخبره بأن هذا هو المكان المطلوب، لينظر من النافذه بجواره فيجد برميل طرشي متحرك لونه أزرق .
وهي حينما لمحته ينظر إليها أنفرجت أساريرها وهمت بالذهاب إليه قائلة" حسـ...
وقبل إنتهائها من النطق باسمه قال للسائق: معلش إطلع يا أسطى مش ده المكان.
وإنطلق التاكسي وبداخله "حسين" ولسان حاله يقول" معلش يا حلوة إبقي قابليني على الشات".
- تمت-.
*******************
# لا تصنع وهماً وتصدقه حتى لا تصطدم على الواقع المرير.
# لا أحد يبحث عن الجواهر في سلة المهملات.
**************************
رسالة للبنات محبي الشات:
ـــــــــــــــــــــــــــــــــــــ
* مينفعش تخوني ثقة أهلك فيكِ بالتحدث مع شخص غريب عنك من وراهم.حتى لو من وجهة نظرك كلام عادي لأن الكلام العادي ده مع الوقت هتتكسفي حد يشوفه. مابالك بقى وربنا مطلع عليكي وشايفك طول الوقت.
* مينفعش تضيعي وقتك فيما لايفيدك دنيا وآخرة.

* إزاي تصدقي واحد لا تعرفيه ولا عمرك شوفتيه. تضمني منين أنه كويس وابن حلال وعمره ما هيأذيكِ.بس إزاي هيخاف عليكِ وأنت ماخوفتيش على نفسك وسمحتى بأن يدخل حياتك شخص لا تعلمي عنه شيئاً.
* تفتكري لو واحد عايز يتجوز بجد هيدور على عروسة عن طريق الشات ليه!!!؟. يعني هي الدنيا والبنات الموجودين في واقع حياته بالفعل خلصوا!!. إزاي تصدقي أنه هيعجب بيكِ من غير ما يشوفك!. وحتى لو ده حصل إنسي إن الموضوع يتطور لأكثر من كده ولو تطور هيبقى يادوب ورقة عرفي ولو اتكتبت كمان.




* لو كنتِ حاسة بالفراغ ففيه مليون طريقة ممكن تشغلي بها نفسك. غير الدخول للتحدث مع ناس غرباء عنك.
حتى لو كنتِ بتكلمي بنات تضمنى منين أنهن بنات مش ولاد ولو كانوا بنات بجد تضمني منين أن أخوها مش قاعد جنبها. إزاي تديها ثقتك وأنتِ ماتعرفيهاش قبل كده.إزاي تعطي الأمان لحد كانت بداية تعرفكم على بعض: هاي.. ممكن نتعرف!.



* تفتكري لو هو شاب كويس هيلجأ للطريقة دي للتعرف على البنات!!. ولا هيكون فاضى أصلاً للكلام ده!.
تعرفي الشاب بيلجأ للطريقة دي ليه لأنها أسهل الطرق وأرخصها. ولأنه فاضي ومعندوش خوف من ربنا.
تقبلي تكوني رخيصة قدام نفسك وقدام اللي بيكلمك.
للأسف دي الحقيقة لأنك لو كنتِ حاسة إنك غالية ماكنتيش رخصتي نفسك بوجودك في مكان تثير حوله الشبهات.
* فكرتيني بالبنات غير المحجبات أو اللاتي يترتدين الملابس الضيقة أواللاتي يظهرن أي حاجة من جسمهن حتى لو رقبتهن من خلال الطرحة الإسبانش لأنهم لو شعروا بأن جسمهن غالي ما فرطن فيه ولم يجعلن أحد ينظر إليه.
* وأخيراً إعصي الله في مكان لا يراكي فيه. واعلمي أن شروط الخلوة المحرمة بين الرجل والمرأة تنتطبق تماما على الشات أو الماسنجر وبالمقابل على التليفون.
حتى زمايلك في الشغل مثلاً أو في الدراسة لو حبيتي تكلميهم يكون في أضيق الحدود وكلمة ورد غطاها زي مابيقولوا عشان ماتديش فرصة للشيطان أنه يدخل في المكالمة ويجعلك تخضعي بالقول فيطمع الذي في قلبه مرض. وبما أن القلوب المريضة كتيرة و ملهمش أعراض واضحة فخدي حذرك وبلاش الإختلاط.
واعرفي أن ربنا مش هيحرم حاجة إلا لو كانت ضارة وفيها مفسدة للجميع. فاغلقي هذا الباب سريعاً.
وبالمناسبة برضه عاوزة أعلق على حاجة خاصة بالفيس بوك واتكلمت عنها رفقة عمر قبل كده هنا.
وهى إن البنات بيضيفوا عندهم الولاد وممكن البنات دول يكونوا واضعين صورهم.
خدوا بالكم يا بنات لأن ده برضه حرااام.


سؤال جانبى:
ــــــــــــــــــــ
* أذكر موقف مشابه للقصة المطروحة؟.
====
تنويه
ـــــــــ
أدعوكم لزيارة هذا الموضوع / ضوابط العلاقة بين الجنسين على الانترنت .

هناك 63 تعليقًا:

كفايـة طيبـة يقول...

انا كنت جاية اقولك وحشتيني بس لقيت موضوع جديد
هو الموقف الوحيد اللى شوفته مشابه بتاع فيلم شورت وفانلة وكاب
لما طلعت حد تانى خالص وهو بردو لعب فى صورته D:

طيب انا نفسي الناس المعنية تقرأ كلامك ده ... مش زوار مدونتك المحترمين :)

وحشتيني بقي D:

كلمات من نور يقول...

موقف مشابه لموضوعك حصل لي : إممممممممممم
أنا الحمدلله قابلت بنات كتير ممن تعاملت معهن عبر اشات من خلال المجموعات اإسلامية والمنتديات وطبعا المدونات ولله الفضل والمنة أقدر أقول مافيش حد فيهم طلع راجل بشنبات ..علما بأن هناك ذوي النفوس الضعيفة الي بيدخلوا الانترنت على إنهم بنات وسيدات بس علشان السن بقى يا مونايزتي ولله الحمدباعرفهم من خلال أول كام سؤال وفي دقائق بيكونوا في قائمة المرفوضين دائما ودول ميزتهم لو بعتوا إيميل بتعمليهم spam or junk
مرة أو مرتين مش بيضايقوكي علشان الإيميل بتاعهم بيتمسح اوتوماتيك ...افتكرت حاجه مهمة ..مرة كنت مشرفة مجموعة إسلامية والمجموعة عيبها إن بيوصلك منها إيميلات كتير بس الحمدلله مكنتش بامرر أي رسائل ..كنت بامرر كل ما هو ديني وصحيح و الأحاديث معنعنه وصحيحةووو وفي مرة كنت عالياهوو أونلاين وواحد من الأعضاء كان عالبروفايل بتاعي وشاف إني أونلاين فوجئت برساله بتقولي : ممكن ترحميني وتبطلي تبعتي الايميلات بتاعتك أنا يهودي ...ههههههههههه ..تخيلي كتب كده وضحك بابص على بيانته لقيته مسلم وعربي ..تخيلي توصل بينا التفاهة لفين لانحطاط ديني.........حسبي الله ونعم الوكيل في اللي وصل لأولادنا إن الكمبيوتر آخره انترنت وشات ومواقع إباحية ...

ربي يكرمك يا موناليزتي ..تعرفي إني باجمع داتا عن روابط الاتصال عبر الانترنت بين الجنسين؟؟ سبقتيني و إن شاء اه موضوعي يكون تكملة لموضوعك.تحياتي 

هناء محمود يقول...

بس قمر بجد الشاب المملوح ده ده مملح مش مملوح

موناليزا يقول...

كفاية طيبة
ــــــــــــ
أختى الحبيبة:اهلا اهلا بالقمر
بجد بفرح لما بشوفك:)
وانتِ كمان ياقلبى وحشاااااانى جدا
الماسنجر عندى رافض ينطق عااااااا

:)فاكراه انا الموقف ده
وانا كمان والله نفسى:)
نورتينى غاليتى واسعدنى تواجدك
بحبك فى الله



********************************


كلمات من نور
ــــــــــــــ
أختى الحبيبة:اهلا اهلا بالغالية
:) طب الحمدلله
وفعلا بجد الخبرة والنضج بيساعدوا الواحد جدا بس ياعينى بقى على البنات اللى لسه فى اعدادى وثانوى وممكن كمان يكونوا فى ابتدائى!! وممكن برضه يكونوا فى الجامعة كمان بس معندهمش نضج كافى ولا ليهم حد يوجههم
ده فيه مهازل بتحصل:(

:) ياخبر ههههههه
تعرفى انا لو مكانك مكنتش بطلت ابعت غير لما يبعت لى الرسالة مكتوب فيها الشهادة:)
بس تعرفى لما يهودى ويطلع منه اى حاجة عادى بنبقى متوقعينها لكن الكارثة لما يبقى مسلم ويسئ لدينه بأفعاله وكلماته سواء على الشات أو غيره
وعندك حق فعلا لان النظرة المحصورة دى بتترك انطباع سلبى عند الكثيرين
:) الافكار عند بعضها
ان شاء الله تكمليه بسرعه حتى نستمتع بقراءته فنحن من الان فى انتظاره
أشكرك جدا لمشاركتك التى انتظرها دائما
نورتينى ياجميلة واسعدنى تواجدك



**********************************


أم بوبة
ـــــــ
أختى الحبيبة:اهلا اهلا بالقمر
:) دى عينة بسيطة بس من اللى بيضحكوا بيه على البنات
أشكرك جدا لتعليقك
نورتينى ياجميلة واسعدنى تواجدك

كلمات من نور يقول...

صباحكي سكر .تقبل الله صلاتنا إن شاء الله..عارفه عملت فيه إيه؟؟ أضفته لحوالي خمسة مجموعات دينية وخاصة بالصحة أنا مشرفه فيهم وخليت صديقاتي الحبيبات يضيفوه ..ويارب يكون تاب....... ههههههههههههههههههههههه

إلا يا موناليزتي تعرفي سبب مشكلة مدونتي إيه؟ كتبت بوست جديد ومحدش شايفه الكل بيحسب أخر بوست هو ما يظهر عندهم الهاص بغزة....

أُكتب بالرصاص يقول...

مافيش غير


أحسنت

SHAPE YOUR LIFE (ABOALI) يقول...

اى حاجة فى الحياه ليها مميزاتها ولها عيوبها

من قال ان العيوب اكثر من الميزات
ف له حقه ويبتعد
ومن قال ان المميزات اكثر من العيوب
ف له حق
كل هذا تحت عباءة الدين ومبادئه

الشات مثله مثل اى شىء

وسيلة ان اسيىء استخدامها فهذا ليس معناه ان الوسيلة حرام والكلام الكبير المذكور
وده مثال حى لوجود السكين فى بيتك من بنى النساء من يستخدمها فى قطع رقاب ازواجهم ومنهم من يستخدمها فى الكوسة والمحشى والبصل

الكلام بهدذا الشكل عن الشات يعتبر كلام مرسل
يدخل تحت بند عموم الكلام او اداب استخدام الشات
وليست هنا لكى ادفع عن الشات وفوائده
او مساؤه
ولكن لكل شيىء مميزات وعيوب
ولا غلط على الوسيلة فى حد ذاتها ان اسيىء استخدامها

هناك من بحث عن الشوك فى الشات
قبل ان يبحث عن روائح الورد


هناك من يكتب فى مدونته كلام يستطرد فيه
اشد من الشات وتعرفى عنه كل شيىء بدون حتى ان تقولى

ممكن نتعرف ؟


للحياه وجهات نظر
لم يتفق فيها الخلق على الله وعظمته
ويعيشون بيننا


وقاااااااااابلينى على الشات

أبو كريم يقول...

يا أمة الله أكرمك الله وهداك وثبت على طريق الحق خطاك

والله العظيم الموضوع ده رائع لانه مرتبط بينا كلنا وأكيد حصل مع حد منا بطريقه أو بأخرى.. والتوعية الى عملتيها دى ياريت كان حد قالهالنا من 7 أو 8 سنين أو ما دخلنا دنيا الشات.. هحكيلك حاجه بس شعرا على موقف حصلى من 7 سنين كده


مطلقـــــه وسكرتيره وليست بالجامعه
ولا تدرس الهندسة أو بالسنة الرابعه
سبعة فوق العشـــريين ولكن الفاجعه
بعد ان أدت دورهــا وأزالت الأقنعه
مــــــازالت تدعى أنها فى حبى واقعه
شكـــــــرا لهذا الدرس ممثلة رائعه
غدا ألقاك بيوم حر فى السماء السابعه
يـــــــــــــوم توفى كل نفس ماكسبت
وليس لهـــــــــــا من دون الله مانعه



أبو كريم

khalid almuzaiqer يقول...

مرحباً
موضوع جميل ورائع يكاد لا يخلو من قصص واقعية في حياتنا اليومية
فالتعرف على النت بات رهن مستقبل البعض وفرصة من الفرص التي لا تُفوت هذا في نظرهم
سلمت الأنامل خيتوو على هذ الطرح
تقبلي مروري المتواضع
وأتمنى بأن لاتحرميني من زيارتكي لعالم الحب
لكي أرقُّ المٌنى من عالم الحب
----------------------
مدونة عالم الحب
http://www.al7ob1.blogspot.com/

محمد حمدي يقول...

سؤال الحلقة
اذكر عشر دروس مستفاده من هذا البوست .. تكسب رحلة حج مجانية

شمس النهار يقول...

بصراحه تسلم ايدك
علشان الموضوع ده عامل مشاكل كتير جدا جدا
من خلال مجلةرؤيه وصلني كم من المشاكل لاحصر لها بسبب الشات

افظع واحده اللي كانت بين ام عملت نفسها شابه وابنها الصغير اللي عمل نفسه شاب

بجد انا جاني زهول هتلاقي القصه في عدد الاسبوع الماضي اعتقد في باب شمس ودفا

سلامي

لجين أبو الدهب يقول...

حتى لو كنتِ بتكلمى بنات تضمنى منين أنهن بنات مش ولاد>>

دى فعلا المشكلة
ان النت اصبح عالم وهمى خداعى بالدرجة الاولى للاسف

لذلك مفروض ما تتحطش اى ثقة فى هذا الشئ ..

جزاكِ الله خير على التذكرة حبيبتى ..

مهمة جدا بجد ..

ياريت كل البنات يعوا..

دمتِ بخير حبيبتى ..

ستيتة يقول...

والله صعبت علي برميل الطرشي :)
بس غريبة
اللي ما طلب منها تفتح الكاميرا يعني؟
ربنا يلطف بينا
ومهما تقولي ومهما تهاتي تظل التجربة الشخصية هي اللي ها تعلم كل شاب وكل فيتاه
بس ربنا يلطف وتكون تجربة هينة وليس لها توابع زلزال
مساء الفل يا مونا

(المهاجر الى الله) يقول...

السلام عليكم ورحمة الله وبركاته :
ايه كمية الغش والكذب والخداع دى . هوه احنا بنى ادمين وللا حاجة تانية ، اعوذ بالله .
بس فعلا حقيقى وكل الكلام ده حصل وبيحصل ولسة هيحصل برغم ان كتيييييير جدا من البنات عارفة الالعيب دى كويس ويمكن تكون انكوت مرة وللا اتنين الا انها مش بتحرم للاسف الشديدومش بتاخد موعظة ، انا حقيقى مستغرب من البنت اللى بمنتهى البساطة تتكلم مع شاب متعرفوش ومتعرفش عنه اى حاجة وحتى لو تعرفه المهم انها لايجوز لها انها تتكلم معاه وفى امور مينفعش تتكلم فيها مع اختها مش مع صاحبتها . واستغرب بل واكاد اجن عندما اسمع احداهن يتحججن بانهن يبحثن عن ازواج واعجبتنى كلمتك الرائعة ( هل نبحث عن الجواهر فى سلة المهملات ) اهل نسيت هذه الفتاه ان ذلك الشاب لابد وان تعرف على العشرات قبلها وانها لن تكون الاخيرة ، الم تعى ان الطيور على اشكالها تقع وان الطيبين للطيبات والخبثين للخبيثات.
وحتى لو هتصدق الشاب اللى بيكلمها ده تضمن منين انه مش بيسجل المحادثات دى وممكن يستغلها بشكل يضرها ابلغ ضرر
وعلى فكرة مفيش شباب كويسين اصلا بيدخلوا غرف الشات مطلقا .
شكرا لك اختى الفاضلة على هذا البوست الرائع ، الحقيقة اننى كنت منذ فترة اود ان اكتب فى هذا الموضوع مقالا مطولا لما رايت فيه من عظم المصيبة وتضخم الكارثة ، فقولت اعمل اللى عليا واحذر بقدر المستطاع لكنك قمتى بالواجب بارك الله فيكى .

♥نبع الغرام♥♪≈ يقول...

السلام عليكم
اختى وحبيبتى الجميله مونليزا
اخبارك ايه وحشتينى اووى متشكرة لسؤالك عنى فى فترة مرضى
الحمد لله بقيت احسن شويه
ربنا يديم الود بينا يارب ويكرمك خير

//

//

موضوعك جميل وحصل معايا انا شخصيآ ومع بنات كتير
وكلنا لو كنا اتكلمنا لان الشخص اللى قدامك تحسى بكلامه انه محترم ويجبرك على كده وانا للاسف صدقت
عامة حصل خير
واللى بيتألم بيتعلم
وأنا اتألمت واتعلمت حبيبتى والحمد لله معتش بثق فى اى حد مهما يكون
وبالنسبه للكمبيوتر الحمد لله مش اساسى بحياتى خالص لانى بشتغل ومش فاضيه اقعد كتير وشغل البيت وكده
الحمد لله ربنا يكفينا شر الحاجات الوحشه ويبعد عننا الشر اللهم امين يارب
وربنا ينصرك على من ظلمك حبيبتى
//
//


منتظراكى عندى عشان عملت بوست عن اليتيم
سلامى ليكى ياقمرى
ايناس

مرايتى يقول...

جزاكى الله خيرا موناليزا

وفعلا دى بقت مشكله كبيره جدا وكتير من البنات بتقع فيها بس إزاى أنا حعرف حد من مجره كلامه وكمان من ورا شاشه عمر الكلام ما بيبين أخلاق حد وفعلا اى بنت تصدق حد من ورى جسم صلب زى الى بنعد قدامه تبقى مش بتفكر صح
وشفت بنت خالت واحده صحبتى حبت حد من على النت وهو من لبنان بس هو كان بيتكلم جد وفعلا نزل مصر وارتبط بيها بس بعد معاناه لان اهلها ماكانوش موفقين بس هى صممت بس للأسف مش مرتاحه فى حياتها لانها دنيا تانيه وحياه تانيه واكيد الى عرفته من كلامه بس على النت او التليفون غير الى عاشرته بجد
وكتير بنات بتتعلق بشباب من غرف الدردشه بس فعلا بجد هى الى قلبها بيوجعها فى الاخر لانها استسلمت وزى ما بتقولى مثلا بتبقى اول تجربه بس هو بيتسلى وبس وحتى الى ما بيتسلاش الاهل ما بيوفقوش عليه يعنى فى الاخر برضه هى الى خسرانه يبقى الاحسن انها تتجنب ده مرضاة لله اولا وخوفا على نفسها ثانيا وحفاظا على ثقة اهلها ثالثا
تحياتى ياقمر

*همسة حب * زوزو يقول...

وحشاني يا حبيبتي
موضوع جميل فعلا و يا رب كل الناس تستفيد منه
في بداية دخولي للنت حصلولي مواقف كثيرة كنت على نياتي و لسة مش دارية بخداعات النت ياما تعرفت على بنات و طلعوا مش بنات ولاطلعوا بنات نص نص
بس دلوقتي اختلف الامر بقيت اعرف ازاي اعرف الي معايا بنت فعلا و لا شاب بيمثل عليا دور البنت المحترمة
و يبقى النت ليه سلبيات و ليه
اجابيات و الواحد لازم يتعامل معاه بحذر كبير اوي
و الله المستعان
و ربنا يهدي العباد

الطالبة عفو الله

د/عرفه يقول...

السلام عليكم

فى البداية
اشكرك على ايجابيتك فى المشاركة على المدونة واتمنى اعرف رايك دايما بصراحة


بالنسبة للموضوع ده
شائك جدا
ومتفق معاكى فى اغلب الاشياء

والشات فعلا من اخطر الاشياء لان الشباب بيتعاملوا مع الموضوع بسهولة شوية وتحرر لسبببين اولا احساسهم انهم لوحدهم ومفيش حد شايف وكمان ولاشباع بعض الغرور لديهم واحساسهم بانهم مرغوبين لدى الطرف الآخر


فى الباية انا مش بحب الشات ابدا وعمرى ما اقدر اكلم حد شات اكتر من ساعة ده فى افضل الظروف وتقريبا مش بيحصل ألا نادرا


بالنسبة للفايس بوك
هو اكتر منطقة شائكة بصراحة
لكن يمكن استعماله بشكل سريع ومتنوع واسهل كتير من المدونة كمان
ووسيلة للتفاعل
ولكنه يبقى شائك جدا فى التعامل مع الجنس الاخر
عن نفسى
اه انا بضيف ناس من الجنسين عادى
ولكن لان عندى شعب يعنى عدد كبير فانا بتعامل بحيادية جدا مع الجميع وبحاول ابعد عن اى موضع شبهة وبحاول لما بضيف مش بضيف اى حد بضيف ناس محترمة
والفايس بوك يكون وفق سلوك اصدقائك
ممكن استحضار النية فى الدعوة وكده ممكن يكون مقبول


وعن نفسى لا انصح اى بنت باضافة شباب
وان اضافت شباب فلتحذر جدا ولا تضيف اى شخص وتنتقى المحترم منهم جدا وتتحاشى الكلام المباشر اى الشات مع اى منهم


يعنى مثلا
انا عندى كتير من الاخوات اصحاب المدونات تعاملى معاهم على الفايس بوك زى المدونة تمام وهكذا
وضح مدى احترامهم على الفايس بوك زى المدونة

يعنى الموضوع ليس سىء بالكامل
بل يمكن ان يكون مجال دعوى كبير فقط استحضار النية



بالنسبة لموقف شخصى ممكن فى كمان شوية اقولك بس هعلق بغير معرف

حمـــــــــــــــــــــة يقول...

هذا جزء مما يحدث و يتكرر كثيرا
مآسي حقيقية ظهر بعضها على الملأ
ولكن سرعة تطور الأمور وصلت الى حد لا يعقل
آخر ما ظهر :
أحدهم أو أحداهن تنشأ صفحة على النت بإسم معروف و مقرب لها تكون نسخة مشابهة الى أبعد الحدود...البروفايل ..و..و..وو
و تدعوا جميع الأصدقاء و الصديقات الموجودين في الصفحة الأصل بحيث تنطلي الحيلة و هنا تصور ما يحدث
فتاة تتصرف بطلاقة مع صديقتها أو صديقها و ترسل له صورها كما تتحدث على جزئيات خاصة بعائلتها أو أكثر من ذلك...و ما إليه
أو تلصق بالصفحة الشبيهة (......)
فيصبح صاحبها أو صاحبتها في ورطة لا قدر الله
موضوع كبير و من محدثات الساعة
أرجوا من الجميع أخذ الحيطة و الحذر كما يجب تنبيه الغافلين والغافلات
شكرا

محمد يقول...

السلام عليكم ورحمة الله وبركاته
أختنا العزيزة .... موناليزا
دوما كلماتك تطرح إما خير أو تحذر عن شر ... وجميل ما بها ذلك الأسلوب الساخر علي أي حال اشتقنا لموضوعاتك النبيلة ولا تنس أخ لك في الله من دعاء بظهر الغيب

فضه يقول...

اتفق بالفعل مع حضرتك بان السلبيات فى الشات كبيره جدا وخصوصا اذا تطورت العلاقه وتكرر الحديث .ولكن هناك جزئيات ارى انه لابد ان نكون لها مدركين بعمق اكثر وهو ان الشات ليس الا وسيله لتبادل الافكار بين الناس ....اساسه هو التعارف على الفكر والسمو فى التعامل ولكن هذا لمن يدرك ويفهم غرضه مثله كمثل المدونات فانتى تعرضين وجهه نظرك وافكارك من خلال مدونتك وكلماتك وهذا يكفى بان احترم فكرك واعرف معدنك وخصوصا اذا داومت قراءه موضوعاتك وليس من المهم ان اعرفك شخصيا كى احترمك وكذلك اذا تحدثتى من خلال الشات لفتره قد تجدى اناس يستحقون الاحترام ايضا ولست معكى فى ان كل من دخل على الشات ليس بواع او محترم ...فكثير من الناس قد دخلوه لاول مره للمعرفه ليس اكتر وحب الاستطلاع ومن خلاله تعرفوا على بعض الشخصيات التى اثرت فكرهم وساعدتهم فى فهم الحياه اكثر واكثر وانا من ضمن هؤلاء الذين خاضوا هذه التجربه ولكن لم اخوضها بمفردى ولكن مع مبادئى واخلاقى وووعيى فى التمييز بين البشر واثبتت ليه الايام ان هناك بالفعل اناس على الشات يستحقون الاحترام وطالما انا من احترم نفسى وارى نفسى متميزه دخلت الشات من قبل فاكيد هناك الكثير مثلى حتى اذا كان الجانب السلبى اعم واشمل.
من الناس ايضا ممن احدثهم يملكون مدونات وفكر راقى ويملكون اسرهم وبيوتهم ولا يدخلون للتحدث فى التفاهات.
ما احب توضيحه لكى سيدتى الا تعممى فى حديثك وتناولى دائما الموضوع بشتى جوانبه ولا تنتقصين من اخلاقيات اناس انتى لا تعلميها بشكل كامل ولتكن موعظه بوعى وادراك اكثر لواقع الحياه وتعدد الشخصيات والفكر فى المجتمع .
عذرا لاننى قد اطلت عليكى ولكن كنت فقط احب توضيح وجهه نظرى
شكرا لطرحك موضوع هام مثل هذا .

Unknown يقول...

بارك الله فيكي سيدتي
دائماً حروفك وتدويناتك ذات اهداف نبيلة
اسأل الله ان ينفع بكِ من حولك

ذكرى رحيل قلم يقول...

السلام عليكم
اوعي اخوكي يكون جمبك لما كنت بكلمك

هههههههههههههههههههههههه

ازيك عاملة ايه

يا بنتي ع الفيس بوك كل حاجة باردتك يعني يتبعتلك صورة ولد ويقوللك ممكن نبقي صحاب حاجة كدة دمها تقيل عادي مفيش حاجة بقت ممنوعة كله مباح
الحمد لله انا لسه ماليش في الفيس بوك
ابعتلي دعوات كتيرة بس انا مش بحب اشترك فيه
انا فاضية

موضوع جميل وكتبت فيه من قبل بس كان موضوع طويل قوي ممكن تعرضي مساويء الشات ومميزاته في الحلقة القادمة

دمتي بخير

ذكرى رحيل قلم يقول...

بس ع فكرة انا واثقة فيكي

وده احساسي والحمد لله

وعمر قلبي اللي هو دليلي ما كدب عليا

وانت عاملة ايه دلوقتي

صح
ولا ايه

كلمات من نور يقول...

هاهي المقال:

ضوابط العلاقه بين الجنسين على الانترنت.

http://mamanooor.blogspot.com/2010/01/blog-post_13.html

عايزين بعد كده واحنا نجمع معلومات البوست اجديد نتشاور هههههههههههه

موناليزا يقول...

كلمات من نور
ـــــــــــــــ
أختى الحبيبة:اهلا بعودتك ياقمر
:) مسائك سكر زيادة وتقبل الله منا ومنكم صالح الاعمال
هههههه والله عسل وشاطرة بجد
ينصر دينك:)
ثوانى وهجيلك ياقلبى ولو ان ثقافتى فى المواضيع دى مش قد كده خالص:)
نورتينى غاليتى واسعدنى تواجدك


********************************


أكتب بالرصاص
ــــــــــــ
أهلا بيك يافندم
أشكرك جدا لتعليقك
يسعدنا دوام التواصل


*********************************

ابو على
ــــــــ
أهلا اهلا بصاحب التعليقات المميزة
مفيش شك فى ان كل شئ له مميزاته وعيوبه ولكن للاسف فى مجتمعنا نبحث عن المساوئ فقط لنستخدمها
أشكرك جدا لتعليقك
يسعدنا دوام التواصل


********************************


ابو كريم
ــــــــــ
أهلا بيك استاذ بهاء
ربنا يعزك يارب اشكرك جدا على بداية التعليق وعلى رأيك
:) كلمات مختصرة ولكنها أدت المعنى بإجادة
وتبقى التجربة خير معلم
أشكرك جدا لمشاركتك
يسعدنا دوام التواصل


*********************************

عالم الحب
ـــــــــ
أهلا وسهلا فى زيارتك الاولى
أشكرك جدا لرأيك ولتعليقك
نورت مدونتى ويسعدنا دوام التواصل


**********************************


محمد حمدى
ــــــــ
أهلا بيك أستاذ محمد
لو الجايزة مضمونة هجاوب حالا:)
يسعدنا دوام التواصل


*********************************


شمس النهار
ــــــــــ
أختى الحبيبة:اهلا اهلا بالقمر
أشكرك جدا لرايك
فعلا الموضوع زاد جدا بس ارجع واقول الغلط فى الاول وفى الاخر على البنت لان استحالة حد هيقرب منها اصلا الا لو هى سمحت له بكده
ربنا يقويكِ ياحبيبتى ويقدرك على حل مشاكلهم
نورتينى شموسة الجميلة واسعدنى تواجدك


**********************************


لجين ابو الدهب
ـــــــــــــ
أختى الحبيبة:اهلا اهلا بالقمر
ربنا يكرمك واشكرك جدا لرايك ولتعليقك
نورتينى لوجى الجميلة واسعدنى تواجدك


********************************


ستيتة حسب الله الحمش
ــــــــــــــــــ
أختى الحبيبة:اهلا اهلا بنبض الحكمة
:) أكيد طلب وهى حبت تعملها له مفاجأة
فعلا عندك حق لان كل واحد بيبقى مفكر نفسه عنده حصانة من الوقوع فى أى خطأ
بس للاسف اكيد بتترك اثر سئ وسلبى لدى الشخص المخدوع سواء كان ولد أو بنت

مساءك سكر زيادة ياقمر
نورتينى سوتيتة الجميلة واسعدنى تواجدك


**********************************


المهاجر الى الله
ـــــــــــــ
وعليكم السلام ورحمة الله وبركاته
أهلا بيك أستاذ طارق
عندك حق فى كل ما قلت
ولذلك علينا ان نحرص على التذكرة من آن لآخر وهذا يعنى انتظارنا ما ستكتب:)
أشكرك جدا لتعليقك
يسعدنا دوام التواصل


*********************************


ابتسامة ملاك
ــــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
حمدالله على سلامتك ياجميلة والف بعيد الشر عنك
أنا الحمدلله بخير ماتحرمش من سؤالك الذى افتقدته فى فترة غيابك

فعلا تبقى التجربة خير معلم
ربنا يسعدك يارب ويرزقك بالزوج الصالح اللى يستاهلك بجد

:) جايالك حالا لو اتأخرت اعذرينى لأن النت بيفصل كتير اليومين دول
نورتينى انوسة الجميلة وكنتى واحشااااااانى جدا ويارب اسمع عنك دايما كل خير


**********************************


مدونتى اسمها مرايتى
ـــــــــــــــــــ
أختى الحبيبة:اهلا اهلا بالقمر
ربنا يكرمك يارب
عندك حق فعلا
أشكرك جدا لمشاركتك
نورتينى ياجميلة واسعدنى تواجدك


*********************************


همسة حب
ــــــــــ
أختى الحبيبة:اهلا اهلا بالقمر
وحشاانى يازوزو أخبارك ايه ياحبيبتى

أشكرك جدا لريك ولمشاركتك
نورتينى ياجميلة واسعدنى تواجدك


********************************

د/عرفة
ــــــــ
وعليكم السلام ورحمة الله وبركاته
أهلا بيك يادكتور
لا شكر على واجب يافندم حضرتك اللى طلبت رأينا بصراحة:)

أشكرك جدا لاتفاقك معى فى بعض الاشياء وفى توضيح وجهة نظرك
ونصيحتك للبنات غالية جدا يريد يسمعوها وينفذوها بجد

وفعلا متفقة معاك انه ممكن يكون مجالا للدعوى بس المهم النية تتجدد دائما عشان الشيطان مايغلبناش

هنتظر الموقف بس مش هنشر التعليق لانى مش عاملة تعليق للغير معرف

أشكرك جدا لمشاركتك
يسعدنا دوام التواصل


*********************************


هاما
ـــــــ
أهلا بيك يافندم
فعلا انتشار هذه الاشياء مؤسف ومحزن على تدهور الاخلاقيات
فلننتظر قدوم الساعة
وكما قال النبى صلى الله عليه وسلم حينما سئل متى الساعة
فقيل" إذا ضيعت الامانة فانتظروا الساعة"
أشكرك جدا لتعليقك
ويسعدنا دوام التواصل

موناليزا يقول...

هذه حياتى
ــــــــــ
وعليكم السلام ورحمة الله وبركاته
أهلا بيك يافندم بعد طول غياب
ربنا يكرمك فما توفيقى الا بالله
ربنا ييسرلك جميع امورك ويهيئلك الخير حيثما كان ويرضيك به
أشكرك جدا لتعليقك
يسعدنا دوام التواصل


********************************

فليسيتى
ـــــــ
أهلا وسهلا
اتفق معاك جدا فى وجهة نظرك ففعلا الغرض الاول هو تبادل الافكار ومناقشة العقول
ومعاك طبعا فى ان صاحب المبادئ بياخدها معاه اينما ذهب ولكن من يملكونها قلة
وتصحيح بس لم أقل ان اللى بيدخل غير محترم
ولكن كلامى معناه ان هناك بنات كثيرين بيتضحك عليهم بكل سهولة ويسر
أشكرك جدا لرايك ولمشاركتك
ويسعدنا دوام التواصل


*********************************


مستر/ حازم
ـــــــــــــ
أهلا بيك استاذ حازم
ربنا يعزك يارب فما توفيقى الا بالله
أشكرك جدا لتعليقك
يسعدنا دوام التواصل


***********************************


ذكرى رحيل قلم
ـــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
:) اطمنى ياقلبى مش انا اللى اعمل كده
حتى لا ينطبق علىَّ قول الله تعالى "أتأمرون الناس بالبر وتنسون أنفسكم...."

أنا الحمدلله بخير ماتحرمش من سؤالك
انا فاكرة موضوعك ده
بس انا مش عاملة الحلقة القادمة عن الشات:)
---
وانا كمان واثقة فيكِ وحاسة انى اعرفك من زمان كمان:)
ربنا يديم الحب بينا
نورتينى ياجميلة واسعدنى تواجدك


***********************************


كلمات من نور
ـــــــــــــ
أختى الحبيبة:اهلا بعودتك ياغالية
هضيفه حالا للبوست
:) يكون لى الشرف طبعا
نورتينى غاليتى واسعدنى تواجدك

غير معرف يقول...

جزاكم الله خيرا على هذا الطرح الممتاز
على الانترنت سواء الشات أو المنتديات
كله بيضحك على كله على رأي ماما

غير معرف يقول...

هذا تعليقي عند كلمات من نور:
جزاكم الله خيرا
علقت لدى موناليزا
و أرى أنكم تقومون بجهد فعال بإذن الله
و لو إني لا استخدم الشات أو المنتديات
لكن يبدو أن الموضوع صار متفغللا في عقول الشباب و المراهقين في غياب الرقابة،لانه في الانترنت كله بيضحك على كله كما تقول أمي.
*****
أريد توضيح نقطة أخرى و هي أن التعاملات الرسمية و العملية العادية بين الرجال و النساء على النت لا ينبغي التحرج منها. على سبيل المثال تبادل الملفات و الابحاث بالإيميل. فهي تدخل مثل المعاملات العادية اليومية. و الأصل في الأمر الإباحة.
****
مع تحياتي

شوكولاتة يقول...

ماشاء الله عليكي بوستاتك تحفة وهادفة جدا
بارك الله فيكي

ووحشتيني جداااااا جداااااااااااا
وميرسي قوي على الهدية الجميلة

تحياتي

موناليزا يقول...

سونيت
ـــــــ
أختى الحبيبة:اهلا اهلا بالقمر
ربنا يكرمك واشكرك جدا لرايك ولتعليقك عندى وعند كلمات من نور
ومتفقة معاكِ طبعا فى ان يستخدم للضرورة
نورتينى ياجميلة واسعدنى تواجدك




********************************



شوكلاتة
ـــــــ
أختى الحبيبة:اهلا اهلا بالقمر
ربنا يعزك يارب فما توفيقى الا بالله
وانتى كمان ياقلبى وحشانى جدا وماتغيبيش علينا كتير كده تانى:)
وكل سنة وانتِ طيبة وجميلة ومحبة للاخرين
نورتينى شيكو الجميلة واسعدنى تواجدك

الفقيرة إلى الله أم البنات يقول...

اى شئ فى الدنيا يجب ان يتم من خلال حدود
وللاسف غياب الاسرة جعل الاولاد شباب وبنات يتصرفوا كيفما يشاءوا
اكثر شئ يضايقنى من ما اره على النت بجانب موضوع الشات وحوارت الحب والهيام والكلام الغير مستقيم
ان تجدى الشاب او الفتاه يتصرف على اساس انه ملتزم فيثق فيه الناس
ثم يمارس حقيقته او تمارس حقيقتها
بالغش والضحك على الآخرين
وفرض النفس واقتحام حياتك لانك خلاص فاهمه انى بنت كويسه ملتزمه أو شاب على خلق
بجورا موضوعك وموضوع كلمات من نور
احذر البنات ان لا يدخلن فى صدقات مع فتيات مثلهن حتى يتأكدن من النوع

ولا يسمحن لأى شاب ان يدخل فى حوار جانبى بأى ححجه
ولا انيسمح اى شاب لأى بنت ان تستدرجه فى الحوار
الحرام على النت هو نفسه الحرام فى الحياه العاديه


شكرا على التذكرة

حصان المرجيحة يقول...

موضوع رهييييب
و والله كلامك صح و ماعرفش البنات ليه بيفرطو في نفسهم بسهولة
فين الحياء و التقل اللي البنات بيتوصفو بيهم
موضوع بجد ممتاز

salwa يقول...

السلام عليكم
نعم اخت موناليزا الامر يحتاج كثير
من الدراية و الوعي
جزاكي الله كل خير
ووفقنا الله لما يحبه و يرضاه
سلام

SAMS-1990 يقول...

كلام موزون جدا

و كمان الكاريكاتير متنقى و بيتكلم لوحده

مع تحياتى

فارس الرومانسيه حسين فهمى اﻷصلى

ههههههههههه

Dr. Ibrahim يقول...

الموقف اللى انا عشته واحد بيحكيلى ان كان واحد بكيلم واحده نفس الموقف بالظبط
بس كان واخد فى باله انه هيسوى الهوايل مع الفتاة بس البنت مطلعتش برميل طرشى ولا حاجة طلعت جايبة اهلها والبوليس ولفقوله تهمة وجوزهم فى قسم الشرطة
والالعن من الشات مواقع الزواج اللى بيحط فيها البنات والفتيات صورهم او ممكن تكون صور لأى حد بس بيكون شكله حلو او اى حاجة وايضا الشباب ..
بس كل دا كلام فاضى هو زى ماحضرتك قلتى اللى عايز يتجوز هيتجوز من النت
"تخيروا لنطفكم فإن العرق دساس"
المحترم ميتكلمش مع البنت اساس على الشات او فى الحقيقة اللى عايز يتجوز وعارف بنت فلان ذات دين يروح ويخبط على الباب..ماهى لو قابلته مرة معناها ممكن تقابل غيره وهكذا..

ربنا يهدى بنات وشباب المسلمين.

ماء تشرين يقول...

موناليزا كنت عايزه اعرف كمان رايك في مواقع الزواج والانتشرت بشكل كبير ايه رايك فيها

اما بالنسبه لكلمك عن الشاتينج اعتقد انو دلوقتى ممكن تلاقى في ولاد عندهم 12 13 سنه تخيلى وممكن يكلموا حد اكبر

اما موقف فاانا هقولك على حتت موقف صدمنى الصراحه جدا وحده كانت زميلتى ايام الكليه وكانت بتدخل شاتينج اتعرفت على واحد وقصه حب عظيمه ياعنى وقبلتو وكده وحصلت مفجأه واحد يعرفه المهم ياعنى الولد ده طلع مسيحي وهى بنت مسلمه محجبه بس

تقبلى كل الود ومستنيه ردك

ليس فقيرا من يحب يقول...

السلام عليكم

ازيك يا مونى ياقمر

دايما موضوعاتك جميله وهادفه

هيبقى النت زيه زى حياتنا فيه

الكويس وفيه الوحش

ولازم كل واحد يخلى باله من نفسه قوى

من ناحيه السؤال انا شفت كذا حد من معارفنا

اتعرف واتجوز من النت منهم واحد جارنا

اتعرف على فلسطينيه وخطبها وكان لسه

العفش بتاعبهم جايبينه من يومين

بس برده قريت فى موقع اسلام اون لاين

مشاااااااكل كتير جدا جدا بتحصل من

الشات

ربنا يحفظنا ويسعدك يا قلبى يارب

وحشااااانى يا قمر

موناليزا يقول...

الفقيرة الى الله ام البنات
ــــــــــــــــــــــــ
أختى الحبيبة:اهلا اهلا بالقمر
للاسف ده حقيقى فدور الاباء اصبح مقتصر على جلب المال وخلاص على كده
متفقة معاكِ جدا فالنت لا يخلف كثيرا عن العالم الواقعى فهو ايضا يحتوى المنافقين واصحاب الوجوه المتعددة
أشكرك جدا لتعليقك
نورتينى حبيبتى واسعدنى تواجدك


*********************************


حصان المرجيحة
ــــــــــــــ
أهلا بيك يافندم
بسبب الكلمة التى ظهرت فى مجتمعنا مؤخراً وهى"عادى" أى حد تقوله اى حاجة دلؤتى يقولك عادى هى فيها ايه!!
أشكرك جدا لتعليقك
يسعدنا دوام التواصل


*********************************


سلوى
ـــــ
وعليكم السلام ورحمة الله وبركاته
أختى الحبيبة:اهلا اهل بالقمر
عندك حق
ربنا يكرمك ويتقبل دعائك
نورتينى حبيبتى واسعدنى تواجدك


**********************************


سمس 1990
ـــــــ
أهلا وسهلا
أشكرك جدا لرايك
نورت مدونتى ويسعدنا دوام التواصل


*********************************



د/ ابراهيم
ـــــــــــــ
أهلا بيك يادكتور
:) معقول!! ده بجد!
بس يستاهل هو اللى جابه لنفسه
صدقت
كل شوية يطلعوا بحاجة جديدة واغراءات للشباب وفعلا ربنا يهدى
اشكرك جدا لمشاركتك ويسعدنا دوام التواصل


*********************************


ماء تشرين
ــــــــــ
أختى الحبيبة:اهلا اهلا بالقمر
رأيى فى مواقع الزواج مش مختلف كتير عن رأيى فى الشات
وبعدين ايهما اسهل للى عايز يتجوز انه يدور على النت ولا يدور على حد فى محيطه!!

فعلا اذا كانوا العيال فى ابتدائى كمان وشغالين شات وفيس بوك وعادى جدا وطبعا بيقولوا ان سنهم اكبر من كده!

:) غريبة فعلا يعنى حبوا بعض واتكلموا فى كل حاجة الا الدين!!!

أشكرك جدا لمشاركتك ولتعليقك
نورتينى ياجميلة وفى انتظارك دائما


***********************************



ليس فقيرا من يحب
ــــــــــــــــ
وعليكم السلام ورحمة الله وبركاته
أنا الحمدلله بخير ماتحرمش من سؤالك
إزيك انتِ يا جميلة

ربنا يعزك يارب فماتوفيقى الا بالله

هو فعلا على النت فيه وفيه وبيحصل احيانا زواج ولكن نسبة قليلة جدا التى تستمر

نورتينى حبيبتى واسعدنى تواجدك
بحبك فى الله

KHALED يقول...

للأسف دة فعلاً بيحصل

جزاكي الله كل الخير على طرح الموضوع

هي وظروفها يقول...

اللي يظلم نفسه

سهل يظلم اي حد

كلامك صح مليون في الميه

تحياتي ليكي

Ahmad يقول...

نعم كلام جميل ورسالة اجمل ,,,,
بارك الله فيك
تحياتي اخوك احمد

Dr. Ibrahim يقول...

أيوه بجد..لأن اللى اتجوز الجوازة دى..صاحب صحبى فمش معقولة صاحبى يكذب عليا يعنى!

موناليزا يقول...

خالد
ـــــــــ
أهلا بيك استاذ خالد
الغريب ان المفروض البنات يبقى عندها وعى اكتر من كده وخصوصا فى ظل انتشار الاعلام ووسائله اللى بتتكلم كتير عن المواضيع دى.
أشكرك جدا لتعليقك
يسعدنا دوام التواصل



********************************


هى وظروفها
ـــــــــــــ
أهلا وسهلا فى زيارتك الاولى
قصدك سهل يتظلم من اى حد
أشكرك جدا لتعليقك
نورت مدونتى وارجو دوام التواصل



***********************************


أحمد
ـــــ
أهلا بيك أستاذ أحمد
ربنا يكرمك يارب
أشكرك جدا لرايك ولتعليقك
يسعدنا دوام التواصل



*********************************


د/ ابراهيم
ـــــــــــ
أهلا بعودتك يادكتور
يافندم طبعا انا مصدقاك من اول ما قلت انا بس كنت مستغربة ان ده ممكن يحصل فى الواقع
بس ياترى العروسة بتبص فى وجه عريسها وقرايبه بأى وجه!!:)
أشكرك جدا لمتابعتك
يسعدنا دوام التواصل

MOHAMMED ELBANNA يقول...

أمه الله
دائماً ما تثيري موضوعات هامه ومؤثره
فعلاً الشات الان اصبح يرتكب فيه كثيراً من المعاصي والمخالفات ، وكلها بدعوى التعارف .
مع العلم ان يجب ان تكون هناك ضوابط على هذا التعارف .
تقبلي تحياتي ومروري
محمد البنا
طريق النجاح

المسلم الصغير يقول...

السلام عليكم ورحمة الله وبركاته...
موضوعك حلو قوي وله هدف جميل
دومتي مبدعانا دائماً بموضيعك
انا عمري ما عملت شات مع حد خالص من كتر ما بسمع انه فيه بلاوي كتيرة ( الباب اللى يجيلك منه الريح سدة واستريح)
تحياتي

غير معرف يقول...

جاية اسلم عليكى واطمن
وجدت هذا البوست الرائع وكعادتك دائما
ضحكت كثير على برميل الطرشى
تعرفى ياموناليزا انا اعرف واحدة
كنت على علاقة بشاب مصرى مغترب بالسعودية وكانت علاقتهم اشبه بالمخطوبين تحدثوا فى كل شى ء
عمره وعمرها وشغلها وشغله والظروف المادية وراته ورائها عن طريق الكاميرا
لدرجة انى كدت اصدق ان ممكن تفلح
احد هذه المحادثات
المهم ظلت العلاقة هكذا طوال سنة ونصف
وتبادلوا التليفونات ورتبوا كل شىء
وعند نزوله اخطرها بميعاد وصوله
ولم يخطر اهله حتى تكون هى بانتظاره
وفعلا حدث وبعد ماارتاح بدات هى تطالبه بتنفيذ خطوات اتفاقهم
بدا يماطل ويطلب منها الخروج والمكالمات
ومش مكفيه سنة ونص وانا كنت انصحها كثير ومرة واحدة لم يرد على تليفوناتها واختفى وصدقت مقولتى ان الانسان او الشاب لما يحب
يرتبط بيبعد عن ممن كانت له بيها علاقه
وهكذا ماكنت اقوله لها دائما
وحصدت هى الحسرة وفرصتين كانوا متقدمين ليها ورفضتهم لارتباطها بيه
عبر النت وهكذا فما بنى على باطل فهو باطل
سلمت يداكى حبيبتى ودعواتك يامونى

عابرة سبيل يقول...

للاسف الشات دة عند ناس كتير بقى ادمان
وبيستمر معاهم لبعد الزواج
انا باتكلم عن الرجاله طبعا
ليا صديقه تشتكى مر الشكوى من زوجها والشات ومش عارفه تخليه يتوقف عن الامر دة
الحمدلله انا قبل ما اشترك فى النت سمعت مساوئ الشات فلم افكر اتعرف حتى على بنت من النت نهائى لغايه ما بدات التدوين اتعرفت على بعض المدونات البنات وهما دول اللى بيخلونى ادخل الماسنجر غير كدة كنت مش اعرف يعنى ايه ماسنجر ولا مهتمه به خالص
اهم حاجه ان لو استخدمنا كل شئ صح وطبقا لشريعتنا وعاداتنا وتقاليدنا اكيد هانتجنب كتير من المشاكل والاخطاء
دايما مواضيعك بتعجبنى جدا موناليزا
ربنا يحفظك ويكرمك
االلهم اميين

mohamed ghalia يقول...

مع حضرتك حق فى كل كلمة قولتيها

موناليزا يقول...

محمد البنا
ــــــــــ
أهلا بيك أستاذ محمد
الحمدلله فماتوفيقى الا بالله
حتى التعارف اخى الفاضل لا ارى له أهمية فى ظل غياب الاخلاق المنتشر
أشكرك جدا لرايك
ويسعدنا دوام التواصل



**********************************


المسلم الصغير
ـــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
أشكرك جدا لرايك وربنا يكرمك يارب فماتوفيقى الا بالله
:) خير ما فعلتِ غاليتى
نورتينى ياجميلة واسعدنى تواجدك


**********************************


أم مالك
ـــــــــ
أختى الحبيبة:اهلا اهلا بالغالية
إيه المفاجأة الجميلة دى:)
سألت عليكِ العافية دايما وماتحرمش من تواجدك المميز
ربنا يسعدك يارب
قصة متكررة للاسف
نورتينى ياحبيبتى وربنا يطمنا عليكِ دايما



**********************************


عابرة سبيل
ـــــــــــ
أختى الحبيبة:اهلا اهلا بالقمر بعد طول غياب
عين العقل
ربنا يكرمك يارب اشكرك جدا لرايك فماتوفيقى الا بالله
نورتينى ياجميلة واسعدنى تواجدك



**********************************



محمد غالية
ـــــــــ
أهلا بيك استاذ محمد
أشكرك جدا لتعليقك
يسعدنا دوام التواصل

غير معرف يقول...

السلام عليكم

تعلمي رأيي في أطروحاتك قيمة ونفيسة

بارك الله بكِ وفيكِ

Lady E يقول...

والله يا موناليزا موضوعك مهم وللأسف مبقاش بس شات مع ان الشات المفروض يبقى وسيلة راقية للتعارف
الموضوع ده وصل للمنتديات والمدونات كمان

وأكيد مش كل البنات عارفين ان في تفكير بعض الشباب دنيء للدرجة دي

بالنسبة لوصفك للبنت ذات الرداء الكحلي حسيت انك قاسية اوي في وصفك بس انتي بتنقلي تفكير بعض الشباب

دائما موضوعاتك مميزة

ربنا يكرمك ويرضى عليكي

Unknown يقول...

لا حول ولا قوة
الا بالله !من دا
كتير وللأسف
الشديد بيضحك
عليهم بوهم الحب
والصداقة ويارب
البنات والاولاد
يعرفو الكلام
دا ويسمعوه
وينفذوه كمان.

موناليزا يقول...

أحمد شريف
ـــــــــ
وعليكم السلام ورحمة الله وبركاته
أهلا بيك أستاذ احمد
ربنا يعزك يارب فما توفيقى الا بالله
أشكرك جدا لرايك ولتعليقك
يسعدنا دوام التواصل




*******************************


ليدى اى
ـــــــــ
أختى الحبيبة:اهلا اهلا بالقمر
فعلا الموضوع انتشر جدا حتى لو اتصال خاطئ على الموبايل
تعرفى انى ترددت فى وصفها كده بس قلت انى بكتب على لسان شاب وده اكيد تفكيره
ربنا يعزك يارب فما توفيقى الا بالله
ماتحرمش منك ابدا
نورتينى ياجميلة



*********************************



نوراهاتى
ـــــــــ
أختى الحبيبة:اهلا اهلا بالقمر
ربنا يهى شباب المسلمين اللهم امين
نورتينى ياجميلة واسعدنى تواجدك

طهر فؤادك يقول...

السلام عليكم ورحمة الله وبركاتة ,,

بارك الله فيكى ... بارك الله فيكى ... بارك الله فيكى

ماشاء الله مواضيعك جميلة ونصايحك للبنات والشباب اكثر من رائعة وبتوصللهم المعلومة بطريقة جميلة وسلسلة وجزاكى الله خيرااا وفيرا اللهم امين والمسلمين ...

موناليزا يقول...

طهر فؤادك
ـــــــــــ
وعليكم لسلام ورحمة الله وبركاته
أهلا بيك يافندم
ربنا يعزك يارب
الحمدلله فما توفيقى الا به
أشكرك جدا لتعليقك
يسعدنا دوام التواصل

P A S H A يقول...

بجد موضوع حلو جداً .. وثري .. تسلم إيدك .. موافقك طبعاً على الكلام اللي قلتيه .. ربنا يستر نساءنا ونساء المسلمين جميعاً . اللهم آمين

تحياتي

:))

سلام

موناليزا يقول...

باشا
ـــــــ
أهلا بيك يافندم
أشكرك جدا لرايك فماتوفيقى الا بالله
أسعدنى تعليقك وربنا يتقبل دعائك
فى انتظاركم دائما

TIMMY !! يقول...

موضوع رائع جدا جزاكِ الله خيرا عليه , رغم إن تعليقي عليه متأخر جدا ,
لكني وجدته مُزَكَّى به في مدونة البيروني ,

للأسف الموضوع واقعي ,
كان واحد معانا في المدينة الجامعية عمل نفس الكلام بس خلع قبل اللقاء لما لقاها وحشة ,

المشكلة إن البنات بترخص نفسها بالطريقة دي جدا ,

ربنا يهدينا و يهدي الجميع

موناليزا يقول...

تيمى
ــــــ
أهلا بيك يافندم
ربنا يكرمك واشكرك جدا لرايك ولتعليقك
ولا يهمك حضرتك تعلق على اى موضوع فى اى وقت تريد فمدونتى ترحب بجميع زوارها دائما

جميل ذكرك لهذا الموقف لعل البنات يتعظن
أشكرك جدا لمشاركتك
يسعدنا دوام التواصل

نسيبه يقول...

السلام عليكم ورحمة الله وبركاته
فعلا يا حبيبتي كلامك صح وموضوع جميل بس المشكله إن في ناس بتبقي عارفه إنه غلط وبتعمله برضه واموضوع بقي زي الإدمان عندهم وإتعودوا عليه وده فعلا من الفراغ زي ما قولتي ربنا يعافينا ويشغل أوقاتنا بما يرضيه
دعواتك

موناليزا يقول...

نسيبة
ــــــــ
وعليكم السلام ورحمة الله وبركاته
أهلا اهلا بالقمر
تعرفى المشكلة الاكبر ان كل واحدة تقول انا واثقةفى نفسى وانا مابعملش حاجة غلط وماتعرفش ان اللى بتعمله ده عو بداية الغلط
ربنا يعافينا ويهدى بنات المسلمين اللهم امين


نورتينى حبيبتى واسعدنى تواجدك

مروه زهران يقول...

تسلم ايدك
موضوع جميل