السبت، 9 يناير 2010

إحتياج

المشهد الأول:
ـــــــــــــــــــــــ
الزوجة: بتحبنى؟.
الزوج : لا يرد.
الزوجة: يااه سؤال صعب أوى كده؟.
الزوج: لا يرد.
الزوجة: طيب قولى بحبك.
الزوج: لما أحسها هابقى أقولها. أكذب عليكِ يعنى!.
الزوجة: وبدل ما بتحبنيش إتجوزتنى ليه؟.
الزوج: يووه أنتِ عايزة تتخانقى وخلاص. وتركها وانصرف.
**************************
المشهد الثانى:
ـــــــــــــــــــــ
البنت: ليه مصروف أخويا الصغير أكتر من مصروفى؟.
الأب: للذكر مثل حظ الأنثيين.
************************
المشهد الثالث:
ــــــــــــــــــــ
الابنة تتذكر نصايح والدها لها وهى طفلة.
الأب: لو كنتِ بتاكلى حاجة وأخوكِ طلبها منك طلعيها من فمك وأعطيهاله.
تسأل نفسها :ياترى وصيت أخويا عليا كده برضه؟.
ولو حد أخذ منك حاجة وجه يرجعهالك قوليله إتفضل دى هدية منى.
تتذكر أن والدها كان يكرم الضيف على حسابها يعنى ممكن تطلب منه حاجة يقولها هعطيهالك فى العيد ولما ييجى العيد وييجى يزورهم ولاد خالتها تجده يعطى لهم ما قد وعدها باعطائها إياه.
قائلاً: معلش دول ضيوف.
تتذكر معاملته الجميلة الممزوجة بالحنان لابن عمها فهو يعطيه أكثر مما يعطيها وحينما تلومه.
يقول: يابنتى أنا أعرفه قبل ما اعرفك ده ابنى. وبعدين هو موجود فى بيتنا ولازم نضايفه.
تتذكر وجوده الدائم عند جدها وجدتها على حساب رؤيتها له رغم تمتعهم بصحتهم .
وحينما تلومه: يا بابا حضرتك مابتقعدتش معايا خالص وماتعرفش أى حاجة عن حياتى.
يجيبها قائلاً: يابنتى دول اللى هيدخلونى الجنة.
تجيب بداخلها: وأنا يعنى اللى هدخلك النار!.
تتذكر هذا وتبكى قائلة بصوت عالى مُحدثة نفسها: ليه يا بابا علمتنى أحب الناس أوى كده ونسيت تعلمنى إزاى أحب نفسى ولو شوية صغيرين.

تعليق على المشهد الأول:
ـــــــــــــــــــــــــــــــــــــ
إليك أيها الزوج/ إذا كنت تعتقد إنك بهذا تقول الصدق خشية من عقاب الكذب. أريد أن أذكرك بوجود حالات مباح فيها الكذب ومن ضمنهم حالتك مع زوجتك والتى تستطيع من خلالها أن تكسب قلب زوجتك وتطيب خاطرها وتدخل السرور على قلبها.
ماذا سيضيرك فى مجرد كلمة طيبة تقولها لزوجتك ولو من باب المجاملة ولن تنقص من قدرك شيئاً بل بالعكس رصيدك عندها هيزيد وهتاخد ثواب كمان.
كيف تريدها أن تتعامل معك بعد معاملتك الجافة معها!!.
عامل زوجتك كما تحب أن يتعامل زوج ابنتك مع ابنتك. وتخيل لو ابنتك حكت لك هذا الحوار عن زوجها ماذا سيكون إنطباعك عنه.
أين المودة والرحمة طالما تتحدث عن الحلال والحرام.
يعنى لو زوجتك ماسمعتش منك كلمة حلوة المفروض تسمعها من مين!!.
وليه تجعلها تطلبها منك؟ لماذا لا تشبع إحتياجاتها النفسية والعاطفية؟.
إعكس الوضع وتخيل لو كنت مكانها وهى ردت عليك كما رديت عليها شعورك وقتها هيكون إيه؟ وهتتصرف معاها إزاى؟.
أيها الزوج إن كلمة حلوة منك لزوجتك كفيلة بإمدادها بطاقة وحيوية تجعلها تقوم بأقصى المهام المنزلية وفى فترة قصيرة مهما كان شدة إرهاقها. فاللكلمة الطيبة مقعول السِحر. يا أخى دى لو واحدة غريبة كنت أكيد هتجاملها.
إجعلها تحب حياتها معاك وأنها مش ممكن تعوضك أو تلاقى مثلك.
إشحن رصيدك دايماً فى قلبها تحسباً لأى أزمة مستقبلية تمرون بها.
إسعد أولادك بمعاملتم لأمهم معاملة طيبة وإدخال السرور على قلبها الذى بدوره سينعكس على كل من فى البيت بالإضافة إلى أنه سيترك ذكريات جميلة بداخلهم.
إعطيها حضنك فى لحظات ضعفها دون أن تطلبه. وحذار أن تحتاج إلى حضنك ولا تجده.
وأخيراً إسعد زوجتك لتسعد.
*************************
تعليق على المشهد الثانى:
ــــــــــــــــــــــــــــــــــــ
إليك أيها الأب/ هذه الآيه التى إستشهدت بها فى ردك على ابنتك ذُكرت فى حالة الميراث. أما فى حالة وجودك على قيد الحياة عليك أن تساوى بين أبنائك فى العطية ولا تجعل نفوسهم تحمل الضغينة لبعضهم البعض.
لا تجعلها تكره نوعها الذى يجعلك تفضل أخوها عليها.
واعلم أنك بهذا تعطى لها معلومة دينية خاطئة. فهى حينما تشترى كتاب مدرسى تدفع ثمنه كاملاً وليس نصف الثمن على اعتبار أنها أنثى .
وأيضا إذا ركبت مواصلات تدفع الأجرة كاملة كما الذكر بالظبط.
واعرف إنك هتتسأل على التفريق فى المعاملة بين أبنائك حتى لو حضنت ابنك وماحضنتهاش أو قبلت ابنك وهى لأ أو سلمت عليه بشوق وهى ببرود وما إلى ذلك.
*خد بالك من معاملتك لولادك حتى لو فى أشياء من وجهة نظرك صغيرة ولا تستحق. لأنها بالنسبة لهم كبيرة وستترك أثر بداخلهم لن ينمحى.
* اعرف دينك صح قبل ما تستشهد بأى آية قرآنية.
***************************
تعليق على المشهد الثالث:
ـــــــــــــــــــــــــــــــــــــ
إليك أيها الأب/ ابنتك تحتاج حنانك واهتمامك فإذا كنت ستعطى حنانك للآخرين والآخرين يعطون حنانهم لآبنائهم
فمَن لابنتك لكى يعطيها الحنان الذى تحتاجه!.
اعلم أن ابنتك هى من ستقوم برعايتك فيما بعد . ولذلك هى أولى باهتمامك.
علمها إزاى تعطيك حنانها بدل ما تعطيه للآخرين.
لا تعتمد على برك لوالديك على حساب إهمالك لها وأنه كما تدين تدان وكما تبر والديك فسيبرك أبنائك لأن فاقد الشئ لا يعطيه.
لا تتعامل مع أى شخص من الأقارب باهتمام زائد ومبالغ فيه أكتر من ابنتك لأنك بالنسبة لهم مجرد شخص من العائلة ومعاملتك الودودة لن تفرق كثيرة معهم لأنهم طبيعى عندهم إكتفاء ذاتى. فأب كل شخص منهم مازال موجوداً ويشبع إحتياجاتهم أما ابنتك ليس لها سواك حتى تأخذ منه ماتحتاج من حب وحنان واهتمام.
لا تجعل ابنتك تبحث عن حنانك المفقود مع أى شخص آخر.
واعلم أن يوم ما يحصل لك أى حاجة بنتك أول واحدة هتكون واقفة جنبك ومعاك وليس أى شخص آخر ممن كنت تفضلهم عليها.


سؤال جانبى:
ــــــــــــــــــــــــ
* مَن أكتر شخص تحتاج لوجوده فى حياتك؟.
* أذكر شئ تحتاجه الآن؟.

هناك 51 تعليقًا:

KHALED يقول...

مَن أكتر شخص تحتاج لوجوده فى حياتك؟

أبويا رحمة الله علية

أذكر شئ تحتاجه الآن؟

مليون جنية ..

(( هوا مافيش جوايز على الأسئلة دى ولا أية ))

P A S H A يقول...

بوست جميل بجد .. تحياتي على تحليلك ومنطقك في الرد .. جزاك الله كل خير .. وجعله في ميزان حسناتك .

ملحوظة: انا ما شفتش السؤال الجانبي خالص !! هههههههههه

سلام

موناليزا يقول...

خالد
ــــــ
أهلا بيك أستاذ خالد
أشكرك جدا لمشاركتك
ربنا يرحم والدك ويغفر له
ولو فيها غلاسة هتعمل بالمليون جنيه إيه؟
:) غالى يافندم والطلب رخيص
الجايزة بعتناها حالا
يسعدنا دوام التواصل


**********************************


باشا
ــــــــ
أهلا بيك يافندم
ربنا يكرمك وأشكرك جدا لرايك
ملحوظة: ليه طيب ده على ايدك اليمين وواضح خالص
ممنوع الهروب من الإجابة:)

يسعدنا دوام التواصل

rovy يقول...

بوست متميز غاليتى كعادتك ..
صحيح ناس كثير اتربت غلط و فهمت غلط و مع الاسف دلوقت بتربى غلط ..
ربنا يبارك فيكى و ينفع بيكى اختى الحبيبه ..
اكيد انتى عارفه ردى على سؤالك ..
اكثر شخص احتاج لوجوده دائما فى حياتى هو ابى رحمة الله عليه .. الذى و الله و ليس لأنه والدى و لكنها الحقيقه لم ارى مثله فى العطاء و الحب و الاخلاص و الوفاء و حبه لله و توكله عليه وحده و حسن معاملته لجميع اهل بيته و احتوائه لنا .. وعطائه المستمر و قلبه الكبير الذى به حب يكفى العالم كله و يفيض ....

ما احتاج اليه الان .. ان اشعر بالامان الذى لم اشعر به سوى فى احضان ابى الحبيب وحده رحمة الله عليه .. ربما لأنه من الصعب بل من المستحيل ان اجد من يعوضنى حبه و حنانه ..
تحياتى

KHALED يقول...

حاعمل أية بالمليون جنية .. ؟؟

ياخسارة ياريتنى كنت طلبت أكتر أصل المليون دلوقتى مايعملوش حاجة

أأقولك ...

أول حاجة حاشترى مكان عالبحر مباشرة علشان يبقى مرسم


حاعمل رحلة طويلة أزور فيها أماكن فى العالم نفسى أروحها

ولو فضل معايا فلوس حاشترى عربية رياضية ممكن تكون فيرارى حتى ولو إستعمال الخارج

ههههههههههه

لعلمك أنا مش طالب من ربنا غير الستر و الصحة .. الفلوس أخر حاجة بافكر فيها ياما ناس معاها فلوس بتتمنى حاجة واحدة من النعم إللى ربنا أنعم بيها عليا .. ومش عارفة تلاقيها
الحمد لله

لجين أبو الدهب يقول...

الصراحة الحالة الاولى

الزواج ده عايز منجنيق ويتحط عليه ويتحدف ويروح اخر الدنيا

ياستااااار يارب معقول فى حد كده !!

اعوذ بالله من هذه الامثال ..

اكتر شئ احتاج لوجوده الان فى حياتى بنتى او ابنى وحشونى مش عارفة تقلانين عليا ليه D:

أذكر اى شئ تحتاجه الان ؟؟

لاب توب حديث حلو كده علشان الوقت الفاضى فى المدرسة اقعد عليه D:

بوست رائع كعادتك حبيبتى

بجد بحب اقرألك جدا ..

دمتِ بخير ..

بحبك يامصر يقول...

طبعا مفيش حد يختلف على تحليلك وارائك فى علاقة الزوج بزوجته وحتمية ان يكتسب قلبها بالكلمه الحلوه وكمان فى الاهتمام بالابناء وعدم التفريق بينهم على اى اساس سواء نوعهم او اى شئ اخر كلامك جميل ومنطقى
اما عن السؤالين
الشخص اللى اتمنى يكون جامبى طول الوقت هو
والدى الله يرحمه
الشئ اللى احتاجه الان هو
الحب

بحبك يامصر يقول...

كلام مهم وجميل محدش يعترض عليه
بجد رضا الزوجه سهل الكلمه الحلوه ترضيها والرجاله بخله فيها انا شاهد على كده
السؤالين
الاول ....... الله يرحمه والدى
الثانى ....... محتاج توفيق ربنا

فاتيما يقول...

حلو قوى البوست
يا مون مون

تعرفى ؟

انا دايما اقول لأى زميل
محتمل يبقى أب قريب
او حتى لسه متجوزش


لو خلفت بنت
لازم تعاملها كاميرة
أو ملكة
لازم تحترمها و تعزز ثقتها
ف نفسها
و الا هتدفع تمن دا بعدين
و تقريبا دا اللى حصلى
انا شخصياً
بابا كان محطملى ثقتى ف نفسى
و دا خلانى اختار شخص أقل منى
لأنى مكنتش حاسة انى أستاهل
اللى احسن ...
ولأنى مش شايفة نفسى احسن
مهما اللى حواليا قالولى
لأن اول راجل ف حياتى اللى هوه بابا
مقلهاليش و حسسنى بيها
كلام علم نفس عبيط يمكن
بس حقيقى بجد
مش مجرد تحليلات


و كمان الأب لازم يدلعها
الدلع مش المرىء اللى يبوظ
لأ
الدلع اللى يخليها حنينة
و تخاف على زعله عشان بتحبه
مش عشان خايفة منه
أو مش قادرة تغلط


ربنا بينظر إلى اعمالنا
مش صورنا
هل إتخلقنا رجالة و لا ستات


يبقى المفروض نعامل بعض
على هذا الأساس


المشهد بتاع الزوج و زوجته
موافقاكى عليه جداااا
الكدب مباح فى بعض الحالات
و خصوصاً حالة زى دى
إنما فيه رجالة كتير
بتعتبر كلمة الحب
ضعف و خيابة ..
جاتهم ستين خيبة
فوق خيبتهم


إجابات السؤالين بقى
طبعا إنتى عارفة
اجابة اول واحد

يوسف
يوسف
يوسف


تانى سؤال
محتاجة أستخبى
ف ضل الراجل اللى بحبه
لأن تعبت من الوحدة



و محتاجة كمان
تكونى قصادى دلوقتى
عشان اديكى البوسة و الحضونة
يا مون مونتى

بس خلاث

Cute Kitty **sookra يقول...

مونا
الكلمه الحلوه لها مفعول السحر عند المرأه او انا يعنى موش عارفه الباقى بس اعتقد انها بجد بتدينا طاقه من نوع خاص
صعب اوى انك تشحتى الحب ويسلام بقى لما يرد عليها ويقولها لما ترضينى ابقى اسمعك كلام حلو
يادى النيله يعنى هى لازم تقدم السبت عشان تلاقى الحد
طيب ماتقدم انت السبت وهو حب وحنان وكلام حلو وهتقدم هى الحد رضى وطاعه وحب واهتمام وكل ماتتمناه
تحياتى
اما موضوع الاب دا فالكلام فيه كتير
يعنى احيانا الاب يحتضن الابن ولايحتضن البنت وعندما تسأله لماذا يقول انتى بنت وعيب انى اخدك فى حضنى
ياغلبنى تروح هى لمين ياخدها فى حضنه؟
تسلم ايديكى

ريمان يقول...

السلام عليكم

المشاهد اللى انتى صورتيها واقعيه اوى بتحصل فى بيوت كتيره جدا
خصوصا المشهد الاول

عجبنى اوى تعليقك على المشاهد دى يا موناليزا

دومتى بخير يا رب

ربنا يجازيكى خير يا رب

المسلم الصغير يقول...

السلام عليكم ورحمة الله وبركاته...
جزاكي الله كل خير في تحليلك وأرشاداتك
دومتي بخير

حمـــــــــــــــــــــة يقول...

فاقد الشيء لا يعطيه
قاعدة ذهبية تجسم واقع متسشري
الأمر لا يتعلق بالرجل وحده...صحيح بإعتباره متحكما في أغلب نواحي العائلة و لكن في المقابل لم يجد من يرجعه الى الصواب بالإصلاح ...و ...و
هنا دور المرأة كأم أو أخت أو زوجة
هنا السؤال هل نتقن دور الضحية و كفى؟...
لا بد من التضحية
لا من الصبر
و كذلك لا بد من الوعي الحقيقي
إذا إختزلنا الدين في الصلاة و الصوم
تختل الأمور
و إذا إختزلنا ما تلقيناه من علوم ...و نسينا معظمه...إختل الأمر
لا أحبذ وصف الرجل بالشرقي ...لأنه وصف متخلف جذوره نابعة رواسب من إستعمار فكري
كذلك لا أريد إلصاق شماعة على مجتمع ريفي أو حضري
عدم التوازن و التكالب على المادة قلب كل شيءا
أصبحت قيمة البشر تقاس بما لديه(....)
و بالطبع من لا دينار له لا يساوي شيءا
هكذا بنيت مجتمعاتنا و يستمر المسلسل إلا من رحمه ربه و تخلص من العديد من الرواسب
أصبحنا نهول من أمرا لا نريده في حين فيه المصلحة
و نقزم كل كبيرا

هذا رأي شخصي مقتنع به نابع عن تجربة بسيطة و الحمد لله

MOHAMMED ELBANNA يقول...

أمه الله
الله على اختياراتك يا موناليزا .
فعلاً كل واحد فينا له احتياج في شخص او شيئ معين .
اكثر شيئ احتاج إليه الان هو ( توفيق الله )
تقبلي تحياتي
محمد البنا
طريق النجاح

مجداوية يقول...

السلام عليكم

راااااااااااائع بل أكثر من رائع

جزاكِالله كل خير يا موناليزا على التأكيد على هذه المواضيع بالتحديد وخاصة معاملة الولد والبنت

وياريت كنتي تضيفي موقف لمعاملة الولد لأخته لأن الأهل بيعطوه حق إيذائها أو إنه يظلمها ويستولي على أشياءها بحجة إنه رجل و له السلطة عليها
لأن العلاقة المفروض تكون أساسها الرحمة والود والعطف وقوة الرجل لا بد أن تكون قوة لحماية المرأة وليس على المرأة

أما عن الأسئلة فأسئلتك رغم أنها سهلة لكن بتوجع

من أحتاج إليه الآن ودائما وأبدا هو الله فهو أحن على من أبي وأمي وهم رحماء الدنيا لكنه أرحم الراحمين

الشىء الذي أحتاجه الآن
رضا الله عني فوقتها سترضى الدنيا كلها عني

ووالله ليست إجابات عنترية أو مجرد أقوال ولكن هذا ما أحسه بالفعل
ربنا يبارك فيكِ وينفع بك دائما غاليتي

Dr. Ibrahim يقول...

فعلا الكلمة الطيبة مفعول سحر وفيه مواقف اتعرضت لها كانت الكلمة الطيبة الحل الوحيد لكسب ود الأخرين..
فعلا التمييز بين الأبناء فى أى حاجة ممكن تؤدى إلى عواقب وخيمة على المدى البعيد من أمراض نفسية فى المستقبل..
وفيه حاجة حضرتك ذكرتيها لو الاب تعامل مع البنت بجفاء ولم يكن لها الانسان المقرب ستحاول البنت ان تتقرب إلى شخص أخر أى ان كان ليكون لها الشخص لذى يعطيها الحنان او القدوة..وهذه مشكلة خطيرة.
والله السؤال الاول مفيش شخص معين.
والسؤال الثانى احتاج الآن وبشدة الهدوء وصفاء الذهن..
دمتم فى رعاية الله

*الطالبة عفو الله *زوزو يقول...

موضوغ قيم
سلمت يمناك حبيبتي
اكثر شخص احتاج لوجوده في حياتي هو جدتي رحمة الله عليها
شيء احتاجه الان حب بكل ما تحمله الكلمة من معنى
تحياتي
الطالبة عفو الله

بنجاواتى يقول...

سلام عليكم

من غير نقاش فى المشاهد الثلاثة فهى صور سلبية تحتاج لتعديل وربنا يصلح بيوتنا

اما اكتر شخص بحتاج لوجوده هى زوجة احبها وبقول كده لان ابى وامى واخواتى ربنا يديهم الصحة وطولة العمر

اما عن اكتر حاجة احتاجها فهى ان يديم ربنا عليا ما انا عليه الان والحمد لله

Mahmoud Ahmed يقول...

السلام عليكم
جميل جدا الموضوع و فكرته وا لهدف الى عايزه توصليه منه ^_^
انا اكثر واحد بحتاجله هو والدي مع ان دايما في خلافات ^_^ و دايما مش بنتفق على راي خالص ^_^ بس فعلا مقدرش استغني عنه

يمكن القط ميحبش الا خناقه ^_^

.....

حاجه محتاجها دلوقتي دلوقتي
اني عايز اقوم اشرب
و مكسل ^_^

ستيتة يقول...

انتي بتدلعي يا موني؟
قولي انك بتدلعي وانا اتعقك؟
طيب انتي جبتيه لنفسك

الحالة الأولى
هع
لأ يا اختي بيكذبوا
وحافظين الحديث ده تمام التمام قوي
زي أية الرجال قوامون
وزي أية واضربوهن
حتى لو واحد قمارتي وسكري برضه حافظ دول عن ظهر قلب
بيكذبوا ياماما في الحلال والحرام وبلاش براءة الأطفال في عينيها دي علشان بتغاظ بسرعة

الحالة التانية
ماتحاوليش
يا إما أب سوي يا إما غير سوي
واتذكر هنا ان فيه اب فضل ولد على الست بنات وجابهم وهو بيموت وقال لهم يا بنات لو كنت اديت حاجة لأخوكم اكتر منكم سامحوني ربنا يخليكم علشان مروحش النار
العبط قالوا اه يابابا مسامحينك
طب انا لو مكانهم؟
والله ما اسامحه ابدا
بنته اللي فوق الولد ده مباشرة مهندسة شاطرة وبارعة الجمال
كانت بتتعاكس في الشارع حتى بالحجاب لأن سبحان الخالق العظيم جمالها نادر
جاب لدلوع عين امه عربية بعد الثانوية العامة وطبعا مكملش كلية
هو اللي يلاقي الدلع ويسيبه يبقى ايه؟
كلمة يعاقب عليها القانون

وهي عمرها ما ركبت عربية
رغم نجاحها الي بيتباهى بيه
وجمالها اللي قارفها


الحالة التالتة
برضه شعور غريب ان الأنثى دي مش حبيبته
انها جت بس في سكة الصبيان غلط
ان ملهاش فايدة
ولو انا منها مش ها اخدمه في كبره
تقولي اني قاسية هباب طين
هي كده يا ها اخدمه لله بدون اي مشاعر
يا ولا كأني هنا ونشوف ابن اخوه وابن عم اللي جابوه ها يسألوا عليه كام مرة في الشهر

واحدة صاحبتي باباها جاله ربنا يعافينا الزهايمر
وبصراحة هو طول عمره بأس الأب
البنت جابت خدامين لليل والنهار
وجابت اطباء وادوية
لكن تشيل؟
تغير له مثلا؟
اقسمت لي بالله انها متقدرش
متقدرش ابدا انها تحس انه ابوها للدرجة دي
تعرفي قالت لي كلمة توجع القلب
قالت انا عمري ما حسيت انه ابويا او اني فارقة معاه عايشة ولا ميتة
ومش قادرة غير على اللي بعمله لله
وكوني معنديش شعور حب وتعاطف معاه يا ستيتة مجنني ومضايقني اكتر
بس خلاص مش بإيدي

"عينيف فيلم رصيف نمرة خمسة ده يا اوختشي

الفقيرة إلى الله أم البنات يقول...

مونى عاجزة على الرد
اسمحى لى لن اعلق فانا عندما قراءت اكتئبت
عندما استطيع سارد

أميرة يقول...

فمَن لابنتك









لها الله

موناليزا يقول...

روفى
ـــــــ
أختى الحبيبة:اهلا اهلا بالغالية
ربنا يعزك يارب فما توفيقى الا بالله
للاسف فعلا ده حقيقى
انا فاكرة لما كنت فى الكلية وكانت الدكتورة بتشرحلنا أنه ماينفعش نضرب الاطفال والمساوئ اللى هتحصل وكده
كان رد البات اللى فى البنش اللى قدامى كانوا بيقولوا زى مااضربنا واحنا صغيرين لازم نضرب العيال!!

طبعا كنت واثقة فى اجابتك جدا:)
هقولهالك تانى بجد مقداميش حاجة غير انه احبه زيك وادعيله دايما بالرحمة والمغفرة
اللى يربى بنته زيك ويزرع جواها الحب والجمال اللى جواكى بجد يستحق الجنة
النبى هو اللى قال كده على فكرة:)
ربنا يسعدك ياحبيبتى ويباركلك فى بناتك
نورتينى روفى الجميلة واسعدنى تواجدك



**********************************


خالد
ــــــ
أهلا بعودتك أستاذ خالد
تعرف انى كنت ناوية اقولك انهم مايعملوش حاجة دلؤتى
:) عمرك أطول من عمرى
:) واااو مرسم وعلى البحر كده بقينا فى الجنة
إختيارات موفقة جدا:)
(يارب تحصل عليهم بسرعة ولو حتى من جورج قرداحى:))

ربنا يديم عليك نعمه يارب ويزيدك من فضله
أشكرك جدا لمتابعتك
وجودك يسعنا دائما


*********************************


لجين ابو الدهب
ــــــــــــــ
أختى الحبيبة:اهلا اهلا بالقمر
:) وفيه أكتر من كده كمان
:) ربنا يرزقك يارب بالذرية الصالحة قريبا الله امين
عجبتينى بجد فى انك عايزة لاب توب خاص بيكِ ومش هتستخدمى اى كمبيوتر فى شغلك لمصالحك الشخصية
ايوة كده الله يباركلك
:)وانا بحب تعليقاتك عندى جدا وبستناها كمان
نورتينى لوجى الجميلة واسعدنى تواجدك


*********************************


بحبك يامصر
ـــــــــ
أهلا بيك يافندم بعد طول غياب
أشكرك جدا لرايك ولمشاركتك
ربنا يرحم والدك ويرزقك التوفيق فى كل امورك
يسعدنا دوام التواصل


*********************************


فاتيما
ــــــــ
أختى الحبيبة:اهلا اهلا بالغالية
أشكرك جدا لرايك
مين قال انه كلام علم نفس عبيط
جاله منين العبط طيب:)
ده كلام عين العقل
لان لو الاسرة عموما اهتمت بابنائها مش هيدوروا مثلا على اصحاب سوء او يقضوا يومهم بره البيت
ولا الاسرة اللى بتعامل البنت على انها ولد والنتيجة البنت تنسى من جواها انها انثى
ولا الام اللى تعود ابنها انها تذاكر له حتى وهو بيحضر الماجستير والنتيجة طبعا اعتماده الكلى عليها فى كل حاجة
هنقول ايه بس ده فيه مصائب فى التربية
اما عن الازواج فحدثى ولا حرج:)

طبعا عارفة الاجابة:)
ربنا يردهولك يارب وتملى عينك منه
ويرزقك باللى تحبيه ويحبك ويكون عوضك على كل حاجة وحشة
:) وصلونى ياقلبى اجمل حضن من طماطم الجميلة
ماتحرمش منك ابدا ولا من تواجدك
نورتينى غاليتى


**********************************


سكرة
ـــــــ
أختى الحبيبة:اهلا اهلا بالقمر
عندك حق جدا
ردود الازواج احيانا كتير تفرس:)
وفعلا لو الابناء مخدوش حنانهم من ابائهم المفروض ياخدوه منين!!
أشكرك جدا لتعليقك
نورتينى سوكا الجميلة واسعدنى تواجدك


**********************************


ريمان
ــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يعزك يارب فما توفيقى الا بالله
تعرفى يا ريمو الغريب ان ايام زمان كان الزوج يشوف عروسته لاول مرة يوم الفرح ومع ذلك كان بيعاملها بمودة ورحمة واليومين دول ورغم تعدد القنوات الفضائية اللى تخلى الحجر ينطق بقى فيه خرس زواجى
حكمتك يارب:)
نورتينى يا جميلة واسعدنى تواجدك


*********************************


المسلم الصغير
ـــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
ربنا يكرمك يارب فماتوفيقى الا بالله
نورتينى ياجميلة واسعدنى تواجدك


*********************************


هاما
ـــــ
أهلا بيك يافندم
ده حقيقى جدا ففاقد الشئ لا يعطيه
وأحترم رأيك جدا فهو واقعى جدا
أشكرك جدا لتعليقك
يسعدنا دوام التواصل

أبو كريم يقول...

أمة الله ثبتك الله وهداك وأرشد للحق خطاك

أقسم بالله العظيم أن تدويناتك مجرد قرائتها تسعدنى والتوقف للتمعن فى أحاديثها وإستشهاداتها أو حتى كريكاتيراتها إستفاده كبيرة لى ولزوجتى التى تقرأها دائما معى..

أكثر شخص أحتاج لوجوده الأن... أسرتى الكبيرة أمى وأبى وأخوتى لانى أعمل فى الغردقة وهم بميت غمر...

والشىء الذى أحتاجه الأن

أصلح الغساله عشان مراتى هتغسل بكرة ومش لاقى حد يصلحهالى!!

دمت فى معية الله

تحياتى
أبو / أم كريم معا

موناليزا يقول...

محمد البنا
ــــــــــ
أهلا بيك استاذ محمد
الله يكرمك يارب فماتوفيقى الا بالله
ربنا يوفقك دايما ويرزقك بكل الخير
أشكرك جدا لمشاركتك
يسعدنا دوام التواصل


**********************************


مجداوية
ــــــــ
وعليكم السلام ورحمة الله وبركاته
أختى الحبيبة:اهلا اهلا بصوت الحق
:)ربنا يكرمك يارب و الحمدلله فماتوفيقى الا به
الاساس فى الاب والام لو زرعوا جوه الاخ حب اخته واحترامها هيلاقوه
(إذا كان رب البيت بالدف ضاربا:))
صادقة غاليتى فى ما تشعرى
ربنا يرضى عنك ويرضيكى
نورتينى حبيبتى واسعدنى تواجدك


********************************



د/ ابراهيم
ـــــــــــــ
أهلا بيك يادكتور
أشكرك جدا لتعليقك
وربنا يرزقك بكل ما تتمناه
يسعدنا دوام التواصل


********************************


الطالبة عفو الله
ــــــــــــــــ
أختى الحبيبة:اهلا اهلا بالقمر
ربنا يكرمك اشكرك جدا لرايك
ربنا يرحم جدتك ويرزقك بكل ما تتمنيه
نورتينى زوزو الجميلة واسعدنى تواجدك


**********************************


بنجاواتى
ــــــــــ
وعليكم السلام ورحمة الله وبركاته
أهلا بيك يافندم بعد طول غياب
ربنا يرزقك بالزوجة الصالحة ويديم عليك نعمته
أشكرك جدا لمشاركتك
يسعدنا دوام التواصل


***********************************


المدونة الاسلامية سبايدر مان
ـــــــــــــــــــــــــــ
وعليكم السلام ورحمة الله وبركاته
أهلا بيك يادكتور
:) ربنا مايحرمكوش من بعض
أقولك على فكرة كويسة هات زجاجة مية وخليها جنبك عشان اول ما تعطش تشرب على طول وبعدين انا اللى هقولك يادكتور على فوايد الشرب!:)
أشكرك جدا لمشاركتك
يسعدنا دوام التواصل


**********************************


ستيتة حسب الله الحمش
ــــــــــــــــــــ
أختى احبيبة:اهلا اهلا بنبض الحكمة
:) لا والله يا سوتيتة مش بتدلع خالص
ده انا جايبة نماذج واقعية جدا:)

يااه الامثلة موجعة جدا وللاسف انها من واقع الحياة
هو فعلا عنيف الفيلم ده جدا:)
نورتينى سوتيتة الجميلة واسعدنى تواجدك


*********************************


الفقيرة الى الله ام البنات
ــــــــــــــــــــــــ
أختى الحبيبة:اهلا اهلا بالقمر
سلامتك من اى اكتئاب ياحبيبتى
عموما براحتك خالص المدونة تحت امرك فى اى وقت طبعا
نورتينى غاليتى واسعدنى تواجدك حتى وان لم تتركى تعليق

*********************************


أليس فى بلاد العجائب
ـــــــــــــــــــــ
أختى الحبيبة:اهلا اهلا بالقمر
ياااه رد مختصر بس موجع وشامل حاجات كتير
نورتينى غاليتى واسعدنى تواجدك


*********************************


ابو كريم
ــــــــــ
أهلا بيك استاذ بهاء
ربنا يعزك يارب فماتوفيقى الا بالله
:) أخجلتم تواضعنا يافندم واسعدتنى حقا بمشاركة زوجتك فى قراءة تدويناتى
ربنا يسعدكم يارب ويباركلكم فى حياتكم

ربنا يجمعكم ببعض على خير
:) أقولك على فكرة كويسة كلم بتوع الصيانة هييجولك على طول ومش هيلعبوا فى حاجة
سلامى لام كريم ولكريم
دمتم فى معية الله وحفظكم الله من اى سوء

ليس فقيرا من يحب يقول...

رقيقه وجميله ورائعه كالعاده يا مونى

بجد البوست ده اكتر من روعه

مش عارفه ليه الناس بتبخل حتى بابسط حاجه ولو كلمه طيبه تأسر القلب

الاجابه على السؤالين

الاول محمد اخويا اصله وحشنى

قوووووووووووووووووووووووى ونفسى اشوفه

اكتر حاجه محتاجاها دلوقتى راحه البال

ربنا يسعد قلبك ياااااارب

كلمات من نور يقول...

* مَن أكتر شخص تحتاج لوجوده فى حياتك؟

أكتر شخص بحتاج لوجوده في حياتي و أفتقده بشده رغم إنه مات وعمري سبع سنوات هو جدي رحمه الله .كان رجل من رجال الزمن الجميل اللي مافيش منهم دلوقتي..
* أذكر شئ تحتاجه الآن؟

أحتاج الآن الستر ..ربي يسترنا فوق الأرض ويسترنا تحت الأرض ويسترنا يوم العرض.

كفايـة طيبـة يقول...

كلام وجميل
ويخلى اللى متجوزش يلحق نفسه ويلف ويرجع تانى
D:

ربنا يحفظنا من شره
اخر سؤالين

اكتر شخص محتاجة وجوده: الحمدلله معايا وهي امى

شيء احتاجه الان : تحقيق الذات واثبات خطوات ثابتة ومعرفة الطريق

(المهاجر الى الله) يقول...

السلام عليكم ورحمة الله وبركاته:
كيف حالك اختى الفاضلة امة الله ، اسال الله ان تكونى بخير حال واتم صحة وان يتم الله عليك نعمته .
حقيقى كان من اكتر الاشياءاللى همانى انى فاتنى من موضوعاتك المتميزة فى الشهر الللى فات ده كتييييير جدا ، لكن لاباس فنا اعيد قراءتها على مهل .
اما بالنسبة للبوست ده ، فاعتقد ان كل المشاهد اتفقت على ان السبب فى وجود هذه النماذج فى مجتمعنا هو الجهل الشديد بالدين الاسلامى والجهل الاشد بمعنى كلمة (رجولة) وحرصنا الدائم على وضعها فى مقابل الانوثة بداعى او بدون داعى .
كما انه الجهل الاكبر عندما ننظر للانثى تلك النظرة المتدنية وكاننا ننظر لها بعين سقراط او افلاطون اللذين جعلاها مخلوق من الدرجة الثالثة ، ونتعمد الا ننظر لها بعين سيدنا محمد عليه الصلاة والسلام ، متناسين انه معلم البشرية وانه علمنا فيما علمنا ان نحترم المراة ونقدر لها جهودها والا نفرق فى المعاملة بين الانثى واخيها الذر ، ومن ينسنى دور السيدة خديجة رضى الله عنها فى الزود عن الاسلام فى مهدة والدعوة الى الله ، والسيدة عائشة التى قال عنها الرسول (خذوا نصف دينكم من هذه الحميراء)، بل وحتى ان الامام الشافعى رحمه الله كان يتلقى العلم على يد ابنة عنته السيدة نفيسة .
من ينسى ان له اما هى احن الناس عليه ، من ينسى ان له زوجة هى الطمائنينة بالنسبة اليه ، من ينسى ان له بنتا هى موهجة قلبة ووجد فؤاده.
يؤسفنى ان اعلن ان هذه النظرة لن تتغير مادام ان البعد عن صحيح الدين ومنهج الرسول هو السمة السائدة .
.......................
اكتر شخص احتاج اليه :
اتنين ، الاول وليد ، وهو احد اشقائى القريب منى جدا .
الثانى : فى علم الغيب .
.......................
اكثر الاشياء التى اطلبها حثيثا ، الا يسىء احد ما فهمى .

موناليزا يقول...

ليس فقيرا من يحب
ــــــــــــــــ
أختى الحبيبة:اهلا اهلا بالقمر
:) ده من ذوقك ياحبيبتى
ماتحرمش منك ولا رقة تعليقاتك
فعلا بخل الكلمة الطيبة بقى كتييير جدا
يارب تشوفيه قريب على خير
ربنا يسعدك يارب ويريح بالك ويرزقك بكل الخير
نورتينى ياجميلة واسعدنى تواجدك



*********************************



كلمات من نور
ــــــــــــ
أختى الحبيبة:اهلا اهلا بالغالية
:) إجابة غير متوقعة
ربنا يسترنا جميعا يارب دنيا واخرة اللهم امين
نورتينى حبيبتى وفى انتظارك دائما



***********************************



كفاية طيبة
ــــــــــــ
أختى الحبيبة:اهلا اهلا بالقمر بعد طول غياب
وحشاااااااانى جدا جدا

:)
ربنا يخليهالك يارب وماتتحرميش منها ابدا
ربنا يهيئلك كل الخير ويحقق لك ما تتمنى
نورتينى حبيبة قلبى واسعدنى تواجد جدا



**********************************


المهاجر الى الله
ـــــــــــــــ
وعليكم السلام ورحمة الله وبركاته
أهلا بيك أستاذ طارق بعد طول غياب
أنا الحمدلله بخير اشكرك جدا لسؤالك
:) ربنا يعزك ويجبر بخاطرك تعليقك هذا تاج على رأسى
ومدونتى ترحب بيك فى اى وقت ويسعدها استقبال تعليقاتكم على اى مواضيع سابقة

صدفت أخى الفاضل
ولكن قليلا من يعرفون الدين ويطبقوه ونحمد الله انهم مازالوا موجودين ولم ينتهوا بعد

ربنا يجمعك باحبابك قريبا اللهم امين
واسمحلى فى اجابة السؤال التانى اقولك نصيحة اخوية
لا تضع نفسك فى اى موضع للشبهة واعمل بقول النبى "تجنبوا الشبهات"
ولو كنت تقصد مجرد كلامك العادى مع اصحابك يبقى لازم بعد انتهائك من الكلام تتأكد انهم فهموه زى ما انت تقصد
وربنا ييسر لك جميع امورك
أشكرك جدا لمشاركتك
يسعدنا دوام التواصل

واحد من البلد دى يقول...

السلام عليكم

موضوع متميز كالعادة..

أكثر شخص أحتاجه الأن..والدى-رحمه الله-وأعزى ذلك الإحساس لأنى لم أره أبدا ولم أقل كلمة(بابا)طوال عمرى..

أما بالنسبة للشيئ الذى أحتاجه الأن..وغدا ودائما..
دعوات من حولى بالهداية وحسن الخاتمة التى أخافها جدا..وآه ثم آه من الخاتمة..

اللهم بلغنا الآخرة على خير وأخرجنا من الدنيا غير مفتونين ولا مضلين وأختم لنا بخاتمة السعادة..

آمين آمين

دمتى طيبة

غير معرف يقول...
أزال المؤلف هذا التعليق.
طوبه فضه وطوبه دهب يقول...

عارفه انا هسميكى صاحبه الكلمه الموزونه بجد تستهلى اللقب عند جداره تسلم ايدك

موناليزا يقول...

واحد من البلد دى
ــــــــــــــــ
وعليكم السلام ورحمة الله وبركاته
أهلا بيك يافندم بعد طول غياب
ربنا يكرمك فماتوفيقى الا بالله

ربنا يرحم والدك ويجمعك معاه فى أعلى جنة الخلد اللهم امين
ويرزققنا واياك حسن الخاتمة اللهم امين
أشكرك جدا لمشاركتك
يسعدنا دوام التواصل



*********************************



عبدالله
ــــــــ
وعليكم السلام ورحمة الله وبركاته
أهلا بيك أستاذ عبدالله
فعلنا ما طلبتم وتم النشر والرد فى مدونة الفضفضة لعلها تقرأ وتعلم مقدارها عندك
ملحوظة: لا أعلم إمكانية نشر التعليق دون إظهار الحساب
ربنا يهيئلك الخير وينولك مرادك
نورت مدونتى واسعدنى تواجدكم وثقتكم الغالية




*********************************



طوبة فضة وطوبة دهب
ــــــــــــــــــ
أختى الحبيبة:اهلا اهلا بالقمر
:) الله
بس أنا كده هتغر

ماتحرمش من ذوقك ياحبيبتى ويارب افضل عن حسن ظنكم بيا دايما
نورتينى ياجميلة واسعدنى تواجدك

حصان المرجيحة يقول...

شكرا علي الموضوع الجميل ده
و بجد تحليل رائع
و مش هاعرف اعلق لان الموضوع مش محتاج تعليق انتي مكفياه جدا
بالنسبة للشخص : النبي صلي الله عليه وسلم
بالنسبة للشئ : رضا الله وبسسسسسسسسسس

غير معرف يقول...

السلام عليكم
دعيني أقول لك أن تدويناتك تعجبني كثيراً ، وكثيراً أتركها بدون تعليق لأعاود طرقها وقراءة محتواها بعناية أكثر

==========
شخصياً : لا أستطيع أن أقول من هو أكثر شخص أحتاج لوجوده في حياتي ، لأني من النوع قوي التحمل ..ربما مرت علي مواقف كثيرة صلبت ظهري وعودي وهذا لا يعني أنا جامد المشاعر .. بالعكس .. لكن لست منغمس في الرومانسية لدرجة تبعدني عن الواقع

لكن بصفة عامة الوالدة والوالد متعهما الله بالصحة ،أحبهما للغاية وأشعر بالسعادة حينما أرفقهما وأحاول رسم البهجة باستمرار على وجوههما لأنهما بعيداً عن أنهما يحملا لقب الأبوة والأموه فهما أصحاب فضل علي بحسن أخلاقهما وبساطتهما

والكثيرين علي غاليين .. صدقيني أحب الناس وأحب الجميع .. أحب أن أموت وكل لحظة وكل مشروع وكل خطوة لي تكون مثال للعطاء لي وللغير ولمصر

أما عن أكثر شيء بحاجة له الآن
مصر .. أحب مصر لدرجة لا أستطيع وصفها أحبها حتى النخاع .. أعشقها عشق وأحتاجها دائماً ، والله أحياناً أحب أن أردد اسمها على لساني وأذوب في معناه

قد يكون كلامي هذا غير محسوس من البعض وقد يصوروه بالخبل ، لكنه حقيقة وواقع
والحمد والفضل لله في هذا

دمتِ بود

طهر فؤادك يقول...

السلام عليكم ورحمة الله وبركاتة

ربنا يكرمك يارب ووالمسلمين وبارك الله فيكى ومواضيعك جميلة ومميزة

- اما عن سؤالك مش عارف بصراحة ارد لان انا اضعف من ان حد يحتاج الية علشان ربنا موجود وهو القادر على كل شئ وهو يلجأ لة احسن منى بكتيرررررر..

- اما ماحتاج لة الان هو رضا الله سبحانة وتعالى وربنا يتقبل منا جميعا صالح الاعمال

مسدس صغير يقول...

اعجبنى الموقف الثانى وضحكت
للذكر مثل حظ الانثيين؟؟
هههه
مش فى دى
المصروف للذكر مثل الانثى
اكتر حد محتاج ليه
امى
حاجة عايزها دالوقتى
زوجة صالحة

حياه بلا عنوان يقول...

السلام عليكم ورحمه الله وبركاته
البوست جميل قوى وواقعى وفعلا فيه ناس كتير بنطبق عليها البوست والردود كمان جميله قوى مشيه جدا على اللاسئله بس للاسف التربيه الغلط سعات بتخلى الانسان يفهم غلط ويتصرف غلط
الاجابه على السؤال الاول
اكتر شخص تحتاج لوجوده فى حياتك؟
ربنا سبحانه وتعالى واهلى
أذكر شىء تحتاجه الآن ؟
ان ربنا يكون راضى عنا جميعا
تحياتى

شمس النهار يقول...

بجد بتعجبني كتاباتك جدا جدا

ربنا يكرمك

سلامي

موناليزا يقول...

حصان المرجيحة
ـــــــــــــ
أهلا بيك يافندم
الشكر لله فما توفيقى الا به
ربنا يكرمك واشكرك جدا لرايك ولمشاركتك
يسعدنا دوام التواصل


*******************************


أحمد شريف
ـــــــــــ
وعليكم السلام ورحمة الله وبركاته
أهلا بيك أستاذ أحمد
أشكرك جدا على هذا الاطراء الجميل ويارب افضل عند حسن ظنكم فيما اكتب دائما
==
السؤال ليس له علاقة بقدرتك على التحمل او قلة الرومانسية ولكنه يختص بحالة يعيشها الفرد أوقات كثيرة حتى لو هيحتاج شخص غير موجود على ارض الواقع
مثال: قدوة طيبة أو يد حانية أو عقل مفكر وهكذا من صفات خاصة بأشخاص نكونهم فى عقلنا
سعيدة بمشاعرك لوالديك ربنا يخليهم لك ويبارك لهم فيك
وسعيدة أكتر بحبك لمصر ولانتمائك ليها
أشكرك جدا لمشاركتك
يسعدنا دوام التواصل


**********************************


طهر فؤادك
ــــــــــــ
وعليكم السلام ورحمة الله وبركاته
أهلا بيك يافندم
ربنا يعزك يارب فماتوفيقى الا بالله
ربنا يرضى عننا جميعا
أشكرك جدا لمشاركتك
يسعدنا دوام التواصل



***********************************


مسدس صغير
ــــــــ
أهلا بيك يافندم
:) فيه ناس كتير بتخلط الأمور
أشكرك جدا لمشاركتك
وربنا ينولك اللى فى بالك
يسعدنا دوام التواصل


*******************************


حياة بلا عنوان
ــــــــــــــ
وعليكم السلام ورحمة الله وبركاته
أشكرك جدا لرايك ولمشاركتك
وربنا يتقبل دعائك ويرضى عن الجميع
يسعدنا دوام التواصل


*********************************


شمس النهار
ــــــــــــ
أختى الحبيبة:اهلا اهلا بالقمر
وانا اعتز برأيك ده جدا:)
ويارب افضل عن حسن ظنكم بيا دايما
نورتينى شموسة الجميلة واسعدنى تواجدك

Unknown يقول...

يا موناليزا
يا قلبى
للاسف عندنا قصور كبير فى معرفة ديننا وتطبيقة بشكل جيد
اما اننا نعرف ولا نطبق او اننا لا نطبق بما يجب

جزاك الله خيرا على الموضوع

شيرين يقول...

فعلا تحليلك وتعقيبك على المشاهد رائع ومنطقي
أهنئك على هذه المدونة الجميلة

غير معرف يقول...

احتاج إلى نفسي المطمئنة
احن إليك إذ أخلو إلى نفسي
كما يحن دمشقي لأندلس

حول العالم يقول...

السلام عليكم
مشاهد جميلة
والأجمل التعليقات
التى هى على كل
مشهد
خالص تقديرى
رابط المدونة
http://halaem.blogspot.com/

موناليزا يقول...

نهر الحب
ــــــــ
أختى الحبيبة:اهلا اهلا بالقمر
فعلا للاسف دى الحقيقة
ربنا يكرمك ياحبيبتى واشكرك لتعليقك
نورتينى انوسة الجميلة واسعدنى تواجدك


**********************************


الشموع السوداء
ــــــــــــــــ
أهلا وسهلا فى زيارتك الاولى
أشكركط جدا لرايك ولتعليقك
نورت مدونتى وارجو دوام التواصل


********************************


سونيت
ــــــــ
أختى الحببة:اهلا اهلا بالقمر
كلنا نحتاج أيضاً الى هذا:)
نورتينى ياجميلة واسعدنى تواجدك



*********************************



حول العالم
ــــــــــــ
وعليكم السلام ورحمة الله وبركاته
أهلا وسهلا فى زيارتك الاولى
أشكرك جدا لرأيك ولتعليقك
نورت مدونتى وارجو دوام التواصل

غير معرف يقول...

السلام عليكم
كيفك يا ست الكل
قد أكون لم أستطع أن أضع تعليقي ووجهة نظري بصورة مباشرة

لكن أنا فهمت طرحك جيداً وباختصار أقول : أن طبيعتي لا تضعني كثيراً في موقف الحاجة المطلقة لفردِ بعينه ، والحمد والفضل لله

قد أستمد قوة من أساتذة أفاضل أو بعض الرموز الجميلة أو أصدقاء أجلاء لكن لست من النوع الذي يكون في حالة حاجة كبيرة ومطلقة لشخصٍ بذاته

قد لا أكون رزقت بزوجة بعد لأقول أنها سكني وأني ألجأ لها وأحكي بكل استفاضة وأريحية لذلك فمساحات الحب بيني وبين الغير تكون في مساحات محددة

نعم بعضها قد يكون ملائم من وجهة نظر البعض لمفهوم الحاجة ، لكن من وجهة نظري ليست حاجة مطلقة بالمرة

يآآآه غلفت الحديث بكلمات كثيرة
لكن يبدو أني لم أستطع صياغتها بشكل مباشر

المهم مبروك للمنتخب المصري الفوز على نيجريا
ودمتِ بود

غير معرف يقول...
أزال المؤلف هذا التعليق.
موناليزا يقول...

أحمد شريف
ــــــــــ
وعليكم السلامورحمة الله وبركاته
أهلا بعودتك أستاذ احمد
ده شئ جميل على فكرة لان من اقسى الشعور ان تحتاج الى شخص ما ولا تجده لاى سبب من الاسباب
فيارب تفضل كده على طول:)
الله يبارك فيك يافندم:)
أشكرك جدا لمتابعتك
ويسعدنا دوام التواصل





**********************************






عبدالله
ــــــ
وعليكم السلام ورحمة الله وبركاته
أهلا بيك استاذ عبدالله
لا شكر على واجب يافندم
ويارب اكون قدرت أفيدكم حقاً
ربنا يهيئلك الخير حيثما كان ثم يرضيكم به
أشكرك جدا لمتابعتك
يسعدنا دوام التواصل

نسيبه يقول...

السلام عليكم ورحمة الله وبركاته
أكتر شخص محتاجه لوجوده في حياتي الزوج الصالح ربنا يجيبه بالسلامه وأنتي؟
شىء أحتاجه الآن هدوم للصيف

موناليزا يقول...

نسيبة
ـــــــ
وعليكم السلام ورحمة الله وبركاته
أهلا اهلا بالقمر
وأنا كمان:)
أشكرك جدا لمشاركتك ولتواجدك المميز
نورتينى غاليتى